Wednesday, February 15, 2017

ប្រជាពលរដ្ឋដែលទទួលបានការអនុញ្ញាតសាងសង់ផ្ទះនៅតំបន់អង្គរ ថាមានភាពងាយស្រួលក្នុងការស្នើសុំ

តំបន់ឧទ្យានអង្គរដែលមានទំហំ៤០១គីឡូម៉ែត្រក្រឡាត្រូវបានដាក់បញ្ចូលក្នុងបញ្ជីបេតិកភណ្ឌពិភពលោកកាលពីខែធ្នូ ឆ្នាំ១៩៩២។ តំបន់នេះត្រូវបានចាត់បញ្ចូលជារមណីយដ្ឋានរស់ដែលសម្បូរដោយទេសភាពធម្មជាតិ ប្រាង្គប្រាសាទ និងប្រជាពលរដ្ឋដែលបន្តរស់នៅរហូតដល់បច្ចុប្បន្ន។ ក្នុងន័យអភិរក្សមរតកបេតិកភណ្ឌជាតិ ក៏ដូចជាការគ្រប់គ្រងរមណីយដ្ឋានទាំងមូល រាជរដ្ឋាភិបានបានប្រគល់ភារៈកិច្ចឲ្យអាជ្ញាធរជាតិអប្សរាដើម្បីបំពេញកិច្ចការសំដៅធ្វើយ៉ាងណាឲ្យគោរពបានតាមលក្ខខ័ណ្ឌនានារបស់បេតិកភណ្ឌពិភពលោក។
ដោយឈរលើគោលការណ៍រមណីយដ្ឋានមានជីវិតរបស់អង្គរទើបមានការអនុញ្ញាតឲ្យប្រជាពលរដ្ឋបន្តរស់នៅលើទីតាំងដែលធ្លាប់រស់នៅពីយូរលង់មកហើយបាន។ ម្យ៉ាងទៀតការសាងសង់ជួសជុលផ្ទះសម្បែងរបស់ប្រជាពលរដ្ឋក្នុងតំបន់ជាចំណុចដែលអាជ្ញាធរជាតិអប្សរាកំពុងបន្តការយកចិត្តទុកដាក់យ៉ាងខ្លាំង។ ការជួសជុលតូចតាច សាងសង់ទ្រុងមាន់ ទ្រុងទា ឬបង្គន់អនាម័យជាដើមនោះ អាជ្ញាធរជាតិអប្សរាបានបង្កើតក្រុមការងារសហគមន៍ដើម្បីចុះពិនិត្យ និងអនុញ្ញាតឲ្យដល់ទីកន្លែងតែម្តង។ រីឯការស្នើសុំសាងសង់ផ្ទះថ្មីជំនួសផ្ទះចាស់ទើបតម្រូវឲ្យមកដាក់ពាក្យស្នើសុំដោយផ្ទាល់នៅអាជ្ញាធរជាតិអប្សរា។ ករណីប្រជាពលរដ្ឋបានបំពេញលក្ខខ័ណ្ឌគ្រប់គ្រាន់ អាជ្ញាធរជាតិអប្សរាអនុញ្ញាតឲ្យសាងសង់ ព្រមទាំងគូសប្លង់បច្ចេកទេស និងជួយពិគ្រោះយោបល់សំដៅធ្វើយ៉ាងណាឲ្យការសាងសង់នោះបានប្រើប្រាស់ចំគោលដៅ សន្សំសំចៃថវិកា ព្រមទាំងគោរពបានតាមរចនាបថខ្មែរបុរាណទៀតផង។
ប្រជាពលរដ្ឋដែលមានទីលំនៅនៅភូមិស្រះស្រង់ខាងត្បូង មានផ្ទះនៅក្បែរស្រះស្រង់ផ្ទាល់តែម្តងនោះ អ្នកមីង ធាន វួន បានបញ្ជាក់កាលពីព្រឹកថ្ងៃទី១៤ កុម្ភៈ ២០១៧ នេះថា អ្នកមីងធ្លាប់ទទួលបានការអនុញ្ញាតឲ្យសាសង់ផ្ទះថ្មីតាំងពីប្រហែល១០ឆ្នាំមុនមកម្លេះ តែចុងឆ្នាំ២០១៦កន្លងមកនេះដោយសារមានកំណើនសមាជិកក្នុងគ្រួសារបន្ថែមទៀត អ្នកមីងក៏បានស្នើសុំហើយទទួលបានការឯកភាពពីអាជ្ញាធរជាតិអប្សរា ដើម្បីតយ៉ាក ព្រមទាំងសាងសង់បង្គន់អនាម័យបន្ថែមទៀតដើម្បីប្រើប្រាស់។
ចំណែកលោកពូ ម៉ៅ ម៉េធ ជាប្រជាពលដ្ឋរស់នៅភូមិរហាល ដែលកំពុងសាងសង់ផ្ទះជិតរួចរាល់ហើយនោះ ក៏បានបង្ហាញពីភាពងាយស្រួលក្នុងការស្នើសុំច្បាប់សាងសង់នេះដែរ។ លោក ម៉េធ ជាអ្នកខេត្តកំពង់ឆ្នាំង ហើយលោកបានយកគ្រួសារជាអ្នកស្រុកអង្គរ និងបានមករស់នៅទីនេះរយៈពេល២០ឆ្នាំមកហើយ។ លោកអះអាងថា ការសុំច្បាប់សាងសង់នៅក្នុងឧទ្យានអង្គរ ពុំមានអ្វីពិបាកទេ ដោយគ្រាន់តែគោរពតាមគោលការណ៍របស់អាជ្ញាធរជាតិអប្សរា ក្នុងនោះរួមមានការសាងសង់ត្រូវគោរពទៅតាមប្លង់ដែលចេញដោយអ្នកជំនាញរបស់អាជ្ញាធរជាតិអប្សរាជាដើម។
ដោយឡែកលោកពូ នូ រ៉ូត ដែលរស់នៅភូមិស្រះស្រង់ខាងជើងវិញ ផ្ទះរបស់លោកសាងសង់ជិតរួចរាល់ហើយ ក្រោយពីមានច្បាប់អនុញ្ញាតត្រឹមត្រូវ។ ដូចគ្នានឹងអ្នកស្រី ធាន វួន និងលោក ម៉ៅ ម៉េធ លោក រ៉ូត ថាពុំមានអ្វីជាពិបាកក្នុងការស្នើច្បាប់សាងសង់នោះទេ។ លោក រ៉ូត បានសម្តែងការងឿងឆ្ងល់ចំពោះប្រជាពលរដ្ឋខ្លះ ដែលថាការស្នើសុំច្បាប់សាងសង់ក្នុងឧទ្យានអង្គរមានការលំបាក តែសម្រាប់លោកគ្រាន់តែដាក់ពាក្យស្នើសុំត្រឹមជាង២០ថ្ងៃ ក៏ទទួលបានការអនុញ្ញាតភ្លាមៗ។
សរុបសេចក្តីមក ការស្នើសុំច្បាប់សាងសង់ក្នុងឧទ្យានអង្គរពុំមានការលំបាកដូចមហាជនមួយចំនួនលើកឡើងនោះទេ គ្រាន់តែការស្នើសុំត្រូវគោរពទៅតាមគោលការណ៍ដែលអាជ្ញាធរជាតិអប្សរា ក៏ដូចជាគោរពទៅតាមល័ក្ខខណ្ឌនៃច្បាប់បេតិកភណ្ឌពិភពលោកតែប៉ុណ្ណោះ។ អ្នកស្រុកអង្គរនៅតែអាចរស់នៅ ប្រកបរបរ និងមានកម្មសិទ្ធិគ្រប់គ្រងអ្វីដែលជារបស់ខ្លួនតាំងដើមរហូតមក៕





ហ្វេសប៊ុក សី ហា៖ ហួសចិត្ត «ថ្ងៃបុណ្យសង្សារ តំណាងរាស្ត្រ ហូរ វ៉ាន់ ភ័យស្លន់ស្លោ វេរលុយច្រលំចូលប្តី របស់សាហាយខ្លួន!» (មានវីដេអូ)

(ភ្នំពេញ)៖ នៅថ្ងៃទី១៥ ខែកុម្ភៈ ឆ្នាំ២០១៧នេះ ទំព័រហ្វេសប៊ុកឈ្មោះ សី ហា បានបង្ហោះ​ផ្សាយ​​នូវខ្លឹម​សារ​អមដោយសំឡេងសន្ទនារបស់លោកតំណាងរាស្រ្ត ហូ វ៉ាន់ និងស្រី​កំណាន់​របស់គាត់ ដើម្បីឱ្យសាធារណជនបានដឹងគ្រប់ៗគ្នា។
ហ្វេសប៊ុក សី ហា បានបង្ហោះដូចតទៅ៖ នៅថ្ងៃនេះមានបុរសម្នាក់សុំមិនបញ្ចេញឈ្មោះ បានផ្ញើសម្លេង និងខ្លឹមសារ មកកាន់ទំព័រ Facebook សី ហា និងបានសំណូមពរឱ្យបកអាក្រាតទង្វើលាមករបស់តំណាងរាស្ត្រចាស់ព្រើល ហូរ វ៉ាន់ នៅថ្ងៃទី១៤ ខែកុម្ភៈ ម្សិលមិញ ដែលត្រូវជាថ្ងៃបុណ្យសង្សារនោះជាបន្ទាន់។ បុរសរូបនោះបានទម្លាយការពិតដ៏ស្មោគគ្រោកមួយទៀតរបស់តំណាងរាស្ត្រ ហូរ វ៉ាន់ ដែលមហាជនបានដឹងគ្រប់ៗគ្នាថា ជាតាចាស់អាយុជាង ៧០ឆ្នាំទៅហើយ ប៉ុន្តែនៅតែល្មោភកាមគុណជាមួយស្រីរោងចក្រ ជាពិសេសលួចទាក់ទងប្រពន្ធគេជាច្រើននាក់។
ខាងក្រោមនេះគឺជាខ្លឹមសារ និងសម្លេងទាំងស្រុង ដែលបុរសម្នាក់នោះទទូចឱ្យទំព័រ សី ហា បង្ហោះផ្សាយ៖
«ពេលថ្ងៃត្រង់ថ្ងៃទី១៤ ខែកុម្ភៈ ឆ្នាំ២០១៧ ត្រូវជាថ្ងៃបុណ្យសង្សារនេះ ឃើញ តា ហូរ វ៉ាន់ វេរលុយទៅឱ្យប្រពន្ធគេម្នាក់ជាសាហាយរបស់គាត់ ដែលស្រីម្នាក់នោះទើបតែរៀបការមានប្តីថ្មីថ្មោងទៀតផង តែបែរជាតា ហូរ វ៉ាន់ វេរលុយច្រលំចូលលេខទូរស័ព្ទប្តីរបស់សាហាយខ្លួនទៅវិញ។
អាចថាមកពីលោកតា ហូរ វ៉ាន់ ជាចាស់ព្រើល ស្រេកឃ្លានចង់តែរួមរ័ក្ស ដោយគាត់គិតថា ថ្ងៃបុណ្យនៃក្តីស្រលាញ់ Valentine day នោះឃើញយុវវ័យមួយចំនួនភ្លើតភ្លើនទៅណាត់គ្នាដេកសប្បាយ លោកតា ហូរ វ៉ាន់ ក៏នឹកចង់ស៊ីចុកចំណីឆ្ងាញ់នៅថ្ងៃនោះដែរ ទើបគាត់ផ្ញើលុយតាម Wing ទៅឱ្យស្រីនោះដើម្បីបានសប្បាយជាមួយនាង។ មិនមែនលោកតា ហូរ វ៉ាន់ គាត់មិនដឹងថា ស្រីដែលជាសាហាយស្មន់របស់គាត់នៅលីវឯណា គឺនាងមានប្តីហើយ តែលោកតា ហូរ វ៉ាន់ គាត់ឆ្ងាញ់តែជាមួយប្រពន្ធគេ ដោយគាត់មិនគិតពីសីលធម៌ និងខ្លាចចិត្តប្តីរបស់គេឡើយ។
ប៉ុន្តែថ្ងៃ១៤ កុម្ភៈ ម្សិលមិញអាចជាថ្ងៃស៊យរបស់លោកតា ហូរ វ៉ាន់ គឺបន្ទាប់ពីបានផ្ញើលុយឱ្យសាហាយរបស់គាត់ហើយ មួយសន្ទុះក្រោយមកប្រហែលជាម៉ោង ១ថ្ងៃត្រង់ បុរសជាប្តីរបស់សាហាយស្មន់គាត់ក៏បានទូរស័ព្ទមកគាត់ ក្រោយពីបុរសនោះបានឃើញសារ និងចំនួនទឹកលុយ ដែលលោកតា ហូរ វ៉ាន់ ផ្ញើឱ្យប្រពន្ធខ្លួន។ នៅពេលបានលឺសម្លេងប្តីរបស់នាង ស្រាប់តែលោកតា ហូរ វ៉ាន់ ភ័យស្រលាំងកាំង ឡើងភ្នែកស គាត់ក៏រកលេសដោះសារប្រាប់ប្តីនាងថា «ជាលុយចងដៃ» បន្ទាប់ពីនិយាយចប់តា ហូរ វ៉ាន់ ក៏ទាក់ទងទូរស័ព្ទលេខមួយទៀតរបស់នាងសាហាយនោះ ដោយនិយាយទាំងញ័រមាត់ថា «រឿងរ៉ាវងាប់ហើយ!» ក្រោយពីនាងជាសាហាយរបស់លោកតា ហូរ វ៉ាន់ ប្រាប់ថាទូរស័ព្ទនោះប្តីរបស់នាងកាន់។
តាមពិតរឿងធំនេះកើតឡើងដោយសារតា ហូរ វ៉ាន ខ្លួនឯងផ្ញើលុយច្រលំចូលលេខចាស់របស់សាហាយគាត់ ដែលសព្វថ្ងៃលេខនេះត្រូវបានប្តីរបស់នាងយកប្រើវិញដោយសារសង្ស័យថានាងមានសាហាយព្រោះតា ហូរ វ៉ាន់ ទូរស័ព្ទណាត់ទៅរួមរ័ក្សជាញឹកញាប់ពេក។ បន្ទាប់ពីវេរលុយ ហើយផ្ញើលេខកូតសម្ងាត់ទៅឱ្យលេខប្តីរបស់សាហាយនោះ ប្តីនាងក៏ទូរស័ព្ទមកភ្លែតអាចថា ប្តីនាងក៏បានដឹងការបែកធ្លាយសម្លេងកាលពីថ្ងៃមុនដែរ ហើយក៏កំពុងតាមដានប្រពន្ធក្បត់ចិត្តនោះទៀតផង។ ឥឡូវរឿងរ៉ាវការពិតបានកើតឡើងហើយ គឺបុរសជាប្តីនោះកំពុងខឹងសម្បារជាខ្លាំង។
ខ្ញុំចង់ផ្តាំទៅតា ហូរ វ៉ាន់ ថាលោកគឺជាអ្នកបំផ្លាញសេចក្តីសុខរបស់គ្រួសារប្តីប្រពន្ធគេ។ សាហាយស្មន់រវាងតា ហូរ វ៉ាន់ បន្លំខ្លួនជាប៉ាធម៌ ទៅរួមរ័ក្សជាមួយប្រពន្ធបុរសនោះបែកការអស់ហើយ។ ពេលនេះគ្រួសារគេកំពុងតែឈ្លោះទាស់ទែងគ្នាយ៉ាងខ្លាំង ដែលអាចឈានទៅដល់ការបែកបាក់លែងលះគ្នាទៀតផង ដោយសារតា ហូរ វ៉ាន់ មកដណ្តើមប្រពន្ធរបស់គាត់។
លោកតា ហូរ វ៉ាន់អើយ ល្មមភ្ញាក់ខ្លួនទៅ ចាស់អាយុជាង ៧០ឆ្នាំហើយ គួរគិតពីធម៌អារ្យខ្លះផង។ ជាចុងក្រោយសូមផ្ញើការក្រើនរំលឹកទៅលោកជំទាវដែលជាភរិយារបស់តា ហូរ វ៉ាន់ ឱ្យជួយឃ្វាលប្តីដែលមានកិលេសកាមតណ្ហាពេញខ្លួនម្នាក់នេះផង ប្រយ័ត្នប្តីរបស់គេទៅរករឿង ស្រែកឡូឡារ ដល់មុខផ្ទះ ឬក៏ប្តឹងផ្តល់ឡើងតុលាការ ប្រយ័ត្នខ្មាស់គេ អសោចកេរ្ត៍ឈ្មោះកាន់តែខ្លាំង។
សូមស្តាប់សម្តីរបស់តំណាងរាស្ត្រ ហូរ វ៉ាន់ ឆ្លើយឆ្លងជាមួយសាហាយ ទាំងភ័យស្លន់ស្លោ ព្រោះវេរលុយច្រលំចូលប្តី របស់សាហាយខ្លួន ដូចតទៅ៖

រដ្ឋមន្ត្រី​ពាណិជ្ជក​ម្ម៖ កម្ពុជា​ជាប្រទេស​បើកចំហរ​ជាមួយគោលន​យោបាយ លើក​ទឹកចិត្ត​ប្រសើរបំផុត​

ភ្នំពេញ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជម្រាបជូនធុរជនជាតិ និងអន្តរជាតិថា កម្ពុជា គឺជាប្រទេសដែលផ្តល់ជូនការលើកទឹកចិត្តផ្នែកវិនិយោគ មានលក្ខណៈប្រកួតប្រជែងជាច្រើនសម្រាប់វិនិយោគិន។ លោករដ្ឋមន្រ្តីថ្លែងដូច្នេះក្នុងពិធីជប់លៀងកិច្ចប្រជុំកំពូលធុរកិច្ចកម្ពុជាឆ្នាំ២០១៧ ដែលរៀបចំឡើងនៅសណ្ឋាគារអ៉ីនធើខុន នាល្ងាចថ្ងៃទី១៤ ខែកុម្ភៈ ឆ្នាំ២០១៧។
លោករដ្ឋមន្ត្រីបានគូសបញ្ជាក់ថា «ទោះបីប្រទេសកម្ពុជាតូច ប៉ុន្តែការដាក់ចេញគោលនយោបាយ និងចក្ខុវិស័យច្បាស់លាស់របស់រាជរដ្ឋាភិបាលកម្ពុជា បានផ្តល់អត្ថប្រយោជន៍គ្មានគូប្រៀបជាងប្រទេសដទៃ នៅក្នុងតំបន់។ ទាំងវិនិយោគិនបរទេស និងក្នុងស្រុក ពួកគេនឹងទទួលបាននូវការគាំពារស្មើភាពគ្នា នៅក្រោមច្បាប់វិនិយោគរបស់យើង»។
លោក ប៉ាន សូរស័ក្តិ បានបន្ថែមទៀតថា «ជាមួយកម្លាំងពលកម្មវ័យក្មេងពោរពេញដោយថាមពល, ធនធានធម្មជាតិសម្បូរបែប, ការគាំទ្រធុរកិច្ចពីរាជរដ្ឋាភិបាល, ទីតាំងភូមិសាស្ត្រមានលក្ខណៈយុទ្ធសាស្ត្រ និងកិច្ចព្រមព្រៀងពាណិជ្ជកម្មពិសេសៗ ជាមួយដៃគូប្រទេសធំៗ និងនៅក្នុងតំបន់ កម្ពុជាគឺជាទីកន្លែងដ៏ប្រសើរសម្រាប់វិនិយោគ និងធ្វើធុរកិច្ច»។
អនុលោមតាមគោលនយោបាយអភិវឌ្ឍន៍ឧស្សាហកម្ម (IDP) ឆ្នាំ២០១៥-២០២៥ រាជរដ្ឋាភិបាលកម្ពុជា បានកំណត់នូវក្របខណ្ឌការងារយុទ្ធសាស្ត្រថ្មី ដើម្បីអភិវឌ្ឍន៍វិស័យឧស្សាហកម្ម សំដៅធ្វើពិពិធកម្មកំណើនសេដ្ឋកិច្ច និងពាណិជ្ជកម្មរបស់កម្ពុជា។ យុទ្ធសាស្ត្រនេះ នឹងធ្វើឲ្យកម្ពុជាកាន់តែមានលក្ខណៈប្រកួតប្រជែង និងកាត់បន្ថយការពឹងផ្អែកលើវិស័យប្រពៃណីដូចជាវាយនភណ្ឌ, ទេសចរណ៍, និងកសិកម្ម ព្រមទាំងទាក់ទាញការវិនិយោគផ្ទាល់ពីបរទេស ទៅលើផ្នែកដែលបន្ថែមចង្វាក់តម្លៃដូចជា កសិពាណិជ្ជកម្ម, ម្ភូបអាហារកែច្នៃ, គ្រឿងបង្គុំ និងឧស្សាហកម្មធុនស្រាល។
កិច្ចប្រជុំធុរកិច្ចកម្ពុជាឆ្នាំនេះ ក៏នឹងផ្តល់ឱកាសវិសេសវិសាលសម្រាប់វិនិយោគិន និងធុរជន ដើម្បីពង្រីកបណ្តាញធុរកិច្ច ព្រមទាំងបរិយា កាសស្និទ្ធស្នាល ដើម្បីពិភាក្សា និងស្វែងរកសក្តានុពល សម្រាប់ការវិនិយោគ និងផ្គូរផ្គងអាជីវកម្ម សំដៅជំរុញការវិនិយោគក្នុងប្រទេសកម្ពុជា និងកំណើនសេដ្ឋកិច្ចជាតិ៕


នាយឧត្តមសេនីយ៍ សៅ សុខា ដឹកនាំកម្លាំងចម្រុះ ចុះទៅត្រួតពិនិត្យសកម្មភាព កាប់រានព្រៃនៅលើកោះរ៉ុង ខេត្តព្រះសីហនុ

ព្រះសីហនុ៖​ បន្ទាប់ពីទទួលបានសេចក្តីរាយការណ៍ពី មេបញ្ជាការកងរាជអាវុធហត្ថ ខេត្តព្រះសីហនុ លោក ហេង ប៊ុនទី នៅថ្ងៃទី១៥ ខែកុម្ភៈ ឆ្នាំ២០១៧នេះ លោក​ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទមេបញ្ជាការ កងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិបានដឹកនាំ កម្លាំងសមត្ថកិច្ចចម្រុះ ចុះទៅត្រួតពិនិត្យនៅកន្លែង បទល្មើសព្រៃឈើ ក្នុងភូមិសាស្ត្រកោះរ៉ុង ដែលមានការកាប់រានព្រៃឈើ យ៉ាងគគ្រឹកគគ្រឹង។
តាមសេចក្តីរាយការណ៍ នៅលើកោះរ៉ុង ខេត្តព្រះសីហនុ ដែលជាតំបន់ទេសចរណ៍ធម្មជាតិ មានចម្ងាយពីកំពង់ផែស្វយ័ត ក្រុងព្រះសីហនុ ៣០គីឡូម៉ែត្រ មានបទល្មើសព្រៃឈើកើតឡើងយ៉ាងខ្លាំង។ ចំណែកកិច្ចប្រតិបត្តិការនេះក៏មានការចូលរួមពី លោក យន្ត មីន អភិបាលខេត្តព្រះសីហនុ សមាជិកគណៈកម្មការជាតិ ព្រមទាំងនាយទាហាន នាយនគរបាលជាតិ ជាច្រើនរូបទៀត។
សូមបញ្ជាក់ថា គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ត្រូវបានបង្កើតឡើងនៅថ្ងៃទី០៧ ខែធ្នូ ឆ្នាំ២០១៦ តាមសេចក្តីសម្រេចរបស់រាជរដ្ឋាភិបាល មានតួនាទី និងភារកិច្ចចុះទប់ស្កាត់ និងបង្ក្រាបបទល្មើសធនធានធម្មជាតិ ដូចជា ការកាប់ព្រៃឈើ ការដឹកឈើ និងការនាំចេញឈើខុសច្បាប់ ការចាប់សត្វព្រៃ និងការនាំចេញសត្វព្រៃខុសច្បាប់ ការកាប់រាន ទន្ទ្រានយកដីរដ្ឋ ព្រមទាំងរុករករ៉ែដោយខុសច្បាប់នៅទូទាំងប្រទេស។
ការកាប់រានព្រៃ ឈូសឆាយដីព្រៃ ហ៊ុព័ទ្ធកាន់កាប់ដីព្រៃដោយខុសច្បាប់ គឺជាអំពើល្មើសដែលមានចែងក្នុងមាត្រា៩៧ នៃច្បាប់ស្តី ពីព្រៃឈើ ត្រូវផ្តន្ទាទោសក្រោមបទល្មើសព្រៃឈើថ្នាក់ទី១ ដែលត្រូវជាប់ពន្ធនាគារពី ៥ឆ្នាំដល់១០ឆ្នាំ។
តាមសេចក្តីរាយការណ៍របស់ លោក ហេង ប៊ុនទី បានឱ្យដឹងថា សង្កាត់កោះរ៉ុង បែងចែកជា១៩ក្រុម មានចំនួន៥ភូមិ មានប្រជាពលរដ្ឋរស់នៅអចិន្រ្ទៃយ៍ ចំនួន៦៦៤គ្រួសារ ស្មើនឹង ២,៥៨៦នាក់ (ស្រី១,១៦៣នាក់) អាយុ១៨ឆ្នាំ ព្រំប្រទល់ខាងកើតជាប់ នឹងសមុទ្រ សង្កាត់លេខ៣ ក្រុងព្រះសីហនុ, ខាងជើងជាប់នឹងសមុទ្រ ស្រុកបទុមសាគរ ខេត្តកោះកុង, ខាងត្បូងទល់នឹងលំហរ សមុទ្រ, ខាងលិចជាប់នឹងសមុទ្រស្រុកគិរីសាគរ ខេត្តកោះកុង៕



ផ្សារទំនើបមួយទៀតនឹងបើកដំណើរការនៅខែមិនាខាងមុខនេះ

ភ្នំពេញ៖ ផ្សារទំនើប AEON មួយទៀត នឹងបើកដំណើរការ នៅខែមិនា ខាងមុខនេះ ដែលមានទីតាំងស្ថិតនៅក្នុងបុរីប៉េង ហ៊ួត The Star Premier ស្ថិតនៅតាមបណ្តោយផ្លូវជាសុផារ៉ា។
អ្នកនាង ហ៊ង សុជាតិ បុគ្គលិកជាន់ខ្ពស់ផ្នែកទីផ្សារនៃបុរីប៉េង ហ៊ួត បានថ្លែងឲ្យដឹងតាមទូរស័ព្ទកាលពីម្សិលម៉ិញថា ក្រុមហ៊ុន AEON MALL បានសម្រេចជួលអាគារកម្ពស់បីជាន់ក្នុងបុរីនេះ ដើម្បីបើកផ្សារទំនើបខ្នាតមធ្យមមួយ ដោយសាររបស់ផ្សារ នេះមានទំហំជាង៤០០០ម៉ែត្រការ៉េប៉ុណ្ណោះ។
អ្នកនាងបន្តថា ផ្សារទំនើបនេះ នឹងមានភោជនីយដ្ឋាន ហាង កាហ្វេ និងទីតាំងលក់ផលិតផលចម្រុះដូចផ្សារទំនើប Lucky នៅជាន់ផ្ទាល់ដីផងដែរ។
ផ្សារទំនើបនេះមានទីតាំងក្នុងបុរីប៉េង ហួត ស្ថិតនៅ តាម បណ្តោយផ្លូវ៥៩៨ ក្នុងសង្កាត់ឫស្សីកែវ ខ័ណ្ឌឫស្សីកែវ រាជ ធានីភ្នំពេញ។
អ្នកនាង ហ៊ង សុជាតិ បន្តថា ក្រុមហ៊ុនAEON Mall បានជួល អាគារក្នុងគំរោងនេះរយៈពេលវែង ដោយសារពួកគេមើល ឃើញឱកាសជោគជ័យពីគម្រោងនេះព្រោះ ទីតាំងនេះមាន មនុស្សរស់នៅច្រើនជាទីតាំង ដែលមិនទាន់មានផ្សារទំនើប នៅឡើយដូច្នេះក្រុមហ៊ុនគិតថា ផ្សារទំនើបនេះនឹងទទួល បាន ជោគជ័យ។
បុគ្គលិកក្រុមហ៊ុន AEON Cambodia ដែលគ្រប់គ្រងផ្សារ ទំនើបលក់រាយនៅកម្ពុជា បាននិយាយក្នុងលក្ខខ័ណ្ឌមិន បញ្ចេញឈ្មោះថា ផ្សារទំនើបនេះមានទំហំតូចប៉ុណ្ណោះ ដែលលក់ទំនិញចម្រុះ និងចំណីអាហារប៉ុណ្ណោះ។ ផ្សារទំនើប នេះ គ្រោងនឹងបើកនៅខែមិនាខាងមុខនេះមែន ប៉ុន្តែការ រៀប ចំមិនទាន់បញ្ចប់នៅឡើយទេ ហេតុនេះគំរោងបើកផ្សារនេះ អាចពន្យាពេល។
អ្នកនាង អាន សុធីតា នាយិកាក្រុមហ៊ុនCBRE CAMBODIA បានថ្លែងថា ផ្សារទំនើបនៅកម្ពុជា មានចំនួនកើនឡើងច្រើន ក្នុងប៉ុន្មានឆ្នាំចុងក្រោយនេះ ហើយការចូល មកដល់របស់ ផ្សារ ទំនើបAEON ដែលផ្តោតលើស្តង់ដារអន្តរជាតិ បាន ធ្វើឲ្យ ផ្សារ ទំនើបផ្សេងៗទៀត ប្រឈមការប្រកួតប្រជែងកាន់តែខ្លាំង ដែលទាមទារឲ្យក្រុមហ៊ុនវិនិយោគផ្សារទំនើបក្នុងស្រុកធ្វើការកែលំអរ ការរចនាអាគារ និងការរៀប ចំស្តង់ លក់ ឲ្យមាន ភាព ទាក់ទាញ ដើម្បីបញ្ចៀសការក្ស័យទុន។
អ្នកនាងបន្តថា “ទោះជាយ៉ាងណាបើគិតពីចំនួនមនុស្ស និង ទំហំផ្សារទំនើបធៀបនឹងប្រជាជនម្នាក់គឺមាន ចំនួនតិចនៅ ឡើយ ដែលធ្វើឲ្យទីផ្សារនេះនៅមានឱកាសបន្ថែមទៀត”៕

បែក​ធ្លាយ​ផ្ទៃក្នុង៖ លោក សម រង្ស៊ី ធ្វើឱ្យ​អ្នកតស៊ូជា​មួ​យកាន់​​តែខក​ចិត្ត បន្ទាប់​ពី​ប្រកាសបិទផ្លូវន​យោបាយ​ប្រពន្ធរបស់​ខ្លួន

ភ្នំពេញ៖ ប្រភពផ្ទៃក្នុងគណបក្សសង្គ្រោះជាតិកូតា សម រង្ស៊ី នាំគ្នាសម្តែងការហួសចិត្តនិងខកចិត្តនៅពេលលោក សម រង្ស៊ី ប្រកាសបិទផ្លូវបន្តទៀតថា «ខ្ញុំអត់មានរៀបចំឱ្យភរិយាខ្ញុំ ឬកូនខ្ញុំណាម្នាក់ មកដឹកនាំគណបក្សជំនួសខ្ញុំទេ»
ផ្ទៃក្នុងគណបក្សសង្គ្រោះជាតិកូតា សម រង្ស៊ី បាននាំគ្នាទះទ្រូងហួសចិត្ត ហើយថ្លែងថា៖ «ហេតុអ្វីក៏សម្រេចចិត្តដោយគ្មានសួរយោបល់គេឯងឱ្យច្បាស់!? បើបានជាបិទផ្លូវនយោបាយខ្លួនឯងទៅហើយ ហេតុអ្វីក៏ប្រកាសបិទផ្លូវនយោបាយរបស់ប្រពន្ធខ្លួនថែមទៀត!? ចុះបើគណបក្សត្រូវការនោះវានឹងទៅជាក្រឡិច ក្រឡុច លេបសម្តីខ្លួនឯងបាត់ទៅហើយទេឬ!? ហេតុអ្វីក៏មិនទុកឱកាសឱ្យគណៈកម្មាធិការអចិន្ត្រៃយ៍ និងគណៈកម្មាធិការនាយកធ្វើការផង!?»
នៅក្នុងគណបក្សសង្គ្រោះជាតិគឺមានចរន្តពីរ ដែលមនុស្សខាងកូតា សម រង្ស៊ី គឺចង់ឱ្យលោកស្រី ជូឡុង សូមួរ៉ា ធ្វើប្រធានបក្ស។ ចំណែកឯកូតាគណបក្ស សិទ្ធិមនុស្សគឺចង់ឱ្យលោក កឹម សុខា ធ្វើប្រធានបក្ស។ បើលោក សម រង្ស៊ី ប្រកាសបិទផ្លូវដូច្នេះ មានន័យថា បក្សទាំងមូលត្រូវតែលើកថ្វាយឱ្យលោក កឹម សុខា ធ្វើប្រធានបក្សដោយស្វ័យប្រវត្តិតែម្តងទៅ។ ផ្ទៃក្នុងបក្សក៏បង្ហើបឱ្យដឹងថា ឥឡូវនេះពីលើដល់ក្រោមកាន់តែច្របូកច្របល់ មិនស្តាប់គ្នា លូកគ្នាពេញ ជាពិសេសក្នុងដំណាក់កាលតែងតាំងបេក្ខភាពសម្រាប់ការបោះឆ្នោតក្រុមប្រឹក្សាឃុំ-សង្កាត់នេះ។
ការប្រកាសបែបនេះទៀតសោត គឺស្ទើរតែចប់ទាំងអស់មនុស្សខាងកូតាគណបក្ស សម រង្ស៊ី។ ព័ត៌មានចេញផ្ទៃក្នុងលាន់មាត់ថា៖ «ប្រពន្ធគេ គេបិទផ្លូវទៅហើយ ចុះទម្រាំឯងសាច់ដ៏ទៃ!?»។ នេះក៏បានផ្ញើសារទៅកាន់ លោក គង់ គាំ លោក យឹម សុវណ្ណ លោក អេង ឆៃអ៊ាង លោក សុន ឆ័យ ថាអ្នកទាំងអស់គ្នានេះ គ្មានឱកាសទេ ហើយជម្រើសបឋមមានពីរគឺ ទី១-អោបជើងលោក កឹម សុខា ឬទី២-នាំគ្នាលាឈប់ធ្វើនយោបាយដែរទៅ ដើម្បីក្លាយជាវីរៈបុរសក្នុងក្អម ពីព្រោះអតីតលោកប៉ាធាន និយាយថាអ្នកណាលាឈប់ គឺជាវីរៈបុរសនោះអី!?
ការណ៍ដែលលោក សម រង្ស៊ី បញ្ចប់ជីវិតនយោបាយខ្លួនឯងនេះ ក៏ត្រូវបានវាយតម្លៃថា ជាការខុសឆ្គងផ្នែកយុទ្ធសាស្ត្រនយោបាយ។ អ្នកខ្លះយល់ថា ប្រហែលជាលោក សម រង្ស៊ី យកពិសោធន៍ការធ្លាប់បានចាញ់ឆ្នោតកន្លងមក៤អាណត្តិជាប់ៗគ្នា មកធ្វើជាមូលដ្ឋានសម្រេចចិត្ត
ទី១-លោក សម រង្ស៊ី ហាក់ដឹងច្បាស់ជាមុនថា បក្សប្រឆាំងគ្មានវាសនានឹងដណ្តើមសមាណចិត្តច្រើនលើសលុបពីប្រជាជនបាននោះទេ។ លទ្ធផលឆ្នោត ឆ្នាំ២០១៣ គឺជាចំនួនខ្ពស់បំផុតហើយ ហើយក្នុងកាលៈទេសៈណាក៏ដោយ ក៏មិនអាចដណ្តើមយកជ័យជំនះពីគណបក្សប្រជាជនកម្ពុជាបានទេ។
ទី២-លោក សម រង្ស៊ី ក៏អាចវាយតម្លៃបានចំពោះលោកនាយករដ្ឋមន្រ្តី ហ៊ុន សែន ដែលធ្លាប់មានប្រសាសន៍ថា៖ «បើខ្ញុំលើកដៃចុះហត្ថលេខាលើកលែងទោសឱ្យ គឺសុខចិត្តកាត់ដៃចោល»។ នេះក៏មានន័យច្បាស់ថា គ្មានផ្លូវ ហើយក៏គ្មានថ្ងៃវិលវិញទេ!
ទី៣-លោក សម រង្ស៊ី ប្រហែលជានៅចងចាំព្រះមហាវីរក្សត្រ នរោត្តម សីហនុ ធ្លាប់មានព្រះរាជបន្ទូលកាលនៅមានព្រះជន្មថា៖ «កម្ពុជាត្រូវការសម្តេច ហ៊ុន សែន។ ពួកអ្នកប្រឆាំងសម្តេច ហ៊ុន សែន គឺមានវាសនាត្រឹមនៅជាអ្នកប្រឆាំងអស់មួយជីវិត!»
ប្រយោគខាងលើនេះគឺច្បាស់ៗ ហើយជាក់ស្តែងបំផុតអំពីជោគវាសនានយោបាយរបស់លោក សម រង្ស៊ី ដែលអស់ឱកាសហើយ។ លើចំណុចនេះ លោក សម រង្ស៊ី ក៏អាចស៊ីឡាកថា ពេលបក្សប្រឆាំងបរាជ័យតទៅទៀត គឺមិនមែនមកពីគាត់ ហើយក៏មិនមែនជាគាត់ទៀតទេ គឺដោយសារអ្នកដឹកនាំក្រោយៗ។
តាមប្រភពផ្ទៃក្នុងក៏បានឱ្យដឹងដែរថា ក្នុងដំណាក់កាលចុងក្រោយនេះ សម រង្ស៊ី ហាក់អន់ចិត្តចំពោះ កឹម សុខា ដែលការរៀបបេក្ខជនសម្រាប់ការ បោះឆ្នោតឃុំ-សង្កាត់ គឺដណ្តើមដាក់តែមនុស្សរបស់ខ្លួន ដែលលើកមុនបានដណ្តើមចែកស្មើជាពីរលើ៥៥កៅអីរួចហើយ។ ដូច្នេះ សម រង្ស៊ី មានមុខអីនឹងឆ្លើយ ចំពោះសមាជិកកូតារបស់ខ្លួនដែលបន្តបាត់ឱកាសទៀតនោះ។
លោក សម រង្ស៉ី ក៏នៅសង្ស័យលើទំនាក់ទំនងវាង លោក ហ៊ុន សែន-កឹម សុខា ដែរ ហើយក៏អន់ចិត្តលោក កឹម សុខា អំពីបេក្ខភាពភរិយាគាត់ធ្វើ ជាប្រធានបក្សនោះដែរ។ ភ្លាមៗបន្ទាប់ពីការប្រកាសលាលែង គឺ សម រង្ស៊ី មិនទាន់បដិសេធនឹងសំណួរកាសែតអំពីផែនការគ្រោងដាក់ប្រពន្ធខ្លួនបន្តវេននោះទេ។ ទើបតែប៉ុន្មានថ្ងៃក្រោយមកទៀត ប្រហែលជាមិនអាចនិយាយត្រូវរ៉ូវផ្ទៃក្នុង សម រង្ស៊ី បានប្រកាសថា បិទផ្លូវនយោបាយប្រពន្ធខ្លួនតែម្តង។
គ្មានអ្វីដែលឥតខ្ចោះទេ។ ក៏ប៉ុន្តែបើឆ្លុះបញ្ចាំងអំពីសាវតា និងបញ្ហាផ្ទៃក្នុងរបស់បក្សប្រឆាំង គឺបែកខ្ញែកបក្ខពួក និងបញ្ហាចាក់ស្រេះ។ កំហុសដ៏ធំខាងយុទ្ធសាស្ត្រនយោបាយគឺ ចរិតមាយាទ «មាត់អត់គំរប» ដែលមនុស្សមិនតិចទេ ជាប់គុកដោយសារមាត់អត់គំរប និងចាញ់បោកតាម សម រង្ស៊ី។ ទីបំផុតកំហុសនយោបាយ នេះគឺធ្លាក់លើខ្លួនឯងរហូត សម រង្ស៊ី សម្រេចលោតចុះពីរថយន្តទាំងរថយន្តកំពុងមានល្បឿន មិនទាន់ឈប់ផងនោះ។ នេះជាការប្រថុយដ៏គ្រោះថ្នាក់ ដែលជាលទ្ធផលគឺត្រូវបាក់ជើង បាក់ដៃ បែកមាត់ បាក់ធ្មេញ និងបោកក្បាល។
ដូច្នេះអ្វីដែលលោក សម រង្ស៊ី សម្រេចចិត្តលាឈប់នេះ គឺដូចនឹងពាក្យចំអកថា៖ «លាលែង វាមិនខុសអ្វីពី គោលែង សេះលែង ឬ ក្បីលែង នោះទេ! គ្រាន់តែថា លា វាល្ងង់ជាងគោ។ ឱ្យតែលែង គឺវាទៅហើយ!»
ពេលនៅមានអំណាចជាប្រធានបក្សចាត់ចែងមិនបានផង ចុះទម្រាំបាត់សិទ្ធិជាសមាជិកបក្សទៅទៀតនោះ!? បុគ្គលដែលអស់សិទ្ធិអត់អំណាច ហើយបញ្ជាគេមិនបានទៅទៀត គឺអាចនឹងកើតរោគអ្វីម្យ៉ាង។ លើការជាក់ស្តែងគឺលោក សម រង្ស៊ីអស់រលីង! កុំបន្ទោសអ្នកណា!
ពីមុនគេហៅ «បក្សសង្គ្រោះជាតិ» ឥឡូវដូរមក «សង្គ្រោះបក្ស» «សង្គ្រោះបក្ខពួក» បន្ទាប់មកស្រែកថា «ជួយសង្គ្រោះខ្ញុំផង!» និងចុងក្រោយគឺ «សក់អ្នកណាក្បាលអ្នកហ្នឹង!»។ នេះគឺជាដំណើរនៃការធ្លាក់ពិត។ សង្គ្រោះតែបក្សមួយ រៀបចំតែបក្សមួយឱ្យបានរឹងមាំ គឺធ្វើមិនបានផង ដូច្នេះតើនឹងមាន សមត្ថភាពនិងលទ្ធភាពអ្វីទ្រទ្រង់ស្ថានការណ៍ និងកិច្ចការប្រទេសជាតិ? យើងមិនត្រូវប្រថុយផ្តល់ឱកាសឱ្យក្រុមដែលមានបញ្ហាលើការគិតនេះ ដឹកនាំប្រទេសបានទេ គឺមិនបានជាដាច់ខាត។
ចំពោះការយល់ឃើញជាទូទៅថា សម រង្ស៊ី អាត្មានិយម ឬបុគ្គលនិយម គឺមិនខុសទេ។ គាត់ទៅហើយ! តែការចាកចេញទៅរបស់គាត់ គឺមិនមែនជាការធ្វើដំណើរ ដោយរលូននិងស្មោះត្រង់ទេ គឺកំហុសនិងពិសពុល និងបានបន្សល់ទុកនូវបញ្ហារាប់ជំពូកមិនទាន់ដោះស្រាយ ហើយលោក សម រង្ស៊ី ក៏បានលេងបោះថ្ម ក្តៅចំកណ្តាលបក្សប្រឆាំងរួចទៅហើយដែរ ដែលដល់ពេលមួយគឺវានឹងឆេះ៕
ដោយ៖ ជាតិរស់

លោក សុខ ឥសាន៖ គណបក្សផ្អែកលើគោលគំនិត មិនមែនផ្អែកលើបុគ្គលទេ

នៅថ្ងៃទី១៥ ខែកុម្ភៈ ឆ្នាំ២០១៧នេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានធ្វើការបញ្ជាក់ជូនសាធារណជននូវខ្លឹមសារក្រោមចំណងជើងថា «គណបក្សផ្អែកលើគោល​​គំនិត មិនមែនផ្អែកលើបុគ្គលទេ»។
លោក សុខ ឥសាន បានបញ្ជាក់ថា អ្នកណាក៏ដឹងដែរថា គណបក្សសង្គ្រោះជាតិបានដើរតាមនយោបាយដែលកំណត់ដោយបុគ្គល​​ម្នាក់ នោះគឺ សម រង្ស៊ី ដែលជាអតីតប្រធានគណបក្សនេះ។ សម រង្ស៊ី បានដើរតាមនយោបាយគ្មានយុទ្ធសាស្ត្រ យុទ្ធវិធីច្បាស់លាស់ម្តងណាទេ ការពិតគឺនយោបាយផ្អែកតាមគោលគំនិតរបស់ សម រង្ស៊ី ជាប្រធានបក្ស ដែលកើតចេញពីមនោគតិផ្ទាល់ខ្លួនរបស់ សម រង្ស៊ី ដែល​ពោរពេញទៅដោយគំនុំ កំហឹង តាមចងកម្មចងពៀរ។
គេចងចាំមិនភ្លេចទេថា ឪពុក សម រង្ស៊ី ឈ្មោះ សម សារី បានមានទំនាស់ដ៏ស្រួចស្រាវជាមួយ សម្តេចព្រះនរោត្តម សីហនុ បន្ទាប់ពីកម្ពុជាទើបទទួលបានឯករាជ្យឆ្នាំ ១៩៥៣។ ក្រោយបារាំងចាកចេញពីកម្ពុជា សម សារី បានដើរតួសំខាន់ក្នុងការចលនា សម្តេចព្រះនរោត្តម សីហនុ ឱ្យ​ដើរតាមនិន្នាការលំអៀងទៅរកសហរដ្ឋអាមេរិក  តែត្រូវបរាជ័យ។ ហេតុនេះហើយបានជា សម សារី ចងគំនុំជាមួយសម្តេចព្រះនរោត្តម សីហនុ រហូតដល់ប្រើឧបាយកលដាក់គ្រាប់​បែក​​ក្នុង​កញ្ចប់វត្ថុអនុស្សាវរីយ៍ ប៉ុនប៉ងបំផ្ទុះធ្វើគត់ ព្រះមហាក្សត្រីយ៍ កុសុមៈ។ ដល់បែកការណ៍ សម សារី ក៏បានរត់គេចខ្លួនទៅប្រទេសវៀតណាមដូរឈ្មោះជា ង្វៀង យ៉ាំង សាម រហូតដល់ស្លាប់ខ្លួន។
ដូច្នេះ ការធ្វើនយោបាយរបស់ សម រង្ស៊ី គឺក្នុងគំនុំសងសឹក សម្តេចព្រះនរោត្តម សីហនុ ចងគំនុំ​នឹង សម្តេចក្រុមព្រះ និង សម្តេចតេជោ ហ៊ុន សែន ដែលបានដក សម រង្ស៊ី ពីរដ្ឋមន្ត្រីក្រ​សួងសេដ្ឋកិច្ច ហិរញវត្ថុនៅឆ្នាំ ១៩៩៤។ ដូចនេះ ការបង្កើតគណបក្សនយោបាយនិងធ្វើនយោ​បាយរបស់ សម រង្ស៊ី មិនមែនកើតឡើងពីស្មារតីស្នេហាជាតិស្រទ្បាញ់ប្រជាជនស្អីនោះទេ។ ហេតុនេះហើយបានជាគោលនយោបាយរបស់បក្សប្រឆាំង កើតចេញពីចិត្ត និងការនឹកឃើញរបស់ សម រង្ស៊ី តែម្តង។ ហេតុនេះហើយបានជាមន្ត្រីជាន់ខ្ពស់មិនឱ្យតម្លៃ សម រង្ស៊ី ហើយនិយាយថា នយោបាយគណបក្សសង្គ្រោះជាតិមិនផ្អែកលើបុគ្គលទេ។
ដូច្នេះ មិនគួរ សម រង្ស៊ី មានមោទនភាពបុគ្គលខ្លាំងពេកទេ រទេះភ្លើងចេញចោលហើយនៅក្រអឺតក្រទមដល់ណាទៀត?

ក្រសួងការងារ បើកកិច្ចប្រជុំបូកសរុបវឌ្ឍនភាពការងារឆ្នាំ២០១៦ និងលើកទិសដៅការងារឆ្នាំ២០១៧

(ភ្នំពេញ)៖ នៅថ្ងៃទី១៥ ខែកុម្ភៈ ឆ្នាំ២០១៧ លោក អ៊ិត សំហេង រដ្ឋមន្រ្តី ក្រសួងការងារ និងបណ្តុះបណ្តាលវិជ្ជាជីវៈ អញ្ជើញបើកកិច្ចប្រជុំបូកសរុបវឌ្ឍនភាពការងារឆ្នាំ២០១៦ ទិសដៅការងារឆ្នាំ២០១៧ នៃការអនុវត្តផែនការយុទ្ធសាស្រ្ត អភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ២០១៤ ២០១៨ នៅទីស្តីការក្រសួង
នៅក្នុងកិច្ចប្រជុំបូកសរុបលទ្ធផលការងារនេះ គឺរៀបចំឡើងក្នុងគោលបំណងដើម្បីពិនិត្យមើល​​អំពីវឌ្ឍនភាពការងាររយៈពេល ៣ ឆ្នាំ នៃការអនុវត្តផែនការយុទ្ធសាស្រ្តអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ២០១៤-២០១៨ និងបញ្ហាប្រឈមមួយចំនួន ដើម្បីដាក់ចេញនូវទិសដៅសម្រាប់អនុវត្តការងារនៅឆ្នាំបន្ទាប់ សំដៅបង្កើននូវកាលានុវត្តភាពការងារប្រកបដោយប្រសិទ្ធភាព ៕



អាស៊ានបានជំរុញឱ្យមានការត្រួតពិនិត្យដោយប្រុងប្រយ័ត្ននៅខួបទី ៥០ ឆ្នាំ

អតីតរដ្ឋមន្រ្តីការបរទេសបានលើកឡើងថា កិច្ចប្រជុំកំពូលអាស៊ីខាងកើតអាចនឹងច្រើនជាង វេទិកាដែលមានឈ្មោះ «សួស្តី-ជំរាបលា» (hello-goodbye) ដែលអាស៊ានបានបរាជ័យក្នុងការទាញយកប្រយោជន៍ពីសេចក្តីសម្រេចរបស់ទីក្រុងឡាអេ ស្តីពីបញ្ហាសមុទ្រចិនខាងត្បូង។ ការពិភាក្សាមួយនៅទីក្រុងហ្សាការតា បានសន្និដ្ឋានថា នៅក្នុងខួបទី ៥០ ឆ្នាំរបស់ខ្លួននេះ អាស៊ានចាំបាច់ត្រូវត្រួតពិនិត្យដោយប្រុងប្រយ័ត្ននៃយន្តការរបស់ខ្លួន ដើម្បីស្វែងរកវិធីជំនួសក្នុងការគ្រប់គ្រងវិបត្តិក្នុងតំបន់ឱ្យបានល្អប្រសើរ។
អតីតរដ្ឋមន្រ្តីការបរទេសលោក Marty Natalegawa បាននិយាយកាលពីថ្ងៃចន្ទថា ខួបលើកទី ៥០ ឆ្នាំរបស់ប្លុកប្រទេសនេះ គឺជាពេលវេលាល្អមួយសម្រាប់អាស៊ាន «ដើម្បីកំណត់ឱកាស និងបញ្ហាប្រឈម។ យើងគួរតែត្រួតពិនិតយ្យដោយប្រុងប្រយ័ន្ននូវអ្វីដែលយើងមាន»។ លោក Marty និងលោកស្រី Dewi Fortuna Anwar អ្នកជំនាញផ្នែកគោលនយោបាយបរទេស ដែលក៏ជាជំនួយការកិច្ចការផ្នែកនយោបាយរបស់អនុប្រធានាធិបតីនោះបាននិយាយថាលិខិតុបករណ៍ផ្សេងៗរបស់អាស៊ានគួរត្រូវបានផ្តល់អំណាចបន្ថែមទៀត ដើម្បីអនុញ្ញាតឱ្យសមាគម ក្នុងតំបន់នេះប្រឈមមុខនឹងភាពមិនច្បាស់លាស់ជាសកលនាពេលបច្ចុប្បន្ន។
លោក Marty និងលោកស្រី Dewi គឺស្ថិតក្នុងចំណោមវាគ្មិនដែលបានចូលរួមនៅក្នុងកិច្ចពិភាក្សានៅថ្ងៃមួយ ស្តីពី «លទ្ធភាពឈរជាអំណាចកណ្តាលនៅក្នុងស្ថានភាពដែលមានភាពចលាចលនៅក្នុងតំបន់អាស៊ីប៉ាស៊ីហ្វិក» ដែលបានធ្វើឡើងដោយស្ថាប័នផ្តល់យោបល់របស់មជ្ឈ មណ្ឌល Habibie និងស្ថានទូតកាណាដា នៅក្នុងការភ្ជាប់ជាមួយខួបទី ៤០ ឆ្នាំនៃទំនាក់ទំនងរវាងប្រទេសកាណាដា និង អាស៊ាន។ កាលពីឆ្នាំមុន កាណាដាបានតែងតាំងឯកអគ្គរដ្ឋទូតដំបូងរបស់ខ្លួនប្រចាំនៅអាស៊ាន លោក Marie-Louise Hannan ដែលបានបើកវេទិកានេះ។
វាគ្មិនដែលបានទទួលស្គាល់ពីការលំបាកក្នុងការឈានដល់ការមូលមតិគ្នា នៅក្នុងចំណោមសមាជិកអាស៊ាន។ លោក Marty បានប្រាប់កិច្ចពិភាក្សានោះថា «ផ្នែកមួយដែលខ្ញុំបានស្វែងរកនោះ គឺការបង្កើនសមត្ថភាពរបស់អាស៊ានពាក់ព័ន្ធទៅនឹងកិច្ចប្រជុំកំពូលអាស៊ីខាងកើត  ដើម្បីអាចគ្រប់គ្រងសក្តានុពលសម្រាប់វិបត្តិនៅក្នុងតំបន់របស់យើង»។ គាត់បាននិយាយថា កិច្ចប្រជុំកំពូលអាស៊ីខាងកើតនេះ អាចមានផលប៉ះពាល់បន្ថែមទៀត ដោយលើកឡើងពីសារៈសំខាន់នៃការដោះស្រាយបញ្ហាក្នុងតំបន់។
គាត់បាននិយាយថា «តើអាស៊ានអាចធ្វើឱ្យកិច្ចប្រជុំកំពូលអាស៊ីខាងកើតច្រើនជាងវេទិកា សួស្តី និងជំរាបលាដោយរបៀបណា ដោយសារតែរហូតមកដល់ពេលនេះ យើងមានកិច្ចប្រជុំកំពូលប្រចាំឆ្នាំមួយនៅចុងឆ្នាំនេះ ហើយបន្ទាប់មកមានការខ្វះចន្លោះប្រហោងដំណើរការការងារនិងការខ្វះចន្លោះប្រហោងដែលពាក់ព័ន្ធ អំឡុងពេល ៩ ខែដំបូង។ ហើយបន្ទាប់មកយើងបានចូលកាន់តំណែង ដែលបានស្វាគមន៍ ហើយបន្ទាប់មកបាននិយាយជំរាបលាទៅវិញ»។ ដើម្បីឆ្លើយតបទៅនឹងការលើកឡើងថា អាស៊ានអាចស្ថិតក្នុងចំណោម «មហាអំណាចពាក់កណ្តាល» នៅក្នុងការប្រឈមមុខនឹងមហាអំណាចពិភពលោក ដូចជាអាមេរិក និងចិន លោកស្រី Dewi បាននិយាយថា អាស៊ានតែងតែបានបង្ហាញពីឥរិយាបថអំណាចពាក់កណ្តាលនៅក្នុងតម្រូវការរបស់ខ្លួនសម្រាប់​ការរស់រានមានជីវិត។ លោកស្រីបាននិយាយថា អាស៊ានតែងតែរៀបចំគិតទុកជាមុន «ដោយការធានាឱ្យមានឱកាសសម្រាប់រស់នៅ និងយុទ្ធសាស្រ្តស្វ័យភាព ចាប់តាំងពីសង្គ្រាមត្រជាក់មក។
លោក Paul Evans សាស្ត្រាចារ្យនៅវិទ្យាស្ថានស្រាវជ្រាវអាស៊ី និងវិទ្យាស្ថាន Lui សម្រាប់បញ្ហាសកលនៅសាកលវិទ្យាល័យ British Columbia ដែលបានជំរុញឱ្យបណ្តាប្រទេសក្នុងតំបន់អាស៊ានដើម្បីរក្សាបាននូវមជ្ឈភាពរបស់អាស៊ាន ចំពេលដែលគាត់និយាយថា គឺជារយៈពេលនៃភាពចលាចលនៅទូទាំងពិភពលោក បន្ទាប់ពីការបោះឆ្នោតរបស់ប្រធានាធិបតីអាមេរិក លោក Donald Trump និងភាពមិនប្រាកដប្រជាកើតចេញពីការដឹកនាំរបស់ចិនផងដែរ។ ប្រធានាធិបតីចិនលោក Xi Jinping បានសាទរចំពោះគុណសម្បត្តិនៃសកលភាវូបនីយកម្មនៅក្នុងសុន្ទរកថាមួយកាលពីខែមុននៅក្នុងទីក្រុង Davos ប្រទេសស្វ៊ីស ដែលត្រូវបានគេមើលឃើញជាទូលំទូលាយថា ជាការផ្ទុយគ្នាទៅនឹងទស្សនៈនៃអ្នកការគាំពារនិយមរបស់ប្រធានាធិបតីអាមេរិកថ្មី។
នៅចំពោះមុខ «ដំរី ខ្លា ខ្លាឃ្មុំ និងត្រីឆ្លាម» លោក Evans បាននិយាយថា បណ្តាប្រទេសជាច្រើនបានប្រឈមមុខនឹងភាពមិនច្បាស់លាស់នៅពេលនេះ ឧទាហរណ៍កិច្ចព្រមព្រៀងពាណិជ្ជកម្មក្នុងអវត្ដមានរបស់សហរដ្ឋអាមេរិក។ វាគ្មិនបាននិយាយថា អាស៊ាននៅក្នុងប៉ុន្មានឆ្នាំចុងក្រោយនេះ បានបរាជ័យដើម្បីទំលាយភាពទាល់ច្រកណាមួយនៅក្នុងការប្រឈមមុខទៅនឹងបញ្ហាប្រឈមក្នុងតំបន់ និងពិភពលោក៕
(ប្រភព : The Jakarta Post ចុះថ្ងៃទី១៤ ខែកុម្ភៈ ឆ្នាំ២០១៧)

លោក វង សូត៖ ធ្វើសន្និបាតបូកសរុបលទ្ធផលការងារឆ្នាំ២០១៦ និងលើកទិសដៅអនុវត្តការងារឆ្នាំ២០១៧

ភ្នំពេញ៖ លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងឱ្យដឹងថា ក្នុងឆ្នាំ២០១៦ កន្លងមកនេះ យុទ្ធសាស្រ្ត៣យ៉ាង កម្មវិធីការងារអាទិភាព៨ចំណុច ត្រូវបានជំរុញ និងអនុវត្ត ហើយទទួលបានផ្លែផ្កា ក្នុងនោះរួមមានទី១ សេវាសុខុមាលភាពសង្គមសម្រាប់ជនក្រីក្រងាយរងគ្រោះ កុមារ មនុស្សចាស់ អតីតមន្រ្តីរាជការស៊ីវិល និងអតីតយុទ្ធជន, ទី២ វិស័យសុខុមាលភាពកុមារ, ទី៣ វិស័យសុខុមាលភាពជនពិការ, ទី៤ វិស័យសុខុមាលភាពមនុស្សចាស់, ទី៥ របបសន្តិសុខសង្គមសម្រាប់មន្រ្តីរាជការស៊ីវិល, ទី៦ វិស័យអតីតយុទ្ធជន, ទី៧ ក្រសួងបានលើកទឹកចិត្ត និងបង្កើនកិច្ចសហប្រតិបត្តិការជាមួយអង្គការមិនមែនរាជរដ្ឋាភិបាលជាតិ និងអន្តរជាតិ, និងទី៨ ពង្រឹងអភិបាលកិច្ច តាមរយៈការជ្រើសរើសមន្រ្តីក្របខណ្ឌថ្មី។
រដ្ឋមន្រ្តី វង សូត បានថ្លែងបែបនេះ ខណៈលោកចូលរួមប្រកាសបើក សន្និបាតបូកសរុបលទ្ធផលការងាររយៈពេល ១ឆ្នាំ​ និង ទិសដៅអនុវត្តបន្ត របស់ក្រសួងសង្គមកិច្ច អតីតយុទ្ធជន និងយុវនីតិសម្បទា ដែលរៀបចំធ្វើនៅថ្ងៃទី១៥ ខែកុម្ភៈ ឆ្នាំ២០១៧ នៅទីស្តីការក្រសួងដោយមានមន្រ្តីរាជការ និងភាគីពាក់ព័ន្ធប្រមាណ៤០០នាក់។
បន្ថែមពីលើនេះ លោក វង សូត បានបន្ថែមទៀតថា យោងតាមសមិទ្ធផលសំខាន់ៗខាងលើនេះ លោកក៏បានជំរុញឱ្យមន្រ្តីគ្រប់ ផ្នែកទាំងអស់រួមគ្នា​ខិតខំធ្វើការរកដំណោះស្រាយដូចជា ការប្រែប្រួលអាកាសធាតុ ការផ្ទុះចេញ ជាជំងឺឆ្លងប្លែកៗ បញ្ហាចំណាកស្រុក បញ្ហាជនអនាថា ការជួញដូរមនុស្ស ជួញដូរពលកម្ម ការកេងប្រវ័ញ្ចផ្លូវភេទ ការប្រើប្រាស់គ្រឿងញៀន និងការបម្រែបម្រួលផ្នែកប្រជាសាស្រ្ត។
ក្រៅពីនោះ លោក រដ្ឋមន្រ្តី ស្នើឱ្យភាគីពាក់ព័ន្ធពង្រឹងពង្រីកសេវាសុខុមាលភាពសង្គមសម្រាប់ជនក្រីក្រ, បន្តពង្រឹងពង្រីកសេវាសុខុមាលភាពកុមារ,បន្តជំរុញការងារយុវនីតិសម្បទា និងកម្មវិធីយុត្តិធម៌អនីតិជន, បន្តពង្រឹងពង្រីកសេវាសុខុមាលភាពជនពិការ និងស្តារលទ្ធភាពពលកម្ម, បន្តពង្រឹង និងពង្រីកវិស័យសុខុមាលភាពមនុស្សចាស់, បន្តអនុវត្តរបបសន្តិសុខសង្គមសម្រាប់មន្រ្តីរាជការស៊ីវិល,បន្តពង្រឹង និងពង្រីកវិស័យអតីតយុទ្ធជន, បន្តពង្រឹងភាពជាដៃគូជាមួយអង្គការមិនមែនរាជរដ្ឋាភិបាល និងអន្តរជាតិ និងបន្តពង្រឹង និងពង្រីកដំណើរការវិទ្យាសា្ថនជាតិសង្គមកិច្ចជាដើម។
រដ្ឋមន្រ្តី វង សូត រំពឹងទុកថា សន្និបាតបូកសរុបលទ្ធផលការងារឆ្នាំ២០១៦ និងលើកទិសដៅអនុវត្តការងារឆ្នាំ២០១៧នេះនិងលើកយកបញ្ហាប្រឈមនានា ដើម្បីរួមគ្នាដោះស្រាយឱ្យបានទាន់ពេលវេលាប្រកបដោយប្រសិទ្ធភាព។លោកបានថ្លែងបន្តថា វិស័យសង្គមកិច្ច អតីតយុទ្ធជន និយយុវនីតិសម្បទា ទទួលបានសមិទ្ធផលថ្មីៗជាច្រើន ក្នុងនោះរួមមានការអនុវត្តគោលនយោបាយ កម្មវិធីចាតិពាក់ព័ន្ធ វិស័យសង្គមកិច្ច សំដៅដល់ការបង្កើតនូវសេវាសាធារណ ដើម្បីជួយជនរងគ្រោះ និងក្រុមងាយរងគ្រោះ ក្នុងសង្គម បង្កើតរបបសន្តិសុខសង្គមសម្រាប់អតីត មន្រ្តីរាជការស៊ីវិល អតីតយុទ្ធជន និងការជួយសង្រ្គោះសង្គមដល់ប្រជាពលរដ្ឋ៕



លោកស្រី ឃួន សុដារី គំាទ្របេក្ខភាពជាស្រ្តី ឈរឈ្មោះបោះឆ្នោតក្រុមប្រឹក្សាឃុំសង្កាត់ខាងមុខឲ្យបានច្រើន

កាលពីថ្ងៃទី១៤ ខែកុម្ភៈ ឆ្នាំ២០១៧នេះ រៀបចំឡើងដោយអគ្គលេខាធិការដ្ឋានសមាគមក្រុមប្រឹក្សាថ្នាក់ក្រោមជាតិ ដែលប្រារព្ធធ្វើនៅ សណ្ឋាគារឡឺរ៉ូយ៉ាល់។
លោក សយ កុសល ប្រធានសម្ព័ន្ធភាពជាតិក្រុមប្រឹក្សាមូលដ្ឋានបានមានប្រសាសន៍គំាទ្រចំពោះការលើកឡើង របស់ លោកស្រី ឃួន សុដារី។
លោកក៏បានគូសបញ្ជាក់ថា ការលើកកម្ពស់សមភាពយេនឌ័រនៅក្នុងសង្គម និងការផ្តល់សិទ្ធិអំណាចដល់ស្រ្តី ក្នុងការឈរឈ្មោះបោះឆ្នោតក្រុមប្រឹក្សា ឃុំ សង្កាត់អាណត្តិទី៤ ឆ្នាំ២០១៧នេះ មានសារៈសំខាន់ណាស់ ក្នុងការអភិវឌ្ឍប្រទេសជាតិ។
លោកប្រធានសម្ព័ន្ធភាពជាតិក្រុមប្រឹក្សាមូលដ្ឋាន បានលើកឡើងថា សមាជិកក្រុមប្រឹក្សាឃុំ សង្កាត់ គឺជាថ្នាក់ដឹកនាំនៅមូលដ្ឋាន នៅជិតនឹងពលរដ្ឋបំផុត ហើយបើថ្នាក់ដឹកនាំឃុំ សង្កាត់ ជាស្រ្តីនោះ ពួកគាត់នឹងមានភាពស្និទ្ធស្នាលជាមួយប្រជាពលរដ្ឋជាងមេឃុំ ឬចៅសង្កាត់ជាបុរស។ ដូច្នេះការ ចូលរួមកសាងអភិវឌ្ឍន៍មូលដ្ឋាន របស់ស្រ្តីនឹងមានប្រសិទ្ធភាពខ្លំាង។
ជាមួយក្តីរំពឹងថា គ្រប់គណបក្សនយោបាយ ដែលចូលរួមការបោះឆ្នោតក្រុមប្រឹក្សាឃុំ សង្កាត់ នឹងផ្តល់ឱកាសដល់ស្រ្តី ធ្វើជាអ្នកដឹកនាំ នៅថ្នាក់មូលដ្ឋាន លោកស្រី ឃួន សុដារី ក៏បានថ្លែងអំណរគុណចំពោះដៃគូអភិឌ្ឍន៍នានា មានកម្មវិធីអភិវឌ្ឍន៍របស់អង្គការសហប្រជាជាតិUNDP សហភាពអឺរ៉ុបEU និងACES សហព័ន្ធនៃទីក្រុងកាណាដាជាដើម ដែលបានជួយឧបត្ថម្ភគាំទ្រ ដល់កិច្ចប្រជុំពេលនេះ ដើម្បីឲ្យមានការផ្លាស់ប្តូរ ទស្សនៈយោបល់គ្នា រវាងអ្នកពាក់ព័ន្ធទាំងអស់ ក្នុងការជំរុញសមភាពយេនឌ័រ នៅថ្នាក់មូលដ្ឋាននេះ។
សូមជម្រាបថា ប្រទេសកម្ពុជានឹងរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ នាដើមខែមិថុនា ឆ្នាំ២០១៧ ខាងមុខនេះ៕



រដ្ឋសភានឹងបើកប្រជុំពិភាក្សា អនុម័តលើវិសោធនកម្មច្បាប់ស្តីពីគណបក្សនយោបាយនៅថ្ងៃទី២០កុម្ភៈ

ភ្នំពេញ៖ លោក ឈាង វុន សមាជិកគណៈកម្មាធិការអចិន្រ្តៃយ៍ នៃរដ្ឋសភា បានអះអាងថា រដ្ឋសភា នឹងបើកកិច្ចប្រជុំពេញ​អង្គវិសាមញ្ញមួយ នៅថ្ងៃទី២០ ខែកុម្ភៈ ឆ្នាំ២០១៧ ខាងមុខនេះ ដើម្បីអនុម័ត លើសេចក្តីស្នើវិសោធកម្មច្បាប់ ស្តីពី​គណបក្សនយោបាយ។
ការសម្រេចនេះ បានធ្វើឡើងបន្ទាប់ពី គណៈកម្មាធិការអចិន្រ្តៃយ៍ នៃរដ្ឋសភា បានបើកកិច្ចប្រជុំមួយទៀត នៅព្រឹកថ្ងៃទី១៥ ខែកុម្ភៈ ឆ្នាំ២០១៧នេះ ដោយពិភាក្សាអំពីរបៀបវារៈខាងលើ។ កិច្ចប្រជុំនេះ ធ្វើឡើងក្រោមអធិបតីភាពលោក  ហេង សំរិន ប្រធានរដ្ឋសភា ដោយមានការចូលរួមពីតំណាងគណៈកម្មការមកពីគណបក្សសង្រ្គោះជាតិផងដែរ។
សំណើសុំធ្វើវិសោធនកម្ម លើច្បាប់ស្តីពីគណបក្សនយោបាយ ដែលរៀបចំដោយក្រុមតំណាងរាស្រ្តគណបក្ស ប្រជាជនកម្ពុជាចំនួន៦០រូប បានចូលមកដល់រដ្ឋសភា កាលពីថ្ងៃទី១០ ខែកុម្ភៈ ឆ្នាំ២០១៧។ ការរៀបចំសំណើសុំធ្វើវិសោធនកម្មច្បាប់នេះ បានធ្វើបន្ទាប់ពីមានការលើកឡើងដោយលោក ហ៊ុន សែន នាយករដ្ឋមន្រ្តីនៃកម្ពុជា នៅក្នុងកិច្ចប្រជុំសភាវិសាមញ្ញ កាលពីថ្ងៃទី៣១ ខែមករា ឆ្នាំ២០១៧។
លោកនាយករដ្ឋមន្រ្ដី ហ៊ុន សែន បានស្នើឱ្យកំណត់លក្ខខណ្ឌតឹងរឹងជាងមុន សម្រាប់ច្បាប់ស្តីពីគណបក្សនយោបាយក្នុង នោះច្បាប់ថ្មីនេះនិងមិនអនុញ្ញាតឱ្យអ្នកមានទោស ឬជាទណ្ឌិត ធ្វើជាប្រធាន ឬ អនុប្រធានបក្សនយោបាយឡើយ ហើយបើទោសធ្ងន់ធ្ងរទៀតនោះ អាចឈានដល់ការរំលាយបក្ស និងហាមឃាត់ថ្នាក់ដឹកនាំបក្សមិនឱ្យ ធ្វើសកម្មភាពនយោបាយថែមទៀត៕


សកម្មជនបក្សប្រឆាំង គ្រោងលើកគ្នាតវ៉ាអំពីការដាក់បេក្ខភាពឈរឈ្មោះបោះឆ្នោតក្រុមប្រឹក្សា ឃុំសង្កាត់ដោយមិនស្មើភាព

ក្នុងពេលថ្មីៗនេះ សមាជិកគណបក្សសង្គ្រោះជាតិ នៅតាមបណ្តាខណ្ឌមួយចំនួន ក្នុងរាជធានីភ្នំពេញ គ្រោងនឹងនាំគ្នាឡើងមកតវ៉ានៅទីស្នាក់ការកណ្តាលគណបក្សសង្គ្រោះជាតិ នៅចាក់អង្រែ ដើម្បីឱ្យថ្នាក់ដឹកនាំគណបក្សធ្វើការដោះសា្រយអំពីការដាក់បេក្ខភាពសមាជិកក្រុមប្រឹ​ក្សា​ឃុំសង្កាត់ មានភាពលំអៀង គឺសមាជិកកូតាខាងគណបក្ស សម រង្ស៊ី បានឈរលេខរៀង​ល្អ រីឯសមាជិកកូតាខាងគណបក្សសិទ្ធិមនុស្សមិនបានឈរលេខរៀងល្អនោះទេ។
ការតវ៉ារឿងឈរលេខរៀងបេក្ខជនក្រុមប្រឹក្សាឃុំ សង្កាត់ របស់សមាជិកគណបក្សសង្គ្រោះជាតិ បានកើតមានជាបន្តបន្ទាប់នៅតាមបណ្តាខេត្តមួយចំនួនដូចជា នៅខេត្តបាត់ដំបង ខេត្តបន្ទាយមានជ័យ ខេត្តកំពង់ចាម និងខេត្តត្បូងឃ្មុំ រួមទាំងខេត្តមួយចំនួនទៀត និងរាជធានីភ្នំពេញ។
ដោយសារតែខ្លាចការតវ៉ារបស់សមាជិកគណបក្សសិទ្ធិមនុស្ស តវ៉ាអំពីលេខរៀងបេក្ខភាពក្រុមប្រឹក្សាឃុំ សង្កាត់ គឺខាងមន្ត្រីគណបក្សសង្គ្រោះជាតិ បានធ្វើការសម្របសម្រួល និងសន្យាដោះស្រាយឱ្យពួកគាត់ និងបានហាមមិនឱ្យតវ៉ានោះទេ គឺទុកលទ្ធភាពឱ្យថ្នាកដឹកនាំធ្វើការដោះស្រាយអំពីបញ្ហានេះ។ សមាជិកគណបក្សសិទ្ធិមនុស្ស បានប្រាប់ឱ្យដឹងថា ចំពោះការគ្រោង​តវ៉ានេះ គឺខាងគណបក្សសម រង្ស៊ី បានប្រាប់កុំឱ្យបញ្ចេញព័ត៌មាននេះទៅក្រៅពីព្រោះខ្លាច​​ប្រជាពលរដ្ឋដឹង និងកុំឱ្យគណបក្សនយោបាយផ្សេងដឹង។
សូមជម្រាបថា នាពេលកន្លងមកនេះ ការឈរបេក្ខភាពក្រុមបឹក្សាឃុំ សង្កាត់ របស់គណបក្សសង្គ្រោះជាតិ នៅតាមបណ្តារាជធានី ខេត្តមួយចំនួន គឺបានតម្រូវឱ្យសមាជិកបង់លុយជាថ្នូរបានឈរលេខរៀងល្អ៕

លោកនាយករដ្ឋមន្រ្តី ហ៊ុន សែន អំពាវនាវដល់វិនិយោគិនបរទេស ពិចារណាចំពោះការវិនិយោគនៅកម្ពុជា

(ភ្នំពេញ)៖ ប្រមុខរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន សែន បានថ្លែងថា លោកសូម ស្វាគមន៍ដល់វិនិយោគិនបរទេសទាំងអស់ ឱ្យពិចារណាចំពោះការវិនិយោគនៅកម្ពុជា។ លោក បានថ្លែងដូចនេះ នៅថ្ងៃទី១៥ ខែកុម្ភៈ ឆ្នាំ២០១៧នេះ ក្នុងឱកាសអញ្ជើញបើកកិច្ចប្រជុំកំពូលពាណិជ្ជកម្មអន្តរជាតិកម្ពុជា ឆ្នាំ២០១៧ (2017 Cambodian International Business Summit) នៅសណ្ឋាគារ Inter Continental Hotel រាជធានីភ្នំពេញ។
លោកនាយករដ្ឋមន្រ្តី ហ៊ុន សែន បានថ្លែងថា ដើម្បីធានាដល់ការវិនិយោគនៅកម្ពុជា រាជ​រដ្ឋាភិបាលកម្ពុជា ប្តេជ្ញាពង្រឹងកិច្ចសហប្រតិបត្តិការ​សេដ្ឋ​កិច្ច​បើកទូលាយគ្រប់តំបន់ និង​ពិភព​លោក ដោយបង្កលក្ខណៈងាយស្រួលក្នុងការវិនិយោគឱ្យល្អប្រសើរ បង្កើត​បរិស្ថាន​អនុ​គ្រោះ​គ្រប់បែបយ៉ាង ថែរក្សាស្ថេរភាពម៉ាក្រូសេដ្ឋកិច្ច និងថែរក្សា សន្តិសុខ ស្ថេរភាពនយោបាយ។

ប្រមុខរាជរដ្ឋាភិបាលកម្ពុជា ក៏បានបង្ហាញជំហរច្បាស់លាស់ ក្នុងការលើកកម្ពស់កិច្ចសហប្រតិ​បត្តិការណ៍ទាំងទ្វេរភាគី និងពហុភាគី និងកម្ពុជា ខិតខំការពារខ្លួនឱ្យក្លាយជា​តំបន់មាន​សុវត្ថិ​ភាព ដើម្បីជួយសម្រួលដល់ការវិនិយោគពីបរទសនានា។ លោកនាយករដ្ឋមន្រ្តី ហ៊ុន សែន ក៏បានថ្លែងថា រាជរដ្ឋាភិបាល នឹងខិតខំឱ្យអស់លទ្ធភាពសម្រួលគ្រប់បែបយ៉ាងដល់ការ វិនិ​យោគដូចជា៖ ១- ការបញ្ចុះតម្លៃអគ្គីសនីនៅក្នុងតំបន់ឧស្សាហកម្ម ២-រៀបចំផែនការមេ ក្នុង ការ​​ដឹកនាំការងារ និងប្រព័ន្ធដឹកជញ្ជូន ៣-ពង្រឹងយន្តការគ្រប់គ្រងទីផ្សារពលកម្ម និង៤-អភិវឌ្ឍន៍​​ខេត្តព្រះសីហនុ ឱ្យក្លាយទៅជាខេត្តគំរូ ក្លាយជាតំបន់សេដ្ឋកិច្ចពិសេស៕








លោក សុខ ឥសាន៖ សម រង្ស៊ី ចង់បានការផ្លាស់ប្តូរក្រោយការបោះឆ្នោត តែពេលនេះមានការផ្លាស់ប្តូរមុនការបោះឆ្នោតទៅវិញ

នៅថ្ងៃទី១៤​ ខែកុម្ភៈ ឆ្នាំ២០១៧នេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា​ បានបញ្ជាក់ ជូនសាធារណជនឱ្យបានដឹង ពីវប្បធម៌និយាយមិនពិត និយាយផ្ទុយរបស់មេបក្សសង្រ្គោះជាតិ សម រង្ស៊ី។
លោក សុខ ឥសាន បានថ្លែងថា សម រង្ស៊ី ជាអតីតប្រធានគណបក្សប្រឆាំង ក្នុងតួនាទីជាបក្សប្រឆាំង សម រង្ស៊ី ក៏ដូចជាសមា​ជិក សមាជិការបស់គាត់ តែងតែប្រើប្រាស់វប្បធម៌និយាយពាក្យផ្ទុយពីការពិត បើការពិត«ស» ពួកគាត់និយាយថា «ខ្មៅ»  ប្រទេសជាតិមានការរីកចំរើនមានការអភិវឌ្ឍ ពួកគាត់និយាយថា អន់ថយ ឬខ្ទេចខ្ទីគ្មានការរីកចំរើនទៅវិញ។
អ្នកនាំពាក្យរូបនោះ បានបញ្ជាក់បន្ថែមថា ឥទ្បូវ សម រង្ស៊ី និយាយថា ចង់ឱ្យមានការផ្លាស់ប្តូរក្រោយការបោះឆ្នោត។  ក្នុងការជាក់ស្តែង ក្នុង​គណបក្សសង្គ្រោះជាតិ ស្រាប់តែមានការផ្លាស់ប្តូរមុនការបោះឆ្នោតទៅវិញ គឺ សម រង្ស៊ីបានផ្លាស់ប្តូរខ្លួនឯងកាលពីថ្ងៃទី១១ ខែកុម្ភៈ ២០១៧ នេះ ដោយលាលែងពីតួនាទីជាប្រធានគណបក្ស និងពីសមាជិកគណបក្សទៀតផង។ នេះបញ្ជាក់យ៉ាងច្បាស់នូវចរិតប្រើពាក្យផ្ទុយ។ ​ឥទ្បូវប្រសិទ្ធភាពនៃវប្បធម៌ផ្ទុយ គឺមានប្រសិទ្ធភាពមែន។
លោក សុខ ឥសាន ក៏បានបញ្ចាក់ថា តាំងពីចាប់ធ្វើនយោបាយមក សម រង្ស៊ី និយាយពីជ័យជំនះជារៀងរហូត ទោះបីបានចាញ់ឆ្នោតនៅគ្រប់ពេលបោះឆ្នោតក្តី បានជ័យជំនះតាំងពីនៅក្នុងស្រុក រហូតរត់ទៅនៅក្រៅប្រ​ទេស តាំងពីនៅមានតួនាទីជាប្រធានបក្ស ឈ្នះរហូតដល់អស់តួនាទី នៅតែឈ្នះដដែលមិនដែលចាញ់។ អស់តួនាទីជាប្រធានបក្ស និងជាសមាជិកម្នាក់ ក៏នៅតែឈ្នះ ឈ្នះត្រង់បានលះបង់តួនាទីដើម្បីរក្សាគណបក្សឱ្យនៅគង់វង្ស។ ប៉ុន្តែផ្ទុយពីពាក្យមួយឃ្លា របស់កញ្ញាម្នាក់ក្នុងក្បាលម៉ាស៊ីនគណបក្សថា សម រង្ស៊ី អស់មានតម្លៃសម្រាប់គណបក្សទៀតហើយ។ តើពាក្យនេះ មាន័យថា ជ័យជំនះ ឬបរាជ័យ ? សូមពិចារណាចុះ!

ធនាគារជាតិនៃកម្ពុជា បញ្ជាក់ថាគ្រឹះស្ថានធនាគារ និងហិរញ្ញវត្ថុ ពុំមែនជារបស់រដ្ឋឡើយ

(ភ្នំពេញ)៖ នៅថ្ងៃទី១៤​ ខែកុម្ភៈ ឆ្នាំ២០១៧នេះ ធនាគារជាតិនៃកម្ពុជា បានចេញសេចក្តីប្រ​កាស​ព័ត៌មានស្តីពីការបញ្ជាក់អត្តសញ្ញាណរបស់គ្រឹះស្ថាន​ធនាគារ និងហិរញ្ញវត្ថុថាជាគ្រឹះ​ស្ថាន​ឯកជន ពុំមែនជារបស់រដ្ឋឡើយ។
សេចក្តីប្រកាសព័ត៌មាន បានបញ្ជាក់ថា កន្លងមកធនាគារជាតិនៃកម្ពុជា បានសង្កេតឃើញថា មានជនខិលខូចមួយចំនួន បានឃោសនាបោកបញ្ឆោតសាធារណជនថា គ្រឹះស្ថានធនាគារ និងហិរញ្ញវត្ថុជារបស់រដ្ឋ ហើយបើសិនជាខ្ចីមិនចាំបាច់សងបំណុលក៏បានដែរ។ ការឃោសនា នេះ បានធ្វើឱ្យសាធារណជនមួយចំនួនយល់ច្រឡំ ដែលអាចបង្កផលប៉ះពាល់ដល់ការអភិវឌ្ឍ វិស័យមីក្រូហិរញ្ញវត្ថុ ដែលកំពុងដើរតួនាទីយ៉ាងសំខាន់ក្នុងការលើកស្ទួយជីវភាពរស់នៅ និងកាត់បន្ថយភាពក្រីក្ររបស់ប្រជាជននៅតាមជនបទ។
ធនាគារជាតិនៃកម្ពុជា ក៏បានបញ្ជាក់ជាថ្មីថា គ្រឹះស្ថានធនាគារ និងហិរញ្ញវត្ថុទាំងអស់ជាគ្រឹះ​ស្ថាន​ឯកជនដែលតម្រូវឱ្យអតិថិជនទាំងអស់ គោរពតាមវប្បធម៌ឥណទានគឺខ្ចីហើយត្រូវសង ត្រឡប់មកវិញតាមលក្ខខណ្ឌដែលបានចែង។
សូមអានសេចក្តីប្រកាសព័ត៌មានរបស់ធនាគារជាតិនៃកម្ពុជាខាងក្រោម៖

ហ្វេសប៊ុក Boulam San៖ អ្នកស្រឡាញ់ជាតិ មិនមែនតាំងខ្លួនជាអ្នកប្រឆាំងផ្កាប់មុខនោះទេ!

(ភ្នំពេញ)៖ នៅថ្ងៃទី១៤ ខែកុម្ភៈ ឆ្នាំ២០១៧នេះ ទំព័រហ្វេសប៊ុកឈ្មោះ Boulam San បានបង្ហោះសារបញ្ចេញ​មតិផ្ទាល់ខ្លួនចំពោះអ្នកវិភាគមួយចំនួនដូចជា លោក ជុន ច័ន្រ្ទបុត្រ និងលោក គឹម សុខ ជាដើម ដែលតែងតែវិភាគបែបលំអៀងទៅបក្សប្រឆាំង វិភាគមិនគ្រប់ជ្រុងជ្រោយដោយ​ផ្អែកលើការពិត និងវិភាគដូចត្រីកំភ្លាញ។

ហ្វេសប៊ុក Boulam San បានលើកឡើងថា អ្នកស្រឡាញ់ជាតិមិនត្រូវតាំងខ្លួនជាអ្នកប្រឆាំងផ្កាប់មុខបែបនេះទេ។ អ្នកដឹងទេថា អ្នកកំពុងបង្កើតវប្បធម៌និយាយស្តីមិនទទួលខុសត្រូវ និ​យាយប៉ាតណាប៉ាតណី ចោទប្រកាន់គេគ្មានភ័ស្តុតាង ប្រមាថគេ ជាសត្វធាតុ និយាយដើម្បីផ្គាប់ចិត្តពួកប្រឆាំង ចង់បានរហ័សនាមថា ជាអ្នកក្លាហាន! បែបនេះឬជាអ្នកស្នេហាជាតិ?

ហ្វេសប៊ុក Boulam San បានបន្ថែមថា ពួកអ្នកវិភាគទាំងនោះ តែងចោទថាសុទ្ធតែគេធ្វើខុសឆន្ទៈរាស្ត្រ តើមានតែក្រុមលោកទេទើបហៅថារាស្ត្រ? ចុះគេជាបក្សឈ្នះឆ្នោតដឹកនាំប្រទេស មានអ្នកគាំទ្រភាគច្រើនហ្នឹងមិនមែនរាស្ត្រទេឬ? សូមកុំប្រមាថទឹកចិត្តអ្នកគាំទ្របក្សប្រជាជន! ឃើញពួកយើងនៅស្ងៀមៗ ហើយក្រុមរបស់ខ្លួនលោតកញ្ឆេង នឹកស្មានថា មានតែខ្លួនទេឡើងចាង។ យល់ច្រឡំធំហើយលោកអ្នកវិភាគ។ លោកវិភាគមើលឃើញតែមួយចំអាមជុំវិញខ្លួន ឃើញតែគ្នាឯងដូចត្រីកំភ្លាញ តែឃើញត្រពាំងគេស្ងប់ស្ងាត់ស្មានថាអត់ត្រីឬ? ច្រឡំធំហើយ!៕


គណៈកម្មាធិការជាតិគ្រប់គ្រងគ្រោះមហន្ដរាយ៖ ខ្យល់ព្យុះកន្ទ្រាក់ និងរន្ទះបាញ់ បានសម្លាប់មនុស្ស និងបំផ្លាញទ្រព្យសម្បត្តិ គួរឱ្យព្រួយបារម្ភ

នៅព្រឹកថ្ងៃទី ១៤ កុម្ភៈ ឆ្នាំ២០១៧ គណៈកម្មាធិការជាតិ គ្រប់គ្រងគ្រោះមហន្ដរាយ បានលើកឡើងថា ក្នុងឆ្នាំ២០១៦ មានបញ្ហាគ្រោះធម្មជាតិជាច្រើន បានកើតឡើង នៅក្នុងប្រទេសកម្ពុជា និងនៅលើពិភពលោក ក្នុងនោះមានដូចជា បញ្ហាកង្វះទឹកប្រើប្រាស់ គ្រោះទឹកជំនន់ រំជួយដី ខ្យល់ព្យុះកន្ទ្រាក់ រន្ទះបាញ់ និងគ្រោះធម្មជាតិជាច្រើនទៀត ដែលធ្វើឱ្យប៉ះពាល់ដល់ការរស់នៅ ខូចខាតផ្ទះសម្បែង ទ្រព្យសម្បត្តិ និងបាត់បង់អាយុជីវិត មនុស្ស សត្វ ជាបន្តបន្ទាប់។
ក្នុងកិច្ចប្រជុំបូកសរុបរបាយការណ៍ ស្ដីពីការគ្រប់គ្រងគ្រោះមហន្ដរាយ ឆ្នាំ២០១៦ និងលើកទិសដៅ ឆ្នាំ២០១៧ នៅសណ្ឋាគាកាំបូឌីយ៉ាណា ក្នុងរាជាធានីភ្នំពេញ លោកបណ្ឌិត ញឹម វណ្ណដា ទេសរដ្ឋមន្រ្ដីទទួលបន្ទុក អនុប្រធានប្រចាំការ និងជាប្រធានគណៈកម្មាធិការជាតិគ្រប់គ្រងគ្រោះមហន្ដរាយ បានមានប្រសាសន៍ថា គ្រោះធម្មជាតិដែលបង្កឡើង ដោយការប្រែប្រួលអាកាសធាតុកាន់តែមានលក្ខណៈធ្ងន់ធ្ងរ និងកើនឡើងពីមួយឆ្នាំទៅមួយឆ្នាំ ជាពិសេសតំបន់អាស៊ីប៉ាស៊ីហ្វិក។
លោកទេសរដ្ឋមន្រ្ដីបានបញ្ជាក់ថា ក្នុងឆ្នាំ២០១៦ ខេត្ដចំនួន២០ ប្រឈមការខ្វះខាតទឹក ដែលតម្រូវឱ្យមានការចូលរួមឆ្លើយតបសង្គ្រោះបន្ទាន់ និងខេត្ដចំនួន៥ មានស្ថានភាពធ្ងន់ធ្ងរជាងគេដូចជា ខេត្តបន្ទាយមានជ័យ បាត់ដំបង សៀមរាប ឧត្ដរមានជ័យ និងស្វាយរៀង។ ក្រៅពីនោះ ទិដ្ឋភាពជារួមមួយ បានកើតស្ទើតែពេញផ្ទៃប្រទេស គឺបញ្ហាខ្យល់ព្យុះកន្ទ្រាក់ និង រន្ទះបាញ់ បានបង្ករឱ្យមានមនុស្ស សត្វ ស្លាប់ និងរហួសជាហូរហែគួរឱ្យព្រួយបារម្ភ។
លោកទេសរដ្ឋមន្រ្តីបន្ដទៀតថា ដោយសារបញ្ហាខាងលើនេះ មានបណ្តាខេត្តនៅជុំវិញ បឹងទន្លេសាប បានទទួលរងផលប៉ះពាល់ និងខូចខាតទ្រព្យសម្បត្តិ រួមទាំងអាយុជីវិត ដោយសារឥទ្ធិពលសម្ពាធទាប បង្ករឱ្យមានជាខ្យល់កន្ទ្រាក់ ជាក់ស្តែង នៅឆ្នាំ២០១៦ បានកើតមានចំនួន២៧៩លើក ធ្វើឱ្យរលំផ្ទះ ខូចខាតធ្ងន់ធ្ងរចំនួន ១៩៩៧ខ្នង ខូចខាតំធ្យម ៨,១៤៧ខ្នង សាលារៀន៤១អគារ បាក់ដើមកៅស៊ូជាង ៤០០ហិកតា និងមានមនុស្ស ស្លាប់២១នាក់ ដោយសាររលំផ្ទះ និងបាក់ដើមឈើសង្កត់ ។
ចំណែកឯគ្រោះថ្នាក់ដោយសាររន្ទះបាញ់វិញ លោកបានឱ្យដឹងថា ក្នុងឆ្នាំ២០១៦កន្លងមក បានកើតមានចំនួន ១៥៤លើក បានបង្ករឱ្យមានមនុស្សស្លាប់ចំនួន ១០៨នាក់ ស្រី្ត ២១នាក់ រងរបួស ១០៥នាក់ ងាប់សត្វពាហនៈ ៨០ក្បាល ខូចខាតផ្ទះ៩ខ្នង និងសម្បត្តិសាធារណៈមួយចំនួនទៀត។
យ៉ាងណា លោកទេសរដ្ឋមន្រ្តី បានសម្តែងនូវការព្រួយបារម្ភ យ៉ាងខ្លាំងចំពោះគ្រោះធម្មជាតិទាំងអស់នោះថា វាអាចនឹងកើតមានជាបន្តសម្រាប់ឆ្នាំនេះ និងឆ្នាំខាងមុខៗទៀត ដែលទាមទាឱ្យប្រជាពលរដ្ឋ មានការយល់ដឹង និងវិធានការការពារ ទប់ស្កាត់ និងគ្រោះធម្មជាតិ ដែលអាចកើតមានជាយថាហេតុ ក្នុងតំបន់ដែលខ្លួនរស់នៅ បើទោះជារាជរដ្ឋាភិបាល មានការគិតគូរ យ៉ាងណាក៏ដោយ ក៏ត្រូវតែមានការចូលរួម និងយល់ដឹងឱ្យបានគ្រប់ៗគ្នាផងដែរ៕



អគារសន្តិសុខ នៃទីស្តីការគណៈរដ្ឋមន្រ្តី នឹងត្រូវសាងសង់នៅដើមត្រីមាសទី៤ ឆ្នាំ២០១៧ខាងមុខ

នៅថ្ងៃទី១៤​ ខែកុម្ភៈ ឆ្នាំ២០១៧នេះ នៅអគារមិត្តភាពនៃទីស្ដីការគណៈរដ្ឋមន្ត្រី មានរៀបចំពិធីចុះហត្ថលេខាលើកិច្ចព្រម​ព្រៀង​ស្តីពីការអនុវត្តគម្រោងសាងសង់​អគារសន្តិសុខនៃទីស្តីការគណៈរដ្ឋមន្ត្រីក្នុងក្របខ័ណ្ឌហិរញ្ញប្បទានឥតសំណងពីសាធារណរដ្ឋប្រជាមានិតចិន។
ពិធីចុះហត្ថលេខានេះ ប្រព្រឹត្តទៅក្រោមអធិបតី លោកទេសរដ្ឋមន្ត្រី យឹម ណុលឡា ប្រធានក្រុមប្រឹក្សាសេដ្ឋកិច្ច ​សង្គមកិច្ច និងវប្បធម៌ និង លោក លី អាន ប្រធានការិយាល័យសេដ្ឋកិច្ច និងពាណិជ្ជកម្ម នៃស្ថានទូតសាធារណរដ្ឋប្រជាមានិតចិននៅ​ព្រះរាជាណាចក្រកម្ពុជា និងជាតំណាងទី​ភ្នាក់​​ងារ​សម្រាប់កិច្ចសហប្រតិបត្តិការសេដ្ឋកិច្ចអន្តរជាតិ​ នៃក្រសួង​​ពាណិជ្ជកម្ម​នៃ​សាធារណរដ្ឋប្រជាមានិតចិន។
លោកទេសរដ្ឋមន្រ្តី យឹម ណុលឡា បានថ្លែងឱ្យដឹងក្នុងឱកាសនោះថា អគារសន្តិសុខដែលបានចុះហត្ថលេខានាពេល​នេះ នឹងចាប់ផ្តើមសាងសង់នៅដើមត្រីមាសទី៤ ឆ្នាំ២០១៧ខាងមុខ ដែលមានទីតាំងស្ថិតនៅខាង​ក្រោយអគារឧបសម្ព័ន្ធនៃទីស្តីការគណៈរដ្ឋមន្ត្រីផ្ទៃក្រឡាដី ៩២៣,៤ម២ បណ្តោយ ៤៤,៦០ ម៉ែត្រ ទទឹង ​១៨,៧៥ ម៉ែត្រ  ផ្ទៃក្រឡាអគារ ១.៣៥០ម២  បណ្តោយ ៤៣.៩ម៉ែត្រ  និងទទឹង ៧.២ម៉ែត្រ  កម្ពស់ចំនួន ៤ជាន់ (រួមទាំងជាន់ផ្ទាល់ដី) ហើយអគារសន្តិសុខនៃទីស្តីការគណៈរដ្ឋមន្ត្រីនេះ បំពាក់នូវគ្រឿងសម្ភារៈមួយចំនូនដូចជា៖ គ្រែ​​/តុទូក្នុងបន្ទប់សម្រាក សម្ភារៈចាំបាច់សម្រាប់អា​ហា​រ​ដ្ឋាននិងផ្ទះបាយ  សម្ភារៈចាំបាច់សម្រាប់បន្ទប់មេបញ្ជាការ ការិយាល័យបន្ទប់ប្រជុំ (តុ កៅអី មីក្រូ ម៉ាស៊ីនត្រជាក់.។ល។
លោកទេសរដ្ឋមន្រ្តី យឹម ណុលឡា ក៏បានបញ្ជាក់បន្ថែមថា ការជួយពីឧបត្ថម្ភពីរដ្ឋាភិបាលចិនចំពោះប្រទេស និងប្រជាជនកម្ពុជា គឺជាការបង្ហាញឱ្យឃើញពីការរីកចំរើននូវចំណងមិត្តភាពនៃប្រទេសទាំងពីរដែលមានតាំងពីយូរលង់ណាស់មកហើយកាន់តែរឹងមាំថែមទៀត ហើយបច្ចុប្បន្ននេះ រាជរដ្ឋាភិបាលកម្ពុជា ក្រោមការដឹកនាំរបស់លោកនាយករដ្ឋមន្រ្តី ហ៊ុន សែន បានចាត់ទុកថា សាធារណរដ្ឋប្រជាមានិតចិន គឺជាមិត្តយុទ្ធសាស្រ្តគ្រប់ជ្រុងជ្រោយ និងរឹងមាំ​៕





លិខិតមិត្តអ្នកអាន៖ នៅពេលច្បាប់ចេញឆ្លុះបង្ហាញថា សម រង្ស៊ី មានកំហុសផ្នែកយុទ្ធសាស្ត្រដ៏ធ្ងន់ធ្ងរក្នុងជីវិតនយោបាយ

ស្តាប់ទៅហាក់បីដូចជា លោក សម រង្ស៉ី បានទទួលដំណឹង ឬដឹងមុនយ៉ាងច្បាស់អំពីខ្លឹមសារច្បាប់គណបក្សនយោបាយដែលគ្រោងធ្វើវិសោធនកម្មនោះ។ រហូតដល់ទៅហ៊ានសម្រេចចិត្តបែបអត្តឃាតនយោបាយ គឺប្រកាសលាលែងពីប្រធានគណបក្ស ហើយថែមទាំងបានចាត់ទុកដោយយល់ខុសថា នេះគឺជាក្បួនយុទ្ធសាស្ត្រដើរឱ្យបានមួយជំហានមុនដៃគូប្រកួត។
តើលោក សម រង្ស៉ី ចង់ធ្វើដូចប្រធានគណបក្សប្រជាជនកម្ពុជា គឺសម្តេចនាយករដ្ឋមន្រ្តី ហ៊ុន សែន ដែលវាយតម្លៃត្រូវ ហើយបានដើរមុនមួយជំហាន ព្យាករណ៍ត្រូវលើរឿងសមុទ្រ​ចិនខាងត្បូង និងលទ្ធផលជាប់ឆ្នោតរបស់ប្រធានាធិបតីអាមេរិក ដូ ណាល់ត្រាំ?
ជាមួយគ្នានេះ មន្ត្រីគិគីលូរបស់គណបក្សសង្រ្គោះជាតិ កូតាខាង សម រង្ស៉ី បាននាំគ្នាហៃអើកោតសរសើរថា នេះជាវីរៈភាពរបស់លោក សម រង្ស៉ី និងយល់ថា លោក សម រង្ស៉ី បានសង្រ្គោះគណបក្ស កុំឱ្យគណបក្សរលាយ ដោយសារប្រធានបក្សមានទោស។ ប៉ុន្តែមិនមានទេ! លោក សម រង្ស៉ី មិនមែនចាក់កៅអូវត្រូវទេ តែគាត់អុកគូថឆ្អល់ទល់ប្រអកទៅទៀត។
ឥឡូវនេះ សេចក្តីស្នើច្បាប់ស្តីពីវិសោធនកម្មច្បាប់ ស្តីពីគណបក្សនយោបាយត្រូវបានផ្សព្វផ្សាយលើគេហទំព័ររដ្ឋសភាហើយ។ គ្រប់គ្នារួមទាំងអ្នកនយោបាយ គណបក្សសង្គ្រោះជាតិ ទាំងអ្នកច្បាប់ ទាំងអ្នកវិភាគសង្គមនានា អាចពិនិត្យសិក្សាវែកញែកខ្លឹមសារនៅក្នុងច្បាប់នោះ ដើម្បីកំណត់ថា តើការវាយតម្លៃលើការសម្រេចចិត្តរបស់លោក សម រង្ស៉ី នៅមុនច្បាប់ត្រូវបានអនុម័ត តើមិនត្រឹមត្រូវ ឬខុសស្រឡះ?
ផ្ទុយទៅវិញ ពេលពិនិត្យឲ្យច្បាស់លាស់ ស្មារតីច្បាប់នេះ មិនមានខ្លឹមសារដូចដែលលោក សម រង្ស៉ី បានលើកឡើងជាសាធារណៈច្រំដែលៗនោះទេ។ នេះមានន័យថា៖
ទី១៖ លោក សម រង្ស៉ី ត្រូវបានគេផ្តល់ដំណឹងឱ្យខុស ឬគាត់ទស្សទាយខុសស្រឡះ ដែលជំរុញឱ្យគាត់ធ្វើការសម្រេចចិត្តខុសដែរ។
ទី២៖ នេះឆ្លុះក៏បញ្ចាំងថា លោក សម រង្ស៉ី ធ្វើអ្នកនយោបាយចាស់វស្សាមែន តែមិនវៃឆ្លាត និងមានភ្នែកភ្លឺនោះទេ។ ក៏ប៉ុន្តែគ្រាន់តែជាអ្នកនយោបាយ ដែលធ្វើឲ្យការចាញ់របស់គាត់ល្បីល្បាញមួយឆាវ ហើយក៏រលត់​ទេ។
គេនៅចាំបានថា នាពេលកន្លងទៅថ្មីៗ លោក សម រង្ស៉ី ក៏ធ្លាប់បានវាយតម្លៃខុស ទាក់ទិននឹងការទស្សន៍ទាយអនាគតប្រធានាធិបតីសហរដ្ឋអាមេរិក ដោយបានចាក់កៅអូវ យកបេក្ខភាពលោកស្រី Hilary Clinton និងបានវាយប្រហារដ៏គឃ្លើនលើបេក្ខភាពលោក Donald Trump ថា ជាមនុស្សផ្តាច់ការ។ ប៉ុន្តែទីបំផុត មនុស្សផ្តាច់ការដែលលោក សម រង្ស៉ី បានចោទប្រកាន់នេះ បានក្លាយជាប្រធានាធិបតី សហរដ្ឋអាមេរិកទី៤៥ ដែលធ្វើឱ្យលោក សម រង្ស៉ី ខាតបង់មុខមាត់នយោបាយជាខ្លាំង។
នៅកម្ពុជាការពិតមានអ្នកនយោបាយដ៏ល្បីល្បាញមួយរូប ដែលតែងតែឈ្នះស្ទើរគ្រប់សមរភូមិ និងបានកាន់អំណាចអភិវឌ្ឍន៍ប្រទេសជាតិរីកចម្រើនរហូត មកដល់សព្វថ្ងៃ គឺសម្តេចតេជោ ហ៊ុន សែន ដែលបច្ចុប្បន្ន គឺជាប្រធានគណបក្សប្រជាជនកម្ពុជា។ សម្តេចតេជោ ហ៊ុន សែន ធ្លាប់ព្យាករណ៍ត្រូវច្បាស់ដូចថ្ងៃ លើរឿងធំៗជាច្រើនក្នុងនោះ មានរឿងធំ និងថ្មីៗចំនួនពីរ ដែលធ្វើឱ្យរំជើបរំជួលពិភពលោក គឺ រឿងសមុទ្រចិនខាងត្បូង និងការជាប់ឆ្នោតរបស់លោក Donald Trump ធ្វើជាប្រធានាធិបតីសហរដ្ឋអាមេរិក។ លើទស្សនវិស័យនេះ លោក សម រង្ស៉ី ត្រូវទទួលស្គាល់ថា សមត្ថភាពនៅអន់ឆ្ងាយណាស់ទាំង នយោបាយក្នុងស្រុកនិងនយោបាយអន្តរជាតិ។
ឥឡូវនេះ ដល់ពេលយកច្បាប់មកមើល អ្វីៗដែលបានលើកឡើងដែលលោក សម រង្ស៉ី គឺ ខុសស្រឡះ១០០ភាគរយ។ ចំណុចដែលលោក សម រង្ស៉ី លើកឡើងប៉ប៉ាច់ប៉ប៉ោចថា ការលាលែងតំណែងប្រធានបក្សឱ្យបានមុនច្បាប់ចេញ ដើម្បីការពារគណបក្សកុំឱ្យគេរំលាយ គឺឥឡូវនេះវាគ្រាន់តែជាវីរៈភាពក្នុងក្អម ពីព្រោះមូលហេតុនៃការលាលែងនេះវាអស់ន័យ។ នៅត្រង់មាត្រា១៨ថ្មី ចែងថា៖ «ប្រធាន និងអនុប្រធាននៃគណបក្សនយោបាយ និងសមាសភាព នៃគណៈកម្មាធិការនាយក ឬគណៈកម្មាធិការ​អចិន្ត្រៃយ៍ ឬអង្គការសមមូល និងគណៈកម្មាធិការនាយក ឬគណៈកម្មាធិការអចិន្ត្រៃយ៍ នៃគណបក្សនយោបាយ មិនត្រូវជាបុគ្គលដែលជាទណ្ឌិតជាប់ទោសដាក់ពន្ធនាគារពីបទឧក្រិដ្ឋ ឬពីបទមជ្ឈិម ដោយគ្មានការព្យួរទោសឡើយ»។ មាត្រា១៨ថ្មីនេះ ក៏បានចែងដែរថា៖ «គណបក្សនយោបាយ ត្រូវចាត់នីតិវិធីដើម្បីជំនួសប្រធានគណបក្សនយោបាយ ដែលបាត់បង់តួនាទីដូចមានចែងក្នុងកថាខណ្ឌខាងលើ ក្នុងរយៈពេលយ៉ាងយូរ ៩០ថ្ងៃ គិតពីថ្ងៃបាត់បង់តួនាទីនោះ»។
ជាក់ស្តែងក្នុងសេចក្តីស្នើច្បាប់នេះ គឺគ្មានមាត្រាណាមួយចែងថា គណបក្សនឹងត្រូវរំលាយដោយសារតែប្រធានបក្សមានទោសនោះទេ។ ច្បាប់គ្រាន់តែចែងថា ប្រធានបក្សបាត់បង់តំណែង ដោយសារមានទោសជាប់ខ្លួន។ ម្យ៉ាងទៀតគណបក្សក៏មិនរំលាយទៅតាមដោយស្វ័យប្រវត្តិ ដោយសារ ប្រធានបក្សជាប់ទោសនោះដែរ គឺគ្មានចែងទាល់តែសោះ!
ដូច្នេះការណ៍ដែលលោក សម រង្ស៉ី អះអាងថា ការលាលែងពីតំណែងដើម្បីកុំឱ្យគណបក្សរលាយ គឺខុសទាំងស្រុង។ នេះគឺជាកំហុសផ្នែកយុទ្ធសាស្ត្រ ដ៏ធ្ងន់ធ្ងរមួយក្នុងជីវិតនយោបាយដែលមិនអាចងាកក្រោយបាន ហើយមិនតែប៉ុណ្ណោះ ក៏បានធ្វើឱ្យគណបក្សជ្រួលច្របល់ថែមទៀត។
ក្នុងស្មារតីច្បាប់នេះ ការរំលាយគណបក្សនយោបាយមួយ គឺ​មិនជាប់ពាក់ព័ន្ធនឹងរឿងប្រធានគណបក្សជាទណ្ឌិតនោះទេ។ មូលហេតុដែលឈានដល់ការ រំលាយគណបក្ស គឺមានផ្សេងពីនេះនិងច្រើនកន្លែង ពិសេស ក្នុងមាត្រា៣៨ថ្មី និងមាត្រា៤៤ថ្មី នៃសេចក្តីស្នើច្បាប់ស្តីពីវិសោធនកម្មច្បាប់ ស្តីពីគណបក្សនយោបាយ ដែលភាគច្រើនពាក់ព័ន្ធនឹងការរំលោភច្បាប់ដូចជា៖ ការធ្វើឱ្យមានអបគមន៍ដែលនាំឱ្យអន្តរាយដល់ឯកភាពជាតិ និងបូរណភាពដែនដី, ការធ្វើវិទ្ធង្សនាប្រឆាំងនឹងរបបប្រជាធិបតេយ្យសេរី ពហុបក្ស និងរបបរាជានិយមអាស្រ័យរដ្ឋធម្មនុញ្ញ, ការធ្វើឱ្យប៉ះពាល់ដល់សន្តិសុខនៃរដ្ឋ, និងការបង្កើតកងកម្លាំងប្រដាប់អាវុធជាដើម។
ដូច្នេះការលាលែងរបស់លោក សម រង្ស៉ី មួយជំហានមុនច្បាប់ចេញ ដែលគ្រាន់តែជាលេសទំលាក់កំហុសឱ្យមកគណបក្សកាន់អំណាច គឺជាការលាលែងដ៏ ឆោតល្ងង់ផ្នែកយុទ្ធសាស្ត្រនយោបាយ និងមិនបានជួយអ្វីដល់គណបក្សសង្រ្គោះជាតិឡើយ ប៉ុន្តែបានធ្វើរូបគាត់ និងគណបក្សខាតបង់ទៅវិញ៖
ទី១៖ កិច្ចព្រមព្រៀងនយោបាយរវាងលោក សម រង្ស៉ី និងលោក កឹម សុខា ដើម្បីបង្កើតគណបក្សរួមគ្នា គឺគណបក្សសង្រ្គោះជាតិ គឺលែងមានន័យ និងលែងមានអានុភាព។
ទី២៖ ចាប់ពេលនេះតទៅ លោក កឹម សុខា បានឡើងធ្វើជាប្រធានស្តីទីពេញសិទ្ធិ និងពេញអំណាចរបស់គណបក្ស ដែលអនុញ្ញាតឱ្យ លោក កឹម សុខា ចាត់ចែងការងារក្នុងបក្សរហូតដល់មានសមាជជ្រើសរើសប្រធានគណបក្សថ្មី។ ប៉ុន្តែប្រធានថ្មី ក៏ត្រូវតែជាលោក កឹម សុខា ព្រោះពីអំណេះតទៅ លោក សម រង្ស៉ី សូម្បីជាសមាជិករបស់បក្សក៏គ្មានផង ដូច្នេះគ្មានសិទ្ធិអ្វីទាំងអស់។ លោក កឹម សុខា ដាក់ទុននយោបាយតែ ៣កៅអី ឥឡូវយកក្តោបយកបក្សបានទាំងមូល! គួរឱ្យសរសើរ គួរឱ្យសរសើរ!
​ទី៣៖ គណបក្សសង្រ្គោះជាតិមានរយៈពេល ៩០ថ្ងៃ ដើម្បីចាត់ចែងជ្រើសរើសប្រធានបក្សថ្មី ក្រោយពេលច្បាប់ចេញ។ ដូច្នេះ មិនមែនត្រូវចាំរហូតដល់ពេលធ្វើសមាជក្នុងខែមេសា ឆ្នាំ២០១៨នោះទេ។ ច្បាប់ធំជាងលក្ខន្តិកៈគណបក្ស។ បើមិនគោរពច្បាប់ ប្រយ័ត្នបក្សរលាយ!
ទី៤៖ រឿងដ៏អស់សំណើចចេញចរិតពិត គឺក្រោយលោក សម រង្ស៊ី លាលែងពីប្រធានបក្សភ្លាម កញ្ញា កឹម មនោវិទ្យា កូនស្រីរបស់លោក កឹម សុខា និងជាអ្នកធ្លាប់រិះគន់លោក សម រង្ស៉ី ថា រត់គេចយករួចខ្លួនទៅក្រៅប្រទេសនោះ បានសរសេររឿងដ៏គួរឱ្យភ្ញាក់ផ្អើលមួយក្នុង Twitter ថា លោក សម រង្ស៉ី លែងជាមនុស្សសំខាន់របស់គណបក្សសង្គ្រោះជាតិទៀតហើយ ព្រោះគណបក្សក្រោមការដឹកនាំរបស់ឪពុករបស់កញ្ញា បានក្លាយជាគណបក្សនៃទស្សនៈគំនិត មិនមែនជាគណបក្សបែបបុគ្គលនិយម ដូចក្រោមការដឹកនាំរបស់លោក សម រង្ស៉ី ឡើយ។ តាមក្បួនយុទ្ធសាស្ត្រនយោបាយ នេះគេហៅថា វិធីបន្សាបឥទ្ធិពល របស់ដៃគូ! ដូច្នេះលោក សម រង្ស៊ី​ ពិតជាចាញ់ហើយចាញ់ទៀត ចាញ់គ្រប់ជ្រុងទាំងអស់។ ចាញ់មួយលើកនេះលោក សម រង្ស៊ី ចាញ់បោសគូថខោ ស្តារលែងឡើងតែម្តង ពីព្រោះអ្វីៗបានធ្លាក់នៅលើដៃរបស់លោក កឹម សុខា ទាំងអស់។
ទោះបីជា សម រង្ស៉ី ទៅឆ្ងាយហើយក៏ដោយ ក៏ប៉ុន្តែសុំខ្សិបឱ្យយោបល់តូចមួយទៅដល់លោក សម រង្ស៉ី និងក្រុមលោក សម​រង្ស៉ី ថា មេឃដីនឹងប្រែប្រួល។ អ្វីៗដែលបានកើតឡើងរហូតដល់លោក សម រង្ស៉ី ត្រូវខ្ទាតពីតំណែងប្រធានបក្ស គឺស្របនឹងផែនការ និងបៀបវារៈនយោបាយរបស់លោក កឹម សុខា និងក្រុមដែលស្និទ្ធនឹងលោក កឹម សុខា ហើយ។ ប្រើដើមទុនតិចចំណេញធំ! លាលែងឈប់ល្ងាចនេះព្រឹកស្អែកឡើងកោះប្រជុំយល់ព្រមភ្លាម ដោយគ្មានស្តាយស្រណោះ។ សត្រូវចេញពីសាច់ឯង គ្រោះថ្នាក់ជាងសត្រូវមកពីចំងាយ៕
ដោយ៖ ចៅចាក់ស្មុក
ខាងក្រោមនេះជាសេចក្តីស្នើវិសោធនកម្ម ច្បាប់ស្តីពីគណបក្សនយោបាយ ដែលរដ្ឋសភាពទទួលយកពិនិត្យ៖