ខ្សែភាពយន្តភាគចិនខ្នាតធំមានចំណងជើងថា “ឥទ្ធិពលនៃស្នេហ៍” ដែលត្រូវនៅក្នុងព្រះរាជាណាចក្រកម្ពុជា និងសាធារណៈរដ្ឋប្រជាមានិតចិន ត្រូវបាន ឯកឧត្តម បណ្ឌិតសភាចារ្យ សុខ អាន ឧបនាយករដ្ឋមន្ត្រី ទទួលបន្ទុកទីស្តីការគណៈរដ្ឋមន្ត្រី និង លោកជំទាវ សម្ពោធដាក់ឲ្យចាប់ផ្តើមថត នាព្រឹកថ្ងៃទី២៥ ខែកុម្ភៈ ឆ្នាំ២០១៤។
ឯកឧត្តម បណ្ឌិតសភាចារ្យ សុខ អាន បានចាត់ទុកការថតខ្សែភាពយន្តភាគខ្នាតធំ រឿង“ឥទ្ធិពលនៃស្នេហ៍” ជាការរួមចំណែកយ៉ាងធំក្នុងការជួយលើកកំពស់វិស័យទេសចរណ៍នៅក្នុងព្រះរាជាណាចក្រកម្ពុជា ដែលវិស័យនេះមានចំណូលប្រមាណ ១៥ % នៃផសស (GDP) បានរួមចំណែកយ៉ាងខ្លាំងក្នុងសេដ្ឋកិច្ចកម្ពុជា។ ឯកឧត្តម បណ្ឌិតសភាចារ្យ សុខ អាន បានមានប្រសាសន៍ថា ខ្សែភាពយន្តនេះ នឹងបង្កើននូវសមានចិត្តរវាងប្រជាជនចិន និងប្រជាជនកម្ពុជា ជាពិសេសគឺមានឥទ្ធិពលលើវិស័យទេសចរណ៍បន្ថែមទៀត ក្នុងពេលដែលកម្ពុជា និងចិន មានការហោះហើរត្រង់ជាមួយគ្នារួមហើយ។
សូមបញ្ជក់ថាខ្សែភាពយន្តភាគចិនខ្នាតធំមានចំណងជើងថា “ឥទ្ធិពលនៃស្នេហ៍” ជាខ្សែភាពយន្តខ្នាតធំបែបមនោសញ្ជេតនា មានចំនួន ៣០ ភាគ ផលិតដោយផលិតកម្ម Beijing Jinyi Celebration Cultural Promotion Co,Ltd។ ខ្សែភាពយន្តបង្ហាញពីឥទ្ធិពលនៃស្នេហារវាងគូរស្នេហ៍មួយគូរ ដែលតួរសម្តែងមកពីប្រទេសចិន គឺលោក Huang Hai Bo ជាតួឯកប្រុស និង អ្នកនាង Zhang Jing Chu ជាតួឯកស្រីដ៏ល្បីរបស់ប្រទេសចិន។ ខ្សែភាពយន្តនេះឆ្លុះបញ្ជាំងពីជីវិតយុវវ័យពោលពេញដោយឧបសគ្គ នឹងដំណោះស្រាយក្នុងការរស់នៅ និងជីវិតស្នេហា នៅក្នុងសង្គម ដែលមានការអភិវឌ្ឍ ដ៏ឆាប់រហ័ស។ ខ្សែភាពយន្តដែលមាន ៣០ភាគនេះ ក្នុងនោះមាន១០ ភាគត្រូវថតនៅ រាជធានីភ្នំពេញ និងខេត្តសៀមរាប។
ពិធីសម្ពោធការចាប់ផ្តើមថតខ្សែភាពយន្តភាគខ្នាតធំ រឿង“ឥទ្ធិពលនៃស្នេហ៍” ប្រារព្វធ្វើនៅសណ្ឋាគារណាហ្គាវើល ដោយមានការអញ្ជើញចូលរួមពី ឯកឧត្តម បណ្ឌិត ថោង ខុន រដ្ឋមន្ត្រីក្រសួងទេសចរណ៍ លោកជំទាវ ភឿង សក្កណា រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកជំទាវ ពូ ចានគួ ឯកអគ្គរដ្ឋទូត នៃសាធារណៈរដ្ឋប្រជាមានិតចិនប្រចាំនៅកម្ពុជា ជាអធិបតី និងការចូលរួមពី លោក ម៉ា មីងឆាំង អគ្គលេខាធិការមជ្ឈមណ្ឌលចិន-អាស៊ាន លោកស្រី យន់ ហ៊ួយ ប្រធានផលិកម្ម Beijing Jinyi Celebration Cultural Promotion Co,Ltd លោក តាន់ស្រ៊ី បណ្ឌិត ឆេន លីប គង់ CEO នៃណាហ្គាវើល ព្រមទាំងអ្នកដឹកនាំ និងតារាសម្តែង រួមទាំងភ្ញៀវកិត្តិយសជាតិ និងអន្តរជាតិជាច្រើនរូបទៀត។
No comments:
Post a Comment