ខ្មែរតែមួយ - Khmer Unity: 06/09/16

Thursday, June 09, 2016

ឯកឧត្តម លីវ ជិនមីន (Liu henmin) បេសកជនពិសេស និងជាអនុរដ្ឋមន្រ្តីការបរទេសចិន បានដឹកនាំគណៈប្រតិភូមកបំពេញទស្សនៈកិច្ចនៅកម្ពុជា

កាលពីថ្ងៃទី០៤ ដល់ថ្ងៃទី០៦ ខែមិថុនា ២០១៦ ឯកឧត្តម លីវ ជិនមីន បានដឹកនាំគណៈប្រតិភូមកបំពេញទស្សនៈកិច្ចនៅកម្ពុជាហើយបានជួបពិភាក្សាជាមួយឯកឧត្តមឧបនាយករដ្ឋមន្រ្តី ហោ ណាំហុង កាលពីថ្ងៃទី០៦ ខែមិថុនា ឆ្នាំ២០១៦ នៅវិមានសន្តិភាព។ នេះបើយោងតាមខ្លឹមសារដែលបានបង្ហោះផ្សាយក្នុងទំព័រហ្វេសប៊ុក ឯកឧត្តមឧបនាយករដ្ឋមន្ត្រី ហោ ណាំហុង។

ឯកឧត្តមឧបនាយករដ្ឋមន្ត្រីបានបន្តថា ក្នុងការជួបពិភាក្សា ឯកឧត្តម លីវ ជិនមីន បានជំរាបថា រដ្ឋាភិបាលចិនបានសម្រេចផ្តល់ជំនួយឥតសំណងចំនួន ៣ពាន់៦០០លានយ័ន ដល់កម្ពុជាសំរាប់រយៈពេល៣ឆ្នាំ(២០១៦-២០១៨)។ ឯកឧត្តមឧបនាយករដ្ឋមន្រ្តី ហោ ណាំហុង ក៏បានថ្លែងអំណរគុណដល់រដ្ឋាភិបាលចិនដែលបានផ្តល់ជំនួយនេះ និងកម្ចីអត់ការប្រាក់ ឬការប្រាក់ទាបជាច្រើនកន្លងមក ដែលរួមចំណែកក្នុងការអភិវឌ្ឍន៍កម្ពុជាលើគ្រប់វិស័យ ជាពិសេសក្នុងវិស័យហេដ្ឋារចនាសម្ព័ន្ធ ផ្លូវ និងស្ពាន។

ឯកឧត្តមឧបនាយករដ្ឋមន្រ្តី ហោ ណាំហុង ក៏បានថ្លែងប្រាប់ទៅមិត្តចិនថា ប្រទេសចិនជាអ្នកវិនិយោគទី១នៅកម្ពុជា ក្នុងរយៈពេល ៤ឆ្នាំចុងក្រោយនេះចាប់តាំងពីឆ្នាំ២០១១ មក ចិនបានបណ្តាក់ទុនចំនួន ៤,៣ ពាន់លានដុល្លារលើផ្នែកកសិកម្ម ថាមពល ឧស្សាហកម្ម និងទេសចរណ៍ ។ ខាងផ្នែកវារីអគ្គីសនី ចិនបានវិនិយោគជាង ២.៣ ពាន់លានដុល្លាអាមេរិក ។ ឯកឧត្តមឧបនាយករដ្ឋមន្រ្តី ហោ ណាំហុង បានបន្តថា ពាណិជ្ជកម្មរវាងកម្ពុជា និងចិនមានចំនួន៤ពាន់១៨៥លានដុល្លារហើយនៅឆ្នាំ២០១៥។ ទិសដៅគឺសំរេចអោយបាន ៥ពាន់លានដុល្លារ នៅឆ្នាំ២០១៧។

ឆ្លៀតក្នុងឱកាសនោះ ឯកឧត្តម លីវ ជិនមីន បានជំរាបជូន ឯកឧត្តមឧបនាយករដ្ឋមន្រ្តី ហោ ណាំហុង ថា ក្នុងឱកាសដែលឯកឧត្តមឧបនាយករដ្ឋមន្រ្តីអញ្ជើញចូលរួមពិធីបើកការតាំងពិព័រណ៌នៅគុនមិញ នាថ្ងៃទី ១២-១៦ខែមិថុនា ឆ្នាំ២០១៦ ខាងមុខនេះ ចិននឹងរៀបចំការជួបពិភាក្សាជាមួយឯកឧត្តម ឧបនាយករដ្ឋមន្រ្តីចិន Wang Yang ដើម្បីបានផ្លាស់ប្តូរទស្សនៈអំពីសហប្រតិបត្តិការកម្ពុជា-ចិនដែលសព្វថ្ងៃកម្ពុជា និងចិនជាដៃគូយុទ្ធសាស្ត្រគ្រប់ជ្រុងជ្រោយ។

ពាក់ព័ន្ធនឹងកម្មាធិការអន្តររដ្ឋាភិបាលសម្របសម្រួល កម្ពុជា- ចិន ឯកឧត្តម លីវ ជិនមីនបានស្នើឲ្យឯកឧត្តមឧបនាយករដ្ឋមន្រ្តី ហោ ណាំហុង រៀបចំ “ ផែនការជាក់ស្តែង” សំរាប់កិច្ចប្រជុំនៃ “ គណៈកម្មាធិការអន្តររដ្ឋាភិបាលសម្របសម្រួល កម្ពុជា- ចិន” ដើម្បីជំរុញកិច្ចសហប្រតិបត្តិការរវាងកម្ពុជា និងចិនអោយកាន់តែស៊ីជម្រៅថែមទៀត៕

លោកជំទាវ ម៉ែន សំអន បានអនុញ្ញាតឲ្យ គណៈប្រតិភូក្រុងសៀងហៃ ចូលសម្តែងការគួសម និងពិភាក្សាការងារ

កាលពីថ្ងៃទី ០៨ ខែមិថុនា ឆ្នាំ២០១៦ លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រី ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចបានអនុញ្ញាតឲ្យគណៈប្រតិភូក្រុងសៀងហៃ ដែលដឹកនាំដោយ ឯកឧត្តម សា ហាយលីន សមាជិកអចិន្ត្រៃយ៍ ប្រធានរណសិរ្សការងារ នៃបក្សកុម្មុយនីស្តចិន និងជាប្រធានសមាគមមិត្តភាពចិនឯនាយសមុទ្រ នៃក្រុងសៀងហៃ បានចូលសម្តែងការគួសម និងពិភាក្សាការងារ នៅទីស្តីការក្រសួង។

លោកជំទាវ ម៉ែន សំអន បានលើកឡើងថា ប្រទេសកម្ពុជាកំពុងតែពង្រឹងទំនាក់ទំនងសហប្រតិបត្តិការល្អនៅលើសកលលោក ក្នុងនោះក៏មានប្រទេសចិនផងដែរ។

លោកជំទាវ ម៉ែន សំអន ក៏បានបន្តទៀតថា សេដ្ឋកិច្ចប្រទេសកម្ពុជាមានការរីកចម្រើនជាលំដាប់នៅរយៈពេលប៉ុន្មានឆ្នាំចុងក្រោយនេះ ដោយរក្សាបាននូវកំណើនសេដ្ឋកិច្ចក្នុងចន្លោះ ៧% ក្នុងមួយឆ្នាំ និងអតិផរណាទាបជាង ៥% ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម សា ហាយលីន ក៏បានទទួលស្គាល់អំពីកំណើនសេដ្ឋកិច្ចរបស់កម្ពុជា ហើយឯកឧត្តមក៏បានបញ្ជាក់ថា ដំណើរទស្សនៈកិច្ចនាពេលនេះគឺចង់រឹតចំណងកិច្ច សហប្រតិបត្តិការរវាងប្រទេសទាំងពីរ និងពិនិត្យមើលអំពីឱកាសក្នុងការវិនិយោគនៅក្នុងប្រទេសកម្ពុជា។

ឯកឧត្តម សា ហាយលីន បានអញ្ជើញលោកជំទាវ និងគណៈប្រតូទៅធ្វើទស្សនៈកិច្ចនៅ ទីក្រុងសៀងហៃក្នុងពេលវេលាណាមួយ។ជាការឆ្លើយតបចំពោះដំណើរទស្សនៈ កិច្ចនៅទីក្រុងសៀងហៃលោកជំទាវនឹងពិនិត្យរកពេលវេលាសមស្រប ណាមួយ៕

បទអន្តរាគមន៍របស់ លោក អង្គ វង្ស វឌ្ឍានា នៅក្នុងកិច្ចប្រជុំសភាពេញអង្គ នៅថ្ងៃទី០៩ ខែមិថុនានេះ

លោកស្រី Catherine Novelli អនុរដ្ឋមន្ត្រីក្រសួងការបរទេសអាមេរិកមកទស្សនកិច្ចកម្ពុជា

មន្រ្តីជាន់ខ្ពស់ក្រសួងការបរទេសអាមេរិក គ្រោងនឹងបំពេញទស្សនកិច្ចកម្ពុជារយៈពេល ២ថ្ងៃ ដើម្បីបញ្ជាក់ការគាំទ្រអាមេរិក លើការទ្រទ្រង់កត្តាបរិស្ថានថែរក្សាព្រៃឈើ និងសត្វព្រៃ ។

យោងតាមស្ថានទូតអាមេរិកដំណើររបស់ លោកស្រីអនុរដ្ឋលេខាធិការក្រសួងការបរទេស Catherine Novelli នឹងផ្តោតលើការអនុវត្តច្បាប់ព្រៃឈើ និងសកម្មភាពដែលមានបំណងកាត់បន្ថយការបរបាញ់សត្វដោយខុសច្បាប់… ការជួញដូរសត្វព្រៃ និងការកាប់ឈើ ខុសច្បាប់ដើម្បីបញ្ជាក់ពីការគាំទ្រ របស់សហរដ្ឋអាមេរិក ក្នុងការការពារទីជំរកសត្វព្រៃ ដែលប្រឈមនឹងការហិនហោចព្រៃឈើ ។

ដំណើរទស្សនកិច្ចនេះ នឹងចាប់ពីថ្ងៃទី៩ដល់ថ្ងៃទី១០ ខែមិថុនានេះ ។ លោកស្រី Catherine Novelli គឺជាអនុរដ្ឋលេខាធិការ ទទួលបន្ទុកផ្នែកកំណើនសេដ្ឋកិច្ចថាមពល និងបរិស្ថាន ដែលជាមន្រ្តីជាន់ខ្ពស់បំផុតផ្នែកសេដ្ឋកិច្ច នៅក្នុងក្រសួងការបរទេសអាមេរិក ។ នៅថ្ងៃទី៩ ខែមិថុនានេះ លោកស្រីអនុរដ្ឋលេខាធិការនឹងទៅមើលតំបន់ជំរកសត្វព្រៃនៅព្រៃឡង់ ហើយជួបជាមួយនឹងក្រុមអនុរក្សព្រៃឈើក្នុងមូលដ្ឋាន ។

លោកស្រី Catherine Novelli គ្រោងនឹងជួបផងដែរជាមួយប្រធានក្រុមប្រឹក្សាអភិវឌ្ឍន៍កម្ពុជា ឯកឧត្តមសុខ ចិន្តាសុភា និងរដ្ឋមន្រ្តីស្តីទីក្រសួងពាណិជ្ជកម្ម ឯកឧត្តម កឹម ស៊ីថន ដើម្បីពិភាក្សាពីបញ្ហានានា ផ្នែកវិនិយោគនិងពាណិជ្ជកម្ម ។ លោកស្រីអនុរដ្ឋលេខាធិការ ក្រសួងការបរទេសអាមេរិក នឹងចូលរួមផងដែរក្នុងពិធីភោជនាហារពេលល្ងាច ជាមួយសហគ្រិនជាស្រ្តី ។

និងនៅថ្ងៃទី ១០ ខែមិថុនា លោកស្រីអនុរដ្ឋលេខាធិការ Novelli នឹងចូលរួមក្នុងក្រុមពិភាក្សា ដើម្បីគូសបញ្ជាក់ពីនយោបាយស្ថាប័ន និងភាពជាដៃគូចាំបាច់សំរាប់កសាងសេដ្ឋកិច្ច ដែលមានវិស័យចំរុះច្រើន និងមានភាពជឿនលឿននៅកម្ពុជា ។ បន្ទាប់មក លោកស្រីនឹងធ្វើដំណើរទៅខេត្តសៀមរាប ដើម្បីមើលការជួសជុលប្រាសាទភ្នំបាក់ខែង និងប្រាសាទដទៃទៀត ក្រោមជំនួយថវិការបស់សហរដ្ឋអាមេរិក នៅក្នុងសួនឧទ្យានអង្គរ ៕

Pages

Thursday, June 09, 2016

លោកជំទាវ ម៉ែន សំអន បានអនុញ្ញាតឲ្យ គណៈប្រតិភូក្រុងសៀងហៃ ចូលសម្តែងការគួសម និងពិភាក្សាការងារ

បទអន្តរាគមន៍របស់ លោក អង្គ វង្ស វឌ្ឍានា នៅក្នុងកិច្ចប្រជុំ​សភាពេញអង្គ នៅថ្ងៃទី០៩ ខែមិថុនានេះ

លោកស្រី Catherine Novelli អនុរដ្ឋមន្ត្រីក្រសួងការបរទេសអាមេរិក​មក​ទស្សនកិច្ចកម្ពុជា

បទអន្តរាគមន៍របស់ លោក អង្គ វង្ស វឌ្ឍានា នៅក្នុងកិច្ចប្រជុំសភាពេញអង្គ នៅថ្ងៃទី០៩ ខែមិថុនានេះ

លោកស្រី Catherine Novelli អនុរដ្ឋមន្ត្រីក្រសួងការបរទេសអាមេរិកមកទស្សនកិច្ចកម្ពុជា