Wednesday, November 02, 2022

ជយោ! វីរកីឡាការិនី ខាន់ ចេសា ដណ្ដើមបានមេដាយមាសកីឡាជឺជីតស៊ូជើងឯកពិភពលោក នៅអារ៉ាប់រួម

(អាប៊ូដាប៊ី)៖ កីឡាការិនីជឺជីតស៊ូកម្ពុជា ខាន់ ចេសា ដណ្ដើមបានមេដាយមាស នៃការប្រកួតកីឡាជឺជីតស៊ូជើងឯកពិភពលោក Ju-Jitsu World Championship - Abu Dhabi 2022 ហើយ ក្រោយយកឈ្នះកីឡាការិនីអេស្ប៉ាញ Matthews Martin Naiomi ក្នុងវគ្គផ្ដាច់ព្រ័ត្រ មុននេះបន្ដិច នៅទីក្រុងអាប៊ូដាប៊ី ប្រទេសអារ៉ាប់រួម។


សម្រាប់ការប្រកួតលើវិញ្ញាសា Jiu Jitsu (Newaza) ទម្ងន់ក្រោម ៥២គីឡូក្រាម ធ្វើបានយ៉ាងល្អ ក្នុងនាមកីឡាការិនីឈរចាំនៅជុំទី២ ដោយកញ្ញាបានយកឈ្នះគូប្រកួត ដោយផ្ដួលឲ្យបោះបង់ការប្រកួតចំនួន ៣ប្រកួតជាប់គ្នា ពោលគឺ ចេសា បានផ្ដួលកីឡាការិនីហ្វីលីពីន Baluyot Ashley Jeraine នៅជុំទី២ (១៦នាក់ចុងក្រោយ), ផ្ដួលកីឡាការិនីម្ចាស់ផ្ទះអារ៉ាប់រួម Shraim Maitha នៅជុំទី៣ (វគ្គ ៨នាក់ចុងក្រោយ) និងផ្ដួលកីឡាការិនីអ៊ីស្រាអ៊ែល Aronov Pnina នៅវគ្គពាក់កណ្ដាលផ្ដាច់ព្រ័ត្រ កាលពីថ្ងៃមិញ។

ឈានដល់វគ្គផ្ដាច់ព្រ័ត្រ កីឡាការិនីកូនកាត់ ៣សាសន៍ (ខ្មែរ-អាមេរិក-ម៉ិកស៊ិក) នៅតែរក្សាភាពខ្លាំងរបស់ខ្លួន ដោយ ខាន់ ចេសា បានប្រើស្នៀតពិសេស ចាប់ឃ្លេកីឡាការិនីជើងខ្លាំងអេស្ប៉ាញ Matthews Martin Naiomi ជាប់ពេញរយៈពេល ៦នាទី ដែលនាំឲ្យគណៈកម្មការផ្ដល់ជ័យជម្នះដល់កីឡាការិនីវ័យ ២១ឆ្នាំរបស់កម្ពុជា ដើម្បីគ្រងមេដាយមាស នៃការប្រកួតជើងឯកពិភពលោក ឆ្នាំ២០២២ ជូនប្រទេសកម្ពុជាតែម្ដង។

ជាមួយជោគជ័យដ៏ត្រចះត្រចង់នេះ លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) និងអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានសម្ដែងការអបអរសាទរ និងកោតសរសើរជាខ្លាំង ចំពោះការខិតខំប្រឹងប្រែងរបស់ប្រតិភូ គ្រូបង្វឹក ពិសេសកីឡការិនី ខាន់ ចេសា ផ្ទាល់ ដែលព្យាយាមរហូតដណ្ដើមបានមេដាយមាស និងកិត្តិយសជូនជាតិ ក្នុងព្រឹត្តិការណ៍ប្រកួតកីឡាជឺជីតស៊ូជើងឯកពិភពលោកនេះ។

លោកថា «ក្នុងនាមគណៈកម្មាធិការ CAMSOC និង NOCC សូមចូលរួមអបអរសាទរជ័យជម្នះដ៏ត្រចេះត្រចង់របស់កញ្ញា ខាន់ ចេសា បន្ទាប់ពីទទួលបានការគោលការណ៍ពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC ដែលអនុញ្ញាតឲ្យសហព័ន្ធ បញ្ជូនកីឡាករ-កីឡាការិនី និងជំរុញការចូលរួមប្រកួតកម្រិតពិភពលោកនេះ។ ស្នាដៃដែលបានទទួលនេះ ស្ដែងឲ្យឃើញពីការខិតខំប្រឹងប្រែងរបស់វីរកីឡាការិនី ខាន់ ចេសា។ សូមឲ្យជ័យជម្នះនេះ ក្លាយទៅជាឆន្ទៈដ៏មុះមុតរបស់កញ្ញាផ្ទាល់ ក៏ដូចជាក្រុមគ្រូបង្វឹក និងសហព័ន្ធ ដើម្បីឆ្ពោះទៅជោគជ័យ និងរក្សាតំណែងមេដាយខ្ពស់បំផុតនេះបន្ដទៀត នៅស៊ីហ្គេម ឆ្នាំ២០២៣»។

ក្នុងនាមគណៈកម្មាធិការជាតិ CAMSOC ដែរ លោក វ៉ាត់ ចំរើន បានថ្លែងអំណរគុណចំពោះសម្ដេចពិជ័យសេនា ទៀ បាញ់ ក៏ដូចជាលោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC ដែលបានអនុញ្ញាតជាគោលការណ៍ក្នុងការជំរុញឲ្យសហព័ន្ធកីឡាជាតិ បានបញ្ជូនកីឡាករ-កីឡាការិនីរបស់ខ្លួន ចូលរួមព្រឹត្តិការណ៍អន្ដរជាតិនានា ជាក់ស្ដែងកីឡាជឺជីតស៊ូ ដែលកំពុងចូលរួមការប្រកួតជើងឯកពិភពលោក នៅប្រទេសរ៉ាប់រួម នាពេលនេះ ដើម្បីជាការសម្រួចសមត្ថភាព និងបច្ចេកទេសបន្ថែមត្រៀមឆ្ពោះទៅព្រឹត្តិការណ៍ជាប្រវត្តិសាស្ដ្រស៊ីហ្គេម ឆ្នាំ២០២៣ ខាងមុខ៕


សម្តេចតេជោ ហ៊ុន សែន ចែករំលែកនូវទស្សនៈផ្ទាល់ខ្លួន៤ចំណុច ដើម្បីបង្កើនប្រសិទ្ធភាពនៃការទាញយកអត្ថប្រយោជន៍ពីកិច្ចព្រមព្រៀងអាសិប

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចែករំលែកនូវទស្សនៈផ្ទាល់ខ្លួនចំនួន៤ចំណុច ដើម្បីបង្កើនប្រសិទ្ធភាព នៃការទាញយកអត្ថប្រយោជន៍ពី កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងដោយតំបន់ (អាសិប) ។



ការចែករំលែកទស្សនៈផ្ទាល់ខ្លួននេះ បានធ្វើលើងក្នុង «ពិធីបើកវទិកាពិគ្រោះយោបល់កម្រិតខ្ពស់ក្នុងឱកាសខួបអនុស្សាវរីយ៍ ១០ឆាំ្ន ស្តីពី កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងដោយតំបន់ (អាសិប) និងការប្រកាសជាផ្លូវការនៃសៀវភៅ ស្ដីពី ក្របខណ្ឌសម្រាប់ការធ្វើសមាហរណកម្មតំបន់របស់វិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា(ERIA)» នៅព្រឹកថ្ងៃទី០២ ខែវិច្ឆិកា ឆ្នាំ២០២២។

សម្តេចតេជោ បានថ្លែងថា ដើម្បីបង្កើនប្រសិទ្ធភាពនៃការទាញយកអត្ថប្រយោជន៍ពីកិច្ចព្រមព្រៀងអាសិប សម្តេចសូមចូលចែករំលែកនូវទស្សនៈផ្ទាល់ខ្លួនមួយចំនួន ដូចខាងក្រោម៖

ទី១៖ ភាគីសមាជិក និងភាគីហត្ថលេខីនៃកិច្ចព្រមព្រៀងអាសិបទាំងអស់ ជាពិសេសភាគី សមាជិកដែលជាប្រទេសអភិវឌ្ឍន៍តិចតួច គួរបង្កើនកិច្ចសហការ និងគាំទ្រគ្នាទៅវិញទៅមក ក្នុងការអនុវត្តកិច្ចព្រមព្រៀងអាសិបនេះឱ្យបានពេញលេញ ដើម្បីទាញយកអត្ថប្រយោជន៍ឱ្យបានជាអតិបរមា។ ដើម្បីសម្រេចបាននូវគោលបំណងនេះ លេខាធិការដ្ឋានអាសិបគួរតែត្រូវបង្កើតឡើងឱ្យ កាន់តែឆាប់តាមតែអាចធ្វើទៅបាន ដោយត្រូវពិចារណាលើគ្រប់ទិដ្ឋភាពនិងលក្ខខណ្ឌចាំបាច់នានា សំដៅធានាបានអព្យាក្រឹត្យភាព ឯករាជ្យភាព កាលានុវត្តភាពសម្រាប់ការអភិវឌ្ឍ និងការចូលរួមក្នុងការធ្វើសមាហរណកម្មតំបន់។ ក្នុងទិសដៅនេះ សម្តេចសូមបញ្ជាក់ជាថ្មីផងដែរថា កម្ពុជានៅតែមានចំណាប់អារម្មណ៍ក្នុងការទទួលតាំងលេខាធិការដ្ឋានអាសិបនៅទីក្រុងភ្នំពេញ និងត្រៀមខ្លួនជាស្រេច ក្នុងការផ្ដល់ការគាំទ្រនិងសម្បទានចាំបាច់នានា។

ទី២៖ សម្តេចសូមលើកទឹកចិត្តយ៉ាងទទូចឱ្យភាគីសមាជិក និងភាគីហត្ថលេខីទាំងអស់នៃអាសិប ចាប់ផ្តើមពិភាក្សាលើនីតិវិធីសម្រាប់ការស្នើសុំចូលជាសមាជិកនៃកិច្ចព្រមព្រៀងបន្ថែមទៀត ឱ្យបានឆាប់តាមតែអាចធ្វើទៅបាន ដោយកិច្ចព្រមព្រៀងរបស់យើង និងអនុញ្ញាតឱ្យមានការស្នើសុំ ចូលជាសមាជិកជាបន្តនៅក្នុងអំឡុងឆ្នាំក្រោយនេះ ។

ទី៣៖ កម្ពុជាសូមស្វាគមន៍ចំពោះការផ្តល់ជំនួយហិរញ្ញវត្ថុពីបណ្តាភាគីសមាជិក និងភាគី ហត្ថលេខីនៃអាសិប សំដៅគាំទ្រ និងលើកកម្ពស់ប្រសិទ្ធភាពនៃការអនុវត្តកិច្ចព្រមព្រៀងនេះ ជាពិសេសសម្រាប់ភាគីសមាជិកជាប្រទេសអភិវឌ្ឍន៍តិចតួចរួមទាំងកម្ពុជា និងសូមអំពាវនាវដល់ សមាជិកទាំងអស់នៃអាសិប ពន្លឿនការពិភាក្សាលើយន្តការនៃការប្រើប្រាស់កិច្ចសហប្រតិបត្តិការ សេដ្ឋកិច្ច និងបច្ចេកទេសនេះឱ្យបានឆាប់ ចែករំលែកឧត្តមានុវត្តន៍ក្នុងការអនុវត្តកិច្ចព្រមព្រៀង ពាណិជ្ជកម្មសេរីនានា ដើម្បីប្រែក្លាយកិច្ចព្រមព្រៀងអាសិបនេះឱ្យទៅជាយន្តការរួមមួយដែល គាំទ្រការអភិវឌ្ឍសេដ្ឋកិច្ចតំបន់ ប្រកបដោយចីរភាព ភាពធន់រឹងមាំ និងបរិយាប័ន្ន។

ទី៤៖ វិស័យឯកជនជាក្បាលម៉ាស៊ីននៃកំណើនសេដ្ឋកិច្ច និងតួអង្គសំខាន់ក្នុងការធានា និងបង្កើនប្រសិទ្ធភាពក្នុងការអនុវត្តកិច្ចព្រមព្រៀងនេះដោយវិស័យឯកជនជាអ្នកអនុវត្តផ្ទាល់។ ហេតុដូចនេះ យើងត្រូវបង្កើនការចូលរួម តាមរយៈការពង្រឹងសមត្ថភាពសកម្មភាពលើកកម្ពស់ការយល់ដឹង និងវេទិកាពិគ្រោះយោបល់ជាមួយវិស័យឯកជន ដែលនឹងអាចក្លាយជាក្របខណ្ឌ ដើម្បីពិភាក្សា ផ្លាស់ប្តូរយោបល់ និងស្វែងយល់អំពីបញ្ហាប្រឈម និងកាលានុវត្តភាពនានា៕









Remarks by Smdech Techo Hun Sen Prime Minister of the Kingdom of Cambodia At the Opening Ceremony of the High-Level Forum at the 10th Anniversary of the Regional Comprehensive Economic Partnership (RCEP) Agreement, and the Official Launch of the Book on the Framework  for Reginal Integration by the Economic Research Institute of ASEAN and East Asia (ERIA) 
Phnom Penh, 2nd November 2022 







សម្តេចតេជោ ហ៊ុន សែន ចែករំលែកបទពិសោធដែលកម្ពុជាឆ្លងកាត់ជូនដល់ប្រធានាធិបតីអ៊ុយក្រែន ហើយបញ្ជាក់ថា «គ្មានសង្គ្រាមណាមួយ អាចបញ្ចប់បានដោយប្រើប្រាស់សង្គ្រាមនោះទេ»


(ភ្នំពេញ)៖ ក្នុងជំនួបតាមទូរស័ព្ទ នៅល្ងាចថ្ងៃទី០១ ខែវិច្ឆិកា ឆ្នាំ២០២២ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចែករំលែកបទពិសោធដែលកម្ពុជាឆ្លងកាត់ ជូនដល់ លោក វ៉ូឡូឌីមៀ ហ្ស៊ែលឡិនស្គី ប្រធានាធិបតីនៃប្រទេសអ៊ុយក្រែន និងបានបញ្ជាក់ថា «គ្មានសង្គ្រាមណាមួយអាចបញ្ចប់បានដោយប្រើប្រាស់សង្គ្រាមនោះទេ»។



«សម្តេចតេជោនាយកដ្ឋមន្ត្រី បញ្ជាក់ថា កម្ពុជាផ្តល់សារសំខាន់ដល់ការចរចា និងដំណោះស្រាយដោយសន្តិវិធី និងសង្ឃឹមថា ភាគីពាក់ពន្ធ័ទាំងអស់នឹងខិតខំរកដំដោះស្រាយគ្រប់ជ្រុងជ្រោយដើម្បីបញ្ចប់សង្រ្គាមនៅអ៊ុយក្រែន ដើម្បីអ៊ុយក្រែនទទួលបានមកវិញនូវសុខសន្តិភាព ស្ថិរភាព បូរណភាពទឹកដី និងការអភិវឌ្ឍន៍»។ នេះបើតាមសេចក្តីប្រកាសរប​ស់ក្រសួងការបរទេស អំពីលទ្ធផលនៃជំនួបតាមទូរស័ព្ទរវាងសម្តេចតេជោ ហ៊ុន សែន និងប្រធានាធិបតីអ៊ុយក្រែន។

នៅក្នុងជំនួបនេះ ប្រមុខរាជរដ្ឋាភិបាល បានសម្តែងនូវការសោកស្តាយចំពោះសោកនាដកម្មដែលបាន និងកំពុងកើតឡើងនៅអ៊ុយក្រែន។ សម្តេចក៏បានបង្ហាញក្តីបារម្ភចំពោះការវាយប្រហារថ្មីៗទៅលើទីក្រុងកៀវ និងទីក្រុងផ្សេងៗក្នុងប្រទេសអ៊ុយក្រែន ដែលបណ្តាលឱ្យមានការបាត់បង់ជីវិតប្រជាជន ការរងរបួសជាច្រើន និងខូចខាតដល់ហេដ្ឋារចនាសម្ព័ន្ធស៊ីវិល ដាច់ចរន្តអគ្គិសនី និងទឹកស្អាតយ៉ាងធ្ងន់ធ្ងរ ហើយបណ្តាលឲ្យមានវិបត្តិឋាមពល និងស្បៀងអាហារធ្ងន់ធ្ងរ ព្រមទាំងអតិផរណាកើនឡើងនៅទូទាំងសកលលោក។

ជាមួយគ្នានេះផងដែរ សម្តេចបានបញ្ជាក់អំពីជំហររបស់កម្ពុជាចំពោះសង្គ្រាមនៅអ៊ុយក្រែនថា កម្ពុជាប្រកាន់ខ្ជាប់នូវការគោរពគោលការណ៍ដែលមានចែងក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិ ប្រឆាំងនឹងការឈ្លានពាន ការគំរាម ឬ ការប្រើប្រាស់កម្លាំងលើអធិបតេយ្យភាព បូរណភាពដែនដីរបស់រដ្ឋឯករាជ្យ និងមិនគាំទ្រដល់ការបំបែករដ្ឋ ឬការទន្ទ្រានយកទឹកដីពីប្រទេសដទៃឡើយ។

ចំណែក ​ប្រធានាធិបតីបានសម្តែងការពេញចិត្ត និងថ្លែងអំណរគុណយ៉ាងជ្រាលជ្រៅបំផុតចំពោះកម្ពុជាដែលបានគាំទ្រ និងបានចូលជាសហស្ថាបនិកសេចក្តីសម្រេចចិត្តរបស់មហាសន្និបាតអង្គការសហប្រជាតិ និងជំហរជាក់លាក់របស់កម្ពុជាពាក់ព័ន្ធនឹងសង្គ្រាមអ៊ុយក្រែន។

លោកបានថ្លែងអំណរគុណ សម្តេចតេជោ ហ៊ុន សែន ចំពោះជំនួប ហើយក៏បានសម្តែងនូវអំណរសាទរយ៉ាងកក់ក្តៅចំពោះភាពជោគជ័យរបស់កម្ពុជាក្នុងការធ្វើជាប្រធានអាស៊ានក្នុងការរៀបចំកិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំពាក់ព័ន្ធកាលពីខែសីហាកន្លងទៅ និងបានជូនពរកម្ពុជាទទួលបានជោគជ័យដ៏ត្រចះត្រចង់បន្ថែមទៀត ក្នុងការរៀបចំកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធ នាខែវិច្ឆិកា ឆ្នាំ២០២២នេះ៕

សូមបញ្ជាក់ថា គិតរហូតមកដល់ពេលនេះ សង្គ្រាមរុស្ស៉ី-អ៊ុយក្រែន បានអូសអន្លាយអស់រយៈពេលប្រមាណជិត៩ខែមកហើយ ខណៈដែលផលប៉ះពាល់នៃសង្គ្រាមកាន់តែរីកធំឡើង៕

















ផ្សាយបន្តផ្ទាល់៖ សម្ដេចតេជោ ហ៊ុន សែន អញ្ជើញជាអធិបតីក្នុង វេទិកាជាន់ខ្ពស់ស្តីពី ខួប១០ឆ្នាំ នៃកិច្ចព្រមព្រៀងអាសិប (RCEP)

 (ភ្នំពេញ)៖ នៅព្រឹកថ្ងៃពុធ ទី០២ ខែវិច្ឆិកា ឆ្នាំ២០២២ស្អែកនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញជាអធិបតីភាពប្រារព្ធពិធីអបអរសាទរខួប១០ឆ្នាំ នៃការបង្កើតកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(អាសិប-RCEP)។


ពិធីនេះនឹងប្រារព្ធធ្វើឡើងនៅសណ្ឋាគារសូហ្វីតែលភូគីត្រា ដោយមានការអញ្ជើញចូលពីតំណាងប្រទេសពាក់ព័ន្ធនៃកិច្ចព្រមព្រៀង ព្រមទាំងអ្នកធ្វើធុរកិច្ចជាច្រើនរូបផ្សេងទៀត។
សូមបញ្ជាក់ថា កិច្ចព្រមព្រៀងអាសិប ជាគំនិតផ្ដួចផ្តើមរបស់អាស៊ាន និងត្រូវបានប្រកាសឱ្យចាប់ផ្ដើមការចរចាក្នុងឆ្នាំ២០១២ នៅរាជធានីភ្នំពេញ ពេលកម្ពុជាធ្វើជាប្រធានអាស៊ាន។ កិច្ចចរចានេះត្រូវបានចាប់ផ្តើមឡើងដោយប្រទេសចំនួន១៦ តែក្រោយមកប្រទេសឥណ្ឌា បានដកខ្លួនទៅវិញ។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប-RCEP) នឹងចូលជាធរមាននៅថ្ងៃទី១ ខែមករា ឆ្នាំ២០២២។
កិច្ចព្រមព្រៀងនេះ គឺជាកិច្ចព្រមព្រៀងពាណិជ្ជកម្មសេរី ដ៏ធំបំផុតលើពិភពលោក ដែលមានសមាជិកចំនួន ១៥ប្រទេស រួមមានប្រទេសសមាជិកអាស៊ានទាំង១០ និងប្រទេសដៃគូពាណិជ្ជកម្មសេរីអាស៊ានចំនួន៥ រួមមាន៖ ប្រទេសអូស្ត្រាលី ចិន ជប៉ុន កូរ៉េខាងត្បូង និងនូវែលហ្សេឡង់។
កិច្ចព្រមព្រៀងអាសិប គ្របដណ្តប់ប្រជាជនប្រមាណ ២.២ពាន់លាននាក់ ឬស្មើនឹង ៣០%នៃចំនួនប្រជាជនពិភពលោក, កិច្ចព្រមព្រៀងនេះ មាន ផលិតផលក្នុងស្រុកសរុបប្រមាណ ២៦.២ ទ្រីលានដុល្លារអាមេរិក ឬស្មើនឹង ៣០% នៃផលិតផលក្នុងស្រុកសរុបរបស់ពិភពលោក, មានទំហំពាណិជ្ជកម្មប្រមាណ ២៨% នៃទំហំពាណិជ្ជកម្មពិភពលោកទាំងមូល។
កិច្ចព្រមព្រៀងនេះ ផ្តល់នូវការអនុគ្រោះពន្ធទំនិញក្នុងតំបន់ប្រមាណ ៩០ភាគរយ។ កិច្ចព្រមព្រៀងនេះនឹងវិសាលភាពគ្រប់ដណ្តប់ទៅលើវិស័យសំខាន់ៗមួយចំនួនមានដូចជា ពាណិជ្ជកម្មទំនិញ ពាណិជ្ជកម្មសេវាកម្ម ការអនុញ្ញាតឱ្យធ្វើវិនិយោគ ស្តង់ដានិងបច្ចេកទេស ការត្រួតពិនិត្យអនាម័យ និងភូតគាមអនាម័យសត្វ និងរុក្ខជាតិ កិច្ចសហប្រតិបត្តិការផ្នែកសេដ្ឋកិច្ច និងបច្ចេកទេស កម្មសិទ្ធិបញ្ញា ធុរកិច្ចអេឡិចត្រូនិច ដំណោះស្រាយវិវាទ និងវិស័យផ្សេងៗ។
កិច្ចព្រមព្រៀងនេះ នឹងធ្វើឱ្យការទិញទំនិញនឹងមានតម្លៃកាន់តែថោក ធ្វើទេសចរណ៍កាន់តែងាយស្រួល
សហគ្រាសកាន់តែមានទំនុកចិត្ត ការវិនិយោគកាន់តែមានប្រសិទ្ធភាព។
ផ្អែកតាមលទ្ធផលនៃការសិក្សារបស់ វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA)បានបង្ហាញថា កម្ពុជាអាចនឹងមានកំណើនប្រចាំឆ្នាំការនាំចេញចំនួន ៧.៣% វិនិយោគចំនួន ២៣.៤% និងផលិតផលក្នុងស្រុកសរុបចំនួនប្រមាណ ២% លើផលិតផលក្នុងស្រុកសរុប ដែលមានបច្ចុប្បន្ន។
កម្ពុជា ទទួលបានភាពអនុគ្រោះពន្ធពីកិច្ចព្រមព្រៀងនេះ លើទំនិញសំខាន់ៗជាច្រើន។ មុខទំនិញរបស់កម្ពុជា ដែលទទួលបានការអនុគ្រោះពន្ធនោះមានដូចជា៖
* ទំនិញកសិកម្ម រួមមាន៖ គ្រាប់ស្វាយចន្ទី, ពោត, ដូង, ស្វាយស្រស់, ចេក, ដំលូងជ្វា, ទឹកឃ្មុំ, ម្សៅរមៀត, ក្រូច, ល្ហុង, ផ្លែផាសិន, ខ្ទឹម, ត្របែក, ស្រកានាគ, ទុរេន, ...។ល។
* ទំនិញកសិកម្មកែច្នៃ រួមមាន៖ គុយទាវ, នំក្រៀម, សំបុកត្រចៀកកាំ, ទំនិញកែច្នៃពីត្រី, ម្សៅដំឡូងមី, ទំនិញកែច្នៃពីដូង, ប្រេងសណ្តែកដី, សាច់ក្រក, ទឹកម្ទេស, ដំណាប់ចេក, ដំណាប់ស្វាយ,ដំណាប់ទុរេន, មីកញ្ចប់, ...។ល។
* ទំនិញឧស្សាហកម្ម រួមមាន៖ កង់, សំលៀកបំពាក់, ស្បែកជើង, គ្រឿងបង្ខំអេឡិចត្រូនិក, ខ្សែកាបអេឡិចត្រូនិកអគ្គិសនី, គ្រឿងសង្ហារឹម, ស្ករស, ស្ករអំពៅ, កាបូបយួរដៃ, វ៉ាលី, ខ្សែភ្លើង, សម្ភារកីឡា,ជ័រកែច្នៃ, សំបកថ្នាំពេទ្យ, ជ័រកៅស៊ូធម្មជាតិរាវ, កៅស៊ូក្នុងទម្រង់បន្ទះ, កៅស៊ូឡាតិច, ក្រណាត់ក្រាល, កម្ទេចឈើកែច្នៃ,...។ល។
កម្ពុជាក៏នឹងទទួលបានអត្ថប្រយោជន៍បន្ថែមពីកិច្ចព្រមព្រៀងនេះមានជាអាទិ៍ ការផ្ទេរបច្ចេកវិទ្យា ចំណេះដឹងចំណេះធ្វើ និងជំនាញថ្មីៗពីការវិនិយោគផ្ទាល់របស់បរទេស ព្រមទាំងបង្កើតការងារថ្មីៗជូនប្រជាជនកម្ពុជា ផងដែរ។ កិច្ចព្រមព្រៀងនេះក៏នឹងជួយជំរុញកំណើននៃការនាំចេញ និងកំណើនផលទុនសរុបក្នុងស្រុក ព្រមទាំងជួយស្ដារឡើងវិញនូវសេដ្ឋកិច្ចរបស់ប្រទេសកម្ពុជាបានឆាប់រហ័ស ដែលទទួលរងផលប៉ះពាល់ពីជំងឺកូវីដ-១៩។
កិច្ចព្រមព្រៀងអាសិប មានគោលបំណងបង្កើតបរិយាកាសពាណិជ្ជកម្ម និងវិនិយោគបើកចំហ ដើម្បីសម្រួលដល់ការពង្រីកពាណិជ្ជកម្ម និងការវិនិយោគក្នុងតំបន់ និងរួមចំណែកដល់កំណើនសេដ្ឋកិច្ច និងការអភិវឌ្ឍសកលលោក។ កិច្ចព្រមព្រៀងអាសិប នឹងក្លាយជាក្របខ័ណ្ឌស្នូលសម្រាប់ការធ្វើពាណិជ្ជកម្មនិងការវិនិយោគ ដើម្បីពង្រីកបន្ថែមទៀតនូវខ្សែច្រវាក់តម្លៃតំបន់ នាំមកនូវឱកាសទីផ្សារនិងការងារ សម្រាប់អាជីវកម្មនិងប្រជាជននៅក្នុងតំបន់។
នៅក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធកាលពីខែកញ្ញា កន្លងទៅ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន បានជំរុញឱ្យបង្កើតលេខាធិការដ្ឋានអាសិបនេះ ដែលមានភាពឯករាជ្យ និងម្ចាស់ការ ដើម្បីដើរតួនាទីក្នុងការងារសម្របសម្រួល ជំរុញ និងត្រួតពិនិត្យការអនុវត្តកិច្ចព្រមព្រៀង។
សម្តេចតេជោ ហ៊ុន សែន បានដាក់សំណើទៅមេដឹកនាំអាស៊ាន ឱ្យផ្តល់ការគាំទ្របង្កើតលេខាធិការដ្ឋានអាសិបនេះ នៅរាជធានីភ្នំពេញ។
កិច្ចព្រមព្រៀងនេះមាន មាន ២០ជំពូក ដែលមានខ្លឹមសារសង្ខេបដូចខាងក្រោម៖
* ជំពូកទី១ បទប្បញ្ញត្តិដើម និងនិយមន័យទូទៅ៖ បានកំណត់ពីគោលបំណងនៃការចរចាអាសិប ក្នុងការបង្កើតភាពជាដៃគូសេដ្ឋកិច្ចដែលមានលក្ខណៈទំនើប គុណភាពខ្ពស់ និងផ្តល់អត្ថប្រយោជន៍ឱ្យគ្នាទៅវិញទៅមក ដោយគិតគូរពីភាពខុសគ្នានៃការអភិវឌ្ឍនិងតម្រូវការសេដ្ឋកិច្ចរបស់ភាគីនានា ជាពិសេសសម្រាប់ប្រទេសអភិវឌ្ឍន៍តិចតួច។
* ជំពូកទី២ ពាណិជ្ជកម្មទំនិញ៖ បានធ្វើសេរីភាវូបនីយកម្មពាណិជ្ជកម្មទំនិញបន្ថែម និងផ្តល់ភាពអនុគ្រោះទីផ្សារ តាមរយៈការធ្វើសេរីភាវូបនីយកម្មពន្ធគយជាបន្តបន្ទាប់ ជាពិសេសការលុបបំបាត់ពន្ធគយក្នុងរយៈពេលសមស្រប ការលុបបំបាត់ការឧបត្ថម្ភធននាំចេញកសិកម្ម ការលុបបំបាត់ជាទូទៅនៃការរឹតបណ្តឹងបរិមាណ និងបំពេញបន្ថែមការធ្វើសេរីភាវូបនីយកម្មពន្ធគយ គោលការណ៍ទាក់ទងនឹងការអនុវត្តវិធានការមិនមែនពន្ធ នីតិវិធីរដ្ឋបាលសម្រាប់អាជ្ញាបណ្ណនាំចូលនិងការអនុវត្តកម្រៃសេវា និងបែបបទទាក់ទងនឹងការនាំចេញ និងនាំចូល។
* ជំពូកទី៣ វិធានដើមកំណើតទំនិញ៖ បានដាក់ចេញនូវគោលការណ៍ណែនាំ វិធានដើម្បីកំណត់ និងបញ្ជាក់ដើមកំណើតទំនិញដែលមានភាពងាយស្រួលជាងមុន ដើម្បីទទួលបានការអនុគ្រោះពន្ធ ជាពិសេសតាមរយៈវិធានបូកបន្ថែមតម្លៃតំបន់ (Regional Cumulation) ដែលអនុញ្ញាតឱ្យប្រទេសជាសមាជិក បូកបញ្ចូលតម្លៃនៃវត្ថុធាតុដើម ដែលនាំចូលពីប្រទេសសមាជិកអាសិបទាំង១៥ ក្នុងដំណើរការផលិតនិងនាំចេញទៅប្រទេសអាស៊បវិញ។
* ជំពូកទី៤ នីតិវិធីគយនិងកិច្ចសម្រួលពាណិជ្ជកម្ម៖ បានបង្កើតបរិយាកាសអំណោយផល សំដៅធ្វើឱ្យរីកចម្រើនខ្សែច្រវាក់ផ្គត់ផ្គង់តំបន់និងសកល តាមរយៈបទប្បញ្ញត្តិដែលសាមញ្ញ អាចប៉ាន់ស្មានបាន និងមានតម្លាភាព ក្នុងការអនុវត្តច្បាប់និងបទប្បញ្ញត្តិគយ និងលើកកម្ពស់ការគ្រប់គ្រងប្រកបដោយប្រសិទ្ធភាពនៃនីតិវិធីគយ និងបញ្ចេញទំនិញបានឆាប់រហ័ស ស្របតាមការអនុវត្តនិងស្ដង់ដារល្អបំផុតអន្តរជាតិ។
* ជំពូកទី៥ អនាម័យ និងភូតគាមអនាម័យ៖ បានដាក់ចេញនូវក្របខណ្ឌមូលដ្ឋានសម្រាប់ការរៀបចំ អនុម័ត និងអនុវត្តវិធានការអនាម័យ និងភូតគាមអនាម័យ ក្នុងគោលបំណងធានាសុវត្ថិភាពចំណីអាហារ និងការពារជីវិតមនុស្ស សត្វ រុក្ខជាតិ ឬសុខភាព ដោយធានាថាវិធានការអនាម័យ និងភូតគាមអនាម័យ ត្រូវអនុវត្ត តែក្នុងស្ថានភាពចាំបាច់បំផុតដើម្បីការពារសុខភាព និងកាត់បន្ថយផលប៉ះពាល់មកលើពាណិជ្ជកម្ម។
* ជំពូកទី៦ ស្ដង់ដារ បទដ្ឋានបច្ចេកទេស និងនីតិវិធីវាយតម្លៃអនុលោមភាព៖ បានពង្រឹងការអនុវត្តកិច្ចព្រមព្រៀងរបាំងបច្ចេកទេសពាណិជ្ជកម្មរបស់អង្គការពាណិជ្ជកម្មពិភពលោក ព្រមទាំងលើកកម្ពស់ការយល់ដឹងពីគ្នទៅវិញទៅមកអំពីស្ដង់ដារ បទដ្ឋានបច្ចេកទេស និងនីតិវិធីវាយតម្លៃអនុលោមភាពរបស់ភាគីនីមួយៗ ក៏ដូចជាពង្រឹងនិងសហការក្នុងការផ្លាស់ប្ដូរព័ត៌មានទៅវិញទៅមក ដើម្បីកាត់បន្ថយរបាំងបច្ចេកទេសដែលមិនចាំបាច់សម្រាប់ការធ្វើពាណិជ្ជកម្ម។
* ជំពូកទី៧ ឧបាស្រ័យពាណិជ្ជកម្ម៖ បានដាក់ចេញនូវវិធានការការពារ និងការប្រឆាំងការលក់បង្ខូចថ្លៃ និងវិធានការពន្ធប៉ះប៉ូវ ដែលអនុញ្ញាតឱ្យភាគីនីមួយៗប្រើប្រាស់យន្តការ ដើម្បីដោះស្រាយការខាតបង់ ឬការគំរាមកំហែងការខាតបង់ដល់ឧស្សាហកម្មក្នុងស្រុក ដោយផ្អែកលើសិទ្ធិ និងការតព្វកិច្ចរបស់ភាគីនីមួយៗដែលមានចែងនៅក្នុងកិច្ចព្រមព្រៀងពាក់ព័ន្ធនៅក្នុងអង្គការពាណិជ្ជកម្មពិភពលោក។
* ជំពូកទី៨ ពាណិជ្ជកម្មសេវាកម្ម៖ បានធ្វើសេរីភាវូបនីយកម្មកាន់តែទូលាយ ដែលនឹងបើកផ្លូវឱ្យការធ្វើពាណិជ្ជកម្មសេវាកម្មកាន់តែប្រសើរឡើង តាមរយៈការកាត់បន្ថយភាពរឹតត្បិត និងវិធានការរើសអើងសម្រាប់ពាណិជ្ជកម្ម ឆ្លងកាត់ព្រំដែនក្នុងវិស័យសេវាកម្ម។
* ជំពូកទី៩ បម្លាស់ទីរូបវ័ន្តបុគ្គល៖ បានដាក់ចេញនូវកាតព្វកិច្ចរបស់ភាគីនៃកិច្ចព្រមព្រៀងអាសិប ទាក់ទងនឹងការសម្របសម្រួលនៃការចូល និងការស្នាក់នៅបណ្តោះអាសន្ននៃរូបវ័ន្តបុគ្គល ដែលចូលរួមក្នុងពាណិជ្ជកម្មទំនិញ ការផ្គត់ផ្គង់សេវាកម្ម ឬវិនិយោគ អាស្រ័យលើលក្ខខណ្ឌ និងការកំណត់នៅក្នុងតារាងសន្យា ដូចជា រយៈពេលនៃការស្នាក់នៅជាដើម។
* ជំពូកទី១០ ការវិនិយោគ៖ បានបង្កើតបរិយាកាសវិនិយោគ ដែលមានភាពសេរីនៅក្នុងតំបន់ និងបានដាក់ចេញនូវបទប្បញ្ញត្តិ ដែលមានលក្ខណៈល្អប្រសើរ គ្របដណ្តប់លើសសរស្តម្ភទាំងបួននៃការវិនិយោគ រួមមាន ការការពារ ការធ្វើសេរីភាវូបនីយកម្ម ការលើកកម្ពស់ និងកិច្ចសម្រួលវិនិយោគ បន្ថែមពីលើអ្វីដែលមានស្រាប់នៅក្នុងកិច្ចព្រមព្រៀងពាណិជ្ជកម្មសេរីអាស៊ាន ព្រមទាំងអនុញ្ញាតឱ្យកែលម្អបទប្បញ្ញត្តិ កិច្ចសម្រួលវិនិយោគ ដែលនឹងជួយដោះស្រាយកង្វល់របស់អ្នកវិនិយោគ ដូចជាការដោះស្រាយបណ្តឹងតវ៉ា និងការតវ៉ា ដែលអាចកើតមាន។
* ជំពូកទី១១ កម្មសិទ្ធិបញ្ញា៖ បានដាក់ចេញនូវវិធីសាស្ត្រដែលមានតុល្យភាព និងប្រកបដោយបរិយាប័ន្ន ក្នុងការការពារ និងពង្រឹងការអនុវត្តច្បាប់សិទ្ធិកម្មសិទ្ធិបញ្ញានៅក្នុងតំបន់ ព្រមទាំងលើកកម្ពស់កិច្ចការពារកម្មសិទ្ធិបញ្ញា បន្ថែមពីលើក្របខ័ណ្ឌដែលផ្តល់ឱ្យក្រោមកិច្ចព្រមព្រៀងអង្គការពាណិជ្ជកម្មពិភពលោក រួមមាន៖ វិធានការការពារ បច្ចេកវិទ្យា និងការអនុវត្តសិទ្ធិឌីជីថល និងការដាក់ពាក្យស្នើសុំតាមប្រព័ន្ធអេឡិចត្រូនិក ដែលសមស្របនឹងការមកដល់នៃយុគសម័យឌីជីថល។
* ជំពូកទី១២ ពាណិជ្ជកម្មតាមប្រព័ន្ធអេឡិចត្រូនិក៖ បានជំរុញការប្រើប្រាស់ពាំណិជ្ជកម្មតាមប្រព័ន្ធអេឡិចត្រូនិក និងកិច្ចសហប្រតិបត្តិការក្នុងចំណោមបណ្តាភាគី។ ភាគីអាសិប ក៏បានយល់ព្រមរក្សាការអនុវត្តបច្ចុប្បន្ននៃការមិនអនុវត្តពន្ធគយសម្រាប់ពាណិជ្ជកម្មតាមប្រព័ន្ធអេឡិចត្រូនិក ស្របតាមសេចក្តីសម្រេចរបស់រដ្ឋមន្ត្រីអង្គការពាណិជ្ជកម្មពិភពលោក។
* ជំពូកទី១៣ ការប្រកួតប្រជែង៖ បានលើកកម្ពស់ប្រសិទ្ធភាពសេដ្ឋកិច្ច និងសុខុមាលភាពអ្នកប្រើប្រាស់ដោយផ្តល់សិទ្ធិដល់ភាគីនីមួយៗក្នុងការបង្កើត ឬរក្សាច្បាប់ប្រកួតប្រជែងដែលមានស្រាប់ និងសមត្ថកិច្ចក្នុងការហាមឃាត់សកម្មភាពប្រឆាំងនឹងការប្រកួតប្រជែង បទប្បញ្ញត្តិស្តីពីការផ្លាស់ប្តូរព័ត៌មាន និងការសម្របសម្រួលក្នុងសកម្មភាពអនុវត្តច្បាប់។
* ជំពូកទី១៤ សហគ្រាសធុនតូច និងមធ្យម៖ បានជំរុញឱ្យមានការអនុវត្តកម្មវិធីសហប្រតិបត្តិការផ្នែកសេដ្ឋកិច្ច និងសកម្មភាពសេដ្ឋកិច្ចនានា សម្តៅបង្កើនសមត្ថភាពរបស់សហគ្រាសធុនតូច និងមធ្យម ក្នុងការប្រើប្រាស់ និងទាញប្រយោជន៍ពីកាលានុវត្តភាពពីកិច្ចព្រមព្រៀងអាសិប ជាពិសេសការធ្វើសមាហរណកម្ម ចូលក្នុងខ្សែច្រវាក់ផ្គត់ផ្គង់តំបន់ជាដើម។
* ជំពូកទី១៥ កិច្ចសហប្រតិបត្តិការសេដ្ឋកិច្ច និងបច្ចេកទេស៖ បានផ្តោតជាចម្បងលើការបង្រួបបង្រួមគម្លាតអភិវឌ្ឍន៍តាមរយៈកម្មវិធីជំនួយបច្ចេកទេស និងកសាងសមត្ថភាពនានា ក្នុងការគាំទ្រដល់ការអនុវត្ត និងប្រើប្រាស់កិច្ចព្រមព្រៀងនេះ យ៉ាងមានប្រសិទ្ធភាព ដោយផ្តល់អាទិភាពដល់ប្រទេសអភិវឌ្ឍន៍តិចតួច។
* ជំពូកទី១៦ លទ្ធកម្មរដ្ឋាភិបាល៖ បានលើកកម្ពស់តម្លាភាពច្បាប់ លិខិតបទដ្ឋានគតិយុត្ត និងនីតិវិធីនានា និងបង្កើនកិច្ចសហប្រតិបត្តិការរវាងភាគីទាំងអស់ក្នុងកិច្ចការលទ្ធកម្មរដ្ឋាភិបាល។
* ជំពូកទី១៧ បទប្បញ្ញត្តិទូទៅនិងការលើកលែង៖ បានកំណត់កាតព្វកិច្ចនានារបស់ភាគីទាំងអស់ ពាក់ព័ន្ធនឹងការបោះពុម្ពផ្សាយ ការផ្ដល់ព័ត៌មាន នីតិវិធីរដ្ឋបាលអនុវត្តលើច្បាប់ លិខិតបទដ្ឋានគតិយុត្ត នីតិវិធីនានាក៏ដូចជាការអនុវត្តសេចក្តីសម្រេចរដ្ឋបាល ការត្រួតពិនិត្យឡើងវិញ និងបណ្ដឹងឧទ្ធរណ៍ ការលាតត្រដាងព័ត៌មាន និងព័ត៌មានសម្ងាត់ ដោយភាគីកិច្ចព្រមព្រៀងអាសិបទាំងអស់អាចរក្សាសិទ្ធិគ្រប់គ្រងលើបញ្ហានានាពាក់ព័ន្ធនឹងប្រយោជន៍សាធារណៈ។
* ជំពូកទី១៨ បទប្បញ្ញត្តិស្ថាប័ន៖ បានបង្កើតឱ្យមានការរៀបចំផ្នែកស្ថាប័នសម្រាប់កិច្ចព្រមព្រៀងអាសិប និងរចនាសម្ព័ន្ធសម្រាប់រដ្ឋមន្ត្រីអាសិប គណៈកម្មាធិការចម្រុះអាសិប និងគណៈកម្មាធិការ/អនុគណៈកម្មាធិការផ្សេងៗទៀត។ គណៈកម្មាធិការចម្រុះអាសិប នឹងពិនិត្យនិងចង្អុលបង្ហាញណែនាំការអនុវត្តកិច្ចព្រមព្រៀងអាសិបនេះ។
* ជំពូកទី១៩ ការដោះស្រាយវិវាទ៖ បានបង្កើតឱ្យមាននូវយន្តការប្រកបដោយប្រសិទ្ធភាព ស័ក្ដិសិទ្ធិភាព និងតម្លាភាព សម្រាប់ការពិគ្រោះយោបល់ និងការដោះស្រាយវិវាទ ដែលកើតចេញពីការអនុវត្តកិច្ចព្រមព្រៀងអាសិបនេះ។
* ជំពូកទី២០ អវសានប្បញ្ញត្តិ៖ បានកំណត់ពីការត្រួតពិនិត្យឡើងវិញទូទៅ និងនីតិវិធីធ្វើវិសោធនកម្មកិច្ចព្រមព្រៀង បញ្ញត្តិស្តីពីការចូលជាធរមាន ការដកខ្លួនចេញពីកិច្ចព្រមព្រៀង និងការចូលជាសមាជិកកិច្ចព្រមព្រៀងអាសិប៕