Friday, December 30, 2016

អង្គភាពកម្ចាត់មីនខេត្តប៉ៃលិនមានផែនការបោសសម្អាតមីននិងគ្រាប់មិនទាន់ ផ្ទុះចំនួន ៤៩ចម្ការ នៅឆ្នាំ២០១៧

(ប៉ៃលិន)៖ អង្គភាពកំចាត់មីនខេត្តប៉ៃលិន ហៅកាត់ថា ម៉ាពូ​ Mapou បានបើកសិក្ខាសាលាអនុម័តដីចំការមីន សំរាប់បញ្ចូលក្នុង ផែនការបោសសំអាត ឆ្នាំ២០១៧ ចំនួន៤៩ចំការ លើទំហំដី ២.៨៤៨ហិកតា។
កិច្ចប្រជុំដែលបានធ្វើឡើង នៅរសៀលថ្ងៃទី២៨ ខែធ្នូ ឆ្នាំ២០១៦ មានការចូល​រួមពីតំណាង ប្រតិបត្តិករដោះមីនក្នុងខេត្តប៉ៃលិន​ មាន​អង្គការ CMAC , អង្គការ MAG, អង្គការMPMEC, និងអង្គការ Halo Trust។
លោក ឈិម សម្បត្តិ ប្រធានអង្គភាព Mapou ខេត្តប៉ៃលិនបានឱ្យដឹងថា «ក្នុងឆ្នាំ២០១៦ យើងបាន​បោសសំអាតមីន និងគ្រាប់មិនទាន់ផ្ទុះបានចំនួន៥៤ចំការ ស្មើនឹងផ្ទៃដីចំនួន៣.២៥៩ ម៉ែត្រការ៉េ, បោសសំអាត​បានគ្រាប់ប្រភេទ AMPបានចំនួន ១១៣៥ គ្រាប់ , ATMបានចំនួន ១៧គ្រាប់, និងប្រភេទUXO បានចំនួន ៦៨២គ្រាប់, ដោយសំរេចបាន៥៧% បើប្រៀបនឹង ផែនការប្រចាំឆ្នាំ»
លោកបានបន្តថា នៅក្នុងឆ្នាំ២០១៦នេះ មានជនរងគ្រោះដោយសារមីន និងគ្រាប់មិនទាន់ផ្ទុះចំនួន៦នាក់ ស្មើនឹង ៥ករណី ក្នុងនោះនៅក្នុងសង្កាត់​បយ៉ាខាចំនួន២នាក់  ឃុំសាលាក្រៅចំនួន១នាក់  ឃុំស្ទឹងត្រង់២នាក់ និងឃុំស្ទឹងកាច់១នាក់។
លោកបានបន្ត​ទៀតថា សំរាប់ឆ្នាំ២០១៧នេះ យើងមានប្រតិប័ត្តករចំនួន៣អង្គភាព គឺ CMAC ចំនួន៤ចំការមីន មានទំហំដី​៦៨៧​ហិចតា , អង្គការMAG ចំនួន២០ចំការ មានទំហំដី ១.២៣៣ហិចតា និងអង្គការ Halo Trust ចំនួន​២៥ចំការ មានទំហំដី ៩២៧ហិកតា សរុបក្នុងផែនការបោសសំអាតមីនក្នុងឆ្នាំ​២០១៧នេះ យើងមាន ៤៩ចំការ មានទំហំដី ២.៨៤៨ហិកតា។
លោកកើត សុធា អភិបាលខេត្តប៉ៃលិន និងជាប្រធានគណៈកម្មាធិការសកម្មភាព​មីន​ខេត្តប៉ៃលិន​បានលើកឡើងថា៖ មកដល់ពេលបច្ចុប្បន្ននេះយើងបានដោះមីន រំដោះដីកសិកម្មជូន​ប្រជា​ពលរដ្ឋ ក៍ដូចជាដោះមីនសំរាប់កសារហេដ្ឋារចនាសម្ព័ន្ធ ធ្វើអោយអត្រាគ្រោះថ្នាក់ដោយសារមីន និងគ្រាប់មិន​ទាន់ផ្ទុះមានការថយចុះយ៉ាងច្រើន សំរាប់ខេត្តប៉ៃលិនយើង ហើយស្នាដៃ ដោះមីនរបស់ខេត្ត​ប៉ៃលិនយើងមាន​ការល្អប្រសើ ទទួលបានការកោតសរសើពីថ្នាក់ជាតិនិងបានយក ខេត្តប៉ៃលិនជាគំរូ បង្ហាញដល់ខេត្ត​ផ្សេងៗ​ទៀតផង។

លោកបានបន្តថា «នៅក្នុងឆ្នាំ២០១៧នេះ យើងត្រូវខិតខំជំរុញការដោះ​មីននេះ​បន្ថែមទៀត ធ្វើយ៉ាងណាប្រឹងប្រែង អោយអស់ពីលទ្ធភាព សំរេចបានតាមផែនការកំណត់ ដោយជំរុញសកម្ម​ភាព​ចុះពិនិត្យជាក់ស្តែងដល់ចំការមីន ដើម្បីអោយបានដឹងពីការលំបាក ការងាយស្រួលរបស់ប្រតិប័ត្តករក្នុង​ការដោះមីននៅតំបន់នោះ ហើយត្រូវមានយន្តការ ផ្សព្វផ្សាយអោយបានខ្លាំងខ្លាថែម​ទៀតដល់ប្រជាពលរដ្ឋ​នៅមូលដ្ឋានអោយបានយល់ពីបញ្ហាគ្រោះថ្នាក់ដោយសារគ្រប់មីន និងគ្រាប់មិនទាន់ផ្ទុះ ដើម្បីត្រៀមលក្ខណៈ​សម្បត្តិអោយបានគ្រប់គ្រាន់សំរាប់ទទួលគណប្រតិភូថ្នាក់ជាតិ មកទស្សនកិច្ច សិក្សាបញ្ហាមីននៅក្នុង​ខេត្ត​ប៉ៃលិន​យើង និងត្រូវជំរុញអោយមានការសហការ ចូលរួមអោយបានច្រើនពីប្រជាពលរដ្ឋ មូលដ្ឋាន ក្នុងការងារ​ដោះមីន និងការប្រគល់-ទទួលដីចំការមីន ពីប្រតិបត្តិករដោះមីនរបស់យើង»



លោកនាយករដ្ឋមន្រ្តី ហ៊ុន សែន និងមន្រ្តីជាន់ខ្ពស់ ដង្ហែព្រះករុណា ព្រះមហាក្សត្រ និងសម្តេចម៉ែ យាងតាមរថភ្លើងទៅកាន់ខេត្តព្រះសីហនុ

(ភ្នំពេញ)៖ នៅថ្ងៃទី៣០ ខែធ្នូ ឆ្នាំ២០១៦នេះ លោកនាយករដ្ឋមន្រ្តី ហ៊ុន សែន និងភរិយា បានសម្តែងនូវសេចក្តីសប្បាយរីករាយ និងមានកិត្តិយសដ៏ឧត្តុង្គឧត្តមបំផុត ដែលបានដង្ហែ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងសម្តេចម៉ែ មុនិនាថ សីហនុ យាងតាមរថភ្លើងពីរាជធានីភ្នំពេញឆ្ពោះទៅកាន់ខេត្តព្រះសីហនុ ដើម្បីឆ្លងឆ្នាំសកល ២០១៧។ ទន្ទឹមនឹងនេះដែរ គឺដើម្បីព្រះអង្គបានទតទីតាំងភូមិសាស្ត្រ និងការវិវត្តន៍ថ្មីៗនៃផ្លូវរថភ្លើងរបស់ប្រទេសកម្ពុជានាពេលបច្ចុប្បន្ន។
នៅក្នុងទំព័រហ្វេសប៊ុករបស់លោកនាយករដ្ឋមន្រ្តី បានបញ្ជាក់ថា ពិតណាស់ ផ្លូវរថភ្លើងពីភ្នំពេញ ទៅកាន់ខេត្តព្រះសីហនុ គឺជាស្នាព្រះហស្ថរបស់អតីតព្រះបិតាជាតិខ្មែរ ព្រះបរមរតនកោដ្ឋ សម្តេចព្រះ នរោត្តម សីហនុ ដែលព្រះអង្គបានកសាងឡើងនៅសម័យសង្គមរាស្ត្រនិយម។ ដោយសារសង្រ្គាម ផ្លូវរថភ្លើងកម្ពុជា ត្រូវបានបំផ្លាញខូចខាតស្ទើរទាំងស្រុង និងទុកចោលជាច្រើនឆ្នាំ។ ក្រោយប្រទេសមានសន្តិភាព គឺផ្លូវរថភ្លើងយើងត្រូវបានជួសជុលរៀបចំឡើងវិញ ដើម្បីបម្រើដល់ការធ្វើដំណើររបស់ប្រជាពលរដ្ឋ និងសេវាដឹកជញ្ជូនទំនិញគ្រប់យ៉ាង។
លោក ហ៊ុន សែន និងភរិយា ក៏សូមជូនពរជនរួមជាតិគ្រប់ស្រទាប់ វណ្ណៈទាំងក្នុង និងក្រៅប្រទេស កងកម្លាំងប្រដាប់អាវុធគ្រប់ប្រភេទ និងកងកម្លាំងដែលកំពុងបំពេញភារកិច្ចរក្សាសន្តិភាពនៅប្រទេសនានាក្រោមឆ័ត្រអង្គការសហប្រជាជាតិផង សូមបានប្រកបដោយសេចក្តីសុខ សេចក្តីចំរើន និងសំណាងល្អគ្រប់ៗគ្នាក្នុងឱកាសចូលឆ្នាំថ្មីសកល ២០១៧ ខាងមុខនេះ។
គួរបញ្ជាក់ថា នៅវេលាម៉ោង៧៖១៨នាទីព្រឹកថ្ងៃទី៣០ ខែធ្នូ ឆ្នាំ២០១៦នេះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងសម្តេចម៉ែ មុនិនាថ សីហនុ បានយាងមកដល់ស្ថានីយ៍រថភ្លើង ដើម្បីយាងតាមរថភ្លើងពីភ្នំពេញ ឆ្ពោះទៅកាន់ខេត្តព្រះសីហនុ ចាប់ពីថ្ងៃទី៣០ ខែធ្នូ ឆ្នាំ២០១៦ ឆ្លងចូលថ្ងៃទី០១ ខែមករា ឆ្នាំ២០១៧។ ការយាងតាមរថភ្លើងរបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រកម្ពុជា និងសម្តេចម៉ែ មុនិនាថ សីហនុ ជាលើកដំបូងរបស់ព្រះអង្គទាំងទ្វេ អមដំណើរដោយលោកនាយករដ្ឋមន្រ្តីនៃកម្ពុជា និងភរិយា លោកឧបនាយករដ្ឋមន្រ្តី ស ខេង, លោកឧបនាយករដ្ឋមន្រ្តី ទៀ បាញ់ ព្រមទាំងមន្រ្តីជាន់ខ្ពស់របស់កម្ពុជាមួយចំនួន នឹងដង្ហែព្រះមហាក្សត្រ និងសម្តេចម៉ែ យាងទៅកាន់ខេត្តព្រះសីហនុ។ កម្លាំងប្រដាប់អាវុធគ្រប់ប្រភេទរាប់ពាន់នាក់ ត្រូវបានដាក់ពង្រាយរួចជាស្រេច ដើម្បីការពារព្រះរាជដំណើររបស់ព្រះមហាក្សត្រ ដែលអមដំណើរដោយ ប្រមុខរាជរដ្ឋាភិបាលកម្ពុជា ចាប់តាំងពីស្ថានីយរថភ្លើងរាជធានីភ្នំពេញ, ស្ថានីយ៍រថភ្លើងតាកែវ, ស្ថានីយ៍រថភ្លើងកំពត រហូតដល់ខេត្តព្រះសីហនុ។
ព្រះទីនាំងរថភ្លើងរបស់ព្រះអង្គទាំងទ្វេ នឹងឈប់ចតនៅស្ថានីយ៍ចំនួន៣កន្លែង, ទី១៖ស្ថានីយ៍រថភ្លើងនៅខេត្តតាកែវ ទី២៖ ស្ថានីយ៍រថភ្លើងនៅខេត្តកំពត និងទី៣៖ ស្ថានីយ៍រថភ្លើងខេត្តព្រះសីហនុ។ កម្លាំងប្រដាប់អាវុធគ្រប់ប្រភេទរាប់ពាន់នាក់ ត្រូវបានដាក់ពង្រាយរួចជាស្រេច ដើម្បីការពារព្រះរាជដំណើររបស់ព្រះមហាក្សត្រ ដែលអមដំណើរដោយ ប្រមុខរាជរដ្ឋាភិបាលកម្ពុជា ចាប់តាំងពីស្ថានីយរថភ្លើងរាជធានីភ្នំពេញ, ស្ថានីយ៍រថភ្លើងតាកែវ, ស្ថានីយ៍រថភ្លើងកំពត រហូតដល់ខេត្តព្រះសីហនុផងដែរ៕





អយ្យការអមសាលាដំបូងខេត្តបន្ទាយមានជ័យ សម្រេចបើកការស៊ើបសួរទៅលើឈ្មោះ ឌិន ពុទ្ធី ពីបទ ហិង្សាដោយចេតនាមានស្ថានទម្ងន់ទោស

(ភ្នំពេញ)៖ កាលពីថ្ងៃទី២៩ ខែធ្នូ ឆ្នាំ២០១៦កន្លងទៅនេះ ក្រសួងមហាផ្ទៃ បានចេញសេចក្ដីប្រកាសព័ត៌មាន ដោយបានបញ្ជាក់ថាអយ្យការអមសាលាដំបូងខេត្តបន្ទាយមានជ័យ សម្រេចបើកការស៊ើបសួរទៅលើឈ្មោះ ឌិន ពុទ្ធី ពីបទ ហិង្សាដោយចេតនាមានស្ថានទម្ងន់ទោស។
សេចក្តីប្រកាសព័ត៌មាន ពាក់ព័ន្ធនឹងព្រឹត្តិការណ៍គ្រោះថ្នាក់ចរាចរណ៍ដែលបានកើតឡើងរវាងលោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ជាមួយលោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាលច្រកទ្វារព្រំដែន អន្តរជាតិប៉ោយប៉ែត ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី២២ ខែធ្នូ ឆ្នាំ២០១៦។
ខាងក្រោមនេះជាសេចក្តីប្រកាសព័ត៌មានរបស់ក្រសួងមហាផ្ទៃ៖


ក្រសួងសុខាភិបាល ណែនាំឱ្យប្រជាពលរដ្ឋមានការប្រុងប្រយ័ត្នខ្ពស់ ចំពោះអាកាសធាតុចុះត្រជាក់

(ភ្នំពេញ)៖ ក្រសួងសុខាភិបាល បានចេញសេចក្តីណែនាំជូនសាធារណៈជន ទូទាំងប្រទេស ជាពិសេសប្រជាពលរដ្ឋ ដែលរស់នៅក្នុងតំបន់ ដែលមានអាកាសធាតុចុះត្រជាក់ខ្លាំង ឱ្យមានការប្រុងប្រយ័ត្នខ្ពស់ និងចេះថែរក្សាសុខភាពផ្ទាល់ខ្លួន និងក្រុមគ្រួសារឱ្យបានល្អ ដើម្បីជៀសវាងជំងឺដង្កាត់ ដែលអាចកើតមានជាយថាហេតុ បណ្តាលមកពីអាកាសធាតុចុះត្រជាក់នេះ។
យោងតាមសេចក្តីណែនាំរបស់ក្រសួងសុខាភិបាល បានបញ្ជាក់ឱ្យដឹងថា ក្នុងចំណោមជំងឺតាមរដូវកាល ដែលជួបប្រទះញឹកញាប់ ក្នុងអំឡុងពេលអាកាសធាតុចុះត្រជាក់ គឺនឹងកើតមាននៅចន្លោះពីខែធ្នូ ដល់ខែមករានៃឆ្នាំនេះ។ ជំងឺទាំងនោះរួមមាន ជំងឺផ្លូវដង្ហើម ដែលមិនត្រូវនឹងអាកាសធាតុ ឬជាប្រភេទអាល់លែកហ្ស៊ី និងជំងឺផ្លូវដង្ហើមបណ្តាលមកពីវីរុស និងមេរោគស្រ្តិបតូកូក ដែលបង្កឱ្យមានរោគសញ្ញា ដូចជា គ្រុនផ្តាសាយ ហៀរសំបោរ រលាកបំពង់ក ក្អក និងរលាកពោះរៀន ដោយពពួកវីរុសជាដើម។
សូមអានសេចក្តីណែនាំរបស់ក្រសួងសុខាភិបាលខាងក្រោម៖



អនុក្រឹត្យ ស្តីពីការ​ដំឡើងប្រាក់​ក​ម្រៃប្រចាំ​ខែ ជូនមន្ត្រី​ជាប់​កិច្ច​សន្យា


សូមអានខ្លឹមសារអនុក្រឹត្យរបស់រាជរដ្ឋាភិបាល ទាំងស្រុង៖



Thursday, December 29, 2016

យុវជន គង់ រ៉ៃយ៉ា ដែលអំពាវនាវធ្វើបដិវត្តពណ៌ ត្រូវបានតុលាការកំពូល កាត់ទោស ឱ្យជាប់ពន្ធាគារ១ឆ្នាំកន្លះដដែល

នៅព្រឹកថ្ងៃទី២៩ ខែធ្នូ ឆ្នាំ២០១៦នេះ លោក សាលី ធារ៉ា ប្រធានក្រុមប្រឹក្សាជំនុំជម្រះតុលាការកំពូល បានប្រកាសសាលដីកាតម្កល់ការសម្រេចរបស់សាលាឧទ្ធរណ៍ ទុកជាបានការដដែល ពោលគឺផ្តន្ទាទោសយុវជន គង់ រ៉ៃយ៉ា ដាក់ពន្ធនាគារ១ឆ្នាំ៦ខែ ករណីប្រកាសធ្វើបដិវត្តន៍ពណ៌តាមបណ្ដាញសង្គមហ្វេសប៊ុក។
យុវជន គង់ រ៉ៃយ៉ា អាយុ២៥ឆ្នាំ ជាអតីតនិស្សិតនៅសាកលវិទ្យាល័យខេមរៈ កាលពីថ្ងៃទី១៥ ខែមីនា ឆ្នាំ២០១៦ ត្រូវបានសាលាដំបូងរាជធានីភ្នំពេញ កាត់ទោសឱ្យជាប់ពន្ធនាគារ១៨ខែ ក្រោមការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៤ និង៤៩៥ នៃក្រមព្រហ្មទណ្ឌ។ បន្ទាប់ពីកាត់ទោសរួចមក រូបគេបានប្តឹងទៅសាលាឧទ្ធរណ៍ ប៉ុន្តែត្រូវតុលាការជាន់ខ្ពស់ សម្រេចតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការណ៍ដដែល។

គួររំលឹកថា កាលពីខែសីហា ឆ្នាំ២០១៥ យុវជន គង់ រ៉ៃយ៉ា អាយុ២៦ឆ្នាំ មានរហស្សនាមនៅក្នុងហ្វេសប៊ុក Soriya Koko បានសរសេរលើបណ្ដាញទំនាក់ទំនងសង្គមហ្វេសប៊ុកថា «តើមានអ្នកណាហ៊ានធ្វើបដិវត្តពណ៌ជាមួយខ្ញុំទេ? ថ្ងៃណាមួយនៅពេលខាងមុខនេះ ខ្ញុំនឹងធ្វើបដិវត្តពណ៌ដើម្បីផ្លាស់ប្តូររបបមួយនេះចេញពីសង្គមខ្មែរ ទោះបីជាត្រូវជាប់គុក ឬស្លាប់ ក៏ដោយ ក៏ខ្ញុំត្រូវតែធ្វើដែរ»។ ក្រោយការប្រកាសនេះ សមត្ថកិច្ចអគ្គស្នងការនគរបាលជាតិ បានឃាត់ខ្លួនយុវជនរូបនេះ ដោយចាត់ទុក ការប្រកាសនេះ ធ្វើឱ្យមានភាពអសន្តិសុខក្នុងសង្គម៕

អាជ្ញាធរជាតិអប្សរាប្រារព្ធពិធីសម្អាតបរិស្ថានអង្គរ នៅវិទ្យាល័យហ៊ុនសែនបាគង

ដើម្បីដាស់ស្មារតីសិស្សានុសិស្ស និងប្រជាពលរដ្ឋទាំងអស់ឲ្យចូលរួមថែរក្សាបរិស្ថាននៅក្នុងឧទ្យានអង្គរ ឲ្យបានស្អាតជាប្រចាំនោះ នៅព្រឹកថ្ងៃទី២៨ ខែធ្នូ ឆ្នាំ២០១៦ អាជ្ញាធរជាតិអប្សរាបានដឹកនាំសិស្សានុសិស្សប្រមាណជាង២០០នាក់មកពីអនុវិទ្យាល័យហ៊ុនសែនបាគង ចុះសម្អាតបរិស្ថានតាមដងផ្លូវពីវិទ្យាល័យរហូតដល់ផ្លូវចូលទៅប្រាសាទបាគង។ កម្មវិធីនេះរៀបចំឡើងក្រោមអធិបតីភាពលោក ភ័ន ផល្លា ប្រធាននាយកដ្ឋានរដ្ឋបាល បុគ្គលិក និងសម្ភារៈ តំណាងអគ្គនាយកអាជ្ញាធរជាតិអប្សរា និងមានការចូលរួមពីថ្នាក់ដឹកនាំ មន្ត្រីបុគ្គលិកនៃអាជ្ញាធរជាតិអប្សរា លោកនាយកសាលា លោកគ្រូ អ្នកគ្រូជាច្រើនរូបទៀត។
លោក ភ័ន ផល្លា បញ្ជាក់ថា កម្មវិធីសម្អាតនេះ ត្រូវបានរៀបចំឡើងជាសារដាស់ស្មារតីឲ្យប្រជាពលរដ្ឋទូទៅយកចិត្តទុកដាក់លើការងារថែរក្សាបរិស្ថាន ជាពិសេស គឺការទុកដាក់សំរាមឲ្យបានត្រឹមត្រូវ ដើម្បីភាពស្រស់ស្អាតនៃអង្គរឲ្យសមនឹងកិត្តិនាមរបស់អង្គរ ដែលជាសម្បត្តិបេតិកភណ្ឌពិភពលោក។ “អង្គរជាមរតកដ៏មានតម្លៃមិនអាចកាត់ថ្លៃបាន ដូច្នេះ យើងត្រូវតែរួមគ្នាដើម្បីឲ្យបរិស្ថានជុំវិញអង្គរស្អាត ទើបសមនឹងតម្លៃអង្គរ។ ការសម្អាតមួយពេលនេះ មិនគ្រប់គ្រាន់ទេ តែវាជាសារមួយដែលប្រាប់យើងគ្រប់គ្នាថា ម្នាក់ៗត្រូវតែចូលរួមទើបបរិស្ថានអាចស្អាតបាន”។
នាយកវិទ្យាល័យហ៊ុនសែនបាគង លោកគ្រូ ស៊ិន សំណាង បានសម្តែងនូវមោទនភាពដែលសាលារបស់លោកត្រូវបានអាជ្ញាធរជាតិអប្សរាជ្រើសរើសជាគោលដៅដាស់តឿនស្មារតីថែរក្សាបរិស្ថាន។ លោកបញ្ជាក់ថា រូបលោកក៏ដូចជាលោកគ្រូអ្នកគ្រូនិងថ្នាក់ដឹកនាំទាំងអស់គាំទ្រចំពោះសកម្មភាពនេះ ដោយហេតុថា វាជាការជំរុញឲ្យសិស្សានុសិស្សយកចិត្តទុកដាក់បន្ថែមទៀតលើការសម្អាតបរិស្ថាន។ លោកគ្រូបន្ថែមថា “ដោយសារខ្ញុំស្រឡាញ់បរិស្ថាន ទើបខ្ញុំជំរុញការងារដាំដុះកូនឈើក្នុងសាលាច្រើន រៀបចំសួន និងណែនាំសិស្ស ក៏ដូចជាអ្នកលក់ក្នុងសាលាឲ្យយកចិត្តទុកដាក់ខ្ពស់លើការទុកដាក់សំរាម។ ធុងសំរាមក្នុងសាលាខ្ញុំបានកាត់បន្ថយតិចទៅៗ ដោយសារសំរាមកាន់តែលែងមាន។ ខ្ញុំនឹងព្យាយាមកាត់បន្ថយឲ្យបានកាន់តែតិចជាងនេះ”។
ប្អូនស្រី ហៅ លីហឿន រៀនថ្នាក់ទី១១H បានសម្តែងនូវអារម្មណ៍រីករាយដែលបានចូលរួមក្នុងសកម្មភាពរើសសំរាមនេះ។ “ខ្ញុំគិតថាកម្មវិធីនេះល្អណាស់ ខ្ញុំចង់ឲ្យបងប្អូនយើងទាំងអស់ចូលរួមសម្អាតសំរាមទាំងតាមទីធ្លាសាធារណៈ ទាំងតាមផ្ទះសម្បែងរៀងៗខ្លួន”។
សូមបញ្ជាក់ថា កម្មវិធីសម្អាតបរិស្ថានក្នុងតំបន់អង្គរ គឺជាកម្មវិធីដែលអាជ្ញាធរជាតិអប្សរាតែងប្រារព្ធឡើងជារៀងរាល់ឆ្នាំ ដើម្បីក្រើនរំឭកប្រជាពលរដ្ឋឲ្យចូលរួមថែរក្សាបរិស្ថានជុំវិញអង្គរឲ្យបានស្អាតជាប្រចាំ។ ដោយឡែកក្នុងឆ្នាំ២០១៦នេះ ជាមួយគ្នានឹងកម្មវិធីសម្អាតបរិស្ថាន អាជ្ញាធរជាតិអប្សរាក៏បានចែកកង់ចំនួន៩គ្រឿង ជូនសិស្សក្រីក្រ ដើម្បីរួមចំណែកកាត់បន្ថយភាពក្រីក្រជាមួយរាជរដ្ឋាភិបាល ក៏ដូចជាចូលរួមលើកកម្លាំងចិត្តឲ្យសិស្សក្រីក្របានបន្តការសិក្សាបានខ្ពង់ខ្ពស់ផងដែរ៕



ព្រះមហាក្សត្រត្រាស់បង្គាប់តែងតាំង លោក ឡុង វិសាលោ ជាឯកអគ្គរាជទូតកម្ពុជា ប្រចាំប្រទេសថៃ

លោក ឡុង វិសាលោ រដ្ឋលេខាក្រសួងការបរទេស និងសហប្រតិបត្តិការអន្តរជាតិ ត្រូវបានព្រះមហាក្សត្រ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ត្រាស់បង្គាប់តែងតាំងជាឯកអគ្គរាជទូតវិសាមញ្ញ និងពេញសមត្ថភាពប្រចាំនៅប្រទេសថៃ។
ព្រះរាជក្រឹត្យតែងតាំង លោក ឡុង វិសាលោ ត្រូវបានព្រះមហាក្សត្រ ឡាយព្រះហស្ថលេខាកាលពីថ្ងៃទី២៣ ខែធ្នូ ឆ្នាំ២០១៦៕
ខាងក្រោមនេះ គឺជាព្រះរាជក្រឹត្យ របស់ព្រះមហាក្សត្រ៖

លោកនាយករដ្ឋមន្ត្រី ហ៊ុន សែន ផ្ញើសារ​រំលែកទុក្ខ ចំពោះការចូលទិវង្គតរបស់ សម្តច ស៊ីសុវត្ថិ ជីវ័ន្ត មុនីរ័ក្ស

(ភ្នំពេញ)៖   នៅល្ងាចថ្ងៃទី២៨ ខែធ្នូ ឆ្នាំ២០១៦ លោកនាយករដ្ឋមន្ត្រី ហ៊ុន សែន បានផ្ញើសារជូនអ្នកម្នាង ស៊ីសុវត្ថិ កន្ធីរ៉េត ចំពោះការចូលទិវង្គត របស់ស្វាមីអ្នកម្នាង គឺសម្តេច ស៊ីសុវត្ថិ ជីវ័ន្ត មុនីរ័ក្ស ក្នុងជន្មាយុ៨០ព្រះវស្សា ដោយព្រះរោគាពាធ នៅព្រឹកថ្ងៃទី២៨ ខែធ្នូ ឆ្នាំ២០១៦។


(ទស្សនាវីដេអូ)៖ លោក ស្រី ចំរើន ចេញមុខទាត់ចោលព័ត៌មានបំផ្លើសរបស់វិទ្យុអាស៊ីសេរីដែលថាមានការប៉ុនប៉ងធ្វើឃាតរូបគាត់ និងអំពីការបែកបាក់ជាមួយកញ្ញា ធី សុវណ្ណថា

(ទស្សនាវីដេអូ)៖ ប្រសាសន៍បណ្ឌិត សុខ ទូច ថ្លែងអំពីមហន្តរាយដែលកើតមានដោយសារសង្គ្រាម

Wednesday, December 28, 2016

លិខិតមិត្តអ្នកអាន៖ អនាគតនយោបាយរបស់គណបក្សសង្គ្រោះជាតិ

មួយរយៈពេលចុងក្រោយនេះយើងសង្កេតឃើញថាផ្ទៃក្នុងគណបក្សសង្គ្រោះជាតិ កំពុងតែជួបវិបត្តិធ្ងន់ធ្ងរដែលអាចឈានដល់ការហែកបក្សនេះជាពីរក៏អាចថាបាន (បែកបាក់) នៅពេលខាង មុខឬអាចនិយាយមួយបែបទៀតថា គូស្នេហ៍ទាំងពីរបានចែកផ្លូវគ្នាដើរ ដែលគ្មានថ្ងៃជួបវិញ។ ទណ្ឌិត សម រង្ស៉ី ដែលបាននិរទេសខ្លួនទៅរស់នៅប្រទេសបារាំងសោយសុខជាមួយក្រុមគ្រួសារធ្វើព្រងើយ ដោយទុកចោលសមាជិកបក្សដែលធ្លាប់តែជឿជាក់   និងដើរតាមនយោបាយ ប្រជាភិថុតិ ភូតភរ បំផ្លើស បំភ្លៃ បំភ័ន្ត របស់មេបក្ស នៅពេលនេះបងប្អូនប្រជាពលរដ្ឋទាំងនោះបានឈប់គាំទ្រ និងអស់ជំនឿលើបក្សសង្គ្រោះជាតិទៀតហើយ និងមានអ្នកគាំទ្រមួយចំនួនធំបានសុំចូលរួមរស់ក្នុងជីវភាពនយោបាយជាមួយបក្សផ្សេងៗទៀតយ៉ាងភ្លូកទឹកភ្លូកដី ព្រោះមេបក្សគ្មានទំនួលខុសត្រូវ។
ចំណែកផ្ទៃក្នុងគណបក្សនេះវិញ ពោរពេញទៅដោយបក្ខពួក អំពើពុករលួយ កិបកេងលុយជំនួយពីបរទេស ជាពិសេសលុយមូលនិធិព្រះអាទិត្យ ក៏បានយកចែកគ្នាចាយអស់។ ឯណាលុយដែលជា កម្លាំងញើសឈាមប្រជាពលរដ្ឋដែលរំពឹងថាទូរទស្សន៍ព្រះអាទិត្យ និងដំណើរការយ៉ាងយូរចុង ឆ្នាំ២០១៥ ឥឡូវនេះដាច់ឆ្នាំ២០១៦ទៅហើយ។
បន្ថែមពីលើរឿងក្តីដែលត្រូវបានតុលាការចោទពីបទបរិហារកេរ្តិ៍លោកឧបនាយករដ្ឋមន្ត្រី ហោ ណាំហុង ដែលធ្វើឱ្យខ្លួនមិនអាចចូលស្រុកបានផង ស្រាប់តែក៏មានបណ្តឹងជាច្រើនផ្សេងទៀតសង្កត់ថែមពីលើ។ ជាក់ស្តែងណាស់នៅព្រឹកថ្ងៃទី២៧ ខែធ្នូ ឆ្នាំ២០១៦នេះ តុលាការបានសម្រេចប្រកាសសាលក្រមផ្តន្ទាទោស លោក សម រង្ស៊ី ដាក់ ពន្ធនាគារ រយៈពេល ៥ឆ្នាំ និងផ្តន្ទាទោសជំនួយការពីរនាក់ឈ្មោះ អ៊ឹង ជុងលាង និងឈ្មោះ សត្យា សម្បត្តិ ដាក់ពន្ធនាគារ ៥ឆ្នាំ តែអនុវត្ត៣ឆ្នាំ តាមមាត្រា១០៧ ១០៨ ៤៩៥ និងមាត្រា ២៩ នៃក្រមព្រហ្មទណ្ឌ។  សាលក្រមនេះតុលាការសម្រេចចេញ ដីកាបង្គាប់ឱ្យកម្លាំងសមត្ថកិច្ចតាមចាប់ខ្លួនជនជាប់ចោទទាំង៣នាក់ ដើម្បីយកមកអនុវត្តទោស។ អង្គហេតុសំខាន់ដែលនាំឱ្យមានការចោទប្រកាន់លើលោក សម រង្ស៊ី និងសហការីរបស់លោក២នាក់ទៀតនេះ គឺយោងទៅតាមចម្លើយសារភាពរបស់លោក ហុង សុខហួរ ដែលបានឆ្លើយបំភ្លឺក្នុងសវនាការ២លើករួចមកហើយ ពាក់ព័ន្ធនឹងបញ្ហាក្លែងឯកសារព្រំដែន រួមទាំងឯកសារមួយចំនួនធំស្ដីអំពីផែនទីបន្ទាត់ព្រំដែនគោក ទឹក ដែលលោក ហុង សុខហួរ បានធ្វើបទបង្ហាញហើយត្រូវបាន លោក សម រង្ស៉ី និងសហការីយកទៅបង្ហោះ នៅក្នុងផេក និង Account  របស់លោក សម រង្ស៊ី បង្កឱ្យមានការយល់ច្រឡំពីមជ្ឈដ្ឋានមហាជនគ្រប់ស្រទាប់វណ្ណៈ។ មកទល់ពេលនេះទណ្ឌិត សម រង្ស៉ី បានបាត់បង់សិទ្ធិក្នុងការធ្វើនយោបាយហើយនាពេលនេះ ហើយបើយើងសង្កេតមើលបច្ចុប្បន្នភាពនៃបក្សនេះវិញ យើងឃើញយ៉ាងច្បាស់ថា ពិតជាមានការបែកបាក់ក្បាលម៉ាស៊ីនពិតប្រាកដមែន ព្រោះទណ្ឌិត សម រង្ស៉ី បានរត់ចោលស្រុកបាត់ទៅហើយ សមាជិកម្នាក់ៗមិនទុកចិត្តគ្នា និងសង្ស័យគ្នាទៅវិញទៅមក ជាពិសេសបានលាបពណ៌ និងមានការសង្ស័យគ្នាឯងថែមទៀតផង។ ការដែលជាចំណោទខ្លាំងបំផុតគឺការរៀបចំបញ្ជីបេក្ខជនបោះឆ្នោតឃុំ សង្កាត់ នាពេលខាងមុននេះ គឺមិនមានការឯកភាពផ្ទៃក្នុងឡើយ ហើយស្មុគស្មាញបំផុត ព្រោះកូតារបស់បក្ស សម រង្ស៊ី បាននឹងដណ្តើមឈរលេខរៀង ទីមួយជាមួយកូតាបក្សសិទ្ធិមនុស្ស ក្នុងការបោះឆ្នោតឃុំសង្កាត់នាថ្ងៃទី៤ ខែមិថុនា ឆ្នាំ២០១៧ ខាងមុខនេះ ប៉ុន្តែស្ថានភាពចុងក្រោយដែលបក្សប្រឆាំងដឹកនាំគ្រប់គ្រងដោយលោក កឹម សុខា អតីតគូសត្រូវរបស់លោក សម រង្ស៉ី នឹងមិនបន្តឱ្យទណ្ឌិត សម រង្ស៉ី ធ្វើអ្វីស្រេចតែអំពើចិត្តទៀត នោះទេ។
ការរៀបរាប់សង្ខេបបែបខ្លីខាងលើនេះ គ្រាន់សម្រាប់ជាការគិត និងជាជំនួយស្មារតីដល់អ្នកគាំទ្របក្សសង្គ្រោះជាតិឱ្យពិចារណាជាថ្មីឡើងវិញ ព្រោះពេលច្របូកច្របល់កាន់តែខ្លាំងឡើងៗ គ្មានអ្នកណាស្តាប់អ្នកណាទេ ក្នុងបក្សប្រឆាំងមួយនេះ ហើយមិនទាន់បានកាន់អំណាចផង ច្របូកច្របល់ម្លឹងហើយ ចុះទម្រាំបានកាន់អំណាចទៀត មិនដឹងប្រទេសជាតិមានភាពអនាធិបតេយ្យ ជ្រួលច្របល់យ៉ាងណាទេ។ តែទោះជាយ៉ាងណាក៏ដោយ ការអត្ថាធិប្បាយរបស់ខ្ញុំមិនមែនបានន័យថាបក្សប្រឆាំងមានសមត្ថភាព ឬក៏អាចទទួលបានការគាំទ្រពីប្រជាពលរដ្ឋ ឱ្យដឹកនាំប្រទេសជាតិនោះឡើយ ពីព្រោះបក្សនេះពូកែតែខាងញុះញង់ ភូតកុហក ប្រព្រឹត្តបំពានច្បាប់ ជាប់គុកច្រវ៉ាក់ និងអ្នកខ្លះរត់ចោលស្រុកតែប៉ុណ្ណោះ។   អ៊ីចឹងហើយអនាគតនយោបាយរបស់បក្សសង្គ្រោះជាតិនឹងជួបតែ រឿងអពមង្គល និងបរាជ័យតែប៉ុណ្ណោះ៕


ក្រសួង​ការ​បរទេស កំពុង​សាង​សង់​អគារវិ​ទ្យាស្ថាន​ការ​ទូត​ដំបូង​គេ​នៅ​កម្ពុជា​

ភ្នំពេញ៖ លោក ជុំ សុន្ទរី អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិកម្ពុជាបានឱ្យដឹង នៅថ្ងៃទី២៧ ខែធ្នូ ឆ្នាំ២០១៦ ថា ក្រសួងការបរទេស កំពុងសាងសង់អគារវិទ្យាស្ថានការទូត ដំបូងគេរបស់កម្ពុជា ដែលមានទីតាំងស្ថិតនៅក្នុងក្រសួងការបរទេសកម្ពុជា។
លោក ជុំ សុន្ទរី បានបន្តថា វិទ្យាស្ថានការទូតដំបូងគេនៅកម្ពុជានេះ នឹងធ្វើការបណ្តុះបណ្តាលដល់មន្រ្តីរាជការក្របខណ្ឌរបស់ក្រសួងការបរទេសសម្រាប់ជំនាញការទូត។ ការបង្កើតវិទ្យាស្ថានការទូតនេះឡើង គឺដើម្បីបំពេញតម្រូវការ នឹងបរិបទការងារការបរទេសដែលកំពុងមានការរីកចម្រើន និងមានតម្រូវការអ្នកជំនាញការទូត នៅក្នុងតំបន់ ក៏ដូចជានៅលើសកលលោកក្នុងពេលសព្វថ្ងៃនេះ។
នៅក្នុងជំនួបរវាងលោក ប្រាក់ សុខុន រដ្ឋមន្ត្រីក្រសួងការបរទេស ជាមួយឯកអគ្គរាជទូតជប៉ុន លោក Hidehisa HORINOUCHI ដើម្បីពិភាក្សាការងារក្នុងឱកាសនោះលោក ប្រាក់ សុខុន ក៏បានស្នើដល់ភាគីជប៉ុន និងភាគីបរទេសដទៃទៀត ដើម្បីជួយត្រួតពិនិត្យលើលទ្ធភាពបង្កើត វិទ្យាស្ថានការទូតកម្ពុជាមួយនេះឱ្យទទួលបានជោគជ័យ។
សូមជម្រាបផងដែរថា វិស័យការទូតក្នុងបរិបទបច្ចុប្បន្នវាពិតជាមានសារៈសំខាន់ណាស់ សម្រាប់ប្រទេសកម្ពុជាក្នុងការធ្វើសកលភាវូបនីយកម្មកម្ពុជាជាមួយពិភពលោកតាមរយៈការបង្កើតស្ថានទូត ឬអង្គកុងស៊ុលនៅបណ្តាប្រទេសលើសកលលោក ដើម្បីបង្កើតទំនាក់ទងលើវិស័យសំខាន់ៗដូចជា វិស័យនយោបាយ វិស័យពាណិជ្ជកម្ម វិស័យសេដ្ឋកិច្ច និងវិស័យសំខាន់ៗជាច្រើនទៀត ជាពិសេសវាអាចជួយសម្រួលអ្នកវិនិយោគបរទេសកាន់តែច្រើនមកវិនិយោគនៅកម្ពុជា តាមរយៈអ្នកជំនាញការទូតដ៏ជំនាញរបស់កម្ពុជា៕

Tuesday, December 27, 2016

អាជ្ញាធរជាតិអប្សរាសហការជាមួយស្ថាប័ន KOCHEF របស់សាធារណរដ្ឋកូរ៉េ ជួសជុលក្រុមប្រាសាទព្រះពិធូរ

អាជ្ញាធរជាតិអប្សរាបានចាប់ដៃគូជាមួយមូលនិធិបេតិកភណ្ឌវប្បធម៌កូរ៉េ (KOCHEF) និងភ្នាក់ងារសហប្រតិបត្តិការអន្តរជាតិកូរ៉េ (KOICA) ដើម្បីជួសជុលស្តារឡើងវិញនូវក្រុមប្រាសាទព្រះពិធូរ ដែលស្ថិតនៅទល់មុខព្រះលានជល់ដំរី។ គម្រោងនេះចាប់ផ្តើមពីឆ្នាំ២០១៥ ហើយគ្រោងនឹងបញ្ចប់ជំហានដំបូងនៅឆ្នាំ២០១៨ខាងមុខ។
លោក ផាក ដុងហ៊ី (Park Dong hee) មន្ត្រីសម្របសម្រួលនៃគម្រោងនេះ បញ្ជាក់ថា គម្រោងអភិរក្សជួសជុលប្រាសាទព្រះពិធូរមានការងារ៣ធំដែលត្រូវធ្វើគឺ៖ ការងារបណ្តុះបណ្តាលធនធានមនុស្ស, ការងារស្រាវជ្រាវចងក្រងឯកសារ និងការងារអភិរក្សជួសជុលស្តារឡើងវិញ។ សព្វថ្ងៃគម្រោងកំពុងដំណើរការលើការងារបណ្តុះបណ្តាលធនធានមនុស្ស និងស្រាវជ្រាវចងក្រងឯកសារ ចំណែកការជួសជុលស្តារឡើងវិញ នឹងចាប់ផ្តើមបន្ទាប់ពីបញ្ចប់ការសិក្សាស្រាវជ្រាវហើយ។
មន្ត្រីសម្របសម្រួលគម្រោងរូបនេះបន្ថែមថា យោងតាមអនុសាសន៍របស់គណៈកម្មាធិការ ICC-Angkor បានតម្រូវឲ្យក្រុមការងាររបស់លោក ធ្វើការអភិរក្សជួសជុលទៅលើ៣ចំណុច នៃក្រុមប្រាសាទព្រះពិធូរគឺ៖ ការជួសជុលលើផ្នែកតូចៗជុំវិញប្រាសាទ, ការសិក្សាទូទៅអំពីទិដ្ឋភាពជុំវិញប្រាសាទ និងការជួសជុលស្តារឡើងវិញនូវកសិន្ធុជុំវិញប្រាសាទ។ រហូតមកទល់នឹងពេលនេះ យើងបានសិក្សាចងក្រងជាឯកសារបានច្រើនហើយ។ នៅរវាងខែមីនា និងមេសា ឆ្នាំ២០១៧ខាងមុខនេះ ក្រុមការងារនឹងធ្វើសិក្ខាសាលាមួយ ដើម្បីបង្ហាញអំពីផែនការពិស្តារនៃគម្រោង ហើយស្តាប់យោបល់របស់អ្នកជំនាញនៃអាជ្ញាធរជាតិអប្សរា និងអ្នកជំនាញផ្សេងៗដែលកំពុងអនុវត្តការងារជួសជុលនៅក្នុងរមណីយដ្ឋានអង្គរ។ ជាជំហានដំបូងយើងនឹងធ្វើការអភិរក្ស ជួសជុលទៅលើរានហាលនៃប្រាសាទកោរជុកតែមួយប៉ុណ្ណោះ។
លោក ដុង ហ៊ី បន្ថែមថា ដើម្បីផ្តល់ជូនព័ត៌មានបន្ថែមដល់អ្នកសិក្សាស្រាវជ្រាវ និងសាធារណជនទូទៅ គម្រោងនេះបានសាងសង់អាគារពិព័រណ៍មួយ នៅខាងមុខប្រាសាទកោរសក់ (ប្រាសាទមួយក្នុងចំណោមក្រុមប្រាសាទព្រះពិធូរទាំង៥)។ អាគារពិព័រណ៍នេះ នឹងបង្ហាញអំពីទិដ្ឋភាពទូទៅ នៃគម្រោងផែនការសកម្មភាពទូទៅ រួមនឹងប្រវត្តិសាស្ត្រនៃប្រាសាទជាដើម ហើយគ្រោងបើកជូនទស្សនាជាផ្លូវការនៅចុងខែមករាឆ្នាំ២០១៧ខាងមុខ។
លោក ស្រ៊ុន តិច មន្ត្រីជំនាញផ្នែកបុរាណវិទ្យានៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការបញ្ជាក់ថា ប្រវត្តិទូទៅនៃប្រាសាទព្រះពិធូរមានលក្ខណៈស្មុគ្រស្មាញច្រើន ដោយសារមិនទាន់មានឯកសារផ្លូវការណាមួយចងក្រងច្បាស់លាស់នៅឡើយ។ ការស្រាវជ្រាវរបស់ប្រទេសបារាំងបានដាក់ឈ្មោះប្រាសាទទាំង៥នេះ ជាតំណាងដោយអក្សរ T U X Z Y។ លោកបញ្ជាក់ថា គេមិនទាន់ដឹងថាមូលហេតុអ្វីទើបបារាំងដាក់ឈ្មោះប្រាសាទទាំង៥នេះដូច្នេះឡើយ តែតាមពិតប្រាសាទនេះ មានឈ្មោះរបស់ខ្លួនតាមដែលអ្នកស្រុកធ្លាប់ហៅមកហើយ គឺ ប្រាសាទកោរសក់ ប្រាសាទជម ប្រាសាទតាទួត ប្រាសាទដូនមារ និងប្រាសាទកណ្តក់យក្ស។ តាមការសន្និដ្ឋានរបស់លោក ប្រាសាទទាំង៥នេះ អាចនឹងសាងសង់ឡើងក្នុងសម័យកាលផ្សេងគ្នាទៀតផង។ អ្នកបុរាណវិទ្យារូបនេះជឿជាក់ថា ក្រោយការស្រាវជ្រាវចងក្រងឯកសារដើម្បីធ្វើការអភិរក្សជួសជុលឡើងវិញ របស់ក្រុមអ្នកជំនាញកូរ៉េ និងកម្ពុជាហើយ គេនឹងទទួលបានទិន្នន័យ និងកម្រងប្រវត្តិសាស្ត្រជាក់ច្បាស់ជាមិនខាន៕




នាយឧត្តមសេនីយ៍ សៅ សុខា ចាត់វិធានការតាមចាប់មេក្លោង នាំឈើ និងម្ចាស់អាជីវកម្មរ៉ែខុសច្បាប់មកផ្តន្ទាទោស

(ភ្នំពេញ)៖ លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបើកកិច្ចប្រជុំរៀបចំផែនការទប់ស្កាត់ និងបង្ក្រាបបទល្មើសនាំឈើខុសច្បាប់ ម្ចាស់អាជីវកម្មរ៉ុករករ៉ែរ៉ែខុសច្បាស់ ព្រមទាំងចាត់វិធានការតាមចាប់មេក្លោង យកមកផ្តន្ទាទោសតាមច្បាប់ ឱ្យខាងតែបាន។
កិច្ចប្រជុំលើកដំបូងនេះ ធ្វើឡើងក្រោមប្រធានបទស្តីពី «ការអនុវត្តភារកិច្ចរបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ» ដោយមានការចូលរួមពី អនុប្រធាន និងសមាជិកនៃគណៈកម្មការជាតិ ឧត្តមសេនីយ៍ នាយទាហានជាច្រើនរូប នៅថ្ងៃទី២៧ ខែធ្នូ ឆ្នាំ២០១៦ ក្នុងបញ្ជាការដ្ឋានកងរាជអាវុធហត្ថលើផ្ទៃប្រទេស។
នាយឧត្តមសេនីយ៍ សៅ សុខា បានឱ្យដឹងថា កិច្ចប្រជុំនេះធ្វើឡើងដោយអនុវត្តតាមសេចក្តីសម្រេចរបស់រាជរដ្ឋាភិបាល ចុះថ្ងៃទី០៧ ខែធ្នូ ឆ្នាំ២០១៦ ស្តីពីការបង្កើតគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដើម្បីរៀបចំផែនការទប់ស្កាត់ និងបង្ក្រាបបទល្មើសធនធានធម្មជាតិ ការនាំឈើខុសច្បាប់ បទល្មើសព្រៃឈើនានា ការរុករករ៉ែខុសច្បាស់ និងការពារឱ្យបាននូវធនធានធម្មជាតិ ព្រមទាំងចាប់ជនប្រព្រឹត្តបទល្មើស មេក្លោងយកមកផ្តន្ទាទោសតាមច្បាប់។
ជាមួយគ្នានេះ អង្គប្រជុំបានពិភាក្សាយ៉ាងម៉ត់ចត់ ដោយរៀបចំយន្តការការងារធានាមធ្យោបាយ និងការទទួលខុសត្រូវខ្ពស់តាមតួនាទី ភារកិច្ចរបស់ខ្លួន៕


ក្រសួងបរិស្ថានប្រជុំ ពិនិត្យ និងផ្តល់យោបល់លើរបាយការណ៍វាយតម្លៃផលប៉ះពាល់បរិស្ថាន និងសង្គម សម្រាប់គម្រោងបង្កើតរោងចក្រផលិតស្ករគ្រាប់

ភ្នំពេញ៖ នៅទីស្ដីការក្រសួងបរិស្ថាន កាលពីល្ងាចថ្ងៃទី២៦ ខែធ្នូ ឆ្នាំ២០១៦ មានបើកកិច្ចប្រជុំអន្តរក្រសួង ស្ដីពីការពិនិត្យ និងផ្ដល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង សម្រាប់គម្រោងបង្កើតរោងចក្រផលិតស្ករគ្រាប់ ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសភ្នំពេញ ក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ របស់ក្រុមហ៊ុន APRATI FOODS (CAMBODIA) Ltd ហើយសម្រាប់ការសិក្សា និងវាយតម្លៃហេតុប៉ះពាល់បរិស្ថាន និងសង្គម គឺធ្វើឡើងដោយក្រុមហ៊ុនទីប្រឹក្សា SUSTINAT GREEN CO., LTD។
កិច្ចប្រជុំនេះ បានប្រព្រឹត្តទៅក្រោមការដឹកនាំរបស់ លោក ស៊ូ សូវុធ អនុរដ្ឋលេខាធិការនៃក្រសួងបរិស្ថាន និងជាប្រធានក្រុមការងារសម្របសម្រួលការវាយតម្លៃហេតុប៉ះពាល់បរិស្ថាន (ស.វ.ហ.ស្ថ) សម្រាប់វិស័យឧស្សាហកម្ម និងមានការចូលរួមពីអគ្គនាយកដ្ឋានពាក់ព័ន្ធដែលជាសមាជិក ស.វ.ហ.ស្ថ, ក្រសួង-ស្ថាប័នពាក់ព័ន្ធ, អាជ្ញាធររាជធានីភ្នំពេញ, មន្ទីរបរិស្ថានរាជធានីភ្នំពេញ, នាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថាន ដែលជាលេខាធិការដ្ឋាន ស.វ.ហ.ស្ថ, តំណាងក្រុមហ៊ុនម្ចាស់គម្រោង និងក្រុមហ៊ុនទីប្រឹក្សា។
គោលបំណងនៃកិច្ចប្រជុំនេះ បានតម្រូវឱ្យក្រុមហ៊ុនម្ចាស់គម្រោងត្រូវយកចិត្តទុកដាក់ទៅលើចំណុចសំខាន់ៗជាអាទិភាពមួយចំនួនដូចជា៖ (១). ការបំពុលខ្យល់ ដែលកើតមានឡើងពីការប្រើប្រាស់ម៉ាស៊ីនភ្លើង (ម៉ាស៊ីនបម្រុងចំនួន ០២គ្រឿង), (២). ការគ្រប់គ្រងសំឡេង និងរំញ័រ, (៣). ការគ្រប់គ្រងសំណល់រឹង ជាពិសេសសំណល់ថង់ប្លាស្ទិក ដែលតម្រូវឱ្យម្ចាស់គម្រោងអប់រំ និងណែនាំដល់កម្មករក្នុងការទុកដាក់សំរាម និងសំណល់ថង់ប្លាស្ទិក, (៤). សំណល់រាវដែលត្រូវធ្វើប្រព្រឹត្តកម្មជាមុនសិន មុននឹងបង្ហូរទៅក្នុងប្រព័ន្ធអាងប្រព្រឹត្តកម្មសំណល់រាវរបស់តំបន់សេដ្ឋកិច្ចពិសេសភ្នំពេញ, (៥). ការគ្រប់គ្រងសុខភាព និងសុវត្ថិភាពរបស់កម្មករ (ភាពហប់ក្តៅនៅកន្លែងផលិតស្ករគ្រាប់) នៅពេលបំពេញការងារ ដោយផ្តល់ឧបករណ៍ការពារ ព្រមទាំងពិនិត្យសុខភាពរបស់កម្មករជាប្រចាំ និងសុវត្ថិភាពចំណីអាហារ និង (៦). ការគ្រប់គ្រងបញ្ហាចរាចរណ៍ ដែលពាក់ព័ន្ធនឹងការដឹកជញ្ជូនសម្ភារៈ និងផលិតផលចេញ-ចូលរោងចក្រ៕



លោក សាយ ឈុំ រម្លឹកអាជ្ញាធរមូលដ្ឋានទាំងអស់ឱ្យយកចិត្តទុកដាក់ ថែរក្សាសន្តិសុខ សណ្ដាប់ធ្នាប់សង្គម ឱ្យកាន់តែរឹងមាំថែមទៀត ដើម្បីបន្តអភិវឌ្ឍន៍មូលដ្ឋានឱ្យកាន់តែរីកចំរើន

កំពង់ស្ពឺ៖ ប្រធានព្រឹទ្ធសភាកម្ពុជា លោក សាយ ឈុំ នារសៀលថ្ងៃទី២៦ ខែធ្នូ ឆ្នាំ២០១៦ ក្នុងឱកាសជួបប្រជុំជាមួយគណៈអភិបាលក្រុងច្បារមន និងចៅសង្កាត់ទាំង៥ ចំណុះក្រុង នៃខេត្តកំពង់ស្ពឺ ដើម្បីស្តាប់របាយការណ៍ស្តីពីសភាពការណ៍ទូទៅរបស់ក្រុង និងសង្កាត់នីមួយៗចំណុះក្រុងច្បារមន និងរបាយការណ៍ស្តីពីការចុះឈ្មោះបោះឆ្នោត លោក សាយ ឈុំ បានធ្វើការរម្លឹកឱ្យអាជ្ញាធរមូលដ្ឋានទាំងអស់ យកចិត្តទុកដាក់ដល់ការថែរក្សាសន្តិសុខសណ្ដាប់ធ្នាប់សង្គម ឱ្យកាន់តែរឹងមាំថែមទៀត ដើម្បីបន្តអភិវឌ្ឍន៍មូលដ្ឋានអោយកាន់តែរីកចំរើន និងដើម្បីធានាឱ្យដំណើរការនៃការបោះឆ្នោតជ្រើសរើស ក្រុមប្រឹក្សាឃុំសង្កាត់ នាពេលខាងមុខ បានប្រព្រឹត្តទៅក្នុងបរិយាកាសសន្តិភាព គ្មានអំពើហិង្សា មានលក្ខណៈសេរី និងយុត្តធម៌ ដែលទាំងអស់គ្នាទទួលយកបាន។
នៅក្នុងកិច្ចប្រជុំនោះ លោកស្រីអភិបាលក្រុងច្បារមន និងអស់លោកជាចៅសង្កាត់ទាំង៥ បានឱ្យដឹងថា៖ ការងារថែរក្សាសន្តិសុខសណ្តាប់ធ្នាប់សង្គម មានលក្ខណៈល្អប្រសើរជាទូទៅ។ ការងារសេដ្ឋកិច្ច សង្គមកិច្ច លើកំពស់ជីវភាពរស់នៅ និងកាត់បន្ថយភាពក្រីរបស់ប្រជាជន បានដំណើរការស្របតាមគោលនយោបាយរបស់រាជរដ្ឋាភិបាល ព្រមទាំងទទួលបានលទ្ធផល ជាផ្លែផ្កា។ ជាមួយគ្នានេះ ភ្លៀងចុងឆ្នាំបណ្តាលឱ្យមានការលិចលង់ភូមិសាស្រ្តមួយចំនួនក្នុងក្រុង ធ្វើឱ្យខូចខាតផ្លូវ និងផលស្រូវមួយចំនួនរបស់ប្រជជន។ បច្ចុប្បន្នអាជ្ញាធរមូលដ្ឋាន បាននឹងកំពុងស្តារផ្លូវដែលខូចខាតនោះឡើងវិញ។ ទាក់ទងដល់ការចុះឈ្មោះបោះឆ្នោតប្រជាជនដែល ដល់អាយុបោះឆ្នោតក្នុងក្រុងច្បារមនទាំងមូល បានទៅចុះឈ្មោះចំនួនជាង ៩១% រួចហើយ។
លោកប្រធានព្រឹទ្ធសភា បានអបអរសាទរចំពោះលទ្ធផលការងារដែលអាជ្ញាធរក្រុង និងមូលដ្ឋានសម្រេចបាន។ លោកក៏បានជំរុញឱ្យអាជ្ញាធរមូលដ្ឋានខិតខំបន្ថែមទៀត ដើម្បីសម្រេចលទ្ធផលធំៗថ្មីៗ ដើម្បីជាគុណប្រយោជន៍ដល់ការកសាងអភិវឌ្ឍន៍មូលដ្ឋាន លើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ៕



អាជ្ញាធរជាតិអប្សរាបន្តកិច្ចសហការ លើការងាររៀបចំអង្គរសង្រ្កាន្តសម្រាប់ឆ្នាំ២០១៧

កាលពីល្ងាចថ្ងៃទី២៦ ខែធ្នូ ឆ្នាំ២០១៦ ថ្នាក់ដឹកនាំសហភាពសហព័ន្ធយុវជនកម្ពុជា (ស.ស.យ.ក) ដឹកនាំដោយលោក សុខ សប្បាយណា ប្រធានក្រុមការងារប្រតិបត្តិព្រឹត្តិការណ៍អង្គរសង្រ្កាន្ត បានចូលរួមកិច្ចប្រជុំនៅអាជ្ញាធរជាតិអប្សរា ក្នុងបំណងដើម្បីស្វែងរកកិច្ចសហប្រតិបត្តិការដើម្បីរៀបចំព្រឹត្តិការណ៍អង្គរសង្រា្កន្តលើកទី៤ ឆ្នាំ២០១៧។
ក្នុងជំនួបដែលធ្វើឡើងនៅស្នាក់ការអាជ្ញាធរជាតិអប្សរា លោក សុខ សប្បាយណា បានសម្តែងអារម្មណ៍សប្បាយរីករាយ និងអរគុណយ៉ាងជ្រាលជ្រៅដល់អាជ្ញាធរជាតិអប្សរា ដែលតែងតែសហការក្នុងការរៀបចំព្រឹត្តិការណ៍អង្គរសង្រ្កាន្តនាពេលកន្លងមក។ លោកបន្តថា ការចូលរួមនេះ គឺបង្ហាញឲ្យឃើញពីការលះបង់ដើម្បីវិស័យវប្បធម៌ជាតិទាំងមូល។
ក្រៅពីនេះ ថ្នាក់ដឹកនាំសហភាពសហព័ន្ធយុវជនកម្ពុជា ក៏បានបង្ហាញពីវីដេអូខ្លី ជុំវិញព្រឹត្តិការណ៍អង្គរសង្រ្កាន្តនាពេលកន្លងមក ក៏ដូចជាកម្មវិធីមួយចំនួន ដែលគ្រោងធ្វើនៅឆ្នាំ២០១៧ខាងមុខ។ ក្នុងនោះ បើតាមការបញ្ជាក់របស់លោក សុខ សប្បាយណា មានកម្មវិធីខ្លះនៅរក្សាដដែល ខ្លះកែសម្រួល និងខ្លះទៀត ពុំមានក្នុងកម្មវិធីឆ្នាំនេះទេ។
លោក សុខ សង្វារ អគ្គនាយករងអាជ្ញាធរជាតិអប្សរា បានលើកឡើងថា អាជ្ញាធរជាតិអប្សរាតែងតែផ្តល់កិច្ចសហការយ៉ាងជិតស្និទ្ធសំដៅធ្វើយ៉ាងណាឲ្យព្រឹត្តិការណ៍អង្គរសង្រ្កាន្តទទួលបានជោគជ័យ។ ដោយឡែកព្រឹត្តិការណ៍អង្គរសង្រ្កាន្តដែលគ្រោងរៀបចំក្នុងឆ្នាំ២០១៧ខាងមុខនេះ អាជ្ញាធរជាតិអប្សរា ក៏បានត្រៀមរៀបចំក្រុមការងារមួយចំនួនផងដែរ ដើម្បីសហការជាមួយក្រុមការងារបស់សហភាពសហព័ន្ធយុវជនកម្ពុជា ក្នុងនោះរួមមានក្រុមការងារភូមិខ្ញុំ ក្រុមអភិរក្សដ្ឋាន និងក្រុមប្រតិបត្តិសម្រាប់ទំនាក់ទំនងការងារទូទៅ។
លោក សុខ សង្វារ បានបន្ថែមទៀតថា ក្រៅពីកិច្ចសហការខាងលើ អាជ្ញាធរជាតិអប្សរាក៏បានបង្កើនសកម្មភាពការងារដើម្បីសម្អាតបរិស្ថាន កាត់ក្រីមែកឈើ រៀបចំផ្តល់ព័ត៌មានទីតាំងហានិភ័យប្រាសាទ ក៏ដូចជាផ្តល់ទឹកពិសារដោយឥតគិតថ្លៃ ដែលកាលពីឆ្នាំទៅទទួលបានការគាំទ្រពីមហាជនទូទៅយ៉ាងខ្លាំង។
គួររម្លឹកថា ព្រឹត្តិការណ៍អង្គរសង្រ្កាន្តបានទាក់ទាញភ្ញៀវទេសចរជាតិ និងអន្តរជាតិជាច្រើនពីមួយឆ្នាំទៅមួយឆ្នាំ។ កាលពីលើកទីមួយឆ្នាំ២០១៣ ព្រឹត្តិការណ៍នេះទាក់ទាញភ្ញៀវទេសចរ ១៧ម៉ឺននាក់, លើកទីពីរ ឆ្នាំ២០១៤ ចំនួន ៣៨ម៉ឺននាក់, លើកទីបី ឆ្នាំ២០១៥ មានចំនួន ៩៧ម៉ឺននាក់ និងលើកទីបួន ឆ្នាំ២០១៦ គឺកើនឡើងដល់ទៅ ១,៣លាននាក់ ហើយគេរំពឹងថា នៅឆ្នាំ២០១៧នេះ ចំនួននេះនឹងបន្តកើនឡើងទៀត៕



គណៈកម្មការជាតិដើម្បីទប់ស្កាត់ និងបង្ក្រាបបទល្មើស ធនធានធម្មជាតិ បើកកិច្ចប្រជុំជាលើកដំបូងរបស់ខ្លួន

ភ្នំពេញ៖ គណៈកម្មការជាតិ ដើម្បីទប់ស្កាត់ និងបង្ក្រាបបទល្មើស ធនធានធម្មជាតិ នៅព្រឹកថ្ងៃទី២៧ ខែធ្នូ ឆ្នាំ២០១៦ បានបើកកិច្ចប្រជុំ ដើម្បីអនុវត្តភារកិច្ចរបស់ខ្លួន នៅសាលប្រជុំអគារសេនាធិការដ្ឋាន នៃបញ្ជាការដ្ឋានកងរាជអាវុធហត្ថលើផ្ទៃប្រទេស ក្រោមអធិបតីភាព នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ។
អង្គប្រជុំនេះបានពិភាក្សាយ៉ាងម៉ត់ចត់ ដោយរៀបចំយន្តការ ការងារធានាមធ្យោបាយ និងការទទួលខុសត្រូវខ្ពស់ តាមតួនាទីភារៈកិច្ចរបស់ខ្លួន។
គួររំលឹកថា កាលពីថ្ងៃទី៧ ខែធ្នូ រាជរដ្ឋាភិបាលកម្ពុជា បានសម្រេចបង្កើតគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្នុងន័យរៀបចំផែនការ ទប់ស្កាត់ និងបង្ក្រាបបទល្មើស ធនធានធម្មជាតិ ការនាំឈើខុសច្បាប់ បទល្មើសព្រៃឈើនានា ការរុករករ៉ែខុសច្បាស់ និងការពារឲ្យបាននូវធនធានធម្មជាតិ ព្រមទាំងចាប់ជនប្រព្រឹត្តបទល្មើស និងមេក្លោងមកផ្តន្ទាទោសតាមច្បាប់៕

កម្ពុជាទទួលបានមេដាយសរុប២១គ្រឿង ក្នុងព្រឹត្តិការណ៍កីឡាអាស៊ីឆ្នេរខ្សាច់ហ្គេមលើកទី៥

នៅទីស្តីការក្រសួងអប់រំ លោកបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា កាលពីថ្ងៃទី២៦ ខែធ្នូ ឆ្នាំ២០១៦ បានអញ្ជើញជាអធិបតី ក្នុងពិធីទទួលស្គាល់ និងផ្ដល់ប្រាក់រង្វាន់ជ័យលាភី ក្នុងការប្រកួតកីឡាអាស៊ីឆ្នេរខ្សាច់ហ្គេមលើកទី៥ ដែលបានប្រព្រឹត្តទៅ ទីក្រុងដាណាង ប្រទេសវៀតណាម ។
ការប្រកួតកីឡាអាស៊ីឆ្នេរខ្សាច់ហ្គេមលើកទី៥នេះ ប្រទេសកម្ពុជា គឺបានទទួលមេដាយសរុបចំនួន២១គ្រឿង ក្នុងនោះមាន៖ មាស ៦គ្រឿង, ប្រាក់៦គ្រឿង និងសំរឹទ្ធ៩គ្រឿង ដោយសរុបជាទឹកប្រាក់រង្វាន់សម្រាប់ផ្ដល់ជូនអត្តពលិកមានចំនួន ១,៣៧២,០០០,០០០រៀល ៕


កងរាជអាវុធហត្ថខេត្តកោះកុង ប្រារព្ធពិធីផ្សព្វផ្សាយ ការងារអប់រំចិត្តសាស្ត្រ ដល់នាយ នាយរង កងរាជអាវុធហត្ថខេត្ត

កោះកុង៖ ដោយអនុវត្តន៍តាមការណែនាំ របស់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ថ្ងៃទី២៧ ខែធ្នូ ឆ្នាំ២១០៦នេះ នៅបញ្ជាការដ្ឋាន កងរាជអាវុធហត្ថខេត្តកោះកុង បានប្រារព្ធពិធីផ្សព្វផ្សាយការងារអប់រំចិត្តសាស្ត្រ ដល់នាយ នាយរង កងរាជអាវុធហត្ថខេត្ត ក្រោមអធិបតីភាព ឧត្តមសេនីយ៍ត្រី ថុង ណារ៉ុង មេបញ្ជាការ កងរាជអាវុធហត្ថខេត្តកោះកុង និងដោយមានការចូលរួមពីសំណាក់ លោកមេបញ្ជាការរង នាយរងសេនាធិការដ្ឋាន ប្រធានមន្ទីរ អនុប្រធានមន្ទីរ នាយការិយាល័យ មេបញ្ជាការ មេបញ្ជាការរងមូលដ្ឋាន ក្រុង ស្រុក ស្នាក់ការសន្តិសុខ កម្លាំងកងអនុសេនាធំចល័តព្រមទាំងនាយ នាយរង ចំណុះបញ្ជាការដ្ឋាន កងរាជអាវុធហត្ថខេត្ត សរុបចំនួន១៩៨នាក់។
លោកឧត្តមសេនីយ៏ត្រី បានលើកឡើងពីសភាពការណ៍ជាតិ អន្តរជាតិ និងបញ្ជាក់ពីទោសបញ្ញាត្តិ និងការដាក់វិធានការមួយចំនួនពាក់ព័ន្ធក្នុងការអនុវត្ត តួនាទី ភារកិច្ចឱ្យបានត្រឹមត្រូវទៅតាមច្បាប់ដែលបានកំណត់៕


តុលាការប្រកាសសាលក្រមរឿង លោក សម រង្ស៊ី និងជំនួយការ​ពាក់ព័ន្ធ​ករណី​ក្លែងឯកសារ​ព្រំដែន​

នៅព្រឹកថ្ងៃទី២៧ ខែធ្នូ ឆ្នាំ២០១៦នេះ តុលាការក្រុងភ្នំពេញ នឹងប្រកាសសាលក្រមរបស់ លោក សម រង្ស៊ី ប្រធានគណបក្សសង្រ្គោះជាតិ និងជំនួយការរបស់លោក២នាក់ទៀត ពាក់ព័ន្ធនឹងករណីក្លែងឯកសារព្រំដែនកម្ពុជា-វៀតណាម ជាមួយលោក ហុង សុខហួរ។
ការប្រកាសសាលក្រមនេះ នឹងធ្វើឡើងដោយ លោក លាង សំណាត់ ជាប្រធានក្រុមប្រឹក្សាជំនុំជម្រះនៃសំណុំរឿងនេះនៅសាលាដំបូងរាជធានីភ្នំពេញ។ ជនជាប់ចោទ ក្នុងករណីនេះមានលោក សម រង្ស៊ី លោក អ៊ឹង ជុងលាង ហៅ ម៉ាប់ ហៅ កូនជ្រូក និង ឈ្មោះ សត្យា សម្បត្តិ ឬ សម្បត្តិ សត្យា ត្រូវបានតុលាការ ចោទប្រកាន់ ពីបទ សមគំនិតក្នុងអំពើក្លែងបន្លំ ឯកសារសាធារណៈ បទប្រើប្រាស់ឯកសារសាធារណៈក្លែង និងបទ ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៦២៩ មាត្រា៦៣០ និងមាត្រា៤៩៥ នៃក្រមព្រហ្មទណ្ឌ។
សូមបញ្ជាក់ថា សំណុំរឿងនេះ គឺត្រូវបានបំបែកចេញពីសំណុំរឿង លោក ហុង សុខហួរ សមាជិកព្រឹទ្ធសភាគណបក្សសម រង្ស៊ី។ ចំពោះសំណុំរឿងនេះ លោក ហុង សុខហួរ ត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគាររយៈពេល៧ឆ្នាំ កាលពីរសៀលថ្ងៃទី៧ ខែវិច្ឆិកា ឆ្នាំ២០១៦៕


លោក សម រង្ស៊ី និងជំនួយការ២នាក់ទៀត ត្រូវបានតុលាការផ្តន្ទាទោស ដាក់ពន្ធនាគាក្នុងម្នាក់ៗចំនួន៥ឆ្នាំ ពីបទ​ក្លែងឯកសារ​ព្រំដែន​

(ភ្នំពេញ)៖ នាព្រឹកថ្ងៃទី២៧ ខែធ្នូ ឆ្នាំ២០១៧នេះ សាលាដំបូងរាជធានីភ្នំពេញ បានសម្រេចប្រកាសសាលក្រមផ្តន្ទាទោសលោក សម រង្ស៊ី ដាក់ពន្ធនាគាររយៈពេល៥ឆ្នាំ និង ផ្តន្ទាទោសជំនួយការពីរនាក់ ឈ្មោះ អ៊ឹង ជុងលាង និងឈ្មោះ សត្យា សម្បត្តិ ដាក់ពន្ធនាគារ៥ឆ្នាំ តែអនុវត្ត៣ឆ្នាំ។ នៅក្នុងសាលក្រមដដែលនេះក៏មានភ្ជាប់ផងដែរ ដែលតុលាការសម្រេចចេញដីកាបង្គាប់ឱ្យកម្លាំងសមត្ថកិច្ចតាមចាប់ខ្លួនជនជាប់ចោទទាំង៣នាក់ ដើម្បីយកមកអនុវត្តទោស។ សាលក្រមប្រកាសដោយកំបាំងមុខជនជាប់ចោទ និងមេធាវី តែចាត់ទុកជាចំពោះមុខ បើកផ្លូវប្តឹងឧទ្ធរណ៍តាមកំណត់ច្បាប់។
ការប្រកាសសាលក្រមនេះ ធ្វើឡើងដោយ លោក លាង សំណាត់ ប្រធានក្រុមប្រឹក្សាជំនុំជម្រះនៃសំណុំរឿងនេះនៅសាលាដំបូងរាជធានីភ្នំពេញ។ ជនជាប់ចោទ ក្នុងករណីនេះមានលោក សម រង្ស៊ី លោក អ៊ឹង ជុងលាង ហៅ ម៉ាប់ ហៅ កូនជ្រូក និង ឈ្មោះ សត្យា សម្បត្តិ ឬ សម្បត្តិ សត្យា ត្រូវបានតុលាការចោទប្រកាន់ ពីបទ សមគំនិតក្នុងអំពើក្លែងបន្លំ ឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា ៦២៩ មាត្រា៦៣០ និងមាត្រា ៤៩៥ នៃក្រមព្រហ្មទណ្ឌ ។
សូមបញ្ជាក់ថា សំណុំរឿងនេះ គឺត្រូវបានបំបែកចេញពីសំណុំរឿង លោក ហុង សុខហួរ សមាជិកព្រឹទ្ធសភាគណបក្សសម រង្ស៊ី។ ចំពោះសំណុំរឿងនេះ លោក ហុង សុខហួរ ត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគាររយៈពេល៧ឆ្នាំ កាលពីរសៀលថ្ងៃទី៧ ខែវិច្ឆិកា ឆ្នាំ២០១៦៕


Friday, December 23, 2016

ទស្សនវិភាគ៖ « បើខ្លួនឯងមិនបានកាន់អំណាច ត្រូវតែកំទេចចោលឲ្យអស់!»

ក្នុងបទសម្ភាសន៍ជាមួយវិទ្យុបរទេសផ្សាយជាភាសាខ្មែរនាពេលថ្មីៗនេះ លោក សម រង្ស៊ី ទណ្ឌិតកំពុងនីរទេសខ្លួន បានបង្ហាញនូវភាពកំសោយ កំសាករបស់ខ្លួនដែលមិនហ៊ានវិលចូលស្រុកវិញនោះដោយបន្លំអួតខ្លួនឯងថា នេះជាយុទ្ធសាស្ត្រដើម្បីតស៊ូពីក្រៅប្រទេស។
បើលោក សម រង្ស៊ី និយាយបែបនេះ មានមតិមួយចំនួនបានលើកឡើងថា សម រង្ស៊ី គួរតែអរគុណចំពោះតុលាការ ឬក៏ត្រូវតែអរគុណចំពោះលោក ហ៊ុន សែន ដែលសម រង្ស៊ី តែងតែលើកឡើងថា តុលាការមិនឯករាជ្យ និងចោទថា លោក ហ៊ុន សែន គំរាមកំហែងមិនឲ្យគាត់បានចូលស្រុក។ អីឡូវ លោក សម រង្ស៊ី ថា គាត់រស់នៅឯក្រៅប្រទេសនោះ គឺជាយុទ្ធសាស្ត្រដើម្បីតស៊ូអ៊ីចឹង សូមលោក សម រង្ស៊ី បន្តរស់នៅឯក្រៅប្រទេសជារៀងរហូតចុះ!
ងាកមកពិចារណាអំពីពាក្យថា ជាយុទ្ធសាស្ត្រតស៊ូ ដើម្បីដណ្តើមអំណាចរបស់លោក សម រង្ស៊ី។ តើវាជាយុទ្ធសាស្ត្រមែន ឬក៏ជាការទាល់ច្រក ហើយចេះតែប្រឹងស្រែក?
មនុស្សលោកក្នុងសម័យបច្ចេកវិទ្យានេះ គឺគេងាយយល់ណាស់ អំពី ស្ថានការណ៍នយោបាយរបស់ប្រទេសជាតិ និងដំណើរការវិវត្តទៅមុខយ៉ាងណានោះ ជាពិសេស មហាជនតាមរយៈប្រព័ន្ធផ្សព្វផ្សាយ ដ៏សំបូរបែបនេះ គឺគេបានដឹងយ៉ាងច្បាស់ថា សព្វថ្ងៃនេះបក្សសង្គ្រោះជាតិកំពុងបែកបាក់គ្នា និងមានជម្លោះផ្ទៃក្នុងយ៉ាងធ្ងនប់ធ្ងរ វាមិនដូចអ្វីដែលជាការលើកឡើងបំភ័ន្តគេដោយទណ្ឌិត សម រង្ស៊ី ថា ជាយុទ្ធសាស្ត្ររបស់បក្សប្រឆាំងនោះឡើយ។
ផ្ទុយទៅវិញ ពាក្យថា «យុទ្ធសាស្ត្ររបស់ទណ្ឌិត រង្ស៊ី »នៅពេលនេះ  គឺវាគ្រាន់តែជាសារបោកប្រាស់របស់លោក សម រង្ស៊ី ដើម្បីភូតកុហក់ខ្លួនឯងផង បន្លំប្រជាពលរដ្ឋផង និងគ្រាន់តែជាការធ្វើប្រជាភិថុតសកម្មជនខ្លួនតែប៉ុណ្ណោះ។
អ្នកតាមដានស្ថានការណ៍នយោបាយ និងអ្នកវិភាគបញ្ហាសង្គមមើលឃើញថា ការតម្លើងសម្លេងរបស់លោក សម រង្ស៊ី មិនមែនជាយុទ្ធសាស្ត្រតស៊ូពីក្រៅប្រទេសស្អីនោះទេ ក៏ប៉ុន្តែគឺដើម្បីលុបលាងនូវភាពបរាជ័យរបស់ខ្លួនចំពោះមុខសកម្មជនតែប៉ុណ្ណោះ ខណៈរូបគាត់ត្រូវបានអ្នកគាំទ្របំភ្លេចចោលលែងនឹកនាបាត់ទៅហើយ។ នាពេលចុងក្រោយនេះ លោក សម រង្ស៊ី បានបាត់អស់នូវតួនាទីក្នុងរដ្ឋសភា រួមទាំងអំណាចក្នុងបក្សប្រឆាំង។
ក្នុងវ័យប្រមាណជិត៧០ឆ្នាំទៅហើយ លោក សម រង្ស៊ី បានបរាជ័យជាប់រហូតមក ហើយនឹងបន្តបរាជ័យរហូតដល់ជីវិតចុងក្រោយ ពីព្រោះសព្វថ្ងៃលោក កឹម សុខា បាននិងកំពុងក្ដោបក្ដាប់អំណាចក្នុងបក្សប្រឆាំងទាំងស្រុងទៅហើយ។ គេបានមើលឃើញថា នៅក្នុងជួរគណបក្សប្រឆាំង បើទោះជាមានមនុស្សជំនិតលោក សម រង្ស៊ី នៅមានខ្លះក៏ដោយ ប៉ុន្ដែអ្នកទាំងនោះ គ្មានឥទ្ធិពលដូចក្រុមមនុស្សជំនិតនឹងអនុប្រធានបក្ស (លោក កឹម សុខា )នោះទេ។
តាមប្រភពផ្ទៃក្នុងពីគណបក្សសង្គ្រោះជាតិបានបង្ហើបប្រាប់ថា ក្រុមមនុស្សជំនិត និងមានតួនាទីសំខាន់កូតារបស់លោក សម រង្ស៊ី ត្រូវបានលោក កឹម សុខា អូសទាញមកគាំទ្រគោលជំហនយោបាយរបស់ខ្លួនអស់ទៅហើយ ដោយសារមេបក្សលោក សម រង្ស៊ី អសមត្ថភាពក្នុងការដឹកនាំ និងភាពកំសាករត់ចោលស្រុក មិនហ៊ានតស៊ូលះបង់ជាមួយសកម្មជនក្នុងស្រុក ហើយរឿងនេះតែងកើតឡើងជារឿយៗនៅក្នុងជីវិតនយោបាយរបស់គាត់ដែលមានទម្លាប់មិនទទួលខុសត្រូវ។
ប្រភពព័ត៌មាននោះបានបង្ហើបឲ្យដឹងទៀតថា អាចនឹងមានការធ្វើសមាជផ្លាស់ប្តូរមេបក្សនាពេលខាងមុខនេះ ខណៈបច្ចុប្បន្នគណបក្សគ្មានមេដឹកនាំច្បាស់លាស់។ ជាក់ស្តែងក្នុងកិច្ចសម្ភាសន៍ថ្មីៗនេះដោយវិទ្យុបរទេសផ្សាយជាភាសាខ្មែរ មានសំនួរមួយបានលើកឡើងថា « ក្នុងចំណោមយុវជនបច្ចុប្បន្នដែលគាំទ្រគណបក្សប្រឆាំង ពួកគេហាក់ដូចជា កំពុងសម្លឹងរកមេដឹកនាំដែលហ៊ាន ពោល គឺថា ប្រសិនជានៅតែមិនហ៊ានអញ្ចឹងទេ គឺពួកគាត់យល់ថា ប្រហែលជាគណបក្សប្រឆាំងពិបាករកជ័យជំនះ ពីព្រោះលោកខ្លួនឯងផ្ទាល់ (សម រង្ស៊ី) ប្រកួតប្រជែងនៅក្នុងឆាកនយោបាយជាច្រើនឆ្នាំមកហើយនៅតែមិនឈ្នះលោកនាយករដ្ឋមន្ត្រី ហ៊ុន សែន»!
សារនេះអាចបញ្ជាក់បានថា បក្សប្រឆាំងជិតដល់ពេលផ្លាស់ប្តូរប្រធានបក្សថ្មីហើយ!
ហេតុផលមួយចំនួនខាងលើនេះ អាចជាការជំរុញឲ្យបក្សប្រឆាំងត្រូវតែប្រឹងដើរទៅមុខយ៉ាងប្រញាប់ប្រញាល់ ជាពិសេសការជ្រើសរើសក្បាលម៉ាស៊ីនដឹកនាំបក្សថ្មី ទើបធានានូវបរិយាកាសល្អបានខ្លះនៅក្នុងគណបក្សនោះ។ គេបានសង្កេតឃើញថា នាពេលចុងក្រោយនេះ ទណ្ឌិត សម រង្ស៊ី ដឹងច្បាស់ថា កំហុសរបស់គាត់ប្រឈមផ្លូវច្បាប់ខ្លាំង ហើយមិនសង្ឃឹមថា លោក ហ៊ុន សែន នឹងយល់យោគដូចលោក កឹម សុខានោះ បាននាំឲ្យ សម រង្ស៊ី ខំប្រឹងស្រែកទាំងមិនដឹងទិសតំបន់។ សារជាច្រើនបានបង្ហោះផ្សាយ ដោយបញ្ចេញនូវអាកប្បកិរិយាព្រហើន ខឹងសម្បារ និងវាយសម្រុកទាំងទៅលើលោក កឹម សុខា ចំៗ និងរិះគន់ខ្លាំងៗមកលើមេបដឹកនាំបក្សកាន់អំណាច។ ភាពច្រឡោងខាមទាំងកំរោលនេះ គឺបញ្ជាក់យ៉ាងច្បាស់ថា ទណ្ឌិត សម រង្ស៊ី ជាជនឯកោ គ្មានអ្នកគាំទ្រគាត់ទៀតឡើយ។ ម៉ោងនេះ សម រង្ស៊ី បាត់បង់អស់នូវតំណែងដែលគាត់ធ្លាប់ដឹកនាំ ដែលអីឡូវកំពុងស្ថិតនៅក្នុងតណ្តាប់ដៃរបស់លោក កឹម សុខា អតីតជាគូសត្រូវរបស់ខ្លួនកាលពីនៅបក្សសិទ្ធិមនុស្ស មុនពេលចងសម្ព័ន្ធភាពជាគណបក្សសង្គ្រោះជាតិ។
ជោគវាសនារបស់លោក សម រង្ស៊ី ត្រូវបានគេដឹងថា ស្ថិតនៅលើភាពអនុគ្រោះរបស់លោក ហ៊ុន សែន ។ ប៉ុន្តែ ល្បែងវាយប្រហារដោយគំនុំ និងការសងសឹកគ្មានទីបញ្ចប់របស់ទណ្ឌិត សម រង្ស៊ី បានធ្វើឲ្យលោក ហ៊ុន សែន បិទផ្លូវសម្រាប់ សម រង្ស៊ី ហើយជាជំនួស គឺការចាប់យកដៃគូសន្ទនាថ្មី គឺ លោក កឹម សុខា ដែលកន្លងមកបក្សកាន់អំណាចក៏ធ្លាប់បានដកតំណែងរបស់លោក កឹម សុខា ម្តងរួចមកហើយពីអនុប្រធានទី១រដ្ឋសភា។
នយោបាយដ៏គ្រោះថ្នាក់សម្រាប់ប្រទេសជាតិដែល សម រង្ស៊ី បាននិងកំពុងអនុវត្ត ប្រៀបបាននឹងការគិតហើយកំពុងប្រព្រឹត្តនូវកំហុសឆ្គងខ្លាំងបំផុតតាមរយៈ ការប្រើយុទ្ធសាស្ត្រមួយ គឺបើខ្លួនឯងមិនបានកាន់អំណាច ត្រូវតែកំទេចចោលឲ្យអស់!» សូម្បីតែស្ថិរភាពនយោបាយ សន្តិសុខសង្គម៕
អត្ថបទដោយ៖ សុខ សុវណ្ណ

មិនមែនលោកឌូទែរតេឈ្លេីយទេ គឺប្រាប់ពីវិធីកាត់បន្ថយភាពក្រីក្រ

អ្នកដែលមិនដឹង អ្នកនឹងគិតថា លោកឌូទែរតេ (ប្រធានាធិបតីហ្វីលីពីន) មហាសែនឈ្លើយ! បន្ទាប់ពីអ្នកសារព័ត៌មាននាំគ្នាចោទសួរទៅលោកថា៖ តើលោក នឹងកាត់បន្ថយភាពក្រីក្រយ៉ាងដូចម្តេច?

ស្រាប់តែលោក លើកជើងដាក់លើតុភ្លាម… ឯក្រុមអ្នកសារព័ត៌មាននាំគ្នាបើកភ្នែកធំៗ គិតក្នុងចិត្តថា ៖
យី ប្រធានាធិបតី ស្អីក៏ឈ្លើយម្ល៉េះ?

លោកប្រធានាធិបតីក៏បានឆ្លើយនូវសំនួរដូចតទៅ ៖
អស់លោកមើលតែស្បែកជើងខ្ញុំពាក់តម្លៃប៉ុន្មាន? ខ្ញុំរកតែស្រោមជើងល្អពាក់ក៏គ្មានដែរ…

ន័យរបស់លោក ជំហានដំបូងចង់កាត់បន្ថយនូវភាពក្រីក្រ គឺផ្តើមចេញពីមន្ត្រីរាជការទាំងអស់ ត្រូវតែមានភាពស្អាតស្អំ នាំគ្នាចេះជួយសន្សំសំចៃការចំណាយថវិការដ្ឋ កាត់បន្ថយការប្រើប្រាស់សម្ភារៈទំនើបៗ ថ្លៃៗ និងមានវប្បធម៍ចែករំលែកជួយប្រជាពលរដ្ឋក្រីក្រ នោះការកាត់បន្ថយភាពក្រីក្រ នឹងទទួលបាននូវជោគជ័យជាក់ជាមិនខាន !


ទស្សនៈ ៖ សម រង្ស៊ី ជា​មេទ័ព​បាក់​ស្បាត ឬ​ជាចង្កៀង​ជិត​អស់​ប្រេង​!

ទណ្ឌិត សម រង្ស៊ី ត្រូវបានសាធារណជនក្នុង និងក្រៅប្រទេសប្រៀបប្រដូចទៅនឹងមេទ័ពបាក់ស្បាត បរាជ័យក្នុងសមរភូមិរាប់មិនអស់ គឺបរាជ័យទាំងការប្រកួតដណ្តើមតំណែងដឹកនាំប្រទេស (ចាញ់រាល់អាណត្តិ) ហើយថែមទាំងបរាជ័យយ៉ាងអាម៉ាស់ជាទីបំផុតទៀត ដោយចាញ់ល្បិចកលរបស់អនុប្រធានបក្សខ្លួន គឺលោក កឹម សុខា តែម្តង។
ជានិច្ចកាល សកម្មជនបក្សប្រឆាំងបានដឹងច្បាស់រួចមកហើយថា មេបក្សខ្លួនដែលតែងតែរត់ចោលស្រុកនោះ ពីព្រោះតែគាត់អសមត្ថភាពក្នុងការដឹកនាំ ឆាប់ភ័យស្លន់ស្លោរនៅពេលជួបបញ្ហាប្រឈមផ្លូវច្បាប់ម្តងៗ ហើយជាពិសេសនោះ គឺលោកប្រធានរបស់ពួកគេមិនធ្លាប់ស្គាល់ពាក្យថា តើអ្វីទៅភាពជាអ្នកដឹកនាំ ហេីយ ម៉្យាងវិញទៀត មេដឹកនាំក្រុម ឬបក្សនយោបាយមួយត្រូវមានសមត្ថភាព និងភាពរឹងមាំច្បាស់លាស់យ៉ាងណានោះទេ ហេតុនេះហើយទើបគេឃើញ លោក សម រង្ស៊ី ប្រៀបបាននឹងមេទ័ពដែលបាក់ស្បាត រត់ចោលកូនចៅរាល់តែពេលមានអាសន្ន រឺប្រឈមនឹងគ្រោះថ្នាក់។
ដោយចង់បន្លំពលរដ្ឋថា ខ្លួនឯងជាមេបក្សឆ្លាត និងប៉ិនប្រសប់នោះ តាមរយៈកិច្ចសម្ភាសន៍ជាមួយវិទ្យុបរទេសផ្សាយជាភាសាខ្មែរ ត្រូវបានលោក សម រង្ស៊ី អះអាងថា « គេមិនដែលឲ្យខ្មាំងចាប់មេទ័ពយើងទេ បើមេទ័ពត្រូវខ្មាំងចាប់បាន ចុះកូនទាហានមិនបាក់ទឹកចិត្តទៅហើយ? …»។ សម្តីនេះ អាចបញ្ជាក់បានថា ទណ្ឌិត សម រង្ស៊ី កំពុងបន្លំតាំងខ្លួនឯងធ្វើជាមេទ័ព ខណៈដែលគាត់មិនទាំងស្គាល់អំពីរបៀប និងយុទ្ធសាស្ត្រ យុទ្ធវិធីក្នុងការដឹកនាំបញ្ជាកូនទាហានយ៉ាងណាទៅផងនោះ។ ម៉្យាងវិញទៀតភាពបរាជ័យរបស់ សម រង្ស៊ី នៅពេលនេះ គឺប្រៀបបាននឹងចង្កៀងដែលជិតអស់ប្រេងទៅហើយ គឺភ្លឹបភ្លែតៗ ហើយត្រូវខ្យល់វាយបក់យ៉ាងខ្លាំងទៀតផង។
ក្នុងសភាពប្រកាសអាសន្ននេះ បក្សសង្គ្រោះជាតិបានហាក់ដូចជាភ្លេចអំពីឈ្មោះ សម រង្ស៊ី បាត់ទៅហើយ ខណៈដែលមេដឹកនាំ កឹម សុខា កំពុងលេចធ្លោរ និងមានប្រជាប្រិយ៍ភាពខ្ពស់ត្រដែតក្នុងបក្ស និងស្លាកសញ្ញាបក្សសិទ្ធិមនុស្សក៏បានស្តែងឡើងផងដែរ ! ភ្លើងទៀន ដែលជាសញ្ញាតំណាងបក្ស សម រង្ស៊ី ឥឡូវទៀននោះក៍អាចឈានទៅរលត់ផងដែរ។
ការពិតភាពជាមេទ័ព គឺតែងតែនាំមុខដាច់ខាត និងមិនរត់ចោលកូនទាហាននោះទេ។ តែចំពោះលោក សម រង្ស៊ី វិញ បានត្រឹមតែជាមេទ័ពកំសាក រត់ចោលជួរ រត់ចោលសមរភូមិហើយនៅតែស្រែកគ្រាន់បើថា ជាយុទ្ធវិធីត្រឹមត្រូវទៅទៀត។
ការពិត ភាពកំសាក រុញឱ្យគេស្លាប់ជំនួសរបស់ ទណ្ឌិត សម រង្ស៊ី គឺបាននាំឱ្យកូនទាហានស្លាប់បាត់បង់ជីវិត និងប្រឈមបញ្ហាគ្រោះថ្នាក់ជាច្រើន។ ចុងក្រោយនេះ កូនទាហានរបស់ សម រង្ស៊ី មួយភាគធំបានបាក់ទ័ពរត់ទៅចូលរួមរស់ស្ងាត់ៗជាមួយកូតាបក្សសិទ្ធិមនុស្ស និងមួយចំនួនទៀតក៍ងាកទៅអែបបក្សផ្សេង។
វាមិនមែនជាលើកទី១នោះទេ គឺពាក្យបោកប្រាស់របស់ សម រង្ស៊ី ត្រូវបានគេឮជាញឹកញាប់ច្រើនដងមកហើយ ។ គាត់ក៏បាននិយាយដែរថា « បេីទោះត្រូវស្លាប់ ក៏ខ្ញុំមិនខ្លាចដែរ ( សំដៅលើ សម រង្ស៊ី ) មិនខ្លាចស្លាប់ និងមិនរត់ចោលបងប្អូនជាដាច់ខាត!» …។សួរថា ចុះពេលនេះ សម រង្ស៊ី បានរត់ទៅដល់ណាហើយ? ហើយកូនទាហាន និងអ្នកគាំទ្រមានរត់ទៅតាមគាត់ទេ? ចម្លើយ សម រង្ស៊ីគាត់រត់លឿនណាស់ កំពុងសម្ងំនៅឯក្រៅប្រទេស ហើយកូនចៅកំពុងជ្រួលច្របល់ក្នុងបក្សជាខ្លាំង។ ឥឡូវនេះ សកម្មជនបក្សប្រឆាំងត្រូវបានលោក កឹមសុខា ប្រមូលយកជាបណ្តេីរៗហើយ។
វាជារឿងច្រំដែលពេកណាស់ទៅហើយ ហើយក៏ដល់វេលាដែលកូនទាហានត្រូវតែផ្លាស់ប្ដូរការគិតថាលោក សម រង្ស៊ី មិនមែនជាមេទ័ពដែលអាចរួមសុខរួមទុក្ខជាមួយខ្លួនបាននោះទេ គាត់ជាជនកំសាកញី។ ភាពកំសាកនេះ ក៏បានស្តែងឡើងផងដែរ តាមរយៈសំណួរមួយរបស់អ្នកសម្របសម្រួលកិច្ចសម្ភាសន៍ ដែលគេបានកត់សម្គាល់ និងចោទជាសំណួរទៅលោក សម រង្ស៊ី ថា «…យុវជនហាក់ដូចជាសម្លឹងរកមេដឹកនាំដែលហ៊ាន ពោល គឺថា ប្រសិនជានៅតែមិនហ៊ានអ៊ីចឹងទេ គឺពួកគាត់ខ្លះឃើញថា បក្សប្រឆាំងពិបាករកជ័យជម្នះ ពីព្រោះលោកខ្លួនឯងផ្ទាល់ (លោក សម រង្ស៊ី) ប្រកួតប្រជែងនៅក្នុងឆាកនយោបាយជាច្រើនឆ្នាំមកហើយ នៅតែមិនឈ្នះលោកនាយករដ្ឋមន្ដ្រី ហ៊ុន សែន»!។
វាហាក់ដូចជាគួរឱ្យខ្មាស់អៀនជាទីបំផុតដែលវិទ្យុគាំទ្របក្សប្រឆាំងមួយនេះ ហ៊ានសួរផ្ទាញ់ដេញដោល និងបកអាក្រាតនូវអំនួតរបស់លោក សម រង្ស៊ី ដែលធ្វើឱ្យទណ្ឌិតរូបនេះ ស្ទើរតែស្រលាំងកាំង និងគាំងអណ្តាត ហើយខំប្រឹងឆ្លើយបង្វែងដានដោះសារ។ ប៉ុន្តែតាមរយៈសំណួរនេះ បង្ហាញឱ្យឃើញថា លោក សម រង្ស៊ី មិនអាចលាក់បាំងនូវភាពកំសាកញីរបស់ខ្លួនបានទៀតទេ។ ទណ្ឌិតរូបនេះ បានត្រឹមតែជាប់ឈ្មោះក្នុងប្រវត្តិសាស្ត្រជាមេបក្សជាប់ឯកទគ្គកម្មខាងប្រព្រឹត្តបំពានច្បាប់រដ្ឋ និងរត់ចោលស្រុកតែប៉ុណ្ណោះ។

គួររំលឹកថា គ្រប់សម័យកាល នៅពេលប្រទេសកើតមាននូវសង្រ្គាម ឬក៏ការដឹកនាំស្រុកទេស ដើម្បីធានាបាននូវសុខសន្តិភាព ក៏ដូចជាការដណ្តើមប្រៀបឈ្នះនៅលើសមរភូមិ គឺគេត្រូវការមេទ័ពខ្លាំង មេទ័ពក្លាហាន មេទ័ពអង់អាចហ៊ានប្ដូរជីវិត ប្រយុទ្ធក្នុងសមរភូមិឈានមុខគេ ទើបជាភាពកក់ក្តៅសម្រាប់កូនទាហាន។ តែគួរឱ្យអនិច្ចារ្យ ទណ្ឌិត សម រង្ស៊ី បានត្រឹមជាជនកំសាក អសមត្ថភាពជាមេទ័ពបាក់ស្បាត រត់ចោលជួរ រត់ចោលកូនចៅ ហើយស្ថានភាពគាត់បច្ចុប្បន្នបាត់អស់ឱកាសធ្វើនយោបាយ បាត់អស់តំណែង និងឥទ្ធិពល ហើយថែមទាំងប្រឈមចំពោះមុខច្បាប់ទៀតផង។ វាសនារបស់ទណ្ឌិត សម រង្ស៊ី ប្រៀបដូចជា ចង្កៀងដែលជិតអស់ប្រេងទៅហើយ៕
អត្ថបទដោយ៖ សម វិទ្យា


រដ្ឋមន្រ្តីក្រសួងមហាផ្ទៃ  ដាក់យុទ្ធសាស្រ្ត៨ចំណុច សម្រាប់យុទ្ធនាការបង្រ្កាបគ្រឿងញៀន ដើមឆ្នាំ២០១៧

(ភ្នំពេញ)៖ លោកឧបនាយករដ្ឋមន្រ្តី ស ខេង និងជារដ្ឋមន្រ្តីក្រសួងមហាផ្ទៃ បានដាក់យុទ្ធសាស្រ្ត៨ចំណុច សម្រាប់បើកយុទ្ធនាការលើកទី១ប្រយុទ្ធប្រឆាំងគ្រឿងញៀនខុសច្បាប់ ដើម្បីការពារ និងលើកកម្ពស់សុខុមាលភាពរបស់ប្រជាពលរដ្ឋ ប្រឆាំងទប់ស្កាត់ចំពោះមហន្តរាយដែលបណ្តាលមកពីឥទ្ធិពលនៃគ្រឿងញៀនខុសច្បាប់ ថែរក្សា ការពារ សណ្តាប់ធ្នាប់សាធារណៈ និងសុវត្ថិភាពសង្គម។

យុទ្ធសាស្រ្តទាំង៨ចំណុចនោះ ត្រូវបានប្រកាស នៅក្នុងកិច្ចប្រជុំផ្សព្វផ្សាយផែនការ ស្ដីពីយុទ្ធនាការប្រឆាំងគ្រឿងញៀនខុសច្បាប់ លើកទី០១ រយៈពេល០៦ខែ (គិតចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០១៧)  នៅវិទ្យាស្ថានជាតិអប់រំ នាថ្ងៃទី២២ ខែធ្នូ ឆ្នាំ២០១៦នេះ។

លោក ស ខេង បានសំណូមពរឱ្យស្ថាប័ន្ធពាក់ព័ន្ធក្នុងយុទ្ធនាការបង្រ្កាបគ្រឿងនេះអនុវត្តដូចតទៅ ១-ត្រូវយល់ថា ការប្រយុទ្ធប្រឆាំងគ្រឿងញៀន គឺជាបញ្ហាស្មុតស្មាញទាក់ទឹនដល់ច្រើនបញ្ហាមានលក្ខណៈបែបពហុវិស័យ ដែលទាមទារឱ្យមានការចូលរួមពីគ្រប់សមាសភាព នៃសង្គមរួមទាំងក្រសួង ស្ថាប័នអាជ្ញាធរមូលដ្ឋាន អង្គការសង្គមស៊ីវិលជាតិ និងអន្តជាតិ វិសិយឯកជន ប្រជាពលរដ្ឋព្រមទាំងយន្តការក្នុង និងក្រៅប្រទេសផងដែរ។ ក្នុងនោះតម្រូវឱ្យ លោក លោកស្រី ដែលកំពុងមានវត្តមានក្នុងកិច្ចប្រជុំផ្សព្វផ្សាយនាពេលនេះ ត្រូវលើកកម្ពស់ស្មារតីទទួលខុសត្រួវខ្ពស់តាមតួនាទី និងភារកិច្ចដែលមានការពាក់ព័ន្ធ ព្រមទាំងសហការគ្នាឱ្យបានស្អិតរមួត ដើម្បីឱ្យចលនាប្រយុទ្ធប្រឆាំងគ្រឿងញៀនខុសច្បាប់ ដំណើរការទៅដោយផុលផុស សកម្មភ្លៀវភ្លា  ទី២-គ្រប់ក្រសួង ស្ថាប័នដែលមានការពាក់ព័ន្ធ និងគណៈបញ្ជាការឯកភាពរដ្ឋបាលគ្រប់ថ្នាក់ ត្រូវយកចិត្តទុកដាក់ចំពោះយន្តការប្រយុទ្ធប្រឆាំងគ្រឿងញៀន ដោយត្រូវជំរុញ និងគាំទ្រយន្តការនោះឱ្យអនុវត្តនូវតួនាទី ភារកិច្ចរបស់ខ្លួន តាមគោលការណ៍ណែនាំរបស់អាជ្ញាធរជាតិប្រយុទ្ធគ្រឿងញៀនដែលបានដាក់ចេញកន្លងមក។ ចំពោះក្រសួង ស្ថាប័ន និងគណៈបញ្ជាការឯកភាពរដ្ឋបាលដែលពុំទាន់បានរៀបចំត្រូវពិនិត្យ ចាត់តាំងសមាសភាពមន្រ្តីទទួលបន្ទុកកិច្ចការនេះជាបន្ទាន់ ដើម្បីធ្វើឱ្យការចូលរួមអនុវត្តផែនការយុទ្ធនាការទទួលបានលទ្ធផលល្អ ទី៣-គោលការណ៍ និងវិធានការនៃផែនការរបស់រាជរដ្ឋាភិបាលស្ដីពីយុទ្ធនាករាប្រយុទ្ធប្រឆាំងគ្រឿងញៀនលើកទី១ បានកំណត់យ៉ាងច្បាស់នូវគោលដៅដែលត្រូវធ្វើដំណើរឆ្ពោះទៅ លុបបំបាត់ បោសសម្អាតគ្រឿងញៀននៅក្នុងប្រទេស ។ ផ្អែកតាមផែនការនេះ និងផ្អែកលើតួនាទី ភារកិច្ចរបស់ក្រសួង ស្ថាប័នដែលមានការពាក់ព័ន្ធ និងគណៈបញ្ជាការឯកភាពរដ្ឋបាលថ្នាក់នីមួយៗ ត្រូវកសាងផែនការជាកស្ដែង និងចាត់តាំផ្សព្វផ្សាយដល់អ្នកពាក់ព័ន្ធទាំងអស់ក្រោមឱវាទឱ្យបានទាន់ពេលវេលា សំដៅធានាការចាប់ផ្ដើមអនុវត្តតាមកាលបរិច្ឆេទកំណត់គឺនៅថ្ងៃទី០១ ខែមករា ឆ្នាំ២០១៧  ទី៤-ក្នុងតំណាក់កាលអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១នេះ គ្រប់ក្រសួងស្ថាប័នដែកមានការពាក់ព័ន្ធ និងគណៈបញ្ជាការឯកភាពរដ្ឋបាលរាជធានី ខេត្តត្រូវធ្វើរបាយការណ៍ប្រចាំថ្ងៃ ប្រចាំសប្ដាហ៍ខែ ត្រីមាស ផ្ញើរមកលេខាធិកាដ្ឋានឱ្យបានទឿងទាត់ ដើម្បីបូកសរុករាយការណ៍ និងសុំគោលការណ៍ចង្អុលដឹកនាំទាន់ពេលវេលា ។ ហេតុនេះដើម្បីធានាអនុវត្តចំណុចនេះក្រសួង ស្ថាប័នដែលមានការពាក់ព័ន្ធ និងគណៈបញ្ជាការឯកភាពរដ្ឋបាលរាជធានី-ខេត្ត ចាំបាច់ត្រូវមានការដឹកនាំ ណែនាំយន្តការក្រោមឱវាទឱ្យបានម៉ត់ចត់ដោយត្រូវរៀបចំកម្មវិធីការងារឱ្យបានច្បាស់លាស់ និងមានការត្រួតពិនិត្យជាប្រចាំ ទី៥-ដើម្បីជំរុញឱ្យចលនាប្រយុទ្ធប្រឆាំងគ្រឿងញៀនខុសច្បាប់ មានសកម្មផុសផុល សស្រាក់សស្រាំនៅទូទាំងប្រទេស លេខាធិកាដ្ឋាននៃយុទ្ធនាការនេះ ត្រូវរៀបចំកិច្ចប្រជុំបើកទូលាយជាមួយសមាសភាព ពាក់ព័ន្ធសំខាន់ៗ ក្នុងសង្គមដូចជា៖ វិទ្យុ ទូរទស្សន៍ អន្តជាតិ ម្ចាស់រង្គសាល សណ្ឋាគារ ក្លឹបកំសាន្ត -ល- ដើម្បីផ្សព្វផ្សាយ និងគៀងគរឱ្យមានការចូលរួមគាំទ្រព្រមទាំងសហការបានច្រើនកុះករ ។ ដោយឡែកនៅថ្នាក់រាជធានី ខេត្តក៏ត្រូវរៀបចំប្រជុំរប្រៀបដូចគ្នានេះដែរ ដោយអញ្ជើញសមាសភាព នានាដែលមានទីតាំង បំពេញការងារ រឺប្រកបអាជីវកម្មនៅក្នុងភូមិសាស្រ្ត និងដែនសមត្ថកិច្ចរបស់ខ្លួន  ទី៦-ទន្ទឹមនឹងការតាមដានបូកសរុបរាយការណ៍ប្រចាំថ្ងៃ និងសប្ដាហ៍ លេខាធិកាដ្ឋានត្រូវរៀបចំប្រជុំដើម្បីត្រួតពិនិត្យដឹកនាំអនុវត្តយុទ្ធការនេះ ឱ្យបានទៀងទាត់ក្នុងរយៈពេល២សប្ដាហ៍ម្ដង សម្រាប់ក្រសួងស្ថាប័ននៅថ្នាក់កណ្ដាល និងប្រជុំដកពិសោធន៍មួយខែម្ដងក្នុងក្របខណ្ឌទូទាំងប្រទេស  ទី៧-ត្រូវយកចិត្តទុកដាក់តាមដានកត់ត្រានូវស្នាដៃអង្គភាព និងបុគ្គលសម្រេចបានរួមទាំងបុគ្គលដែលនៅក្នុងសង្គមខាងក្រៅផង សំដៅមានវិធានការសរសើរ ជូនរង្វាន់ និងលើកទឹកចិត្តឱ្យបានសមស្រប ដើម្បីបំផុសស្មារតីចូលរួមឲ្យក្លាយជាចលនា ជាតិប្រកបដោយថាមពល ទី៨- ត្រូវម្ចាស់ការពីដើមទី ដើម្បីត្រៀមលក្ខណៈក្នុងការបូកសរុប វាយតម្លៃសន្និដ្ឋាន ឱ្យបានត្រឹមត្រួវពីការប្រែប្រួលនៃសភាពការណ៍គ្រឿងញៀននៅកម្ពុជា បន្ទាប់ពីអនុវត្តផែនការយុទ្ធការប្រយុទ្ធប្រឆាំងគ្រឿញៀនខុសច្បាប់លើកទី១នេះ សំដៅពិចារណរផ្ដើមស្នើរដ្ឋាភិបាលដាក់ចេញនូវវិធានការចាំបាច់នានាជាបន្តទៀត សម្រាប់រយៈពេលខាងមុខ៕