លោក សុខ ឥសាន៖ បើចោទថា សម្តេចតេជោកំពុងភ័យស្លន់ស្លោរ ហេតុអ្វី សម រង្ស៊ីមិនចូលស្រុកមក?

លោក សុខ ឥសាន អ្នកនាំពាក្យគណបក្សប្រជាជនកម្ពុជាកំពុងកាន់អំណាច នៅថ្ងៃទី១៧ ខែមករា ឆ្នាំ២០១៩នេះ បានធ្វើការឆ្លើយតបទៅនឹងទង្វើខុសឆ្គងរបស់លោក រ៉ុង ឈុន និងភាពក្រអើតក្រទម ចោទប្រកាន់ មួលបង្កាច់ បំពុលព័ត៌មានដោយទណ្ឌិតរត់ចោលគុក សម រង្ស៊ី ថា ជាជនកំសាកមិនហ៊ានចូលស្រុកខ្លាចជាប់គុក។

លោក សុខ ឥសាន បានលើកឡើងថា ៖

ទី១- រឿងក្រុមលោក​ រ៉ុង​ ឈុន​ ដែលប្តឹងទៅតុលាការ គឺជាសិទ្ធិរបស់អស់លោកដែលកើតទុក្ខមិនសុខចិត្ត​ ។ ប៉ុន្តែបញ្ហានេះ លោកថា ការលុបឈ្មោះលោក រ៉ុងឈុន ចេញ​ពីក្របខ័ណ្ឌក្រសួងគឺពាក់ព័ន្ធនឹងការគ្រប់គ្រងរដ្ឋបាលរបស់ក្រសួងអប់រំ​យុវជននិងកីឡា​ ។ លោក សុខ ឥសានថា រឿងនេះ ចាំមើលតើតុលាការសម្រេចយ៉ាងណា​បន្តទៀត ?
​
ទី២- អ្នកនាំពាក្យបក្សកាន់អំណាចបានបន្តថា អ្នកខ្លះនិយាយថាសម្តេចតេជោ​ គិតតែពីការពង្រឹងអំណាច​ មិនគិតពីការដោះស្រាយបញ្ហាផ្សេងៗដែលកើតឡើងនៅក្នុងសង្គម​ ?

ការចោទប្រកាន់នេះ ត្រូវបានលោក សុខ ឥសាន ពន្យល់ថា ជាការពិតហើយ​ មានអំណាចទើបអាចដោះស្រាយបញ្ហានានានៅក្នុងសង្គមបាន​ បើអត់អំណាចតើដោះស្រាយបញ្ហាស្អីបានទៅ​ ? លោកបន្ថែមថា ដូច្នេះ​ រាជរដ្ឋាភិបាលកម្ពុជា​ ជាបឋមត្រូវតែពង្រឹងអំណាច​។ លោក សុខ សាន ” មានអំណាចទើបអាចថែក្សា​ ការពារបានរឹងមាំសន្តិភាព​ ស្ថិរភាពនយោបាយ​ សន្តិសុខសុវត្ថិភាពសាធារណសង្គម និងធ្វើការអភិវឌ្ឈន៏ប្រទេសជាតិបា​ន​ និងរាល់បញ្ហាដែលកើតឡើងនៅក្នុងសង្គមបាន”។
​
ទី៣- លោក សុខ ឥសាន ក៏បានបញ្ជាក់ផងដែរថា ពួកប្រឆាំងនិយាយថា សម្តេចតេជោកំពុងខ្លាចស្លន់ស្លោរ។ លោកថា បើសម្តេចតេជោកំពុងខ្លាចស្លន់ស្លោរដូចគេថាមែននោះ​ ហេតុម៉េចបានជាទណ្ឌិតសម​ រង្សីមិនចូលមកក្នុងស្រុកទៅ​ នៅដល់ណាទៀត​ ?

​ ទី៤- ឆ្លើយតបទៅនឹង ទណ្ឌិតសម​ រង្សីដែលថាមានប្រជាជនកម្ពុជារាប់លាននាក់នៅគាំទ្រខ្លួន​ ត្រូវបានលោក សុខ ឥសាន បំភ្លឺតបវិញថាបើដូច្នេះមែន​ ខ្លាចអីនឹងចូលមកក្នុងស្រុកមក​នៅខ្លាចអីទៀត​ បើប្រជាជនរាប់លាននាក់ត្រៀមរង់ចាំទទួលខ្លួនហើយនោះ​ ?