កម្ពុជា និងថៃ រួមគ្នាជិះកង់ ដើម្បីមិត្តភាព សាមគ្គីភាព និងកិច្ចសហប្រតិបត្តិការល្អ ដែលមានអ្នកចូលរួមប្រមាណជាង ២៥០០នាក់

ប៉ៃលិន៖ លោក ផាន់ ចាន់ធុល អភិបាលខេត្តប៉ៃលិន និងលោក វីធូរ៉ាត់ ស្រ៊ីណាម អភិបាលខេត្តចាន់បុរី ប្រទេសថៃ នៅថ្ងៃទី១៩ ខែសីហា ឆ្នាំ២០១៨ បានអញ្ជើញបើកការជិះកង់មិត្តភាព កម្ពុជា+ថៃ លើទឹកដី ខេត្តប៉ៃលិន និងខេត្តបាត់ដំបង ដែលមានកីឡាករចូលរួមចំនួនប្រមាណ ២៥០០នាក់ លើចម្ងាយផ្លូវ ១០០គីឡូម៉ែត្រ ដើម្បីមិត្តភាព សាមគ្គីភាព និងកិច្ចសហប្រតិបត្តិការល្អ ជាពិសេសផ្សព្វផ្សាយវិស័យទេសចរណ៍ខេត្ត នៅជាប់ព្រំដែននៃព្រះរាជាណាចក្រកម្ពុជា។

លោក ផាន់ ចាន់ធុល អភិបាលខេត្តប៉ៃលិន បានមានប្រសាសន៍លើកឡើងថា ការជិះកង់មិត្តភាព កម្ពុជា+ថៃ (ប៉ៃលិន បាត់ដំបង និងចាន់បុរី) នាពេលនេះ គឺជាការផ្លាស់ប្តូរបទពិសោធន៍រវាងគ្នាទៅវិញទៅមក ផ្នែកកីឡាជិះកង់ផង និងដើម្បីពង្រឹងពង្រីកកិច្ចទំនាក់ទំនងមិត្តភាព និងកិច្ចសហប្រតិបត្តិការរវាងថ្នាក់ដឹកនាំ មន្ត្រីរាជការ និងប្រជាពលរដ្ឋ ដែលជាអ្នកភូមិផងរបងព្រំដែនជាប់គ្នាផង ជាពិសេសផ្សព្វផ្សាយវិស័យ ទេសចរណ៍ដែលជាសក្តានុពលរបស់ខេត្តនីមួយៗ ព្រមទាំងអនុវត្តន៍ ឱ្យស្របតាមគោលនយោបាយរបស់រាជរដ្ឋាភិបាលនៃប្រទេសទាំង២ សម្រាប់តំបន់ព្រំដែនដោយបង្រួមទំនាស់ ពង្រីកមិត្តភាព សាមគ្គីភាព ទំនាក់ទំនង កិច្ចសហប្រតិបត្តិការនៅបណ្តោយព្រំដែន។

នៅក្នុងឱកាសនោះផងដែរ លោកអភិបាលខេត្ត បានផ្តាំផ្ញើដល់ក្រុម កីឡាករទាំងពីរប្រទេស បន្តការគាំទ្រ និងចូលរួមជិះកង់ជាមិត្តភាព នៅពេលក្រោយៗទៀត ដើម្បីបញ្ជាក់នូវសក្ខីកម្មនៃប្រជាជនជុំវិញ ពិភពលោក គាំទ្រយល់ដឹងច្បាស់ពីស្ថានភាព សន្តិសុខ សណ្តាប់ធ្នាប់ សេ្ថរភាពនយោបាយ និងសេដ្ឋកិច្ចសង្គម ជាពិសេសកីឡាករ-ការិនី ទាំងអស់ ត្រូវមានការប្រុងប្រយ័ត្នខ្ពស់ មានអធ្យាស្រ័យគ្នាទៅវិញទៅមក ដើម្បីជៀសវាងគ្រោះថ្នាក់ជាយថាហេតុ និងមានស្មារតីកីឡា ស្មារតីមិត្តភាព សាមគ្គីភាព សន្តិភាពនិងស្មារតីការពារបរិស្ថានភព ផែនដីស្ថិតនៅក្នុង បេះដូងយើងទាំងអស់ជានិច្ច។

លោក វីធូរ៉ាត់ ស្រ៊ីណាម អភិបាលខេត្តចាន់បុរី ប្រទេសថៃ បានមាន ប្រសាសន៍ឱ្យដឹងថា៖ ដោយមើលឃើញប្រជាជនថៃក៏ដូចជាប្រជាជន ទូទៅចូលចិត្តជិះកង់លំហាត់ប្រាណ ដើម្បីសុខភាពនិងការជិះកង់ជាក្រុមៗគ្រប់ទីកន្លែង ទើបគណៈកម្មការនៃព្រះមហាក្សត្រថៃ បានរៀបចំឱ្យមាន កម្មវិធីប្រកួតប្រណាំងជិះកង់មិត្តភាពនេះឡើង ដោយចង់លើកទឹកចិត្តក្រុម អ្នកជិះកង់ ជាពិសេសគឺដើម្បីសុខភាព មិត្តភាព និងពង្រឹងទំនាក់ទំនង រវាងខេត្តជិតខាងដែលរួមមានខេត្តប៉ៃលិន និងខេត្តបាត់ដំបងនៃប្រទេស កម្ពុជា និងខេត្តចាន់បុរី ប្រទេសថៃ។

បើតាមការបញ្ជាក់របស់គណៈកម្មការការចម្រុះកម្ពុជា+ថៃ បានឱ្យដឹងថា៖ ការជិះកង់មិត្តភាពនេះគឺចាប់ចេញដំណើរពីច្រកទ្វារអន្តរជាតិព្រំខេត្តប៉ៃលិន នៅ៨៖០០នាទីព្រឹក នៅបញ្ចប់ នៅច្រកទ្វារអន្តរជាតិដូង ផ្សារបានឡែម ខេត្តបាត់ដំបង នៅម៉ោង ១២៖០០ ថ្ងៃត្រង់ ដែលមានកីឡាករចូលរួម ចំនួនប្រមាណ ២៥០០នាក់ ក្នុងនោះកីឡាករកម្ពុជា ប្រមាណ ៥០០នាក់ ដោយជិះលើចម្ងាយផ្លូវ ១០០គីឡូម៉ែត្រ៕

អភិបាលខេត្តកំពង់ចាម ត្រៀមរង្វាន់សម្រាប់ផ្ដល់ជូនសិស្សានុសិស្ស ដែលទទួលបាននិទ្ទេសល្អប្រសើរ

កំពង់ចាម៖ នៅថ្ងៃទី២០ ខែសីហា ឆ្នាំ២០១៨ លោក គួច ចំរើន អភិបាលខេត្តកំពង់ចាម បានអញ្ជើញចូលរួមកាត់វិញ្ញាសារប្រលងមធ្យមសិក្សាទុតិយភូមិ ( បាក់ឌុប )នៅមណ្ឌលវិទ្យាល័យ ហ៊ុន សែន បឹងកុក ដែលមានការចូលរួមពីមន្ត្រីជាន់ខ្ពស់របស់ក្រសួងអប់រំ យុវជន និងកីឡា និងខាងមន្ត្រីជាន់ខ្ពស់នៃអង្គភាពប្រឆាំងអំពើពុករលួយ ផងដែរ ។

ក្នុងឱកាសនោះ លោកអភិបាលខេត្ត បានលើកទឹកចិត្តដល់ក្មួយៗសិស្សានុសិស្សទាំងអស់ ត្រូវខិតខំប្រឹងប្រែងឲ្យអស់ពីសមត្ថភាព ធ្វើឲ្យបានរួចរាល់លើគ្រប់វិញ្ញាសារ ដោយត្រូវគោរពឲ្យបានខ្ជាប់ខ្ជួន នូវបទប្បញ្ញត្តិ និងបទបញ្ជាផ្ទៃក្នុងនៃការប្រលង ។ ជាមួយនេះ អភិបាលខេត្ត ក៏បានជូនពរដល់សិស្សានុសិស្សទាំងអស់ឲ្យទទួលបានលទ្ធផលជោគជ័យ និងទទួលបាននិទ្ទេសល្អគ្រប់ៗគ្នាក្នុងសម័យប្រលងឆ្នាំសិក្សា ២០១៧-២០១៨នេះ ហើយរដ្ឋបាលខេត្តនៅតែបន្ត និងត្រៀមរង្វាន់សម្រាប់ផ្ដល់ជូន សិស្សានុសិស្សដែលទទួលបាននិទ្ទេសល្អប្រសើរផងដែរ ។

អាណាព្យាបាលដែលកំពុងរង់ចាំកូនៗ នៅខាងក្រៅបរិវេណមណ្ឌលប្រលង បានសម្តែងអារម្មណ៍រីករាយបំផុត ដែលឃើញកូនៗរបស់ពួកគាត់បានតស៊ូរៀនសូត្រ ហើយបានជម្រុញដល់ការសិក្សាបន្ថែមទៀត ដើម្បីបន្តទៅរៀននៅមហាវិទ្យាល័យ និងដាក់ពាក្យប្រលងចូលបម្រើការក្នុងស្ថាប័នរដ្ឋ ឬឯកជន ក្នុងការរួមចំណែកអភិវឌ្ឍន៍ប្រទេស។

សូមបញ្ជាក់ដែរថា បេក្ខជនសរុបទាំងអស់ក្នុងខេត្តកំពង់ចាម មានចំនួន ៨០០៧នាក់ ក្នុងខេត្តកំពង់ចាមមាន ១៤មណ្ឌល ផ្នែកវិទ្យាសាស្រ្ដ មានចំនួន៩មណ្ឌល ផ្នែកវិទ្យាសាស្ត្រសង្គម ៥មណ្ឌល ហើយមណ្ឌលប្រលង ដែលបានកំណត់មាននៅក្នុងរីរួមខេត្តកំពង់ចាម ស្រុកកំពង់សៀម និងស្រុកជើងព្រៃ ៕

ការប្រឡងមិនអនុញ្ញាតឲ្យបេក្ខជនយកសំណៅឯកសារ សៀវភៅ ទូរស័ព្ទដៃ និងឧបករណ៍អេឡិចត្រូនិចមួយចំនួនទៀត ចូលមណ្ឌលប្រឡងឡើយ

កំពង់ធំ ៖ លោក សុខ លូ អភិបាលខេត្តកំពង់ធំ និងថ្នាក់ដឹកនាំខេត្តជាច្រើនរូប នៅថ្ងៃទី២០ ខែសីហា ឆ្នាំ២០១៨នេះ បានអញ្ជើញចូលរួមជាកិត្តិយសបើកវិញ្ញាសារប្រឡងសញ្ញាបត្រមធ្យមសិក្សាទុតិយភូមិ ចំណេះដឹងទូទៅ និងបំពេញវិជ្ជាចំនួន ១០មណ្ឌល នៅក្រុងស្ទឹងសែន និងស្រុកកំពង់ស្វាយ។

ក្នុងពិធីបើកវិញ្ញាសារនោះដែរ លោក សុខ លូ និងថ្នាក់ដឹកនាំខេត្តជាច្រើនរូបទៀត បានមានប្រសាសន៍ស្រដៀងគ្នាដោយលើកឡើងថា តាមរយៈការធ្វើកំណែទម្រង់ស៊ីជម្រៅរបស់ក្រសួងអប់រំ យុវជន និងកីឡា កន្លងមក ដោយមានការសហការជាមួយអង្គភាពប្រឆាំងអំពើពុករលួយ យើងសង្កេតឃើញថា ការប្រឡងបាក់ឌុប ពីមួយឆ្នាំទៅមួយឆ្នាំ នៅតែរឹតបន្តឹងជាបន្តបន្ទាប់ ហើយឆ្នាំនេះ មានការរឹតបន្តឹងជាងឆ្នាំមុនៗថែមទៀត។

លោក សុខ លូ បន្តថា ក្នុងការប្រឡងមានការត្រួតពិនិត្យសុំណុំឯកសារចាប់ពីក្លោងទ្វារមណ្ឌលប្រឡង រហូតដល់ក្នុងបន្ទប់ប្រឡង ដោយមិនអនុញ្ញាតឲ្យបេក្ខជនយកសំណៅឯកសារ សៀវភៅ ទូរស័ព្ទដៃ និងឧបករណ៍អេឡិចត្រូនិចមួយចំនួនទៀត ចូលមណ្ឌលប្រឡងឡើយ ប្រសិនបើអនុរក្សរកឃើញ បេក្ខជនអាចនឹងបានពិន្ទុសូន្យ គឺធ្លាក់ដោយស្វ័យប្រវត្តិតែម្តង ការរឹតបន្តឹងបែបនេះ ដើម្បីពង្រឹងនូវសមត្ថភាពសិស្សក្នុងការសិក្សារៀនសូត្រ អ្នកចេះ គឺជាប់។

លោក សុខ លូ បានបន្ថែមទៀតថា ការវេចខ្ចប់វិញ្ញាសារ ទាំងការដឹកជញ្ជូន មានលក្ខណៈតឹងរ៉ឹង និងម៉ត់ចត់ ដែលមានការចូលរួម ពីមន្ត្រីក្រសួងអប់រំ និងអង្គភាពប្រឆាំងអំពើពុករលួយ ដើម្បីមិនឱ្យមានការបែកធ្លាយណាមួយនោះឡើយ ធ្វើឲ្យយន្តការនៃការប្រឡងបាក់ឌុប គឺមានការច្បាស់លាស់ ត្រឹមត្រូវ យុត្តិធម៌ តម្លាភាព ជាពិសេសលទ្ធផលអាចទទួលយកបាន គុណភាពនៃការសិក្សានុសិស្សមានការកើនឡើង ភាគរយនៃការប្រឡងជាប់ក៏កើនឡើងជាបន្តបន្ទាប់ ដែលបានបង្ហាញថា ការសិក្សារបស់សិស្ស មានគុណភាពល្អជាងមុន។

ជាមួយគ្នានោះដែរ រដ្ឋបាលខេត្តកំពង់ធំ បានរៀបចំកន្លែងស្នាក់នៅ ដោយឥតគិតថ្លៃជូនសិស្សានុសិស្ស ដែលក្រីក្រខ្វះលទ្ធភាពជួលកន្លែងស្នាក់នៅ ក្នុងរយៈនៃការប្រឡងសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្តទៅរយៈពេល០២ថ្ងៃ នៅថ្ងៃទី២០-២១ ខែសីហា ខាងមុខនេះ ដូច្នេះសូមក្មួយៗសិស្សានុសិស្ស ដែលមកពីបណ្តាក្រុង-ស្រុក ដែលខ្វះខាត សូមធ្វើការទំនាក់ទំនងតាមរយៈក្រុង-ស្រុកសាម៉ី និងរៀបចំកន្លែងផ្ញើកង់ ម៉ូតូ ដោយពុំតម្រូវឲ្យមានការបង់ប្រាក់នោះទេ។ ក្នុងនោះលោកអភិបាលខេត្តកំពង់ធំ បានផ្តាំផ្ញើដល់ក្មួយៗជាសិស្សសាលា ត្រូវស្លៀកសំលៀកបំពាក់ឯកសណ្ឋានជាសិស្ស នៅពេលសិក្សា ក៏ដូចជានៅពេលប្រឡងបាក់ឌុបជាដើម។ បន្ទាប់ពីក្មួយៗ ប្រឡងបាក់ឌុបចប់ ត្រូវមានគោលដៅច្បាស់លាស់ និងមានផែនការមុតស្រួច ដើម្បីសម្រេចបានគោលបំណងរបស់ខ្លួន។

យោងតាមរបាយការណ៍ លោក ជូ វុនធី ប្រធានមន្ទីរអប់រំ យុវជន និងកីឡា ខេត្តកំពង់ធំ បានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ ចំណេះដឹងទូទៅ និងបំពេញវិជ្ជា មានចំនួន ១០មណ្ឌល ដែលចែកចេញជាពីរផ្នែក គឺមណ្ឌលប្រឡងថ្នាក់វិទ្យាសាស្ត្រមានចំនួន៤មណ្ឌល និងថ្នាក់វិទ្យាសាស្ត្រសង្គម មានចំនួន៦មណ្ឌល មានសិស្សប្រឡងសរុបចំនួន ៤,៤៩៨នាក់ ថ្នាក់វិទ្យាសាស្ត្រចំនួន ១,៨៧២នាក់ និងថ្នាក់វិទ្យាសាស្ត្រសង្គមចំនួន ២,៦២៦នាក់ បើធៀបទៅនឹងឆ្នាំ២០១៧ បេក្ខជន បេក្ខនារី កើនឡើង ២៦០នាក់ ស្នើរនឹង ៦,១៣ភាគរយ។ ទន្ទឹមនឹងនោះ ក៏មានអ្នកចូលរួមសង្កេតការណ៍ ត្រួតពិនិត្យនៅពេលប្រឡង មានចំនួន ១៩៨នាក់ ដែលមកពី៥ស្ថាប័ន និងបុគ្គលឯកជនផងដែរ៕

រដ្ឋមន្រ្តីក្រសួងមុខងារសាធារណៈ បន្តផ្តល់អំណោយជូនប្រជាពលរដ្ឋរងគ្រោះដោយសារទឹកជំនន់

ប្រជាពលរដ្ឋចំនួន ១០០ គ្រួសារទៀត បានទទួលទទួលអំណោយពីលោករដ្ឋមន្រ្តីក្រសួងមុខងារសាធារណៈ ពេជ្រ ប៊ុនធិន ជាប្រធានក្រុមការងារថ្នាក់កណ្តាលចុះជួយខេត្តក្រចេះ លោកយក់ ប៊ុណ្ណា ប្រធានក្រុមការងារថ្នាក់កណ្តាលចុះជួយស្រុកចិត្របុរី អមដំណើរលោក ហឿ ស៊ីយ៉ែម អភិបាលរងខេត្តក្រចេះ រួមជាមួយ លោក លោកស្រី ជាក្រុមការងារ និងសប្បុរសជនផងដែរ កាលពីចុងសប្តាហ៍កន្លងទៅនេះ ។

ក្នុងពីធីនេះ លោករដ្ឋមន្រ្តីក្រសួងមុខងារសាធារណៈបានលេីកឡេីងថា បញ្ហាទឹកជំនន់គឺបានចោទទៅលើបញ្ហាជីវភាពប្រចាំថ្ងៃរបស់ប្រជាពលរដ្ឋ និងសុខភាពផងដែរ ដោយយល់ឃើញពីទុក្ខលំបាកទាំងនេះ ទើបរូបលោក រួមក្រុមការងារ និងសប្បុរសជន បាននាំយកនូវអំណោយមកចែកជូននាពេលនេះ ដើម្បីឆ្លើយតបទៅនឹងបញ្ហាប្រឈមរបស់ពូកគាត់ ។ ទោះបីជាអំណោយដែលផ្តល់ជូនពេលេនេះ វាមិនគ្រប់គ្រាន់ក្តី តែអាចជួយសម្រួល និងដោះស្រាយនូវភាពខ្វះខាត ទីទាល់បានមួយរយះពេលផងដែរ ដែលនេះបញ្ជាក់ឲ្យឃើញពីការយកចិត្តទុកដាក់របស់រាជរដ្ឋាភិបាល ចំពោះទុក្ខលំបាក ក្តីកង្វល់របស់បងប្អូនប្រជាពលរដ្ឋដែលរងគ្រោះដោយគ្រោះមហន្តរាយផ្សេង ជាពិសេសគ្រោះទឹកជំនន់តែម្តង ដែលត្រូវបានកាត់ផ្តល់នូវជីវភាពប្រចាំថ្ងៃ សុខភាព ខាតបងនូវទ្រព្យសម្បត្តិ និងផលដំណាំនានា ហើយសម្រាប់គ្រោះទឹកជំនន់នេះ មិនមែនតែប្រទេសកម្ពុជាយើងទេជាអ្នកទទួលរងគ្រោះ គឺនៅមានប្រទែសដទៃទៀតក៏ទទួលរងប៉ះពាល់ដូចគ្នាដែរ ។

នៅក្នុងឱកាសនោះ លោកអគ្គលេខាធិការរង បានសំដែងនូវទឹកចិត្តអាណិតអាសូ ចំពោះបងប្អូនប្រជាពលរដ្ឋរងគ្រោះ និងបានពាំនាំផ្តាំផ្ញើសួរសុខទុក្ខពីលោកស្រី ប៊ុន រ៉ានី ហ៊ុនសែន ដែលសម្តេចតែងតែមានការព្រួយបារម្មណ៍ពីសុខទុក្ខប្រជាពលរដ្ឋគ្រប់ច្រកល្ហក ដោយជម្រុញ “ ទីណាមានទុក្ខលំបាក ទីនោះមានកាកបាទក្រហមកម្ពុជា ” និងបានផ្ដាំផ្ញើដល់បងប្អូនប្រជាពលរដ្ឋទាំងអស់ឱ្យថែទាំសុខភាពអោយបានល្អ ត្រូវរស់នៅស្អាត ពិសាទឹកឆ្អិន ត្រូវដេកក្នុងមុងជានិច្ច និងសូមជួយមើលថែទាំចាស់ជរានិងកូនតូចៗអោយបានល្អ ជៀសវាងគ្រោះថ្នាក់ជាយថាហេតុណាមួយកើតឡើងក្នុងពេលដែលមានគ្រោះទឹកជំនន់នេះ ជាពិសេសចំពោះសត្វពស់ចឹកឬខាំ ហើយបើមានសមាជិកគ្រួសារបញ្ហារផ្នែសុខភាព ត្រូវឆាប់នាំអ្នកជំងឺទៅមណ្ឌលសុខភាព ។

គួរបញ្ជាក់ដែរថា អំណោយដែលចែកជូន មានចំនួន២លើក ទី១នៅថ្ងៃទី១០ ខែសីហា ឆ្នាំ២០១៨ និងទី២ថ្ងៃទី១៩ ខែសីហាកន្លងនេះ ដោយក្នុង១គ្រួសារទទួលបាន ៖ អង្ករ២០គ.ក្រ មី១កេស ត្រីខ៥កំប៉ុង ទឹកស៊ីអ៊ីវ២ដប ទឹកត្រី១ដប ទឹកសុទ្ធ១យួរ ក្រមា១និងអាវយឺត១ផងដែរ៕