កម្ពុជាជាប់ចំណាត់ថ្នាក់លេខ១៣ ជាប្រទេសមានសុខសន្តិភាពបំផុតសម្រាប់ឆ្នាំ២០១៧នៅក្នុងតំបន់អាស៊ីប៉ាស៊ីហ្វិក

តាមការស្រាវជ្រាវ និងវាយតម្លៃរបស់ Global Peace Index 2017 បានបង្ហាញថា ប្រទេសកម្ពុជាទទួលបានចំណាត់ថ្នាក់លេខ១៣ ជាប្រទេសមានសុខសន្តិភាពបំផុតសម្រាប់ឆ្នាំ២០១៧ នៅក្នុងតំបន់អាស៊ីប៉ាស៊ីហ្វិក និងមានចំណាត់ថ្នាក់លេខ៨៩ នៅលើពិភពលោក។

យោងតាមស្ថិតិរបស់ Global Peace បានបញ្ជាក់ថា នៅក្នុងចំណោមប្រទេសជាសមាជិកអាស៊ាន កម្ពុជា ឈរនៅលេខរៀងទី៦ ខណៈប្រទេសសិង្ហបុរីឈរនៅលេខ១ ម៉ាឡេស៊ីលេខ២ ឡាវលេខ៣ ឥណ្ឌូនេស៊ីលេខ៤ វៀតណាមលេខ៥ មីយ៉ាន់ម៉ាលេខ៧ ថៃលេខ៨ ហ្វីលីពិនលេខ៩។

Global Peace បានបញ្ជាក់ដែរថា នៅឆ្នាំ ២០១៧ នេះ កម្ពុជា បានធ្វើឱ្យមានភាពល្អប្រសើរបំផុតក្នុងការរក្សានូវសុខសន្តិភាពនៅក្នុងតំបន់អាស៊ីប៉ាស៊ីហ្វិក ខណៈឥណ្ឌូនេស៊ី មានការធ្លាក់ចុះខ្លាំង៕

អនុប្រធានមូលនិធិរូបិយវត្ថុអន្តរជាតិ IMF៖ «កម្ពុជាគឺជាប្រទេសមួយក្នុងចំណោមប្រទេសទាំង១០ ដែលមានសេដ្ឋកិច្ចរីកចំរើនលឿនបំផុតក្នុងលោក ក្នុងរយៈពេល២០ឆ្នាំចុងក្រោយនេះ»

នៅក្នុងឱកាសជួបជាមួយនិស្សិត នៅសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច កាលពីថ្ងៃទី០៧ ខែមិថុនា ឆ្នាំ២០១៧ លោក Mitsuhiro Furusawa អនុប្រធានមូលនិធិរូបិយវត្ថុអន្តរជាតិ បានគូសបញ្ជាក់ថា «កម្ពុជាគឺជាប្រទេសមួយ ក្នុងចំណោមប្រទេសទាំង១០ ដែលមានសេដ្ឋកិច្ចរីកចំរើន លឿនបំផុតក្នុងលោក ក្នុងរយៈពេល២០ឆ្នាំចុងក្រោយនេះ»។

នៅក្នុងបទអន្តាគមន៍របស់ខ្លួន លោក Mitsuhiro Furusawa ក៏បានលើកឡើងផងដែរថា៖
ផ្តើមចេញពីការវិនាសហិនហោចដោយភាពកំណាចព្រៃផ្សៃ និងប្រល័យពូជសាសន៍ កម្ពុជាសម្រេចបាននូវវឌ្ឍនភាពសេដ្ឋកិច្ច និងសង្គម គួរឱ្យស្ងើចសរសើរ យ៉ាងខ្លាំង»។ កម្ពុជាគឺជាប្រទេសមួយក្នុងចំណោមប្រទេសទាំង១០ ដែលមានសេដ្ឋកិច្ចរីកចំរើនលឿនបំផុតក្នុងលោក ក្នុងរយៈពេល២០ឆ្នាំចុងក្រោយនេះ។ អត្រាភាពក្រីក្រ បានថយចុះយ៉ាងច្រើនពី៥០% នៅឆ្នាំ២០០៥ មកត្រឹម១៣.៥% នៃចំនួនប្រជាជនសរុប នៅឆ្នាំ២០១៤។ ធនាគារពិភពលោក បានចាត់ថ្នាក់កម្ពុជាជា ប្រទេសសេដ្ឋកិច្ចចំណូលមធ្យមកំរិតទាប លែងជាប្រទេសចំណូលទាបទៀតឡើយ។
«កំណើនរបស់កម្ពុជានេះ គឺជាសមិទ្ធផលនៃស្ថេរភាពម៉ាក្រូសេដ្ឋកិច្ចដែលសម្រេចបានដោយលំបាក។ កំណើននេះ បានឆ្លុះបញ្ចាំងឱ្យឃើញក្នុងអតិផរណាទាប ការកើនឡើងនូវរូបបីយប័ណ្ណអន្តរជាតិបម្រុង ឱនភាពសារពើពន្ធតិចតួច បំណុលសាធារណៈទាប និងគោលនយោបាយសេដ្ឋកិច្ចដ៏ប្រុងប្រយ័ត្ន»។
«កម្ពុជាមានហេតុផលគ្រប់គ្រាន់ដើម្បីមានមោទនភាពចំពោះការរីកចំរើនសេដ្ឋកិច្ចរបស់ខ្លួន។ យើងបានព្យាករណ៍ថា សេដ្ឋកិច្ចកម្ពុជានឹងមានកំណើនប្រមាណ ៧%នៅឆ្នាំនេះ ដោយសារការនាំចេញសំលៀកបំពាក់ និងសកម្មភាពក្នុងវិស័យអចលនទ្រព្យ និងសំណង់»។ «កម្ពុជាកំពុងមានកំណើនសេដ្ឋកិច្ចរឹងមាំ។ ជាប្រទេសសេដ្ឋកិច្ចសេរីបើកចំហរ និងមានប្រជាជនវ័យក្មេងបើប្រៀបធៀបនឹងប្រទេសអាស៊ីអាគ្នេយ៍ដទៃទៀត កម្ពុជានឹងទទួលបានប្រយោជន៍ច្រើន ពីទិដ្ឋភាពល្អប្រសើរនៅក្នុងតំបន់ និងពិភពលោក»។

ចំពោះបញ្ហាប្រឈមនៃកំណើនសេដ្ឋកិច្ចកម្ពុជា លោក Mitsuhiro Furusawa បានលើកឡើងថា៖
«បញ្ហាប្រឈមរួមមាន៖ ហេដ្ឋារចនាសម្ព័ន្ធ តម្លៃថាមពលខ្ពស់ កង្វះខាតការផ្គត់ផ្គង់អគ្គិសនី និងកង្វះប្រព័ន្ធដឹកជញ្ជូន។» ចំពោះបញ្ហាអភិបាលកិច្ច លោក Mitsuhiro Furusawa បានគូសបញ្ជាក់ថា៖
«អភិបាលកិច្ចល្អ គឺជាការចាំបាច់។ ក្នុងបរិបទនេះ ខ្ញុំសប្បាយចិត្តដោយបានដឹងថារដ្ឋាភិបាលបានចាប់ដំណើរការ គោលនយោបាយអភិវឌ្ឍឧស្សាហកម្ម ដើម្បីដោះស្រាយបញ្ហាប្រឈមទាំងនេះ។ គោលនយោបាយនេះ សំដៅលើកចំណាត់ថ្នាក់រចនាសម្ព័ន្ធឧស្សាហកម្មកម្ពុជា ពីការផលិតដោយប្រើកំលាំងពលកម្ម ទៅជាការផលិតដោយប្រើជំនាញ នៅឆ្នាំ២០២៥។ ប្រសិនបើអនុវត្តបានទាន់ពេលវេលា និងមានប្រសិទ្ធភាព គោលនយោបាយនេះ នឹងអាចជំរុញឱ្យមានការធ្វើពិពិធកម្ម និងការរីកចំរើនប្រកបដោយចីរភាព”។
ជាការសន្និដ្ឋាន លោក Mitsuhiro Furusawa បានលើកឡើងថា៖
«បញ្ហាប្រឈមខាងលើមិនមែនមានតែនៅកម្ពុជាទេ។ ប្រទេសដ៏ទៃក៏មានបញ្ហាប្រឈមនេះដែរ។ អ្វីដែលចាំបាច់គឺការឆ្លើយតបដែលសមស្រប។ ក្នុងន័យនេះ គឺកំណែទម្រង់ដែលអាចឱ្យមានការធ្វើពិពិធកម្ម និងអភិបាលកិច្ចល្អ ឬក៏ដំណោះស្រាយតាមរយៈធុរៈកិច្ចដែលអាចបង្កើតការងារល្អៗ»។
លោក Mitsuhiro Furusawa អញ្ជើញចូលជួបសម្តែងការគួរសម និងសំណេះសំណាលការងារជាមួយលោកនាយករដ្ឋមន្រ្ដី ហ៊ុន សែន នៅវិមានសន្តិភាព នៅរសៀលថ្ងៃទី០៧ ខែមិថុនា ឆ្នាំ២០១៧កន្លងទៅ៕

ក្រសួងមហាផ្ទៃ ច្រានចោលព័ត៌មានមិនពិតរបស់វិទ្យុអាស៊ីសេរីដែលថានឹងតែងតាំងបេក្ខជនដែលមិនបានជាប់ឆ្នោតឱ្យធ្វើជាទីប្រឹក្សាឬជំនួយការនៅតាមក្រសួង ស្ថាប័ននានា

នៅក្នុងកម្មវិធីផ្សាយរបស់វិទ្យុអាស៊ីសេរីកាលពីថ្ងៃទី០៧ ខែមិថុនា ឆ្នាំ២០១៧ បានធ្វើការផ្សាយ​ព័ត៌មានថា អង្គការសង្គមស៊ីវិល និងគណបក្សសង្រ្គោះជាតិ ព្រួយបារម្ភអំពីការប្រើប្រាស់​ថវិកាជាតិដោយគ្មានប្រសិទ្ធភាពជុំវិញគម្រោងតែងតាំងមន្រ្តីឃុំ សង្កាត់ចាញ់ឆ្នោតរបស់គណបក្សប្រជាជនកម្ពុជា ជាជំនួយការ ឬទីប្រឹក្សាមន្រ្តីរដ្ឋាភិបាល។ ការផ្សាយព័ត៌មាននេះ ជាការលើកឡើងក្នុងគោលបំណងបំភ័ន្តការពិត និងធ្វើឱ្យសាធារណមតិមានការយល់ច្រឡំមកលើរាជរដ្ឋាភិបាលដែលដឹកនាំដោយគណបក្សប្រជាជនកម្ពុជា។

ក្រសួងពាណិជ្ជកម្ម បង្ហាញលេខទូរស័ព្ទឆបោកចំនួនបួនខ្សែ

ក្រសួងពាណិជ្ជកម្ម បានបង្ហាញលេខទូរស័ព្ទឆបោកចំនួនបួនខ្សែ ៖ ០៩៧ ៩២៤ ៨៩៩៩, ០៩៧ ៥៩៨ ១៣៣៣, ០១២ ៨៣៧ ៨៥១, ០១២ ៨៣៧ ៩០៣ ដែលបានទូរស័ព្ទទៅ ប្រធាមន្ទីពាណិជ្ជកម្មខេត្តបាត់ដំបង និងមន្ត្រីរាជការដោយប្រាប់ថា ជាជំនួយការ របស់ លោក ឈូន ដារ៉ា និង បានវេលុយជាបន្ទាន់ចំនួន ៣០០ដុល្លារ ដើម្បីរត់ការដំឡើងកាំប្រាក់ ដោយហេតុថា ឯកសារនៅត្រឹមទីស្តីការគណៈរដ្ឋមន្ត្រីនៅឡើយ។

ក្រសួងពាណិជ្ជកម្ម តាមលិខិតចុះថ្ងៃទី០៨ ខែមិថុនា ឆ្នាំ២០១៧សូមជម្រាបដល់ លោក លោកស្រី មន្ត្រីរាជការ ឱ្យបានជ្រាបថា ព័ត៌មានខាងលើនេះ ជាព័ត៌មានមិនពិត គឺជាការឆបោក ព្រោះការដំឡើងកាំប្រាក់ ក្រសួង បានរៀបចំរួចហើយ និងមិនមានប៉ះពាល់ដល់រឿងលុយកាក់ទេ៕

កងទ័ពមួកខៀវរបស់កម្ពុជា បានរងការវាយប្រហារជាថ្មីម្តងទៀត នៅតំបន់ Bria ប្រទេស​អាហ្រ្វិកកណ្តាល​ ប៉ុន្តែពុំបាន​ធ្វើឱ្យទាហាន​កម្ពុជា​ ណាម្នាក់ស្លាប់ ​ឬរបួសនោះទេ​

កងទ័ពមួកខៀវរបស់កម្ពុជា បានរងការវាយប្រហារ​ជាថ្មីម្តងទៀត នៅតំបន់ Bria ប្រទេសអាហ្រ្វិកកណ្តាល កាលពីព្រឹកថ្ងៃទី០៥ ខែមិថុនា ឆ្នាំ២០១៧ ប៉ុន្តែទោះជាយ៉ាងណា​ការប៉ះទង្គិចគ្នានេះពុំបានធ្វើឱ្យទាហានកម្ពុជាណាម្នាក់ស្លាប់ឬរបួសនោះទេ នេះបើតាមរបាយការណ៍របស់ក្រសួងការពារជាតិ។

របាយការណ៍បានឱ្យដឹងទៀតថា នៅវេលាម៉ោង០៧៖៣០នាទីព្រឹក (ម៉ោង ១៣:៣០នាទីនៅភ្នំពេញ) ថ្ងៃទី០៥ ខែមិថុនា ឆ្នាំ២០១៧ មានជន Anti-Balaka ចំនួន០២រូប ប្រដាប់ដោយអាវុធ AK-47 បានជិះម៉ូតូសំរុកចូលបន្ទាយអង្គការ សហប្រជាជាតិ ក្នុងតំបន់ Bria ប្រទេសអាហ្វ្រិកខាងត្បូង ហើយកម្លាំងកម្ពុជា រួមជាមួយកម្លាំង Zambia ដែលឈរជើងក្នុងតំបន់នោះ បានធ្វើការព័ទ្ធចាប់។

នៅវេលាម៉ោង ០៨៖២៥នាទី (ម៉ោង១៤៖២៥នាទីនៅភ្នំពេញ) ថ្ងៃដដែលនោះ កម្លាំងប្រជាពលរដ្ឋលាយឡំនឹងកម្លាំង Anti-Balaka បំពាក់ដោយកាំបិត ក៏បានសម្រុកចូលបុស្តិ៍យាមរបស់ អ.ស.ប នៅតំបន់នោះ​ថែមទៀត ពេលនោះកម្លាំងកម្ពុជា បានបាញ់ឡើងលើចំនួន០៥គ្រាប់ជាការគម្រាម ប៉ុន្តែក្រុមទាំងនោះមិនបញ្ឈប់ការសំរុកចូលឡើយ ដូច្នេះកម្លាំងកម្ពុជាក៏បាញ់ត្រូវត្រង់ជើង០១គ្រាប់ ទើបកម្លាំងទាំងនោះដកថយទៅវិញ។

សម្រាប់ហេតុការណ៍ខាងលើនេះ អ្នករងរបួស ត្រូវបានបញ្ជូនទៅទទួលការព្យាបាលនៅមន្ទីរពេទ្យរដ្ឋក្នុងតំបន់ Bria ហើយក្រុមការងារមជ្ឈមណ្ឌលជាតិ កំពុងធ្វើការតាមដានសភាពការណ៍នេះ។

សូមរំលឹកថា កាលពីយប់រំលងអាធ្រាត្រឈានចូលថ្ងៃទី០៩ ខែឧសភា ឆ្នាំ២០១៧ ក្បួនកងកម្លាំងរក្សាសន្តិភាព​របស់អង្គការសហប្រជាជាតិ ដែលក្នុងនោះ មានទាំងកងទ័ពមួកខៀវកម្ពុជាផង បានរងការវាយប្រហារពីក្រុមឧទ្ទាម​នៅប្រទេសអាហ្រ្វិកកណ្តាលដែរ បណ្តាលឱ្យកងទ័ពមួកខៀវកម្ពុជាមួយរូប ស្លាប់ភ្លាមៗនៅកន្លែងកើតហេតុ និង៣នាក់ផ្សេងទៀតត្រូវបានស្លាប់ នៅ២គីឡូម៉ែត្រពីកន្លែងកើតហេតុ។ ចំណែកទាហានម៉ារ៉ុក ៥នាក់ ដែលស្ថិតនៅក្នុងក្បួន អ.ស.ប ជាមួយកម្ពុជា ក៏បានរងរបួសដែរ។

សូមបញ្ជាក់ថា កងកម្លាំងមួកខៀវរបស់កម្ពុជា ដែលបានពលីជីវិតនោះរួមមាន៖ លោកអនុសេនីយ៍ទោ អឹម សំ មានស្រុកកំណើតនៅស្រុកពួក ខេត្តសៀមរាប, លោកអនុសេនីយ៍ឯក ម៉ៅ អេង មានលំនៅឋានក្នុងសង្កាត់ស្រះចក ខណ្ឌដូនពេញ, លោកព្រិន្ទបាលទោ ស៊ាង នរិន្ទ មានលំនៅឋានក្នុងស្វាយរៀង និងលោកព្រិន្ទបាលទោ មុំ តុលា មានស្រុកកំណើតនៅស្រុកកណ្តៀង ខេត្តពោធិ៍សាត់៕

ក្រសួង​ការពារជាតិកម្ពុជា​ រៀបចំប្រារព្ធ​ទិវានៃ​ការចងចាំ​ ដំណើរឆ្ពោះទៅរក ​ការផ្តួលរំលំ​របបប្រល័យពូជសាសន៍ ប៉ុល ពត

នៅថ្ងៃទី០៩ ខែមិថុនា ឆ្នាំ២០១៧នេះ ក្រសួងការពារជាតិកម្ពុជា បានរៀបចំប្រារព្ធទិវានៃការចងចាំ នៃដំណើរឆ្ពោះទៅរក ការផ្តួលរំលំរបបប្រល័យពូជសាសន៍ ប៉ុល ពត នៅទីស្តីការក្រសួងការពារជាតិ ក្រោមអធិបតីភាព លោកឧបនាយករដ្ឋមន្រ្តី ទៀ បាញ់ រដ្ឋមន្រ្តីក្រសួងការពារជាតិ និងជាប្រធានគណៈកម្មការរៀបចំទិវានៃការចងចាំ នៃដំណើរឆ្ពោះទៅ ការផ្តួលរំលំរបបប្រល័យពូជសាសន៍ ប៉ុល ពត។ ពិធីនេះក៏មានការចូលរួមពីថ្នាក់ដឹកនាំក្រសួងការពារជាតិ អគ្គបញ្ជាការដ្ឋាន ព្រមទាំងនាយទាហានតាមស្ថាប័ន កងឯកភាពក្នុងកងយោធពលខេមរភូមិន្ទផងដែរ។

របបប្រល័យពូជសាសន៍ ប៉ុល ពត ត្រូវបានផ្តួលរំលំ នៅថ្ងៃទី០៧ ខែមករា ឆ្នាំ១៩៧៩ ដោយកងទ័ពរណសិរ្សសាមគ្គីសង្រ្គោះជាតិកម្ពុជា (គណបក្សប្រជាជនកម្ពុជាបច្ចុប្បន្ន) ក្រោមកិច្ចសហការជាមួយកងទ័ពវៀតណាម។ ការដួលរលំនៃរបបនេះ ក៏បាននាំមកនូវការបង្រួបបង្រួមជាតិ និងសន្តិភាពនៅកម្ពុជារហូតដល់សព្វថ្ងៃ ក្រោមនយោបាយឈ្នះៗ របស់លោកនាយករដ្ឋមន្ត្រី ហ៊ុន សែន៕

លោកនាយករដ្ឋមន្រ្តី ហ៊ុន សែន នឹងអញ្ជើញផ្តល់កិត្តិយសប្រគល់ពានរង្វាន់ក្នុងកម្មវិធីខ្ញុំជាយុវជនគំរូកម្ពុជាលើកទី១២ នេះ!

ពិសេសបំផុតនោះគឺ លោកនាយករដ្ឋមន្រ្តី ហ៊ុន សែន នឹងអញ្ជើញផ្តល់កិត្តិយសប្រគល់ពានរង្វាន់ដល់បេក្ខជនទាំង១០ នាក់នៅវិមានសន្តិភាព! នេះជាឱកាសពិសេស សម្រាប់បេក្ខជន បេក្ខនារី ដើម្បីចូលរួមប្រកួតប្រជែងក្នុងកម្មវិធី «ខ្ញុំជាយុវជនគំរូកម្ពុជា» លើកទី 12 – I Am a Role Model 12 ដើម្បីបង្ហាញនិងចែករំលែកនូវសកម្មភាពជាស្នាដៃគម្រូល្អៗដល់យុវជន និងប្រជាពលរដ្ឋទូទៅ។

ចំនួនវិញ្ញាសាដែលនឹងត្រូវជ្រើសរើសយកគឺ វីដេអូ Video (3), -កំណាព្យនិងអត្ថបទ (2), -ចម្រៀង (3) និង គំនូរ (2) សរុបចំនួន 10 នាក់។ បេក្ខជន បេក្ខនារីទាំង១០ ដែលបានជាប់ TOP-10 នៅក្នុងការប្រកួត លើគេហទំព័រ សម្តេចតេជោ នាយករដ្ឋមន្រ្តី​ www.samdech​hun​sen.gov.kh (First Vote) គឺនឹងយកទៅបោះឆ្នោតប្រកួតលើកចុងក្រោយ (Final Vote) នៅលើ Facebook សម្តេចតេជោ លើកចុងក្រោយដើម្បីបោះឆ្នោតយកលេខ 1 (TOP-1)។

«ខ្ញុំជាយុវជនគំរូកម្ពុជា» គឺបានបង្កើតឡើងក្រោមគំនិតផ្តួចផ្ដើមដ៏ខ្ពង់ខ្ពស់របស់ សម្តេចតេជោ ហ៊ុន សែន ក្នុងគោលបំណងគាំទ្រ និងលើកទឹកចិត្តដល់ពលរដ្ឋ ជាពិសេស យុវជន យុវនារីគ្រប់រូបអោយចូលរួម កសាងអំពើល្អក្នុងសង្គម និងដើម្បីចៀសឆ្ងាយពីគ្រឿងញៀន និងអំពើអបាយមុខផ្សេងៗ។

***លក្ខខណ្ឌចូលរួម៖
1- ត្រូវមាន Facebook Account ប្រើឈ្មោះ និងរូបថតពិតប្រាកដ។
2- Like/Share-Page សម្តេចតេជោ។
3- ធ្លាប់បានធ្វើ ឬកំពុងបន្តធ្វើអំពើល្អក្នុងសង្គម ទោះតូចឬធំក្តី។
4- ជាស្នាដៃរបស់ខ្លួនពិតប្រាកដ ឬជាស្នាដៃក្រុមការងាររួមគ្នា។
5- មិនមែនគ្រាន់តែជាគំនិតស្រមើស្រមៃ (គ្មានសកម្មភាពពិត)
6- មិនត្រូវលួចចម្លង (Copy) ស្នាដៃអ្នកដទៃ។
7- ជ័យលាភីដែលធ្លាប់បានជាប់លេខ1 (Top1) ក្នុងការប្រកួតពីវគ្គមុនៗមក (ពីវគ្គទី1-វគ្គទី6) គឺមិនអាចចូលរួមប្រកួតបានឡើយ។
8- ជ័យលាភីដែលធ្លាប់បានជាប់លេខ1 (Top1) ក្នុងការប្រកួតពីវគ្គមុនៗមក (ពីវគ្គទី7-វគ្គទី11) គឺអាចចូលរួមប្រកួតបាន។ ហើយចំពោះបេក្ខជនដែលមិនបានជាប់លេខ (1) គឺអាចចូលរួមប្រកួតប្រជែងនៅក្នុងវគ្គពិសេសនេះបានទាំងអស់។ សូម Upload វីដេអូឃ្លីប (Video Clip) , វិដេអូចម្រៀង , កំណាព្យ និង គំនូរមកកាន់គេហទំព័រ សម្តេចតេជោ ដើម្បីចូលរួមប្រកួតប្រជែងនៅថ្ងៃនេះ។

ពានរង្វាន់ លេខ1 (Top-1) គឺម៉ូតូ ZUSUKI IMPLUSE មួយគ្រឿង iPhone និងរង្វាន់ផ្សេងៗជា ច្រើនទៀត។ កម្មវិធីនេះគឺចាប់ផ្តើមទទួលពាក្យប្រកួតប្រជែងចាប់ពីថ្ងៃនេះតទៅ។សូមចុចអាន​ការណែនាំបន្ថែមអំពីកម្មវិធី «ខ្ញុំជាយុវជនគំរូកម្ពុជា» នៅ www.samdechhunsen.gov.kh៕

សន្ទស្សន៍​សន្តិភាពស​កល៖ កម្ពុជា​ទទួលចំណាត់​ថ្នាក់​សន្តិភាព​ល្អជាង​ឆ្នាំ​មុន​

របាយការណ៍សន្ទស្សន៍សន្តិភាពសកល(Global Peace Index)ឆ្នាំ ២០១៧ បង្ហាញថា កម្ពុជាទទួលបានចំណាត់ថ្នាក់សន្តិភាពប្រសើរជាងឆ្នាំ ២០១៦ និងប្រសើរជាងប្រទេសដទៃទៀតដែលស្ថិតនៅក្នុងតំបន់អាស៊ីប៉ាស៊ីហ្វិកទាំងមូល។ ប្រសើរជាងមុនត្រង់ថា ក្នុងរយៈពេលប៉ុន្មានឆ្នាំចុងក្រោយនេះ កម្ពុជា គ្មានចលនាបាតុកម្ម កុប្បកម្មរបស់កម្មករ ឬជម្លោះប្រដាប់អាវុធ ការរក្សាបានគោលនយោបាយសារពើពន្ធល្អ និងការចូលរួមផ្តល់ជំនួយហិរញ្ញវត្ថុគាំទ្រប្រតិបត្តិការរក្សាសន្តិភាពរបស់អង្គការសហប្រជាជាតិជាដើម។

របាយការណ៍របស់វិទ្យាស្ថានសេដ្ឋកិច្ច និងសន្តិភាពកម្រាស់ជាង ១៤០ ទំព័រដែលវាយតម្លៃពីសន្តិភាពប្រទេសចំនួន១៦៣ ពិភពលោក ក៏បានកត់សម្គាល់ពីភាពប្រសើរឡើង និងស្ថេរភាពនៅក្នុងប្រទេសកម្ពុជា។ កម្ពុជាស្ថិតនៅក្នុងលេខរៀងទី ៨៩ ក្នុងចំណោមប្រទេសទាំងអស់ ១៦៣ ខណៈប្រទេសឥណ្ឌូនេស៊ី ស្ថិតនៅចំណាត់ថ្នាក់បាតតារាងនៅក្នុងតំបន់។
បើធៀបនឹងឆ្នាំ២០១៦ កម្ពុជាទទួលបានចំណាត់ថ្នាក់ប្រសើរជាងមុនរហូតដល់ទី ១៥ លេខ។ ពោលគឺនៅក្នុងឆ្នាំ ២០១៦ កម្ពុជា ស្ថិតនៅក្នុងចំណាត់ថ្នាក់លេខ ១០៤ ក្នុងចំណោមប្រទេស ១៦៣។
ទន្ទឹមនឹងចំណាត់ផ្នែកសន្តិភាព ដែលមានការកើនឡើងគួរឲ្យកត់សម្គាល់នេះ របាយការណ៍ដដែល បានដាស់តឿនថា ស្ថិរភាពនៅកម្ពុជាអាចនឹងរងផលប៉ះពាល់ដោយសារភាពតានតឹងផ្នែកនយោបាយទាំងក្នុងពេលបោះឆ្នោតឃុំសង្កាត់ឆ្នាំ ២០១៧ និងការបោះឆ្នោតថ្នាក់ជាតិ ឆ្នាំ ២០១៨ ខាងមុខ។
បើតាមរបាយការណ៍ ប្រទេសដែលមានកម្រិតសន្តិភាពខ្ពស់បំផុត បានទៅលើប្រទេសអ៊ីស្លង់ ដែលបានរក្សាតំណែងនេះតាំងពីឆ្នាំ ២០០៨ មក តាមពីក្រោយដោយប្រទេសណូវែលហ្សេឡង់។ខណៈ សិង្ហបុរីមានសន្តិភាពជាងគេក្នុងចំណោមសមាជិកអាស៊ាន។ ចំណែកប្រទេសដែលគ្មានសន្តិភាពនិងអស្ថេរភាពជាងគេលើពិភពលោក គឺប្រទេសស៊ីរី ដែលកំពុងតែញាំញ៉ីដោយសង្គ្រាមស្ទើររាល់ថ្ងៃ។
សូមបញ្ជាក់ថា របាយការណ៍សន្ទស្សន៍សន្តិភាពសកល ធ្វើឡើងដោយផ្អែកលើកត្តាបីចម្បងសំខាន់រួមមាន៖ ការធ្វើយោធូបនីយកម្ម សន្តិសុខសង្គម និងជម្លោះហិង្សា៕

ដកស្រង់ពីវិទ្យុបារាំងអន្តរជាតិជាខេមរភាសា

ភ្ញៀវទេ​សចរអន្ដរជាតិ​ជិត២លាន​នាក់ ចូល​ទស្សនា​អង្គរវត្តក្នុង​រយៈពេល​៥ខែ​ដើមឆ្នាំ២០១៧

ក្នុងរយៈពេល៥ខែ ដើមឆ្នាំ២០១៧នេះ ភ្ញៀវទេសចរអន្ដរជាតិ បានមកទស្សនាប្រាសាទអង្គរ ជាង១,៩លាននាក់ និងទទួលបានចំណូលចំនួនជាង៤៥លានដុល្លារ ពោលគឺមានការកើនឡើងទ្វេដង បើធៀបនឹងរយៈពេលដូចគ្នា កាលពីឆ្នាំមុន។

យោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ដែលបានចេញផ្សាយនៅថ្ងៃទី០៨ ខែមិថុនានេះ បានឲ្យដឹងថា ស្ថិតិភ្ញៀវទេសចរបរទេស បានទិញប័ណ្ណ ចូលទស្សនាអង្គរ ចាប់ពីខែមករា ដល់ខែឧសភានេះ មានចំនួន ជាង១,៩លាននាក់ គឺកើនឡើងទ្វេដង បើធៀបនឹងរយៈពេល៥ខែដូចគ្នានៅក្នុងឆ្នាំ២០១៦ កន្លងមក។
សេចក្ដីប្រកាសព័ត៌មាន បានឲ្យដឹងថា ចំណែកថវិកាទទួលបានពីការលក់ប័ណ្ណចូលទស្សនាអង្គរចំនួន៥ខែនេះ មានចំនួនជាង៤៥លានដុល្លារ កើនឡើងជាង៦៤ភាគរយ បើធៀប៥ខែដូចគ្នាក្នុងឆ្នាំ២០១៦។
គ្រឹះស្ថានអង្គរ បានបញ្ជាក់ថា ថវិកាដែលបានពីលក់ប័ណ្ណអង្គរ បានបង់ចូលថវិកាជាតិ ជាង៦លានដុល្លារ និងបានផ្ដល់មូលនិធិដល់មន្ទីរពេទ្យគន្ធបុប្ផា ចំនួនជិត៣០ម៉ឺនដុល្លារផងដែរ។ ចំណាយកាជួសជុល ហេដ្ឋារចនាសម្ព័ន្ធអង្គរ មួយផ្នែកធំ ដើម្បីលើកសោភ័ណភាព និងទាក់ទាញភ្ញៀវទេសចរឲ្យចូលមកទស្សនាកាន់តែច្រើនឡើងធ្វេដងថែមទៀត ៕

អង្គការសហប្រជាជាតិ៖ការបោះឆ្នោតឃុំសង្កាត់ អាណ្តត្តិទី៤នៅកម្ពុជា មានសណ្តាប់ធ្នាប់ល្អ និងដោយរលូន

ការិយាល័យសិទ្ធិមនុស្សអង្គការសហប្រជាជាតិ អ.ស.ប ប្រចាំតំបន់អាស៊ីអាគ្នេយ៍បានស្វាគមន៍ចំពោះ ការបោះឆ្នោតឃុំ សង្កាត់ នៅកម្ពុជា ប្រព្រឹត្តទៅដោយសណ្តាប់ធ្នាប់ល្អ និងប្រព្រឹត្តដោយរលូន និងដោយសន្តិវិធី សម្រាប់ដំណើរការប្រជាធិបតេយ្យ នៅមុនពេល នៃការបោះឆ្នោតជាតិ។ នេះបើតាមសេចក្តីថ្លែងការណ៍ របស់ការិយាល័យសិទ្ធិមនុស្ស អ.ស.ប ប្រចាំតំបន់អាស៊ីអាគ្នេយ៍ ដែលបានផ្សព្វផ្សាយ នៅថ្ងៃទី៧ ខែមិថុនា ឆ្នាំ២០១៧។
លោកស្រី កាទីយ៉ា ស៊ីរីហ្ស៊ី តំណាងរងប្រចាំតំបន់ នៃការិយាល័យប្រចាំ តំបន់អាស៊ីអាគ្នេយ៍នៅទីក្រុងបាងកក បានមានប្រសាសន៍ថា ” យើងមានសេចក្តីរីករាយ ដែលបានឃើញថា អំពើហិង្សាអន្តរាគមន៍យោធា និងការចាប់ខ្លួន ដែលត្រូវបានគំរាម នៅមុននៃការបោះឆ្នោត មិនបានកើតមានទេ។ ប្រជាជនកម្ពុជា បានសម្តែងនូវការពេញចិត្ត ជាទូទៅ ចំពោះដំណើរការនេះ”។
ការិយាល័យសិទ្ធិមនុស្ស អ.ស.ប បានឃ្លាំមើលបរិយាកាសសិទ្ធិមនុស្ស នៃការបោះឆ្នោត ដូចដែលខ្លួន បានធ្វើនៅរៀងរាល់ ការបោះឆ្នោត ចាប់តាំងពីការិយាល័យនេះ បានបង្កើតនៅក្នុងឆ្នាំ១៩៩៣។
ការិយាល័យសិទ្ធិមនុស្ស អ.ស.ប បានអបអរសាទរ ចំពោះការពិត ដែលថាវាមាន លក្ខណៈផ្ទុយគ្នានឹង ការបោះឆ្នោត កាលពីពេលកន្លងមក គឺនាពេលនេះ មិនមានអ្នកបោះឆ្នោតណា បានអះអាងថា ពួកគេត្រូវត្រូវបានរារាំង មិនអោយបោះឆ្នោតឡើយ។
ការិយាល័យសិទ្ធិមនុស្ស អ.ស.ប ក៏បានអបអរសាទរ ចំពោះប្រជាជនកម្ពុជា ដែលបានចេញទៅបោះឆ្នោត ក្នុងចំនួនដ៏ខ្ពស់៕

លោកនាយករដ្ឋមន្ត្រី ហ៊ុន សែន ថ្លែងអំណរគុណដល់ប្រជាពលរដ្ឋខ្មែរ​គ្រប់ស្រទាប់​វណ្ណៈនៅ​ទូទាំងប្រទេស​ ដែលមាន​ជំនឿចិត្ត​ចំពោះការ​ដឹកនាំ​របស់លោក​

នៅព្រឹកថ្ងៃទី០៩ ខែមិថុនា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានលើកឡើងថា គ្រាដែលកម្ពុជាកំពុងសប្បាយរីករាយជាមួយសន្តិភាព និងវឌ្ឍនភាពសង្គមនោះ មានប្រទេសមួយចំនួននៅលើពិភពលោក ជាពិសេសតំបន់មជ្ឈិមបូព៌ា កំពុងប្រឈមនឹងភ្លើងសង្រ្គាម និងអស្ថេរភាពសង្គម ដូចដែលកម្ពុជា ធ្លាប់ឆ្លងកាត់យ៉ាងជូរចត់កាលពីអតីតកាល។

ជាមួយនិងការរក្សាបាននូវសុខសន្តិភាព និងស្ថេរភាពនៅក្នុងសង្គមនេះ លោកនាយករដ្ឋមន្ត្រី ហ៊ុន សែន បានថ្លែងអំណរគុណដល់ប្រជាពលរដ្ឋខ្មែរគ្រប់ស្រទាប់វណ្ណៈនៅទូទាំងប្រទេស ដែលបានចូលរួមថែរក្សាការពារសន្តិភាព និងមានជំនឿចិត្តចំពោះការដឹកនាំរបស់លោក និងគាំទ្រឥតងាករេ ដើម្បីបន្តការកសាង និងអភិវឌ្ឍន៍កម្ពុជាឲ្យក្លាយជាប្រទេសរីកចម្រើនសម្បូរសប្បាយនៅក្នុងតំបន់អាស៊ី ដែលបានប្រែក្លាយកម្ពុជាពីគំនរផេះផង់នៃភ្លើងសង្រ្គាម មកជាប្រទេសមានការរីកចម្រើនដូចពេលបច្ចុប្បន្ននេះ៕

(វីដេអូ) អ្នកនាំពាក្យ​គណបក្ស​ប្រជាជន​កម្ពុជា ព្រមាន​ដល់មន្រ្តី គណបក្ស​ប្រឆាំង ចំពោះ​ការប៉ុន​ប៉ង​កាន់​កាប់​​ស្ថាប័ន​ព្រឹទ្ធសភា​ ខណៈដែល​​គណបក្ស​នេះ​ បាន​ទទួល​​សំឡេង​​ភាគតិច​​នៅឡើយ​​