Thursday, February 05, 2015

កម្ពុជា​និង​កូរ៉េចង់​បង្កើត​ឱ្យមាន​​សហគមន៍​វប្បធម៌អាស៊ី

ក្នុងកិច្ចជំនួបពិភាក្សា​ក្រោយពីបើកសន្និសីទពិភពលោក ស្ដីពីទេសចរណ៍​និងវប្បធម៌​របស់អង្គការទេសចរណ៍​ពិភពលោក​និង​អង្គការ​យូណេស្កូ​​រ​កាលពី​រសៀលថ្ងៃទី០៤ ខែ កុម្ភៈ​ ឆ្នាំ ២០១៥ ឯកឧត្ដម ឧបនា​យករដ្ឋមន្រ្តី សុខ អាន រដ្ឋមន្រ្តីទទួល​បន្ទុកទីស្ដី​ការគណៈរដ្ឋ​មន្រ្តីបាន​ជំរាបជូន ឯកឧត្ដម គីម ខ្វាន់យ៉ុង រដ្ឋមន្រ្តីវប្បធម៌នៃ​សាធារណៈរដ្ឋកូរ៉េ​ ​  ពី​ការបង្កើតឱ្យមាន​សហគមន៍វប្បធម៌អាស៊ីដើម្បីរឹតចំណងសាមគ្គីភាពទំនាក់ទំនងគ្នា​ជាមួយនិង​ប្រទេសដែលមាន​វប្បធម៌អរិយយធម៌យូរអង្វែង​។ តាមរយៈ​វប្បធម៌​បង្កើត​ជាកម្មវិធីពិសេសៗដូចជាកម្មវិធីយុវជន​សម្ដែងរួមគ្នានូវសកម្មភាពរបស់​យុវជនរវាងប្រទេសនីមួយៗ​ទៅតាមកម្មវិធី​ប្រពៃណីទំនៀមទំលាប់​របស់ប្រទេស​នីមួយៗ ។ ជាក់ស្តែងប្រទេសកម្ពុជាមានកម្មវិធីអង្គរសង្រ្កាន្ត ​​​។​ហើយកម្ពុជាស្វាគមន៍​ចំពោះយុវជនប្រទេស​ណាដែ​លមានសិល្បះប្រពៃណីផ្សេងៗ​មកចូលរួម​ក្នុងកម្មវិធីជាមួយ​គ្នាដើម្បីផ្លាស់ប្តូរវប្បធម៌​​ប្រពៃណី​សំរាប់បង្កើនកិច្ចសហប្រតិបត្តិការ​ផ្លាស់ប្តូរពត៌មានគ្នាទៅវិញទៅមកឱ្យបានយល់ដឹង​នូវរបកគំហើញថ្មីៗនៃ​ប្រវត្តិសាស្រ្តក្នុង​តំបន់ដើម្បី​អភិវឌ្ឍន៍វប្បធម៌មួយឱ្យទៅជាវប្បធម៌មានលក្ខណៈជារបស់ អាស៊ី។

ឯក​ឧត្ដម ឧបនា​យករដ្ឋមន្រ្តី ​មានប្រសាសន៏ថាការពង្រឹងវប្បធម៌សន្ទនាដោយការដោះដូរ ទស្សនៈកិច្ចពីប្រទេសមួយទៅប្រទេសមួយតាមរយៈយុវជន​វប្បធម៌ដើម្បីឱ្យយល់ដឹង​ពីវប្បធម៌ពីប្រទេសផ្សេងៗក្នុងការរៀបចំសម្ដែងកម្មវិធីតាមវប្បធម៌រៀងៗខ្លួនជាលក្ខណៈមហាជននិងសហគមន៍។ ឱ្យវប្បធម៌នេះក្លាយជាស្ពាន​ភ្ជាប់គ្នារវាងអាស៊ីដូចគ្នា​ដែលមានវប្បធម៌ប្រពៃណីខុសគ្នា​បង្កើតជាភាសាវប្បធម៌ជាភាសាសន្តិភាពនិងចង់ឱ្យវប្បធម៌បង្ក្រាបហឹង្សាភ្លើងកំហឹងទាំងឡាយ យកជំនួសវិញដោយសន្តិភាព។

  បន្ទាប់ពីជំនួបពិភាក្សានេះដែរ អាជ្ញាធរអប្សរាបានចុះហត្ថលេខាជាមួយ អង្គការ​ទេសចរណ៍​ពិភពលោក  ​ផ្ដោតសំខាន់​​ក្នុងការជួយដល់យុវជន​ប្រជាជន​ដែលរស់នៅ​ក្នុងតំបន់​ទេសចរណ៍វប្បធម៌ឱ្យ​យល់​ដឹងពីអ្វីដែល​បង្ហាញពីអត្តសញ្ញាណ​របស់ខ្លួននិងបង្កើតចលនាកាត់​បន្ថយភាពក្រីក្រ ក្នុងផ្នែក​ទេសចរណ៍​និងបន្តកិច្ច​សហប្រតិបត្តិការ​រវាងអាជ្ញាធរ​អប្សរាជាមួយអង្គការ​ទេសចរណ៍​ពិភពលោក​និងសាធារណៈរដ្ឋកូរ៉េ។ ឯកឧត្ដម ឧបនាយករដ្ឋមន្រ្តី សុខ អាន មានប្រសាសន៍ថា ការតភ្ជាប់​យុវជនក្នុង​ជំនាន់អាជ្ញាធ​រអប្សរាជាមួយ អង្គការ​ទេសចរណ៍​ពិភពលោកគឺបង្ហាញពី​ការអភិវឌ្ឍន៍​បែបថ្មី​មួយទៀត ដែលកម្ពុជាពីមុនធ្វើអ្វីតែម្នាក់​ឯងប៉ុន្តែឥឡូវនេះកម្ពុជាធ្វើការងារ​ជាមួយពិភពលោក។ កម្ពុជា​និងកូរ៉េមានប្រវត្តិប្រហាក់​ប្រហែល​គ្នា​​ពីរាជវង្សនីមួយៗ​តាំងពីសមយ័អង្គរមក ការចុះហត្ថលេខានា​ពេលនេះ​គឺជាគ្រឹះរឹងមាំបន្ថែមទៀត​កម្ពុជានិងកូរ៉េចាប់​ដៃគ្នានាំមិត្តភក្តិអាស៊ីនិយាយភាសាវប្បធម៌​។

អត្ថបទ: ខេមរា

កម្ពុជា​ទទួល​ធ្វើម្ចាស់​ផ្ទះក្នុង​ការរៀប​ចំសន្និ​សីទ​ពិភព​លោក ស្តីពី​ទេសចរណ៍ និង​វប្បធម៌ នៅទឹកដី វប្បធម៌​ប្រវត្តិ​សាស្រ្ត​របស់កម្ពុជា

សន្និសីទពិភពលោក ស្តីពីទេសចរណ៍ និងវប្បធម៌ ក្រោម​ប្រធានបទៈ បង្កើត​ភាពជា ដៃគូថ្មី ត្រូវបានបើកជាផ្លូវការហើយ នាព្រឹកថ្ងៃទី ០៤ កុម្ភៈនេះ នៅលើទឹកដី សៀមរាបអង្គរ ទឹកដីនៃបេតិកភណ្ឌវប្បធម៌ប្រវត្តិសាស្រ្តរបស់កម្ពុជា។​

​​សន្និសីទ​ថ្នាក់​​​ពិភពលោក ​រយៈពេល៣ថ្ងៃ ចាប់ពីថ្ងៃទី ៤​ដល់ថ្ងៃទី៦ កុម្ភៈ​ ឆ្នាំ២០១៥ ដែលមានអ្នកចូល​រួម​ចំនួន ១១០៧រូប មកពីថ្នាក់ដឹក​នាំ​គណៈ​​ប្រតិភូ នៃ​វិស័យ​ទេសចរណ៍ និង​វប្បធម៌ និងមានវាគ្មិន​​អន្តរជាតិល្បីៗមកពី៩៩ប្រទេស។ ក្នុង​នោះ​រដ្ឋ​មន្ត្រី​ចំនួន៤១រូប មក​ពី​៣៨ប្រទេស ដែលមានរដ្ឋមន្ត្រីទេសចរណ៍១៧រូប រដ្ឋ​មន្ត្រី​​​​វប្បធម៌១៥រូប រដ្ឋមន្ត្រី​​ទេស​​ចរណ៍ និង​វប្បធម៌៧រូប ថ្នាក់អគ្គនាយក២រូប ។ សន្និ​សីទ​នេះ ក៏មានដែរ ការចូលរួម ពីសាស្ត្រាចារ្យ និស្សិតនិង ផ្នែកឯកជន ។​

​​ថ្លែងបើកក្នុងសន្និសីទពិភពលោក ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថាសន្និសីទ​ដែល​ត្រូវបាន ប្រារព្ធ​ឡើង​ជា​ប្រវត្តិសាស្ត្រ លើកដំបូងរបស់ខ្លួននៅថ្ងៃនេះ មិនត្រឹមតែឆ្លុះ​បញ្ចាំងពីកាអភិវឌ្ឍ ដែលផ្សារភ្ជាប់ ជាមួយនឹង វិស័យទេសចរណ៍ ប៉ុណ្ណោះទេ ប៉ុន្តែថែមទាំង បានឆ្លុះបញ្ចាំងពីកិច្ចសហប្រតិបត្តិការ យ៉ាងជិតស្និត រវាងអង្គការ​ទេសចរណ៍ពិភពលោក និងអង្គការយូណេស្កូ ក្នុងបុព្វហេតុរួម  តែ​មួយគត់គឺរួមគ្នា ចូលរួម សម្រេចឱ្យបាននូវគោលដៅអភិវឌ្ឍន៍សហស្សវត្សរ៍ និងការត្រៀមខ្លួន សម្រេច ឱ្យបាននូវគោលដៅអភិវឌ្ឍន៍ក្រោយឆ្នាំ២០១៥ របស់អង្គការសហ​ប្រជា​ជាតិ ។ សម្តេចតេជោ ហ៊ុន សែន ស្នើឲ្យ អង្គសន្និសីទទាំងមូល យកចិត្តទុក​ដាក់​លើ​មូលដ្ឋានសំខាន់ពីរ ដែលត្រូវដើរទន្ទឹមគ្នាគឺ ការបង្កើនឧត្តមភាព ប្រកួតប្រជែង នៃគោលដៅទេសចរណ៍ វប្បធម៌ និងការ ធានាឱ្យបាននូវ ចិរភាព ដែលកើតចេញ​ពីការ​អភិវឌ្ឍ វិស័យទេសចរណ៍ វប្បធម៌នេះ ។

​​សម្តេចតេជោ នាយករដ្ឋមន្ត្រី​បាន​​​ផ្តល់ជាសារគន្លឹះដល់អង្គសន្និសីទ ដែលចាំ​​បាច់បន្តខិតខំជំរុញឱ្យវិស័យទេសចរណ៍ និងវប្បធម៌ ឱ្យប្រតិបត្តិការរួមគ្នា សម្រាប់​​ជំរុញ កំណើន និងការបែងចែក ផ្លែផ្កានៃកំណើន ប្រកបដោយសមធម៌ ។ ក្នុងនោះ ដែរវិស័យទេសចរណ៍ និងវប្បធម៌ ត្រូវបំរើឱ្យការថែរក្សាបេតិកភណ្   វិស័យ​​ទេស​​​ចរណ៍ និងវប្បធម៌ ត្រូវរួមគ្នា ដើម្បីឧត្តមភាព ប្រកួតប្រជែង គោល​ដៅ​ទេស​ចរណ៍ និង​ ការកសាងនូវវប្បធម៌សន្តិភាព។

​សម្តេចតេជោ នាយករដ្ឋមន្ត្រី បានស្នើឱ្យក្រសួងទេសចរណ៍ និងក្រសួង វប្បធម៌ និងវិចិត្រសិល្បៈ ដោយសហការជាមួយ ក្រសួងឧស្សាហកម្ម និងសិប្បកម្ម ព្រមទាំង ដៃគូអភិវឌ្ឍន៍ និងវិស័យឯកជន ត្រូវយកចិត្តទុកដាក់ បង្កលក្ខណៈ​ងាយ​ស្រួល ជូនប្រជាជន ដោយដាក់ចេញ នូវកម្មវិធីថ្នាក់ជាតិមួយ​​សំដៅជំរុញ​​​លើកទឹក​​​ចិត្ត  បណ្តុះនូវគំនិត ផ្តួចផ្តើម  និងការច្នៃប្រឌិត ដើម្បីបង្កើតឱ្យចេញជា​​ផលិត​​​ផល​​ទេសចរណ៍ វប្បធម៌ថ្មីៗ ជាលក្ខណៈ វត្ថុអនុស្សាវរីយ៍ទេសចរណ៍ ដែលបង្ហាញនូវ​​​វប្បធម៌ និងប្រពៃណីរស់នៅ របស់ប្រជាជនតាមតំបន់ផ្សេងៗគ្នា និងប​ង្ហាញពី​​​សិល្បៈ របាំ , ចម្រៀងប្រពៃណី , ម្ហូមខ្មែរ ,ផ្លែឈើ។ល។ រាជរដ្ឋាភិបាលកម្ពុជា មាន​​​ជំនឿ​​​យ៉ាងមុតមាំថា ការអភិវឌ្ឍវិស័យទេសចរណ៍ ប្រកបដោយការ​ទទួលខុស​​ត្រូវ និងប្រកបដោយបរិយាប​ន្ន នឹងចូលរួមដល់ការអភិរក្ស ថែរក្សា នូវ សម្បត្តិ បេតិក​​​ភណ្ឌ និងលើកតំកើង នូវតម្លៃ នៃគោលដៅ ទេសចរណ៍ ហើយប្រការទាំងនេះ នឹង ធ្វើឱ្យវិស័យទេសចរណ៍ និងវប្បធម៌ ចូលរួម ដល់ការអនុវត្តនូវគោលដៅ អភិវឌ្ឍន៍ ក្រោយឆ្នាំ ២០១៥ របស់អង្គការសហប្រជាជាតិ។

​​តាមការឲ្យដឹងពី ឯកឧត្តម ថោង ខុន រដ្ឋមន្រី្តក្រសួងទេសចរណ៍ឲ្យដឹងថា គោល​បំណងនៃសន្និសិទ្ធនេះគឺដើម្បី កំណត់កាលានុវត្តភាព និង​បញ្ហា​​​ប្រឈម សំខាន់ៗ ដើម្បី​​ពង្រឹងកិច្ចសហប្រតិបត្តិការ រវាងវិស័យទេសចរណ៍ និង​វិស័យវប្បធម៌ ឲ្យកាន់​​តែ ខ្លាំងក្លាពិភាក្សាអំពីគំរូភាពជាដៃគូថ្មី ក្នុងការពង្រឹង​​​ទំនាក់​ទំនង សេដ្ឋកិច្ច-សង្គម, ការពង្រឹង ការអនុវត្តរួមគ្នា ដើម្បីលើកកំពស់ បកស្រាយ ការពារ និងអភិរក្ស​​វប្បធម៌ ដែលរួមបញ្ចូលទាំងសម្បត្តិបេតិកភណ្ឌ និង​ឧស្សា​​​ហកម្មកែច្នៃ ព្រមទាំង​កសាងទេសចរណ៍វប្បធម៌ សម្រាប់ការអភិវឌ្ឍប្រកប ដោយ​និរន្តរភាព។  ​​​

នៅក្នុងអំឡុងពេលនៃសន្និសីទពិភពលោកនេះ និងមាន កិច្ចប្រជុំ​២សំខាន់ រួម​មាន កិច្ចសន្ទនា ថ្នាក់រដ្ឋមន្ត្រី ក្រោមប្រធានបទ គំរូនៃការបង្កើតដៃគូថ្មីនិង កិច្ច​​ពិភាក្សា​​​​ថ្នាក់បច្ចេកទេស ។ អង្គសន្និសីទ នឹងដាក់ចេញសេចក្តីថ្លែងការណ៍​សៀម​​រាប​​​​ស្តីពីទេសចរណ៍ និងវប្បធម៌ ដោយរំពឹង ថាខ្លឹមសារ នៃសេចក្តីថ្លែងការណ៍​នេះ​នឹងក្លាជាធាតុចូល ដ៏មានសារៈសំខាន់បន្ថែមទៀត សម្រាប់ជា ឯកសារយោង ក្នុងការរៀបចំ​ផែនការ​អភិវឌ្ឍ និងអភិរក្សទេសចរណ៍វប្បធម៌ ប្រកបដោយ និរន្តរ​ភាព និងការទទួល​ខុស​ត្រូវ។

គួរបញ្ជាក់ថា ​​​សៀមរាប-អង្គរ ត្រូវបាន​ទទួល​ស្គាល់ និង​ចាត់​ថ្នាក់ជាជា​ទីក្រុង​​​គោលដៅទេសចរណ៍​ប្រកបដោយភាពទាក់ទាញលំដាប់ទី ៤ នៅលើសកល​លោក និង​លំដាប់ទី ២ នៅក្នុងអាស៊ី បន្ទាប់ពីទីក្រុង Kyoto បើតាមការ​វាយ​តម្លៃ​របស់​ទស្សនា​​វដ្តី Travel and Leisure ហើយអង្គរក៏បានជាប់ពានរង្វាន់​ជើងឯក​ឆ្នាំ២០១៤ ក្នុងឱកាស​​​ទិវាបុរាណ​វិទ្យាអន្តរជាតិ ផងដែរ។​ ឆ្នាំ២០១៤ កម្ពុជាបានទទួល​ទេសចរ​​អន្តរជាតិ៤,៥ លាន​នាក់ ក្នុងកំណើន៧% ព្រមជាមួយ​នឹងចំនួន​ទេសចរក្នុងស្រុក​​ប្រមាណ​ជាង៨លាននាក់ ។ វិស័យទេសចរណ៍កម្ពុជាបានរួមចំណែកប្រមាណជាង ១0% នៃផលិត​ផល​ក្នុងស្រុកសរុប (GDP) របស់កម្ពុជា នៅឆ្នាំ២០១៣ ជាមួយ​នឹងការបង្កើត​ឱកាស​ការងារដោយផ្ទាល់ប្រមាណជាង៥០ម៉ឺននាក់(​ប្រមាណ១៣%​​​នៃកម្លាំងពលកម្សរុប)​ និងការងារដោយប្រយោលរាប់ម៉ឺននាក់ថែមទៀត។ ​ជាមួយនឹងគោល​នយោបាយ​អភិវឌ្ឍន៍ទេសចរណ៍កម្ពុជា ជាទេសចរណ៍វប្បធម៌ និងធម្មជាតិ និងយុទ្ធ​សាស្រ្ត​អភិវឌ្ឍន៍កម្ពុជាស្អាតនិងបៃតងនិងការ​​​ផ្តល់សេវា​​​ទេស​ចរណ៍ប្រកបដោយគុណភាព កម្ពុជានឹងទទួលទេសចរ​អន្តរជាតិ​ប្រមាណ ៥លាន​នាក់ នៅឆ្នាំ២០១៥ និង​ប្រមាណ​៧,៥លាននាក់ នៅឆ្នាំ២០២០៕

អត្ថបទ: សុវណ្ណារ៉ា

ព្រះម​ហា​ក្សត្រ​៖ កម្ពុជា​ពិតជា​មាន​​មោទន​​ភាព​​ខ្លាំង​ណាស់ ដែលបុព្វ​បុរសបាន​បន្សល់​ទុកនូវ​កេរ្តិ៍​មរតក​វប្បធម៌ យ៉ាង​ច្រើន និង​​អារ្យធម៌​​ដ៏រុងរឿង

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃ ព្រះរាជាណាចក្រកម្ពុជា បានមានព្រះរាជបន្ទូល អំពីមោទនាភាពរបស់កម្ពុជា ពិសេសតំបន់ប្រាសាទអង្គរ ដែលត្រូវបានទទួលស្គាល់ជាអន្តរជាតិ អំពីតម្លៃដែលលេចធ្លោជាសកល គឺដោយសារបុព្វបុរស ខ្មែរបានបន្សល់ទុកនូវ កេរ្តិ៍មរតកវប្បធម៌យ៉ាងច្រើន និងអារ្យធម៌ដ៏រុងរឿង ពិសេសតំបន់ប្រាសាទ អង្គរដែលត្រូវ បានទទួលស្គាល់ជាអន្តរជាតិ អំពីតម្លៃដែលលេចធ្លោរជាសកល និងបានទាក់ទាញ បំផុត ខាងវិស័យទេសចរណ៍។
​ព្រះរាជបន្ទូលលើកឡើង របស់ព្រះមហាក្សត្រ ត្រូវបានធ្វើឡើងនៅក្នុងព្រះរាជពិធីលៀងសាយភោជន៍ និងទតការ សម្តែងសិល្បៈ នាឱកាសសន្និសីទពិភពលោក អង្គការទេសចរណ៍ពិភពលោក និង យូណេស្កូ ស្តីពីទេសចរណ៍ និងវប្បធម៌ការកសាងភាពជាដៃគួរថ្មី នៅទីព្រះ​​លានជល់ដំរី ស្ថិតក្នុងក្រុងសៀមរាបអង្គរ កាលពីរាត្រីថ្ងៃទី៤ ខែកុម្ភៈ ឆ្នាំ២០១៥ ដែលមានការអញ្ជើញ ចូលរួមពីបណ្តាអង្គការ និងគណៈប្រតិភូអន្តរជាតិ ជាង ៨០ ប្រទេស។

​ព្រះករុណាជាអម្ចាស់ជីវិតតម្កល់លើត្បួង ជាទីគោរពសក្ការៈដ៏ខ្ពង់ខ្ពស់បំផុត បានមាន ព្រះរាជ បន្ទូលរំលឹកពីព្រះរាជកិច្ចត្រូសត្រាយរបស់ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ដ៏គូរឱ្យគោរពសរសើរ ដែលព្រះអង្គ ទ្រង់បានអំពាវនាវរកការគាំទ្រ ចំពោះស្ថានភាព ប្រកបដោយគ្រោះថ្នាក់របស់ប្រាសាទអង្គរ នៅឆ្នាំ១៩៨៩ ដែលក្នុងពេលនោះ ប្រទេសកម្ពុជា ក្នុងកំពុងស្ថិតក្នុងជម្លោះ និងសង្រ្គាម ស៊ីវិលនៅឡើយ។ បន្ទាប់មកតំបន់អង្គរ ត្រូវបានចុះបញ្ជីបេតិកភណ្ឌពិភពលោក ដោយអង្គការ យូណេស្កូ នៅឆ្នាំ១៩៩២ និងនៅក្នុងឆ្នាំ ១៩៩៣ គណៈកម្មការអន្តរជាតិសម្របសម្រូល ដើម្បីការពារ និងអភិវឌ្ឍន៍តំបន់ប្រវត្តិ សាស្រ្តអង្គរ (ICC-Angkor) ក៏ត្រូវបានបង្កើតឡើង នៅឯសន្និសីទនាទីក្រុងតូក្យូ ដោយ ផ្តោតលើការថែរក្សាប្រាសាទ ដែលកំពុងប្រឈមគ្រោះថ្នាក់ ដំណាលគ្នានឹងពេលដែល បានបើកឱ្យទេសចរណ៍ជាតិ អន្តរជាតិ ចូលមកទស្សនា។

​ព្រះករុណាជាអម្ចាស់ជីវិតតម្កល់លើត្បួង ជាទីគោរពសក្ការៈដ៏ខ្ពង់ខ្ពស់បំផុត បានមាន ព្រះរាជ បន្ទូលទៀតថា ប្រាង្គប្រាសាទតំបន់អង្គរ ទទួលបានការចាប់អារម្មណ៍ពីភ្ញៀវ ទេសចរថា បង្កប់ដោយភាពអាថ៌កំបាំង ដែលពុំទាន់មានឯកសារបញ្ជាក់ឱ្យបានពិស្តារ នៅឡើយ និងប្រកបដោយពលានុភាព នៃការទាក់ទាញដ៏អស្ចារ្យសម្រាប់មនុស្សគ្រប់គ្នា ដោយប្រាង្គប្រាសាទ ទាំងនេះ មានអានុភាពរបស់ខ្លូនទាក់ទងទៅនឹងភាពវិជ្ជមាន ភាពស្ងប់ស្ងៀម ភាពរឹងមាំ និងថាមពលរីកចម្រើន។ ដូច្នេះ អង្គរ នឹងមិនបាត់បង់នូវភាពអស្ចារ្យ របស់ខ្លូនឡើយ។

ក្នុងន័យនេះ ព្រះមហាក្សត្រ បានមានព្រះរាជបន្ទូលសង្កត់ធ្ងន់ថា ការគ្រប់គ្រងនិងអភិវឌ្ឍន៍ទេសចរណ៍ ត្រូវផ្សារភ្ជាប់ជាមួយការអភិរក្សបេតិកភណ្ឌ។

តាមការឱ្យដឹងពី ឯកឧត្តមឧបនាយករដ្ឋមន្ត្រី សុខ អាន  រដ្ឋមន្រ្តីទទួលបន្ទុកទីស្តីកាគណៈរដ្ឋមន្រ្តី និងជាប្រធានអាជ្ញាធរអប្សរា បានឱ្យដឹងថា សន្និសីទពិភពលោក ស្តីពី ទេសចរណ៍ និងវប្បធម៌ ត្រូវបានប្រារព្ធធ្វើឡើង ក្រោម​ប្រធានបទៈ បង្កើត​ភាពជាដៃគូថ្មី បានបើកជាផ្លូវការ កាលពីព្រឹក ថ្ងៃទី៤ កុម្ភៈនេះ នៅលើទឹកដីសៀមរាបអង្គរ ក្រោម អធិបតីភាពប្រមុខ រាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រកម្ពុជា មានរយៈពេល ៣ថ្ងៃ ចាប់ពីថ្ងៃទី៤ ​ដល់ថ្ងៃទី៦ ខែកុម្ភៈ​ ដែលមាន អ្នកចូល​រួម​ចំនួន ១ពាន់ ១០៧រូប មកពីថ្នាក់ ដឹក​នាំ​គណៈ​​ប្រតិភូ នៃ​វិស័យ​ទេសចរណ៍ និង​វប្បធម៌ និងមានវាគ្មិន​​អន្តរជាតិល្បីៗ មកពី ៩៩ប្រទេស ក្នុង​នោះ​រដ្ឋ​មន្ត្រី​ចំនួន ៤១រូប មក​ពី​​ ៣៨ប្រទេស ដែលមានរដ្ឋមន្ត្រីទេសចរណ៍ ១៧រូប រដ្ឋ​មន្ត្រី​​​​វប្បធម៌ ១៥រូប រដ្ឋមន្ត្រី​​ទេស​​ចរណ៍ និង​វប្បធម៌ ៧រូប ថ្នាក់អគ្គនាយក ២រូប ព្រមទាំងមានចូលរួមពីសាស្ត្រាចារ្យ និស្សិត និងផ្នែកឯកជន។​

ឯកឧត្តម ឧបនាយករដ្ឋមន្រ្តី សុខ អាន បានឲ្យដឹងបន្តទៀតថា គោល​បំណង នៃសន្និសិទ្ធនេះ គឺដើម្បីកំណត់កាលានុវត្តភាព និង​បញ្ហា​​​ប្រឈមសំខាន់ៗ ដើម្បី​​ពង្រឹង កិច្ចសហប្រតិបត្តិការ រវាងវិស័យទេសចរណ៍ និង​វិស័យវប្បធម៌ ឲ្យកាន់​​តែខ្លាំងក្លាពិភាក្សាអំពីគំរូភាពជាដៃគូថ្មី ក្នុងការពង្រឹង​​​ទំនាក់​ទំនងសេដ្ឋកិច្ច-សង្គម, ការពង្រឹងការ អនុវត្តរួមគ្នា ដើម្បីលើកកំពស់ បកស្រាយ ការពារ និងអភិរក្ស​​វប្បធម៌ ដែលរួមបញ្ចូលទាំង សម្បត្តិបេតិកភណ្ឌ និង​ឧស្សា​​​ហកម្មកែច្នៃ ព្រមទាំង​កសាងទេសចរណ៍វប្បធម៌  សម្រាប់ ការអភិវឌ្ឍប្រកប ដោយ​និរន្តរភាព។ 
នៅក្នុងអំឡុងពេលនៃសន្និសីទពិភពលោកនេះ និងមានកិច្ចប្រជុំ ​២សំខាន់ រួម​មាន កិច្ចសន្ទនាថ្នាក់រដ្ឋមន្ត្រី ក្រោមប្រធានបទ គំរូនៃការបង្កើតដៃគូថ្មីនិង កិច្ច​​ពិភាក្សា​​​​ថ្នាក់ បច្ចេកទេស។ ជាមួយគ្នានេះ អង្គសន្និសីទ នឹងដាក់ចេញសេចក្តីថ្លែងការណ៍​សៀម​​រាប​​​​ស្តីពី ទេសចរណ៍ និងវប្បធម៌ ដោយរំពឹងថា ខ្លឹមសារ នៃសេចក្តីថ្លែងការណ៍​នេះ​នឹងក្លាយជាធាតុ ចូលដ៏មានសារៈសំខាន់បន្ថែមទៀត សម្រាប់ជាឯកសារយោង ក្នុងការរៀបចំ​ផែនការ​អភិវឌ្ឍ និងអភិរក្សទេសចរណ៍វប្បធម៌ ប្រកបដោយនិរន្តរ​ភាព និងការទទួល​ខុស​ត្រូវ។

គួរបញ្ជាក់ថា ​​​សៀមរាប-អង្គរ ត្រូវបាន​ទទួល​ស្គាល់ និង​ចាត់​ថ្នាក់ជាជា​ទីក្រុង​​​គោលដៅទេសចរណ៍​ប្រកបដោយភាពទាក់ទាញលំដាប់ទី៤ នៅលើសកល​លោក និង​លំដាប់ទី២ នៅក្នុងអាស៊ី បន្ទាប់ពីទីក្រុង Kyoto បើតាមការ​វាយ​តម្លៃ​របស់​ទស្សនា​​វដ្តី Travel and Leisure ហើយអង្គរ ក៏បានជាប់ពានរង្វាន់​ជើងឯក​ឆ្នាំ២០១៤ ក្នុងឱកាស​​​ទិវាបុរាណ​វិទ្យាអន្តរជាតិផងដែរ។​
បើយោងតាមសេចក្តីជូនដំណឹងរបស់អាជ្ញាធរអប្សរា ចេញផ្សាយកាលពី ថ្ងៃទី២០ ខែមករា ឆ្នាំ២០១៥កន្លងមកថ្មីៗនេះ បានឱ្យដឹងថា នៅក្នុងឆ្នាំ២០១៤ កន្លងមកនេះ ខេត្ត សៀមរាប មានភ្ញៀវទេសចរណ៍ជាតិ មកលេងកំសាន្តចំនួន ២លាន ៦សែន ៧ម៉ឺន ២ពាន់ ៩៥០នាក់ និងមានភ្ញៀវទេសចរណ៍អន្តរជាតិ ចំនួន ២លាន ៣សែន ៥ម៉ឺន ៩៣៧នាក់ ដែលក្នុងនោះ ភ្ញៀវទេសចរណ៍អន្តរជាតិ ដែលបានចូលទស្សនាអង្គរ មាន ចំនួន ២លាន ៥ម៉ឺន ៩ពាន់ ៧០២នាក់ ដែលទទួលបានចំណូល បានមកពីការលក់ប័ណ្ណចូលទស្សនា អង្គរ បានចំនួន ៥៩លាន ៣សែន ៤ម៉ឺន ២ពាន់ដុល្លារអាមេរិក៕

អត្ថបទ: មៀច សំអាត