ពិធី​បើក​សន្និបាត​បូក​សរុប​លទ្ធ​ផល​ការ​ងារ​ទេសច​រណ៍ ឆ្នាំ២០១២-​២០១៣ និង​ទិស​ដៅ​អនុវត្ត​បន្ត «ទេសចរណ៍​កម្ពុជា​ឆ្ពោះ​ទៅ​សមា​ហរណកម្ម​អាស៊ាន ឆ្នាំ​២០១៥» និងអប​អរសាទរ​ទិវា​ជាតិ​ទីក្រុ​ង​ស្អាត

ពិធី​សម្ភោធ​ដាក់​ឲ្យ​ប្រើ​ប្រាស់​ជា​ផ្លូវ​ការ ស្ថានីយ៍​អគ្គិ​ស​នី​ដុត​ធ្យូង​ថ្ម និង​ខ្សែ​បណ្តាញ​បញ្ជូន​អគិ្គសនី​ភ្នំពេញ កំពង់ចាម នៅ​ស្រុក​ស្ទឹងហាវ ខេត្ត​ព្រះ​សីហនុ ក្រោម​អធិបតីភាព​ដ៏​ខ្ពង់​ខ្ពស់ សម្តេច​អគ្គ​មហា​សេនា​បតី​តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា

សុន្ទរកថា ឯកឧត្តម សុខ អាន, ក្នុងពិធី​បើកសន្និបាត​បូក​សរុប​លទ្ធផល​ការងារ​ទេសចរណ៍ ឆ្នាំ​២០១២-២០១៣ និងទិសដៅ​អនុវត្ត​បន្ត «ទេសចរណ៍​កម្ពុជា​ឆ្ពោះ​ទៅ​សមាហរ​ណកម្ម​អាស៊ាន ឆ្នាំ២០១៥» និងអប​អរ​សាទរ​ទិវា​ជាតិ​ទីក្រុង​ស្អាត

រាជធានីភ្នំពេញ ថ្ងៃទី២៦ ខែកុម្ភៈ ឆ្នាំ២០១៤

​​​- ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍

 - ឯកឧត្ដម លោកជំទាវ  អស់លោក លោកស្រី  ភ្ញៀវកិត្តិយសជាតិ និងអន្ដរជាតិ  

 - អង្គសន្និបាតទាំងមូលជាទីមេត្រី!

ថ្ងៃនេះ ខ្ញុំមានសេចក្តីសោមនស្សរីករាយ ចូលរួមជាមួយឯកឧត្ដម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ ក្នុង​ពិធីបើកសន្និបាតបូកសរុបលទ្ធផល​ការងារទេសចរណ៍ ឆ្នាំ២០១២-២០១៣ និងទិសដៅអនុវត្តបន្ត «ទេសចរណ៍កម្ពុជាឆ្ពោះ​ទៅ​ស​មាហរណកម្ម​អាស៊ានឆ្នាំ២០១៥» និងអបអរសាទរទិវា​​ជាតិទីក្រុងស្អាត​។​​​ ខ្ញុំសូមវាយ​តម្លៃខ្ពស់​ចំពោះកិច្ចខិតខំប្រឹងប្រែងយ៉ាងសកម្មរបស់ថ្នាក់ដឹកនាំ និង​មន្ដ្រី​រាជ​ការ​គ្រប់​លំដាប់​​​ថ្នាក់​របស់​ក្រសួង​ទេសចរណ៍ ​ក្នុង​ការ​បំពេញ​ភារកិច្ច​កន្លង​មក ជាពិសេស​ការ​​អនុវត្ដនូវសកម្មភាព​ជា​អាទិភាព​នានា ដើម្បី​ចូលរួម​​​អភិវឌ្ឍ​ទេសចរណ៍កម្ពុជា សំដៅ​ធ្វើ​ឱ្យ​កម្ពុជា​ក្លាយ​ជា​គោល​ដៅ​​ទេសចរណ៍ដ៏​ទាក់​ទាញ​​ប្រកប​ដោយ​គុណ​ភាព និងភាពប្រកួតប្រជែងខ្ពស់ និង​ទទួល​បាន​​កំណើ​​ន​​​​គួរ​ឱ្យ​កត់​សម្គាល់​។ ឆ្លៀតក្នុងឱកាសនេះ ខ្ញុំសូម​កោត​សរសើរ​ចំពោះ​សមិទ្ធផល​ធំៗជាច្រើន ដែល​ក្រសួង​ទេសចរណ៍​ខិត​ខំ​សម្រេច​​បាននាពេល​កន្លង​មកនេះ។

សន្និបាតនេះក៏បានប្រមូលផ្តុំផងដែរនូវអ្នកដឹកនាំក្នុងវិស័យទេសចរណ៍ វាគ្មិនជាតិនិងអន្តរជាតិ សាស្រ្តាចារ្យ អ្នកស្រាវជ្រាវ និងអ្នកពាក់ព័ន្ធដទៃទៀតក្នុងវិស័យទេសចរណ៍ ដែលនឹងធ្វើបទបង្ហាញលើប្រធានបទសំខាន់ៗមួយចំនួនរួមមាន ការអភិវឌ្ឍផលិតផលទេសចរណ៍ ការពង្រឹងគុណភាពផលិតផលទេសចរណ៍ ការសម្រួលនិងពង្រឹងយន្តការទ្រទ្រង់ការអភិវឌ្ឍទេសចរណ៍កម្ពុជា ការផ្សព្វផ្សាយ​និងយុទ្ធសាស្ត្រទីផ្សារ អភិបាលកិច្ចល្អក្នុងវិស័យទេសចរណ៍ រមណីយដ្ឋានស្អាត សេវាល្អ និងចលនាប្រឡងប្រណាំងទីក្រុងស្អាត។ ការជួបជុំក្នុងរយៈពេលបីថ្ងៃនេះនឹងផ្តល់ឱកាសឱ្យអ្នកចូលរួមទាំងអស់បានពិភាក្សា និងផ្លាស់ប្តូរបទពិសោធន៍ ព្រមទាំងការអនុវត្តល្អៗ ដែលអាចធានាបាននូវការគ្រប់គ្រងនិងការអភិវឌ្ឍលើវិស័យទេសចរណ៍ ប្រកបដោយចីរភាពនិងប្រសិទ្ធភាពឱ្យកាន់តែខ្ពស់ថែមទៀត។

ឯកឧត្ដម លោកជំទាវ  អស់លោក លោកស្រី !

កន្លងមកនេះ រាជរដ្ឋាភិបាលកម្ពុជាសម្រេចបាននូវសមិទ្ធផលធំៗជាច្រើន តាមរយៈការ​ដាក់​ចេញ​នូវ​​ផែនការ និង​យុទ្ធសាស្ដ្រសំខាន់ៗក្នុងការអភិវឌ្ឍសេដ្ឋកិច្ច-សង្គម សំដៅលើកកម្ពស់ជីវភាពរស់​នៅ និង​​កាត់​បន្ថយ​​ភាព​ក្រីក្ររបស់ប្រជាពលរដ្ឋ​ ក៏ដូចជាធានាបាននូវសុខសន្ដិភាព ស្ថិរភាពនយោបាយ សុវត្ថិ​ភាព​សង្គម​ សណ្ដាប់​ធ្នាប់​សាធារណៈជូនប្រជាជននិងជាតិមាតុភូមិ។  តាមរយៈ​ការអនុវត្ត​គោលនយោបាយ​ឈ្នះ-ឈ្នះ​របស់ ​​សម្តេច​អគ្គ​មហា​​សេនាបតី​តេជោ ហ៊ុន សែន កម្ពុជា​ទទួលបាន​សុខសន្តិភាពយ៉ាង​ពេញលេញ ដែល​ពុំ​ធ្លាប់​មាន​ក្នុង​រយៈ​កាលជិត ៥០០ ឆ្នាំ​ចុង​ក្រោយ​នេះ​។  សុខសន្តិភាព និង​ស្ថិរភាព​នយោបាយ​គឺ​ជាមូលដ្ឋាន​ដ៏រឹងមាំ​សម្រាប់​​ធានា​បាន​នូវ​ការ​អភិវឌ្ឍ​លើ​គ្រប់​វិស័យ។ ជាក់ស្តែង​ ក្នុងឆ្នាំ២០១២ កម្ពុជា​សម្រេច​បាន​នូវ​កំណើនសេដ្ឋកិច្ច ៧,៣% ហើយ​ កំណើននេះ​ត្រូវ​បាន​ប៉ាន់ស្មាន​ថា​ស្ថិតក្នុង​រង្វង់​ពី​ ៧% ទៅ ៨% នៅឆ្នាំបន្តបន្ទាប់។ ផ្អែកលើកំណើន​ដ៏ខ្ពស់នេះ  កម្ពុជា​ជាប់ចំណាត់ថ្នាក់ទី ១១ ក្នុងចំណោមប្រទេសដែលសម្រេចបាន​កំណើន​សេដ្ឋកិច្ច​ខ្ពស់លើ​​ពិភពលោកក្នុងរយៈពេល ១០ឆ្នាំ កន្លងមកនេះ និងជាប់​ចំណាត់​ថ្នាក់​ទី៥ក្នុង​ចំណោម​ប្រទេស​​​កំពុង​​អភិវឌ្ឍន៍ដែលអាច​សម្រេច​បានគោលដៅអភិវឌ្ឍសហស្សវត្សរ៍។ លើសពីនេះទៀត កម្ពុជា​នឹងក្លាយជា​ប្រទេសដែលមាន​ប្រាក់ចំណូលមធ្យម​​កម្រិត​​​ទាបក្នុងពេលអនាគត​ដ៏ខ្លីខាងមុខនេះ និង​ឈាន​ទៅជាប្រទេស​ដែលមានប្រាក់ចំណូល​មធ្យម​កម្រិតខ្ពស់​នៅឆ្នាំ២០៣០។

វិស័យទេសចរណ៍គឺជាមាសបៃតង ដែលបាននិងកំពុងរួមចំណែកយ៉ាងសំខាន់​ដល់​កំណើនសេដ្ឋកិច្ចជាតិ ដោយបង្កើតបានប្រាក់ចំណូលប្រមាណជាង ២,៥ពាន់​លានដុល្លារអាមេរិក ក្នុងឆ្នាំ២០១៣។ កម្ពុជាទទួលបានភ្ញៀវទេសចរអន្តរជាតិចំនួនជាង ៤,២លាន​នា​ក់ ក្នុងឆ្នាំ២០១៣ បើធៀប​ទៅនឹង​ឆ្នាំ​២០១២ មានការកើនឡើងជាង ១៧,៥% ហើយបើ​ធៀបនឹងតួលេខឆ្នាំ១៩៩៣ គឺមាន​ការ​ហក់​ឡើង​យ៉ាង​ខ្លាំង ព្រោះពេលនោះ​ភ្ញៀវទេសចរ​អន្តរជាតិ​មាន​តែប្រមាណ ១២ម៉ឺននាក់ ប៉ុណ្ណោះ​។

កំណើនភ្ញៀវទេសចរនេះបានមកដោយសារ កម្ពុជាមានមរតក​បេតិកភណ្ឌ​វប្បធម៌ ធម្មជាតិ និង​ប្រវត្តិសាស្ត្រ​ជាច្រើន គួបផ្សំជាមួយនឹងស្ថិរភាពនយោបាយ និងសន្តិភាពពេញលេញ ដែលយើងទទួលបានតាំងពីឆ្នាំ១៩៩៨ មកម្ល៉េះ។ ក្រៅពីរមណីយដ្ឋានអង្គរ កម្ពុជា​មាន​​រមណីយដ្ឋាន​​ជាច្រើនទៀត ​ដែលជាគោលដៅដ៏មាន​សក្ដានុពល​សម្រាប់​ទេសចរណ៍​វប្បធម៌។ លើសពីនេះទៀត យើងក៏មានបរិស្ថាន​ធម្មជាតិ​ដ៏ស្រស់ត្រកាលរួមមាន​ ព្រៃ ស្ទឹង​ ទន្លេ បឹង​បួរ ឆ្នេរ​សមុទ្រ​ដ៏ល្អខ្នាត​អន្តរជាតិ​ កោះ​ និង​សត្វ​ព្រៃ ជាពិសេស​សត្វ​ផ្សោតមេគង្គ​ដ៏កម្រ ដែលទាំងនេះជាកត្តាទាក់ទាញដល់អេកូទេសចរណ៍នៅកម្ពុជា។ ប្រទេស​យើង​មាន​ប្រវត្តិ​យូរអង្វែង ប្រកបដោយ​វប្បធម៌ និង​អរិយធម៌ដ៏មហស្ចារ្យ។ បុព្វ​បុរស​ខ្មែរ​បាន​បន្សល់​ទុក​ឱ្យ​យើង​នូវ​បេតិកភណ្ឌ​រូបីយនិង​អរូបីយជាច្រើន ​ជាអាទិ៍ ប្រាង្គប្រាសាទ សិល្បៈ និង​របាំ​បុរាណ។ ជាមួយនឹងសម្បត្តិ​ទាំងនេះ ព្រមទាំងមានការចូលរួមយ៉ាងសកម្មពីគ្រប់​មជ្ឈដ្ឋាន​ទាំងអស់​ ជាពិសេសក្មួយៗ​យុវជនក្នុងការលើកស្ទួយវិស័យទេសចរណ៍វប្បធម៌ កម្ពុជា​នឹងបង្កីន​ឧត្តមភាព​ប្រៀបធៀបរបស់ខ្លួនកាន់តែខ្លាំងថែមទៀត​​ក្នុង​វិស័យ​​នេះ​ ក្នុងការ​រួម​ចំណែក​ដល់​កិច្ច​អភិវ​ឌ្ឍឧស្សាហកម្មសេវាកម្ម ការបង្កើតបន្ថែ​មទៀតនូវ​កាលានុវត្តភាពការងារ ការបង្កើនប្រាក់ចំណូលជូនប្រជាពលរដ្ឋ និង​ការកាត់បន្ថយ​ភាពក្រីក្រ។

ឯកឧត្ដម លោកជំទាវ  អស់លោក លោកស្រី !

ទន្ទឹមនឹងកាលានុវត្តភាព​ខាងលើ ​​វិស័យទេសចរណ៍​កម្ពុជាក៏​មានបញ្ហាប្រឈមមួយចំនួន ជាអាទិ៍ ការបន្តបង្កើនការតភ្ជា​ប់​ ការ​ពង្រឹង​ក្របខណ្ឌច្បាប់និង​​យន្តការ​ស្ថាប័ន និងការធានាគុណភាព​នៃផលិតផលទេសចរណ៍​​​​ ដើម្បី​លើកកម្ពស់ឧត្តមភាពថែមទៀតក្នុងវិស័យទេសចរណ៍ ជាពិសេស នៅពេលដែលសហគមន៍អាស៊ានត្រូវបានបង្កើតឡើង​នៅឆ្នាំ២០១៥​។ ក្នុងន័យនេះ យើង​ត្រូវដោះស្រាយ​បញ្ហា​ប្រឈមទាំង​នេះ ព្រមទាំងបង្កើន​សមត្ថភាពធនធានមនុស្សនិង​ស្ថាប័ន ព្រមទាំងកែ​ទម្រង់​រចនាសម័្ពន្ធផ្ទៃក្នុង​នានា​ ជាពិសេស​ការពង្រឹង​សមត្ថភាពឧស្សាហកម្មទេសចរណ៍​ឱ្យ​មាន​​​ប្រសិទ្ធភាពខ្ពស់ និង​ទាន់ពេលវេលា ដើម្បីទាញយក​ផល​ប្រយោជន៍ថែមទៀតពីសហគមន៍នេះ។

ដើម្បីរួមចំណែកដល់ការដោះស្រាយបញ្ហាប្រឈមទាំងនេះ ខ្ញុំសូមផ្ដល់ជាគំនិតខ្លះៗ ដែលជា​ធាតុចូលសម្រាប់ការពិភាក្សាក្នុងអង្គសន្និបាតរយៈពេលបីថ្ងៃនេះ ដូចខាងក្រោម៖

ទី១-ឈរលើ​សក្តានុពល​នៃធនធានធម្មជាតិនិងវប្បធម៌​ដ៏សម្បូរបែបរបស់​កម្ពុជា ក្រសួងទេស-​ចរណ៍គួរពង្រឹងថែមទៀត នូវប្រសិទ្ធភាព​យុទ្ធ​សាស្ដ្រ​ធ្វើពិពិធ​កម្មផលិតផល​ទេស​ចរណ៍ ជាពិសេសការបង្កើតផលិតផលទេសចរណ៍​ថ្មីៗ ប្រកបដោយ​ភាពទាក់ទាញ ច្នៃ​ប្រ​ឌិ​ត និងផ្តល់​នូវ​បទពិ​សោធន៍​​ដ៏ល្អ​ដល់ភ្ញៀវទេសចរ​។

ទី២-ជាមួយនឹងការដាក់ចេញនូវ​ចលនាប្រឡងប្រណាំង​ “ទីក្រុងស្អាត រមណីយ​ដ្ឋា​ន​​ស្អាត សេវា​ល្អ” ក្រសួងទេសចរណ៍ គួរពង្រឹងគុណភាពផលិត​ផលទេសចរណ៍ឱ្យបាន​ប្រសើរឡើងថែមទៀត​ ដោយមាន​ការចូលរួម​ពីប្រជាពលរដ្ឋ​​ ប្រតិបត្តិករទេសចរណ៍ និងអ្នកពាក់ព័ន្ធដទៃទៀត។

ទី៣-ក្រសួង​ទេសចរណ៍​គួរ​បង្កើន​កម្មវិធី​បណ្ដុះ​បណ្ដាល​ធនធាន​មនុស្ស​ថែមទៀត ជាពិសេស​ជំនាញវិជ្ជាជីវៈក្នុង​វិស័យទេស​ចរណ៍ ដើម្បីផ្ដល់សេវាក្នុងវិស័យនេះឱ្យមានប្រសិទ្ធភាពខ្ពស់ ប្រកប​ដោយ​វិជ្ជាជីវៈពិតប្រាកដ។ លើសពីនេះទៀត ក្រសួងទេសចរណ៍គួរសហការជាមួ​យ ​សាកលវិទ្យាល័យនានា ដើម្បីជំរុញឱ្យមាន​ការសិក្សាស្រាវជ្រាវបន្ថែមទៀត ទាំងផ្នែកទ្រឹ​ស្តី ទាំងការអនុវត្ត ព្រមទាំងការវិវត្តនៃវិស័យទេសចរណ៍ក្នុងប្រទេស ក្នុងតំបន់អាស៊ាន អាស៊ីប៉ាស៊ីហ្វិក និងក្នុងពិភពលោក។

ទី៤-ក្រសួងទេសចរណ៍គួរពង្រឹងការងារសិក្សាទីផ្សារ និង​ផ្សព្វ​ផ្សា​យ​​​​ទេសចរណ៍កម្ពុជា ឱ្យបានទូលំទូលាយថែមទៀត។

ទី៥-ក្រសួងទេសចរណ៍គួរពង្រឹងការអនុវត្ដច្បាប់ស្ដីពីទេសចរណ៍ និង​ការពង្រឹង​សមាគមទេសចរណ៍ដែលជាដៃគូដ៏​សំខាន់របស់រាជរដ្ឋាភិបាល ក្នុងការអភិវឌ្ឍវិស័យទេសចរណ៍ប្រកប​ដោយ​និរន្ដរភាព។

ទី៦-​ក្រសួងទេសចរណ៍​គួរ​​ពង្រឹង​ការផ្តល់​សេវាសាធារណៈ​ ក្នុង​ឧស្សាហ​កម្មទេសចរណ៍ឱ្យកាន់តែប្រសើរថែមទៀត។ ក្នុងន័យនេះ ក្រសួងគួរបន្ត​ជំរុញ​វិធី​សាស្រ្ត​គ្រប់គ្រង និងផ្ដល់​សេវាសាធារណៈក្នុងវិស័យទេសចរណ៍តាមប្រព័ន្ធបចេ្ចកវិទ្យា។

ទី៧-ក្រសួងទេសចរណ៍គួរបន្តលើកកម្ពស់​ការតភ្ជាប់ ការសម្រួល​ការ​​​ធ្វើ​​ដំណើរ  និង​ការ​ដឹក​ជញ្ជូន​ភ្ញៀវទេសចរ​ ក្នុង​បរិបទនៃការធ្វើ​សមាហរណកម្ម​អាស៊ាន ឱ្យ​កាន់តែស៊ីជម្រៅថែមទៀត​។

ទី៨-ក្រសួងទេសចរណ៍គួរធ្វើយ៉ាងណា ដើម្បីឱ្យប្រជាពលរដ្ឋមូលដ្ឋានទទួលបានផលប្រយោជន៍​ឱ្យកាន់តែច្រើនថែមទៀតពី​វិស័យ​ទេសចរណ៍ សំដៅចូល​រួម​​កាត់​បន្ថយ​ភាព​ក្រី​ក្រ​របស់ប្រជាជន។

ឯកឧត្ដម លោកជំទាវ អស់លោក លោកស្រី!

ជាថ្មីម្ដងទៀត ខ្ញុំសូមកោតសរសើរ និងវាយតម្លៃខ្ពស់ចំពោះក្រសួងទេសចរណ៍ ក្រសួង-ស្ថាប័នពាក់ព័ន្ធ ផ្នែកឯកជន អង្គការជាតិ-អន្ដរជាតិ និងដៃគូអភិវឌ្ឍន៍នានា ដែល​បានចូល​រួមចំណែកក្នុង​កិច្ច​អភិវឌ្ឍ​វិស័យ​ទេសចរណ៍​កម្ពុជា។​ ​ខ្ញុំក៏សូម​កោតសរសើរផងដែរ​​ដល់​​គណៈកម្មាធិការជាតិវាយតម្លៃទីក្រុងស្អាត ដែលខិតខំបំពេញ​ភារកិច្ច​របស់ខ្លួន។ ហើយខ្ញុំ​សង្ឃឹម​ថា ​នឹងមាន​ការចូលរួមយ៉ាង​សកម្មពីក្រុង/ខណ្ឌ​ទាំង​អស់ ក្នុងការចូលរួម​ប្រកួត​ប្រជែងចលនាទីក្រុងស្អាត ដើម្បីទទួលបានជ័យ​លាភី​ផ្ការំដួល ២ ឬ ៣ទង គ្រប់ៗគ្នានៅឆ្នាំ​២០១៥។​ ទន្ទឹមនឹងនេះ ខ្ញុំក៏សូម​​អំពាវនាវផងដែរដល់​បងប្អូន​ប្រជាពលរដ្ឋ សិស្ស-និសិ្សត ព្រះសង្ឃ វិស័យ​ឯកជន ជាពិសេសក្មួយៗយុវជន បន្តរួមចំណែកក្នុង​យុទ្ធនាការ​ប្រឡង​ប្រណាំង​ “ទីក្រុងស្អាត​ រមណីយដ្ឋានស្អាត​ សេវា​ល្អ” ដើម្បីធ្វើឱ្យវិស័យ​ទេសចរ​ណ៍​​កម្ពុជាកាន់តែមានភាពទាក់ទាញបន្ថែមទៀតដល់ភ្ញៀវជាតិនិងអន្តរជាតិ។

ខ្ញុំសង្ឃឹមថា អង្គសន្និបាតលើកនេះនឹងទទួលបានលទ្ធផលល្អ ជាពិសេស​នឹង​ទទួល​បាន​អនុសាសន៍​ណែ​នាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន ​ក្នុង​ពិធី​បិ​ទ​​សន្និបាត​នេះ។​

ជាទីបញ្ចប់ ខ្ញុំសូមជូនពរឯកឧត្ដម លោកជំទាវ អស់លោក លោកស្រីទាំងអស់ សូម​ទទួលបានជោគជ័យ ​សេចក្ដី​សុ​ខ និងសុភមង្គលក្នុងក្រុមគ្រួសារ។

ខ្ញុំ​សូម​ប្រកាសបើកសន្និបាតបូកសរុបលទ្ធផលការងារទេសចរណ៍ ឆ្នាំ២០១២-២០១៣ និងទិសដៅអនុវត្តបន្ត «ទេសចរណ៍កម្ពុជាឆ្ពោះទៅសមាហរណកម្មអាស៊ានឆ្នាំ២០១៥» ចាប់ពីពេលនេះតទៅ។

សូមអរគុណ!

សុន្ទរកថា​ស្វាគមន៍ ឯកឧត្តម ថោង ខុន, ក្នុង​​ឱកាស​​សន្និបាត​​បូក​សរុប​​ស​ភាព​​ការណ៍​​អនុវត្ត​ន៍​ការងារ​​ទេស​ចរណ៍​​ឆ្នាំ​២០១២​-២០១៣ និង​ទិស​ដៅ​អនុវត្តបន្ត “ទេសច​រណ៍​កម្ពុជា ឆ្ពោះ​ទៅ​សមាហរណ​កម្ម​អាស៊ាន​ឆ្នាំ​២០១៥” និង​​​អប​អរ​សាទរ​​ទិ​វា​ជាតិ​ទីក្រុង​ស្អាត

នៅបុរីកោះពេជ្រ​ នៅថ្ងៃ ទី២៦ ខែ​កុម្ភៈ ឆ្នាំ២០១៤

សូម​គោរព​

‑ ឯកឧត្តមបណ្ឌិតសភាចារ្យ សុខ អាន ឧប​នាយក​រដ្ឋមន្ត្រី​ រដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រី ជាទីគោរព ​  ដ៏ខ្ពង់ខ្ពស់!

-ឯកឧត្តម លោកជំទាវអង្គទូត

 -ឯកឧត្តម លោក​ជំទាវ លោក​ឧកញ៉ា លោក លោក​ស្រី ភ្ញៀវកិត្តិយស​ជាតិ និង​អន្តរជាតិ!

‑ អង្គសន្និបាត​ទាំង​មូលជាទីគោរព និង​ជាទីមេត្រី!

         ជា​បឋម ខ្ញុំ​បាទ​តាង​នាម​ឲ្យ​ថ្នាក់​ដឹក​នាំ និង​មន្ត្រី​រាជការ​ក្រសួង​ទេសចរណ៍​ទាំង​អស់​ និង​ក្នុង​នាម​ខ្ញុំ​បាទ​ផ្ទាល់​ សូម​សំដែង​​នូវ​គាវរកិច្ច និង​អំណរគុណ​ដ៏​ជ្រាល​ជ្រៅ​ចំពោះ​វត្ត​មាន​ដ៏​ខ្ពង់​ខ្ពស់​របស់ ឯកឧត្តមបណ្ឌិតសភាចា​រ្យ សុខ អាន ឧប-​នាយក​រដ្ឋមន្ត្រី​ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ដែ​លបាន​ឆ្លៀតឱកាស​ដ៏​​មមា​ញឹក​អញ្ចើញ​ជា​អធិបតី​ដ៏ខ្ពង់​ខ្ពស់​ក្នុង​ពិធី​បើក​សន្និបាត​បូក​សរុប​សភាព​ការណ៍​អនុវត្តន៍​​ការ​ងារ​ទេស​ច​រ​ណ៍​​ឆ្នាំ​២០១២-២០១៣ និងទិសដៅអនុវត្តបន្ត​ “ទេស​​​-ចរណ៍​កម្ពុជាឆ្ពោះទៅសមាហរណកម្មអាស៊ានឆ្នាំ២០១៥” និងអបអរសាទរ​ទិ​វាជាតិទីក្រុងស្អាត ដ៏​មាន​សារៈសំខាន់​នេះ។

ខ្ញុំ​​បាទ​សូម​ថ្លែង​អំណរគុណ​ចំពោះ ឯកឧត្តម លោក​ជំទាវ លោក​ឧកញ៉ា លោក លោក​ស្រី ភ្ញៀវ​កិត្តិយស​ជាតិ​ និង​អន្តរជាតិ​ ដែល​បាន​ផ្តល់​នូវ​កិត្តិយស​ដ៏​ថ្លៃ​ថ្លា​ អញ្ចើញ​ចូលរួម​យ៉ាង​ច្រើន​កុះ​ករ​ក្នុង​អង្គ​សន្និបាត​នេះ។

​

‑ គណៈអធិបតី ជាទីគោរព!

‑ អង្គ​សន្និបាត​ជា​ទីមេត្រី!

ការ​រីកចំរើន​នៃ​វិស័យ​ទេសចរណ៍​កម្ពុជា បាន​ឆ្លុះ​បញ្ចាំង​យ៉ាង​ប្រត្យ​ក្ស​អំពី​សារៈ​សំខាន់​នៃកត្តា​សន្តិសុខ សុវត្ថិភាព ស្ថេរភាព​នយោបាយ ដែល​ជា​កត្តា​កំណត់ និង​ជាមូលដ្ឋាន​សម្រាប់​ធានា​ចីរភាព កំណើន​នៃ​វិស័យ​ទេសចរណ៍។ ជាការពិត​ ក្រោម​ការ​ដឹក​នាំ​ដ៏​ត្រឹម​ត្រូវ និងឈ្លាស​​វៃ​ប្រកប​ដោយ​គិត​បណ្ឌិត​របស់​ សម្តេច​អគ្គ​មហា​សេនា​បតី​តេជោ ហ៊ុន សែន នាយក​​រដ្ឋមន្ត្រីនៃព្រះ​រាជាណាចក្រ​កម្ពុជា វិស័យ​ទេសចរណ៍កម្ពុជា​មានការ​រីកចំរើន​គួរឱ្យកត់សំគាល់​ និង​ទទួល​​បាន​​សមិទ្ធ​-ផលធំៗ ហើយ​វិស័យ​ទេសចរណ៍​ត្រូវបាន​ចាត់ទុក​ជា​​វិស័យ​អាទិភាព​ដ៏សំខាន់​មួយ​ក្នុង​ការ​កសាង​សេដ្ឋកិច្ច‑​សង្គម ដោយ​​បាន​​នាំ​មក​នូវ​ចំណូល​ជូន​ជាតិ​ផ្តល់​ឱកាស​ការងារ និង​ចូលរួម​ដល់​ការ​​កាត់​បន្ថយ​ភាព​ក្រីក្រ​របស់​ប្រជាពល​រដ្ឋ​​ប្រកប​ដោយ​​​ប្រសិទ្ធ​ភាព ពិសេសជំរុញការអភិវឌ្ឍហេដ្ឋា​រចនាសម្ព័ន្ធផ្លូវថ្នល់ ស្ពាន កំពង់ផែ អាកាសយាន្តដ្ឋាន ការផ្តត់ផ្គង់អគ្គីសនី ទឹក​ស្អាត នៅតំបន់ទេសចរណ៍អាទិភាព ការពង្រឹងសន្តិភាព សន្តិសុខ ស្ថិរភាព​នយោបាយ សណ្តាប់ធ្នាប់សង្គម និង
សុ​វត្ថិភាពរបស់ទេសចរ ព្រមទាំង​ការដាក់​ចេញនូវគោលនយោបាយ​ដ៏រស់​រវើក​​ក្នុង​ការ​ទាក់ទាញភ្ញៀវទេសចរ...។ល។

ជាក់ស្តែង ក្នុង​ឆ្នាំ​២០១៣ កម្ពុជា​ទទួល​​បាន​ទេសចរ​អន្តរ​ជាតិ​ចំនួន ៤.២១០.១៦៥​នាក់​ ក្នុង​កំណើន ១៧,៥% (បើ​ប្រៀប​ធៀប​នឹង​ឆ្នាំ២០១២) ក្នុងនោះ មកពីតំបន់អាស៊ីប៉ាស៊ីហ្វិក ៧៦% មកពីអឺរ៉ុប ១៦% មកពីអាមេរិច។ ក្នុងចំណោម​ទីផ្សារ​សំខាន់ទាំង១០របស់កម្ពុជា មានវៀតណាម ចិន កូរ៉េ ឡាវ ថៃ​ ជប៉ុន អាមេរិច អូស្រ្តាលី រុស្សី បារាំង ជាមួយ​​នឹង​កំណើន​​​​​​ទេសចរ​ក្នុង​ស្រុក​ប្រមាណ៧​លាន​នាក់ (ដែល​មាន​កំណើន​ប្រមាណ ៣%) ដោយ​បាន​នាំ​មក​នូវ​ចំណូល​​ប្រមាណ ២.៥៤៧​​​​លាន​ដុល្លា ចាក់​បញ្ចូល​ក្នុង​សេដ្ឋកិច្ច​កម្ពុជា (ស្មើនឹង ១៥,៥% នៃ GDP) និង​បង្កើត​ការងារ​ដោយ​​ផ្ទាល់​ប្រមាណ៦២ម៉ឺន​នាក់  និង​ដោយ​ប្រយោលរាប់ម៉ឺន​នាក់ទៀត។ តាម​ការ​ព្យាករណ៍​ឆ្នាំ​​២០១៤នេះ កម្ពុជា​នឹង​ទទួល​​បាន​ទេសចរ​អន្តរជាតិ​ប្រមាណ៤.៧ លាន​នាក់ ហើយនៅ​ឆ្នាំ២០១៥ ប្រមាណ៥លាន​នាក់ ហើយនៅ​ឆ្នាំ២០២០ កម្ពុជា​នឹង​អាច​ទទួល​​ភ្ញៀវ​ទេសចរ​អន្តរ​ជាតិ​​​ប្រមាណ៧,៥-៨ លាន​នាក់​ ជាមួយ​នឹង​ចំណូល​ជាតិ​សរុប​​ប្រមាណ ៥ពាន់​លាន​ដុល្លារ និង​បង្កើត​ការងារ​​ដោយ​ផ្ទាល់​ប្រមាណ ៨៥​​ លាន ​នាក់។ ​

 ខ្ញុំបាទសូមអនុញ្ញាត​ជំរាប​ជូនអង្គសន្និបាតជ្រាបថា ក្នុងឆ្នាំ​២០១២ និង​ឆ្នាំ​២០១៣ កន្លងមក យើងសម្រេច​បានសមិទ្ធិផលទេសចរណ៍ធំៗជាច្រើន ​៖

ទី១. អំពីការអភិវឌ្ឍ​ផលិតផលទេសចរណ៍៖ យោងលើទស្សនទាន “ការអភិវឌ្ឍបម្រើឲ្យការអភិរក្ស និងការ​អភិរក្ស​បម្រើឲ្យការអភិវឌ្ឍ”  និងដើម្បីឆ្លើយតបទៅនឹងយុទ្ធសាស្រ្តបៃតង និងយុទ្ធសាស្រ្តពិពិធកម្ម កន្លងមកក្រោមកិច្ចសហការ​គាំទ្រ​ពីក្រសួង​-ស្ថាប័នពាក់ព័ន្ធ និង​ក្លឹបឆ្នេរ​សមុទ្រ​ដែល​ស្អាតជាងគេ​បំផុត លើ​សកល​​លោក យើងបានរៀបចំកិច្ចប្រជុំ​​មហា​សន្និបាត​ក្លឹបឆ្នេរ​សមុទ្រ​ដែល​ស្អាត​​បំផុត​លើ​សកល លោក​លើកទី៩​ប្រកប​ដោយ​ជោគជ័យ​ កាលពីថ្ងៃទី៦-១០ ខែធ្នូ ឆ្នាំ​២០១៣ និងបាន​ដាក់​​ចេញ​​នូវសេចក្តី ថ្លែងការណ៍​បូកគោ​​ស្តីពី “ការ​អភិវឌ្ឍ​ទីក្រុង​​តំបន់ឆ្នេរ​ប្រកបដោយ​និរន្តរភាព”។ យើងបាន​រៀបចំ​ពិធីបុណ្យ​សមុទ្រ​​ជារៀងរាល់ឆ្នាំ ហើយឆ្នាំ ២០១៣ កន្លងមកនេះ ​យើង​បានរៀបចំ​ពិធី​បុណ្យ​​​សមុទ្រ​លើកទី២ នៅខេត្ត​កែប ក្រោម​ប្រធាន​បទ “ផ្ទៃសមុទ្រខៀវស្រងាត់ ទីក្រុង​បៃតង” ប្រកប​ដោយ​​​ជោគជ័យ រីឯការ​រៀបចំ​បុណ្យ​សមុទ្រ​នៅ​ឆ្នាំ២០១៤ នឹងប្រព្រឹត្តទៅនៅ​ខេត្តកោះកុង​។​ ព្រម​ជា​មួយនេះ យើងបានសហការជាមួយក្រុមហ៊ុនផលិតកម្ម Adventure Line ​Productions របស់បារាំង ថតកម្មវិធី Koh Lanta ​​នៅកោះរុង ​ដែលជាប្រភេទខ្សែភាពយន្តផ្សងព្រេងរួមមាន០៩ភាគ ហើយដែល​ត្រូវ​បាន​បញ្ចាំង​ផ្សាយ​​នៅកម្មវិធីទូរទស្សន៍បារាំង TF1 ប្រកបដោយជោគជ័យ។ បច្ចុប្បន្ន មានក្រុមហ៊ុនផលិត​កម្ម​ប៊ុលហ្គារី បាននិងកំពុងថតកម្មវិធីផ្សងព្រេង Bulgaria Survivor នៅកោះរុង ខេត្តព្រះសីហនុ។

ទន្ទឹមនឹងនេះ នៅឆ្នាំ២០១២ ២០១៣ យើងបានបង្កើត​ផលិតផល​ និងព្រឹត្តិការណ៍ទេសចរណ៍​នានា​ជា​ច្រើន រួមមាន​ព្រឹត្តិការណ៍​ទេសច​រណ៍​​វប្បធម៌​និងកីឡា​ ជាអាទិ៍ព្រឹត្តិការណ៍រត់ប្រណាំង Interna- tional Half Marathon នៅខេត្តសៀមរាប រាជធានីភ្នំពេញ និងខេត្ត​ព្រះសីហ​នុ ការ​ប្រណាំង​រថយន្ត India-ASEAN Car Rally នាខែធ្នូ ឆ្នាំ២០១២ និងការប្រជុំ​សន្និសីទជាច្រើន ដូចជាកិច្ចប្រជុំកំពូលអាស៊ាន និង​កិច្ចប្រជុំកំពូលពាក់ព័ន្ធនានា កិច្ចប្រជុំគណៈកម្មការបេតិកភណ្ឌពិភពលោកលើកទី៣៧ កិច្ចប្រជុំអន្តរ​រាជរដ្ឋាភិបាលលើកទី៣ សន្និសីទអន្តរជាតិ ថ្នាក់តំបន់ និងថ្នាក់ពិភពលោកជាច្រើនទៀតនៅ​ភ្នំពេញ​នៅ​សៀមរាបអង្គរ និងនៅក្រុងព្រះសីហនុ។

នៅខែកញ្ញាឆ្នាំ២០១៤ យើងនឹងរៀបចំពិព័រណ៍ទេសចរណ៍ PATA Travel Mart នៅរាជធានីភ្នំពេញ ដែលមាន​ប្រតិបតិ្តករ​ទេសចរណ៍ និងផ្នែកឯកជនពាក់ព័ន្ធនានាប្រមាណជាង ១ពាន់នាក់ ចូលរួម ព្រមជាមួយនឹង​ការ​​​រៀបចំវេទិកាវិនិយោគទេសចរណ៍អាស៊ាន (ASEAN Tourism Investment Forum) និងសន្និសីទ​អន្តរ​ជាតិ​ស្តីពីសហគមន៍ទេសចរណ៍។ នៅឆ្នាំ២០១៥ ក្រសួងទេសចរណ៍ និងក្រសួងវប្បធម៌ និងវិចិត្រ​សិល្បៈ សហការជាមួយអង្គការទេសចរណ៍ពិភពលោក​ (UNWTO) និងអង្គការ UNESCO នឹងរៀបចំ​ព្រឹត្តិការណ៍សន្និសីទអន្តរជាតិស្តីអំពីទេសចរណ៍ និងវប្បធម៌ ដែលមានថ្នាក់ដឹកនាំជា​រដ្ឋមន្រ្តី​ទេសចរណ៍ រដ្ឋមន្រ្តីវប្បធម៌ ផ្នែកឯកជន និងឥស្សរជនល្បីៗជុំវិញពិភពលោក ប្រមាណ ១ពាន់នាក់ ចូលរួម នៅខេត្ត​សៀមរាប។

សហគមអេកូទេសចរណ៍ និង ធម្មជាតិជាច្រើន ត្រូវបានបង្កើតឡើង​ដែលសរុបមកដល់បច្ចុបន្ន​យើងមានសហគមទេសចរណ៍ ប្រមាណ ៥០ មូលដ្ឋាន។

ដើម្បីចូលរួម​អនុវត្ត “សេចក្តីប្រកាស​ក្រុងព្រះសីហនុស្តីពីកិច្ចសហការ​ពហុភាគីដើម្បី​អភិវឌ្ឍ​​អេកូ​ទេសចរណ៍” ដែល​បានអនុម័ត​ដោយ​អង្គការ​ទេសចរណ៍ពិភពលោក​ (UNWTO) កាលពីឆ្នាំ​២០១​១ ក្រសួង​ទេស​ចរ​ណ៍ ក្រសួង​បរិស្ថាន និង​ក្រសួងកសិកម្ម រុក្ខាប្រមាញ់ និងនេសាទ បាន​ឯកភាព​​​រួម​គ្នា​ជំរុញ​ និង​អភិវឌ្ឍ​សហគ​ម​ន៍​ទេសចរណ៍ និងសហគមន៍អេកូទេសចរណ៍ ដោយ​​​បង្កើត​ក្រុមការងារ​​បច្ចេក​ទេស​ចម្រុះ​រួមគ្នាធ្វើ​កិច្ចការនេះ។ ​​យើងបានដាក់ចេញនូវប្រកាសស្តីពីក្រមសីលធម៌វិជ្ជាជីវៈ និងក្រមប្រតិបតិ្ត​វិជ្ជាជីវៈទេសចរណ៍ ដើម្បីឲ្យប្រតិបតិ្តករទេសចរណ៍អនុវត្ត។​

ទី២. ​ការពង្រឹង​គុណភាព​ផលិតផលទេសចរណ៍៖ ទន្ទឹមនឹងការអនុវត្តយ៉ាងត្រឹមត្រូវនូវ​ច្បាប់ស្តីពីទេសចរណ៍ យុទ្ធនាការឃោសនា​ផ្សព្វផ្សាយ​ទេសចរណ៍ “កម្ពុជាៈ ព្រះរាជាណាចក្រអច្ឆរិយៈ” និងចលនា​ប្រឡង​ប្រណាំង “ទីក្រុងស្អាត រមណីយដ្ឋានស្អាត សេវាល្អ” ពិតជាធានា​បាននូវការលើ​កកម្ពស់​កិត្យានុភាពជាតិ និង​ជំរុញ​ការ​ផ្ស​ព្វផ្សាយ​ និងអភិវឌ្ឍ​វិស័យ​ទេសចរណ៍ ដើម្បីប្រែក្លាយ​​កម្ពុជា​ក្លាយជាគោលដៅ​ទេសចរណ៍​​ប្រកប​ដោយ​​ភាព​ទាក់ទាញ និងផ្តល់​ភាពកក់ក្តៅ​ដល់​​ភ្ញៀវទេសចរក្នុងតំបន់ និងសកលលោក។ យើង​នឹង​​ធ្វើ​ការ​បូក​​សរុបជាលើកទីពីរ ដើម្បី​​ផ្តល់​ជូន​បណ្ណសរសើរ​ដល់​រមណីយដ្ឋានស្អាត សេវាល្អ នៅ​ក្នុង​សន្និបាត​នេះ​​ផងដែរ។ ដោយ​ឡែក​សម្រាប់​​ចលនា​ប្រឡង​ប្រណាំង​ទីក្រុង​ស្អាត គណៈកម្មាធិការ​ជាតិ​វាយ​តម្លៃ​ទីក្រុងស្អាត បាន​ធ្វើ​ការ​វាយ​តម្លៃ​ដំណាក់កាល​បឋម នៃចលនា​ប្រឡង​ប្រណាំង​ទីក្រុងស្អាត (ក្នុង​នោះ  ជាលទ្ធផល​​​​បឋម​ គឺក្រុង​បាត់ដំបង​ ជាក្រុងឈានមុខគេ បន្ទាប់មកក្រុង​សៀមរាប ក្រុងកែប និងក្រុង​ពោធិ៍សាត់)។ ព្រមជាមួយនេះ ​​គណៈ​កម្មា​ធិ​ការ​ជាតិបានរៀបចំ​នូវ​​​សៀវភៅស្តីពីកម្មវិធី​ការងារ​អនុវត្ត​ឆ្ពោះទៅ​ទទួលជ័យលាភី​ផ្ការំដួល ២ ឬ៣ទងដល់​ក្រុង/​ខណ្ឌ​បេក្ខភាព ក្នុង​នោះចំនុច០៤ធំៗ​ជា​យុទ្ធសាស្រ្ត​៖ ១).​ការ​គ្រប់គ្រង​សំណល់​រឹងនិងសំណល់រាវ​ ២).ការ​ពង្រឹង​ការផ្តល់​សេវាកម្មទេសចរ​ណ៍និង​​សេវា​សា​ធារណៈ ៣).ការរៀបចំសណ្តាប់ធ្នាប់ សោភ័ណភាពទីក្រុង ៤).ការរៀបចំ​ឱ្យ​​មាន​សង្កាត់គំរូ ដើម្បី​ឆ្ពោះ​ទៅ​ទទួល​ជ័យលាភី​នៅថ្ងៃទី២៧ ខែកុម្ភៈ ឆ្នាំ​២០១៥ នា​ឱកាស​​ប្រារព្ធទិវាជាតិ​ទីក្រុងស្អាតលើក​ទី៣។

ទន្ទឹមនឹងចលនា​ប្រឡងប្រណាំងនេះ​ ក្រោមពន្លឺនៃច្បាប់​ស្តីពីទេសចរណ៍​ វិស័យទេសចរណ៍​កម្ពុជា​​បាន​​នឹង​​កំពុងមាន​ការអភិវឌ្ឍ​ប្រកបដោយ​ប្រសិទ្ធភាព​ គុណភាព និងនិរន្តរភាព និងធានា​លើក​កម្ពស់​​គុណ​​ភាព​សេវាកម្មទេសចរណ៍ ​​ផ្តល់សេវា​សាធារណៈ​ជូន​ដល់​អាជីវករ​ទេស​ចរណ៍ប្រកបដោយ​តម្លាភាព ប្រជាធិបតេយ្យ និងយុត្តិធម៌។  

យើង​ក៏បាននិង​កំពុងរៀបចំ​ការ​សម្រួល​​នីតិវិធី​នៃ​ការផ្តល់អាជ្ញាបណ្ណ​ទេសចរណ៍ តាម​ប្រព័ន្ធ Online ចូលរួម​​ដល់​ការកាត់​បន្ថយ​របាំង​មិន​​ចាំ​បាច់មួយ​ចំនួនក្នុង​ការផ្តល់អាជ្ញាបណ្ណទេសចរណ៍​​ឱ្យ​បាន​កាន់តែ​ឆាប់​រហ័ស និង​មានប្រសិទ្ធភាព​ខ្ពស់​ជាងមុន។​ ទន្ទឹមនឹង​នោះ ក្រសួងទេសចរណ៍បាន​​កំពុង​រៀប​ចំ​នូវ​ស្លាក​សញ្ញា​​ពិសេស “អេកូឡាបិល” ដោយ​ផ្អែកលើ​ស្តង់ដាសម្រាប់សេវាកម្មនីមួយៗ ដូច​ជា ស្តង់ដា​សណ្ឋាគារ​បៃតង ស្តង់ដា​​​រផ្ទះស្នាក់បៃតង ស្តង់ដា​រ​​​ទីក្រុងទេសចរណ៍ស្អាត ស្តង់ដា​រ SPA and Wellness  ស្តង់ដា​របង្គន់​សាធារណៈ និងស្តង់ដា​រទេស​ចរណ៍​សហគមន៍ ដែលក្នុងនោះកម្ពុជាត្រូវបានអាស៊ាន​ប្រគល់ ​ភារកិច្ចនាំមុខអំពីស្តង់ដារទីក្រុងទេសចរណ៍ស្អាតអាសាន និងស្តង់ដារសហគមន៍ទេសចរណ៍អាស៊ាន​។

ទី៣. ចំពោះការអភិវឌ្ឍ​ធនធានមនុស្ស៖ ដើម្បី​​ពង្រឹង​គុណភាព​នៃការបណ្តុះបណ្តាល​ធនធានមនុស្ស​ក្នុង​​វិស័យទេសចរណ៍កម្ពុជា និងដើម្បី​ត្រៀម​បំលាស់ទី​អ្នកជំនាញ​ទេសចរណ៍ក្នុងអាស៊ាននៅឆ្នាំ២០១៥​ គណៈកម្មាធិការជាតិអ្នកជំនាញទេសចរណ៍ (ដែល​ជាដៃគូ​ការងារ​ជាមួយ​លេខាធិការដ្ឋានអាស៊ានក្នុងការ​ធ្វើបំលាស់ទី​អ្នកជំនាញទេសចរណ៍​អាស៊ាននៅឆ្នាំ២០១៥) បានរៀបចំ​ និងសម្រេច​បាននូវ​ឯកសារ​ទ្រទ្រង់​ការ​អនុវត្ត​កិច្ចព្រមព្រៀង​ទទួលស្គាល់​គ្នាទៅវិញទៅមក​​នៃអ្នកជំនាញទេសចរណ៍ (MRA) ជាច្រើន​ ដូចជា​​ប្រអប់​បណ្តុះ​បណ្តាល (Toolboxes) សម្រាប់​ផ្នែកសេវាកម្មសណ្ឋាគារចំនួន ១៤៤ និងបណ្តុះ​បណ្តាល​គ្រូ​បង្គោល (Train of trainer) និងអ្នកវាយតម្លៃបង្គោល (Master Assessor) ចំនួន ២១០រូប។ កន្លងមក អាស៊ានបានបណ្តុះបណ្តាលគ្រូបង្គោល និងអ្នកវាយតំលៃបង្គោលអាសាន បានចំនួន ៦០ រូប​ក្នុង​នោះកម្ពុជា​មាន៦រូបហើយមួយរូបបានទទួលចំណាត់ថ្នាក់​ឆ្នើមរបស់អាស៊ានផ្នែកសេវាកម្ម​សណ្ឋាគារ។​​​ ទន្ទឹមនឹងនៅក្នុងការប្រលងប្រណាំងជំនាញទេសចរណ៍អាស៊ានកាលពីឆ្នាំ២០១២ យុវនារីកំព្រាមួយ​រូប បា​ន​ទទួលជ័យលាភីមេដាយឆ្នើមអាស៊ានផ្នែកចុងភៅ។​​​ ដោយយោងលើសមិទ្ធិផលរបស់កម្ពុជា លេខា​ធិការដ្ឋានអាស៊ានបានសិក្សាពីភាពជោគជ័យដ៏ល្អរបស់កម្ពុជា ហើយបានចែករំលែករបាយការណ៏​នេះ​ដល់​ប្រទេសជាសមាជិក។ ទន្ទឹម​នឹង​​​​នេះ ក្រសួងទេសចរណ៍​បាន​ពង្រឹង​ភាព​​ជា​ដៃ​គូជាមួយ​សាលា​បណ្តុះ​បណ្តាលវិជ្ជាជីវៈ​ទេសចរណ៍ឯកជនដូចជាសាលាប៉ូលឌុយប្រ៊ុល អង្គការ​ដើម្បីភាពញញឹមនៃកុមារ​(សាលា PSE )​ វិទ្យាស្ថានជាតិពហុបចេ្ចកវិទ្យា​ (NPIC) ក្នុងការ​បណ្តុះ​បណ្តាល​ជំនាញមគ្គុទ្ទេសក៍​ទេសចរណ៍​។ ចំពោះ​មុខ ដើម្បីដាក់អនុវត្តអនុក្រឹត្យ​ស្តីពី​មគ្គុទេ្ទសក៍​ទេស​​ចរណ៍​​ ឱ្យ​មាន​ប្រសិទ្ធភាព​ យើងបាន​ដាក់ចេញ​នូវ​ឯកសារ​យុទ្ធសាស្ត្រ​ស្តីពីការពង្រឹង​ការបណ្តុះ​បណ្តាល និង​គុណភាព​មគ្គុទ្ទេសក៍ទេសចរណ៍ផងដែរ។​ បច្ចុប្បន្ន​ យើង​កំពុងរៀបចំ​ស្តង់ដា​​សមត្ថភាព និងកម្មវិធី​បណ្តុះ​បណ្តាល​មគ្គុទ្ទេសក៍ទេសចរណ៍​​សម្រាប់​ថ្នាក់​ពិសេស ថ្នាក់តំបន់ និងថ្នាក់ជាតិ និង​បន្ត​​ពង្រឹង​យន្តការ​គ្រប់គ្រង​​មគ្គុទ្ទេសក៍​​ ដោយប្រើប្រាស់​​​ប្រព័ន្ធ បច្ចេក​វិទ្យាទំនើប (ថ្ងៃខាងមុខ​ យើងនឹង​មាន​ប្រព័ន្ធ​ចុះបញ្ជី​មគ្គុទ្ទេសក៍ទេសចរណ៍ និង​ការប្រើប្រាស់​QR Code សម្រាប់​មគ្គុទ្ទេសក៍ទេសចរណ៍​)។ ដោយឡែក​សម្រាប់​​ការ​បណ្តុះ​បណ្តាល​​​ជំនាញវិជ្ជាជីវៈទេស- ចរណ៍ យើងបាន​និងកំពុង​​សហការជាមួយ​ទីភ្នាក់ងារ​អភិវឌ្ឍ​​​បារាំង (AFD) លើការរៀបចំ​​​បង្កើត​សាលា ជាតិជំនាញ​វិជ្ជាជីវៈទេសចរណ៍​នៅ​រាជធានីភ្នំពេញ និង​នៅ​ខេត្ត​​​ព្រះសីហនុ​ ព្រមទាំងបាននិងកំពុង​បំផុស​លើក​ទឹកចិត្តដល់​ផ្នែកឯកជន​ដើម្បីចូលរួម​បង្កើត សាលា​បណ្តុះបណ្តាលវិជ្ជាជីវៈទេសចរណ៍ឲ្យបានច្រើន ។​

ទី៤. ការតភ្ជាប់​ និងការសម្រួលការ​ធ្វើដំណើរ​ដឹកជញ្ជូន៖ មកដល់​បច្ចុប្បន្ន​​​យើង​មាន​ក្រុមហ៊ុន​អាកាសចរ​ក្នុង​ស្រុក​ចំនួន២ក្រុមហ៊ុន និងក្រុមហ៊ុនអាកាសចរ​អន្តរជាតិ​ចំនួន ២៤ក្រុមហ៊ុន ​ដោយ​បាន​ហោះហើរត្រង់ ពីតំបន់អាស៊ាន កូរ៉េ ចិន Quatar មកសៀមរាប និងភ្នំពេញ។

-ចំពោះទំនាក់ទំនង​ការ​​​​ដឹក​​​ជញ្ជូនកម្ពុជា-វៀតណាម គឺត្រូវបាន​ពង្រីក​ឲ្យកាន់តែល្អ​ប្រសើរ​ឡើងនៅ​តាមច្រកទ្វារទាំង១0 ដោយ​​មាន​ការព្រមព្រៀង​គ្នាបង្កើន​ចំនួនរថយន្តដល់​៣០០គ្រឿងក្នុង១ថ្ងៃ​ ដោយ​​ ក្នុងនោះ​រថយន្ត​ដឹកអ្នក​ទេស​ចរណ៍មានចំនួន៧៨គ្រឿង (៣៩ គ្រឿងពីកម្ពុជា និង៣៩គ្រឿងពី​វៀត​ណាម)។

         -ជាមួយភាគីឡាវ តាមច្រកត្រពាំង​គ្រៀលដែលបានរៀបចំ​សម្បទា​​​​​​ល្អ​ មាន​ចំណត​រថយន្ត កន្លែង​ធ្វើការ  និង​​​​សេវាដឹកជញ្ជូនភាគីឡាវ និងកម្ពុជា បានចុះហត្ថលេខាលើ​កិច្ចព្រមព្រៀងដឹកជញ្ជូ​នដោយ អនុញ្ញាតឲ្យរថយន្ត​ដឹកអ្នក​ទេស​ចរណ៍១០ក្រុមហ៊ុន(៥ ក្រុមហ៊ុនមកពីកម្ពុជា និង៥ ក្រុមហ៊ុនមកពី​ឡាវ ប៉ុន្តែ បច្ចុប្បន្ន ទើបតែមាន១ក្រុមហ៊ុន កំពុងដំណើរការ)

​         -ជាមួយភាគីថៃៈ ក៏បានចុះកិច្ចព្រមព្រៀងដឹកជញ្ជូនរវាង ក្រសួងសាធារណការ និងដឹកជញ្ជូន នៃ ប្រទេសទាំងពីរ ដោយអនុញ្ញាតឲ្យរថយន្តដឹកជញ្ជូនទំនិញ និងអ្នកធ្វើដំណើរចំនួន ៨០គ្រឿង  (៤០ គ្រឿង  ពីកម្ពុជា  ក្នុងនោះ ១០គ្រឿង ជារថយន្តដឹកទំនិញ និង៣០ គ្រឿង រថយន្ត​ដឹកអ្នក​ទេស​ចរណ៍ និង៤០គ្រឿងពី​ថៃ ក្នុងនោះ ១០គ្រឿង ជារថយន្ត​ដឹកអ្នក​ទេស​ចរណ៍ និង៣០គ្រឿង​រថយន្តដឹកទំនិញ) និងមានក្រុមហ៊ុនដឹកជញ្ជូន​០២ទៀត បានដឹកជញ្ជូនភ្ញៀវផ្ទាល់ពីទីក្រុងបាងកក មកទីក្រុង​សៀមរាប។​

​បច្ចុប្បន្ន​ កម្ពុជាមានច្រកទ្វារអន្តរជាតិជាមួយប្រទេសជិតខាង សរុបចំនួន ២៤ ក្នុងនោះផ្លូវគោកមាន ចំនួន១៧(ដោយមិនទាន់រួមបញ្ចូលទាំងច្រកទ្វារអន្តរជាតិដែលបើកថ្មីចំនួន​០៣) ផ្លូវទឹកមានចំនួន០៤ និងផ្លូវអាកាសមានចំនួន ៣។​

​គណៈកម្មការអន្តរក្រសួងដើម្បីសម្រួលការដឹកជញ្ជូននិងធ្វើដំណើរតាមច្រកទ្វារអន្តរជាតិ បាន​ធ្វើការ​ប្រជុំ​ជា​ប្រចាំ ហើយបានកាត់បន្ថយនូវរបាំងមិនចាំបាច់​ដើម្បីសម្រួលការធ្វើ​ដំណើររបស់ទេសចរ​បាន​យ៉ាងច្រើន។

យើងបានសហការជាមួយក្រសួងមហាផ្ទៃ អគ្គស្នងការដ្ឋាននគរបាលជាតិក្នុងការយកចិត្តទុកដាក់ពង្រឹង សន្តិ​សុខ សុវត្ថិភាពទេសចរណ៍ ពិសេសនៅតំបន់ទេសចរណ៍សំខាន់ៗដោយបានចាត់តាំងរៀបចំឲ្យមាន សន្តិសុខឯកជន និងយុវជនស្មគ្រចិត្តដែលជាបណ្តាញរបស់នគរបាលទេសចរណ៍។

       

‑ ឯកឧត្តមឧបនាយករដ្ឋមន្រី្ត ជាទីគោរពដ៏ខ្ពង់ខ្ពស់!

‑ អង្គ​សន្និបាត​ជា​ទីមេត្រី!

ទន្ទឹមនឹង​លទ្ធផល​ដែល​យើងទទួលបាន​ប្រកបដោយ​មោទនៈ យើងក៏​នៅមានបញ្ហាប្រឈម​មួយចំនួន​ដែលត្រូវ​រួបរួមគ្នា​ដើម្បីដោះស្រាយ​ប្រកបដោយ​ស្មារតី​ទទួលខុសត្រូវ​ និងការ​ប្តេជ្ញាចិត្តខ្ពស់ ​​ ពិសេស​ក្នុង​បរិបទ​​ដែលកម្ពុជា​កំពុង​​​ធ្វើ​សមាហរណកម្ម​អាស៊ាននៅឆ្នាំ២០១៥ ខាងមុខ។ យើង​ឃើញ​ថា វិស័យ​ទេសចរណ៍កម្ពុជាកំពុងជួប​ប្រទះ​​​នូវបញ្ហា​ប្រឈម​ ដូចខាងក្រោម៖​

ទី១.   ខណៈដែលកម្ពុជា​សំបូរទៅដោយ​ធនធាន និងសក្តានុពល​ធនធានធម្មជាតិ និងវប្បធម៌ កម្ពុជាមាន​សក្តានុ​ពល​​ក្នុងការអភិវឌ្ឍផលិតផលទេសចរណ៍ប្រកបដោយ​ភាព​សំបូរបែបបំរើឱ្យ​ភ្ញៀវទេសចរ​ ដែល​ទាម​ទារ​ឱ្យ​មាន​​ការវិនិយោគ​ឯកជន និងវិនិយោគ​សាធារណៈ​​ឱ្យបាន​សមស្រប​សម្រាប់​ការ​អភិវឌ្ឍ​ផលិតផល​ទេសចរណ៍​ទៅថ្ងៃអនាគត។​

ទី២.   កង្វះខាតលើ​ការងារផ្សព្វផ្សាយ៖ បច្ចុប្បន្នយើង​បានខិតខំ​យ៉ាងសកម្ម​ និងចូលរួម​ពីគ្រប់ផ្នែក​ដើម្បី​ជំរុញ​ការ​ផ្សព្វផ្សាយ“កម្ពុជាៈ ព្រះរាជាណាចក្រអច្ឆរិយៈ” ដើម្បីទាក់ទាញ​ទេសចរតាម​គ្រប់រូបភាព និងគ្រប់​មធ្យោបាយ​​នានា ដូចជាផ្សព្វផ្សាយ​តាមបណ្តាញទូរទស្សន៍ជាតិ និងទូរទស្សន៍​ក្នុងស្រុកដែលផ្សាយទៅក្រៅ ប្រទេស ទូរទស្សន៍CNN តាមគេហទំព័រ ការចូលរួម​ពិព័រណ៍​ទេសចរណ៍​​អន្តរជាតិនានា ការ​ផលិត​ស្ប៉ត​ផ្សព្វផ្សាយ ចំរៀងទេសចរណ៍ ការផលិត​សំភារៈផ្សព្វផ្សាយ ការធ្វើ Fam-Trip ។ល។ ប៉ុន្តែ​ ដើម្បីរក្សា​ស្ថេរ​ភាព​​នៃកំណើន​ក្នុងរយៈពេលវែង យើងត្រូវ​ការភាពប្រកួតប្រជែង​ខ្លាំង ទាមទារ​ការ​ផ្សព្វផ្សាយ​ច្រើន និងចូលរួមក្នុងទីផ្សារ​​ទេសចរណ៍​សំខាន់ៗ​ជាគោលដៅ​ដែលតម្រូវឱ្យ​មានយន្តការ​ស្ថាប័ន​​​​គាំទ្រច្បាស់លាស់ (ទាំងថវិកា មធ្យោបាយ និងធនធានមនុស្ស)។ ឆ្លៀត​ឱកាសនេះ ក្នុងនាម​ឱ្យ​ក្រសួងទេសចរណ៍​ ខ្ញុំសូម​ថ្លែង​អំណរគុណចំពោះ​ទូរទស្សន៍និងវិទ្យុក្នុងស្រុក និងប្រព័ន្ធផ្សព្វផ្សាយ​ទាំងអស់ដែលតែងតែ​គាំទ្រ និងជ្រោម​ជ្រែង​ដល់ការ​ផ្សព្វផ្សាយ​ពី​វិស័យ​ទេសចរណ៍កម្ពុជា។​

ទី៣.   ការអនុវត្ត​ច្បាប់ស្តីពីទេសចរណ៍​នៅមានកំរិត​នៅឡើយ​ទាំងការ​ផ្សព្វផ្សាយ​​​​​​ និង​អនុវត្ត​ច្បាប់ក៏ពុំទាន់​ទូលំ​-ទូលាយ​ និងស៊ីជំរៅទាំងការ​កសាងបទដ្ឋានគតិយុត្តទ្រទ្រង់ក៏​មាន​ការ​​យឺតយ៉ាវ។ មិនតែប៉ុណ្ណោះ​ការចូលរួម​​របស់​​ផ្នែកឯកជន​ក្នុងការអភិវឌ្ឍវិស័យទេសចរណ៍​នៅកម្ពុជា​ហាក់នៅមាន​កំរិត​ ដោយរចនាសម្ព័ន្ធ​សមាគម​ទេសចរណ៍ខ្លះ​នៅទន់ខ្សោយ (ពុំមានអ្នក​ធ្វើការជាអចិន្ត្រៃយ៍ កង្វះភាព​ជាតំណាង​ដោយចំនួន​សមាជិក​នៅ​​​​​មាន​កំរិត ហើយក៏ពុំមាន​គោលការណ៍​​ច្បាស់លាស់​ក្នុង​ដំណើរការរបស់ខ្លួន) កង្វះការយកចិត្តទុកដាក់​ដល់និរន្តរភាពនិងទំនួលខុសត្រូវ​ផ្នែកសង្គម។ យើង​​មិនទាន់​បានរៀបចំ​ឱ្យមាន​ស្តង់ដា​គុណភាព​លើ​គ្រប់​សេវាទាំងអស់នៅឡើយ។​ សមាគមន៍ឧស្សាហកម្មទេសចរណ៍ខ្លះពុំទាន់មានក្រមសីលធម៌វិជ្ជាជីវៈ និងក្រម​ប្រតិបត្តិវិជ្ជាជីវៈទេសចរណ៍ ប្រើប្រាស់ឲ្យបានត្រឹមត្រូវ។

ទី៤. ចំពោះ​ការ​អភិវឌ្ឍ​ធនធាន​មនុស្ស​ក្នុងវិស័យ​ទេសចរណ៍ យើងខ្វះ​កំលាំង​ពលកម្ម ពិសេស​ជំនាញ​វិជ្ជាជីវៈ​​ទាំងលើ​បរិមាណ​ និងគុណភាព​ ដែល​​ជាកត្តា​គន្លឹះ​ក្នុងការពង្រឹង​គុណភាព​​សេវាកម្មទេសចរណ៍ និង​បង្កើន​ភាព​ប្រកួត​ប្រជែង​តាមរយៈ​​ការ​បំពេញ​​​​​សេចក្តី​ត្រូវការ​របស់ភ្ញៀវជាតិនិងអន្តរជាតិ។ ខណៈពេលដែល​ការ​​​​​​អនុវត្ត​កិច្ចព្រមព្រៀង​ទទួលស្គាល់​អ្នក​ជំនាញ​ទេសចរណ៍ (MRA) លើការ​បំលាស់ទីអ្នកជំនាញ​ទេស​ចរ​ណ៍​នៅ​ក្នុងតំបន់​អាស៊ានកាន់តែ​ខិត​ជិត​​មកដល់​ យើងត្រូវត្រៀម​លក្ខណៈ​សម្បត្តិ​ឱ្យបាន​សមស្រប ហើយ​បច្ចុប្បន្ន​​ យើងពុំ​ទាន់មាន​សាលាជាតិ​​បណ្តុះ​បណ្តាល​ជំនាញវិជ្ជាជីវៈទេសចរណ៍ក្នុងការ​​​ពង្រឹង​ និងបណ្តុះ​បណ្តាលជំនាញគ្រប់កំរិតនិងគ្រប់​ប្រភេទ​ជំនាញវិជ្ជាជីវៈ​ទេសចរណ៍ ដែលអាចផ្តល់លទ្ធភាពឲ្យសិស្ស​បានចូលរៀនក្នុងតម្លៃសមរម្យ។

ទី៥.   ការតភ្ជាប់​តាមផ្លូវ​គោក ផ្លូវទឹក ផ្លូវអាកាស៖​ ក្នុងនោះការតភ្ជាប់តាមផ្លូវអាកាសមកកម្ពុជា ​ភាគច្រើន​ ជាលក្ខណៈតំបន់ រីឯការហោះហើរត្រង់ពីគោលដៅឆ្ងាយៗពុំទាន់​មានច្រើន។ ការ​ដឹកជញ្ជូន​ទេស​ចរណ៍ តាមនាវាសមុទ្រ ទោះបីជាត្រូវបានសម្រួលជាបន្ត​បន្ទាប់ ប៉ុន្តែ​យើងក៏​នៅ​ខ្វះខាតកំពង់ផែ​ទេស​ចរណ៍​ខ្នាត តូចនៅ​តាមបណ្តា​ខេត្ត​​​​តំបន់ឆ្នេរ។ រីឯ ការដឹកជញ្ជូនទេសចរណ៍តាមនាវាទន្លេ​(River Based Tourism) ដែលកម្ពុជាមានសក្កានុពលខ្ពស់ ក៏នៅពុំទាន់បានអភិវឌ្ឍឲ្យបានខ្លាំងក្លា។ កំពង់ផែទេសចរណ៍​តាមដង​​ទន្លេ​មេគង្គ​ក៏នៅមានការខ្វះខាត។​ ប្រព័ន្ធ​សន្តិសុខ សុវត្ថិភាព​ ពិសេសដំណោះស្រាយខាងផ្នែកធានារ៉ប់រង នៅ ពេល​ទេសចរមានគ្រោះថ្នាក់ នៅមានការ​យឺតយ៉ាវ។​

ទី៦.   ការទប់ស្កា​ត់​ការធ្លុះធ្លាយ​ផ្នែកសេដ្ឋកិច្ចក្នុងវិស័យទេសចរណ៍៖  ជាមធ្យម​ការធ្លុះធ្លាយសេដ្ឋកិច្ច​នៃវិស័យ​ទេសចរណ៍​កម្ពុជាមានប្រមាណ២៥% ដែល​កិច្ច​ការ​នេះតម្រូវ​ឱ្យ​​មាន​កា​ររៀបចំ​​​​​ផែនការ​ និងយន្តការ​​​​ច្បាស់​លាស់ ពិសេស​ទាមទារ​ឱ្យមាន​កិច្ចសហការ​ស្អិត​រមួតរវាងក្រសួង-ស្ថាប័នពាក់ព័ន្ធដើម្បីទាញយក​​ប្រយោជន៍ ​​ជា​អតិបរមានូវ​តំលៃ​​បន្ថែម (Value added) ពី​វិស័យទេសចរណ៍។

ខ្ញុំ​បាទសង្ឃឹមថា តាមរយៈ​សន្និបាត​ យើង​នឹងបានទទួល​នូវបទពិសោធន៍​​ និង​យោបល់ល្អៗជាច្រើន ដើម្បី​រួមគ្នា​ដោះស្រាយ​នូវបញ្ហា​ប្រឈមទាំងនេះ ចូលរួម​កាត់បន្ថយ​របាំង​ដែលរាំងស្ទះ​ដល់ការ​អភិវឌ្ឍ​ទេសចរណ៍​កម្ពុជា ពិសេស​​ដល់ការ​ធ្វើ​សមាហរណកម្មទេសចរណ៍កម្ពុជាទៅក្នុងអាស៊ាន នៅឆ្នាំ២០១៥ ខាងមុខនេះ ប្រកបដោយ​ប្រសិទ្ធភាពខ្ពស់ ពោល​​​គឺ​ឆ្ពោះទៅ​សម្រេច​បាននូវ​ចក្ខុវិស័យ​ ៥លាន​នាក់ នៅឆ្នាំ​២០១៥និង៧.៥-៨លាននាក់ ឆ្នាំ២០២០ ខណៈដែលតំបន់​​ ASEANទាំងមូល ទទួលបានទេសចរ៩០.២ លាននាក់ និងមានផែនការនឹង​ទទួល​ភ្ញៀវទេសចរ ​ឲ្យបានប្រមាណ​ ១០៧​លាននាក់ នៅឆ្នាំ២០១៥  ស្របទៅនឹង​ផែនការយុទ្ធសាស្ត្រ​​ទេសចរណ៍​អាស៊ាន (ATSP-2011-2015)។ ​

អាស៊ានបានដាក់​ចេញ​នូវ​យុទ្ធសាស្ត្រ​គន្លឹះ​ធំៗចំនួន ០៥ ​ដើម្បី​ឆ្ពោះទៅ​សមា​ហរណកម្ម​អាស៊ាន២០១៥ ដើម្បីអាស៊ាន​ជា​គោលដៅ​​ទេសចរណ៍កំរិតអន្តរជាតិ និងផ្តល់ភាពកក់ក្តៅដល់​ទេសចរ ​(ASEAN World Class Destination , ASEAN feel the warmth)​៖

 (១) ជំរុញ​ការវិនិយោគទេសចរណ៍ និង​អភិវឌ្ឍ​ផលិតផល​ទេស​ចរណ៍ ៖ ផ្តោតសំខាន់លើទេសចរណ៍​ធម្មជាតិ ទេសចរណ៍វប្បធម៌-បេតិកភណ្ឌ ទេសចរណ៍សហគមន៍ ទេសចរណ៍តាមនាវាសមុទ្រនិងទន្លេ ទេសចរណ៍ទីក្រុង ការរៀបចំ​ព្រឹត្តិការ​​ពិពណ៌ទេសចរណ៍ និងសន្និសីទធំៗ (MICE)។ល។

(២).ការ​សិក្សា​​​ទីផ្សារ និង​ផ្សព្វផ្សាយ៖ ដែលផ្តោតសំខាន់ទៅលើទីផ្សារក្នុងតំបន់ (ASEAN for ASEAN) អាស៊ាន​បូក៣ និងអាស៊ាន-ឥណ្ឌាក្នុងនោះទីផ្សារចិនជាយុទ្ធសាស្រ្តចំបង។​   អង្គការទេសចរណ៍ពិភពលោកបានវាយ​តម្លៃថា​ប្រទេសចិននឹងក្លាយជាគោលដៅទេសចរណ៍និងទីផ្សារទេសចរណ៍ដ៏ធំមួយរបស់ពិភពលោកនៅឆ្នាំ២០២០។ ​​បច្ចុប្បន្ន មានទេសចរចិនចេញក្រៅប្រទេសប្រមាណ​ ១០០លាននាក់ ហើយនឹងអាចកើនដល់​ប្រមាណ ២០០​លាន​នាក់ នៅ​ឆ្នាំ២០២០។ ឆ្នាំ២០១៣ ទេសចរចិន​មកទស្សនាអាស៊ាន មានប្រមាណជាង ៩លាននាក់ ក្នុងនោះមកទស្សនាប្រទេសថៃ ជាង២លាននាក់ មក​ទស្សនាប្រទេស​​ម៉ាឡេស៊ី ជាង២លាននាក់។ ចំពោះកម្ពុជា ឆ្នាំ២០១៣ យើងទទួលបាន​ទេសចរចិន​ប្រមាណជិត ៤៧ម៉ឺននាក់ ក្នុងកំណើន៣៨,៧%។​ យើង​អាច​ប៉ាន់ស្មានថា កម្ពុជានឹងទទួលទេសចរចិនបានប្រមាណជាង ៨០ម៉ឺននាក់ នៅឆ្នាំ២០១៥ និងប្រមាណជាង ២លាននាក់​នៅឆ្នាំ២០២០។ ឆ្លៀតឱកាសនេះ ខ្ញុំសូមអរគុណចំពោះ​មជ្ឈមណ្ឌលអាសានចិន​ដែលបានខិតខំជួយសហការផ្សពផ្សាយ​ទេស​ចរណ៍​កម្ពុជានៅលើទីផ្សារចិន ហើយកាលពី​ព្រឹក​ម្សិលមិញនេះ យើងបានបើកសម្ភោធជាផ្លូវការ​នូវការថតខ្សែភាពយន្តភាគ​ចិន​ខ្នាតធំ​​ ដែល​​មាន​ចំណង​ជើងថា​”ឥទ្ធិពលស្នេហ៍ / Love is Brave” នៅតាម​​បណ្តា​គោលដៅ​ទេស​ចរណ៍ដ៏ទាក់ទាញនៅ​រាជធានីភ្នំពេញ និងខេត្ត​សៀមរាប ដោយក្រុមហ៊ុនផលិតកម្មភាពយន្តខ្នាតធំ (Beijing Junyi Celebration Culture Co.,Ltd.) ដ៏ល្បីល្បាញ​របស់ចិន។

(៣) ពង្រឹង​គុណភាព​ផលិតផល​ទេសចរណ៍ ដែលផ្តោតសំខាន់លើការរៀបចំស្តង់ដារសេវាកម្មទេសចរណ៍ ​ដូចជា​ស្តង់ដារអាស៊ានGreen Hotelស្តង់ដារទីក្រុងទេសចរណ៍ស្អាតអាស៊ាន ​ ស្តង់ដារផ្ទះស្នាក់អាស៊ាន ​ស្តង់ដា​រ​សហគមទេសចរណ៍អាស៊ាន ស្តង់ដារSPA and Wellness និងស្តង់ដារបង្គន់សាធារណៈអាស៊ាន។

(៤). ការអភិវឌ្ឍ​ធនធាន​មនុស្ស​ក្នុង​វិស័យ​ទេស​ចរណ៍​ ដែលផ្តោតសំខាន់លើការបណ្តុះបណ្តាលជំនាញវិជ្ជា​ជីវៈ​​ទេសចរណ៍ដើម្បីជម្រុញការអនុវត្តស្មារតីកិច្ចព្រមព្រៀង​គ្នាទៅវិញទៅមកនៃអ្នកជំនាញទេសចរណ៍អាសាន (MRA) ដើម្បីបំលាស់ទីអ្នកជំនាញទេសចរណ៍នៅឆ្នាំ២០១៥។

(៥) ជំរុញ​​ការ​តភ្ជាប់ (Connetivity) និង ​សម្រួលការ​ធ្វើ​ដំណើរ​ ដែលផ្តោត​សំខាន់លើលការសម្រួល​ការ​ធ្វើដំណើរនិងការតភ្ជាប់តាមផ្លូវអាកាស ផ្លូវគោក និងផ្លូវទឹកក្នុងតំ​បន់និងការតភ្ជាប់ទៅអាសានបូកបី និងអាស៊ាន-ឥណ្ឌា ការសម្រួលការធ្វើដំណើរបស់ប្រជាពលរដ្ឋក្នុងអាស៊ាន (ASEAN Travellers) តាមរយៈការជម្រុញ​ការលើក​លែង​ទិដ្ឋាការនិងការជម្រុញការផ្តល់ទិដ្ឋាការរួម (ASEAN Single Visa) សំរាប់អ្នកធ្វើដំណើរក្រៅតំបន់អាសាន (Non- ASEAN Travellers)  ដែលបច្ចុប្បន្ន​ កម្ពុជាកំពុងអនុវត្តគំរូជាមួយប្រទេសថៃ។​

‑ ឯកឧត្តមឧបនាយករដ្ឋមន្រី្ត ជាទីគោរពដ៏ខ្ពង់ខ្ពស់!

‑ អង្គ​សន្និបាត​ជា​ទីមេត្រី!

ក្នុងស្មារតីនេះ អ​ង្គសន្និបាត​​លើកនេះ នឹង​​ផ្តោត​ពិភាក្សា​​​រិះរក​នូវ​​គន្លឹះ​ដើម្បី​ចាប់យក​កាល្លា​​នុវត្តភាព​ និង​ឆ្លើយតប​​​នូវ​បញ្ហា​ប្រឈម​ខាង​លើ​ ដើម្បីជាមូលដ្ឋាន​ទ្រទ្រង់​​ក្នុងការធ្វើ​សមាហរណកម្មអាស៊ាន ដែល​ក្នុងនោះយើង​នឹងពិភាក្សា​លើ​ប្រធានបទសំខាន់ៗ ដូចខាងក្រោម៖

ប្រធានបទទី១៖ ស្តីពីការអភិវឌ្ឍផលិតផលទេសចរណ៍

ប្រធានបទទី២៖ ស្តីពីការពង្រឹងគុណភាពផលិតផលទេសចរណ៍ ដែលផ្តោតសំខាន់ទៅលើ :

-      ស្តង់ដារសេវាកម្មទេសចរណ៍

-      សុវត្ថិភាពចំណីអាហារ រាប់ទាំងសុវត្ថិភាពចំណីអាហារតាមដងផ្លូវ

-      ការបណ្តុះបណ្តាលធនធានមនុស្ស ដែលផ្តោតសំខាន់លើការបណ្តុះបណ្តាលជំនាញវិជ្ជា​ជីវៈ​ទេសចរណ៍ ការគ្រប់គ្រង និងពង្រឹង​គុណភាពមគ្គុទ្ទេសក៏ទេសចរណ៍ និងការអនុវត្ត​ក្រម​សីលធម៌វិជ្ជាជីវៈ និងក្រមប្រតិបត្តិវិជ្ជាជីវៈទេសចរណ៍

ប្រធានបទទី៣៖ ស្តីពីការសម្រួល និងពង្រឹងយន្តការទ្រទ្រង់ការអភិវឌ្ឍទេសចរណ៍កម្ពុជា ដែលផ្តោតសំខាន់

លើការសម្រួលការធ្វើដំណើរ និងដឹកជញ្ជូនទេសចរ

ប្រធានបទទី៤៖ ការផ្សព្វផ្សាយ និងយុទ្ធសាស្ត្រទីផ្សារ

ប្រធានបទទី៥៖ ស្តីពីអភិបាលកិច្ចល្អក្នុងវិស័យទេសចរណ៍ ដែលផ្តោតសំខាន់លើ:

-      ការគ្រប់គ្រងការផ្តល់សេវាសាធារណៈតាមប្រព័ន្ធបច្ចេកវិទ្យា

-         ការពង្រឹងរចនាសម្ព័ន្ធ សមត្ថភាព និងភាពជាតំណាងរបស់ផ្នែកឯកជនក្នុងវិស័យទេសចរណ៍

-      ការរៀបចំបណ្តាញអ្នកស្រាវជ្រាវ និងក្រុមប្រឹក្សាយោបល់

-      និងការរៀបចំប្រព័ន្ធ Intranet នៅក្រសួងទេសចរណ៍

ប្រធានបទទី៦៖  ស្តីពី “រមណីយដ្ឋានស្អាត សេវាល្អ”

ប្រធានបទទី៧៖ ស្តីពីចលនាប្រឡងប្រណាំងទីក្រុងស្អាតដែលនឹងត្រូវឆ្លុះបញ្ចាំងអំពីលទ្ធផលនៃការវាយតម្លៃ

បឋមចំពោះចលនានេះ ស្របពេលនៃការប្រារព្ធពិធីទិវាទីក្រុងស្អាតលើកទី២ក្រោមប្រធានបទ

សកម្មភាពរបស់អ្នកដើម្បីទីក្រុងស្អាត ផងដែរ។

‑ ឯកឧត្តម​ឧបនាយករដ្ឋមន្ត្រី ជាទីគោរពដ៏ខ្ពង់ខ្ពស់​!

‑ គណៈអធិបតី និងអង្គ​សន្និបាត ​ជា​ទីគោរព និងជាទី​មេត្រី!

ខ្ញុំបាទមានកិត្តិយសសូមគោរពជម្រាបជូនថា អង្គសន្និបាតលើកនេះ​មានការចូលរួម​ពីក្រសួង-ស្ថាប័ន អាជ្ញាធរ​សមត្ថ​កិច្ច​ពាក់ព័ន្ធ​ នគរបាលទេសចរណ៍ អគ្គនាយកដ្ឋានគយ និងពន្ធដារ សាកលវិទ្យាល័យ សាលាបណ្តុះ​បណ្តាលវិ​ជ្ជា​ជីវៈ ផ្នែកឯកជន សហគមន៍​ទេសចរណ៍ ប្រព័ន្ធ​ឃោសនា​​ផ្សព្វផ្សាយ អង្គការក្រៅរដ្ឋាភិបាល អង្គការជាតិ និងស្ថានទូត​នានា សរុបចំនួន ៨០០នាក់។

ជាទីបញ្ចប់ ខ្ញុំបាទសូមគោរពជូនពរឯកឧត្តមបណ្ឌិតសភាចារ្យឧបនាយករដ្ឋមន្ត្រី រដ្ឋមន្រ្តី​ទទួលបន្ទុក​ទីស្តី​ការគណៈ​រដ្ឋមន្រ្តី​ ទទួលបានសុខភាព​ល្អបរិបូរណ៍ ប្រាជ្ញា​ឈ្លាស​​វៃ អាយុយឺនយូរ ដើម្បីចូលរួមដឹកនាំនាវាកម្ពុជាទៅ​កាន់​ភាព​សំបូរ​រុង​រឿង និងសុភមង្គលជូន​ប្រជាពលរដ្ឋ។​

សូមគោរពជូនពរ​ ឯកឧត្តម លោកជំទាវ លោក លោកស្រី អ្នកនាយកញ្ញា ទទួលបាននូវពុទ្ធពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀតឃ្លាតឡើង​។

ដើម្បីអង្គសន្និបាត​ទាំងមូល​បានដំណើរការប្រកប​​​ដោយប្រសិទ្ធភាព​ គុណភាព និង​ទទួល​​បានលទ្ធផលល្អ​ប្រសើរ​ ខ្ញុំបាទមានកិត្តិយសដ៏ខ្ពង់ខ្ពស់​ សូមគោរពអញ្ជើញ ឯកឧត្តមឧបនាយករដ្ឋមន្ត្រី មេត្តា​ផ្តល់អនុសាសន៍​ណែនាំ​ដ៏ខ្ពង់ខ្ពស់​ និង​ថ្លែងសុន្ទរកថាបើកអង្គសន្និបាត។​  

​សូមគោរពអញ្ជើញ!