លោក ថោង ខុន ស្នើសមាជិកអាស៊ានខំប្រឹងបង្កើតផលិតផលទេសចរណ៍ថ្មីៗ និងពង្រីកការហោះហើរត្រង់មកកាន់ប្រទេសកម្ពុជា

លោក ថោង ខុន រដ្ឋមន្ត្រីក្រសួងទេសចរណ៍កម្ពុជា បានស្នើដល់ប្រទេសជាសមាជិកអាស៊ានទាំងអស់ត្រូវខិតខំបង្កើតផលិតផលទេសចរណ៍ថ្មីៗ និងពង្រីការហោះហើរត្រង់បន្ថែម ឱ្យបានច្រើនតាមដែលអាចធ្វើទៅបាន ដើម្បីទាក់ទាញភ្ញៀវទេសចរឱ្យបានកាន់តែច្រើន ព្រមទាំងត្រូវដោះស្រាយបញ្ហាប្រឈមនានាមួយចំនួនទៀតផងដែរ។
ការអំពាវនាវនេះ ត្រូវបានធ្វើឡើងក្នុងឱកាសដែលលោកអញ្ជើញជាអធិបតីភាពក្នុងពិធីបើកកិច្ចប្រជុំកម្រិតអគ្គ នាយកទេសចរណ៍អាស៊ានលើកទី៥០ (ASEAN NTOs) ជាផ្លូវការ នៅសណ្ឋាគារបុរីអង្គរ ខេត្តសៀមរាប ដោយមានការចូលរួមពីលោក ទៀ សីហា អភិបាលខេត្តសៀមរាប និងឯកឧត្តម PG Kamalrudzaman Haji Mohd Ishak អគ្គលេខាធិការក្រសួងធនធាន ឧស្សា ហកម្ម និងទេសចរណ៍ នៃប្រទេសប្រ៊ុយណេ ដែលជាប្រធានអង្គប្រជុំ ASEAN NTOs លើកទី៥០ និងកិច្ចប្រជុំពាក់ព័ន្ធ។

ក្នុងពិធីបើកកិច្ចប្រជុំ ASEAN NTOs នេះទៀតសោត លោករដ្ឋមន្ត្រី ថោង ខុន បានឆ្កឹះអំពីបញ្ហាប្រឈមមួយ ចំនួនដែលប្រទេសជាសមាជិកអាស៊ាន ត្រូវមានកិច្ចសហប្រតិបត្តិការដោះស្រាយរួមគ្នា ក្នុងនោះត្រូវជំរុញការធ្វើដំណើរទស្សនាកម្សាន្តផ្ទៃក្នុងអាស៊ានឱ្យបានផុសផុលឡើង សំដៅធ្វើយ៉ាងណាឱ្យទទួលបានកំណើនជាមធ្យម ៤% ក្នុងមួយឆ្នាំ និងជំរុញឱ្យទេសចរអាចធ្វើដំណើរទស្សនាកម្សាន្តបានដោយខ្លួនឯង ពិសេសដំណើរកម្សាន្តឆ្លងប្រទេស។

លោក ថោង ខុន បានសម្លឹងឃើញពីសក្ដានុពលនៃ «ទេសចរណ៍ម្ហូបអាហារ» យូរមកហើយ ដោយក្នុងកិច្ច ប្រជុំខាងលើនេះដែរ ឯកឧត្តមបានជំរុញឱ្យអង្គប្រជុំ ASEAN NTOs រួមគ្នាពិភាក្សាពីចំណុចដ៏សំខាន់មួយនេះ សំដៅធ្វើយ៉ាងសម្រេចឱ្យបាននូវ «ស្ដង់ដារទេស ចរណ៍ម្ហូបអាហារអាស៊ាន» នេះឱ្យបាន។

ដោយសារតែនៅតំបន់អាស៊ានសម្បូរទៅដោយធនធានធម្មជាតិ វប្បធម៌រូបិយ-អរូបិយ ដែលអំណោយផលដល់ការអភិវឌ្ឍវិស័យទេសចរណ៍ក្នុងតំបន់ ឱ្យក្លាយទៅជាផលិតផលដ៏ល្អឯក និងផ្ដល់នូវការចងចាំដ៏ជក់ចិត្តដល់ទេសចរ ដូច្នេះហើយបានជាលោក ថោង ខុន ជំរុញលើកទឹកដល់ប្រទេសសមាជិកអាស៊ាន ត្រូវធ្វើយ៉ាងណាបង្កើតផលិតផលទេសចរណ៍ថ្មីៗឱ្យបានច្រើន ដើម្បីទាក់ ទាញទេសចរឱ្យមកទស្សនាកើនឡើងកាន់តែច្រើនថែម ទៀត។

រដ្ឋមន្ត្រីទេសចរណ៍កម្ពុជា ក៏បានថ្លែងអំណរគុណដល់ប្រទេសហ្វីលីពីន និងឥណ្ឌូនេស៊ីផងដែរ ដែលបានត ភ្ជាប់ជើងហោះហើរត្រង់មកកម្ពុជា ដែលនេះជាការរួម ចំណែកដល់ការជំរុញចរន្តភ្ញៀវទេសចរពីគ្នាទៅវិញ ទៅមក។

សូមជម្រាបថា កិច្ចប្រជុំ ASEAN NTOs ខាងលើ មានរយៈពេល៣ថ្ងៃ ចាប់ពីថ្ងៃទី១០-១២ ខែកក្កដា ឆ្នាំ ២០១៩។ ក្រៅពីកិច្ចប្រជុំ ASEAN NTOs អាស៊ាននេះ ក៏មានកិច្ចប្រជុំ ASEAN NTOs បូក៣ ដែលមានប្រទេសចិន ជប៉ុន និងកូរ៉េខាងត្បូង ហើយនឹងមានកិច្ចប្រជុំក្នុងក្របខណ្ឌមជ្ឈមណ្ឌលអាស៊ាន-ចិន មជ្ឈមណ្ឌលអាស៊ាន-ជប៉ុន និងមជ្ឈមណ្ឌលអាស៊ាន-កូរ៉េខាងត្បូង ព្រមទាំងមានកិច្ចប្រជុំជាមួយដៃគូសន្ទនាផ្សេងទៀតផងដែរ៕

ក្រសួងការងារជូនដំណឹងពីការសម្ពោធដាក់ឱ្យប្រើប្រាស់មណ្ឌលសិក្សាកម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (ប៊ីប)

ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីប្រកាសព័ត៌មាន ស្តីពីការសម្ពោធដាក់ឱ្យប្រើប្រាស់មណ្ឌលសិក្សាកម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (ប៊ីប) ចំនួន ២ ទីតាំង ដែលនឹងប្រព្រឹត្តទៅនាថ្ងៃទី១១ ខែកក្កដា ឆ្នាំ២០១៩ នៅវិទ្យាស្ថានជាតិពហុបច្ចេកទេសអង្គរ (NPIA) ខេត្តសៀមរាប។

សូមអានសេចក្តីជូនដំណឹងខាងក្រោម៖

រដ្ឋមន្រ្តីក្រសួងកិច្ចការនារី អនុញ្ញាតឱ្យប្រធានក្រុមនៃកម្មវិធីប្រចាំប្រទេសកំពុងអភិវឌ្ឍន៍នៃអង្គការ CBI ចូលជួបពិភាក្សាការងារ

នៅថ្ងៃទី៨ ខែកក្កដា ឆ្នាំ២០១៩ លោកស្រី អ៊ឹង កន្ថាផាវី រដ្ឋមន្រ្តីក្រសួងកិច្ចការនារីអនុញ្ញាតឱ្យលោកស្រី Henrique Postma-Hanzelaar ប្រធានក្រុមនៃកម្មវិធីប្រចាំប្រទេសកំពុង អភិវឌ្ឍន៍ នៃអង្គការ CBI និងក្រុមការងារ ចូលជួបពិភាក្សាការងារ និងសម្តែងការគួរសម នៅទីស្តីការក្រសួងកិច្ចការនារី។

នៅក្នុងការពិភាក្សានោះ លោកស្រីបានបង្ហាញជូនលោកស្រីរដ្ឋមន្រ្តី អំពីការងាររបស់អង្គការ CBI គឺជាភ្នាក់ងារសហគ្រិននៃប្រទេសហូឡង់ (ទទួលថវិកាពីក្រសួងការបរទេសនៃប្រទេសហូឡង់) ដែលផ្តោតលើកកម្ពស់ការនាំចេញពីបណ្តាប្រទេសកំពុងអភិវឌ្ឍន៍ ទៅទីផ្សារអឺរ៉ុប។

នៅក្នុងដំណើរទស្សនៈនេះ ក្រុមការងារកំពុងសិក្សា និងស្វែងរកសក្កានុពលនានា លើផលិតផលនានាដែលនៅកម្ពុជា អាចឱ្យមានលទ្ធភាព ក្នុងការនាំចូលនៅបណ្តាប្រទេសអឺរ៉ុប ជាពិសេសផ្តោតលើការដែលផ្តោតលើសក្កានុពលក្នុងស្រុក និងក្រុមហ៊ុនដែលមានការទទួលខុសត្រូវផ្នែកសង្គម។

នៅក្នុងកិច្ចស្វាគមន៍នៃកិច្ចសំណេះសំណាលនោះ លោកស្រីរដ្ឋមន្រ្តី បានបង្ហាញ អំពីកិច្ចការ សំខាន់ៗរបស់ក្រសួងកិច្ចការនារី ក្នុងការលើកកម្ពស់តួនាទីស្រ្តី ទាំងក្នុងវិស័យសាធារណៈសង្គម និងសេដ្ឋកិច្ច ។ លោកស្រីក៏បានបង្ហាញអំពីការងារអាទិភាព និងបទពិសោធន៍កន្លងមក របស់ក្រសួងកិច្ចការនារី ក្នុងការលើកកម្ពស់ភាពអង់អាចផ្នែកសេដ្ឋកិច្ចដល់ស្រ្តី ដែលនៅក្នុងនោះ ផ្តោតសំខាន់លើការគាំទ្រដល់សហគ្រិនភាពរបស់ស្រ្តី និងការលើកកម្ពស់ជីវភាព ស្រ្តីនៅជនបទ ដោយរួមទាំងការផ្តល់ជំនាញវិជ្ជាជីវៈរបស់មជ្ឈមណ្ឌលអភិវឌ្ឍន៍ស្រ្តី និងការលើកកម្ពស់សង្វាក់តម្លៃនៅជនបទ ។

នៅក្នុងការពិភាក្សាបានស្វាគមន៍ និងឯកភាព ក្នុងបន្តពិភាក្សាកម្រិតបច្ចេកទេស ដើម្បីស្វែងរកលទ្ធភាពនៃកិច្ចសហការរបស់ក្រសួងកិច្ចការនារី ជាមួយគម្រោងរបស់ CBI ក្នុងជំរុញដល់ក្រុមស្រ្តី ដែលមានសក្តានុពល ក្នុងការផលិតកម្មដែលអាចនាំចេញ រួមទាំងការបញ្ជ្រាបយេនឌ័រ និងការទទួលខុសត្រូវផ្នែកសង្គម (CSR) ក្នុងសកម្មភាពរបស់គម្រោង៕

លោក ម៉ឹង សំផន ប្រជុំក្រុមការងារឆ្លើយតបសង្គ្រោះបន្ទាន់ក្រសួងការពារជាតិ

ក្រុមការងារសម្របសម្រួលការត្រៀមរៀបចំឆ្លើយតបសង្គ្រោះបន្ទាន់ និងស្តារឡើងវិញ នៃគ្រោះមហន្តរាយ ក្រសួងការពារជាតិ បានបើកកិច្ចប្រជុំនារសៀលថ្ងៃទី៨ ខែកក្កដា ដើម្បីត្រួតពិនិត្យលើកម្លាំង និងមធ្យោបាយដើម្បីត្រៀមឆ្លើយតបជួយសង្គ្រោះ គ្រោះមហន្តរាយ ដែលកិច្ចប្រជុំបានធ្វើឡើងស្ថិតក្រោមអធិបតីភាពនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងជាប្រធានក្រុមការងារ។

ក្នុងនាមក្រសួងការពារជាតិ លោក ម៉ឹង សំផន បានថ្លែងនូវការកោតសរសើរ និងវាយតម្លៃខ្ពស់ចំពោះកងឯកភាពកងពល និងស្ថាប័នជំនាញនៃ ខ.ភ.ម ដែលបានចូលរួម ជួយសង្គ្រោះគ្រោះមហន្តរាយនៃការបាក់រលំអគារនៅក្រុងព្រះសីហនុនាពេលថ្មីៗនេះ។ លោក បានបន្តថា ក្រសួងការពារជាតិបាន និងកំពុងធ្វើការកែទម្រង់កងទ័ពឲ្យមានការរីកចម្រើនរឹងមាំបន្ថែមទៀត។ ជាមួយគ្នានេះដែរ បានយកចិត្តទុកដាក់ខ្ពស់ក្នុងការត្រៀមបំរុងជារៀងរាល់ឆ្នាំនូវកម្លាំង សម្ភារៈឧបករណ៍ និងមធ្យោបាយ ដើម្បីឆ្លើយតបជួយសង្គ្រោះចំពោះគ្រោះមហន្តរាយ និងជម្ងឺឆ្លងផ្សេងៗ បានទាន់ពេលវេលា និងប្រកបដោយប្រសិទ្ធភាព។

លោក ម៉ឹង សំផន បានបញ្ជាក់ថា នៅពេលគ្រោះមហន្តរាយកើតឡើង មានតែកម្លាំងកងទ័ពទេ ដែលជាអ្នកឈានមុខគេ និងជាស្នូលនៅក្នុងការជួយសង្គ្រោះអាយុជីវិតប្រជាពលរដ្ឋ និងជនរងគ្រោះនោះ។ លោក បានមានប្រសាសន៍ដែរថា រាជរដ្ឋាភិបាល ដែលមានលោកនាយករដ្ឋមន្ត្រី ហ៊ុន សែន ជាប្រមុខ បានធ្វើឲ្យប្រទេសជាតិ មានសុខសន្តិភាព ស្ថេរភាព សន្តិសុខ សណ្តាប់ធ្នាប់សង្គម និងការអភិវឌ្ឍន៍ សេដ្ឋកិច្ចមានការរីកចម្រើនជាទីមោទនៈ។

ក្នុងនោះបានដាក់ចេញ គោលនយោបាយ និងមានកិច្ចសហប្រតិបត្តិការជាមួយប្រទេសជិតខាង មានប្រទេសវៀតណាម ឡាវ និងប្រទេសថៃ ដើម្បីជួយសង្គ្រោះគ្រោះមហន្តរាយ ដែលកើតឡើងនៅតាមបណ្តោយព្រំដែន។

លោក ម៉ឹង សំផន បានគូសបញ្ជាក់ថា នៅក្នុងខែវិច្ឆិកា ឆ្នាំ២០១៩ខាងមុខនេះ ក្រសួងការពារជាតិកម្ពុជា និងវៀតណាម នឹងធ្វើលំហាត់សមយុទ្ធរួមគ្នា លើការជួយសង្គ្រោះគ្រោះមហន្តរាយនៅតាមបណ្តាយព្រំដែន នៃប្រទេសទាំងពីរ ហើយកម្មវិធីនេះអនុវត្តនៅស្រុកចន្ទ្រា ខេត្តស្វាយរៀង។

ភាគីវៀតណាម ក៏នឹងជួយសាងសង់មណ្ឌលសុខភាពមួយកន្លែងដល់កម្ពុជា សម្រាប់ជួយសង្គ្រោះសារធាតុគីមី ដែលនៅសេសសល់តាមបណ្តោយព្រំដែនកម្ពុជា វៀតណាម នាសម័យសង្គ្រាម ៕

កិច្ចប្រជុំផ្សព្វផ្សាយសេចក្តីសម្រេចស្តីពីការបង្កើតគណៈកម្មការ និងអនុគណកម្មការរៀបចំការប្រកួតកីឡាទូកប្រពៃណីខ្នាតអន្តរជាតិ ’’ទូកនាគ’’

ស្វាយរៀង៖ នៅថ្ងៃទី១០ ខែកក្កដា ឆ្នាំ២០១៩នេះ លោក ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងកិច្ចប្រជុំផ្សព្វផ្សាយសេចក្តីសម្រេចស្តីពីការបង្កើតគណៈកម្មការ និងអនុគណកម្មការរៀបចំការប្រកួតកីឡាទូកប្រពៃណីខ្នាតអន្តរជាតិ ’’ទូកនាគ’’ ពានរង្វាន់សម្តេចក្រឡាហោម ស ខេង ភូមិភាគវាលរាបលើកទី១ ឆ្នាំ២០១៩ នៅទន្លេវ៉ៃគោ ក្រុងស្វាយរៀង។

អញ្ជើញចូលរួមក្នុងកិច្ចប្រជុំនេះមាន លោកអភិបាលរងខេត្ត លោកស្នងការរងនគរបាលខេត្ត លោកមេបញ្ជាការប្រតិបត្តិការសឹករងខេត្ត លោកមេបញ្ជាការរងកងរាជអាវុធហត្ថខេត្ត លោកសាកលវិទ្យាធិការសាកលវិទ្យាល័យស្វាយរៀង លោក លោកស្រី នាយក នាយករងរដ្ឋបាលសាលាខេត្ត លោកអភិបាលក្រុងស្រុកទាំង៨ លោក លោកស្រី ប្រធានមន្ទីរ-អង្គភាពនានាជុំវិញខេត្តជាច្រើនរូបទៀត។

មានប្រសាសន៍នៅក្នុងកិច្ចប្រជុំនេះ លោកអភិបាលខេត្តបានផ្តាំផ្ញើដល់គណៈកម្មការ និងអនុគណៈកម្មការរៀបចំការប្រកួតកីឡាទូកប្រពៃណីខ្នាតអន្តរជាតិពានរង្វាន់សម្តេចក្រឡាហោម ស ខេង នៅទន្លេវ៉ៃគោ ក្រុងស្វាយរៀង ត្រូវយកចិត្តទុកដាក់អនុវត្តតួនាទីភារកិច្ចរបស់ខ្លួនឱ្យបានល្អស្រប ទៅតាមសេចក្តីសម្រេចដូចមានចែងនៅក្នុងគណៈកម្មការ និងអនុគណៈកម្មការរៀបចំការប្រកួតរបស់ រដ្ឋបាលខេត្តស្វាយរៀង។

សូមជម្រាបជូនថា ព្រឹត្តិការណ៍នៃការប្រកួតទូកប្រពៃណីខ្នាតអន្តរជាតិ ពានរង្វាន់សម្តេចក្រឡាហោម ស ខេង ភូមិភាគវាលរាប លើកទី១ ឆ្នាំ២០១៩នេះ ក៏មានការដាក់តាំងពិពណ៌ផ្សព្វផ្សាយលក់ ផលិតផលជាតិ-អន្តរជាតិ ការប្រគុំតន្ត្រី ព្រមទាំងការហាត់សមរបស់កីឡាករទូកចាប់ពីថ្ងៃទី២២ តទៅ និងដល់ថ្ងៃទី២៧-២៨ ខែកក្កដា ឆ្នាំ២០១៩ ជាថ្ងៃប្រកួតផ្លូវការយកចំណាត់ថ្នាក់ផ្តាច់ព្រ័ត ដែលប្រព្រឹត្តទៅនៅតាមបណ្តោយមាត់ទន្លេវ៉ៃគោ ក្រុងស្វាយរៀង ខេត្តស្វាយរៀង ៕

ក្រសួងសុខាភិបាល បន្តអំពាវនាវដល់អាជ្ញាធរ និងពលរដ្ឋ ឱ្យអនុវត្តវិធានការការពារជំងឺគ្រុនឈាម ឱ្យសកម្ម ខណៈស្លាប់២៥នាក់ និងឈឺ១ម៉ឺន៥ពាន់នាក់

ជំងឺគ្រុនឈាមនៅប្រទេសកម្ពុជា បានចាប់ផ្តើមកើនឡើងពីដើមខែឧសភា រហូតដល់បច្ចុប្បន្ន ដោយបានសម្លាប់មនុស្ស២៥នាក់ហើយ គិតមកដល់ដើមខែកក្កដា ឆ្នាំ២០១៩នេះ ខណៈដែល ពលរដ្ឋនៅកម្ពុជា១៥០០០នាក់ បានឆ្លងជំងឺនេះ។ នេះបើតាមការប្រកាសរបស់ក្រសួងសុខាភិបាល ដែលទទួលបាននៅមុននេះបន្តិច។

ឆ្លើយតបនឹងការផ្ទុះជំងឺគ្រុនឈាមដ៏ខ្លាំងក្លានេះ ក្រសួងសុខាភិបាល បានអំពាវនាវសារជាថ្មីដល់ប្រជាពលរដ្ឋទាំងអស់ និងអាជ្ញាធរគ្រប់លំដាប់ថ្នាក់ ឱ្យចូលរួមយ៉ាងសកម្ម អនុវត្តវិធានការការពារជំងឺគ្រុនឈាមតាមរយៈការអនុវត្តន៍វិធានការមួយចំនួនដូចជា៖

វិធានការទី១៖ អាណាព្យាបាល មាតាបិតា កុមារាកុមារី គ្រប់រូប ត្រូវកម្ចាត់ដង្កូវទឹក នៅតាមទីកន្លែងដែលមានទឹក ដូចជា ពាង អាងទឹក ថូផ្កា បានទ្រជើងតុទូ ក្រឡ ធុង ខាប់ ជាដើម ដោយការផ្លាស់ប្តូរទឹក និងលាងសម្អាតជាប្រចាំ ឲ្យបានយ៉ាងតិចមួយដងក្នុងមួយអាទិត្យ ឬត្រូវគ្របគម្របឲ្យបានជិតល្អ និងត្រូវសហការជាមួយបណ្តាញសុខាភិបាល ដើម្បីដាក់ថ្នាំសម្លាប់ដង្កូវទឹក ឬចិញ្ចឹមកូនត្រីប្រាំពីរពណ៌ នៅកន្លែងដែលអាចចិញ្ចឹមបាន។ ចំពោះសម្ភារដក់ទឹកផ្សេងទៀត ដែលមិនប្រើប្រាស់ទុកចោល ដូចជាសំបកកង់សំបកដប កំប៉ុង ត្រឡោកដូង និងវត្ថុដក់ទឹកផ្សេងទៀត ត្រូវកប់ ឬដុត ឬកំទេចចោល ឬទុកដាក់ឲ្យមានរបៀប កុំឲ្យមានទឹកដក់។

វិធានការទី២៖ អាជីវករ និងម្ចាស់អាជីវកម្មទាំងឡាយ ដែលប្រកបរបរពាក់ព័ន្ធនឹងសំបកកង់ពិសេសសំបកកង់ឡាន និងសំបកកង់ម៉ូតូទាំងអស់ សូមធ្វើការគ្រប់គ្រងសំបកកង់ទាំងនោះឲ្យមានសុវត្ថិភាពចៀសផុតពីការដក់ទឹក ដោយមិនត្រូវទុកចោល ពាសវាលពាសកាល បង្កើតបានជាប្រភពកកើត និងជម្រកមូសខ្លាដ៏គ្រោះថ្នាក់បំផុត ដែលអំណោយផលដល់ការចម្លងជំងឺគ្រុនឈាមកើនឡើងនិងអាចឈានទៅរកការរាតត្បាតគ្រប់ពេលវេលា។ វិធីសាស្រ្តក្នុងការគ្រប់គ្រងសំបកកង់ ដោយសុវត្ថិភាពគ្មានសត្វមូសកកើត គឺត្រូវ៖ ដាក់គរត្រួតលើគ្នាគ្របដោយបន្ទះក្តាជិត ឬស្បៃមុង ចាក់ប្រេងម៉ាស៊ីនដែលខូចឈប់ប្រើប្រាស់ចូលឬចាក់ដីបំពេញ ជាពិសេសដាក់នៅក្រោមដំបូលដើម្បីការពារកុំឲ្យមានដក់ទឹក ដែលបង្កទៅជាប្រភពកកើត និងជំរកមូសខ្លា។

វិធានការទី៣៖ ត្រូវសម្អាតការដ្ឋានសំណង់ កុំឲ្យមានកន្លែងទឹកចូលជាជម្រកមូសខ្លា និងរក្សាអនាម័យល្អជានិច្ច។

វិធានការទី៤៖ ករណីមានរោគសញ្ញាក្តៅខ្លួនខ្លាំងភ្លាមៗត្រូវប្រញ៉ាប់នាំអ្នកជំងឺទៅរកសេវាថែទាំសុខភាពរដ្ឋ (សេវាសាធារណៈ) ដែលនៅជិតបំផុតជាបន្ទាន់ (មិនឲ្យយឺតជាង ៧២ម៉ោង បន្ទាប់ពីក្តៅខ្លួន) ដូចជា មណ្ឌលសុខភាព និងមន្ទីរពេទ្យ (សូមកុំសាកល្បងព្យាបាលអ្នកជំងឺគ្រុនក្តៅខ្លាំងភ្លាមៗនេះ ដោយខ្លួនឯង ឬពន្យាពេលតាមដានព្យាបាលជំងឺក្នុងសេវាឯកជនដែលគ្មាន សមត្ថភាពផ្នែកជំងឺគ្រុនឈាមឲ្យសោះ)។

ជំងឺគ្រុនឈាម អាចនឹងសម្លាប់អ្នកជំងឺបានគ្រប់ពេល ប្រសិនបើមិនទៅទទួលការព្យាបាលនៅសេវារដ្ឋឲ្យបានទាន់ពេលវេលា ឬព្យាបាលមិនមានជំនាញវិជ្ជាជីវៈ ឬបើមានប្រើប្រាស់ប្រភេទថ្នាំអាស្ពីរីន។

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានសម្តែងនូវការកោតសរសើរដល់មន្ត្រីបុគ្គលិកសុខាភិបាលទាំងអស់ ដែលបានខិតខំយ៉ាងសកម្មឆ្លើយតបនឹងជំងឺគ្រុនឈាមដោយអស់ពីកម្លាំងកាយ-ចិត្ត និងថ្លែងអំណរគុណយ៉ាងជ្រាលជ្រៅ ចំពោះប្រជាពលរដ្ឋ និងអាជ្ញាធរគ្រប់លំដាប់ថ្នាក់ ដែលបានយកចិត្តទុកដាក់អនុវត្តតាមការណែនាំខាងលើ ៕

ខាងក្រោមនេះជាសេចក្តីជូនដំណឹងរបស់ក្រសួងសុខាភិបាល៖

លោក នាង ផាត ជួបសំណេះសំណាលនិងពិភាក្សាឯកអគ្គរដ្ឋទូតអ៊ុយក្រែន ប្រចាំកម្ពុជា

ក្នុងជំនួបសម្តែងការគួរសមជាមួយ នាយឧត្តមសេនីយ៍ នាង ផាត រដ្ឋលេខាធិការ ក្រសួងការពារជាតិ នាព្រឹកថ្ងៃទី៩ ខែកក្កដា ឆ្នាំ២០១៩ លោក អូឡិចស៊ី សូកូភ្លី ឯកអគ្គរដ្ឋទូតអ៊ុយក្រែន ប្រចាំព្រះរាជាណាចក្រកម្ពុជា ដែលមាននិវាសដ្ឋាននៅទីក្រុងហាណូយ ប្រទេសវៀតណាម បានថ្លែងជំនួស មុខឲ្យរដ្ឋាភិបាល និងកងទ័ពអ៊ុយក្រែន ពិសេសក្រសួងការពារជាតិអ៊ុយក្រែន បានសំដែងនូវអំណរគុណយ៉ាងជ្រាលជ្រៅ ចំពោះក្រសួងការពារជាតិកម្ពុជា ដែលបានអនុញាតិឲ្យលោក បានចូលជួបសំដែងការគួរសម ដើម្បីបានពង្រឹងពង្រីក ចំណងទាក់ទងកិច្ចសហប្រតិបត្តិការ នៃការរឹតចំណងសាមគ្គីភាព មិត្តភាព រវាងកងទ័ពទាំងពីរ អ៊ុយក្រែន និងកម្ពុជាឲ្យកាន់តែមានភាពជិតស្និទ្ធ។

ឯកអគ្គរដ្ឋទូតអ៊ុយក្រែន បានបញ្ជាក់ថា ប្រទេសជាតិមួយមានសន្តិភាព សន្តិសុខ សុវត្ថិភាពគឺដោយសារមានកងទ័ពមួយក្លាហាន មានសំភារៈបច្ចេកទេសយោធាទំនើបៗ អាចទប់ទល់បានជាមួយសត្រូវដែលមានគោលបំណងមកឈ្លានពានបូរណភាពទឹកដីរបស់ខ្លួន។ លោក ក៏បានជំរាបលោករដ្ឋលេខាធិការឲ្យបានដឹងទៀតថា ដូចជាប្រទេសរបស់លោកបច្ចុប្បន្ន កំពុងទទួលរងនូវការឈ្លានពានពីសំណាក់ប្រទេសជិតខាងផងដែរ ក៏ព្រោះតែកងទ័ពអ៊ុយក្រែនមានសមត្ថភាពនៅមានកម្រិតនៅឡើយ។ លោក បានបន្តថា នាពេលខាងមុខក្រសួងការពារជាតិទាំង២ កម្ពុជា និងអ៊ុយក្រែន នឹងធ្វើការចុះអនុស្សារណៈធ្វើកិច្ចសហប្រតិបត្តិការ ដើម្បីរឹតចំណងសាមគ្គីភាព មិត្តភាព លើការជួយបណ្តុះបណ្តាល និងផ្គត់ផ្គង់សំភារៈបច្ចេកទេសយោធា។

នាយឧត្តមសេនីយ៍ នាង ផាត បានបញ្ជាក់ថា រវាងកងទ័ពយើងទាំង២ អ៊ុយក្រែន និងខ.ភ.ម ធ្លាប់មានប្រវត្តិទំនាក់ទំនងកិច្ចសហប្រតិបត្តិការល្អជាមួយគ្នា តាំងពីយូរណាស់មកហើយ ហើយយើងនឹងបន្តពង្រឹងពង្រីកកិច្ចសហប្រតិបត្តិការនេះឲ្យកាន់តែប្រសើរឡើងថែមទៀត។ លោកបានបន្តទៀតថា ពេលនេះកងទ័ពអ៊ុយក្រែន កំពុងធ្វើការពង្រឹងសមត្ថភាពរបស់ខ្លួនដើម្បីការពារទឹកដី។ ដើម្បីធ្វើជាហត្ថលេខី នៃការចុះអនុស្សារណៈ រវាងក្រសួងការពារជាតិ នៃប្រទេសទាំង២ កម្ពុជា-អ៊ុយក្រែន នាពេលខាងមុខនេះ លោករដ្ឋលេខាធិការ សង្ឃឹមថា បណ្តាប្រភេទជំនាញដែលមានការពាក់ព័ន្ធចំពោះខ្លឹមសារអនុស្សារណៈនឹងខិតខំពិនិត្យរួមគ្នាដើម្បីឈានទៅដល់ការព្រមព្រៀង និងចុះហត្ថលេខាក្នុងពេលឆាប់ៗនេះ៕

នៅព្រឹកថ្ងៃទី១១ ខែកក្កដា ស្អែកនេះ អង្គភាពអ្នកនាំពាក្យរាជរដ្ឋាភិបាលនឹងធ្វើសន្និសីទសារព័ត៌មានស្តីពី «បញ្ហាផ្ទុះជំងឺប៉េស្តជ្រូក» នៅទីស្តីការគណៈរដ្ឋមន្រ្តី

អង្គភាពអ្នកនាំពាក្យរាជរដ្ឋាភិបាល បានចេញសេចក្តីជូនដំណឹងជូនសាធារណជនក៏ដូចជាបណ្តាញសារព័ត៌មានគ្រប់និន្នាការថា នៅថ្ងៃទី១១ ខែកក្កដា ឆ្នាំ២០១៩ស្អែកនេះ វេលាម៉ោង៩និង៣០នាទី នៅជាន់ផ្ទាល់ដី សាលប្រជុំ B នៃទីស្តីការគណៈរដ្ឋមន្រ្តី នឹងមានរៀបចំសន្និសីទសារព័ត៌មានស្តីពី «បញ្ហាផ្ទុះជំងឺប៉េស្តជ្រូក»។

សូមអានសេចក្តីជូនដំណឹងខាងក្រោម៖

នៅថ្ងៃទី១២ កក្កដា លោកនាយករដ្ឋមន្រ្តី ហ៊ុន សែន នឹងអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី

នៅថ្ងៃទី១០ ខែកក្កដា ឆ្នាំ២០១៩ លោកនាយករដ្ឋមន្រ្តី ហ៊ុន សែន បានបញ្ជាក់តាមរយៈបណ្តាញសង្គមហ្វេស​ប៊ុកថា លោកបានចេញពីមន្ទីរពេទ្យប្រទេសសឹង្ហបុរីហើយកាលពីម្សិលមិញ ហើយនៅថ្ងៃនេះនឹងអញ្ជើញមកភ្នំពេញវិញដើម្បីរៀបចំដឹកនាំកិច្ចប្រជុំពេញអង្គគណៈរដ្ឋមន្រ្តីនៅថ្ងៃទី១២ ខែកក្កដា ឆ្នាំ២០១៩ខាងមុខនេះ។

លោកនាយករដ្ឋមន្រ្តី ហ៊ុន សែន បានសរសេរនៅក្នុង Facebook ថា «ជនរួមជាតិជាទីនឹករឮក និងកូនក្មួយជាទីស្រឡាញ់ ពុកបានចេញពីមន្ទីរពេទ្យមកនៅសណ្ឋាគារតាំងពីព្រឹកម្សិលម៉ិញម្ល៉េះ។ ថ្ងៃទី១០ កក្កដា នេះ នឹងត្រឡប់មកដល់ភ្នំពេញវិញ ដើម្បីដឹកនាំប្រជុំគណៈរដ្ឋមន្ត្រីនៅ ទី ១២ កក្កដា ២០១៩។ អរគុណបងប្អូនជនរួមជាតិ និងកូនក្មួយដែលបានជូនពរឬបារម្ភពីសុខភាពខ្ញុំ»៕

តុលាការចេញដីកាកោះ លោក សម រង្ស៉ី ឱ្យចូលបំភ្លឺនៅថ្ងៃ៣១ កក្កដា នេះ តបតាមបណ្តឹង ឧបនាយករដ្ឋមន្រ្តី ស ខេង

បន្ទាប់ពីកោះអញ្ជើញមេធាវី៣នាក់ ឱ្យចូលបំភ្លឺក្នុងនាមដើមបណ្តឹង តំណាងអយ្យការអមសាលាដំបូងរាជធានីភ្នំពេញ ក៏បានចេញដីកាមួយទៀត កោះហៅទណ្ឌិត សម រង្ស៉ី មេក្រុមឧទ្ទាមក្រៅច្បាប់ ឱ្យបំភ្លឺនៅព្រឹកថ្ងៃទី៣១ ខែកក្កដា ឆ្នាំ២០១៩ ខាងមុខនេះ តបតាមបណ្តឹងរបស់ លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ ដែលបានប្តឹង លោក សម រង្ស៉ី អំពីបទញុះញង់។
ដីកានេះចេញដោយ លោក សេង គឹមឡាក់ ព្រះរាជអាជ្ញារង នៃតំណាងអយ្យការអមសាលាដំបូងរាជធានីភ្នំពេញ ដោយកោះហៅ លោក សម រង្ស៉ី ឱ្យចូលបំភ្លឺ នៅម៉ោង៨៖៣០នាទីព្រឹក ថ្ងៃទី៣១ ខែកក្កដា ឆ្នាំ២០១៩ ខណៈដែលទណ្ឌិតរូបនេះ កំពុងរត់គេចខ្លួនទៅក្រៅប្រទេសនៅឡើយ។
សូមបញ្ជាក់ថា ក្រុមមេធាវីលោកឧបនាយករដ្ឋមន្រ្តី ស ខេង កាលពីថ្ងៃទី០២ ខែកក្កដា ឆ្នាំ២០១៩ បានដាក់ពាក្យបណ្តឹងមួយទៅកាន់សាលាដំបូងរាជធានីភ្នំពេញ ដើម្បីប្តឹងទណ្ឌិត សម រង្ស៉ី មេក្រុមប្រឆាំងជ្រុលនិយមនៅក្រៅប្រទេស អំពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍។ ក្នុងពាក្យបណ្តឹងនេះ លោកឧបនាយករដ្ឋមន្រ្តី ស ខេង បានទាមទារឱ្យតុលាការ ចាត់ការលោកសម រង្ស៉ី ទៅតាមផ្លូវច្បាប់ឱ្យបានធ្ងន់ធ្ងរបំផុត និងទាមទារសំណងជំងឺចិត្តចំនួន៤ពាន់លានរៀល ប្រហាក់ប្រហែលនឹង១លានដុល្លារអាមេរិក ចំពោះការញុះញង់របស់ លោក សម រង្ស៉ី។
ពាក្យបណ្តឹងនេះ ធ្វើឡើងបន្ទាប់ពីទណ្ឌិត សម រង្ស៉ី បានបង្ហោះសារលាបពណ៌ បំភ្លៃការពិត អំពីរឿងមរណភាពរបស់ លោក ហុក ឡង់ឌី។ លោក សម រង្ស៉ី បានមួលបង្កាច់ថា លោកនាយករដ្ឋមន្ត្រី ហ៊ុន សែន ជាអ្នកសម្លាប់លោក ហុក ឡង់ឌី ហើយភូតទៀតថាពេលនេះ លោក ឌី វិជ្ជា ដែលជាកូនប្រុសរបស់ លោក ហុក ឡង់ឌី កំពុងរៀបចំផែនការសងសឹក ដោយមានការគាំទ្រពីលោកឧបនាយករដ្ឋមន្រ្តី ស ខេង។
លោកឧបនាយករដ្ឋមន្រ្តី ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅថ្ងៃទី០៨ ខែកក្កដា ឆ្នាំ២០១៩នេះ បានបញ្ជាក់ថា ការដាក់ពាក្យប្តឹង លោក សម រង្ស៉ី មេក្រុមប្រឆាំងជ្រុលនិយម ទៅតុលាការនាថ្មីៗនេះ គឺជាបណ្តឹងលើកដំបូងរបស់លោកឧបនាយករដ្ឋមន្រ្តី ក្នុងមួយឆាកជីវិតនេះ។

លោកឧបនាយករដ្ឋមន្រ្តីបានបញ្ជាក់ថា ការដាក់ពាក្យប្តឹងទណ្ឌិត សម រង្ស៉ីនេះ គឺជាការដាស់តឿនស្មារតីដល់អ្នកនយោបាយមួយចំនួន ឲ្យប្រកាន់ខ្ជាប់នូវ សេចក្តីថ្លៃថ្នូរ សីលធម៌ និងគុណធម៌ក្នុងវិជ្ជាជីវៈ ចៀសវាងការប្រឌិតព័ត៌មាន ដើម្បីញុះញង់បំផុសបំផុល ក្នុងចេតនាទុច្ចរិតមួលបង្កាច់ និងបំបែកបំបាក់ ដើម្បីបំពេញគោលបំណង និងមហិច្ឆិតាអគតិរបស់ខ្លួន និងក្រុមខ្លួន៕

ក្រសួងការងារ និងអង្គការ GIZ សហការអនុវត្តកម្មវិធី «គម្រោងពង្រឹងនិរន្តរភាពវិស័យវាយនភណ្ឌ និងកាត់ដេរនៅទ្វីបអាស៊ី»

ក្រសួងការងារ និងបណ្តុះបណ្តាលវិជ្ជាជីវៈ និងអង្គការ GIZ បានចុះហត្ថលេខាលើអនុស្សរណៈនៃការយោគយល់គ្នាស្ដីពីការអនុវត្តកម្មវិធី «គម្រោងពង្រឹងនិរន្តរភាពវិស័យវាយនភណ្ឌ និង កាត់ដេរនៅទ្វីបអាស៊ី» (GIZ, FABRIC) នៅកម្ពុជា ក្រោមអធិបតីភាពជាសាក្សី លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី៩ ខែកក្កដា ឆ្នាំ២០១៩ នៅទីស្តីការក្រសួង។ ពិធីនេះ ចុះហត្ថលេខាបានធ្វើឡើងដោយលោក ម៉ម វណ្ណៈ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងលោកបណ្ឌិត Guenter Riethmacher នាយក GIZ ប្រចាំប្រទេសកម្ពុជា។

លោក អ៊ិត សំហេង បានថ្លែងអំណរគុណដល់អង្គការ GIZ ដែលតែងតែផ្តល់ការគាំទ្រទាំងថវិកាក៏ដូចជាអ្នកជំនាញបច្ចេកទេសជួយដល់កម្ពុជា ជាពិសេសក្រសួងការងារ និងបណ្តុះបណ្តាលវិជ្ជាជីវៈនាពេលកន្លងមក។ លោក ពេញចិត្តចំពោះការអនុវត្តគម្រោង GIZ ក៏ដូចជាការជួយរបស់រដ្ឋាភិបាលអាល្លឺម៉ង់មកដល់កម្ពុជាពិសេសវិស័យការងារ និងបណ្តុះបណ្តាលវិជ្ជាជីវៈ។
ភាគី GIZ ពេញចិត្តនឹងកិច្ចសហប្រតិបត្តិការ នូវការផ្តល់ជំនួយក្នុងការអនុវត្តគម្រោងឱ្យទទួលជោគជ័យបន្ថែមទៀត។ ភាគីទាំងពីរបានបង្ហាញការរីករាយចំពោះកិច្ចសហការនេះ និងសន្យាបន្តកិច្ចការងារនេះបន្ថែមទៀតទៅលើគម្រោងដើម្បីឈានសម្រេចបានភាពជោគជ័យ ស្របតាមគោលនយោបាយរបស់រាជរដ្ឋាភិបាលកម្ពុជា ក៏ដូចជាផែនការយុទ្ធសាស្រ្តរបស់ក្រសួងការងារនិងបណ្តុះបណ្តាលវិជ្ជាជីវៈ។

សូមបញ្ជាក់ថា អនុស្សរណៈនៃការយោគយល់គ្នា ស្ដីពីការអនុវត្តកម្មវិធី «គម្រោងពង្រឹងនិរន្តរភាពវិស័យវាយនភណ្ឌ និងកាត់ដេរនៅទ្វីបអាស៊ី» (GIZ, FABRIC) នៅកម្ពុជាមានរយៈពេល ចាប់ពីថ្ងៃទី០១ ខែមេសា ឆ្នាំ២០១៩ ដល់ថ្ងៃទី៣១ មីនា ឆ្នាំ២០២១ ដែលមានថិវកា គិតជាទឹកប្រាក់សរុបចំនួន ៦លានអឺរ៉ូ សម្រាប់ប្រទេសបង់ក្លាដេស កម្ពុជា ចិន មីយ៉ាន់ម៉ា ប៉ាគីស្ថាន និងវៀតណាម។

គោលបំណងនៃអនុស្សរណៈនៃការយោគយល់គ្នានេះ រួមមាន៖
– គាំទ្រដល់បណ្តាស្ថាប័នរដ្ឋ និងឯកជន ដើម្បីផ្លាស់ប្តូរព័ត៌មាន កិច្ចសន្ទនា និងកិច្ចសហប្រតិបត្តិការថ្នាក់តំបន់ ថ្នាក់ជាតិ និងកម្រិតសហគ្រាស គ្រឹះស្ថានដើម្បីពង្រឹងអនុលោមភាពតាមបទដ្ឋានសង្គម និងការងារដូចមានចែងនៅក្នុងច្បាប់ស្តីពីការងារនៅព្រះរាជាណាចក្រកម្ពុជា និងអនុសញ្ញាអន្តរជាតិនានាដែលកម្ពុជាបានផ្តល់សច្ចាប័ន និងធ្វើឱ្យប្រសើរឡើងនូវសមភាពយេនឌ័រនៅកន្លែងធ្វើការ។
– ផ្ដល់ជំនួយគាំទ្រផ្នែកហិរញ្ញវត្ថុ និងបច្ចេកទេសពីគម្រោង GIZ, FABRIC ដល់ ក្រសួងការងារ និងបណ្តុះបណ្តាលវិជ្ជាជីវៈ ដើម្បីពង្រឹងប្រព័ន្ធអធិការកិច្ចការងារនៅកម្ពុជាឱ្យកាន់តែមានសមត្ថភាព តម្លាភាព ប្រសិទ្ធភាព និងទទួលបានការជឿជាក់ពីគ្រប់ភាគីពាក់ព័ន្ធ។
– ផ្តល់ជំនួយបច្ចេកទេសដល់ ក្រសួងការងារ និងបណ្តុះបណ្តាលវិជ្ជាជីវៈ សម្រាប់អនុវត្តសកម្មភាពទាំងឡាយដែលគាំទ្រដល់ផែនការយុទ្ធសាស្ត្របញ្ជ្រាបយេនឌ័រក្នុងវិស័យការងារ និងបណ្តុះបណ្តាល វិជ្ជាជីវៈដើម្បីលើកកម្ពស់សមភាពយេនឌ័រ និងផ្តល់សិទ្ធិអំណាចដល់ស្ត្រីដែល ធ្វើការក្នុងវិស័យវាយនភណ្ឌ និងកាត់ដេរ៕

ពិធី«រុក្ខទិវា»ទូទាំងប្រទេស បានបំផុសពីការស្រលាញ់ដើមឈើ និងលើកស្ទួយសម្រស់ធម្មជាតិ

សៀមរាប៖ នៅថ្ងៃទី០៩ ខែកក្កដា ឆ្នាំ២០១៩ អាជ្ញាធរជាតិអប្សរា បានបន្តដាំកូនឈើគ្រញូង និងគគីរចំនួន៥០០០ដើម នៅបរិវេណព្រៃខាងកើតប្រាសាទបន្ទាយប្រីយ៍ ដោយមានការចូលរួមពីរដ្ឋបាលខេត្តសៀមរាប ព្រះសង្ឃ កាយរិទ្ធនារីកម្ពុជា លោកគ្រូអ្នកគ្រូ គរុសិស្ស និងពុទ្ធបរិស័ទប្រមាណជា៥០០អង្គ/នាក់។

ពិធីដាំដើមឈើនេះគឺធ្វើឡើងស្របពេលនឹងការប្រារព្ធពិធី «រុក្ខទិវា» ទូទាំងប្រទេស ដើម្បីបំផុសគំនិត និងដាស់តឿនស្មារតីមហាជនគ្រប់ស្រទាប់វណ្ណៈឱ្យចូលរួមដាំដើមឈើឡើងវិញ ជៀសវាងការកាប់បំផ្លាញព្រៃដែលជាជម្រកសត្វនិងជារនាំងការពារបុរាណដ្ឋានពីហានិភ័យនៃគ្រោះថ្នាក់ធម្មជាតិផ្សេងៗ។

ក្នុងឱកាសនៃការដាំកូនឈើនោះ ព្រះតេជគុណ ពេជ្រ ដេវីត គង់នៅវត្តពោធិ៍លង្កា មានសង្ឃដីកាថា ដើមឈើពិតជាមានសារៈសំខាន់ណាស់ ព្រោះផ្តល់ជម្រកដល់មនុស្សសត្វ ផ្តល់ខ្យល់អាកាសបរិសុទ្ធ ជារនាំងបាំងខ្យល់ព្យុះ ការពារទឹកជំនន់ និងនាំទឹកភ្លៀងសម្រាប់បង្កបង្កើនផលចិញ្ចឹមជីវិតសត្វលោក។ ព្រះអង្គក៏សូមអំពាវនាវដល់ប្រជាពលរដ្ឋទាំងអស់ គប្បីចូលរួមដាំដើមឈើទាំងអស់គ្នា ចូលរួមថែរក្សាការពារ ស្រឡាញ់ព្រៃឈើ និងបរិស្ថានធម្មជាតិឱ្យបានច្រើនជាជាងការកាប់បំផ្លាញ។

អ្នកមីង ចៅ តូច ប្រជាពលរដ្ឋរស់នៅស្រុកប្រាសាទបាគង ដែលជួយផ្គត់ផ្គង់ភេសជ្ជៈសម្រាប់អ្នកចូលរួមដាំដើមឈើទាំងអស់បានបង្ហាញនូវភាពរីករាយថា យើងដាំដើមឈើច្រើនគឺជួយដល់សង្គមជាតិទាំងមូលឱ្យមានភាពបៃតង ព្រោះដើមឈើផ្តល់ភ្លៀង ធ្វើឱ្យដំណាំបានផលល្អ សម្រស់ធម្មជាតិស្រស់ផូរផង់។

ក្នុងនាមអាជ្ញាធរជាតិអប្សរា លោក ជូ រ៉ាឌីណា អនុប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថានបានប្រាប់ថា នេះជាលើកទី៥ហើយ នៃយុទ្ធនាការដាំដើមឈើចំនួន៤០០០០ដើម នៅក្នុងរមណីយដ្ឋានអង្គរនារដូវវស្សាឆ្នាំ២០១៩នេះ។ បើគិតពីដើមឆ្នាំ២០១៩មកដល់ពេលនេះ យើងបានដាំដើមឈើចំនួន៧៣០០ដើមហើយ ហើយក៏បានចែកជូនកូនឈើដល់ប្រជាពលរដ្ឋចំនួន៣០៣៩៧ដើមដែរ ដែលនេះជាជោគជ័យមួយបង្ហាញអំពីការស្រឡាញ់បរិស្ថាន ស្រឡាញ់ធម្មជាតិ ដើម្បីទប់ស្កាត់ការប្រែប្រួលអាកាសធាតុផង និងការពារប្រាសាទបុរាណផង។

សូមបញ្ជាក់ថា អាជ្ញាធរជាតិអប្សរានឹងបន្តបណ្តុះកូនឈើគ្រប់ប្រភេទរួមទាំងកូនឈើប្រណីត និងកូនឈើដែលងាយស្រួលដាំក្នុងគោលបំណងចែកជូនអង្គភាព ស្ថាប័នរដ្ឋ និងប្រជាពលរដ្ឋគ្រប់មជ្ឈដ្ឋានដែលមានបំណងចង់យកទៅដាំតាមសហគមន៍ ភូមិស្រុក និងវត្តអារាមដើម្បីលើកស្ទួយភាពស្រស់បំព្រងនិងការពារគ្រោះធម្មជាតិផ្សេងៗ៕

កម្ពុជា-អាមេរិក បន្តពង្រឹងទំនាក់ទំនងពាណិជ្ជកម្មទ្វេភាគី

ទំនាក់ទំនងពាណិជ្ជកម្មរវាងកម្ពុជា-អាមេរិក នៅតែមានលក្ខណៈវិជ្ជមាន មិនមានសញ្ញាណថមថយឡើយ ខណៈភាគីទាំងពីរបានបង្ហាញឆន្ទៈក្នុងការបន្តពង្រឹងកិច្ចសហប្រតិបត្តិការលើវិស័យធុរកិច្ច និងវិនិយោគ រាប់ចាប់តាំងពីទំនិញប្រើប្រាស់ប្រចាំថ្ងៃ រហូតដល់សេវាកម្មបច្ចេកវិទ្យា និងពាណិជ្ជកម្មអេឡិចត្រូនិក។ នេះបើតាមកិច្ចពិភាក្សារវាងលោក ប៉ាន សូរស័ក្តិ និងគណៈប្រតិភូក្រុមប្រឹក្សាធុរកិច្ចអាមេរិក-អាស៊ាន (US-ABC) ដឹកនាំដោយលោក Alexander Feldman និងមានការចូលរួមពីលោក Michael Newbill ភារធារីនៃស្ថានទូតអាមេរិក ប្រចាំនៅកម្ពុជា។

នៅក្នុងជំនួបធ្វើឡើងនៅទីស្តីការក្រសួងពាណិជ្ជកម្ម កាលពីរសៀលថ្ងៃទី៨ ខែកក្កដា ឆ្នាំ២០១៩ លោក Alexander Feldman រួមជាមួយតំណាងសាជីវកម្មធំៗរបស់អាមេរិក មានដូចជា ConocoPhillips, Ford, General Electric (GE), Chevron, Coca-Cola, Facebook, Amazon Web Service, Oracle, Google, Master Card និង Visa Card សុទ្ធតែបានបង្ហាញសុទិដ្ឋិនិយមចំពោះទីផ្សារកម្ពុជា និងមានបំណងបណ្តាក់ទុនបន្ថែម ដើម្បីជំរុញកំណើនសេដ្ឋកិច្ច និងពាណិជ្ជកម្មនៃប្រទេសទាំងពីរ។ យ៉ាងណាក៏ដោយ ការអនុវត្តស្តង់ដាររថយន្តអាស៊ាន នីតិវិធីនាំចូលសម្ភារបរិក្ខាពេទ្យ និងគ្រឿងម៉ាស៊ីនសម្រាប់បម្រើវិស័យអាកាសចរណ៍ ការទប់ស្កាត់សកម្មភាពរត់ពន្ធផលិតផលកូកា-កូឡាឆ្លងដែន, ពាណិជ្ជកម្មអេឡិចត្រូនិក និងការអភិវឌ្ឍសេដ្ឋកិច្ចឌីជីថល គឺជារបៀបវារៈដែលបានលើកឡើងដោយភាគីអាមេរិក។

ជាការឆ្លើយតប លោករដ្ឋមន្ត្រី ប៉ាន សូរស័ក្តិ បានសម្តែងការស្វាគមន៍ចំពោះគណៈប្រតិភូ US-ABC និងបានជម្រាបជូនលោក Alexander Feldman និងតំណាងសាជីវកម្មទាំងអស់ អំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការដាក់ចេញនូវយុទ្ធសាស្ត្រ និងកម្មវិធីកំណែទម្រង់នានា ដើម្បីលើកកម្ពស់ឧត្តមភាពប្រកួតប្រជែងរបស់កម្ពុជា និងការពារអត្ថប្រយោជន៍ជូនវិស័យឯកជន ដែលជាក្បាលម៉ាស៊ីនដ៏សំខាន់នៃកំណើនសេដ្ឋកិច្ចជាតិ។

លោករដ្ឋមន្ត្រី បានធ្វើការបកស្រាយនូវសំណួរទាំងឡាយរបស់តំណាងសាជីវកម្មអាមេរិក និងបានគូសបញ្ជាក់ពីប្តេជ្ញាចិត្តរបស់ក្រសួងពាណិជ្ជកម្ម ក្នុងការបន្តលើកស្ទួយបរិយាកាសធុរកិច្ច និងវិនិយោគ ព្រមទាំងកិច្ចសម្រួលពាណិជ្ជកម្ម ដើម្បីទាក់ទាញការវិនិយោគបន្ថែមពីបរទេស។ លោក ក៏បានជម្រាបជូនគណៈប្រតិភូ US-ABC ពីភាពដឹកនាំរបស់ក្រសួងពាណិជ្ជកម្ម នៅក្នុងការចរចាបង្កើតកិច្ចព្រមព្រៀងពាណិជ្ជកម្មសេរីអាស៊ាន និងដៃគូ រួមមាន អាស៊ាន +១, អាស៊ាន +៣ និងអាស៊ាន +៦ ព្រមទាំងកិច្ចប្រឹងប្រែងលុបបំបាត់របាំងពន្ធគយ និងគោលនយោបាយគាំពារនិយម ជាដើម។

សូមជម្រាបថា កាលពីឆ្នាំ២០១៨ កន្លងទៅ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបាន ៤,២៦៤លានដុល្លារ គឺបានកើនឡើងប្រមាណ ២៣% ធៀបនឹងឆ្នាំ២០១៧។ ទន្ទឹមគ្នានេះ គិតត្រឹមខែមេសា ឆ្នាំ២០១៩ ទំហំពាណិជ្ជកម្មសរុបនៃប្រទេសទាំងពីរ សម្រេចបានទឹកប្រាក់ ១,៦៥៦លានដុល្លារ គឺបានកើនឡើង ២៣,៧១% ធៀបនឹងរយៈពេលដូចគ្នា នៅក្នុងឆ្នាំ២០១៨៕