(វីដេអូ) សម្រង់ប្រសាសន៍សម្តេច​មហា​បវរ​ធិបតី ហ៊ុន ម៉ាណែត, ក្នុងពិធីពិសាអាហារស្រាយបួសខែរ៉ាម៉ាឌន នៃសាសនាឥស្លាម លើកទី៨ ឆ្នាំ២០២៤

 CMF: 21 March, 2024

អ្នកឧកញ៉ា សុះ កំរ៉ី ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា
ឯកឧត្តម Wanmuhamadnoor Matha ប្រធានរដ្ឋសភា នៃព្រះរាជាណាចក្រថៃ
ឯកឧត្តមបណ្ឌិត Agung Laksono អតីតប្រធានរដ្ឋសភាជាតិឥណ្ឌូនេស៊ី និងជាអនុប្រធានអង្គការអ្នកប្រជាធិបតេយ្យនិយមកណ្តាលអាស៊ីប៉ាស៊ីហ្វិកអន្តរជាតិ (CAPDI)
ឯកឧត្តម El Habib Bourane តំណាងឯកឧត្តម Hissein Brahim Taha អគ្គលេខាធិការអង្គការសហប្រតិបត្តិការឥស្លាម (OIC)
ឯកឧត្ដម លោកជំទាវ លោកឧកញ៉ា លោក លោកស្រី បងប្អូនសាសនិកឥស្លាម ដែលបានអញ្ជើញចូលរួមនៅក្នុងឱកាសនេះ ក៏ដូចជាកំពុងទស្សនាការផ្សាយបន្តផ្ទាល់ពីបណ្តាទូរទស្សន៍ជាតិ ឯកជន និងបណ្តាញព័ត៌មាននានា!
ថ្ងៃនេះ ខ្ញុំពិតជាមានក្តីរីករាយជាអនេក ដែលបានមកចូលរួម និងជួបបងប្អូនសាសនិកខ្មែរឥស្លាមជាលើកដំបូង ក្នុង​ឱកាសពិសា​អាហារស្រាយបួសខែរ៉ាម៉ាឌន ឆ្នាំ២០២៤ រៀបចំដោយរាជរដ្ឋាភិបាលនីតិកាលទី៧ នៃរដ្ឋសភា ហើយពិធីនេះគឺជាការផ្តួចផ្តើមគំនិតដោយ សម្តេចអគ្គមហាសេនាបតីតេជោ ហ៊ុន សែនអតីតនាយករដ្ឋមន្ត្រី ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ដែលបានរៀបចំតាំងពីឆ្នាំ២០១៤ កន្លងមក។ ក្នុងនាមរាជរដ្ឋាភិបាល​ ខ្ញុំនឹងចូលរួមពិធីពិសាអាហារស្រាយបួសខែរ៉ាម៉ាឌន នៃសាសនាឥស្លាមកម្ពុជា នៅពេលអនាគតខាងមុខទៅទៀត។

ខ្ញុំសូមកោតសរសើរ ចំពោះគណៈកម្មការរៀបចំពិធីពិសាអាហារស្រាយបួសខែរ៉ាម៉ាឌន នៃសាសនាឥស្លាម ដែលមាន ឯកឧត្តម អូស្មាន ហាស្សាន់ ទេសរដ្ឋមន្ត្រីជាប្រធាន ដែលបានសហការរៀបចំពិធីនេះឡើង ដើម្បីបង្ហាញឱ្យឃើញនូវសាមគ្គីភាព ការយោគយល់គ្នា និងការរស់នៅជាមួយគ្នាប្រក​បដោយក្តីមេត្តា ករុណា រវាងសហគមន៍ឥស្លាមនៅកម្ពុជា ក្រោមម្លប់សន្តិភាព ហើយក៏ជាការផ្តល់ឱកាសសម្រាប់អង្គពិធីបានជួបប្រាស្រ័យទាក់ទងគ្នាកាន់តែជិតស្និទ្ធ ផ្លាស់ប្តូរ គំនិតយោបល់ ចែករំលែកបទពិសោធល្អៗ និងពង្រឹងកិច្ចសហប្រតិបត្តិការ ដើម្បីរួមចំណែកដល់ការលើកស្ទួយសុខដុមនីយកម្មវិស័យឥស្លាមសាសនានៅកម្ពុជា សំដៅរក្សានូវសុខសន្តិភាព ស្ថិរភាព និងសុវត្ថិភាព ទាំងផ្លូវកាយ ផ្លូវចិត្ត និងស្មារតី ក្នុងការអភិវឌ្ឍសង្គម-សេដ្ឋកិច្ចជាតិ។

ជាការពិត ការស្រាយបួស ជាច្បាប់ក្រឹត្យក្រមសាសនាឥស្លាម ដែលបងប្អូនសាសនិកខ្មែរឥស្លាម ទាំងនៅកម្ពុជា និងសកលលោក សុទ្ធតែធ្វើការប្រតិបត្តិដូចគ្នា។ ដូច្នេះ ពេលចាប់ផ្តើមខែរ៉ាម៉ាឌន ខ្ញុំបានផ្ញើសារជូនពរបងប្អូនសាសនិកឥស្លាមកម្ពុជា និងសាសនិកឥស្លាមនៅទូទាំងពិភពលោកផងដែរ​ ដោយអនុវត្តតាមគន្លងដ៏ប្រពៃរបស់សម្តេចតេជោ បន្ទាប់ពីការស្រាយបួសនៅទីនេះហើយ សម្តេចតេជោ អតីតនាយករដ្ឋមន្ត្រីតែងតែបានជ្រើសរើសទីតាំងមួយទៀត ទៅចូលរួមស្រាយបួស មានការអញ្ជើញចូលរួមដោយឧប​នាយករដ្ឋមន្ត្រី ទេសរដ្ឋមន្រ្តី រដ្ឋមន្ត្រីមួយចំនួន ព្រមទាំងអភិបាលរាជធានី-ខេត្ត ក៏បានទៅធ្វើពិធីស្រាយបួសនៅតាមវិហារឥស្លាមនានាមួយចំនួនផងដែរ។

រាជរដ្ឋាភិបាល ក្នុងបុព្វហេតុប្រទេសជាតិ និងប្រជាជន បានខិតខំធ្វើឱ្យសាសនា​ទាំងអស់ ទទួលបានការគាំពារធានា និងលើកទឹកចិត្ត សុខដុមនីយកម្មសាសនា ដើម្បីឆ្ពោះទៅរកការរីកចម្រើន និងរស់នៅក្នុងសុខសន្តិភាព និងការអភិវឌ្ឍ។ រាជរដ្ឋាភិបាលតែងតែយកចិត្តទុកដាក់ ផ្តល់សេរីភាពជំនឿសាសនាយ៉ាងទូលំទូលាយដល់ប្រជាជនទូទៅ ដោយឈរលើមូលដ្ឋាននៃការពង្រឹងសុខដុមនីយកម្មរវាងសាសនិក នៃគ្រប់និកាយសាសនា ប្រឆាំងរាល់ទង្វើរើសអើង សំដៅទប់ស្កាត់ការយកសាសនាទៅធ្វើអាជីវកម្ម ដែលអាចបង្កវិបត្តិសាសនានៅកម្ពុជា។

កម្ពុជាពិតជាមានមោទនភាពចំពោះប្រជាពលរដ្ឋរបស់ខ្លួន ដែលគោរពកាន់សាសនាផ្សេងៗគ្នា ប៉ុន្តែ មានសាមគ្គី​ភាពគ្នាយ៉ាងល្អប្រសើរ​។​ នេះមិនត្រឹមតែជាមោទនភាពសម្រាប់កម្ពុជាតែប៉ុណ្ណោះទេ ប៉ុន្តែ ក៏ជាមោទនភាព សម្រាប់ប្រទេសក្នុងតំបន់ និងពិភពលោកផងដែរ ដែលប្រទេសជាច្រើនកោតសរសើរចំពោះសុខដុមនីយកម្មសាសនានៅកម្ពុជា តាមរយៈគោលនយោបាយដ៏ត្រឹមត្រូវរបស់រាជរដ្ឋាភិបាល ដែលមានកិច្ចសហការល្អ ជាមួយស្ថាប័ន អង្គភាព ក៏ដូចជាដៃគូពាក់ព័ន្ធ ដើម្បីធ្វើឱ្យមានប្រសិទ្ធភាពខ្ពស់លើការងារ និងបង្កភាពងាយស្រួលជូនប្រជាពលរដ្ឋគ្រប់សាសនិកនៅព្រះរាជាណាចក្រកម្ពុជា ទាំងបច្ចុប្បន្ន និងអនាគត។

អង្គពិធីជាទីមេត្រី !
កន្លងមក រាជរដ្ឋាភិបាល ក្រោមការដឹកនាំដោយ សម្តេចតេជោ ហ៊ុន សែន អតីតនាយករដ្ឋមន្ត្រី ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានរៀបចំឱ្យមានស្ថាប័នកំពូលឥស្លាម គឺគណៈដឹកនាំជាន់ខ្ពស់នៃសាសនាឥស្លាមកម្ពុជា ដែលមានអ្នកឧកញ៉ា ចាងហ្វាង សុះ កំរ៉ី ជាចាងហ្វាង ជាអ្នកដឹកនាំ តាំងពីឆ្នាំ២០០០ មក ហើយមានឋានានុក្រមគ្រប់គ្រងពីលើរហូតដល់ក្រោម ជាគណៈអ៊ីម៉ាំរាជធានី-ខេត្ត ក្រុង ស្រុក ខណ្ឌ អ៊ីម៉ាំម៉ាស្ជិទ។

ទន្ទឹមនេះ រាជរដ្ឋាភិបាលបានផ្តល់តួនាទីដល់ថ្នាក់ដឹកនាំសហគមន៍ខ្មែរឥស្លាមជាច្រើនរូប ក្នុងស្ថាប័នកំពូលរបស់ជាតិ និងនៅថ្នាក់ក្រោមជាតិ ដើម្បីបង្កលក្ខណៈងាយស្រួលដល់សហគមន៍ខ្មែរឥស្លាម ហើយថ្មីៗនេះ មានថ្នាក់ដឹកនាំខ្មែរឥស្លាម ៥ រូប ក្នុងនោះ មានស្ត្រី ១ រូប បានជាប់ជាសមាជិកព្រឹទ្ធសភានីតិកាលទី៥ និងកន្លងមកមាន ៦ រូប ក្នុងនោះ មានស្ត្រី ១ រូប បានជាប់ជាតំណាងរាស្ត្រក្នុងនីតិកាលទី៧ នៃរដ្ឋសភា ក្រៅពីនោះ មានសមាជិករាជរដ្ឋាភិបាល រដ្ឋលេខាធិការ អនុរដ្ឋលេខាធិការ ទីប្រឹក្សាប្រធានព្រឹទ្ធសភា ទីប្រឹក្សាជាន់ខ្ពស់រដ្ឋសភា រាជរដ្ឋាភិបាល ក្រសួង-ស្ថាប័ន អភិបាលរងរាជធានី-ខេត្ត អភិបាលរងក្រុង ស្រុក-ខណ្ឌ សមាជិកក្រុមប្រឹក្សាខេត្ត សមាជិកក្រុមប្រឹក្សាក្រុង ស្រុក-ខណ្ឌ សមាជិកក្រុមប្រឹក្សាឃុំសង្កាត់ មន្ត្រីថ្នាក់ឧត្តមសេនីយ៍នគរបាល យោធា និងគ្រូបង្រៀនខ្មែរឥស្លាមជាច្រើនរូប ដូចដែលបានលើកឡើងដោយ ឯកឧត្តម អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ​អម្បាញ់ម៉ិញនេះ។

ជាមួយនេះ សេរីភាពនៃការគោរពសាសនាឥស្លាម ត្រូវបានរាជរដ្ឋាភិបាលបើកទូលាយដល់បងប្អូន​ឥស្លាម ដូចជាសិស្ស-និស្សិតឥស្លាមអាចស្លៀកសម្លៀកបំពាក់ប្រពៃណីឥស្លាម នៅតាមគ្រឹះស្ថានសិក្សាគ្រប់​កម្រិត បងប្អូនជាស្ត្រីអាចទទូរក្បាល និងបុរសអាចពាក់កាតឹបថតរូបសម្រាប់ប្រើប្រាស់លើឯកសាររដ្ឋបាល ដូចជា លិខិត​ឆ្លងដែន អត្ត​សញ្ញាណប័ណ្ណ ។ល។ កន្លែងថ្វាយបង្គំមាននៅព្រលានយន្តហោះ នៅតាមមន្ទីរពេទ្យរដ្ឋ នៅតាមរោងចក្រ សណ្ឋាគារ ផ្សារធំៗមួយចំនួន ជាពិសេស នៅវិមានសន្តិភាពនៃទីស្តីការគណៈរដ្ឋមន្ត្រី ក៏បានរៀបចំបន្ទប់ថ្វាយបង្គំផងដែរ។

ខ្ញុំមានមោទនភាពដែលកន្លងមក ឯកឧត្តម អូស្មាន ហាស្សាន់ ទេសរដ្ឋមន្ត្រី ទទួលបន្ទុកបេសកកម្មពិសេស បានចូលរួមក្នុងសន្និសីទអន្តរជាតិឥស្លាម នៅតាមតំបន់ជាច្រើន ដើម្បីផ្សព្វផ្សាយអំពីភាពសុខដុមនីយកម្មជាតិសាសន៍ និងសាសនានៅកម្ពុជា ដែលថ្មីៗកន្លងទៅ នៅសារ៉ាយ៉េវ៉ូ(Sarajevo) ប្រទេសបូស្ន៊ី ហ៊េកហ្ស៊ីហ្គូវីណា​(Bosnia-Herzegovina) ឯកឧត្តម Sheikh Dr. Muhammad Bin Abdul Karim Issa អគ្គលេខាធិការអង្គការ​សម្ព័ន្ធពិភពឥស្លាម (RABITA) ​ដែលជាអ្នកសង្កេតការណ៍របស់អង្គការសហប្រជាជាតិ(UN) និងអង្គការសហប្រតិបត្តិការឥស្លាម (OIC) បានយល់ព្រមនឹងរៀបចំសន្និសីទអន្តរជាតិឥស្លាមនៅកម្ពុជាចុងឆ្នាំ២០២៤ ដើម្បីឱ្យបណ្តាប្រទេសដទៃ រៀនសូត្រពីបទពិសោធជាគំរូ ដែលរាជរដ្ឋាភិបាលកម្ពុជាបាន និងកំពុងយកចិត្តទុកដាក់ដល់សហគមន៍ឥស្លាម ដោយគ្មានការរើសអើង ហើយខ្ញុំនឹងចូលរួមក្នុងពិធីដ៏មានសារ:សំខាន់នេះ។

អង្គពិធីជាទីមេត្រី !
ចំពោះវិស័យអប់រំ នៅក្នុងសហគមន៍ខ្មែរឥស្លាមបច្ចុប្បន្ន មានការរីកចម្រើន ហើយរាជរដ្ឋាភិបាលបានផ្តល់ក្របខ័ណ្ឌគ្រូបង្រៀនខ្មែរឥស្លាម ជូនដល់សហគមន៍ខ្មែរឥស្លាម ធ្វើឱ្យចំនួនសិស្ស-និស្សិត បញ្ញវន្តខ្មែរឥស្លាមកាន់​តែមានចំនួនកើនឡើង។ ដូច្នេះ ខ្ញុំសូមអំពាវនាវឱ្យបន្តយកចិត្តទុកដាក់បណ្តុះបណ្តាលនូវមុខជំនាញវិជ្ជាជីវៈ និងបចេ្ចកវិទ្យាផ្សេងៗ ដើម្បីឱ្យបងប្អូនខ្មែរឥស្លាម ទទួលបាននូវការងារសមស្រប ធ្វើឱ្យជីវភាពគ្រួសារ និងសង្គមជាតិ កាន់តែប្រសើរឡើង តាមរយៈអនុសាសន៍ណែនាំមួយចំនួន ដែលខ្ញុំសូមដាក់ចេញដូចខាងក្រោម៖

ទី១. ថ្នាក់ដឹកនាំឥស្លាមនិងសាសនិកឥស្លាមទាំងអស់ ត្រូវបន្តសហការ ​សាមគ្គីគ្នា និងមានទំនាក់ទំនងល្អជាមួយសហគមន៍សាសនាដទៃទៀត ទាំងក្នុងថ្នាក់ជាតិ និងអន្តរជាតិ ដោយឈរលើគោលការណ៍សុខដុមនីយ​កម្មជាតិសាសន៍។

ទី២. សូមបន្តរៀបចំដឹកនាំកិច្ចការសាសនា ក្នុងសហគមន៍ខ្មែរឥស្លាម តាមរយៈកិច្ចសហការជិតស្និទ្ធជាមួយក្រសួងធម្មការ និងសាសនា និងអាជ្ញាធរមានសមត្ថកិច្ចតាមលំដាប់ថ្នាក់។

ទី៣. អាជ្ញាធរមានសមត្ថកិច្ចជួយសម្រួលលើការសាងសង់សាលារៀន វិហារឥស្លាម ស៊ូរ៉ាវ ជូនបងប្អូនខ្មែរឥស្លាម ដោយត្រូវអនុវត្តឱ្យបានខ្ជាប់ខ្ជួននូវសេចក្តីជូនដំណឹង ស្តីពីការកំណត់លើការកសាងទីកន្លែងប្រតិបត្តិសាសនា នៅតាមបណ្តាភូមិដែលមានសាសនិកខ្មែរឥស្លាមរស់នៅ ស្របតាមក្រឹត្យក្រមច្បាប់សាសនាឥស្លាមដែលបានកំណត់ និងអនុវត្តតាមបច្ចេកទេស​ទៅតាមស្ថាប័នមានសមត្ថកិច្ច។

ទី៤. សូមបង្កើនសកម្មភាពសង្គម តាមរយៈកិច្ចការមនុស្សធម៌ ការអប់រំ ការអភិវឌ្ឍ និងសកម្មភាពសាសនា ដោយឈរលើគោលការណ៍នៃជំនឿឥស្លាម និងគោរពតាមរដ្ឋធម្មនុញ្ញ។

ទី៥. សូមមានការជឿជាក់លើការដឹកនាំរបស់រាជរដ្ឋាភិបាល ដែលបានធានាសិទ្ធិសេរីភាពខាងសាសនាឥស្លាម​នៅកម្ពុជា តាមរយ:សាមគ្គីភាពជាមួយអ្នកកាន់សាសនានានា ដើម្បីភាពសុខដុមនីយកម្មផ្នែកសាសនា​​។

ទី៦. ​សូមបន្តកិច្ចសហប្រតិបត្តិការជាតិ និងអន្តរជាតិ ដើម្បីកៀរគរថវិកា និងបច្ចេកទេស សម្រាប់គាំទ្រដល់សកម្មភាពអភិវឌ្ឍសហគមន៍ខ្មែរឥស្លាម ដោយជៀសវាងការយកសាសនាសម្រាប់ធ្វើអាជីវកម្ម បង្កើតបញ្ហាមិនល្អនៅក្នុងសហគមន៍។

ខ្ញុំសូមយកឱកាសនេះ ​ថ្លែងអំណរគុណបងប្អូនខ្មែរឥស្លាមនៅទូទាំងព្រះរាជាណាចក្រកម្ពុជា ដែលតែងតែជឿជាក់លើការដឹកនាំរបស់គណបក្សប្រជាជនកម្ពុជា និងរាជរដ្ឋាភិបាល ជាពិសេស នៅតាមតំបន់សហគមន៍ ដែល​មានបងប្អូនសាសនិកខ្មែរឥស្លាមរស់នៅ អត្រាភាគរយនៃការបោះឆ្នោតជូនគណបក្សប្រជាជនកម្ពុជា គឺមានកម្រិតខ្ពស់គួរឱ្យកត់សម្គាល់ គឺខ្ញុំសូមអរគុណចំពោះកិច្ចការនេះ។

​ខ្ញុំសូមអរគុណភ្ញៀវកិត្តិយសជាតិ-អន្តរជាតិ ដែលបានអញ្ជើញចូលរួមនៅក្នុងឱកាសនេះ ជាពិសេស សូមអរគុណ ឯកឧត្តម Wanmuhamadnoor Matha ឯកឧត្តមបណ្ឌិត Agung Laksono និងឯកឧត្តម El Habib Bourane តំណាងឯកឧត្តម Hissein Brahim Taha អគ្គលេខាធិការ OIC ដែលបានអញ្ជើញ និងថ្នាក់ដឹកនាំផ្សេងទៀត ដែលបានអញ្ជើញចូលរួមក្នុងពិធីនេះ ហើយខ្ញុំក៏សូមអញ្ជើញទុកជាមុននូវភ្ញៀវ ដែលបានអញ្ជើញមក​ឆ្នាំនេះ សម្រាប់ឆ្នាំក្រោយៗទៀត ដើម្បីរួមជាមួយយើងខ្ញុំ ធ្វើពិធីស្រាយ​​​បួសរ៉ាម៉ាឌនជារៀងរាល់ឆ្នាំ។

នៅទីបញ្ចប់នេះ ខ្ញុំសូមព្រះអាល់ឡោះ ប្រទាននូវពរជ័យ សិរីសួស្តី សម្រាប់អ្នកទាំងអស់គ្នាជាមួយនឹងភាព​រីកចម្រើន រុងរឿង សុភមង្គល និងសេចក្តីសុខសប្បាយសម្រាប់គ្រប់ៗគ្នាតរៀងទៅ។

សូមអរគុណ!

សម្រង់ប្រសាសន៍សម្តេច​មហា​បវរ​ធិបតី ហ៊ុន ម៉ាណែត, ពិធីសម្ពោធសមិទ្ធផលមជ្ឈមណ្ឌលជាតិជនពិការ តេជោសែន និងគណៈកម្មាធិការជាតិប៉ារ៉ាឡាំពិកកម្ពុជា

 CMF: 21 March, 2024

ឯកឧត្តម សមាជិកព្រឹទ្ធសភា សមាជិករាជរដ្ឋាភិបាល ភ្ញៀវកិត្តិយសជាតិនិងអន្តរជាតិ
ថ្នាក់ដឹកនាំមជ្ឈមណ្ឌលជាតិនៃជនពិការនិងគណៈកម្មាធិការជាតិប៉ារ៉ាឡាំពិកកម្ពុជា
ក្រុមអត្តពលិកនិងបងប្អូនជនពិការ និងបងប្អូនប្រជាពលរដ្ឋ ជនរួមជាតិជាទីស្រលាញ់

ថ្ងៃនេះ ខ្ញុំមានសេចក្តីសោមនស្សដែលបានចូលរួមអបអរសាទរ ​ជាមួយបងប្អូន ពិការភាពទាំងអស់ នៅក្នុងពិធី «សម្ពោធសមិទ្ធផលមជ្ឈមណ្ឌលជាតិនៃជនពិការតេជោសែន និង គណៈកម្មាធិការជាតិប៉ារ៉ាឡាំពិកកម្ពុជា » ប្រកបដោយបរិយាកាសរីករាយ នាពេលនេះ ។ នេះ ជាសមិទ្ធផល​ប្រវត្តិសាស្ត្រពុំធ្លាប់មាននៅលើទឹកដីកម្ពុជាកន្លងមក, ដែលកើតចេញពីការខិតខំប្រឹងប្រែងដោយផ្ទាល់របស់បងប្អូនមានពិការភាព ក្នុងរយៈពេល ២៧ ឆ្នាំ និង ការចូលរួមផ្តួចផ្តើមដ៏ខ្ពង់ខ្ពស់បំផុតរបស់ សម្តេចតេជោ និង សម្តេចកិត្តិព្រឹទ្ធបណ្ឌិត ។

ឆ្លៀតក្នុងឱកាសនេះ, ខ្ញុំសូមពាំនាំនូវក្តីនឹករឭក និង ការផ្តាំផ្ញើសួរសុខទុក្ខពីសំណាក់ សម្តេចទំាងពីរ ផ្ញើជូនចំពោះ ឯកឧត្តម លោកជំទាវ លោក លោកស្រី បងប្អូនមានពិការភាពទាំងអស់នៅទីនេះនៅក្នុងស្មារតីនៃការស្រលាញ់យកចិត្តទុកដាក់ជូនដល់បងប្អូន ក៏ដូចជាប្រជាពលរដ្ឋគ្រប់រូបនៅទូទាំងប្រទេសផងដែរ។

តាមរយៈរបាយការណ៍របស់ ឯកឧត្តម យី វាសនា, ខ្ញុំសូមសម្តែងនូវការកោតសរសើរ និង វាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ បងប្អូនមានពិការភាព, អាណាព្យាបាល និង បុគ្គលិក ទាំងអស់នៃមជ្ឈមណ្ឌលជាតិនៃជនពិការតេជោសែន និង គណៈកម្មាធិការជាតិប៉ារ៉ាឡាំពិក កម្ពុជា, ដែល​បានខិតខំប្រឹងប្រែងអស់កម្លាំងកាយចិត្ត បញ្ញា ស្មារតី, តស៊ូ ព្យាយាម និង អត់ធ្មត់ ក្នុងការបំពេញតួនាទី ភារកិច្ច និង បេសកកម្មរបស់ខ្លួន ជូនជាតិមាតុភូមិ និង ប្រជាជន, ជាពិសេស ជនមានពិការភាពរបស់យើង ។ ទន្ទឹមនេះ, ខ្ញុំសូមកោតសរសើរ និង ថ្លែងអំណរគុណចំពោះការចូលរួមរបស់ដៃគូអភិវឌ្ឍន៍, អង្គការជាតិ-អន្តរជាតិ, សាលាបណ្តុះបណ្តាលវិជ្ជាជីវៈ និង ស្ថាប័ន ពាក់ព័ន្ធ និអាជ្ញាធរដែន​​ដី, ដែលបានសហការ និង ផ្តល់ការឧបត្ថម្ភគាំទ្រ, ទាំងសម្ភារៈ ថវិកា និង បច្ចេកទេស, ដល់សកម្ម ភាព​ការងាររបស់មជ្ឈមណ្ឌលជាតិនៃជនពិការតេជោសែន និងគណៈកម្មាធិការជាតិប៉ារ៉ាឡាំពិកកម្ពុជា, ដែលការណ៍នេះ រួមចំណែកដល់ការលើកកម្ពស់សិទ្ធិជនមានពិការភាព និងលើកកម្ពស់ជីវភាពបងប្អូនឱ្យកាន់តែ ប្រសើរ ​។

ខ្ញុំ​មានក្តីរំភើបរីករាយ ដោយបានឃើញជនមានពិការភាពនៅកម្ពុជា ចូលរួមយ៉ាងសកម្ម និង ពេញ​លេញ ​នៅក្នុង​សកម្មភាពសេដ្ឋកិច្ច-សង្គមកម្ពុជារបស់យើង,​ ដែលនេះឆ្លុះបញ្ចំាង​ពីសមត្ថភាព និង សក្តានុពលរបស់ជនមាន ពិការភាព ស្របតាមសុភាសិត «ពិការតែកាយ ចិត្តមិនពិការឡើយ»។ ខ្ញុំសូមលើកទឹកចិត្ត និង បញ្ជាក់ជូនបងប្អូនមានពិការភាពថា បងប្អូនមិននៅឯកោទេ ។ បងប្អូនឃើញនាពេលនេះ គឺ សម្តេចតេជោ, ខ្ញុំ, និង រាជរដ្ឋាភិបាល តែងតែចាត់ទុកបងប្អូនមានពិការភាពជាមូលធនមនុស្សដ៏មានសក្តានុពល និង បានកំណត់យ៉ាងច្បាស់នៅក្នុង យុទ្ធសាស្ត្របញ្ចកោណ-ដំណាក់កាលទី ១ របស់រាជរដ្ឋា-ភិបាល នីតិកាលទី ៧ ដែលផ្តោត​​ជាចម្បងលើការកសាងធនធានមនុស្ស និងពង្រឹងធនធានមនុស្សដែលរួមទាំងប្រជាពលរដ្ឋយើងទាំងអស់រួមទាំងបងប្អូនមានពិការភាពផងដើម្បីក្លាយជាធនធានរបស់កម្ពុជា។ ការណ៍នេះ បានបញ្ជាក់ យ៉ាងច្បាស់នូវការយកចិត្តទុកដាក់របស់រាជរដ្ឋាភិបាលរបស់យើង ដែលបានធ្វើកន្លងមកនិងបន្តតទៅទៀតនៅក្នុងអាណត្តិថ្មីនេះ ។

តាមរយៈកិច្ចខិតខំប្រឹងប្រែងរបស់មជ្ឈមណ្ឌលជាតិនៃជនពិការតេជោសែន និង គណៈ​កម្មាធិការជាតិប៉ារ៉ាឡាំពិកកម្ពុជា, ​ស្ថាប័នទំាង​​ពីរនេះ បានក្លាយជាសេនាធិការរបស់ក្រសួងសង្គមកិច្ច អតីតយុទ្ធជន និង យុវនីតិសម្បទា និង ក្រសួងអប់រំ យុវជន និង កីឡា, ព្រមទាំងចូលរួមប្រកប​ដោយស្មារតីបុរេសកម្ម ក្នុងការសហការអនុវត្តការងារ ដែលឈានដល់ការសម្រេចបាន ​សមិទ្ធផល​ជាច្រើន,

[ចាប់ផ្តើមអធិប្បាយបន្ថែម១]

(១) អ្នកហ្វឹកហ្វឺនមិនធ្វើសម្រាប់តែយកពានប៉ុណ្ណោះទេ ប៉ុន្តែដើម្បីលើកមុខមាត់និងទង់ជាតិរបស់កម្ពុជា

សមិទ្ធផលទាំងអស់នេះ មិនមែនតែនៅក្នុងប្រទេសរបស់យើងនោះទេ ប៉ុន្តែក៏បាននាំសមិទ្ធផលទាំងអស់នេះពីឆាកអន្តរជាតិមកជូនប្រទេសរបស់យើង។ ខ្ញុំបានដើរទស្សនានៅក្នុងការពិពណ៌ ឃើញមេដាយនៅលើតុច្រើន ហើយមេដាយនេះមិនមែនយកមកដាក់នៅទីនេះទេ គឺយើងបានយកពីឆាកអន្តរជាតិ តាមរយៈការលើកទង់ជាតិយើងលើការប្រកួតប្រជែងកម្រិតអាស៊ាន អាស៊ី ទៅមុខទៀតយើងនឹងអាចឈានទៅដល់កម្រិតពិភពលោក។ ខ្ញុំជឿជាក់ថា ការខិតខំប្រឹងប្រែងរបស់កីឡាកររបស់យើង និងការគាំទ្របន្ថែមទៀតរបស់រាជរដ្ឋាភិបាល ក៏ដូចជាការចូលរួមរបស់ប្រជាជនយើងទូទាំងប្រទេស នឹងបង្កើនលទ្ធភាពជូនដល់កីឡាករនៅក្នុងការដណ្តើមមេដាយកម្រិតពិភពលោក។ ជាក់ស្តែង មកដល់ពេលនេះ យើងបានជាង ២៦១ គ្រឿងទៅហើយ។ កាលពីជាង ១០ ឆ្នាំមុន យើងមិនអាចរំពឹងថាទៅរួចទេ … អ្វីក៏ដោយជាការបើកច្រកមួយ និងការខិតខំប្រឹងប្រែងបន្ថែមទៀត។ រាជរដ្ឋាភិបាលនឹងបន្តយកចិត្តទុកដាក់ ព្រោះកិច្ចការនេះមិនមែនធ្វើតែសម្រាប់បងប្អូនតែប៉ុណ្ណោះទេ គឺធ្វើសម្រាប់ជាតិរបស់យើង។ បងប្អូនជាអ្នកហ្វឹកហ្វឺន ក៏មិនមែនធ្វើសម្រាប់តែខ្លួនឯងយកពានប៉ុណ្ណោះទេ ប៉ុន្តែគឺធ្វើដើម្បីលើកមុខមាត់និងទង់ជាតិរបស់កម្ពុជានៅលើឆាកអន្តរជាតិ។ ត្រូវតែមានកម្លាំងសរុបរួមគ្នាធ្វើដើម្បីជាតិយើងទាំងមូល។

[បញ្ចប់សេចក្ដីអធិប្បាយ១]

នាពេលកន្លងទៅ រាជរដ្ឋាភិបាលបានដាក់ចេញនូវផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា ឆ្នាំ ២០១៩-២០២៣ សំដៅគិតគូរ និងបន្តជំរុញការលើកកម្ពស់យុវជនមានពិការភាព ឲ្យចូលរួមចំណែកកាន់តែច្រើននៅក្នុងកិច្ចការអភិវឌ្ឍន៍សង្គមសេដ្ឋកិច្ច។

[ផ្ដើមសេចក្ដីអធិប្បាយ២]

(២) សូមបងប្អូនមានពិការភាព ប្រឹងប្រែងបន្តស្មារតី “ពិការកាយ តែមិនពិការចិត្ត”

មិនមែនតែវិស័យកីឡាប៉ុណ្ណោះទេ។ គ្រប់ស្ថានភាពទាំងអស់ត្រូវយកចិត្តទុកដាក់ជំរុញនិងផ្តល់អាទិភាព ដើម្បីចូលធាតុផ្សំសំខាន់។ កិច្ចការទាំងអស់នេះ ខ្ញុំបានឃើញនៅតាមសាលា … បានឃើញបងប្អូនមានពិការភាពរបស់យើងក្លាយទៅជាគ្រូ។ គាត់កើតមកងងឹតភ្នែកទេ ប៉ុន្តែក្លាយទៅជាគ្រូបង្រៀន។ កាលដែលខ្ញុំរៀននៅក្រៅប្រ​ទេសមានម្តងនោះមិត្តភក្តិរបស់ខ្ញុំម្នាក់មកពីបង់ក្លាដែសងងឹតភ្នែកពីកំណើតតែក្លាយទៅជាគ្រូបង្រៀនកុំព្យូទ័រ​នៅសាកលវិទ្យាល័យ Georgetown នៅអាមេរិក។ កម្ពុជាយើងក៏មានដែរ ពេលណាដែលយើងផ្តល់លទ្ធភាព។ ខ្ញុំក៏បានផ្តល់អាហារូបករណ៍ច្រើនដល់បងប្អូនដែលមានពិការភាព។ បងប្អូនខិតខំប្រឹងប្រែងរហូតដល់ចប់។ អម្បាញ់​មិញជួបខ្លះដែរនៅទីនេះ។ បងប្អូនផ្សេងទៀត ក្រៅពីការរៀនសូត្រ ក៏ធ្វើការងារក្នុងវិស័យកីឡានេះ។ យើងខិតខំប្រឹងប្រែងបន្តស្មារតីដែលថា “ពិការកាយ មិនពិការចិត្ត” … ទោះបីកាយសម្បទាមិនបានដូចគេ ប៉ុន្តែ​​យើងមានចិត្តអាចសម្រេចជោគជ័យធំ ហើយរាជរដ្ឋាភិបាលនឹងបន្តផ្តល់ឱកាសគោលនយោបាយនេះបន្តទៀត …។

[បញ្ចប់សេចក្ដីអធិប្បាយ២]

រាជរដ្ឋាភិបាល បានដាក់ចេញយុទ្ធសាស្រ្តបញ្ចកោណ-ដំណាក់កាលទី១, ដែល​មានមុំទី ៤ នៃបញ្ចកោណយុទ្ធ សាស្ត្រទី១ គឺ ការកសាង និង ការអភិវឌ្ឍប្រព័ន្ធគាំពារសង្គមឱ្យមានលក្ខណៈប្រមូលផ្តុំ និង សង្គតិភាព, ទាំងក្នុងប្រព័ន្ធជំនួយសង្គម និង ប្រព័ន្ធសន្តិសុខសង្គម, ដោយឈរលើស្មារតី «មិនបោះបង់ពលរដ្ឋខ្មែរណាម្នាក់», ដើម្បីពង្រីកវិសាលភាពនៃប្រព័ន្ធគាំពារសង្គម សំដៅធានាបរិយាប័ន្ន និង សមធម៌សង្គម តាមរយៈកិច្ចអន្តរា គមន៍របស់រដ្ឋសម្រាប់គ្រួសារក្រីក្រ, ងាយរងគ្រោះ និង ងាយរងហានិភ័យ ។

បន្ថែមលើនេះ, រាជរដ្ឋាភិបាល នីតិកាលទី ៧ បានដាក់ចេញគោលការណ៍ណែនាំស្តីពីក្របខ័ណ្ឌកម្មវិធីជាតិជំនួយសង្គមក្នុងកញ្ចប់គ្រួសារ និង គោលការណ៍ណែនាំស្តីពីក្របខ័ណ្ឌកិច្ចគាំពារសង្គមសម្រាប់ឆ្លើយតបនឹងគ្រោះអាសន្ន ដែលឯកសារទាំងពីរនេះនឹងក្លាយជាផែនទីបង្ហាញផ្លូវសម្រាប់ការតម្រង់ទិស និង ការផ្តល់ការណែនាំដល់គ្រប់តួអង្គប្រតិបត្តិករទាំងអស់ អំពីនីតិវិធីនៃការអនុវត្តកម្មវិធីជួយសង្គមក្នុងកញ្ចប់គ្រួសារ ដែលកម្មវិធីកិច្ចគាំពារសង្គមឆ្លើយតបនឹង គ្រោះអាសន្ន ។ កម្មវិធីជាតិជួយសង្គមក្នុងកញ្ចប់គ្រួសារ គឺជាបណ្តុំនៃកម្មវិធីជាតិជួយសង្គមដែលមានលក្ខណៈប្រក្រតី និង អចិន្ត្រៃយ៍ សម្រាប់ផ្តល់ជាប្រយោជន៍ដល់គ្រួសារក្រីក្រ និង សមាជិកគ្រួ សារដែលជាជនរងគ្រោះ, និង ជាការធ្វើសមាហរណកម្មកម្មវិធីជាតិជំនួយសង្គមចំនួន ៤ បញ្ចូលគ្នា រួមមាន៖ (១) កម្មវិធីឧបត្ថម្ភសាច់ប្រាក់សម្រាប់ស្ត្រីមានផ្ទៃពោះ និង កុមារអាយុក្រោម ២ ឆ្នាំ, (២) កម្មវិធីអាហារូបករណ៍សម្រាប់សិស្សក្រីក្រនៅថ្នាក់បឋមសិក្សា និង មធ្យមសិក្សាចំណេះទូទៅ, (៣) កម្មវិធីឧបត្ថម្ភសាច់ប្រាក់ជូនជនមានពិការភាព, និង (៤) កម្មវិធីឧបត្ថម្ភសាច់ប្រាក់ជូនជនចាស់ជរា (អាយុ ៦០ ឆ្នាំឡើង)ដែលស្ថិតនៅក្នុងគ្រួសារក្រីក្រនិងងាយរងហានិភ័យ ។

ជាការពិត, ការងារក្នុងវិស័យពិការភាពពិតជាមានសារៈសំខាន់, ដែលចាំបាច់ត្រូវមានការចូលរួម​ពីក្រសួង​-ស្ថាប័ន សង្គមស៊ីវិល និង សហគមន៍ ។ ខ្ញុំសូមយកឱកាសនេះ លើកទឹកចិត្ត​ដល់គ្រប់ក្រសួង-ស្ថាប័ន និង អង្គភាពថ្នាក់​ក្រោមជាតិទាំងអស់ សូមចូលរួមសហការ ស្របតាម​អភិក្រម «ជវភាពនៃប្រព័ន្ធតួអង្គតែមួយ» ដើម្បីអនុវត្តផែនការសកម្មភាព​ដែលបានដាក់ចេញ សំដៅសម្រេចបានគោលដៅដែលបានកំណត់, ដូចដែលខ្ញុំបានលើកឡើងក្នុងសន្និបាតបូកសរុប និង លើកទិសដៅរបស់ក្រសួងសង្គមកិច្ច អតីតយុទ្ធជន និង យុវនីតិសម្បទា នាពេលថ្មីៗនេះ ។​ ខ្ញុំសូមបញ្ជាក់ថា រាជរដ្ឋាភិបាល​ «មិនទុកជនមានពិការភាពណាម្នាក់ឱ្យនៅឯកោដោយគ្មានការជួយជ្រោមជ្រែងនោះឡើយ» ។

ក្នុងន័យនេះ, ខ្ញុំសូមអំពាវនាវដល់សហគមន៍ជាតិ និង អន្តរជាតិ សូមបន្តរួមគ្នាអនុវត្តគោលដៅអភិវឌ្ឍន៍ប្រកបដោយចីរភាពស្តីពីជនមានពិការភាព, អនុសញ្ញាស្តីពីសិទ្ធិជនមានពិការ-ភាពរបស់អង្គការសហប្រជាជាតិ និង យុទ្ធសាស្រ្តទីក្រុងអ៊ីនឈុន ដើម្បីផ្តល់សិទ្ធិពិតប្រាកដដល់ជនមានពិការភាព ក៏ដូចជាបង្កើតសហគមន៍មួយដែលមានបរិយាប័ន្ន និង ភាពសុខដុមសម្រាប់ជនមានពិការភាព ស្របតាមគោលការណ៍ «គ្មានជនណាម្នាក់ត្រូវបានបោះបង់ចោល» ។​ ជាក់ស្តែង, ដោយបានគិតគូរល្អិតល្អន់នូវសុខុមាលភាពរបស់ជនមានពិការភាព, រាជរដ្ឋាភិបាលកម្ពុជាបានកំណត់កូតារហូតដល់ចំនួន ២% សម្រាប់ជ្រើសរើសជនមានពិការភាពឱ្យបម្រើការងារនៅក្រសួង-ស្ថាប័នរដ្ឋ ស្របតាមច្បាប់ស្តីពីកិច្ចការពារ និង លើកកម្ពស់សិទ្ធិជនពិការ ។ បន្ថែមលើនេះ, វិស័យឯកជនត្រូវបានលើកទឹកចិត្តជាពិសេសឱ្យទទួលយកជនមានពិការភាពឱ្យចូលបម្រើការងារ ដើម្បីលើកកម្ពស់ជីវភាពគ្រួសារ និង ផ្តល់ឱកាសដល់ជនមានពិការភាព ក្នុងការរួមចំណែកដល់កិច្ចការអភិវឌ្ឍសេដ្ឋកិច្ច-សង្គម ឱ្យបានកាន់តែទូលំទូលាយថែមទៀត ។

ការលើកកម្ពស់សិទ្ធិរស់រានមានជីវិតរបស់ជនមានពិការភាព គឺជាការចាំបាច់ ដើម្បីធ្វើឱ្យជនមានពិការភាពទាំងអស់ទទួលបានសិទ្ធិដូចប្រជាជនដែលគ្មានពិការភាពផងដែរ រួមមាន ៖ សិទ្ធិទទួលបានការអប់រំ, ការថែទាំសុខភាព, សេវាយុត្តិធម៌ និង ការចូលរួម នៅក្នុងសកម្មភាពសង្គម សាសនា, កីឡា សិល្បៈ, នយោបាយ ដោយពេញលេញ និង ស្មើភាព ដោយគ្មានការរើសអើង។ ការកែលម្អ និង អភិវឌ្ឍនូវបរិស្ថានរូបវន្ត មធ្យោបាយដឹកជញ្ជូនសាធារណៈ ចំណេះដឹង ព័ត៌មាន និង ទំនាក់-ទំនងក្នុងយុគសម័យឌីជីថល ជាកត្តាចាំបាច់ ក្នុងការជំរុញការចូលរួមប្រកបដោយចីរភាពរបស់ជនមានពិការភាពផងដែរ ។ ការរើសអើង និង ការមើលរំលងនូវសមត្ថភាពរបស់ជនមានពិការភាព គឺជាកំហុសឆ្គង ទាំងផ្នែកសីលធម៌ ស្មារតី និង គោលការណ៍សកលស្តីពីជនមានពិការភាព ព្រមទាំងនាំឱ្យបាត់បង់សាមគ្គីភាព ភាពសុខដុម និង ភាពជឿជាក់គ្នាក្នុងសហគមន៍ ។ ក្នុងនេះ យើងមានន័យថា ការពង្រឹងវិស័យពិការភាពនាពេលនេះ គឺជាការរួមគ្នាបង្កើនក្តីសង្ឃឹមបន្ថែមជូនបងប្អូនទាំងអស់ នូវភាពអង់អាច និង លើកកម្ពស់សិទ្ធិសេរីភាព សេចក្តីថ្លៃថ្នូររបស់ជនមានពិការភាព ព្រមទាំងផ្លាស់ប្តូរ ឱ្យមានការគិតជាវិជ្ជមានប្រកបដោយគុណធម៌សម្រាប់ជនមានពិការភាព ។

ដើម្បីរួមចំណែកដល់ការលើកកម្ពស់ជនមានពិការភាព ប្រកបដោយបរិយាប័ន្ន នៅក្នុងសហគមន៍ និង ក្នុងដំណើរការអភិវឌ្ឍសង្គម-សេដ្ឋកិច្ចឱ្យបានច្រើនជាអតិបរមា, ខ្ញុំសូមផ្តល់អនុសាសន៍​មួយចំនួន ដូចខាងក្រោម ៖

ទី១. ខ្ញុំសូមណែនាំដល់ ក្រសួងសង្គមកិច្ច អតីតយុទ្ធជន និង យុវនីតិសម្បទា និង ក្រសួង-ស្ថាប័នពាក់ព័ន្ធ ចូលរួមរៀបចំបទដ្ឋានគតិយុត្តគ្រប់ជ្រុងជ្រោយ ដើម្បីធានាថាមជ្ឈមណ្ឌលជាតិនៃជនពិការតេជោសែន ជាសម្បត្តិសម្រាប់ជនមានពិការភាពរបស់យើងប្រើប្រាស់ជាបន្ត និង តរៀងទៅ ទាំងក្នុងពេលបច្ចុប្បន្ន និង អនាគត ។

[ផ្ដើមសេចក្ដីអធិប្បាយ៣]

(៣) ធ្វើបច្ចុប្បន្នភាពច្បាប់កីឡា កាលពី ២៧ឆ្នាំមុន ពិសេសក្នុងក្របខណ្ឌ ប៉ារ៉ាឡាំពិក

ក្នុងន័យនេះ សំណើររបស់ឯកឧត្តម យី វាសនា សុំឱ្យក្រសួងសង្គមកិច្ច អតីតយុទ្ធជន និងយុវនីតិសម្បទា, ទីស្ដីការគណៈរដ្ឋមន្ត្រី និងក្រសួងពាក់ព័ន្ធធ្វើទំនើបកម្ម។ គោលការណ៍ជាបទដ្ឋានពីឆ្នាំ១៩៩៧ គិតមកដល់នេះ ២៧ឆ្នាំ។ បើសិនជាក្មេងកើតឥឡូវប្រហែលជាមានកូន ៣ទៅ ៤នាក់ហើយ។ យើងធ្វើទំនើបកម្ម ហើយគិតគូរសុំឱ្យក្រសួងសង្គមកិច្ច អតីតយុទ្ធជន និងយុវនីតិសម្បទា និងទីស្ដីការគណៈរដ្ឋមន្ត្រី ស្ថាប័នពាក់ព័ន្ធ ជំរុញធ្វើបច្ចុប្បន្នភាពកិច្ចការនេះ។ ឥឡូវយើងកំពុងព្រៀងច្បាប់កីឡា និងពិគ្រោះគ្នាបញ្ចូលកិច្ចការមួយចំនួនទៅក្នុងច្បាប់នេះតែម្ដងដើម្បីឱ្យទាន់សម័យ។ ព្រោះ ការងាររបស់យើងកាលពី ២៧ឆ្នាំមុន ជាពិសេសនៅក្នុងក្របខណ្ឌ ប៉ារ៉ាឡាំពិកនេះមិនទាន់ដើរទេ។ ឥឡូវ យើងដើរយ៉ាងសកម្ម។ ត្រូវដើរឱ្យខ្លាំងទៅមុខទៀត។ អញ្ចឹងត្រូវធ្វើកែសម្រួលក៏ដូចជាបំពេញបន្ថែមនូវបទដ្ឋានគិតិយុត្តិចាំបាច់និងឯកភាពចំពោះសំណើនេះ។

[បញ្ចប់សេចក្ដីអធិប្បាយ៣]

ទី២. គ្រប់កិច្ចអភិវឌ្ឍទាំងអស់ រួមមានសកម្មភាពសង្គម សេដ្ឋកិច្ច នយោបាយ និង វប្បធម៌ ត្រូវលើកទឹកចិត្ត និង លើកកម្ពស់ឱ្យមានការចូលរួមជាអតិបរមារបស់ជនមានពិការភាពនៅកម្រិតសហគមន៍ឱ្យបានទូលំទូលាយ ដើម្បីសម្រេចបាននូវការអភិវឌ្ឍប្រកបដោយបរិយាប័ន្ន ទាំងទិដ្ឋភាព និង តួអង្គនៃការអភិវឌ្ឍ ។

ទី៣. ខ្ញុំសូមលើកទឹកចិត្តឱ្យបន្តបង្កើនកិច្ចសហការ ក្នុងការរៀបចំការបណ្តុះបណ្តាលជំនាញពិសេស និង ប្រើប្រាស់បច្ចេកទេសសមស្របសម្រាប់ការសិក្សារបស់ជនមានពិការភាព ដើម្បីលើកកម្ពស់សមត្ថភាព និង លទ្ធភាពទទួលបានការងារធ្វើជាមួយប្រាក់បៀវត្សខ្ពស់ សំដៅលើកកម្ពស់ជីវភាពប្រចាំថ្ងៃរបស់ជនមានពិការភាព និង គ្រួសារឱ្យបានកាន់តែប្រសើរ ក៏ដូចជាធ្វើឱ្យជនមានពិការភាពអាចចូលរួមកាន់តែច្រើន ពេញលេញ ស្មើសិទ្ធិ នៅក្នុងទីផ្សារការងារនៅក្នុងវិស័យឯកជន និង សាធារណៈ ។

[ផ្ដើមសេចក្ដីអធិប្បាយ៤]

(៤) ឯកភាពសំ​ណើរបង្កើត «មូលនិធិកីឡាជនពិការតេជោសែន»

អំពីសំណើរបស់ឯកឧត្តម យី វាសនា ចំណុចមួយដើម្បីប្រសិទ្ធភាពនៅក្នុងការអនុវត្តការងារ មជ្ឈ​មណ្ឌល​ជាតិនៃជនពិការតេជោសែន និងគណៈកម្មាធិការប៉ារ៉ាឡាំពិកកម្ពុជា ចាំបាច់ត្រូវមានថវិកាដើម្បីជួយជំរុញការអភិវឌ្ឍវិស័យកីឡា ជនមានពិការភាព ជាពិសេសត្រៀមខ្លួនធ្វើជាម្ចាស់ផ្ទះកីឡា យុវជនអាស៊ីប៉ារ៉ាហ្គេមលើកទី៦ ឆ្នាំ២០២៩។ ពាក់ព័ន្ធកិច្ចការនេះ ខ្ញុំសូមឱ្យក្រសួងអប់រំយុវជននិងកីឡា ស្ថាប័នពាក់ព័ន្ធ ពិភាក្សាជាមួយក្រសួងសេដ្ឋកិច្ចនិងហិរញ្ញវត្ថុពិនិត្យមើលការជួយ(ដោះស្រាយ)នៅក្នុងចំណុចនេះ។ ជាមួយគ្នានេះ, ខ្ញុំសូមឯកភាពចំពោះសំ​ណើរនិងសូមរៀបចំបង្កើតជា «មូលនិធិកីឡាជនពិការតេជោសែន»។ កិច្ចការនេះ ខ្ញុំបានបានឯកភាព និងសុំបង្កើតតែម្ដង ដើម្បីកៀរគរប្រភពថវិកា។ យើងមានមូលនិធិជនពិការ ហ៊ុន សែន ដែលបង្កើតឆ្នាំ ១៩៩៧ … ខ្ញុំបានឆ្លងសម្ដេចតេជោ។ កាលនោះមិនទាន់មានឈ្មោះសម្ដេចតេជោទេ។ យើងហៅមូលនិធិជនពិការ។ ឥឡូវសុំផ្ទេរមូលនិធិចូលទៅក្នុងកញ្ចប់នេះតែម្ដង។

(៥) ២០០ លានរៀល/ឆ្នាំ រយៈពេល ៤ឆ្នាំ សំរាប់ដំណើរការមជ្ឈមណ្ឌលជាតិជនពិការតេជោសែន និងគណៈកម្មាធិការជាតិប៉ារ៉ាឡាំពិកកម្ពុជា

សម្រាប់មូលនិធិនេះ សូមរៀបចំលក្ខន្តិកៈឱ្យបានត្រឹមត្រូវដើម្បីធានាប្រសិទ្ធភាពក្នុងការគ្រប់គ្រង ក៏ដូចជាការបង្កើតការទុក​ចិត្ត និងការចូលរួមគាំទ្រដល់មូលនិធិ។ សូមរៀបចំនូវលក្ខន្តិកៈដើម្បីបង្កើត។ នៅក្រោយពេលបង្កើតនេះ ខ្ញុំសូមបោះមេចូលរួម ២០០លាន(រៀល)ក្នុងមូលនិធិនេះ និងបន្តនៅក្នុងមួយឆ្នាំ ២០០លាន រយៈពេល ៣ឆ្នាំបន្តទៀត សរុប៤ឆ្នាំដំបូងក្នុងមួយឆ្នាំៗ ២០០លាន។ ក្រោយពីនោះ យើងពិនិត្យនិងជួយបន្តបន្ថែមទៀតតាមជាក់ស្ដែង។ សូមអំពាវនាវឱ្យឯកឧត្តម អ្នកឧកញ៉ា លោក លោកស្រី ដៃគូ សប្បុរសជនទាំងអស់ … បន្តជួយដំណើរការរបស់មជ្ឈមណ្ឌល ក្នុងការផ្ដល់អត្ថប្រយោជន៍ និងគណៈកម្មាធិការប៉ារ៉ាហ្គេមរបស់យើង។ តិច/ច្រើនយើងជួយគ្នា។ ឯកឧត្តម (យី វាសនា, ខ្ញុំ)សន្យាមួយឆ្នាំ ២០០លាន(រៀល) ចូលរួមនៅក្នុងគំរោងនេះ …។

(៦) ទទួលងារជាប្រធានកិត្តិយស និងេកភាពរក្សាទីតាំងមណ្ឌលបច្ចុប្បន្នមិនដោះដូរ

ចំពោះការផ្ដល់កិត្តិយសឱ្យខ្ញុំធ្វើជាប្រធានកិត្តិយសនៃមណ្ឌលជាតិនៃជនពិការតេជោសែន និងគណៈកម្មាធិការប៉ារ៉ាឡាំពិក ខ្ញុំសូមអរគុណនិងទទួលជាប្រធានកិត្តិយសនេះដោយរីករាយ។ សំណើមួយទៀត គឺសុំរក្សាសមិទ្ធផលទីនេះជាទីតាំងប្រវត្តិសាស្ត្រ សម្រាប់ជនពិការទៅអនាគត។ ពាក្យសាមញ្ញថាសូមកុំឱ្យរើកញ្ជើទៀត។ ឃើញអម្បាញ់មិញឯកឧត្តម យី វាសនា បង្ហាញកន្លែងចូលដំបូងឆ្នាំ ២០១៤ គឺវាលស្រែសុទ្ធ។ ឥឡូវយើងសង់បានសមិទ្ធផលច្រើន។ សំ​ខាន់សិលាចារិករាប់តោនដឹកមកនេះ មិនងាយរើទៅណាទេ។ ឯកភាពគឺត្រូវរក្សានៅទីនេះ កុំឱ្យមានការដោះដូរទៅណា។ រដ្ឋាភិបាលមិនមានគោលការណ៍ដោះដូរទៅណាទេ។ ខ្ញុំនិយាយបានក្នុងនាមខ្ញុំនៅជានាយករដ្ឋមន្ត្រីទេ។ បើអ្នកណាផ្សេងមក សិទ្ធសម្រេចនៅលើគេ។ តែដរាបណាខ្ញុំនៅដឹកនាំរដ្ឋាភិបាល អត់មានស៊ីញ៉េផ្លាស់ប្ដូរទេ។ ឥឡូវបានផ្ទេរសិទ្ធមកមជ្ឈមណ្ឌលជាតិនៃជនពិការតេជោសែននិងគណៈកម្មាធិការជាតិ។ កាលមុននៅក្រសួងកិច្ចការនារី ឥឡូវបានផ្ទេរមកហើយ។ សូមថែទាំ … កន្លែងនេះ ពី ១០ឆ្នាំមុនជាវាលស្រែ។ ឥឡូវអត់មានវាលស្រែទេ ដុះផ្ទះកាន់តែខ្ពស់។ កន្លែងនេះជាទីតាំងអំណាយផលមួយសម្រាប់ធ្វើការងារ។

(៧) អាចច្នៃបរិវេណនៅសល់នៃកីឡដ្ឋានមរតក៌តេជោសំរាប់ការហ្វឹកហ្វឺនកីឡា

អាចពិនិត្យមើលទីលានដែលយើងហ្វឹកហ្វឺន ព្រោះឥឡូវបើនឹងរកទីលានណាផ្សេងក្នុងភ្នំពេញក៏វាពិបាករកដីទំនេរធ្វើ ដូចកាលពី ១០ឆ្នាំមុន ដែលអាចមានដីវាលស្រែ​។​ អញ្ចឹង អាចច្នៃ(ទីតាំងហាត់)ដូចជាកីឡាបាញ់ព្រួញនៅក្នុងទីតាំងស្ដាត ថារៀបចំនៅចំកន្លែងណា(មួយ) ព្រោះ​នៅសល់ដីច្រើនសំរាប់រៀបចំទីលានហ្វឹកហ្វឺន(កីឡា)អីផ្សេងៗទៀតនៅ(កីឡដ្ឋាន)មរត៌កតេជោ។ កីឡដ្ឋាននេះជាសម្បត្ដិ​របស់ថ្នាក់ជាតិ។ សូមឲ្យក្រសួងអប់រំយុវជននិងកីឡា គណៈកម្មាការជាតិអូឡាំពិកពិនិត្យមើល​។ មិនមែនតែសំរាប់កីឡាពិការទេ។ កីឡាខ្លះដូចគ្នា ទាំងបងប្អូនប៉ារ៉ាហ្គេម បាញ់ធ្នូក៏មានកីឡា យើងធម្មតា(ក៏ប្រើបាន)សំរាប់ហ្វឹកហ្វឺនរួម។ មិនចាំបាច់ញែកទេ។ បាញ់ធ្នូ ក៏បាញ់តែមួយដូចគ្នា យើងគ្រាន់តែប្ដូរវេនប្ដូរពេលគ្នាហាត់។ អញ្ចឹងទីតាំងកន្លែងនោះគឺយើងអំណោយផលច្រើន។ ពាក់ព័ន្ធនឹងការស្នើសុំបន្ដគោលការណ៍ចំនាយ តាមរយៈទីស្ដីការគណៈរដ្ឋមន្ដ្រីដូចមុនៗនិងប្រាក់ឧបត្ថម្ភជំរើសជាតិ រួមទាំងប្រាក់រង្វាន់ជ័យលាភីតាមក្រសួងអប់រំយុវជននិងកីឡា ជាពិសេសពេលប្រកួតផ្សេងៗ ដែលយើងមិនមានអណាប័ក​ដើមខ្សែ គឺយើងមានកញ្ចប់ពិសេសនោះ សូមបន្ដការងារនេះបន្ដទៅទៀត …។

(៨) ពិនិត្យពិភាក្សាសំណើបន្ថែមប្រភេទនិងចំនួនអត្តពលិក

សូមពិចារណាពីការបន្ថែមប្រភេទកីឡានិងចំនួនអត្ដពលិក … ខ្ញុំបានប្រគល់គោលការណ៍ដល់ឯកឧត្តម ហង់ជួន ណារុន ដើម្បីទៅពិនិត្យ ហើយអាចមានលទ្ធភាពច្រើនក្នុងការពង្រីកតាមលទ្ធភាព។ វាត្រូវតែរីកអញ្ចឹងហើយទៅថ្ងៃអនាគត។ សូម្បីកីឡាអូឡាំពិកក៏មានច្រើន សូម្បីវីដេអូហ្គេមហ្នឹងក៏ចូលជាកីឡាដែរ។ ទៅថ្ងៃក្រោយ យើងគិតថាជាការវិវឌ្ឍទៅមុខ AI/តិចណូឡូជី ត្រូវតែបង្កើត។ យើងពិនិត្យមើលទាំង​កីឡាប៉ារ៉ាហ្គេម ទាំងប្រភេទកីឡាផ្សេងៗទៀត តាមលទ្ធភាពរៀបចំរបស់យើង។ ខ្ញុំបានប្រគល់​ការងារនេះឲ្យឯកឧត្តមបណ្ឌិតសភាចារ្យ(អូនព័ន្ធមុនីរតន៍) និងឯកឧត្តម ហង់ជួន ណារុន ពិភាក្សាគ្នា។ ចំពោះគោលរបបឧបត្ថម្ភបន្ថែមកីឡាមុនចេញ ខ្ញុំបានប្រគល់ជូនឯកឧត្តម ហង់ជួន ណារុន ពិភាក្សាជាមួយឯកឧត្តមអគ្គ​បណ្ឌិតសភាចារ្យ ដើម្បីពិនិត្យ ពិសេសនៅពេលដែលយើងចេញប្រកួតអាស៊ាន តើយើងអាចជួយបំប៉ន​កំរិតណាបន្ថែមទៀត។ មានការងារជាច្រើនទៀតដែលមជ្ឈមណ្ឌលជាតិជនពិការតេជោសែន និងគណៈកម្មាការជាតិប៉ារ៉ាឡាំពិកកម្ពុជាបានធ្វើ នៅក្នុងបុព្វហេតុជាតិមាតុភូមិ ដែលជាថ្មីម្ដងទៀត ខ្ញុំសូមបញ្ជាក់ថារាជរដ្ឋាភិបាលថ្មីនឹងខិតខំបន្ដនៅគោលការណ៍ និងគោលនយោបាយគាំទ្របងប្អូនតទៅទៀត។

(៩) មិនអោយបងប្អូនមានពិការភាពណាម្នាក់ មិនបានទទួលការយកចិត្តទុកដាក់ពីរាជរដ្ឋាភិបាលឡើយ

ទីតាំងនេះជាទីតាំងប្រវត្ដិសាស្ដ្រ។ ឯកភាពមិនរើកញ្ជើទៅណាទេ​ នៅបន្ដ។ អម្បាញ់មិញឃើញរៀបចំកន្លែងប្រកួតអុក។ ឃើញមានកៅអីស្ដេចទៀតនៅហ្នឹង។ អញ្ចឹងនៅបន្ដប្រកួតនៅកន្លែងហ្នឹង។ ហ្វឹកហ្វឺនរៀបចំបន្ដទៀតជាជំហានៗ ដែលយើងអាចធ្វើទៅបាន។ អត្ថប្រយោជន៍សំរាប់បងប្អូនកីឡាករប៉ារ៉ាហ្គេម ក៏ដូចជាប្រជាពលរដ្ឋដែលមានពិការភាព ជាគោល​នយោបាយរបស់រាជរដ្ឋាភិបាល ដែលបានដាក់ចេញនៅទូទាំងប្រទេសធ្វើយ៉ាងណាផ្ដល់អត្ថប្រយោជន៍ និងតាមលទ្ធភាពដែលយើងធ្វើទៅបាន។ ទោះជាយ៉ាងណា យើងមិនអោយបងប្អូនណាម្នាក់ដែលមានពិការភាព ដោយមិនបានយកចិត្តទុកដាក់នោះទេ។ ក៏ដូចជាប្រជាពលរដ្ឋរបស់យើងនៅទូទាំងប្រទេស ដែលខ្ញុំថ្ងៃមុន​ខ្ញុំទៅសម្ពោធ យើងមិនទុកទីតាំងកន្លែងណាមួយ ឬប្រជាជនណាម្នាក់ដែលមិនទទួលបានការយកចិត្តទុកដាក់របស់រាជរដ្ឋាភិបាលនោះទេ។ នេះជាគោលដៅ(ការងារ)ដែលយើងខំពង្រីកថែមទៀតតាមលទ្ធភាព និងគោល​នយោបាយ …។​

(១០) ប្រជាពលរដ្ឋមានពិការភាព ក៏ជាធន​ធានមនុស្សសំខាន់សំរាប់រាជរដ្ឋាភិបាល/ជាតិ

ប៉ុន្មានថ្ងៃនេះ បានទៅចូលរួមសន្និបាតគ្រប់វិស័យ មានក្រសួងសុខាភិបាល ម្សិលមិញក្រសួងអភិវឌ្ឍនជនបទ គឺសុទ្ធតែផ្ដោតទៅលើការជំរុញការអភិវឌ្ឍនិងការតភ្ជាប់គ្រប់កន្លែងនៅក្នុងប្រទេសរបស់យើង មិនឲ្យកន្លែងណាមួយដែលយើងមិនបានថ្ពក់ទៅរួមក្នុងការអភិវឌ្ឍ ហើយមិនអោយប្រជាជនណាម្នាក់នៅក្នុងតំបន់​ណាក៏ដោយ ដែលមិនអាចត្រូវបានទុកចោលនោះទេ។ តិចច្រើនជួយគ្នា។ អញ្ចឹងប្រជាពលរដ្ឋដែលមានពិការភាពក៏ជាធន​ធានមនុស្សដែលសំខាន់សំរាប់រាជរដ្ឋាភិបាលសំរាប់ជាតិរបស់យើង ដែលយើងនឹងបន្ដចេញគោលនយោបាយជា​ថ្មី ដើម្បីបន្ដជួយបន្ថែមៗទៀត។ សូមអរគុណណាស់ចំពោះការរៀបចំនៅថ្ងៃនេះ។

[បញ្ចប់សេចក្ដីអធិប្បាយ៤]

មុននឹងបញ្ចប់ ជាថ្មីម្តងទៀត, ខ្ញុំសូមថ្លែងអំណរគុណចំពោះមជ្ឈមណ្ឌលជាតិនៃជនពិការតេជោសែន, គណៈកម្មាធិការជាតិប៉ារ៉ាឡាំពិកកម្ពុជា, ក្រសួង-ស្ថាប័នពាក់ព័ន្ធ, អង្គការសង្គម ស៊ីវិលជាតិ-អន្តរជាតិ, និង​ អ្នកពាក់ព័ន្ធ ចំពោះការចូលរួម​ជួយជ្រោមជ្រែង​ដល់បងប្អូនជនមានពិការភាពរបស់យើង នាពេលកន្លងទៅ រហូតទទួលបានសមិទ្ធផលធំៗជាច្រើន ។

ជាទីបញ្ចប់, ជាមួយនឹងការអបអរសាទរនូវសមិទ្ធផលថ្មីនៃមជ្ឈមណ្ឌលជាតិជនពិការតេជោសែន និង គណៈកម្មាធិការជាតិប៉ារ៉ាឡាំពិកកម្ពុជា, ខ្ញុំសូមជូនពរ ឯកឧត្តម លោកជំទាវ, លោក លោកស្រី និង បងប្អូនមានពិការភាពទាំងអស់ សូមមានសុខភាពល្អបរិបូណ៌ និង ទទួល​បាន​ជោគជ័យក្នុងគ្រប់ភារកិច្ចរៀងៗខ្លួន, និង សូមប្រកបដោយពុទ្ធពរ និង ពរទាំង ៥ ប្រការ គឺ អាយុ វណ្ណៈ សុខៈ ពលៈ និង បដិភាណ កុំបី​ឃ្លៀងឃ្លាត។

[ផ្ដើមសេចក្ដីអធិប្បាយ៥]

សម្រាប់អត្តពលិកជនពិការ គ្រូបង្វឹក អ្នកថែទាំជនពិការ និស្សិត កម្មករ/ការនីពិការ សរុប៤៨០នាក់ ក្នុងម្នាក់ៗថវិកា ២០ម៉ឺនរៀល, ជូនមណ្ឌលជាតិនៃជនពិការតេជោសែន ថវិកា ១០លានរៀល, ជូនសាលាខណ្ឌសែនសុខ ថវិកា ២លានរៀល, ជូនក្រុមគ្រូពេទ្យប្រចាំពិធីថវិកា៣លានរៀលផងដែរ។ សូមអរគុណ៕

[បញ្ចប់សេចក្តីអធិប្បាយ៥]

---

Selected Comments Samdech Moha Bovor Thipadei Hun Manet,

at the inauguration of the achievements of the Techo Sen National Center for the Disabled Persons (TSNCDP) and the National Paralympic Committee of Cambodia (NOCC)

[Unofficial and translations]

CMF: 21/03/2024

[1]

(1) Paralympians win not just the trophies but raise the image and flag of Cambodia

All these achievements are not only (from competitions) within country […] we have won them from the international competitions and risen our national flag on the ASEAN and Asia level competition and we will be able to reach the world level one day. I am confident that the efforts of our players and the further support of the Royal Government, as well as the participation of our people across the country, will increase the ability of the athletes to compete for world-class medals. Obviously, so far, we have won more than 261 medals […] and the Royal Government will continue to pay attention on this work, not only for you, but for our nation. The paralympic athletes are training hard not only to win trophies for themselves, but to raise the image and flag of Cambodia on the international stage […]

[2]

(2) May those with disability continue the spirit of “physically maimed but mentally fit”

I have seen our brothers and sisters with disabilities become teachers. They may have been born blind, but they worked hard to become teachers […] I have also given many scholarships for the people with disabilities. They have worked hard to the end. I have met some of them here. Some others, besides studying, work in the sports. We strive to continue the spirit of though we may be “physically maimed, but we are mentally fit” […] although physical fitness by definition is not the same, we have the heart to achieve great success and the Royal Government will continue to provide this policy opportunity […]

[3]

(3) Upgrade the sports laws from 27 years ago, especially in the Paralympic framework

HE Yi Veasna has asked for the Ministry of Social Affairs, Veterans and Youth Rehabilitation, the Office of the Council of Ministers and the relevant ministries to modernize (the sports law) […] We are drafting and consulting a sports law to include some works and update in this law. The law is from 27 years ago, especially in the framework of the Paralympics, since when it was not there yet. Now, the paralympic is functioning actively […] amendments must be made and supplements are necessary for this proposed legal standard […]

[4]

(4) Approved the proposal to establish “Techo Sen Sports Fund for the Disabled”

In order to effectively implement the work of the National Center for the Disabled Persons (TSNCDPO) and the Cambodian Paralympic Committee, we need to have funds to support the development of sports for people with disabilities, especially to be ready to host the 6th Asian Para Games 2029 […] I would urge the Ministry of Education, Youth and Sports, and relevant institutions, discuss with the Ministry of Economy and Finance to figure out a way to assist this point […] I agree with the proposal and would like to set up a “Techo Sen Sports Fund for the Disabled” […] I am to contribute 200 million (Riel) in this fund and continue with this 200 million amount per year for three consecutive years […], and after that, we will see how do we go about continuing it. I call on His Excellency, Neak Oknha, Ladies and Gentlemen, partners, all philanthropists […] to continue to assist the Center’s operations of the Para Games Committee […]

(5) Accepting the position of Honorary Chairman and agreeing to keep the current location unchanged

[…] For the offering of the position of Honorary President of the Techo Sen National Center for the Disabled and the Paralympic Committee, I am so grateful and accepting it. Reagrding one other proposal to keep this achievement as a historical site for the disabled in the future […], where at the beginning of 2014, it was just rice fields, and now we have built a lot of achievements […] I totally agree to keep everything here and there is no exchange of location. The government has no intention to exchange it for anything where else […]

In Phnom Penh, it is no longer easy to find vacant land, as it was 10 years ago, (to build a training ground). We my be able to set up parashooting in the Techo Morodok Stadium because there has some space available there. The stadium is a national treasure. I suggest that the Ministry of Education, Youth and Sports, the National Olympic Committee check on thar not just for the disabled sports – for the Paralympic archery and for regular sports to joint training […], and about the request to continue implementing the principle of approving expenditure through the Office of the Council of Ministers, and the prize money through the Ministry of Education, Youth and Sports, especially during the games, when the committee does not have principle budget officers, let us continue this method […]

(6) Discuss additional proposals for type of sports and number of athletes

Let us consider adding more types of sports and the number of athletes […] I have entrusted the principle to the Deputy Prime Minister and Ministe of Education, Youth and Sports, HE Hang Chuon Naron, to examine the possibility of expandingf as many as we can. It has to grow in the future. In the olympics competitiuon, even video games are becoming sports. In the time to come, AI / Technology will have their places too […] let us look at both Paralympic Games and other types of sports […] I entrust the jobs with the Deputy Prime Minister and Minister of Economy and Fiance, (HE Dr. Aun Porn Moniroth), and HE Hang Chuon Naron […] as there are more works that the Techo Sen NCDP, and the National Paralympic Committee of Cambodia have fulfilled in the cause of the motherland, and I would like to reiterate that the new Royal Government will continue to work on policies to provide further supports in this field […]

(7) No one person with disability were to leave unattended by the Royal Government

Benefits reserved for the Paralympic players as well as people with disabilities is the policy of that the Royal Government has laid out across the country to provide as many benefits and possibilities as we can. We will not leave any disabled person unattended. The same is true for the whole Cambodian people across the country when I stated at the inauguration (of the Techo Sen Koh Thom hospital) the other day that we do not leave any places or any persons without the attention of the Royal Government. We are trying to expand this policy objective further according to the possibilities […]

(8) People with disabilities are important human resources for the Royal Government/Nation

[…] Attended the annual reviews conferences in all sectors, such as the Ministry of Health, and yesterday, the Ministry of Rural Development, we have focused on promoting development and connectivity everywhere in the country, so that there is not a single place has not been connected in development. We do not let any people in any area be left behind. More or less, we help each other. People with disabilities are also important human resources for the Royal Government and for our nation. We will continue to issue new policies to help them more […]./.

សម្តេចធិបតី ហ៊ុន ម៉ាណែត៖ រាជរដ្ឋាភិបាល បានចាត់ទុកជនមានពិការភាព គឺជាមូលធនមនុស្សដ៏មានសក្តានុពល

ក្នុងពិធីសម្ពោធសមិទ្ធផល មជ្ឈមណ្ឌលជាតិ នៃជនពិការតេជោសែន និងគណៈកម្មាធិការជាតិប៉ារ៉ាឡាំពិកកម្ពុជា នៅព្រឹកថ្ងៃទី២១ ខែមីនា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាល បានដាក់ចេញនូវយុទ្ធសាស្រ្តបញ្ចកោណ-ដំណាក់កាលទី១ ដោយផ្តោតលើការអភិវឌ្ឍមូលធនមនុស្ស ដែលក្នុងនោះក៏បានចាត់ទុកជនមានពិការភាព គឺជាមូលធនមនុស្សដ៏មានសក្តានុពលផងដែរ។

សម្តេចធិបតី ហ៊ុន ម៉ាណែត ក៏បានផ្តាំផ្ញើទៅបងប្អូនជនមានពិការភាពទាំងអស់ថា បងប្អូនមិនឯកោនោះទេ ពោលគឺរាជរដ្ឋាភិបាល មិនទុកចោលជនមានពិការភាពណាម្នាក់ ដែលមិនបានដោះស្រាយនោះឡើយ។

សម្តេចធិបតី ហ៊ុន ម៉ាណែត ក៏បានអំពាវនាវដល់គ្រប់តួអង្គពាក់ព័ន្ធទាំងអស់ សប្បុរសជននានា រួមទាំងដៃគូអភិវឌ្ឍ ចូលរួមជួយដល់ជនមានពិការភាពនៅកម្ពុជា៕