ពិធីសំណេះសំណាល និងពិនិត្យការធ្វើតេស្ត(Rapid Tes) រកមេរោគកូវីដ-១៩ ដល់នាយទាហាន នាយទាហានរង និងពលទាហាន

កំពង់ឆ្នាំង៖ នៅថ្ងៃទី១៩ ខែកក្កដា ឆ្នាំ២០២១ លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង អញ្ជើញចូលរួមក្នុងពិធីសំណេះសំណាល និងពិនិត្យការធ្វើតេស្ដ(Rapid Tes) យកសំណាករកមេរោគកូវីដ-១៩ ដល់នាយទាហាន នាយទាហានរង និងពលទាហាន ១៦០ នាក់ នៅតំបន់ប្រតិបត្តិការសឹករងខេត្តកំពង់ឆ្នាំង។

លោកឧត្តមសេនីយ៍ត្រី អ៊ុ សុភា មេបញ្ជាការតំបន់ប្រតិបត្តិការសឹករងខេត្តកំពង់ឆ្នាំងបានអោយដឹងថា ការធ្វើតេស្តរហ័សយកសំណាកដល់នាយទាហាន នាយទាហានរង និងពលទាហានចំនួន១៦០ នាក់ដែលក្នុងនោះមកពីប្រតិបត្តិការសឹករងស្រុកបរិបូណ៌, កងវិរៈសេនាតូចលេខ១ និងទីបញ្ជាការដ្ឋានតំបន់ប្រតិបត្តិការសឹករងកំពង់ឆ្នាំង ។

មានមតិសំណេះសំណាលក្នុងឪកាសនោះ លោក ស៊ុន សុវណ្ណារិទ្ធិ បានមានប្រសាសន៍ថា ការធ្វើតេស្តរហ័ស រកមេរោគកូវីដ-១៩ មិនត្រឹមតែចំពោះនាយទាហាន នាយទាហានរង និងពលទាហាននោះទេ គឺយើងជម្រុញឲ្យធ្វើគ្រប់អង្គភាពទាំងអស់ទាំងវិស័យសាធារណៈ និងវិស័យឯកជន។ ដោយឡែកប្រជាពលរដ្ឋ ដែលពួកគាត់មានមន្ទិលសង្ស័យ ឬមានអាការៈថាមានរោគសញ្ញានឹងមេរោគកូវីដ-១៩ ពួកគាត់អាចរាយការណ៍ ជូនអាជ្ញាធរមូលដ្ឋាន ឬក៏ទៅធ្វើតេស្ដនៅមន្ទីរពេទ្យខេត្ត។ 

លោក បានថ្លែងបញ្ជាក់ថា ការធ្វើតេស្ដនេះគឺជាការរួមចំណែកមួយដ៏ធំព្រោះអាចជម្រះមន្ទិលសង្ស័យ និងការពារខ្លួនឯងផង ព្រមទាំងបានចូលរួមការទប់ស្កាត់ជំងឺរីករាលដាលនៃកូវីដ-១៩ ទៅកាន់អ្នកដទៃ ជាពិសេសដើម្បីកាត់ផ្ដាច់ការចម្លងទៅកន្លែងផ្សេងៗទៀត ។

ជាយន្តការឆ្លើយតបការចូលរួមទប់ស្កាត់ការរីករាលដាលជំងឺនេះលោក ស៊ុន សុវណ្ណារិទ្ធិ អភិបាលខេត្ត ក៏បានអំពាវនាវដល់នាយទាហាននាយទាហានរងនិងពលទាហានទាំងអស់ត្រូវចូលរួមអនុវត្តនូវវិធានការការពារឲ្យបានម៉ឺងម៉ាត់តាមការណែនាំរបស់វិធានការក្រសួងសុខាភិបាល និងអនុសាសន៍របស់ប្រមុខរាជរដ្ឋាភិបាល «៣ការពារនិង ៣កុំ» ឲ្យបានខ្ជាប់ខ្ជួន៕

ពិធីបើកកិច្ចប្រជុំផ្សព្វផ្សាយការចូលកាន់មុខតំណែង និងបំពេញការងារ របស់អភិបាលរង នៃគណៈអភិបាលខេត្តប៉ៃលិនថ្មី

ប៉ៃលិន៖ រដ្ឋបាលខេត្តប៉ៃលិន កិច្ចប្រជុំផ្សព្វផ្សាយការចូលកាន់មុខតំណែង និងបំពេញការងារ របស់អភិបាលរង នៃគណៈអភិបាលខេត្តប៉ៃលិនថ្មី  ស្ថិតក្រោមការដឹកនាំលោក ជា ចាន់ឌិន ប្រធានក្រុមប្រឹក្សាខេត្ត និងលោកស្រី បាន ស្រីមុំ អភិបាលខេត្តប៉ៃលិន ដែលកិច្ចប្រជុំនេះ ក៏មានការចូលរួមពីសំណាក់ សមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំ និងមន្រ្តីសាលាខេត្ត ព្រមទាំងអាជ្ញាធរក្រុង/ស្រុកផងដែរ នៅថ្ងៃទី ១៩ ខែកក្កដា ឆ្នាំ២០២១។

សូមជម្រាបផងដែរថា រាជរដ្ឋាភិបាលបានសម្រេចផ្ទេរភារកិច្ច លោកស្រី ជា លាភ ពីអភិបាលរងនៃគណៈអភិបាលខេត្តប៉ៃលិនឲ្យមកបម្រើការងារនៅទីស្តីការក្រសួងមហាផ្ទៃ ដែលត្រូវដល់អាណត្តិការងារ ០៨ឆ្នាំ ស្របតាមច្បាប់ស្តីពីការគ្រប់ គ្រងរដ្ឋបាលរាជធានី ខេត្ត ក្រុង ស្រុក ខណ្ឌ បានកំណត់ និងតែងតាំងលោកស្រី ឡូញ ឈាង  ឱ្យកាន់តំណែងជាអភិបាលរងនៃគណៈអភិបាលខេត្តបៃលិន ជំនួសលោកស្រី ជា លាភ។ ទន្ទឹមនឹងនោះរាជរដ្ឋាភិបាលក៏បានសម្រេច ផ្ទេរភារកិច្ច លោក គោស៊ុ ប៊ុនសឿត ពីអភិបាលរងខេត្តព្រះវិហារ ទៅជាអភិបាលរងនៃគណៈអភិបាលខេត្តប៉ៃលិន ជំនួសលោក ធូ ភា ដែលត្រូវបានផ្ទេរភារកិច្ចឲ្យទៅកាន់មុខតំណែងថ្មី។ 

នាឱកាសនោះ លោកស្រី ឡូញ ឈាង និងលោក គោស៊ុ ប៊ុនសឿត អភិបាលរងនៃគណៈអភិបាលខេត្តប៉ៃលិន ដែលទើបចូលកាន់មុខតំណែងថ្មី បានឡើងធ្វើការប្តេជ្ញាចិត្តជូនដល់គណៈអធិបតី និងអង្គពិធីទាំងមូល ដោយបន្តចូលរួមអនុវត្តន៍កិច្ចការងារឲ្យកាន់តែមានប្រសិទ្ធភាព ក្នុងការអនុវត្តន៍នូវនយោបាយកំណែទម្រង់ និងកម្មវិធីនយោបាយ យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ព្រមទាំងពង្រឹងសាមគ្គីភាពផ្ទៃក្នុង ក្នុងការដឹកនាំ និងគ្រប់គ្រង ជាពិសេសផ្តល់ការយកចិត្តទុកដាក់ខ្ពស់ ក្នុងការផ្តល់សេវាជូនដល់ប្រជាពលរដ្ឋអោយបានល្អ។ 

លោកស្រី បាន ស្រីមុំ អភិបាលខេត្តប៉ៃលិន បានមានប្រសាសន៍លើកឡើងថា រាជរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន បានអនុវត្តន៍គោលនយោបាយកំណែទម្រង់រដ្ឋបាលសាធារណៈ និងមុខងារសាធារណៈនៅតែជាអទិភាពក្នុងដំណើរការពីដំណាក់កាលមួយទៅដំណាក់កាលមួយទៀតប្រកបដោយភាពរលូនល្អ និងរីកចម្រើនជាលំដាប់ដោយមានច្បាប់ស្តីពីសហលក្ខន្តិកៈមន្ត្រីរាជការស៊ីវិល និងច្បាប់គោលមួយចំនួនទៀត។

លោកស្រីអភិបាលខេត្ត ក៏បានមានប្រសាសន៍ផ្តាំផ្ញើដល់ថ្នាក់ដឹកនាំ និងមន្ត្រីរាជការ ទាំងអស់ ជាពិសេស អភិបាលរងខេត្ត ដែលទើបចូលកាន់មុខតំណែងថ្មី ត្រូវមានកិច្ចសហការល្អ មានសាមគ្គីភាពផ្ទៃក្នុង រវាងថ្នាក់លើ និងថ្នាក់ក្រោម តាមតួនាទីភារកិច្ចដែលខ្លួនទទួលខុសត្រូវ ហើយត្រូវបន្តយកចិត្តទុកដាក់លើការផ្តល់សេវា និងការសម្របសម្រួលដោះស្រាយបញ្ហានានាជូនប្រជាពលរដ្ឋអោយបានទាន់ពេលវេលា និងឆាប់រហ័សប្រកបដោយប្រសិទ្ធភាព គុណភាព និងតម្លាភាព ជាពិសេសអនុវត្តន៍តាមអភិក្រមទាំង ០៥ របស់លោកនាយករដ្ឋមន្ត្រី ហ៊ុន សែន គឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។

នៅក្នុងឱកាសនោះផងដែរ លោកស្រី បាន ស្រីមុំ ក៏បានមានប្រសាសន៍ជំរុញដល់មន្ត្រីជំនាញ និងអាជ្ញាធរមូលដ្ឋានគ្រប់ជាន់ថ្នាក់ ត្រូវយកចិត្តទុកដាក់ និងទទួលខុសត្រូវខ្ពស់ ព្រមទាំងសហការគ្នា ចុះធ្វើការអប់រំផ្សព្វផ្សាយ និងណែនាំបងប្អូនប្រជាពលរដ្ឋ ចូលរួមអនុវត្តន៍តាមការណែនាំរបស់រាជរដ្ឋាភិបាល និងក្រសួងសុខាភិបាល ដើម្បីបង្ការ និងទប់ស្កាត់ ការរីករាលដាលនៃជម្ងឺកូវីដ-១៩ ជាពិសេសរួមគ្នាអនុវត្តឱ្យបានខ្ជាប់ខ្ជួន នូវវិធានការការពាររបស់ប្រមុខរាជរដ្ឋាភិបាល សម្តេចតេជោ ហ៊ុន សែន គឺ ៣ការពារ ៣កុំ៕

តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី១៦ ដល់ថ្ងៃទី៣១ ខែកក្កដា ឆ្នាំ២០២១

 បើយោងតាមផេកហ្វេសបុករបស់ក្រសួងពាណិជ្ជកម្ម បានចេញសេចក្តីជូនដំណឹងអំពីតម្លៃប្រេងឥន្ធនៈ ចាប់ពីថ្ងៃទី១៦ ដល់ថ្ងៃទី៣១ ខែកក្កដា ឆ្នាំ២០២១​ គឺ

ប្រេងសាំងធម្មតា ៤.១០០រៀល/លីត្រ

ប្រេងម៉ាស៊ូត ៣.៦៥០រៀល/លីត្រ ។

ប្រភព: ក្រសួងពាណិជ្ជកម្ម

លោក ជាវ តាយ អភិបាលខេត្តកំពត ចុះសួរសុខទុក្ខ និងនាំយកអំណោយដ៏ថ្លៃថ្លា របស់លោកនាយករដ្ឋមន្រ្តី ហ៊ុន សែន ចែកជូនដល់ប្រជាពលរដ្ឋងាយរងគ្រោះ និងរងផលប៉ះពាល់ដោយសារជំងឺកូវីដ-១៩ ចំនួន ១១៨គ្រួសារ

 កំពត៖ នៅថ្ងៃទី១៩ ខែកក្កដា ឆ្នាំ២០២១ លោក ជាវ តាយ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពត អញ្ជើញចុះសួរសុខទុក្ខ និងចែកអំណោយដល់ប្រជាពលរដ្ឋងាយរងគ្រោះ និងរងផលប៉ះពាល់ដោយសារជំងឺកូវីដ-១៩ ចំនួន ១១៨គ្រួសារ នៅស្រុកអង្គរជ័យ ខេត្តកំពត ដោយមានការអញ្ជើញចូលរួមមាន លោក លោកស្រី សមាជិកគណៈកម្មាធិការ កងកម្លាំងទាំងបី ប្រធានមន្ទីរ អង្គភាព សមាជិកអនុសាខាស្រុក និងប្រជាពលរដ្ឋ ដែលពិធីនេះ ប្រារព្ធធ្វើនៅបរិវេណវិទ្យាល័យវត្តអង្គរជ័យ។

ថ្លែងនៅក្នុងពិធីនោះ លោក ជាវ តាយ បានពាំនាំនូវការផ្តាំផ្ញើសាកសួរសុខទុក្ខពីសំណាក់ លោកនាយករដ្ឋមន្រ្តី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពជា និងលោកស្រីបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលលោកនាយករដ្ឋមន្ត្រី និងប្រធានកាកបាទក្រហមកម្ពុជា គឺលោកទាំងទ្វេ តែងតែគិតគូរខ្ពស់ពីសុខទុក្ខ និងមានការដោះស្រាយបញ្ហាប្រឈមនានា ជូនបងប្អូនប្រជាពលរដ្ឋ មិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬ និន្នាការនយោបាយ ដោយមិនដែលទុកចោលឲ្យប្រជាពលរដ្ឋណាម្នាក់ស្លាប់ដោយអត់ស្បៀងអាហារ និងមិនមានការដោះស្រាយអ្វីឡើយ។

ជាមួយនេះផងដែរ លោកអភិបាលខេត្ត បានបន្តទៀតថា បើទោះបីអំណោយដែលបានចែកជូនប្រជាពលរដ្ឋនាពេលនេះ មានចំនួនតិចតួចក្ដី ប៉ុន្តែក៏អាចជួយសម្រាលការលំបាកខ្វះខាតរបស់បងប្អូនបានមួយគ្រាផងដែរ។ លោក ក៏បានក្រើនរំលឹកអំពាវនាវដល់បងប្អូនប្រជាពលរដ្ឋ ត្រូវបន្តបង្កើនការប្រុងប្រយ័ត្ន យកចិត្តទុកដាក់ឲ្យបានខ្ពស់បន្ថែមទៀត ដោយចូលរួមអនុវត្តតាមវិធានការណែនាំរបស់ក្រសួងសុខាភិបាលឱ្យបានគ្រប់ៗគ្នា និងប្រកាន់យកនូវការអនុវត្តវិធានការ ៣ការពារ(ពាក់ម៉ាសនៅគ្រប់ទីសាធារណៈ លាងដៃជាមួយសាប៊ូ អាល់កុល ឬជែល រក្សាគម្លាតសុវត្ថិភាពសង្គមចាប់ពីមួយម៉ែត្រកន្លះឡើងទៅ) និង ៣កុំ(កុំចូលទៅកន្លែងបិទជិតគ្មានខ្យល់ចេញចូល កុំចូលទៅកន្លែងមានមនុស្សច្រើនកុះករ កុំប៉ះពាល់គ្នា) ក្នុងការចូលរួមទប់ស្កាត់ និងការពារជំងីកូវីដ-១៩។

អំណោយក្នុង០១គ្រួសារ ទទួលបាន៖ អង្ករ ២៥kg ត្រីខ១យួរ ទឹកត្រី១យួរ មី១កេស និងថវិកា២ម៉ឺនរៀល ស្មើនឹង២.៣៦០.០០០រៀល ព្រមទាំងបានឧបត្ថម្ភថវិកាសរុប៥០ម៉ឺនរៀល ជូនទីប្រឹក្សាយុវជន យុវជនកាកបាទក្រហម អ្នកស្ម័គ្រចិត្តកាកបាទក្រហម នគរបាល កងរាជអាវុធហត្ថ និងប្រជាការពារ៕

អ្នកស្ម័គ្រចិត្តចាក់វ៉ាក់សាំងកូវីដ-១៩ លេខរៀងទី ៦លាន ទទួលបានអំណោយដ៏ថ្លៃថ្លារបស់នាយករដ្ឋមន្ត្រី

កំពង់ចាម៖ អ្នកស្ម័គ្រចិត្តចាក់វ៉ាក់សាំងកូវីដ-១៩ លេខរៀងទី ៦លាន នឹងទទួលបានអំណោយដ៏ថ្លៃថ្លារបស់ លោកនាយករដ្ឋមន្រ្តី ហ៊ុន សែន នៅថ្ងៃទី១៩ ខែកក្កដា ឆ្នាំ២០២១។ គណកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានរកឃើញអ្នកដែលស្ម័គ្រចិត្តចាក់វ៉ាក់សាំងកូវីដ-១៩ ទី ៦លាន គឺលោកស្រី ផេង សឿន អាយុ៦៧ គាត់ជាកសិករ ដែលសព្វថ្ងៃរស់នៅភូមិតាអុង ឃុំតាអុង ស្រុកចំការលើ ខេត្ត

កំពង់ចាម។

នៅថ្ងៃឣង្គារ ទី២០ ខែកក្កដា ឆ្នាំ២០២១ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាល និងជាប្រធានគណកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) បាននាំយកជំនួយឧបត្ថម្ភថវិកាចំនួន ១០លានរៀល និងសម្ភារៈឧបភោគបរិភោគ ដែលជាអំណោយដ៏ថ្លៃថ្លារបស់ លោកនាយករដ្ឋមន្រ្តី ហ៊ុន សែន ទៅប្រគល់ជូនដល់ជ័យលាភីចាក់វ៉ាក់សាំងកូវីដ-១៩ លេខរៀងទី ៦លាន តាមការណែនាំដ៏ខ្ពង់ខ្ពស់របស់នាយករដ្ឋមន្ត្រី៕

ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មានបញ្ជាក់ពីស្ថានភាពធាតុអាកាសនៅកម្ពុជា ចាប់ពីថ្ងៃទី២១ ដល់ ២៧ ខែកក្កដា ឆ្នាំ២០២១

 (ភ្នំពេញ)៖ ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មានបញ្ជាក់ពីស្ថានភាពធាតុអាកាសនៅកម្ពុជា ចាប់ពីថ្ងៃទី២១ ដល់ ២៧ ខែកក្កដា ឆ្នាំ២០២១។

ក្រសួងបញ្ជាក់ថា នៅសប្តាហ៍ខាងមុខនេះ ព្រះរាជាណាចក្រកម្ពុជានឹងទទួលនូវឥទ្ធិពល៖

* ពីថ្ងៃទី ២១-២២ ខែកក្កដា ទទួលឥទ្ធិពលពីមូសុងនិរតីខ្លាំង, ប្រព័ន្ធសម្ពាធទាបភ្ជាប់ និងព្យុះលើកទី៧ សេម៉ាកា (CEMPAKA)
* ពីថ្ងៃទី ២៣-២៧ ខែកក្កដា ទទួលឥទ្ធិពលពីមូសុងនិរតីកម្រិតខ្លាំង, ជ្រលងសម្ពាធទាបពីប្រទេសចិន និងប្រព័ន្ធសម្ពាធទាប។

ស្ថានភាពបែបនេះនឹងធ្វើឲ្យ៖
១៖ បណ្តាខេត្តនៅតំបន់វាលទំនាបកណ្ដាល
* សីតុណ្ហភាពអប្បបរមា មានពី ២២-២៥ °C
* សីតុណ្ហភាពអតិបរមា មានពី ២៨-៣១ °C
* នឹងអាចមានភ្លៀងមធ្យមទៅបង្គរ លាយឡំខ្យល់កន្ត្រាក់បក់ខ្លាំង ។ លើកលែងតែបណ្តាខេត្តនៅភាគខាងក្រោមនឹងអាចមានភ្លៀងធ្លាក់តិចទៅមធ្យម លាយឡំខ្យល់កន្ត្រាក់បក់ខ្លាំង ។

២៖ បណ្តាខេត្តដាប់ជួរភ្នំដងរែក និងខ្ពង់រាបឦសាន
* សីតុណ្ហភាពអប្បបរមាមានពី ២២-២៥ °c
* សីតុណ្ហភាពអតិបរមា មានពី ២៧-៣០ °C
* អាចមានភ្លៀងពីកម្រិតបង្ហូរទៅច្រើន ផ្គរ រន្ទះតិចតួច លាយឡំនឹងខ្យល់កន្ត្រាក់ក្នុងល្បឿនខ្លាំងពិសេស នៅតាមតំបន់ជួរភ្នំក្រវាញ់ ជួរភ្នំដងរែក និងបណ្តាខេត្ត ដែលស្ថិតនៅតាមដងទន្លេមេគង្គ។

៣៖ តំបន់មាត់សមុទ្រ
* សីតុណ្ហភាពអប្បបរមា មានពី ២១-២៤°C
* សីតុណ្ហភាពអតិបរមា មានពី ២៥-២៨ °C
* អាចមានភ្លៀងពីកម្រិតបង្គរទៅច្រើន ផ្គរ រន្ទះបង្គរ លាយឡំនឹងខ្យល់កន្ត្រាក់ក្នុងលឿនខ្លាំង និងរលកសមុទ្រមានកម្ពស់ខ្ពស់។ ទន្ទឹមនោះលទ្ធភាពនៃជំនន់ទឹកភ្លៀង (Flash Flood) ក៏មានភាគរយខ្ពស់ផងដែរ។

ក្រសួងបន្តថា អាស្រ័យស្ថានភាពធាតុអាកាស ដូចបានជម្រាបជូនខាងលើ សូមសាធារណជន និងបងប្អូនប្រជានេសាទបង្កើនការប្រុងប្រយ័ត្នខ្ពស់៕