លោក គង់ គាំ អតីតប្រធានគណបក្សសមរង្ស៉ី និងជាអតីតមនុស្សជំនិតរបស់ លោក សម រង្ស៉ី បានប្រតិកម្មតបទៅនឹង លោក សម រង្ស៉ី និងបក្ខពួកដែលវាយប្រហាររូបលោក ចំពោះការទទួលយកសិទ្ធិធ្វើនយោបាយឡើងវិញ។ ជាមួយគ្នានេះ លោក គង់ គាំ បានថ្លែងថា ការមិនទទួលយកសិទ្ធិធ្វើនយោបាយនៅពេលនេះ គឺប្រៀបបីដូចជាសម្លាប់ជីវិតនយោបាយខ្លួនឯង។
ថ្លែងក្នុងកិច្ចសម្ភាសជាមួយ Fresh News នៅថ្ងៃទី១៤ ខែមករា ឆ្នាំ២០១៩ លោក គង់ គាំ បានចាត់ទុកថា បុគ្គលមួយចំនួន នៅក្នុងចំណោមអតីតថ្នាក់ដឹកនាំ ១១៨នាក់ នៃអតីតគណបក្សសង្រ្គោះជាតិ ដែលមិនទទួលយកសិទ្ធិធ្វើនយោបាយនោះ គឺជាក្រុមដែលកំពុងងប់ងុលនឹង លោក សម រង្ស៉ី ដែលលោកចាត់ទុកថា ការសម្រេចចិត្តបែបនោះ គឺជាជម្រើសខុសឆ្គង។
លោក គង់ គាំ បានបញ្ជាក់យ៉ាងដូច្នេះថា៖ «ខ្ញុំចង់រំលឹកថា បើយើងរងគ្រោះទទួលអយុត្តិធម៌ ហើយចង់បានយុត្តិធម៌ត្រូវតែសុំនីតិសម្បទាឡើងវិញ អាហ្នឹងគឺជាយុត្តិធម៌ហើយ បើយើងចង់បម្រើប្រជាធិតេយ្យសេរីពហុបក្ស ហើយបើយើងចង់បម្រើឆន្ទៈប្រជាពលរដ្ឋ ដែលចង់ឱ្យមានការផ្លាស់ប្តូរ គឺថា លោក សម រង្ស៉ី គាត់រកយុត្តិធម៌នៅពេលណាបាន គាត់នឹងមានសិទ្ធិឡើងវិញ លោក កឹម សុខា នៅក្នុងនីតិវិធីតុលាការ បញ្ចប់ពេលណាគាត់នឹងវិលមកវិញ ឯយើងទាំងអស់គ្នា បានមកដល់ច្បាប់វិសោធនកម្មគណបក្សនយោបាយ បើកច្រកឱ្យយើងទទួលបាននីតិសម្បទាឡើងវិញហើយ ការមិនទទួលស្មើនឹងសម្លាប់ជីវិតនយោបាយរបស់ខ្លួនប៉ុណ្ណឹង»។
លោក គង់ គាំ បានប្រកាសជំហរទទួលយកសិទ្ធិធ្វើនយោបាយឡើងវិញ កាលពីចុងឆ្នាំ២០១៨ គ្រាដែលច្បាប់ស្តីពីវិសោធនកម្ម ច្បាប់ស្តីពីគណបក្សនយោបាយ មាត្រា៤៥ថ្មី (ស្ទួន១) ត្រូវបានរៀបចំដោយរដ្ឋសភា និងមុនច្បាប់នេះចូលជាធរមានម្ល៉េះ។ លោកបានដាក់ពាក្យស្នើសុំទៅក្រសួងមហាផ្ទៃ កាលពីថ្ងៃទី០៩ ខែមករា ឆ្នាំ២០១៩ ដើម្បីសុំសិទ្ធិធ្វើនយោបាយនេះ បន្ទាប់ពីត្រូវតុលាការកំពូលហាមឃាត់សិទ្ធិធ្វើនយោបាយ ក្នុងរយៈពេល៥ឆ្នាំ ជាមួយអតីតថ្នាក់ដឹកនាំ នៃគណបក្សសង្រ្គោះជាតិ១១៧នាក់ផ្សេងទៀត។
សម្រាប់ លោក គង់ គាំ, ដើម្បីជោគជ័យក្នុងនយោបាយតាមបែបប្រជាធិបតេយ្យសេរីភាពពហុបក្សនោះ ថ្នាក់ដឹកនាំអតីតគណបក្សសង្រ្គោះជាតិ មិនអាចរង់ចាំ លោក សម រង្ស៉ី ចូលប្រទេស ឬលោក កឹម សុខា មានសេរីភាព ឬគណបក្សសង្រ្គោះជាតិ រស់ឡើងវិញនោះឡើយ ជាពិសេសរឹតតែមិនអាចដើរតាមអ្វីដែល ដាក់ចេញដោយ លោក សម រង្ស៉ី ទាំង៥ចំណុចនោះថែមទៀត។
លោកបានបញ្ជាក់ថា «ខ្ញុំនិយាយហើយនិយាយទៀត កុំសង្ឃឹមកុំស្រមើស្រមៃថា គណបក្សសង្រ្គោះជាតិមានអត្តសញ្ញាណឡើងវិញ ខ្ញុំគិតថា សម រង្ស៉ី ដែលជាប្រធានស្តីទីតាមផ្ទៃក្នុងរបស់គាត់ហៅថាបក្សប្រហារហ្នឹង ធ្វើជាប្រធានស្តីទី(អតីត)គណបក្សសង្រ្គោះជាតិ ក្រៅបញ្ជីក្រៅច្បាប់ហ្នឹង លក្ខខណ្ឌរបស់គាត់ថា ទម្លាក់ចោលការចោទប្រកាន់ ដោះលែងលោក កឹម សុខា សងអំណាចជាប់ឆ្នោតមកវិញ បោះឆ្នោតឡើងវិញអន្តរជាតិសង្កេតការណ៍ ខ្ញុំគិតថា អត់មានចំណុចណាមួយដែល វិជ្ជមានហើយអាចកើតមានទាល់តែសោះ»។
លោក គង់ គាំ បានសម្លឹងឃើញអំពីឱកាសក្នុងការទាញយកប្រយោជន៍នយោបាយ ពីការទទួលបានសិទ្ធិធ្វើនយោបាយនាពេលនេះ ដោយលោកគិតថាលោកនឹងអាចរៀបចំគោលនយោបាយ និងត្រៀមខ្លួនបាន ទាន់ពេលវេលា សម្រាប់ប្រកួតប្រជែងក្នុងការបោះឆ្នោត នៅឆ្នាំ២០២២ និង២០២៣ ខាងមុខនេះ។ ការរង់ចាំរហូតដល់ អនុវត្តសាលដីការួចជាស្ថាព័រនោះ មិនផ្តល់ផលល្អសម្រាប់ការបោះឆ្នោតខាងមុខនេះឡើយ ខណៈដែលអតីតថ្នាក់ដឹកនាំ គណបក្សសង្រ្គោះជាតិ កាន់តែមានវ័យចំណាស់ទៅហើយ។
លោកបញ្ជាក់ថា៖ «ខ្ញុំគិតថា ទទួលនីតិសម្បទាធ្វើនយោបាយឡើងវិញ ពេលនេះវាមិនយឺតទេ យើងខាតបង់ពីថ្ងៃទី២៩ ខែកក្កដា ឆ្នាំ២០១៨ ក៏ពិតមែននេះតែដើមឆ្នាំ២០១៩ យើងមានឱកាស ដូច្នេះ២០១៩, ២០២០, ២០២២, ២០២៣ ច្បាស់ជាយើងរួមចំណែកធ្វើឱ្យបរិយាកាសលំហរប្រជាធិបតេយ្យ សេរីភាព សម្តែងមតិ បានត្រឡប់មកវិញ ជាហូរហែតាមបំណងរបស់យើង ដូច្នេះមិនគួរមិនទទួលយកឱកាសនេះនោះទេ»៕
