កាលពីព្រឹកថ្ងៃទី២៦ ខែធ្នូ ឆ្នាំ២០១៤ ក្រុមអាជីករពិឃាដសត្វ ដែលប្រកបរបរកាប់ជ្រូក កាប់គោ ទាំង១០ ស្រុកនៃខេត្តតាកែវ មានការខឹងសប្បារយ៉ាងខ្លាំងជាមួយនឹងការធ្វើអាជីវកម្មសត្តឃាតដ្ឋានផ្តាច់មុខគ្រប់គ្រងដោយលោក ហ៊យ ហៀង បានផ្ទុះការតវ៉ា ដាក់ញត្តិទៅអាជ្ញាធរមានសមត្ថកិច្ច ដោយទាមទារ ឲ្យបញ្ចប់កិច្ចសន្យាចាស់ដែលត្រូវផុតកំណត់នៅចុងឆ្នាំ២០១៤នេះ និងសំណូមពរដោយទទូចឲ្យមានក្រុមហ៊ុនថ្មីមកជំនួស ដោយមានការដេញថ្លៃជាសាធារណៈ និងមានលក្ខណៈមិនផ្តាច់មុខ។
តាមការអះអាងរបស់អាជីវករបានឲ្យដឹងថា លោក ហ៊យ ហៀង បានទទួលសិទ្ធិផ្តាច់មុខក្នុងការគ្រប់គ្រងអាជីវកម្មសត្តឃាតដ្ឋានទូទាំងខេត្តតាកែវ ចាប់តាំងពីឆ្នាំ២០០២ មកដល់បច្ចុប្បន្ននេះ មានរយៈពេល១៣ឆ្នាំមកហើយ។
ការទទួលសិទ្ធិធ្វើអាជីកម្មផ្តាច់មុខរបស់លោក ហ៊យ ហៀង កន្លងមកនេះ មិនបានអនុវត្តតាមកិច្ចសន្យា ទារលុយច្រើនលើសពីសៀវភៅបន្ទុក និងបង្កឲ្យមានបញ្ហាមួយចំនួន ដូចជា ទីតាំងសត្តឃាតដ្ឋាន មិនបានរៀបចំឲ្យត្រឹមត្រូវតាមស្តង់ដារដែលកំណត់ដោយក្រសួងកសិកម្ម រុក្ខា ប្រម៉ាញ់ និងនេសាទ គ្មានបង្គន់អនាម័យ គ្មានការប្រមូលកាកសំណល់លាមកសត្វ គ្មានប្រព័ន្ធបង្ហូរទឹកស្អុយ គ្មានអនាម័យ ខ្វះខាតទឹកស្អាតប្រើប្រាស់ ទីសត្តឃាតដ្ឋានចាស់ទ្រុឌ ទ្រោម គ្មានការជួសជុលកែលម្អរ លិចទឹកនៅរដូវវស្សា មានភក់ជ្រាំ ជះក្លិនស្អុយ សំឡេងរំខានដល់ប្រជាពលរដ្ឋដែលរស់នៅជិតខាង និងទីសត្តឃាតដ្ឋានមួយចំនួន ដូចជានៅក្នុងស្រុកសំរោង មានតែទីតាំង និងរោងទទេស្អាត គ្មានបំពាក់សម្ភារៈបរិក្ខា គ្មានប្រព័ន្ធទឹកភ្លើង គ្មានផ្តូវចូល និងមិនដែលប្រើប្រាស់ទាល់តែសោះ ចាប់តាំងពីឆ្នាំ២០០២មក ដែលជាហេតុបង្កឲ្យអាជីវករជាអ្នកកាប់សត្វ យកលំនៅដ្ឋានផ្ទាល់ខ្លួន ធ្វើជាទីតាំងសម្លាប់សត្វ បង្កឲ្យមានផលប៉ះពាល់ជាច្រើនគ្រប់បែបយ៉ាង។
តំណាងអាជីវករនៅក្រុងដូនកែវ បានឲ្យដឹងថា នៅកន្លែងសត្តឃាតដ្ឋានរបស់ពួកគាត់ គឺពិតជាកខ្វក់ គ្មានទឹកប្រើប្រាស់គ្រប់គ្រាន់ គ្មានអនាម័យ អាងស្តុកទឹកតូចចង្អៀត និងម្ចាស់អាជ្ញាប័ណ្ណទារថ្លៃសម្លាប់ជ្រូក១ក្បាល ទាររហូតដល់១ម៉ឺនរៀល លើសសៀវភៅបន្ទុកដែលតម្រូវឲ្យបង់តែ៤៥០០រៀលប៉ុណ្ណោះ បន្ថែមលើការទារលុយ១ឆ្នាំៗជាង១ពាន់ដុល្លារជាប្រចាំ។
ជាមួយនឹងការផ្ទុះការតវ៉ារបស់ក្រុមអាជីករ និងប្រជាពលរដ្ឋ មន្ត្រីជំនាញរបស់ការិយាល័យកសិកម្ម ផ្នែកផលិតកម្ម និងបសុព្យាបាល និងមន្ត្រីបរិស្ថាន បានអះអាងស្របគ្នាអំពីផលប៉ះពាល់នៃការគ្រប់គ្រងសត្តឃាតដ្ឋានទៅតាមវិស័យជំនាញរបស់ខ្លួនរៀងៗខ្លួន ។ លោក ឡាយ សារ៉ាន់ ប្រធានការិយាល័យបរិស្ថានស្រុកសំរោង បានទទួលស្គាល់ថា បញ្ហាសត្វឃាត បានប៉ះពាល់ដល់បរិស្ថានយ៉ាងធ្ងន់ធ្ងរ ហើយថា ម្ចាស់អាជីវកម្មផ្តាច់មុខ លោក ហ៊យ ហៀង មិនធ្លាប់បានមកពិនិត្យមើលការធ្វើអាជីវកម្មទេតាំងពីឆ្នាំ២០០២មក គឺឲ្យតែអ្នកមកម៉ៅការបន្ត មកប្រមូលលុយថ្លៃភាស៊ី។ ហេតុដូច្នេះ គឺទីធ្វើសត្វឃាដនៅតាមផ្ទះនៅស្រុកសំរោងប្រមាណជាង៣០កន្លែង មានក្លិនស្អុយ រំខាន និងប៉ះពាល់ដល់សុខភាពប្រជាពលរដ្ឋនៅជុំវិញនោះ។ ហេតុនេះប្រជាពលរដ្ឋ បានសំណូមពរឲ្យធ្វើការដេញថ្លៃជាសាធារណៈឡើងវិញ ដែលប្រការនេះ មន្ត្រីផ្នែកបរិស្ថានរូបនេះ បានសំដែងនូវការពេញចិត្តជាខ្លាំង និងសង្ឃឹមថា អ្នកដេញថ្លៃថ្មី និងមានគំនិតថ្មី រៀបចំទីសត្តឃាដបានល្អ ហើយសង្ឃឹមថា មានការរៀបចំទីបង្ហូរកាកសំណល់ កុំឲ្យមានក្លឹនស្អុយប៉ះពាល់ដល់សុខភាពប្រជាពលរដ្ឋ និងមានទឹក មានភ្លើងគ្រប់គ្រាន់ សម្រួលដល់អ្នកកាប់ជ្រូក គោ ពេញចិត្តមកធ្វើនៅកន្លែងសត្តឃាដ និងសមស្របតាមសៀវភៅបន្ទុករបស់ក្រសួងសេដ្ឋកិច្ច និងហិរញ្ញវត្ថុ។
ចំពោះញត្តិ របស់ក្រុមអាជីវករដែលបានដាក់ជូនអាជ្ញាធរស្រុក និងក្រុងទាំង១០ នៃខេត្តតាកែវ ត្រូវបានទទួលយកធ្វើការពិនិត្យ និងពិភាក្សា ដើម្បីរកដំណោះស្រាយជូនប្រជាពលរដ្ឋ។
ចំណែកលោក ញ៉ែម ស្រស់ អភិបាលស្រុកសំរោង បានដឹងថា អាជីករសត្តឃាដពិតជា ជួបការលំបាក ដោយសារគេតម្រូវឲ្យបង់ប្រាក់ប្រចាំឆ្នាំប្រមាណជាង១ពាន់ដុល្លារក្នុងម្នាក់ៗ។ លោកបន្ថែមថា ការមិនទទួលខុសត្រូវរបស់ម្ចាស់អាជីវកម្មផ្តាច់មុខ ពិតជានាំការលំបាកដល់ប្រជាពលរដ្ឋ។ ជាមួយគ្នានេះ លោកសំដែងការសប្បាយរីករាយប្រសិនបើ មានការដេញថ្លៃជាសាធារណៈ ប្រកបដោយតម្លាភាព។
តាមសំនូមពររបស់អាជីវករ និងប្រជាពលរដ្ឋ ដែលកំពុងជួបប្រទះនូវបញ្ហាប្រឈមដ៏ធ្ងន់ធ្ងរនេះ ពួកគាត់មិនអាចទទួលយកបានជាដាច់ខាត និងបានសំណូមពរឲ្យបញ្ចប់នូវកិច្ចសន្យា ការធ្វើអាជីវកម្មផ្តាច់មុខគ្រប់គ្រងដោយលោក ហ៊យ ហៀង និងរាល់កិច្ចសន្យាវិនិយោគ និងការគ្រប់គ្រងសត្តឃាតដ្ឋាននៅក្នុងមូលដ្ឋានរបស់ពួកគាត់ ត្រូវតែធ្វើការដេញថ្លៃជាសាធារណៈដោយតម្លាភាព មានការប្រគួតប្រជែង និងសូមកុំឲ្យមានការធ្វើអាជីវកម្មផ្តាច់មុខទូទាំងខេត្តតទៅទៀត។
ជាការឆ្លើយតបនឹងញត្តិ ជាសំណូមរបស់ក្រុមអាជីវករ និងប្រជាពលរដ្ឋ អាជ្ញាធរស្រុក ក្រុង បានខិតខំប្រមូលព័ត៌មាន កំណត់បញ្ហា និងបញ្ជូននូវរាល់សំណូមពរទាំងនេះ ទៅឯកឧត្តមអភិបាល នៃគណៈអភិបាលខេត្ត ដើម្បីរិះរកមធ្យោបាយដោះស្រាយបញ្ហានេះបន្តទៀត។
លោក មូល វិចិត្រ អភិបាលក្រុងដូនកែវ បានមានប្រសាសន៍ថា បន្ទាប់ពីបានទទួលញត្តិ លោកបានកោះប្រជុំជាបន្ទាន់ជាមួយក្រុមការងារទីប្រឹក្សាបញ្ញត្តិករផ្សារ ដើម្បីរិះរកវិធីដោះស្រាយជូនប្រជាពលរដ្ឋដែលជួបបញ្ហា។ លោកថា ក្រុមការងារបញ្ញត្តិករបានសម្រេច ថា ត្រូវតែលុបចោលកិច្ចសន្យាក្រុមហ៊ុនថ្មី ដែលពួកអាជីវករចាត់ទុកថា ធ្វើឡើងដោយខុសនីតិវិធីច្បាប់ និងជម្រុញឲ្យមានការដាក់ដេញថ្លៃជាសាធារណៈឡើងវិញ ពីព្រោះពួកអាជីវករបានទទួលព័ត៌មានថា ក្រុមហ៊ុនថ្មី មានសម្ព័ន្ធភាពជាមួយនឹងក្រុមហ៊ុនចាស់របស់លោក ហ៊យ ហៀង ។ ហើយក្រុមហ៊ុនចាស់ គឺបានធ្វើឲ្យពួកគាត់ថ្នាំងថ្នាក់ និងមានសតិអារម្មណ៍ខ្លាំងណាស់។ ពាក់ព័ន្ធនឹងញត្តិនេះ លោកអភិបាលក្រុងដូនកែវ និងដាក់ជាសំណើរជូនគណៈអភិបាលខេត្តតាកែវ ដែលមានគណៈកម្មការពិនិត្យសៀវភៅបន្ទុករបស់អ្នកវិនិយោគច្បាស់លាស់ ដូច្នេះសង្ឃឹមថា នឹងមានវិធានការបន្តបន្ទាប់ទៀត ដើម្បីរកដំណោះស្រាយជូនក្រុមអាជីវករឲ្យបានសមរម្យ។
-(1).jpg)
-(2).jpg)
