Friday, October 13, 2017

រដ្ឋមន្ត្រីក្រសួងសាធារណការកម្ពុជា ចូលរួមប្រជុំជាមួយរដ្ឋមន្ដ្រីដឹកជញ្ជូនអាស៊ាន-ចិន ស្តីពីវេទិកាខ្សែក្រវ៉ាត់ និងផ្លូវ លើកទី១៦ នៅប្រទេសសឹង្ហបុរី

សឹង្ហបុរី៖ លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន នៅថ្ងៃទី១២ ខែតុលា ឆ្នាំ២០១៧ បានអញ្ជើញចូលរួមកិច្ចប្រជុំ រដ្ឋមន្រ្តីដឹកជញ្ជូនអាស៊ាន-ចិនលើកទី១៦ នៅប្រទេសសឹង្ហបុរី។

កិច្ចប្រជុំនេះ លោក Khaw Boon Wan រដ្ឋមន្រ្តីសម្របសម្រួលទទួលបន្ទុកហេដ្ឋារចនាសម្ព័ន្ធ និងជារដ្ឋមន្រ្តីដឹក ជញ្ជូនសឹង្ហបុរី និងលោក Dai Dongchang អនុរដ្ឋមន្រ្តីដឹកជញ្ជូនចិន ជាសហប្រធានដឹកនាំកិច្ចប្រជុំ។

រដ្ឋមន្ត្រីបានគាំទ្រការឯកភាពគ្នា នៅក្នុងសេចក្តីប្រកាសរួម នៃកិច្ចប្រជុំតុមូលថ្នាក់ដឹកនាំស្តីពីវេទិកាខ្សែក្រវ៉ាត់ និងផ្លូវ សម្រាប់កិច្ចសហប្រតិបត្តិការអន្តរជាតិ ដែលបានប្រព្រឹត្តទៅចាប់ពី ថ្ងៃទី១៤-១៥ ខែឧសភា ឆ្នាំ២០១៧ នៅទីក្រុងប៉េកាំង សាធារណរដ្ឋប្រជាមានិតចិន និងបានបញ្ជាក់ជាថ្មី នូវការប្តេជ្ញាចិត្តរបស់ខ្លួន ក្នុងការបង្កើន ការតភ្ជាប់រវាងរដ្ឋជាសមាជិកអាស៊ាន និងសាធារណរដ្ឋប្រជាមានិតចិន។

រដ្ឋមន្ត្រីបានឯកភាពប្រគល់ភារកិច្ចជូនឧត្តមមន្រ្តី និងក្រុមការងារពាក់ព័ន្ធ ធ្វើការពិភាក្សាអំពីស កម្មភាព តាមដានរបស់ខ្លូន ក្នុងការពង្រឹងកិច្ចសហប្រតិបត្តិការលើវិស័យ ផ្លូវថ្នល់, ផ្លូវដែក, កំពង់ផែ, ការដឹកជញ្ជូន តាមផ្លូវទឹក, ផ្លូវសមុទ្រ, និងផ្លូវអាកាស ដើម្បីជំរុញកំណើនលំហូរពាណិជ្ជកម្ម និងវិនិយោគ នៅក្នុងតំបន់។

រដ្ឋមន្ត្រីក៏បានពិភាក្សា និងផ្តល់អនុសាសន៍ណែនាំលើការអនុវត្តន៍ឯកសារសំខាន់ៗ ដូចខាងក្រោម៖ ទី១- កិច្ចព្រមព្រៀងដឹកជញ្ជូនតាមផ្លូវអាកាស អាស៊ាន-ចិន, ទី២-កិច្ចព្រមព្រៀងដឹកជញ្ជូនតាមផ្លូវសមុទ្រ អាស៊ាន-ចិន, ទី៣-យន្តការពិគ្រោះយោបល់លើបញ្ហាពាក់ព័ន្ធផ្លូវសមុទ្រ អាស៊ាន-ចិន, ទី៤-ផែនការយុទ្ ធសាស្រ្តកែសម្រួលសម្រាប់កិច្ចសហប្រតិបត្តិការដឹកជញ្ជូនអាស៊ាន-ចិន, និងទី៥ សកម្មភាពរួមអាស៊ាន-ចិន សម្រាប់ឆ្នាំ២០១៨។

រដ្ឋមន្ត្រីបានអនុម័តលើអនុស្សរណៈយោគយល់ រវាងអាជ្ញាធរទទួលបន្ទុកស៊ើបអង្កេតគ្រោះថ្នាក់ អាកាសយាន នៃរដ្ឋជាសមាជិកអាស៊ាន និងរដ្ឋបាលអាកាសចរណ៍ស៊ីវិលចិន ស្តីពីកិច្ចសហប្រត្តិបត្តិការទាក់ទង នឹងការ ស៊ើបអង្កេតឧប្បត្តិហេតុ និងគ្រោះថ្នាក់អាកាសយាន ដែលត្រូវចុះហត្ថលេខាដោយស្ថាប័នពាក់ព័ន្ធ។រដ្ឋមន្ត្រីបានពិភាក្សា និងអនុម័ត លើសេចក្តីថ្លែងការណ៍រួម នៃកិច្ចប្រជុំរដ្ឋមន្ត្រីដឹកជញ្ជូនអាស៊ាន-ចិន លើកទី១៦ ដែលបានប្រារព្ធធ្វើឡើងនៅថ្ងៃ១២ ខែតុលា ឆ្នាំ២០១៧ នៅប្រទេសសឹង្ហបុរី ៕





ក្រសួងបរិស្ថាន​ រកឃើញ​ជ័យលាភី​យុវជន​ឆ្នើមថ្នាក់ជាតិ​ ជជែកពិភាក្សា​អំពីបញ្ហា​បរិស្ថាន​ ឆ្នាំ២០១៧​

ក្រសួងបរិស្ថាន បានអបអរសាទរដល់សាកលវិទ្យាល័យវិទ្យាសាស្រ្តសុខាភិបាល ដែលបានប្រកួតឈ្នះដណ្តើមពានមាសជ័យលាភីលេខ១ យុវជនឆ្នើមថ្នាក់ជាតិ ជជែកពិភាក្សាអំពីបញ្ហាបរិស្ថាន ឆ្នាំ២០១៧។

ដោយឡែក ជ័យលាភីលេខ២ បានទៅលើសាកលវិទ្យាល័យភ្នំពេញអន្តរជាតិ និងជ័យលាភីលេខ៣ស្ទួន បានទៅលើវិទ្យាស្ថានបច្ចេកវិទ្យាកម្ពុជា និងសាកលវិទ្យាល័យស្វាយរៀង។ និស្សិតឆ្នើមរបស់សាកលវិទ្យាល័យចំនួន៤ខាងលើ ក៏ត្រូវបានបំពាក់មេដាយមាស មេដាយប្រាក់ និងមេដាយសំរិទ្ធ ទៅតាមប្រភេទជ័យលាភី ទទួលប័ណ្ណជ័យលាភី និងវិញ្ញាបនបត្រ និងប្រាក់ឧបត្ថម្ភ ដើម្បីឆ្លើយតបនឹងកិច្ចខិតខំប្រឹងប្រែងរបស់ប្អូនៗនិស្សិត។

ពិធីប្រគល់ជ័យលាភីនេះធ្វើឡើងនៅថ្ងៃទី១២ ខែតុលា ឆ្នាំ២០១៧ នៅស្ថានីយទូរទស្សន៍ជាតិកម្ពុជា ក្រោមអធិបតីភាពលោក ឃុត ចាន់ដារ៉ា អនុរដ្ឋលេខាធិការក្រសួងបរិស្ថាន។
នៅក្នុងវេទិកាយុវជនឆ្នើមថ្នាក់ជាតិជជែកពិភាក្សាអំពីបញ្ហាបរិស្ថាន ឆ្នាំ២០១៧ មានប្រធានបទសំខាន់ចំនួន៣ ដែលនិស្សិតបានប្រកួតយ៉ាងស្វិតស្វាញ នៅក្នុងការប្រកួតវគ្គផ្តាច់ព្រ័ត្រនេះ គឺ៖ ប្រធានបទទី១ “ការអនុវត្តច្បាប់គឺជាមធ្យោបាយដ៏មានប្រសិទ្ធភាពក្នុងការការពារធនធានធម្មជាតិ”, ប្រធានបទទី២ “ទម្លាប់នៃការដុតសំណល់នៅទីចំហរ គួរតែត្រូវបញ្ឈប់” និងប្រធានបទផ្តាច់ព្រ័ត្រទី៣ “ការរីកចម្រើនផ្នែកវិទ្យាសាស្រ្ត និងបច្ចេកវិទ្យា បណ្តាលឱ្យមានផលប៉ះពាល់អវិជ្ជមានដល់បរិស្ថាន”។

សូមបញ្ជាក់ថា វេទិកាយុវជនឆ្នើមថ្នាក់ជាតិជជែកពិភាក្សាអំពីបញ្ហាបរិស្ថាន ឆ្នាំ២០១៧ មិនត្រឹមតែស្វែងរកយុវជនឆ្នើម ឬក្រុមជ័យលាភីប៉ុណ្ណោះទេ ប៉ុន្តែគឺដើម្បីជាមធ្យោបាយក្នុងការបញ្ជ្រាបចំណេះដឹងដល់យុវជនឱ្យមានឱកាសក្នុងការសិក្សាស្រាវជ្រាវ ស្វែងរកទឡ្ហីករណ៍ឬអំណះអំណាងសមស្របមកធ្វើការបកស្រាយ ក្នុងន័យបង្កើនសមត្ថភាពរបស់ពួកគាត់។ ជាមួយគ្នានេះដែរ វេទិកានេះក៏ជាមធ្យោបាយបញ្ជ្រាបចំណេះដឹងទៅដល់សាធាណជនគ្រប់ស្រទាប់វណ្ណៈ ឲ្យបានយល់ដឹងអំពីបរិស្ថានដែលកើតមាន និងផលប៉ះពាល់ទៅដល់សុខភាពមនុស្ស និងលើកទឹកចិត្តក្នុងការចូលរួមកិច្ចគាំពារបរិស្ថាន ការអភិរក្សធនធានធម្មជាតិ ការរស់នៅប្រកបដោយចីរភាព។

ក្រសួងបរិស្ថានសូមឱ្យយុវជនទាំងអស់ ជាពិសេសយុវជនដែលចូលរួមនៅក្នុងវេទិកាយុវជនឆ្នើម ដើរតួជាអ្នកផ្សព្វផ្សាយបន្តលើកកម្ពស់កិច្ចគាំពារបរិស្ថាន។ សូមចូលរួមជាអ្នកដោះស្រាយបញ្ហា មិនមែនជាអ្នកបង្កើតបញ្ហាបរិស្ថាននោះទេ។

សូមបញ្ជាក់ផងដែរថា ក្រសួងបរិស្ថាន គឺជាស្ថាប័នដំបូងដែលបានដឹកនាំរៀបចំវេទិកាយុវជនជជែកពិភាក្សាអំពីបញ្ហាបរិស្ថាន ក្នុងនោះបានរៀបចំតាមកញ្ចក់ទូរទស្សន៍សរុបចំនួន ៣៦លើក ចំណែកការប្រកួតជាលក្ខណៈថ្នាក់ជាតិ គឺមានចំនួន២លើក នៅឆ្នាំ២០១៦ និងឆ្នាំ២០១៧នេះ។

ចំពោះការប្រកួតថ្នាក់ជាតិឆ្នាំ២០១៧នេះ មានគ្រឹះស្ថានឧត្តមសិក្សាសរុបចំនួន១៤ មកពីទូទាំងប្រទេស បានបញ្ជូននិស្សិតឆ្នើមរបស់ខ្លួនមកចូលរួមប្រកួត ដែលក្នុងនោះ មានសាកលវិទ្យាល័យមកពីបណ្តាខេត្តចំនួន២ គឺសាកលវិទ្យាល័យស្វាយរៀង និងសាកលវិទ្យាល័យជាស៊ីមកំចាយមារ នៃខេត្តព្រៃវែង។ ការប្រកួតថ្នាក់ជាតិ ត្រូវបានបែងចែកជា៣វគ្គ គឺ៖ ការប្រកួតវគ្គដំបូង វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ដែលមានរយៈពេល៣ខែ គិតចាប់ពីខែសីហា រហូតដល់ខែតុលា ឆ្នាំ២០១៧៕


ក្រសួងទេសចរណ៍ជម្រាបជូនមន្ទីរទេសចរ និងម្ចាស់មូលដ្ឋានអាជីវកម្មសេវាទេសចរណ៍ ឱ្យត្រៀមលក្ខណៈឱ្យបានរួចរាល់ ដើម្បីឆ្លើយតបនឹងបញ្ហាអាកាសធាតុ

ក្រសួងទេសចរណ៍ចេញលិខិតជម្រាបជូន លោក លោកស្រីប្រធានមន្ទីររាជធានី ខេត្ត ម្ចាស់មូលដ្ឋានអាជីវកម្ម សេវាកម្មទេសចរណ៍ អំពីសេចក្តីជូនដំណឹងរបស់ក្រសួងធនធានទឹក និងឧតុនិយម ដែលបានឲ្យដឹងថា ប្រទេសកម្ពុជា នឹងរងឥទ្ធិពលប្រព័ន្ធសម្ពាធទាបដែលបានកំពុងបន្តអូសកាត់លើភាគខាងជើងកម្ពុជា និង វិសម្ពាធមួយ នៅក្នុងសមុទ្រចិនខាងត្បូង ដែលរំកិលខ្លួនមកកាន់ឆ្នេរប្រទេសវៀតណាមភាគកណ្តាល។

វិសម្ពាធនេះនឹងបង្កឲ្យប្រព័ន្ធសម្ពាធទាបនៅលើប្រទេសកម្ពុជា បង្តើនឥទ្ធិពលកាន់តែខ្លាំង ចាប់ពីថ្ងៃ១៣-២២ ខែតុលា ឆ្នាំ២០១៧ លក្ខណៈបែបនេះនឹងធ្វើឲ្យផ្ទៃមេឃនៅប្រទេសកម្ពុជា មានស្ថានភាពអាប់អួ អាចមាន ភ្លៀងធ្លាក់ច្រើនជាប់ៗគ្នា ក្នុងក្របខណ្ឌទូទាំងប្រទេស និងរាជធានីខេត្តជាច្រើនអាច នឹងជំនន់ទឹកភ្លៀង។

ក្រសួងទេសចរណ៍ បានលើកឡើងថា ដើម្បីធានាសន្តិសុខ និងសុវត្ថិភាពដល់ភ្ញៀវទេសចរ ដែលមកទស្សនា ក្នុងប្រទេសកម្ពុជា ជាពិសេសបណ្តារាជធានី-ខេត្តដែលទទួលរងឥទ្ធិពលខាងលើនេះ សូមប្រធានមន្ទីរ ទេសចរណ៍រាជធានី-ខេត្ត ធ្វើការផ្សព្វផ្សាយ និងណែនាំដល់ម្ចាស់មូលដ្ឋានអាជីវកម្ម សេវាកម្មទេសចរណ៍ ប្រតិបត្តិករទេសចរណ៍ និងភ្ញៀវទេសចរទាំងអស់ឱ្យបង្កើនការប្រុងប្រយ័ត្ន និងយកចិត្តទុកដាក់ខ្ពស់ ដើម្បីចៀសវាងនូវគ្រោះថ្នាក់ និងជំងឺផ្សេងៗដែលអាចកើតឡើងជាយថាហេតុ៕


ក្រសួងធនធានទឹក បញ្ជាក់ស្ថានភាពកម្ពស់ទឹកជំនន់ នៅតាមស្ថានីយជលសាស្ត្រ ប្រចាំថ្ងៃទី១៣ ខែតុលានេះ

ក្រសួងធនធានទឹក និងឧតុនិយម នៅព្រឹកថ្ងៃទី១៣ ខែតុលា ឆ្នាំ២០១៧នេះ បានចេញព្រឹត្តិបត្រព័ត៌មាន និងព្យាករណ៍កម្ពស់ទឹកជំនន់ នៅតាមបណ្តាស្ថានីយជលសាស្ត្រទាំង៨ រួមមានស្ថានីយ៖
១-ទន្លេមេគង្គ-ស្ទឹងត្រែង
២-ទន្លេមេគង្គ-ក្រចេះ
៣-ទន្លេមេគង្គ-កំពង់ចាម
៤-ទន្លេបាសាក់-ចតុមុខ
៥-ទន្លេមេគង្គ-អ្នកលឿង
៦-ទន្លេបាសាក់-កោះខែល
៧-ទន្លេសាប-ព្រែកក្តាម
៨-ទន្លេសាប-កំពង់លួង

សូមអានព្រឹត្តិបត្រព័ត៌មាន និងព្យាករណ៍កម្ពស់ទឹកជំនន់ របស់ក្រសួងធនធានទឹក ពីស្ថានភាពកម្ពស់ទឹក នៅតាមបណ្តាស្ថានីយជលសាស្ត្រ ដូចខាងក្រោម៖


ជម្រើសនគរ៖ តម្លៃសន្តិភាព និងប្រជាធិបតេយ្យ

មុននឹងចាប់ផ្តើមនិយាយអំពីជម្រើសរបស់នគរខ្មែរ យើងគួរចាប់ផ្តើមឆ្លើយដោយភាពប្រាកដ និយមទៅនឹង សំណួរថា តើកម្ពុជាជាគោលដៅនៃការ ផ្លាស់ប្តូររបបដឹកនាំតាមបែបបដិវត្តន៍ពណ៌ ដោយអាមេរិកដែរឬទេ? សំណួរនេះបានកើតឡើង បន្ទាប់ពីការបែកធ្លាយវីដេអូឃ្លីប ដែលក្នុងនោះ មេដឹកនាំបក្ស ព្រះអាទិត្យ បាននិយាយ យ៉ាងច្បាស់ និងប្រកបដោយអំនួតអំពីផែនការ សម្ងាត់ក្នុងការផ្តួលរំលំរបបដឹកនាំកម្ពុជា តាមការបង្គាប់បញ្ជារបស់អាមេរិក ដោយយកគំរូនៃការធ្វើបដិវត្តន៍ពណ៌ នៅអតីតប្រទេសយូហ្គោស្លាវី។

សំណួរនេះក៏បានកើតឡើង បន្ទាប់ពីព្រឹត្តិការណ៍ នៃការប្រមូលផ្តុំមនុស្សធ្វើបាតុកម្មទ្រង់ទ្រាយធំ ដែលបក្ស ព្រះអាទិត្យ បានហៅថា ជាមហាបាតុកម្ម បន្ទាប់ការចោទប្រកាន់អំពីភាពមិនប្រក្រតីនៃការបោះឆ្នោត ដើម្បីបដិសេធលទ្ធផលនៃការបោះឆ្នោត។ សំណួរនេះក៏បានកើតឡើង បន្ទាប់ពីមេដឹកនាំបក្សព្រះអាទិត្យ បាននិយាយជាច្រើនលើកអំពីផែនការផ្តួលរំលំបក្សទេវតា ដោយនិយាយអំពីរបៀប ធ្វើតាមបែប បដិវត្តប្រជាជន។ សំណួរនេះបានកើតឡើងបន្ទាប់ពីបក្ស ព្រះអាទិត្យបានបញ្ជូនយុវជនរបស់ខ្លួនទៅបរទេស ដើម្បីទទួលការបណ្តុះបណ្តាលមេរៀនអំពីរបៀបធ្វើបដិវត្តន៍ពណ៌ ដែលបង្រៀនដោយអង្គការ Canvas ដែលល្បីល្បាញខាងការធ្វើបដិវត្តន៍ពណ៌នៅក្នុងពិភពលោកកន្លងមក? មេរៀននៃការធ្វើបដិវត្តន៍ ពណ៌ទាំងនេះ មានជាវីដេអូជាច្រើនវគ្គ មានការពន្យល់យ៉ាងល្អិតល្អន់ ដែលមានបកប្រែជាភាសាខ្មែរ ហើយបង្ហោះផ្សាយតាមអ៊ិនធើណែត ក្នុងគោលដៅបំផុសយុវជនខ្មែរក្នុង ស្រុកបន្ថែមទៀត។

សំណួរនេះបានកើតឡើងបន្ទាប់ពីមានភស្តុតាងយ៉ាងច្បាស់លាស់អំពីតួនាទីស្នូលរបស់អាមេរិក ក្នុងការដឹកនាំ និងចាត់តាំងអនុវត្តការធ្វើបដិវត្តពណ៌ ឬផ្លាស់ប្តូររបបដឹកនាំនៃរដ្ឋបរទេស។ ភស្តុតាងនេះមាន ការទទួលស្គាល់ ពីលោក ដូណាល់ ត្រាំ ប្រធានាធិបតីទី ៤៥ របស់អាមេរិក ដែលបានបង្ហាញនូវនយោបាយថ្មីរបស់អាមេរិក ក្នុងការបញ្ឈប់ដើរផ្តួលរំលំរបបដឹកនាំនៃរដ្ឋបរទេស។ សំណួរនេះបានកើតឡើងបន្ទាប់ពីតួអង្គ សំខាន់ៗនៃការ ធ្វើបដិវត្តន៍ពណ៌បានមកដល់ និងមានវត្តមាននៅកម្ពុជា ហើយអាមេរិកបានវិនិយោគជា ច្រើនដោយផ្តល់លុយ រាប់រយលានដុល្លារ ទៅអង្គការមិនមែនរដ្ឋាភិបាល ដើម្បីធ្វើសកម្មភាពញុះញង់ និងបំផុសចលនា ប្រជាជន ជាដុំជាដុំ ដើម្បីប្រឆាំងរដ្ឋអំណាចក្រោមផ្លាកសិទ្ធិមនុស្ស។ សំណួរនេះ បានកើតឡើង បន្ទាប់ពីបានមើល ឃើញតួនាទីស្នូលរបស់ទូតអាមេរិកនៅកម្ពុជា ដែលសកម្ម និងលូកដៃជ្រៅ ក្នុងកិច្ចការងាររបស់នគរខ្មែរ ដូចជា ការបង្កើតក្រុមប្រឹក្សាយុវជនកម្ពុជា និងការចំណាយលុយ ដើម្បីផ្សាយពាណិជ្ជកម្មហ្វេសប៊ុករបស់ទូតអាមេរិក នៅកម្ពុជា។ សំណួរនេះ បានកើតឡើង បន្ទាប់ពីមានរឿងវិនាសកម្មជាច្រើនបានកើតឡើង នៅតំបន់មជ្ឈិមបូព៌ា បន្ទាប់ពីការធ្វើបដិវត្តពណ៌បរាជ័យ។

ផែនការនៃការធ្វើបដិវត្តពណ៌ ដើម្បីផ្តួលរំលំរបបដឹកនាំរបស់ប្រទេសមួយ វាកិច្ចការរដ្ឋ ដែលត្រូវលាក់ការណ៍ជា សម្ងាត់ ហើយនេះជារឿងធម្មតា។ វាជារឿងធម្មតាដែរ ដែលបញ្ញាវន្តខ្មែរខ្លះ និងយុវជនខ្មែរខ្លះ ដែលមិនអាចដឹង អំពីផែនការសំងាត់ទាំងនេះ ហើយវិភាគយល់ឃើញអំពីគុណសម្បត្តិដ៏ធំធេងរបស់ អាមេរិកចំពោះកម្ពុជា ក្នុងការលើកកំពស់ប្រជាធិបតេយ្យ ហើយភ្លេចនឹកឃើញអំពីរឿងអាមេរិក ដែលបានបង្កសង្រ្គាម និងទំលាក់ គ្រាប់បែកលើក្បាលខ្មែរ ក្នុងដីខ្មែរ ក្នុងអតីតកាល។ វាក៏ជារឿងធម្មតាដែរ ដែលបញ្ញាវន្តខ្លះ និងយុវជនខ្មែរ ភ្លេចសំឡឹងមើលនគរក្បែរខាងរបស់នគរខ្មែរដែលរស់នៅបានដោយសុខសាន្ត និងដោយរីកចម្រើន ដោយគ្មាន បក្សប្រឆាំងដែលប្រឆាំងអុកឡុកដើម្បីអំណាច។ នគរក្បែរខាងកម្ពុជា មិនទាន់មាននគរណា មួយអវសាន ឡើយ។ ជម្រើសនគរខ្មែរ គឺត្រូវកំណត់អាទិភាពនៃតំលៃជាតិ ជីវិតជាតិ។ សន្តិភាព គឺជាជីវិតជាតិ ដែលគួរត្រូវ ការពារអោយបានដាច់ខាត បន្ទាប់មក ប្រជាធិបតេយ្យសេរី បន្ទាប់មក កសាងនគរមួយដែលរុងរឿង. . . ។ មានរឿងនយោបាយជាច្រើនដែលបញ្ញាវន្ត និងយុវជនខ្មែរខ្លះមិនបានដឹង តើបក្សភ្លើងទៀន និងបក្សលោកខែ ចូលគ្នាជាបក្សព្រះអាទិត្យដោយសារតែ ការផ្តួចផ្តើមរបស់ខ្មែរ ឬដោយសារបរទេស ចាប់ឱ្យបញ្ចូលគ្នា?

នគរខ្មែរបច្ចុប្បន្នក្រោមការដឹកនាំរបស់សម្តេចតេជោ ហ៊ុន សែនគឺពោរពេញ ដោយសន្តិភាព សេចក្តីសុខ និងការអភិវឌ្ឍ។ សន្តិភាពដែលកម្ពុជាមានបច្ចុប្បន្ននេះគឺ ចេញពីការអនុវត្តនយោ បាយឈ្នះ-ឈ្នះរំលាយ អង្គការចាត់ តាំងនយោបាយនិងយោធាខ្មែរក្រហមទទួលបានជោគជ័យនៅចុងឆ្នាំ ១៩៩៨។

កម្ពុជាបានដើរចេញ ពីអតីតកាលដ៏ សោកសៅដែលពោរពេញដោយសង្គ្រាមហែកហួរ អំពើប្រល័យពូជ សាសន៍ ការសង សឹកគ្នា អសន្តិសុខ។ ប្រជាជនរស់នៅក្នុងស្ថានភាពសន្តិភាពផងសង្គ្រាមផង និងរងនូវ ទណ្ឌកម្មសេដ្ឋកិច្ច និងពោរពេញដោយភាពក្រីក្រ។ ប៉ុន្តែពេលនេះកម្ពុជាពិតមិនដូចអ្វី នៅលើទំព័រ សារព័ត៌មានបរទេស និងជនបរទេសមួយចំនួននោះឡើយ។ កម្ពុជាពេលនេះពោរពេញដោយការអភិវឌ្ឍ កំណើនសេដ្ឋកិច្ចជាង ៧%ក្នុងមួយឆ្នាំបានក្លាយជាកូន ខ្លានៅអាស៊ី និងជាប្រទេសដែលបានកាត់បន្ថយ ភាពក្រីក្របានយ៉ាងច្រើនពី ១០០%នៅ ឆ្នាំ ១៩៧៩ មកនៅត្រឹមជាង ១០%នៅឆ្នាំ២០១៦ ហើយកម្ពុជាបាន ចាកពីប្រទេសមានចំណូលកម្រិតទាប មកជាប្រទេសមានចំណូលមធ្យមកម្រិតទាប។ កម្ពុជាបានប្រែពី ប្រទេសដែលទទួលទាហានមួកខៀវអង្គការ សហប្រជាជាតិមកជាប្រទេសបញ្ជូនកងទ័ព មួកខៀវក្នុងក្របខ័ណ្ឌអង្គការសហប្រជាជាតិក្នុងបេសកកម្មមនុស្សធម៌។

ទោះក្នុងតម្លៃណាក៏ដោយ កម្ពុជានឹងការពារឱ្យបាននូវសន្តិភាព និងការអភិវឌ្ឍដែលខ្លួនមាន មិនឱ្យក្រុមជន ក្បត់ ជាតិ បំផ្លាញបានឡើយ។ កម្ពុជារងគ្រោះ គ្មានបរទេសណារងគ្រោះជាមួយឡើយ! អតីតកាលនៃប្រទេស កម្ពុជាបានបង្ហាញនូវសោកនាដកម្មយ៉ាងជូរចត់ដោយសារតែការលូកដៃរបស់បរទេសក្នុងកិច្ចការ ផ្ទៃក្នុងខ្មែរ ក្នុងនោះ សម័យសាធារណរដ្ឋខ្មែររបស់សេនាប្រមុខ លន់ នល់ ជាឧទាហរណ៍ស្រាប់ដែលធ្វើ ឱ្យខ្មែររងការ បំផ្លាញខ្ទេចខ្ទី ដោយសារតែគ្រាប់បែកចង្កោម និងគ្រាប់បែកគីមីរបស់អាមេរិក។

ពេលនេះការលុបបំបាត់បក្សប្រឆាំងឧទ្ទាម ក្នុងប្រជាធិបតេយ្យនៅកម្ពុជាគឺជាភាព ចាំបាច់ដើម្បីការពារ រដ្ឋធម្មនុញ្ញ សន្តិភាពនិងការអភិវឌ្ឍរបស់កម្ពុជា។ កម្ពុជារឹងមាំជានិច្ចនៅចំពោះមុខនៃការជ្រៀតជ្រែក កិច្ចការផ្ទៃក្នុងរបស់ខ្លួនពីសំណាក់បរទេសមួយចំនួន និងប្រឆាំងដាច់ខាតការទាញកម្ពុជា ទៅធ្វើអាយ៉ងបរទេសដូចដែលបក្សសង្គ្រោះជាតិអនុវត្ត។

ហេតុដូច្នេះការធ្វើវិសោធនកម្មដើម្បីប្រសិទ្ធភាពនៃការអនុវត្តច្បាប់ការប្តឹងរំលាយបក្សសង្គ្រោះជាតិគឺជាការក ម្ចាត់ប្រភពជនក្បត់ជាតិ និងរកអ្នកទទួលខុសត្រូវចំពោះទង្វើក្បត់កម្ពុជានេះ! កម្ពុជាផ្តល់នូវបរិយាកាស អំណោយផល និងប្រកបដោយសុវត្ថិភាពជូនប្រជាជនកម្ពុជា ដើម្បីអនុវត្តនូវសិទ្ធិសេរីភាពក្នុងការបញ្ចេញមតិ និងការប្រមូលផ្តុំដែល គោរពតាមច្បាប់មានជាធរមាន។

កម្ពុជាប្រឆាំងដាច់ខាតការផ្តួលរំលំរដ្ឋាភិបាលស្របច្បាប់តាមរូបភាពបដិវត្តន៍ពណ៌។ អរគុណបរទេសទាំងឡាយដែលបារម្ភពីខ្មែរ ប៉ុន្តែក្រោយរំលាយបក្សសង្គ្រោះជាតិ លទ្ធិប្រជាធិបតេយ្យ សិទ្ធិមនុស្ស និងសេរីភាពនៅកម្ពុជានឹងបោះជំហានទៅមុខលឿនជាងនេះ ព្រោះបក្សក្បត់ជាតិត្រូវបាន ដួលរលំ គ្មានអ្នកបំផ្លាញជាតិដើម្បីបរទេសទៀតឡើយ។ កម្ពុជាកំពុងមានវិស័យព័ត៌មានដ៏រស់រវើក សង្គមស៊ីវិលដែល សកម្ម និងគណបក្សនយោបាយមានតួនាទី សកម្មក្នុងការការពារជាតិ ការពារសន្តិភាព និងការអភិវឌ្ឍ និងជឿ ជាក់ថា ជាសង្គមប្រជាធិបតេយ្យមួយនៅលើពិភពលោក។

ដូច្នេះជម្រើសនគរខ្មែរ ជាជម្រើសជាតិ ជម្រើសសន្តិភាព និងប្តេជ្ញាចិត្តបន្តលើផ្លូវប្រជាធិបតេយ្យសេរីពហុបក្ស ដែលមិនបំផ្លាញសន្តិភាពដើម្បីជាតិមានជីវិត និងដើរទៅមុខជានិច្ច។ ប្រជាធិបតេយ្យគ្មាននីតិរដ្ឋ គឺអនា ធិបតេយ្យ។ នីតិរដ្ឋក៏ជាមធ្យោបាយតែមួយគត់ ដើម្បីបញ្ចប់បដិវត្តន៍ពណ៌ មុនពេលកម្ពុជាត្រូវបានបំផ្លាញ ដោយដៃបក្សព្រះអាទិត្យ ធ្លាក់ចូលទៅក្នុងវិនាសកម្ម ដូចនៅស៊ីរី ឬលីបី៕


អភិបាលខេត្តព្រះសីហនុ អញ្ជើញចូលរួមបិទសិក្ខាសាលា ស្តីពីសិទ្ធិដីធ្លី និងសិទ្ធិលំនៅឋាន តាមបទដ្ឋានជាតិ និងអន្តរជាតិ

លោក យន្ត មីន អភិបាលនៃគណអភិបាលខេត្តព្រះសីហនុ ថ្ងៃទី១១ ខែតុលា ឆ្នាំ២០១៧ បានអញ្ជើញចូល រួមបិទសិក្ខា សាលា ស្តីពីសិទ្ធិដីធ្លី នឹងសិទ្ធិលំនៅឋានតាមបទដ្ឋានជាតិ និងបទដ្ឋានអន្តរជាតិ។ នាឱកាសនោះលោកអភិបាលខេត្ត ក៏បានអោយដឹងថា នៅក្នុងប្រទេសកម្ពុជា មានបញ្ហាដីធំៗចំនួន៧កន្លែង ក្នុងនោះក៏មានខេត្តព្រះសីហនុ យើងផងដែរ។

លោកក៏បានសាទរដល់សិក្ខាកាមទាំងអស់ ហើយក៏បានសំនូមពរអោយសិក្ខាកាមទាំងអស់ យកចំណេះ ដឹង ទៅប្រើអោយបានត្រឹមត្រូវ តាមបទដ្ឋាន នឹងសូមអោយជួយចូលរួមគ្នាថែរក្សាបរិស្ថាន ព្រោះខេត្តព្រះសីហនុ យើងក៏ជាបេក្ខភាព១ក្នុងចំណោម៨ ក្នុងការប្រលងប្រជែងទីក្រុងស្អាត និងឆ្នេរស្អាត។ លោក យន្ត មីន ក៏បានបង្ហាញពីឆន្ទៈរបស់លោក ក្នុងការដឹកនាំខេត្តព្រះសីហនុយើងទាំងមូល និងបានចែករំលែក នូវបទពិសោធន៍កន្លងមក របស់លោកផងដែរ៕





កូនខ្មែរម្នាក់​បានបង្កើត​ម៉ាស៊ីនដោះមីន​ ដើម្បីជួយកម្ពុជា​ ឲ្យរួចផុតពី​គ្រោះថ្នាក់​ដោយសារ​គ្រាប់មីន​

ភ្នំពេញ៖ ក្នុងជំនួបពិភាក្សាការងារជាមួយលោក លី ធុច ទេសរដ្ឋមន្ត្រី និងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី១២ ខែតុលា ឆ្នាំ២០១៧ លោក Richard នាយកប្រតិបត្តិក្រុមហ៊ុន DeminRobotie ជាកូនខ្មែរម្នាក់ដែលបានបន្តការសិក្សានៅប្រទេសកាណាដា បានបង្កើតម៉ាស៊ីនដោះមីនក្នុងគោលបំណងជាធំគឺដើម្បីជួយកម្ពុជា ឲ្យរួចផុតពីគ្រោះថ្នាក់ដោយសារគ្រាប់យុទ្ធភ័ណ្ឌមិនទាន់ផ្ទុះ និងជួយពន្លឿនដល់ដំណើរការកម្ចាត់គ្រាប់មីននៅកម្ពុជា។

លោក Richard បានឲ្យដឹងបន្តថា ម៉ាស៊ីនដោះមីននេះត្រូវបានឆ្លងកាត់ការស្រាវជ្រាវ និងធ្វើតេស្តជាច្រើនដងដើម្បីធានាបានថា វាមានប្រសិទ្ធភាពមុននឹងយកមកប្រើប្រាស់ក្នុងប្រទេសកម្ពុជា ហើយម៉ាស៊ីននេះក៏ត្រូវបានទទួលស្គាល់ពីស្ថាប័នជាច្រើន និងរដ្ឋកាណាដាដែលគាត់រស់នៅផងដែរ។ ម៉ាស៊ីននេះនឹងត្រូវបញ្ជូនមកកម្ពុជា នៅឆ្នាំ២០១៨ខាងមុខនេះ។

លោកទេសរដ្ឋមន្ត្រី លី ធុច ក៏បានសម្ដែងនូវការស្វាគមន៍ចំពោះការបង្កើតម៉ាស៊ីនដោះមីនដើម្បីយកមកជួយប្រជាជនកម្ពុជានេះ ហើយលោកនឹងបន្តការគាំទ្រ សហការគ្រប់បែបយ៉ាងដើម្បីឲ្យគម្រោងមួយនេះទទួលបានជោគជ័យផ្ដល់ផលប្រយោជន៍ដល់ប្រជាជនកម្ពុជា ឲ្យរួចផុតពីគ្រោះថ្នាក់បង្កដោយគ្រាប់មីន៕


(សូមទស្សនាវីដេអូ) វិទ្យាស្ថាន ពលរដ្ឋវិជ្ជា៖ គ្មានក្រុមនយោបាយឧទ្ទាមក្នុងរបបប្រជាធិបតេយ្យសេរីពហុបក្ស ជាចំណុច វិជ្ជមានដ៏ចាំបាច់