សម្តេចតេជោ ហ៊ុន សែន អញ្ជើញជួបពិភាក្សាការងារជាមួយ រដ្ឋមន្រ្តីការបរទេសសហរដ្ឋអាមេរិក

នៅវិមានសន្តិភាព រសៀលថ្ងៃទី០៤ ខែសីហា ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានជួបពិភាក្សាការងារ ជាមួយឯកឧត្តម Antony J. Blinken រដ្ឋមន្រ្តីក្រសួងការបរទេស សហរដ្ឋអាមេរិក ។ 

ឯកឧត្តម Antony Blinken បានគោរពថ្លែងអំណរគុណកម្ពុជា ចំពោះភាពដឹកនាំជាប្រធានអាស៊ាន, ការផ្ដល់ដីឱ្យសហរដ្ឋអាមេរិក សង់ស្ថានទូត, ការធ្វើដំណើរទៅប្រជុំដោយជោគជ័យនៅទីក្រុងវ៉ាសីនតោន, ការអនុញ្ញាតឱ្យកប៉ាល់ Westerdam ចូលចត ដែលនៅក្នុងនោះមានជនជាតិអាមេរិកចំនួន ៦០០នាក់, ការបោះឆ្នោតគាំទ្រសេចក្ដីសម្រេចរបស់មហាសន្និបាតអង្គការសហប្រជាជាតិ លើបញ្ហារុស្ស៊ីឈ្លានពានអ៊ុយក្រែន, ការរុករកអធិធាតុទាហានអាមេរិកបាត់ខ្លួនក្នុងសម័យសង្គ្រាម TOWMIA, កិច្ចប្រឹងប្រែងរបស់កម្ពុជា ក្នុងនាមជាប្រធានអាស៊ាន ក្នុងការស្វែងរកដំណោះស្រាយបញ្ហានៅមីយ៉ាន់ម៉ា ។

ឯកឧត្តម Blinken បានគោរពជម្រាបជូនសម្ដេចតេជោថា ទិសដៅរបស់សហរដ្ឋអាមេរិក គឺមានទំនាក់ទំនងជាវិជ្ជមានជាមួយកម្ពុជា ឈរលើមូលដ្ឋាននៃកិច្ចសហប្រតិបត្តិការដែលមានស្រាប់ដូចជា៖ ទីផ្សារនាំចេញ និងជំនួយសម្រាប់ការអភិវឌ្ឍ។ល។

ជាការឆ្លើយតប សម្ដេចតេជោ ហ៊ុន សែន បានសម្ដែងនូវការរីករាយ និងស្វាគមន៍ឯកឧត្តម Antony Blinken ក្នុងអំឡុងពេលកិច្ចប្រជុំរដ្ឋមន្ត្រីការបរទេសអាស៊ាន នឹងកិច្ចប្រជុំពាក់ព័ន្ធ។ សម្តេចតេជោ បានសម្ដែងនូវការរីករាយជាមួយលទ្ធផលនៃជំនួបកំពូលអាស៊ាន-អាមេរិក កាលពីខែឧសភា ឆ្នាំ២០២២ និងជំនួបជាមួយសមាជិកព្រឹទ្ធសភា និងធុរជនអាមេរិកកន្លងទៅ នៅរដ្ឋធានីវ៉ាស៊ីនតោន។

សម្ដេចតេជោបានមានប្រសាសន៍ថា ការអនុញ្ញាតឱ្យកប៉ាល់ Westerdam ចូលចតនោះ ជាការងារមនុស្សធម៌ ប្រសិនបើកម្ពុជា មិនអនុញ្ញាតឱ្យចូលចត នោះប្រជាជននៅលើកប៉ាល់ ត្រូវដាច់ស្បៀង ដាច់ទឹក នឹងឈានទៅដល់មានគ្រោះមហន្តរាយដល់អាយុជីវិត ព្រោះមិនមានប្រទេសណាអនុញ្ញាតឱ្យចូលចតក្រៅពីកម្ពុជានោះទេ។ 

ចំពោះករណីបោះឆ្នោតគាំទ្រសេចកីសម្រេចរបស់មហាសន្និបាតអង្គការសហប្រជាជាតិ លើបញ្ហារុស្ស៊ីឈ្លានពានអ៊ុយក្រែននោះ ជាគោលការណ៍ដែលកម្ពុជា ប្រកាន់យ៉ាងខ្ជាប់ខ្ជួននូវគោលការណ៍ធម្មនុញ្ញអង្គការសហប្រជាជាតិ និងបទដ្ឋានដែលទទួលស្គាល់ពាក់ព័ន្ធនឹងការគោរពអធិបតេយ្យភាព បូរណភាពទឹកដី និងឯករាជ្យភាពរបស់ប្រទេសសមាជិកអង្គការសហប្រជាជាតិទាំងអស់ ។ កម្ពុជា អំពាវនាវឱ្យមានបទឈប់បាញ់គ្នា ចរចាដោយសន្តិវិធី និងការអត់ធ្មត់ជាទីបំផុត ។

ជាមួយគ្នានោះដែរ សម្តេចតេជោ នាយករដ្ឋមន្ត្រី បានស្នើឱ្យមានការពិនិត្យឡើងវិញ អំពីការដាក់ទណ្ឌកម្មទៅលើប្រទេសរុស្ស៊ី ដែលទណ្ឌកម្មនេះ មិនប៉ះពាល់ត្រឹមតែរុស្ស៊ីនោះទេ ប៉ុន្តែប៉ះពាល់ដល់សេដ្ឋកិច្ចពិភពលោកក្នុងនោះ រួមទាំងកម្ពុជាផងដែរ។

ពាក់ព័ន្ធទៅនឹងការស្វែងរកអធិធាតុទាហានអាមេរិក បាត់ខ្លួន នៅក្នុងអំឡុងពេលសង្គ្រាមនោះ កម្ពុជា បានធ្វើការជាមួយសហរដ្ឋអាមេរិកជាច្រើនឆ្នាំមក ហើយកម្ពុជា នៅតែបន្តសហការលើបញ្ហាការងារមនុស្សធម៌នេះ ។ កម្ពុជា មានការសោកស្ដាយ និងភ្ញាក់ផ្អើលចំពោះការអនុវត្តទោសប្រហារជីវិតសកម្មជន ៤រូបថ្មីៗនេះ នៅប្រទេសមីយ៉ាន់ម៉ា។ កម្ពុជា ក៏បានធ្វើប្រតិកម្មតាមរយៈការចេញសេចកីថ្លែងការណ៍ប្រធានអាស៊ាន នៅថ្ងៃទី ២៥ ខែកក្កដា ឆ្នាំ២០២២។ ទោះជាយ៉ាងនេះក៏ដោយ កម្ពុជា នៅតែប្ដេជ្ញាចិត្តខិតខំជួយឲ្យប្រទេសមីយ៉ាន់ម៉ា វិលទៅរកភាពប្រក្រតី និងដំណើរការតាមមាគ៌ាប្រជាធិបតេយ្យឡើងវិញ ។

មុននឹងបញ្ចប់ សម្តេចតេជោ ហ៊ុន សែន បានថ្លែងអំណរគុណសហរដ្ឋអាមេរិក ដែលដរាបរៀងមកជួយដល់កម្ពុជា ទាំងការងារមនុស្សធម៌ការបញ្ជូនវ៉ាក់សាំង ជួយដល់កម្ពុជា ក្នុងការទប់ស្កាត់ការរីករាលដាលជំងឺកូវីដ-១៩ ការជួយដល់ការងារវប្បធម៌ និងបេតិកភណ្ឌ តាមរយៈការបញ្ជូនវត្ថុបុរាណមកកម្ពុជាវិញ និងការជួយដល់កម្ពុជា លើវិស័យដទៃទៀត រួមទាំងវិស័យអប់រំ វិស័យបរិស្ថានជាដើម៕

សម្ដេចតេជោ ហ៊ុន សែន ទទួលជួបពិភាក្សាការងារជាមួយ រដ្ឋមន្ត្រីការបរទេសរុស្ស៊ី

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានជួបពិភាក្សាការងារជាមួយឯកឧត្តម Sergey Lavrov រដ្ឋមន្ត្រីការបរទេសសហព័ន្ធរុស្ស៊ី  នៅវិមានសន្តិភាព ទីស្ដីការនាយករដ្ឋមន្ត្រី នាព្រឹកថ្ងៃទី ៤ ខែសីហា ឆ្នាំ ២០២២។

ឯកឧត្តម Sergey Lavrov បានសម្ដែងនូវការអបអរសាទរជូនចំពោះសម្តេចតេជោ គណបក្សប្រជាជនកម្ពុជា ដែលបានឈ្នះឆ្នោតក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់កន្លងមក។ ឯកឧត្តម បានគោរពរាយការណ៍ជូនសម្ដេចតេជោ អំពីស្ថានភាព និងជំហររបស់រុស្ស៊ី ជុំវិញករណីជម្លោះអ៊ុយក្រែន ហើយបានសង្កត់ធ្ងន់លើការពង្រឹងពង្រីកដែលមានស្រាប់ និងជំរុញកិច្ចសហប្រតិបត្តិការបន្ថែមលើវិស័យទេសចរណ៍ វិនិយោគ និងវិស័យដទៃទៀត តាមរយៈការជម្រុញការរៀបចំកិច្ចប្រជុំលើកទី១១ នៃគណៈកម្មការអន្តររដ្ឋាភិបាលកម្ពុជា-រុស្ស៊ី ស្តីពីកិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្រ្ត និងបច្ចេកទេស ។

ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះឯកឧត្តម Sergey Lavrov ដែលបានសម្ដែងនូវការអបអរសាទរជូនចំពោះលទ្ធផលនៃការបោះឆ្នោតជ្រើសរើសក្រុមប្រឹក្សាឃុំសង្កាត់កន្លងមក និងរបាយការណ៍ពីជំហររបស់រុស្ស៊ី ជុំវិញជម្លោះនៅអ៊ុយក្រែន។

សម្តេចតេជោនាយករដ្ឋមន្ត្រី បានថ្លែងអំណរគុណផងដែរចំពោះវ៉ាក់សាំង ដែលឯកឧត្តម Lavrov បាននាំមកជាមួយ ជូនដល់កម្ពុជា ។

សម្ដេចតេជោ ក៏បានឯកភាពជាមួយ ឯកឧត្តម Lavrov ក្នុងការពង្រឹងទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរជាពិសេស ជំរុញកិច្ចប្រជុំលើកទី១១ នៃគណៈកម្មការអន្តររដ្ឋាភិបាលកម្ពុជា-រុស្ស៊ី។ សម្ដេច មានប្រសាសន៍បន្ថែមថា ទំនាក់ទំនងរវាងកម្ពុជា និងរុស្ស៊ី ជាទំនាក់ទំនងប្រវត្តិសាស្រ្ត ដែលកម្ពុជាតែងតែផ្ដល់សារៈសំខាន់ខ្លាំងក្នុងការពង្រឹងពង្រីកទំនាក់ទំនងមិត្តភាព និងកិច្ចសហប្រតិបត្តិការជិតស្និទ្ធលើវិស័យនានាជាមួយរុស្ស៊ី ។

ក្នុងឱកាសនោះដែរ សម្តេចតេជោ ហ៊ុន សែន ក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនអតីតសហភាពសូវៀត និងសហព័ន្ធរុស្ស៊ី ដែលបានគាំទ្រ និងជំនួយជាច្រើនដ៏មានតម្លៃ ផ្ដល់ជូនប្រជាជន និងរាជរដ្ឋាភិបាលកម្ពុជា ក្នុងគ្រាដ៏លំបាកនាពេលកន្លងមក។ សម្ដេចតេជោបានបន្ថែមថា យើងមិនអាចបំភ្លេចបានឡើយ នូវកាយវិការប្រកបដោយមិត្តភាព និងសមាណជិតក្នុងពេលដែលយើងត្រូវការចាំបាច់ ឧទាហរណ៍ដូចជា៖ មន្ទីរពេទ្យមិត្តភាពខ្មែរ-សូវៀត ដែលបានជួយសង្គ្រោះជីវិតមនុស្សជាច្រើននាក់ និងវិទ្យាស្ថានបច្ចេកវិទ្យាកម្ពុជា ដែលបានបណ្ដុះបណ្ដាលនិស្សិតជាច្រើននាក់៕

សម្ដេចតេជោ ហ៊ុន សែន ទទួលជួបតំណាងជាន់ខ្ពស់ទទួលបន្ទុកកិច្ចការបរទេស និងសន្តិសុខ នយោបាយ និងជាអនុប្រធានគណៈកម្មការអឺរ៉ុប

នៅវិមានសន្តិភាព នាព្រឹកថ្ងៃព្រហស្បតិ៍ ទី០៤ ខែសីហា ឆ្នាំ២០២២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម ចូសិប បូររែល ហ្វុនតេលលេស (Josep Borrll Fontelles) តំណាងជាន់ខ្ពស់ទទួលបន្ទុកកិច្ចការបរទេស និងសន្តិសុខ នយោបាយ និងជាអនុប្រធានគណៈកម្មការអឺរ៉ុប ដឹកនាំគណៈប្រតិភូជួបសម្តែងការគួរសម និងពិភាក្សាការងារ។

ឯកឧត្តម ចូសិប បូររែល បានគោរពជម្រាបជូនសម្ដេចតេជោថា ឯកឧត្តម បានទៅធ្វើទស្សនកិច្ចនៅខេត្តសៀមរាប និងបានដើរ ១៦ម៉ោង ទស្សនាប្រាង្គប្រាសាទដ៏អស្ចារ្យ ដែលរំលេចនូវភាពកំពូលមិនត្រឹមតែផ្នែកសិល្បៈទេ ប៉ុន្តែថែមទាំងផ្នែកស្ថាប័ត្យកម្មផង ។ ឯកឧត្តមបន្ថែមថា ប្រាង្គប្រាសាទនៅកម្ពុជា គឺជាទ្រព្យសម្បត្តិដ៏មហាសាលរបស់មនុស្សជាតិ ។

ឯកឧត្តម ចូសិប បូររែល បានសម្ដែងនូវការគាំទ្រ និងវាយតម្លៃខ្ពស់ចំពោះភាពដឹកនាំជាប្រធានអាស៊ានរបស់កម្ពុជា និងបានពិភាក្សាជាមួយសម្ដេចតេជោ អំពីបញ្ហាកិច្ចសហប្រតិបត្តិការការអភិវឌ្ឍរបស់សហភាពអឺរ៉ុបនៅកម្ពុជា ករណីអនុគ្រោះពន្ធគ្រប់មុខទំនិញលើកលែងសព្វាវុធ (EBA) កិច្ចប្រជុំកំពូលរំលឹកខួបអាស៊ាន-សហភាពអឺរ៉ុប និងបញ្ហារស្ស៊ី អ៊ុយក្រែន រួមទាំងករណីមីយ៉ាន់ម៉ាផងដែរ ។

ជាការឆ្លើយតប សម្ដេចតេជោ ហ៊ុន សែន បានស្វាគមន៍យ៉ាងកក់ក្កៅជូនចំពោះវត្តមានរបស់ឯកឧត្តម ចូសិប បូររែល និងគណៈប្រតិភូសហគមន៍អឺរ៉ុបនៅកម្ពុជា។ សម្តេចតេជោ បានថ្លែងអំណរគុណដល់សហភាពអឺរ៉ុប ដែលបានគាំទ្រដល់កម្ពុជា ក្នុងឱកាសជាប្រធានកិច្ចប្រជុំកំពូលអាស៊ី-អ៊ឺរ៉ុប លើកទី១៣ ដែលបានបញ្ចប់ដោយជោគជ័យកាលពីខែវិច្ឆិកាឆ្នាំ២០២១ ហើយក៏បានថ្លែងអំណរគុណសហភាពអឺរ៉ុប ចំពោះការគាំទ្រដល់កម្ពុជា ជាប្រធានអាស៊ាន ឆ្នាំ២០២២ និងតួនាទីជាប្រេសិតពិសេសនៃប្រធានអាស៊ានឆ្នាំ២០២២ ស្តីពីមីយ៉ាន់ម៉ា។ 

សម្ដេចតេជោនាយករដ្ឋមន្ត្រី បានវាយតម្លៃខ្ពស់ចំពោះលទ្ធផលប្រកបដោយផ្លែផ្កា នៃកិច្ចប្រជុំគណៈកម្មការចម្រុះកម្ពុជា សហភាពអឺរ៉ុប លើកទី១១ កាលពីខែមីនា ឆ្នាំ២០២២ ដែលបានរួមចំណែកដល់ការពង្រឹងទំនាក់ទំនង និងកិច្ចសហប្រតិបត្តិការរវាងភាគីទាំងពីរ ។ សម្ដេច ក៏បានថ្លែងអំណរគុណផងដែរដល់សហភាពអឺរ៉ុប ចំពោះការផ្ដល់ជំនួយកិច្ចសហប្រតិបត្តិការដល់កម្ពុជា ចាប់តាំងពីឆ្នាំ១៩៩២ មក ដែលបានចូលរួមយ៉ាងសំខាន់ដល់ការអភិវឌ្ឍកម្ពុជា និងសូមវាយតម្លៃខ្ពស់ចំពោះសហភាពអឺរ៉ុប ដែលបានផ្ដល់ជំនួយជាវ៉ាក់សាំង តាមរយៈយន្តការ កូវ៉ាក់ និងហិរញ្ញប្បទានកន្លងមក ដែលបានចូលរួមចំណែកដល់ភាពជោគជ័យរបស់កម្ពុជា ក្នុងយុទ្ធនាការទប់ស្កាត់ការរីករាលដាលជំងឺកូវីដ-១៩ និងស្ដារសេដ្ឋកិច្ចសង្គមកម្ពុជាឡើងវិញ។

សម្ដេចតេជោ ហ៊ុន សែន បានបន្ថែមថា កម្ពុជា គាំទ្រចំពោះគំនិតផ្ដួចផ្ដើមឱ្យមានការរៀបចំប្រជុំកំពូលរំឭកខួប ៤៥ឆ្នាំនៃទំនាក់ទំនងដៃគូសន្ទនារវាងអាស៊ាន-សហភាពអឺរ៉ុប នៅក្នុងខែធ្នូ ឆ្នាំ២០២២ ខាងមុខនេះ ហើយសម្ដេចជឿជាក់ថា  លទ្ធផលនៃកិច្ចប្រជុំកំពូលនេះ និងរំលេចពីសារៈសំខាន់ ហើយពង្រីកបន្ថែមនូវភាពជាដៃគូយុទ្ធសាស្ត្រអាស៊ាន-សហភាពអឺរ៉ុប ដែលកម្ពុជា គាំទ្រគោលការណ៍ចំពោះឯកសារទស្សនៈទានរបស់សហភាពអឺរ៉ុប ស្តីពីសេចក្ដីថ្លែងការណ៍រួមរបស់ដឹកនាំអាស៊ាន-សហភាពអឺរ៉ុប ស្តីពីឥណ្ឌូប៉ាស៊ីហ្វិក ដែលត្រូវអនុម័តនៅក្នុងកិច្ចប្រជុំកំពូលរំលឹកខួបអាស៊ានសហភាពអឺរ៉ុប ។ ដោយឡែកករណី E B A សម្តេចនាយករដ្ឋមន្ត្រី បានរំលឹកអំពីអ្វីដែលបានលើកឡើងកន្លងមកនោះ គឺកម្ពុជា មិនយកអធិបតេយ្យភាពខ្លួនទៅដូរយកជំនួយ ឬភាពអនុគ្រោះអ្វីនោះទេ។ ចំពោះករណីរុស្ស៊ី និងអ៊ុយក្រែន សម្តេចតេជោ ហ៊ុន សែន បានស្នើឲ្យមានការពិនិត្យឡើងវិញអំពីការដាក់ទណ្ឌកម្មរុស្ស៊ី ព្រោះថា ការដាក់ទណ្ឌកម្មនេះ មិនប៉ះពាល់តែរុស៊ីទេ ប៉ុន្តែវាធ្វើឲ្យមានការប៉ះពាល់យ៉ាងធ្ងន់ធ្ងរទាំងសេដ្ឋកិច្ច សង្គមទាំងនៅអឺរ៉ុប និងទូទាំងពិភពលោកផង៕

សម្ដេចតេជោ ហ៊ុន សែន ទទួលជួបពិភាក្សាការងារជាមួយរដ្ឋមន្ត្រីការបរទេសនៃប្រទេសកាតា

នៅវិមានសន្តិភាព នាល្ងាចថ្ងៃទី០៣ ខែសីហា ឆ្នាំ ២០២២នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអនុញ្ញាតឱ្យ ឯកឧត្តម Sheikh Mohammed bin Abdulrahman al-Thani ឧបនាយករដ្ឋមន្ត្រី និងជារដ្ឋមន្រ្តីក្រសួងការបរទេសនៃប្រទេសកាតា។ 

សម្ដេចតេជោ ហ៊ុន សែន បានស្វាគមន៍ឯកឧត្តមឧបនាយករដ្ឋមន្ត្រី និងជារដ្ឋមន្ត្រីការបរទេសកាតា និងគណៈប្រតិភូដែលអញ្ជើញមកចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធនេះ។ សម្ដេចតេជោបានមានប្រសាសន៍ថា បច្ចុប្បន្ននេះ ទំនាក់ទំនងទ្វេភាគីរបស់យើងមានភាពល្អប្រសើរទៅមុខហើយទស្សនកិច្ចរបស់ឯកឧត្តមឧបនាយករដ្ឋមន្ត្រី និងជារដ្ឋមន្ត្រីការបរទេសនាពេលនេះ នឹងរួមចំណែកក្នុងការពង្រឹង ពង្រីកទំនាក់ទំនង និងកិច្ចសហប្រតិបត្តិការរវាងប្រទេសយើងទាំងពីរ  ជាពិសេសពង្រីកទំនាក់ទំនងរវាងប្រទេសកាតា និងប្រទេសអាស៊ានផងដែរ។ 

ឯកឧត្តមឧបនាយករដ្ឋមន្ត្រី និងជារដ្ឋមន្ត្រីការបរទេស នៃរដ្ឋកាតា បានថ្លែងអំណរគុណសម្ដេចតេជោនាយករដ្ឋមន្ត្រី ចំពោះការទទួលស្វាគមន៍ឯកឧត្តម ក៏ដូចជាការទទួលជួបសម្ដែងការគួរសមនាពេលនេះ។ ឯកឧត្តមក៏បានអបអរសាទរនូវភាពជោគជ័យនៃកិច្ចប្រជុំរដ្ឋមន្ត្រីការបរទេសអាស៊ាន។  ឯកឧត្តមក៏បានអរគុណចំពោះការចុះហត្ថលេខានៃកិច្ចសហប្រតិបត្តិការអាស៊ាននេះ ។ ឯកឧត្តមបានគូសបញ្ជាក់ថា នេះគឺជាឱកាសដ៏ល្អដែលឯកឧត្តមបានមកប្រទេសកម្ពុជានាពេលនេះ ឯកឧត្តមពិតជាចង់ឃើញនូវដំណើរការវិវត្តនៃទំនាក់ទំនង និងកិច្ចសហប្រតិបត្តិការរវាងប្រទេសយើងទាំងពីរ។ ឯកឧត្តមបានគូសបញ្ជាក់ថា រហូតមកដល់ពេលនេះ ទំនាក់ទំនងយើងទាំងពីរចាប់ផ្ដើមមានភាពល្អប្រសើរហើយយើងនៅមានសក្តានុពលជាច្រើនទៀតដែលយើងអាចសហការគ្នា ជាពិសេសទៅលើវិស័យសេដ្ឋកិច្ច ។ ឯកឧត្តមបានមានប្រសាសន៍ថា បច្ចុប្បន្នយើងមានកិច្ចសហប្រតិបត្តិការគ្នាខ្លះហើយលើវិស័យអប់រំ ហើយយើងនឹងរកកិច្ចសហប្រតិបត្តិការលើវិស័យផ្សេងៗជាច្រើនទៀតនៅពេលខាងមុខ។ 

ឯកឧត្តមបានមានប្រសាសន៍ជម្រាបជូនសម្ដេចតេជោថា ឯកឧត្តមបានជួបពិភាក្សាជាមួយ នឹងឯកឧត្តមឧបនាយករដ្ឋមន្ត្រីការបរទេសកម្ពុជា​ ឯកឧត្តម ប្រាក់ សុខុន រួចហើយ ហើយក្នុងជំនួបនោះ អ្វីដែលឯកឧត្តមចាប់អារម្មណ៍គឺ ប្រទេសកាតាអាចមានកិច្ចសហប្រតិបត្តិការល្អជាមួយកម្ពុជាទៅលើវិស័យទេសចរណ៍ និងការពង្រីកទំហំពាណិជ្ជកម្ម និងការវិនិយោគ។  ឯកឧត្តមបានប្ដេជ្ញាចិត្តថា នឹងជំរុញឲ្យមានគណៈប្រតិភូធុរកិច្ចមកប្រទេសកម្ពុជានាពេលខាងមុខ ដើម្បីជួបពិភាក្សាជាមួយធុរកិច្ចកម្ពុជា ក្នុងការពង្រីកកិច្ចសហប្រតិបត្តិការលើវិស័យធុរកិច្ចនេះតែម្ដង។ 

សម្ដេចតេជោ ហ៊ុន សែន បានស្វាគមន៍ និងអបអរសាទរ ដែលប្រទេសកាតាបានយកចិត្តទុកដាក់ចំពោះអាស៊ាន ក៏ដូចជាចំពោះប្រទេសកម្ពុជា និងពិតជារីករាយដែលឯកឧត្តមបានជួបជាមួយឯកឧត្តម ប្រាក់ សុខុន ក្នុងការជំរុញនូវកិច្ចសហប្រតិបត្តិការនេះផងដែរ។  ។ សម្ដេចតេជោមានក្តីសង្ឃឹមថា ប្រទេសកាតានឹងទទួលបានភាពជោគជ័យក្នុងការរៀប Word Cup  នៅចុងឆ្នាំ២០២២នេះ ពីព្រោះប្រទេសកត្តាជាអ្នករៀបចំព្រឹត្តិការណ៍ world cup នេះតែម្ដង ។ សម្ដេចតេជោបានមានប្រសាសន៍បន្ថែមថា ប្រទេសយើងទាំងពីរ គឺនៅមានសក្កានុពលជាច្រើន ដែលយើងអាចពង្រឹងនូវកិច្ចសហប្រតិបត្តិការគ្នាបាននាពេលខាងមុខ។ ពាក់ព័ន្ធទៅនឹងវិស័យទេសចរណ៍ សម្តេចតេជោបានមានប្រសាសន៍ថា ប្រទេសកាតាពិតជាមានភាពរឹងមាំ ជាពិសេសប្រទេសកាតា គឺមានសមត្ថភាពក្នុងការពង្រឹងជើងហោះហើរ ហើយប្រទេសកាតា គឺមានភូមិសាស្រ្តនៅមជ្ឈិមបូព៌ា ដែលអាចធ្វើការហោះហើរមកកម្ពុជាដោយផ្ទាល់បាន។ 

សម្ដេចតេជោបានមានប្រសាសន៍ថា មុនវិបត្តិជំងឺកូវីដ-១៩ កម្ពុជាមានទេសចរបរទេសប្រមាណជាង៦ លាន៦សែននាក់ តែពេលនេះ ធ្លាក់មកដល់ត្រឹមជិត១លាននាក់ប៉ុណ្ណោះ។ សម្ដេចតេជោបញ្ជាក់ថាគោលដៅកម្ពុជាគឺចង់ទទួលបានភ្ញៀវទេសចរប្រមាណជា១៥លាននាក់ ឯណ្ណោះ។ សម្ដេចតេជោបានមានប្រសាសន៍ថា ពេលនេះកម្ពុជាមានការលើកលែងនូវលក្ខខណ្ឌជាច្រើន ដើម្បីឲ្យភ្ញៀវទេសចរមកកាន់កម្ពុជា ។សម្តេចតេជោបានមានប្រសាសន៍ថា ប្រទេសកាតាអាចគាំទ្រ ជាពិសេសធ្វើឲ្យមានជំនួបរវាងអ្នកធុរកិច្ច និងធុរកិច្ចនៃប្រទេសទាំងពីរ ដូចជាអោយអ្នកធុរកិច្ចនៃប្រទេសទាំងពីរអាចចូលរួមក្នុងការតាំងពិព័រណ៍ ពាណិជ្ជកម្មក្នុងខែ១២ ចុងឆ្នាំនេះផងដែរ ធ្វើយ៉ាងណាជំរុញផ្នែកធុរកិច្ច និងធុរកិច្ចឲ្យមានទំនាក់ទំនងគ្នា។ 

សម្តេចតេជោក៏បានលើកទឹកចិត្តឲ្យប្រទេសកាតាជំរុញដល់វិស័យឯកជន ដើម្បីមកធ្វើការរួមគ្នាជាមួយវិស័យឯកជននៅប្រទេសកម្ពុជា ។ សម្ដេចចង់ឃើញអ្នកវិនិយោគប្រទេសកាតាមកវិនិយោគនៅក្នុងប្រទេសកម្ពុជា ហើយនាំចេញទៅកាន់ទីផ្សារបរទេស ពិសេសពាក់ព័ន្ធទៅនឹងវិស័យស្បៀង ដូចជាស្រូវ អង្ករតែម្ដង សម្ដេចតេជោជំរុញឲ្យប្រទេសកាតាអាចមកវិនិយោគលើវិស័យនេះ ហើយធ្វើការនាំចេញទៅកាន់ទីផ្សារអន្តរជាតិផងដែរ។

ឯកឧត្តមរដ្ឋមន្ត្រីការបរទេសកាតាបានថ្លែងអរគុណចំពោះសម្ដេចតេជោ ចំពោះអនុសាសន៍ដ៏មានអត្ថន័យក្នុងការពង្រឹងទំនាក់ទំនងក៏ដូចជាការពង្រីកពង្រឹងកិច្ចសហប្រតិបត្តិការលើវិស័យសេដ្ឋកិច្ចពាណិជ្ជកម្មរវាងប្រទេសទាំង២ នេះ។ ឯកឧត្តមសន្យាថា ឯកឧត្តមនឹងបញ្ជូនអ្នកធុរកិច្ចពីប្រទេសកាតាមកកាន់ប្រទេសកម្ពុជា ដើម្បីធ្វើការជាមួយធុរកិច្ចកម្ពុជាក្នុងការពង្រឹងពង្រីកកិច្ចសហប្រតិបត្តិការក៏ដូចជា វិនិយោគទៅលើវិស័យអ្វីដែលប្រទេសទាំងពីរអាចសហការគ្នាបាន។ ឯកឧត្តមក៏បានសន្យាថាឯកឧត្តមនឹងជំរុញឲ្យមានការហោះហើរឡើងវិញ តភ្ជាប់រវាងកម្ពុជា និងប្រទេសកាតាផងដែរដើម្បីធ្វើយ៉ាងណាជំរុញវិស័យទេសចរណ៍រវាងប្រទេសទាំងពីរ ភាពល្អប្រសើរផងដែរនៅពេលខាងមុខ៕

វិភាគអន្តរជាតិ៖ តើចិន ចំណេញអ្វីពីការធ្វើសមយុទ្ធយោធាព័ទ្ធជុំវិញ កោះតៃវ៉ាន់?

(វ៉ាស៊ីនតោន)៖ ភាពធូរស្រាលបានកើតមានឡើង បន្ទាប់ពីប្រធានសភាតំណាងរាស្ត្រអាមេរិក លោកស្រី ណាន់ស៊ី ផេឡូស៊ី បានធ្វើដំណើរទៅដល់កោះតៃវ៉ាន់ ដោយសុវត្ថិភាពកាលពីយប់ថ្ងៃទី២ ខែសីហា ដ្បិតការភ័យខ្លាចថាយោធាចិនអាចនឹងបាញ់ទម្លាក់ ឬបញ្ជូនយន្ដហោះចម្បាំងឱ្យហោះអមយន្ដហោះរបស់លោកស្រី ដែលនឹងបង្កឱ្យមានសង្រ្គាមជាមួយសហរដ្ឋអាមេរិក វាមិនបានកើតឡើងនោះទេ។

តែទោះជាបែបនេះក្ដី បញ្ហាប្រឈមដែលសហរដ្ឋអាមេរិកកំពុងជួបប្រទះ គ្រាន់តែការចាប់ផ្ដើមមួយតែប៉ុណ្ណោះ។ ជាការឆ្លើយតបទៅនឹងដំណើរទស្សនកិច្ចរបស់ លោកស្រី ផេឡូស៊ី ចិនបានប្រកាសធ្វើសមយុទ្ធយោធាមានរយៈពេល៤ថ្ងៃ នៅក្នុងតំបន់ចំនួន ៦ទីតាំងព័ទ្ធជុំវិញកោះតៃវ៉ាន់។ បើទោះជាសមយុទ្ធនេះនឹងត្រូវធ្វើ ឡើងនៅថ្ងៃទី៤ ខែសីហា ក្រោយលោកស្រី ផេឡូស៊ី ចាកចេញពីតៃប៉ិក៏ដោយ តែវានឹងក្លាយជា តាក់ទិក ឬយុទ្ធសាស្ត្រយោធាមិនធ្លាប់មានពីមុនមករបស់ចិនដែល ហាក់ដូចជា ចិនចង់បង្ហាញថាខ្លួនមានសមត្ថភាពយោធាអាចបិទខ្ទប់ ឬគ្រប់គ្រងច្រកសមុទ្រតៃវ៉ាន់ទាំងមូលបានគ្រប់ពេលវេលា។ ឱកាសនៃការធ្វើសមយុទ្ធយោធា ធំបែបនេះគឺសហរដ្ឋអាមេរិក ជាអ្នកផ្ដល់ឱ្យចិន។

សមយុទ្ធយោធានេះក៏បានបង្ហាញដែរថាចិនមានវិធីសាស្ត្រធ្វើសង្រ្គាមគ្រប់ជម្រើស ដើម្បីដាក់សម្ពាធលើតៃវ៉ាន់ និងបំផ្លាញការគំាទ្ររបស់សហរដ្ឋអាមេរិកចំពោះ ទីក្រុងតៃប៉ិ ហើយដែលតាក់តិចរបៀបនេះត្រូវបានគេហៅជាទូទៅថា «យុទ្ធសាស្ត្រសង្រ្គាមតំបន់ពណ៌ប្រផេះ»។ បើតាមក្រុមអ្នកជំនាញ យុទ្ធសាស្ត្រសង្រ្គាមតំបន់ ពណ៌ប្រផេះនេះគឺជា «សង្រ្គាមចិត្តសាស្ត្រមួយ» ដែលចិនបាន និងកំពុងប្រើដើម្បីវាយបំបាក់ស្មារតី និងកម្លាំងចិត្តប្រជាជនតៃវ៉ាន់ឱ្យបាក់ស្បាត និងបំភ័យប្រទេស ដែលចង់ជួយតៃវ៉ាន់ តាមរយៈការបង្ហាញសាច់ដុំយោធា។ ម្យ៉ាងវិញទៀត ខណៈសមត្ថភាពយោធាចិនកាន់តែរីកចម្រើនទៅមុខ «យុទ្ធសាស្ត្រសង្រ្គាមតំបន់ពណ៌ ប្រផេះ» របស់ចិនក៏នឹងកាន់តែមានប្រសិទ្ធភាពដែរ ដែលនេះអាចនឹងបង្កផលលំបាកយ៉ាងច្រើនដល់កិច្ចខិតខំប្រឹងប្រែងរបស់សហរដ្ឋអាមេរិក ក្នុងការពារសន្តិសុខ តៃវ៉ាន់។

នៅក្រោយសង្រ្គាមអ៊ុយក្រែនផ្ទុះឡើង ក្រុមអ្នកវិភាគភាគច្រើនបានប្រដូចសង្រ្គាមនៅតៃវ៉ាន់ ទៅនឹងសង្រ្គាមន័រម៉ង់ឌី (Normandy) ដែលជាសង្រ្គាមឆ្លងសមុទ្រ របស់សម្ព័ន្ធមិត្តដឹកនាំដោយសហរដ្ឋអាមេរិក ដើម្បីរំដោះតំបន់អឺរ៉ុបចេញពីកណ្ដាប់ដៃហ៊ីត្លែរ។ ពួកគេជឿជាក់ថាសង្រ្គាមបែបនេះនឹងមិនអាចកើតឡើងនៅតៃវ៉ាន់ ក្នុងរយៈពេល ៥ ទៅ ៧ឆ្នាំខាងមុខឡើយ។ ពីព្រោះថាវាជាសង្រ្គាមប្រថុយប្រថាននឹងបរាជ័យច្រើនជាងឈ្នះសម្រាប់ចិន ដែលមិនទាន់មានសមត្ថភាពយោធា ខ្លាំងក្លាគ្រប់គ្រាន់អាចធ្វើសង្រ្គាមបែបនេះបានឡើយ។

ក៏ប៉ុន្តែ ទម្រាំតែចិនអាចនឹងបំពេញចន្លោះប្រហោងយោធារបស់ខ្លួន ដើម្បីធានាជ័យជម្នះក្នុងសង្រ្គាមតៃវ៉ាន់ នោះច្បាស់ណាស់ចិននឹងបង្កើនសកម្មភាព «យុទ្ធសាស្ត្រ សង្រ្គាមតំបន់ពណ៌ប្រផេះ» ដើម្បីសាកល្បងសម្រេចគោលដៅរបស់ខ្លួន និងកំញើញកុំឱ្យសហរដ្ឋអាមេរិក ឬកម្លាំងណាមួយគាំទ្រតៃវ៉ាន់ ឬបង្រួបបង្រួមជាមួយតៃវ៉ាន់ ដោយមិនប្រើកម្លាំងបាយដែលអាចនឹងត្រូវជាមួយ «យុទ្ធសាស្ត្រឈ្នះដោយមិនបាច់ចម្បាំង» របស់ដូនតាចិន និងជាអ្នកប្រាជ្ញសង្រ្គាមចិនស៊ុន អ៊ូ។

លើសពីនេះទៅទៀត ជាមួយ «យុទ្ធសាស្ត្រសង្រ្គាមតំបន់ពណ៌ប្រផេះ» តាមរយៈការបង្ហាញសាច់ដុំយោធានេះ ចិនអាចនឹងប្រើវាដើម្បីបង្កការខូចខាតជាក់ស្ដែងដល់ សេដ្ឋកិច្ចតៃវ៉ាន់ ដោយបង្កើនហានិភ័យដល់បណ្ដាប្រទេសដែលចង់ធ្វើជំនួញជាមួយតៃវ៉ាន។ នៅត្រង់នេះ បានន័យថាប្រសិនតៃវ៉ាន់ត្រូវបានគេមើលឃើញថា ជាកន្លែងគ្មានសុវត្ថិភាពសម្រាប់ការធ្វើពាណិជ្ជកម្ម នោះប្រទេសដទៃ ឬក្រុមហ៊ុនបរទេសនឹងស្វែងរកកន្លែងផ្សេងជំនួស។ ជាឧទាហរណ៍ ដោយសារតែបារម្ភខ្លាច ចិនអាចគ្រប់គ្រងតៃវ៉ាន់បានជាយថាហេតុ ឬក៏មានវិបត្តិធ្ងន់ធ្ងរណាមួយដែលធ្វើឱ្យសហរដ្ឋអាមេរិកមិនអាចទទួលបានបន្ទះឈីបទំនើបៗដែលតៃវ៉ាន់កំពុងឈានមុខ ជាងគេ សភាទាំង២របស់សហរដ្ឋអាមេរិក បានអនុម័តច្បាប់ថ្មីមួយកាលពីពេលថ្មីៗនេះ សំដៅជំរុញ និងបង្កើនឧស្សាហកម្មបន្ទះឈីបនៅក្នុងស្រុក។

សម្រាប់ថ្នាក់ដឹកនាំចិន «យុទ្ធសាស្ត្រសង្រ្គាមតំបន់ពណ៌ប្រផេះ» គឺជាយុទ្ធសាស្ត្រដ៏ល្អបំផុតក្នុងពេលបច្ចុប្បន្ន ដោយវាផ្ដល់ជម្រើសឱ្យចិនអាចបង្កភាពតានតឹងផង ហើយអាចបញ្ចៀសការប្រឈមមុខដោយផ្ទាល់ជាមួយយោធាអាមេរិកផង។ ជាការពិតណាស់ សមយុទ្ធយោធារបស់ចិនត្រូវបានសហរដ្ឋអាមេរិកចាត់ទុកថាជាទង្វើ បង្កហេតុ និងប្រកបដោយគ្រោះថ្នាក់ រីឯចិនក៏បានហៅទស្សនកិច្ចរបស់លោកស្រី ផេឡូស៊ី ជាទង្វើបង្កហេតុ និងប្រកបដោយគ្រោះថ្នាក់ដូចគ្នាដែរ។ ប៉ុន្តែ ជាលក្ខណៈ បច្ចេកទេស សមយុទ្ធយោធា វាមិនមែនជាការបង្កសង្រ្គាមដែលតម្រូវឱ្យទីក្រុងវ៉ាស៊ីនតោនចាត់វិធានការឆ្លើយតបនោះទេ ពោលគឺគ្រាន់តែការបញ្ជូនសារព្រមាន តែប៉ុណ្ណោះ។

នៅពេលអនាគត បើមានសេណារីយ៉ូធ្ងន់ធ្ងរជាងដំណើរទស្សនកិច្ចរបស់លោកស្រី ផេឡូស៊ី នៅតៃវ៉ាន់ ចិនអាចនឹងធ្វើសមយុទ្ធយោធាជើងទឹកមានរយៈពេល រាប់សប្ដាហ៍ព័ទ្ធជុំវិញកោះតៃវ៉ាន់ ដែលនេះអាចនឹងកាត់ផ្ដាច់បណ្ដាញទំនាក់ទំនងសមុទ្ររបស់តៃវ៉ាន់តែម្ដង។ យុទ្ធសាស្ត្រដែលកាន់តែគ្រោះថ្នាក់ទៅទៀត គឺចិនអាច នឹងបញ្ជូនយន្ដហោះយោធា និងនាវាចម្បាំងទៅកាន់កៀកនឹងដែនទឹកតៃវ៉ាន់ និងដែនអាកាស ហើយបើតៃវ៉ាន់ហ៊ានហោះស្ទាក់ចាប់យន្ដហោះចិន នៅពេលនោះនឹង មានហានិភ័យខ្ពស់នៃការបាញ់ប្រហារដាក់គ្នាទៅវិញទៅមកដែលភាពតានតឹងរបៀបនេះអាចនឹងនាំទៅរកការបិទដែនអាកាសតៃវ៉ាន់បណ្ដុះអាសន្ន។

ដូច្នេះហើយទើបពេលវេលាល្អមិនទាន់មកដល់ «យុទ្ធសាស្ត្រសង្រ្គាមតំបន់ពណ៌ប្រផេះ» មិនបង្កហានិភ័យច្រើនសម្រាប់ចិននោះទេ។ យ៉ាងណាក៏ដោយ ជម្រើស កាន់តែល្អបំផុតនោះ គឺការចូលរួមផែ្នកការទូតដើម្បីបញ្ចៀសសង្រ្គាម ឬវិបត្តិកុំឱ្យផ្ទុះឡើងនៅពេលអនាគត ហើយវិធីមួយនេះត្រូវការការអនុវត្តជាក់ស្ដែង និងការអត់ធ្មត់ពីគ្រប់ភាគីទាំងអស់ ទាំងសហរដ្ឋអាមេរិក ចិន និងតៃវ៉ាន់ បើទោះជាមានការលំបាកក៏ដោយ។ ភាពតានតឹងជុំវិញដំណើរទស្សនកិច្ចរបស់លោកស្រី ផេឡូស៊ី នៅកោះតៃវ៉ាន់ វាពិតជារឿងគ្រោះថ្នាក់ ប៉ុន្តែវាក៏អាចនឹងត្រូវបានប្រើជាហេតុផលផងដែរ ប្រសិនបើសហរដ្ឋអាមេរិក និងចិន មានបំណងស្ដារកិច្ចសន្ទនា ព្រមទាំងមានបំណងបញ្ចៀសកុំឱ្យមានវិបត្តិបែបនេះនៅពេលអនាគត តែគ្រប់យ៉ាងវាអាស្រ័យទៅលើថាតើចិន ឬអាមេរិក មើលឃើញរឿងបែបនេះមានប្រយោជន៍ សម្រាប់ពួកគេ ដែរឬក៏យ៉ាងណា។

យ៉ាងណាក៏ដោយ នេះអាចជាការរំពឹង ឬក្ដីស្រម៉ៃមួយប៉ុណ្ណោះ ព្រោះនៅក្នុងបរិបទដែលការប្រជែងដណ្ដើមឥទ្ធិពលធ្វើជាមេដឹកនាំពិភពលោករវាងសហរដ្ឋអាមេរិក និងចិនកាន់តែខ្លាំង ហានិភ័យនៃការប្រឈមមុខដាក់គ្នារវាងមហាអំណាចទាំង២ មុខជាចៀសមិនរួចឡើយ គ្រាន់តែគេពិបាកស្មានឱ្យប្រាកដថានៅពេលណា តែប៉ុណ្ណោះ៕ ដោយៈ Fresh News