ក្នុងនាមខ្ញុំជាសមាជិកសកម្មថ្នាក់ទាបមួយរូបនៃគណបក្សសង្គ្រោះជាតិ និងបានចូលរួមយ៉ាងសកម្មភាពជាមួយថ្នាក់ដឹកនាំគណបក្សនេះកន្លងមក ហើយពេលនេះ មានការតឹងចិត្ត និងតូចចិត្តជាខ្លាំង និងសូមបន្ធូរអារម្មណ៍ខ្លះតាមរយៈសារព័ត៌មាន ទាក់ទងទៅនឹង គោលជំហរ និងសកម្មភាពរបស់ថ្នាក់ដឹកនាំនៃគណបក្សនេះ ដែលតែងតែប្រព្រឹត្តខុសម្តងហើយម្តងទៀត ទាំងខាងផ្នែកគោលនយោបាយដឹកនាំ និងចរឹតអាត្មានិយម មានតែអញ ពួកអ្នកដែលជាកូនចៅត្រូវតែធ្វើតាមអញ ព្រោះអញជាអ្នកទៅរកលុយពីបរទេស ជាដើម។
ពាក់ព័ន្ធទៅនឹងគោលនយោបាយបាយដឹកនាំរបស់គណបក្ស គឺនៅតែមានការបែងចែកជាពីរក្រុមដដែល គឺរវាងក្រុមដែលស្និតនឹងលោកប្រធាន សម រង្ស៊ី និងក្រុមដែលស្និតនឹងលោកអនុប្រធាន កឹម សុខា។ ទាំងសមាសភាព នៅក្នុងជួរគណៈកម្មាធិការនាយក គណៈកម្មាធិការវិន័យ និងឃោសនាការ គឺនៅ តែមិនទាន់ចូលធ្លុងគ្នានៅឡើយ។ ចំណែកឯគណៈកម្មាធិការហិរញ្ញវត្ថុ គឺជាក្រុមដែលស្និតខ្លាំងនឹងលោកប្រធាន សម រង្ស៊ី និងចេះធ្វើបញ្ជីចំណាយបានស្អាតជូនលោកប្រធាន ដើម្បីបានចំណេញជូនលោកប្រធានផង និងបានចំណេញដល់ខ្លួនឯងផង។
ជាក់ស្តែង ក្រុមដែលមានមុខ មានមាត់ចេញទៅចរចា ដែលគេហៅថាក្រុមការងារចរចារបស់គណបក្សនោះ ក៏ត្រូវបានជ្រើសរើសចេញពីសមាសភាពនៃក្រុមដែលស្និតនឹងអតីតប្រធានបក្សចាស់ទាំងពីរផងដែរ។
ទាក់ទង នឹងរឿងចរចានេះ ធ្វើឲ្យរូបខ្ញុំដែលជាសកម្មជនថ្នាក់ទាប គិតឡើងវិលក្បុង ហើយមិនដឹងអនុវត្តតាម គោលនយោបាយមួយណា ពីព្រោះបើស្តាប់ប្រសាសន៍លោកអនុប្រធាន កឹម សុខា លោកថា ៖ « នៅពេលណាស្ថានការណ៍វិលមករកភាពប្រក្រតីវិញនោះ មហាបាតុកម្មនឹងផ្ទុះឡើងម្តងទៀត ហើយពេលកំពុងចរចារនេះ លោកអំពាវនាវឲ្យប្រជាពលរដ្ឋចិញ្ចឹមចិត្តធ្វើបាតុកម្ម ក្នុងបេះដូងជាប្រចាំ » ។ ចំណែកឯសម្តី របស់លោក សុន ឆ័យ ប្រធានក្រុមចរចា ថា « ក្នុងស្ថានភាពដែលកំពុងមានការចរចាត្រូវគ្នានេះ ការធ្វើបាតុកម្មត្រូវផ្អាកសិន។ គេមិនអាច ធ្វើបាតុកម្មផង និងធ្វើការចរចាផង ក្នុងពេលជាមួយគ្នានោះទេ »។
ថ្នាក់ដឹកនាំគណបក្សសង្គ្រោះជាតិ សុទ្ធតែដឹងជាមុនថា រាល់ការចរចា គឺមិនអាចមានប្រៀបលើបក្សកាន់អំណាចនោះទេ ដូច្នេះរាល់ការសម្រេចចិត្តក្នុងការចរចានយោបាយ គឺត្រូវតែមានការហ្មត់ចត់ មិនមែនក្រោយពីស៊ីញ៉េព្រមព្រៀងគ្នាហើយ បែរជាមិនទទួលស្គាល់ ឬស្នើសុំកែតម្រូវ សារចុះសារឡើង តាមចិត្តនឹកឃើញនោះទេ។ បើធ្វើរបៀបនេះ វានឹងបញ្ជាក់អំពីភាពខ្សោយរបស់ខ្លួន។
តាមពិតទៅ « កំណែទម្រង់ការបោះឆ្នោត » គឺជារបៀបវារៈដែលគណបក្សដាក់ចេញ ដើម្បីធ្វើការតថ្លៃគ្នារឿងបែងចែកអំណាចនៅក្នុងស្ថាប័ននីតិបញ្ញត្តិនេះតែប៉ុណ្ណោះ ពីព្រោះថ្នាក់ដឹកនាំគណបក្សសង្គ្រោះជាតិ សុទ្ធតែដឹងថា លទ្ធផលនៃការបោះឆ្នោតលើកនេះ ត្រូវចាញ់គេរួចទៅហើយ។ ចំណុចនេះ ខ្ញុំយល់ថា សមាជិកគណៈកម្មាធិការនាយក និងសកម្មជនគាំទ្រគណបក្សសង្គ្រោះជាតិទាំងអស់ ក៏មិនមែនល្ងង់ និងមិនយល់នោះទេ សូម្បីតែក្រុមយុវជន និងយុវនារីក្មេងៗ ដែលគាំទ្រគណបក្សក៏បានជ្រួលច្របល់ អំពីការធំក្លិននៃការបែងចែកតួនាទីជាមុន ចេញពីក្នុងរង្វង់ថ្នាក់ដឹកនាំគណបក្សសង្គ្រោះជាតិ រួចទៅហើយដែរ ប្រសិនបើនៅពេលដែលការចរចាបានសម្រេច ក្នុងការសុំតំណែងប្រធានរដ្ឋសភា ប្រធានគណៈកម្មការរដ្ឋសភា តំណែងចៅហ្វាយក្រុងភ្នំពេញ និងតំណែងចៅហ្វាយខេត្តមួយចំនួន ជាដើមនោះ។
ក្នុងអំឡុងពេលនៃការធ្វើបាតុកម្មនៅទីលានប្រជាធិបតេយ្យ លោកប្រធាន និង លោកអនុប្រធាន បានស្រែកអាក្រោសហៅសមាជិក និងអ្នកគាំទ្រគណបក្សសង្គ្រោះជាតិពីគ្រប់ទិសទីឲ្យមកចូលរួមធ្វើបាតុកម្ម។ អ្នកខ្លះខំលក់មាន់ លក់ទា រហូតដល់អ្នកខ្លះ លក់ឆ្កែ លក់ឆ្មាទៅទៀត ខ្លះខ្ចប់បាយ ខ្ចប់ទឹក ធ្វើដំណើរមកដេកហាលភ្លៀង ហាលខ្យល់ នៅទីលានប្រជាធិបតេយ្យ ដោយជឿលើការប្រកូកប្រកាស និងជឿលើសម្តី របស់លោកទាំងពីរដែលហ៊ានប្រកាសថា « ស៊ូស្លាប់ទាំងពីរនាក់ » ដើម្បីឲ្យមានការផ្លាស់ប្តូរ។ ផ្ទុយទៅវិញ នៅពេលដែល ក្រុមអាជ្ញាធរ ចុះទៅបណ្តេញវីរៈបាតុករចេញពីទីលានប្រជាធិបតេយ្យ ថ្ងៃទី០៤ ខែមករា ឆ្នាំ២០១៤ មិនបានឃើញមុខលោកទាំងពីរចេញមកការពារបាតុករ ដូចការសន្យានោះឡើយ។
ជាក់ស្តែង កាលណោះរូបខ្ញុំនៅក្នុងទីស្នាក់ការគណបក្ស ចាក់អង្រែ បានឃើញរូបលោកទាំងពីរឡើងឡានថាមកជួយបាតុករ តែផ្ទុយទៅវិញ លោកទាំងពីរបានបង្វែរដាន ដោយជិៈឡានយកទៅផ្លុងចោលនៅក្នុងវត្តមួយក្បែរព្រះបរមរាជវាំង ហើយឡើងឡានផ្សេងទៀតរត់ចូលស្ថានទូតអាមេរិកយករួចខ្លួនទៅវិញ។ លោកប្រធាន និងអនុប្រធាន ពិតជាក្អេងក្អាង ដូចក្អាត់ក្នុងក្អម ដូចលោក ហ៊ុន សែន និយាយមែន។
បើនិយាយអំពី លទ្ធផលនៃចំនួនអសនៈ ដែលគណបក្សសង្គ្រោះជាតិទទួលបាន រូបខ្ញុំផ្ទាល់ រឹតតែតាមលែងទាន់ទៅទៀត។ ប៉ុន្មានថ្ងៃមុននេះនៅកំពង់ឆ្នាំង លោកប្រធាន សម រង្ស៊ី បានប្រើវោហារស័ព្ទប្លែកៗតែម្តង។ លោកថ្លែងថា ៖ « បើមានការរៀបចំគណៈកម្មាធិការជាតិរៀបចំការបោះឆ្នោត ( គ ជ ប ) បានត្រឹមត្រូវ គណបក្សសង្គ្រោះជាតិយើង មុខជាទទួលបានដល់ទៅ ៧៦ អសនៈ ឯណោះ។ រូបខ្ញុំនឹកក្នុងចិត្តសែនចម្លែក ថាមិនដឹងជាលោកប្រធាន ទើបទទួលបានតួលេខថ្មីនេះពីណាមកទេ ពីព្រោះកាលពីមុននេះបន្តិច លោកប្រធានធ្លាប់បានអះអាងថា គណបក្សរបស់យើងឈ្នះបាន៦៣ អសនៈ។ តួលេខនេះ លោកប្រធានមានការច្បាស់ក្នុងខ្លួនខ្លាំងណាស់ ហើយលោកថែមទាំងប្រមូលពួកអ្នកតំណាងរាស្ត្រយើងទាំង៦៣រូប ទៅឈរស្បថស្បែរនៅខាងមុខប្រាសាទអង្គរវត្ត យ៉ាងអាធិកអធម ថែមទៀត។ ប៉ុន្តែឥឡូវនេះ តួលេខអ្នកតំណាងរាស្ត្រយើងបានកើនឡើងរហូតជាង១០អសនៈបន្ថែមទៀតឯណោះ ដែលធ្វើឲ្យរូបខ្ញុំ និងសមាជិកគណបក្សដែលបានចូលរួមមានការងឿងឆ្ងល់ ហើយលួចលាន់មាត់តិចៗថា « ម៉េចអញ្ចឹងៗៗ » ។
នៅមានរឿងជាច្រើនទៀតដែលត្រូវសម្តែង ដើម្បីបង្ហាញពីគោលជំហរនយោបាយឃ្លេងឃ្លោង របស់លោកប្រធាន និងលោកអនុប្រធាន ព្រមទាំងភាពអាក់អន់ស្រពន់ចិត្តរបស់ក្រុមអ្នកតំណាងរាស្ត្រដ៏ទៃទៀតដូចគ្នា ដែលមិនហ៊ានកម្រើកមាត់ ហើយស៊ូទ្រាំស៊ីអត់ស៊ីឃ្លាន មើលភាពហឺហារបស់លោកប្រធាន និងលោកអនុប្រធាន ជាបន្តទៅទៀត ក្រែងលោបន្តិចទៀតការចរចាត្រូវរ៉ូវគ្នា នឹងទទួលបាននូវការសើមមាត់ សើមក និងគេ អំពីប្រាក់បៀរវត្សរំលឹករបស់អ្នកតំណាងរាស្ត្រ និងតួនាទីខ្លះៗដែលទទួលបានពីការចរចា។ ប៉ុន្តែពេលនេះ សុំស្លេះត្រឹមប៉ុណ្ណេះសិន អេវ៉ាំង៕
ដោយការគោរព
ពីខ្ញុំបាទសួន ចំរើន (អ្នកធ្លាប់គាំទ្រគណបក្សសង្គ្រោះជាតិ)
No comments:
Post a Comment