Friday, November 02, 2018

អបអរសាទរសមិទ្ធផលថ្មីៗ របស់រដ្ឋបាលខេត្តស្វាយរៀងសម្រេចបាន ដែលឆ្លើយតបទៅនឹងសេចក្តីត្រូវការរបស់ប្រជាពលរដ្ឋ

ស្វាយរៀង៖ ក្រោមការដឹកនាំរបស់ក្រុមប្រឹក្សាខេត្ត គណៈអភិបាលខេត្ត ពិសេស ការខិតខំយកចិត្តទុកដាក់​របស់លោក ម៉ែន វិបុល អភិបាលខេត្ត ក្នុងនាមក្រុមប្រឹក្សាខេត្ត បានធ្វើឲ្យខេត្តស្វាយរៀង មានការអភិវឌ្ឍរីក ចម្រើនលើគ្រប់វិស័យ ឆ្លើយតបទៅនឹងសេចក្តីត្រូវការ និងសំណូមពរ របស់ប្រជាពលរដ្ឋ។ ជាពិសេសការអភិវឌ្ឍលើហេដ្ឋារចនាសម្ព័ន្ធសាធារ ណៈ ផ្លូវអ៊ុតបេទីមAC ចំនួន៥ខ្សែបន្ថែមទៀត នៅក្នុងក្រុងស្វាយរៀង បាននឹងកំពុងចាប់ផ្តើមស្ថាបនាចាប់ពី ថ្ងៃទី២ ខែវិច្ចិកា ឆ្នាំ២០១៨នេះ ។
បន្ទាប់ពីមានការសាងសង់សួនច្បារ ការដាក់ភ្លើងស្តុបនៅតាមដងផ្លូវ សំខាន់ៗមួយចំនួនក្នុងក្រុងស្វាយរៀង ការសាងសង់ច្រាំងទន្លេវ៉ៃគោ (ទំនប់តាណេង) រដ្ឋបាលខេត្ត ក៏បានធ្វើការជួសជុលផ្លូវអ៊ុតបេទីម AC ចំនួន ៥ខ្សែបន្ថែមទៀតនៅចុងឆ្នាំ២០១៨នេះ។ បន្ទាប់ពីបានជួសជុល អ៊ុតបេទីមAC ចំនួន៩ខ្សែរួចហើយ​នាឆ្នាំ​កន្លងទៅ ស្ថិតក្នុងក្រុងស្វាយរៀង យើងនេះ ដើម្បីកែលម្អសោភ័ណភាព និងភាពស្រស់បំព្រង ចូលរួម ចំណែកការប្រឡងប្រណាំងទីក្រុងស្អាតប្រចាំឆ្នាំផងដែរ ។
ដោយឡែក ចំពោះផ្លូវជនបទ នៅតាមមូលដ្ឋានភូមិ ឃុំ សង្កាត់មួយចំនួន ដែលរងការខូចខាតដោយសារ​ជំនន់ទឹកភ្លៀងនារដូវវស្សា ឆ្នាំ២០១៨នេះ អាជ្ញាធរខេត្ត ក៏មានការគិតគូរធ្វើការជួសជុលឡើងវិញផងដែរ ៕





កម្ពុជារៀបចំបញ្ជូនកងទ័ពមួកខៀវ ២១៦នាក់ទៀត ទៅបំពេញបេសកកម្មរក្សាសន្តិភាព នៅសាធារណរដ្ឋអាហ្វ្រិកកណ្តាល

នៅថ្ងៃទី២ ខែវិចិ្ឆកា ឆ្នាំ២០១៨នេះ កម្ពុជាបានបញ្ជូនកងវិស្វកម្មលេខ៥៩៤ ចំនួន២១៦នាក់ទៀត ទៅចូលរួមបេសកកម្មរក្សាសន្តិភាព ក្រោមស្លាកអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល។ ក្នុងចំណោម កងវិស្វកម្មលេខ៥៩៤ ចំនួន២១៦នាក់ មានកងនារី១០នាក់ផងដែរ។
ពិធីជូនដំណើរកងវិស្វកម្មលេខ៥៩៤ ទាំង២១៦នាក់ ប្រព្រឹត្តទៅក្រោមអធិបតីភាព នាយឧត្តមសេនីយ៍ ប៉ុល សារឿន ទេសរដ្ឋមន្រ្តី ទទួលបន្ទុកបេសកកម្មពិសេស នៅមូលដ្ឋានទ័ពអាកាសពោធិ៍ចិនតុង រាជធានីភ្នំពេញ។
ក្រៅពីរៀបចំពិធីជូនដំណើរដល់កងវិស្វកម្មលេខ៥៩៤ កម្ពុជាក៏រៀបចំកម្មវិធីមាតុភូមិនិវត្តន៍ នៃកងវិស្វកម្មលេខ៩៥៤ ចំនួន២១៦នាក់ ពីសាធាណរដ្ឋអាហ្វ្រិកកណ្តាល និងកងរាជអាវុធហត្ថ លេខ៦១៨ ចំនួន៧៣នាក់ ពីសាធារណរដ្ឋស៊ូដង់ខាងត្បូងផងដែរ។
កម្មវិធីពិធីមាតុភូមិនិវត្តន៍ នឹងត្រូវបានរៀបចំឡើង ក្រោមអធិបតីភាព លោកឧបនាយករដ្ឋមន្រ្ដី ទៀ បាញ់ រដ្ឋមន្ត្រីក្រសួងការពារជាតិ តំណាង លោកនាយករដ្ឋមន្រ្ដី ហ៊ុន សែន នៅវេលាម៉ោង ៨:០០នាទីព្រឹក ថ្ងៃទី៥ ខែវិច្ឆិកា ឆ្នាំ២០១៨ នៅមូលដ្ឋានទ័ពអាកាសពោធិ័ចិនតុង រាជធានីភ្នំពេញ។
បើតាមសេចក្តីប្រកាសដែលចេញដោយ នាយឧត្តមសេនីយ៍ ឈុំ សុជាត, កងវិស្វកម្ម លេខ៥៩៤ គឺជាកងវិស្វកម្ម លើកទី៥ហើយ ដែលត្រូវបញ្ជូន ទៅចូលរួមបេសកកម្មរក្សាសន្តិភាព នៅសាធារណរដ្ឋអាហ្វ្រិកកណ្តាល ហើយកងនេះ នឹងត្រូវទៅប្តូរវេនជំនួសកងវិស្វកម្មលេខ៩៥៤ ដែលបានសម្រេចភារកិច្ចដោយជោគជ័យ ក្នុងបេសកកម្មរក្សាសន្តិភាព អាណត្តិ១ឆ្នាំរបស់ខ្លួន នៅសាធាណរដ្ឋអាហ្វ្រិកកណ្តាល ៕







ខេត្តកំពត បើកសិក្ខាសាលាផ្សព្វផ្សាយប្រកាសស្ដីពីការអភិវឌ្ឍដី និងឯកសារគតិយុត្ត​ ពាក់ព័ន្ធ​ និងការងាររៀបចំ​ដែនដីនគរូបនីយកម្ម​ សំណង់ ​និងសុរិយោដី​

កំពត៖ នៅថ្ងៃទី០២ ខែវិច្ឆិកា ឆ្នាំ២០១៨នេះ នៅសាលាខេត្តកំពត លោក ប៉ឹល កុសល អភិបាលរងខេត្ត តំណាងលោក ជាវ តាយ អភិបាលនៃគណៈអភិបាលខេត្តកំពត បានអញ្ជើញជាអធិបតី ក្នុងអង្គសិក្ខាសាលាផ្សព្វផ្សាយប្រកាសស្ដីពីការអភិវឌ្ឍដី និងឯកសារគតិយុត្ត ពាក់ព័ន្ធ និងការងាររៀបចំដែនដីនគរូបនីយកម្ម សំណង់ និងសុរិយោដី។
សិក្ខាសាលានេះ ក៏មានការអញ្ជើញចូលរួមពីនាយករដ្ឋបាលខេត្ត ក្រុង ស្រុក ឃុំ សង្កាត់ មន្ត្រីរាជការ មន្ទីរអង្គភាពពាក់ព័ន្ធ ដៃគូអភិវឌ្ឍន៍ និងវិស័យឯកជនក្នុងខេត្តសរុបប្រមាណ២៥០នាក់៕


លោកស្រី ប៊ុន រ៉ានី ហ៊ុនសែន ចុះសួរសុខទុក្ខ និងចែកអំណោយ ជូនដល់ប្រជាពលរដ្ឋងាយរងគ្រោះ ជិត២ពាន់គ្រួសារ នៅខេត្ដកំពង់ឆ្នាំង

កំពង់ឆ្នាំង៖ លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងគណៈប្រតិភូអមដំណើរ នៅថ្ងៃទី២ ខែវិច្ឆិកា ឆ្នាំ២០១៨នេះ អញ្ជើញ ចុះសំណេះសំណាលសួរសុខទុក្ខ និងចែកអំណោយ ជូនប្រជាពលរដ្ឋ ចាស់ជរាគ្មានទីពឹង ស្ដ្រីមេម៉ាយកូនច្រើន កុមារកំព្រា ជនពិការ និងអ្នកកើត ឬអ្នកផ្ទុយមេរោគអេដស៍ចំនួន ១,៦៣៦គ្រួសារដែលមកពីចំនួន៧១ភូមិ ១១ឃុំ និងមកពីស្រុកចំនួន៤ ខេត្តកំពង់ឆ្នាំង។
ការអញ្ជើញចុះជួបសំណេះសំណាលសួរសុខទុក្ខ និងចែកអំណោយរបស់ប្រធាន កាកបាទក្រហមកម្ពុជា បានធ្វើឡើងនៅភូមិស្រែសាន ឃុំឈូកស ស្រុកកំពង់ត្រឡាច ខេត្ដកំពង់ឆ្នាំង។
សូមជម្រាបថា កាកបាទក្រហមកម្ពុជា ដែលមានលោកស្រី ជាប្រធាន, លោកតែង តែយកចិត្ដទុកដាក់ និងដោះស្រាយរាល់បញ្ហាប្រឈមរបស់ប្រជាពលរដ្ឋ គ្រប់មជ្ឈ ដ្ឋានដោយក្តីមេត្តា ករុណា គិតគូរ និងផ្តល់ក្តីសង្ឃឹម ជំនឿចិត្តដល់ប្រជាជនទូទៅ ដែលជួបការលំបាកដោយគ្មានការរើសអើង មិនប្រកាន់វណ្ណៈ ពូជសាសន៍ ពណ៌សម្បុរ សាសនា ឬនិន្នាការនយោបាយអ្វីឡើយ នៅទីកន្លែងណាមានទុក្ខលំបាក គឺមានកាក បាទក្រហមកម្ពុជា ៕





ប្រធានរដ្ឋសភា ទទួលជួបសវនាការជាមួយអនុប្រធានសភាតំណាងប្រជាជនចិន ដែលដឹកនាំគណៈប្រតិភូមកបំពេញទស្សនកិច្ចនៅកម្ពុជារយៈពេល ៤ថ្ងៃ

លោក ហេង សំរិន ប្រធានរដ្ឋសភាកម្ពុជា នៅថ្ងៃទី២ ខែវិច្ឆិកា ឆ្នាំ២០១៨នេះ ទទួល ជួបសវនាការជាមួយ អនុប្រធានសភាតំណាងប្រជាជនចិន លោក Zhang Chunxian ដែលបានដឹកនាំគណៈប្រតិភូមកបំពេញ ទស្សនកិច្ចនៅកម្ពុជា រយៈពេល៤ថ្ងៃ។
គណៈប្រតិភូជាន់ខ្ពស់សភាតំណាងប្រជាជនចិន ទូទំាងប្រទេសដឹកនាំដោយលោក Zhang Chunxian អនុប្រធានសភាតំណាងប្រជាជនចិនទូទំាងប្រទេស បានអញ្ជើញមកដល់ប្រទេសកម្ពុជាហើយ ដើម្បីបំពេញទស្សនកិច្ច រយៈពេល៤ថ្ងៃ ចាប់ពីថ្ងៃទី១ ដល់ថ្ងៃទី៤ ខែវិច្ឆិកា ឆ្នាំ២០១៨។
តាមគម្រោង នៅថ្ងៃទី២ ខែវិច្ឆិកា ឆ្នាំ២០១៨នេះ គណៈប្រតិភូជាន់ខ្ពស់សភាតំណាងប្រជាជនចិនទូទាំងប្រទេស ត្រូវជួបសម្តែងការគួរសម និងធ្វើសវនាការជាមួយថ្នាក់ដឹកនាំសំខាន់ៗ នៃ កម្ពុជា រួមមាន លោក ហេង សំរិន ប្រធានរដ្ឋសភា, លោក សាយ ឈុំ ប្រធានព្រឹទ្ធសភា, និងលោកនាយករដ្ឋមន្រ្ដី ហ៊ុន សែន ។
ដោយឡែក នៅព្រឹកថ្ងៃទី៣ ខែវិច្ឆិកា គណៈប្រតិភូនឹងធ្វើដំណើរទៅកាន់ខេត្តសៀមរាប ដើម្បីទស្សនាប្រាសាទ មួយចំនួនរបស់កម្ពុជា ៕




រដ្ឋបាលខេត្តកំពង់ឆ្នាំង ជូនដំណឹងពីការចុះកំណត់ព្រំ វាស់វែង និងប្រមូលទិន្នន័យ ក្បាលដី នៅភូមិស្រៃតាជ័យ ឃុំអភិវឌ្ឍន៍ ស្រុកទឹកផុស

កំពង់ឆ្នាំង៖ រដ្ឋបាលខេត្តកំពង់ឆ្នាំង បានចេញសេចក្តីជូនដំណឹងស្តីពីការចុះកំណត់ព្រំ វាស់វែង និងប្រមូលទិន្នន័យក្បាលដី នៅភូមិ ស្រៃតាជ័យ ឃុំអភិវឌ្ឍន៍ ស្រុកទឹកផុស បានជ្រាបជាសាធារណៈដោយគិតចាប់ពីថ្ងៃទី៦ ខែវិច្ឆិកា ឆ្នាំ២០១៨ តទៅ៕
ព័ត៌មានលម្អិត សូមអានសេចក្តីជូនដំណឹងមានដូចខាងក្រោម៖

លោក ត្រាំ អ៊ីវតឹក អញ្ជើញជាអធិបតីបើកសិក្ខាសាលាស្ដីពី «ការពង្រឹងសន្តិសុខបច្ចេកវិទ្យាគមនាគមន៍ និងព័ត៌មាន»

នៅព្រឹកថ្ងៃទី១ ខែវិច្ឆិកា ឆ្នាំ២០១៨ នៅសណ្ឋាគារសុខាភ្នំពេញ លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីបើកសិក្ខាសាលាស្ដីពី «ការពង្រឹងសន្តិសុខបច្ចេកវិទ្យាគមនាគមន៍ និងព័ត៌មាន» ក្រោមកិច្ចសហការរវាងក្រសួងប្រៃសណីយ៍និងទូរគមនាគមន៍ ជាមួយសមាគមមន្ត្រីទទួលបន្ទុកការងារបច្ចេកវិទ្យាគមនាគមន៍អាស៊ាន (ASEAN CIO Assosiation – ACIOA)។
សិក្ខាសាលានេះ មានការចូលរួមពីថ្នាក់ដឹកនាំ និងមន្ត្រីទទួលបន្ទុកការងារបច្ចេកវិទ្យាគមនាគមន៍និងព័ត៌មាន មកពីបណ្ដាក្រសួង-ស្ថាប័ន ក្រុមហ៊ុនដែលទើបបង្កើតថ្មី (start-up) និងក្រុមហ៊ុនដែលពាក់ព័ន្ធក្នុងវិស័យឧស្សាហកម្មបច្ចេកវិទ្យាគមនាគមន៍និងព័ត៌មានប្រមាណ១២០នាក់។ គោលបំណងនៃសិក្ខាសាលាគឺដើម្បីស្វែងយល់ពីតួនាទីសន្តិសុខនៅក្នុងបដិវត្តន៍ឧស្សាហកម្មជំនាន់ទី៤ ទស្សនៈជាសកលអំពីបញ្ហាប្រឈមនៃការស្ថាបនាប្រព័ន្ធសន្តិសុខ និងនិន្នាការថ្មីៗនៃការវាយប្រហារតាមប្រព័ន្ធអ៊ីនធឺណិតលើស្ថាប័នរដ្ឋ និងឯកជន។
មានប្រសាសន៍បើកអង្គសិក្ខាសាលានាឱកាសនោះ លោករដ្ឋមន្ត្រី ត្រាំ អ៊ីវតឹក បានគូសបញ្ជាក់ពីមូលហេតុដែលនាំឱ្យមានការរៀបចំសិក្ខាសាលានេះឡើងរួមជាមួយភាពកាត់ផ្ដាច់ពុំបាននៃសន្តិសុខបច្ចេកវិទ្យាគមនាគមន៍ និងព័ត៌មាននៅក្នុងដំណើរការអភិវឌ្ឍន៍សេដ្ឋកិច្ចឌីជីថល និងសមិទ្ធផលទាក់ទងនឹងការពង្រឹងសន្តិសុខដែលសម្រេចបាននាពេលកន្លងមកជូនអង្គសិក្ខាសាលាបានយល់ដឹងផងដែរ៕




លោក ប៉ាន សូរស័ក្តិ ស្នើសហរដ្ឋអាមេរិកជួយពង្រឹងសមត្ថភាពមន្ត្រីកាំកុងត្រូល លើការងារត្រួតពិនិត្យសុវត្ថិភាពម្ហូបអាហារនៅកម្ពុជា

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានស្នើសហរដ្ឋអាមេរិក ជួយបណ្តុះបណ្តាលមន្ត្រីនៃអគ្គនាយកដ្ឋានកាំកុងត្រូល លើការងារត្រួតពិនិត្យ និងគ្រប់គ្រងសុវត្ថិភាពម្ហូបអាហារ នៅក្នុងប្រទេសកម្ពុជា ដើម្បីពង្រឹងសិទ្ធភាពការងារ និងធានាការលើកម្ពស់សុខមាលភាពជូនប្រជាពលរដ្ឋ និងភ្ញៀវទេសចរគ្រប់ជាតិសាសន៍។
លោកបានលើកឡើងដូចនេះក្នុងឱកាសទទួលជួបពិភាក្សាការងារជាមួយ លោក William A. Heidt ឯកអគ្គរដ្ឋទូតសហរដ្ឋអាមេរិក ដែលនឹងត្រូវបញ្ជប់បេសកកម្មការទូតនៅក្នុងប្រទេសកម្ពុជា កាលពីព្រឹកថ្ងៃព្រហស្បតិ៍ ទី១ ខែវិច្ឆិកា ឆ្នាំ២០១៨ នៅក្នុងបន្ទប់ប្រជុំតាព្រហ្ម នៃទីស្តីការក្រសួងពាណិជ្ជកម្ម។
នៅក្នុងឱកាសនោះ លោករដ្ឋមន្ត្រី ប៉ាន សូរស័ក្តិ បានជម្រាបជូន ឯកអគ្គរដ្ឋទូតសហរដ្ឋអាមេរិក អំពីកំណែទម្រង់របស់ក្រសួងពាណិជ្ជកម្ម និងកាតព្វកិច្ចស្នូលរបស់អគ្គនាយកដ្ឋានកាំកុងត្រូល ដែលទទួលខុសត្រូវលើបញ្ហាសុវត្ថិភាពម្ហូបអាហារ កិច្ចការពារអ្នកប្រើប្រាស់ និងការប្រកួតប្រជែងធុរកិច្ចដោយសមធម៌។
ជាការឆ្លើយតប លោក William A. Heidt បានទទួលយកសំណើរបស់លោករដ្ឋមន្ត្រី និងបានសន្យាធ្វើការបន្តជាមួយរដ្ឋបាលចំណីអាហារ និងថ្នាំពេទ្យ (FDA) ដែលជាទីភ្នាក់ងារសហព័ន្ធ ចំណុះឱ្យក្រសួងសុខាភិបាលសហរដ្ឋអាមេរិក ដើម្បីស្វែងរកគំរូឧត្តមានុវត្តន៍ (ការអនុវត្តល្អបំផុត) សម្រាប់ពង្រឹងការលើកកម្ពស់សុវត្ថិភាពម្ហូបអាហារ នៅក្នុងប្រទេសកម្ពុជា។
លើសពីនេះ លោកឯកអគ្គរដ្ឋទូតសហរដ្ឋអាមេរិក ក៏បានថ្លែងអំណរគុណចំពោះ លោករដ្ឋមន្ត្រី ដែលកន្លងមក បានផ្តល់ការគាំទ្រចំពោះវត្តមានសភាពាណិជ្ជកម្មសហរដ្ឋអាមេរិក (AmCham) និងកិច្ចសហការល្អជាមួយស្ថានទូត ក្នុងការរៀបចំទស្សនកិច្ចសិក្សា និងវេទិកាជំនួបធុរកិច្ចផ្សេងៗ ហើយឯកឧត្តម នឹងស្នើឯកអគ្គរដ្ឋទូតថ្មី អញ្ជើញវិស័យឯកជនកម្ពុជា ទៅចូលរួមព្រឹត្តិការណ៍ពិព័រណ៍ពាណិជ្ជកម្ម នៅក្នុងសហរដ្ឋអាមេរិក ឱ្យបានកាន់តែច្រើន ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មនៃប្រទេសទាំងពីរ៕


អាជ្ញាធរជាតិអប្សរា​ នឹងចាប់ផ្តើម​ជួសជុលផ្លូវថ្នល់​ឡើងវិញ​ទាំងអស់នៅចុង​ ឆ្នាំ២០១៨​​ នេះតទៅ​

រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា លោកស្រី ភឿង សកុណា បានមាន​ប្រសាសន៍ថា ផ្លូវថ្នល់ដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា នឹងត្រូវធ្វើការជួសជុលឡើងវិញទាំងអស់នៅចុងឆ្នាំ ២០១៨ខាងមុននេះតទៅ។
លោកស្រីបានថ្លែងបែបនេះ ក្នុងកិច្ចប្រជុំលើកដំបូងនៃគណៈកម្មការអន្ដរក្រសួង ដើម្បីសិក្សារៀបចំផែនការមេសម្រាប់ការអភិវឌ្ឍវិស័យទេសចរណ៍ខេត្តសៀមរាប ដែលធ្វើឡើងនៅរដ្ឋបាលខេត្តសៀមរាប នារសៀលថ្ងៃទី៣០ ខែតុលាកន្លងទៅ។
លោកស្រីរដ្ឋមន្រ្តី បានឲ្យដឹងទៀតថា គោលបំណងសំខាន់នៃការរៀបចំជួសជុលផ្លូវទាំងអស់របស់អាជ្ញាធរជាតិអប្សរាឡើងវិញ គឺដើម្បីសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវទេសចរដែលមានការកើនឡើងយ៉ាងឆាប់រហ័សមកកាន់ខេត្តសៀមរាប។
គួររម្លឹកថា៖ ផ្លូវប្រៀបដូចសរសៃឈាមរបស់ប្រទេសជាតិ។ នារយៈពេលចុងក្រោយនេះ អាជ្ញាធរជាតិអប្សរា បានធ្វើការជួសជុល និងកែលម្អប្រព័ន្ធផ្លូវថ្នល់មួយចំនួនក្នុងរមណីយដ្ឋានអង្គរ បំណងដើម្បីលើកសោភ័ណភាព និងការសម្រួលដល់ការធ្វើដំណើរដល់សាធារណជនទូទៅ តួយ៉ាងដូចផ្លូវក្នុងវង់តូច និងវង់ធំ។ យ៉ាងណាមិញ ត្បិតបានអភិវឌ្ឍបានច្រើនយ៉ាងណាក្ដី ក៏នៅមានផ្លូវខ្លះមានការខូចខាតផងដែរ មូលហេតុទាំងនោះដោយសារការដឹកជញ្ជូនធ្ងន់ៗ និងចរាចរណ៍មានភាពមមាញឹកជាងពេលមុនៗជាដើម៕