កិច្ចប្រជុំសាមញ្ញលើកទី១៥ ឆ្នាំទី២ អាណត្តិទី៣ របស់ក្រុមប្រឹក្សាខេត្តស្វាយរៀង

 ស្វាយរៀង៖ នៅថ្ងៃទី៣១ ខែសីហា ឆ្នាំ២០២០នេះ នៅសាលប្រជុំសាលាខេត្តស្វាយរៀង មានរៀបចំកិច្ចប្រជុំសាមញ្ញលើកទី១៥ ឆ្នាំទី២ អាណត្តិទី៣ របស់ក្រុមប្រឹក្សាខេត្តស្វាយរៀង ក្រោមអធិបតីភាពលោក ជុំ ហាត ប្រធានក្រុមប្រឹក្សាខេត្ត និងលោក ម៉ែន វិបុល អភិបាលនៃគណៈអភិបាលខេត្ត ព្រមទាំងមានការអញ្ជើញចូលរួមពីលោក លោកស្រី សមាជិក សមាជិកាក្រុមប្រឹក្សាខេត្ត អភិបាលរងខេត្ត លោកនាយករដ្ឋបាលសាលាខេត្ត លោកប្រធានមន្ទីរព័ត៌មានខេត្ត លោកអនុប្រធានមន្ទីរសុខាភិបាលខេត្ត លោក លោកស្រីនាយក នាយករងទីចាត់ការ/អង្គភាព និងប្រធានការិយាល័យចំណុះសាលាខេត្ត សរុបវត្តមានចំនួន៤៨នាក់។

របៀបវារៈសំខាន់ៗនៅក្នុងកិច្ចប្រជុំនេះរួមមាន៖
១-ពិនិត្យ និងអនុម័តលើសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១៤។
២-ពិនិត្យនិងអនុម័តរបាយការណ៍បូកសរុបលទ្ធផលការងារប្រចាំខែសីហានិងទិសដៅការងារខែកញ្ញាឆ្នាំ២០២០ របស់រដ្ឋបាលខេត្ត។
៣-ពិនិត្យ និងអនុម័តកម្មវិធីចំណូល ចំណាយថវិកា ឆ្នាំ២០២១ របស់រដ្ឋបាលខេត្ត។
-ពិនិត្យ និងអនុម័តកម្មវិធីចំណូល ចំណាយថវិកា ឆ្នាំ២០២១ របស់មន្ទីរសុខាភិបាល នៃរដ្ឋបាលខេត្ត។
៤-ស្តាប់របាយការណ៍ប្រចាំខែសីហានិងទិសដៅការងារខែកញ្ញាឆ្នាំ២០២០ របស់គណៈកម្មាធិការពិគ្រោះ យោបល់កិច្ចការស្រ្តី និងកុមារខេត្ត។
៥-ស្តាប់របាយការណ៍ប្រចាំខែសីហានិងទិសដៅការងារខែកញ្ញាឆ្នាំ២០២០ របស់គណៈកម្មាធិការលទ្ធកម្មខេត្ត។
៦-សេចក្តីផ្សេងៗ (កិច្ចប្រជុំសាមញ្ញលើកទី១៦ នឹងប្រព្រឹត្តទៅនៅថ្ងៃទី៣០ ខែកញ្ញា ឆ្នាំ២០២០)៕

កិច្ចប្រជុំស្ដីពីការរៀបចំ​ពិធីបុណ្យភ្ជុំបិណ្ឌ និងការពង្រឹងវិធានការ​ការពារសុវត្ថិភាពសង្គម​

 ស្វាយរៀង៖ នៅថ្ងៃទី៣១ ខែសីហា ឆ្នាំ២០២០ រដ្ឋបាលស្រុកកំពង់រោទិ៍ បានរៀបចំកិច្ចប្រជុំផ្សព្វផ្សាយស្ដីពីការរៀបចំពិធីបុណ្យកាន់បិណ្ឌ ភ្ជុំបិណ្ឌ និងការពង្រឹងវិធានការការពារសុវត្ថិភាពសង្គមដើម្បីកាត់បន្ថយហានិភ័យនៃការរីករាលដាលជំងឺកូវីដ-១៩ នៅតាមទីវត្តអារ៉ាមទាំងអស់នៅក្នុងស្រុកកំពង់រោទិ៍ក្រោមអធិបតីភាពលោក សុច ពិសី អភិបាល នៃគណៈអភិបាល ស្រុកកំពង់រោទិ៍ និងព្រះតេជគុណ ឈុន ឌីណា ព្រះគ្រូអនុគណស្តីទីស្រុក។

កិច្ចប្រជុំនេះមានការនិមន្ត និងចូលរួមពី លោក លោកស្រី អភិបាល រងស្រុក លោក លោកស្រីនាយករងរដ្ឋបាលសាលាស្រុក ព្រះតេជ គុណគ្រូ ចៅ អធិការ វត្ត ព្រះមន្រ្តីសង្ឃ គ្រូអាចារ្យ គណៈ កម្ម ការ វត្ត ក្នុងស្រុក ប្រធានការិយាល័យធម្មការ និង សាសនាស្រុក ផងដែរ៕

លោក ចម ប្រសិទ្ធិ អញ្ជើញសម្ពោធ រោងចក្រផលិតទឹកស្អាតភ្នំវាលចាបនៅទីលានហ្វឹកហ្វឺនបាញ់គ្រាប់ពិតមរតកតេជោសែន ភ្នំវាលចាប ខេត្តបាត់ដំបង

 បាត់ដំបង៖ នៅព្រឹកថ្ងៃអាទិត្យទី៣០ ខែសីហា ឆ្នាំ ២០២០ លោក ចម ប្រសិទ្ធិ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងលោកស្រី ទេព បុប្ផា ចម ប្រសិទ្ធិ បានអញ្ជើញជាអធិបតី ភាពក្នុងពិធីសម្ភោធដាក់ឱ្យប្រើប្រាស់ជាផ្លូវការសមិទ្ធិផលប្រព័ន្ធប្រព្រឹត្តកម្មទឹកស្អាត នៅទីលានហ្វឹកហ្វឺនបាញ់គ្រាប់ពិតមរតកតេជោ សែន ភ្នំវាលចាប ខេត្តបាត់ដំបង ដែលមានការអញ្ជើញចូលរួមអមដំណើរ លោក ងួន រតនៈ អភិបាល នៃគណៈអភិបាលខេត្ត និងភរិយាឧត្តមសេនីយ៍ឯក ឯក សំអូន មេបញ្ជាការរងកងទ័ពជើង គោក និងជាមេបញ្ជាការយោធភូមិភាគទី៥ ថ្នាក់ដឹកនាំក្រសួង ថ្នាក់ដឹនាំមន្ទីរ មន្ត្រីរាជការ កងទ័ព គ្រួសារកងទ័ព និងកំម្លាំងទីលានហ្វឹកហ្វឹន សរុបប្រមាណជាង ៤៦១ នាក់ផងដែរ។

ឧត្តមសេនីយ៍ឯក ឯក សំអូន បានថ្លែងនៅក្នុងពិធីនោះឱ្យថា ទីលានហ្វឹកហ្វឺនបាញ់គ្រាប់ពិតមរតកតេជោ សែន កន្លងមកនៅក្នុងសម័យខ្មែរឥស្សរៈគឺជាតំបន់លាក់ខ្លួនរបស់កម្លាំងចលនាតស៊ូគ្រប់ជំនាន់ប្រឆាំងជាមួយកម្លាំងរាជរដ្ឋាភិបាល ហើយក៏ជាតំបន់អនុវត្តគោលនយោបាយឈ្នះឈ្នះ របស់លោកនាយករដ្ឋមន្ត្រី ហ៊ុន សែន បានប្រែក្លាយតំបន់នេះទៅជាទីលានសម្រាប់ហ្វឹកហ្វឺនបណ្តុះ បណ្តាលធនធានមនុស្សខាងវិស័យយោធា គួបផ្សំនឹងការបាញ់គ្រាប់ពិតនៅភាគពាយ័ព្យនៃប្រទេសកម្ពុជា ដែលស្ថិតនៅក្នុងភូមិសាស្ត្រភូមិកណ្តាលស្ទឹង ឃុំអណ្តើកហែប ស្រុករតនមណ្ឌល ខេត្តបាត់ដំបងផងដែរ។

លោក ចម ប្រសិទ្ធិ បានមានប្រសាសន៍ថា ការសម្ពោធដាក់ឱ្យដំណើររោងចក្រផលិតទឹកស្អាតភ្នំវាលចាប នៅទីលានហ្វឹកហ្វឺនបាញ់គ្រាប់ពិតមរតតេជោសែន ភ្នំវាលចាបនាពេលនេះថា ដោយមានការយកចិត្តទុកដាក់អំពីសុខភាពរបស់យុទ្ធជន និងពលទាហានដែលកំពុងឈរជើងការពារព្រំដែន និងជួយស្វែងរកសុខសន្តិភាពជូនប្រទេសជាតិក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា រហូតមកដល់បច្ចុប្បន្ននេះមន្ត្រីរាជការ និងកម្លាំងជួរក្រោយ សូមធ្វើការកោតសរសើរចំពោះភក្តីភាព ភាពដ៏អង់អាចក្លាហ៊ានរបស់ពលទាហាន នាយក ដែលបានលះបង់សាច់ស្រស់ ឈាមស្រស់ ដើម្បីការពារសុខសន្តិភាពជូនប្រទេសជាតិផងដែរ។

នៅក្នុងពិធីសម្ពោធនោះ លោក បានឧបត្ថម្ភបន្ថែមតាមសំណូមពរនូវ ម៉ាស៊ីនភ្លើងកម្លាំង ៤៥ គីឡូវ៉ាត់ចំនួន ១គ្រឿង សម្រាប់ប្រើប្រាស់ឱ្យប្រព្រឹត្តទឹកស្អាត និងឧបត្ថម្ភផ្ទះចំនួន ១ខ្នង ទំហំ ៥×៨ ម៉ែត្រសម្រាប់កង ការពារស្នាក់នៅ និងគ្រឿងឧបភោគបរិភោគសម្ភារៈប្រើប្រាស់មួយចំនួនធំចែកជូនដល់គ្រួសារកងទ័ព និងពលទាហាននាឱកាសផងដែរ។

សូមជម្រាបជូនដែរថា រោងចក្រផលិតទឹកស្អាត ភ្នំវាលចាបនេះជាអំណោយដ៏ថ្លៃថ្លារបស់លោក ចម ប្រសិទ្ធិ និងភរិយាតាមរយៈក្រុមហ៊ុន ម៉ៃក្រូ ភូរីហ្វីខេសិន សៀងហៃ ដែលមានទឹកប្រាក់ប្រមាណជិត ២ ម៉ឺនដុល្លាសហរដ្ឋអាមេរិច សម្រាប់ពលទាហាន នាយទាហាន ប្រើប្រាស់នៅក្នុងទីលានហ្វឹកហ្វឺនបាញ់គ្រាប់ពិតមរតកតេជោ សែននេះផងដែរ៕

លោកស្រី ម៉ែន សំអន អញ្ជើញប្រារព្ធពិធីបួងសួងសុំសេចក្តីសុខ និងប្រគេនស្គរជ័យ និងគងជ័យ ដល់វត្តភ្នំសំបុក

 ក្រចេះ៖ នៅព្រឹកថ្ងៃអាទិត្យទី៣០ ខែសីហា ឆ្នាំ២០២០ លោក ហឿ សុីយ៉ែម ប្រធានក្រុមប្រឹក្សាខេត្តក្រចេះ លោក វ៉ា ថន អភិបាលខេត្ត និងភរិយា បានអញ្ជើញចូលរួមពិធីបួងសួងសុំសេចក្តីសុខ និងប្រគេនស្គរជ័យ និងគងជ័យ ដល់វត្តភ្នំសំបុក ស្ថិតនៅឃុំថ្មគ្រែ ស្រុកចិត្របុរី ខេត្តក្រចេះ ក្រោមអធិបតីភាព លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភាព្រឹទ្ធសភា និងអធិការកិច្ច។ ដោយមានការអញ្ជើ ញចូលរួមពីថ្នាក់ដឹកនាំក្រសួងទំនាក់ទំនងព្រឹទ្ធសភា រដ្ឋសភា លោកជំទាវអ្នកតំណាងរាស្ត្រមណ្ឌលខេត្តក្រចេះ លោកជំទាវតំណាងរាស្រ្តមណ្ឌលខេត្តស្វាយរៀង ថ្នាក់ដឹកនាំខេត្តក្រចេះ និងព្រមទាំងប្រជាពុទ្ធបរិស័ទ នៅក្នុងចំណុះជើងវត្តភ្នំសំបុកច្រើនកុះករផងដែរ។

គោលបំណងដែលប្រារព្ធពិធីនេះឡើង គឺទី១ដើម្បីរំលឹកប្រវត្តិសាស្ត្រ និងដឹងគុណណូបការៈរបស់អតីតព្រះ មហាក្សត្រខ្មែរជាច្រើនជំនាន់ ទី២ ដើម្បីបួងសួងសុំសេចក្តីសុខសន្តិភាព ពីទេវតាបារមីសាកសិទ្ធលើលោកយើងនេះ ទី៣ ដើម្បីឧទ្ឋិសបុណ្យកុសលថ្វាយដល់ព្រះមហាក្សត្រព្រះមហាក្សត្រីយ៉ានីគ្រប់ជំនាន់ ទី៤ ប្រគេនថ្វាយគងជ័យ និងស្គជ័យដល់ព្រះសង្ឃទុកជាមរត៏ ក្នុងព្រះពុទ្ធសាសនា នៅក្នុងវត្តភ្នំសំបុក នេះផ្ទាល់។

លោកស្រី ម៉ែន សំអន បានបញ្ជាក់ថា ការធ្វើពិធីបួងសួងនេះគឺដើម្បីដឹងគុណអារុកអារក្ស អ្នកតាព្រៃព្រឹក្សា ដែលធ្វើអោយយើងមានជីវិត មានក្តីសង្ឃឹមនេះគឺជាការតប ស្នងសងគុណជូនវិញ ហើយយើងត្រូវដឹងគុណសន្តិភាព ដែលបានផ្តល់ឪកាសឲ្យយើងបានប្រកបកិច្ចប្រតិបត្តិ ទាំងផ្នែកអាណាចក្រ និងពុទ្ធចក្រដោយមានការរីកចំរើនគួឲ្យកត់សម្គាល់។

លោកស្រី បានក្រើនរំលឹកអំពាវនាវដល់បងប្អូនប្រជាព លរដ្ឋគ្រប់រូប សូមបន្តយកចិត្តទុកដាក់ ការពារថែទាំថែរក្សាសុខភាព ធ្វើយ៉ាងណាដើម្បីបញ្ចៀសផុតពីការឆ្លងជំងឺរលាកផ្លូវដង្ហើមដ៏កាចសាហាវ គឺជំងឺកូវីដ១៩ ដែលកំពុងតែរាតត្បាតលើសកលលោកយើងនេះ ដោយឡែកប្រទេសកម្ពុជាយើងក៏មានការឆ្លងនូវជំងឺកូវីដ១៩ផងដែរ តែដោយក្រោមការគ្រប់គ្រងពីប្រមុខថ្នាក់ដឹកនាំ បានគ្រប់គ្រងការពារទប់ស្កាត់មិនឲ្យមានការឆ្លងចូលទៅសហគមន៍នៅឡើយទេ។

លោកស្រី បានបន្តថា ដោយឡែកការងារបង្កបង្កើនផលវិញ សូមឱ្យបងប្អូនយើងខិតខំយកចិត្តទុកដាក់ប្រឹងប្រែង ហើយក្នុងដំណាក់កាលកូវីដ១៩ ប្រមុខរាជរដ្ឋាភិបាលកម្ពុជា បានគិតគូរយកចិត្តទុកដាក់ខ្ពស់ គឺបានជួយ ឧបត្ថម្ភជាសាច់ប្រាក់ជូនដល់ប្រជាពលរដ្ឋក្រីក្រជារៀងរាល់ខែ ហើយជាពិសេសបានយកចិត្តទុកដាក់ទៅស្ត្រីដែលមានផ្ទៃពោះ គឺបានផ្តល់ប្រាក់ឧបត្ថម្ភរហូតទៅដល់ចំនួន៤លើក ក្រោយសម្រាលកូនហើយ ដើម្បីធ្វើយ៉ាងណាឲ្យកូនដែលសម្រាលហើយមានសុខភាពល្អ។ ចំនុចដែលសំខាន់គឺសូមអោយបងប្អូនបន្តថែទាំសុខភាពដោយឧស្សាហ៍លាងដៃនឹងសាប៊ូ អាកុល ឬជែលជាដើម ពាក់ម៉ាសជាប្រចាំ។

ចុងក្រោយលោកស្រី ម៉ែន សំអន រួមនិងក្រុមការងារ បានចែកអំណោយដល់ លោកយាយ លោកតា ពូ មីង ក្មួយៗ ចំនួនជាង២០០នាក់ ដែលមកចូលរួម ដោយទទួលបាន សារ៉ុង១ ក្រម៉ា១ នំប័ង មី រួមនិងលុយ ២មុឺនរៀល៕

តំណាងរាស្រ្តមណ្ឌលកំពង់ឆ្នាំង និងក្រុមការងារ នាំយកទេយ្យទាន និងទៀនវស្សា បច្ច័យ ប្រគេនដល់វត្តទាំង ៤៧ ស្ថិតក្នុងស្រុកមោងឬស្សី

 បាត់ដំបង៖ នៅព្រឹកទី២៩ ខែសីហា ឆ្នាំ២០២០ លោកស្រី កែ ច័ន្ទមុនី អ្នកតំណាងរាស្រ្តមណ្ឌលកំពង់ឆ្នាំង លោកស្រី គ្រី សារ៉ន ប្រធានសម្ព័ន្ធប្រជាជនដើម្បីសន្តិភាព ព្រៈគ្រូសរណវិចិត្រធម្ម ហឿម សុវណ្ណារ៉ា ព្រៈចៅអធិការវត្តគីរីធម្មរាជ រួមជាមួយសមាគមចលនាយុវជនកម្ពុជា (ក្រុម១៥៧) ក្រុងប៉ោយប៉ែត សហភាពសហព័ន្ធយុវជនកម្ពុជា ស្រុករលាប្អៀរ និងក្រុមការងារ បាននាំយកទយ្យទាន គ្រឿងឧបភោគបរិភោគ ទានចំណាំព្រះវស្សា និងបច្ច័យ ប្រគេនដល់វត្តទាំង ៤៧ ស្ថិតក្នុងស្រុកមោងឬស្សី ខេត្តបាត់ដំបង។

ដោយមានការចូលរួមពីប្រធានក្រុមប្រឹក្សាស្រុក អភិបាល នៃគណៈអភិបាលស្រុកមោងឬស្សី និងមន្ត្រីរាជការកងកម្លាំងទាំងបីស្ថាប័ន និងអាជ្ញាធរមូលដ្ឋាន និងសហភាពសហព័ន្ធយុវជនកម្ពុជា ស្រុកមោងឬស្សី ផងដែរ។

លោកស្រី កែ ច័ន្ទមុនី បានពាំនាំការផ្តាំផ្ញើការសាកសួរសុខទុក្ខពីសំណាក់លោក ហ៊ុន សែន នាយយករដ្ឋមន្ត្រី នៃព្រះរាជាណាចក្រកម្ពុជា។

ឆ្លៀតក្នុងឱកាសនោះលោកស្រី បានធ្វើផ្សព្វផ្សាយដល់បងប្អូនប្រជាពលរដ្ឋ ពីវិធានការការពារខ្លួនពីជំងឺផ្សេងៗ ពិសេសជំងឺកូវីដ១៩ ត្រូវអនុវត្តតាមវិធានការ របស់រាជរដ្ឋាភិបាលកម្ពុជា និងតាមគោលកាណ៍ណែនាំរបស់ក្រសួងសុខាភិបាលជាប្រចាំ ៕

កម្មវិធីដាំកូនឈើប្រណិតចំនួន ៣៧០ដើមនៅតំបន់ឃុំឈូកស ជាដែនជម្រកសត្វព្រៃ និងធម្មជាតិល្អ

 កំពង់ឆ្នាំង៖ នៅថ្ងៃទី៣០ ខែសីហា ឆ្នាំ២០២០នេះ លោក សាន់ យូ ប្រធានសមាគមសម្ព័ន្ធយុវជនមុស្លិមកម្ពុជាខេត្តកំពង់ឆ្នាំង បានដឹកនាំយុវជននៃសមាគមសម្ព័ន្ធយុវជមុស្លិមកម្ពុជាខេត្តកំពង់ឆ្នាំង ចំនួន ៩៧នាក់ ដាំកូនឈើប្រណិតចំនួន ៣៧០ដើម នៅជុំបឹង និងខ្នងទំនប់ព្រៃពារ និងអូរតាសោម ស្ថិតក្នុងឃុំឈូកស ស្រុកកំពង់ត្រឡាច។

លោកបានបញ្ជាក់ថា ការចូលរួមដាំដើមឈើនេះគឺដើម្បីថែរក្សា ការពារធនធានធម្មជាតិឱ្យបានល្អ ក្នុងគោលដៅពង្រឹងសហគមន៍ឱ្យមានភាពប្រសើរឡើង យល់ដឹងកាន់តែស៊ីជម្រៅស្តីពីអត្ថប្រយោជន៍នៃការអភិរក្សធនធានធម្មជាតិ និងចូលរួមគ្រប់គ្រងអេកូឡូស៊ីប្រកបដោយនិរន្តរ៍ភាព៕

សន្និសីទសារព័ត៌មានស្ដីពី «ការផ្ដល់ឈាមដើម្បីសង្គ្រោះជីវិត»

 

******************

ថ្ងៃព្រហស្បតិ៍ ទី២៧ ខែសីហា ឆ្នាំ២០២០ អង្គភាពអ្នកនាំពាក្យរាជរដ្ឋាភិបាល រៀបចំសន្និសីទសារព័ត៌មានស្តីពី «ការផ្តល់ឈាម ដើម្បីសង្រ្គោះជីវិត» វាគ្មិនអញ្ជើញចូលរួម៖ - ឯកឧត្ដមវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល នៃក្រសួងសុខាភិបាល - វេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម

សុន្ទរកថា សម្តេចពិជ័យសេនា ទៀ បាញ់ ថ្លែងក្នុងពិធីប្រគល់ទទួលផែនទីឋានលេខាព្រំដែនគោកខ្នាត១/២៥០០០ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម

 

លោក ម៉ែន វិបុល ទទួលជួបពិភាក្សាការងារជាមួយឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា

 ស្វាយរៀង៖ នៅថ្ងៃទី២៦ ខែសីហា ឆ្នាំ២០២០នេះ លោក ម៉ែន វិបុល អភិបាលនៃគណៈអភិបាលខេត្តស្វាយរៀង បានអនុញ្ញាតឲ្យលោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា ដើម្បីជួបសម្តែងការគួសម និងស្វែងយល់អំពីសក្កានុពលនិងសិក្សាលទ្ធភាពក្នុងការពង្រឹងកិច្ចសហប្រតិបត្តិការរវាងរដ្ឋបាលខេត្តស្វាយរៀង និងស្ថានទូតសហរដ្ឋអាមេរិក។

នៅក្នុងឱកាសអញ្ជើញចូលរួមក្នុងជំនួបនេះមាន លោកអភិបាលរងខេត្ត លោកនាយករដ្ឋបាលសាលាខេត្ត លោកប្រធានមន្ទីរព័ត៌មានខេត្ត លោកប្រធានមន្ទីរការងារបណ្តុះបណ្តាល និងវិជ្ជាជីវៈខេត្ត និងមន្ត្រីពាក់ព័ន្ធមួយចំនួនទៀត។

មានប្រសាន៍ទៅកាន់ លោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅ កម្ពុជា លោកអភិបាលខេត្ត បានបញ្ជាក់ជូន អំពីស្ថានភាពភូមិសាស្ត្រ និងតំបន់សក្កានុពលសំខាន់ៗ ដែលរដ្ឋបាលខេត្តសម្រេចបាន រួមមាន៖ វិស័យសេដ្ឋកិច្ច ឧស្សាហកម្ម ពាណិជ្ជកម្ម និងកសិកម្មព្រមទាំងការងាររបស់អង្គការសង្គមស៉ីវិលជាមួយរដ្ឋបាលខេត្តផងដែរ ជាពិសេស លោកអភិបាលខេត្តបានបញ្ជាក់ថា ក្នុងតំបន់សេដ្ឋកិច្ចពិសេសនានានៅខេត្តស្វាយរៀង បានផ្តល់ការងារ ធ្វើជូនដល់បងប្អូនប្រជាពលរដ្ឋក្នុងខេត្ត និងមកពីតាមបណ្តាខេត្តជាង៨ម៉ឺននាក់ ។

នាឱកាសនោះ លោកអភិបាលខេត្តបានជម្រាបជូន អំពីស្ថានភាពបច្ចុប្បន្ន ក្នុងកំឡុងពេលជំងឺកូវីដ១៩ ដូចជាការនាំទំនិញចេញចូលឆ្លងកាត់នៅព្រំដែនខេត្តស្វាយរៀងនិងវៀតណាម ព្រមទាំងវិធីសាស្ត្រក្នុងការបង្ការទប់ស្កាត់ការរីករាលដាលនៃជម្ងឺកូវីដ១៩ របស់រដ្ឋបាលខេត្ត ក្នុងនោះរដ្ឋបាលខេត្តស្វាយរៀង ក៏បានអនុវត្តយ៉ាងម៉ឺងម៉ាត់ តាមសេចក្តីណែនាំរបស់ក្រសួងសុខាភិបាលកម្ពុជាផងដែរ។

ជាចុងបញ្ចប់ លោក ម៉ែន វិបុល បានថ្លែងនូវការអរគុណចំពោះ លោក W.Patrick Murphy ឯកអគ្គរដ្ឋទូតសហរដ្ឋអាមេរិកដែលបានឆ្លៀតពេលពេលវេលាអញ្ជើញមកសិក្សាស្វែងយល់អំពីសក្កានុពល និងសិក្សាលទ្ធភាពក្នុងការពង្រឹងកិច្ចសហប្រតិបត្តិការរវាងរដ្ឋបាលខេត្តស្វាយរៀង និងស្ថានទូតសហរដ្ឋអាមេរិក៕

វគ្គបណ្តុះបណ្តាលរំលឹកឡើងវិញស្តីពីរបៀបកត់ត្រាការងារអត្រានុកូលដ្ឋាន

 កំពង់ឆ្នាំង៖ នៅព្រឹកថ្ងៃទី២៥ ខែសីហា ឆ្នាំ២០២០ រដ្ឋបាលខេត្តកំពង់ឆ្នាំង បានបើកវគ្គបណ្តុះបណ្តាលរំលឹកឡើងវិញស្តីពីរបៀបកត់ត្រាការងារអត្រានុកូលដ្ឋានសម្រាប់មន្រ្តីអនុវត្តនៅតាមឃុំ សង្កាត់ ក្នុងខេត្តកំពង់ឆ្នាំង ក្រោមអធិបតីភាពលោក ស៊ុន សុវណ្ណារិទ្ធិ អភិបាលរងខេត្តកំពង់ឆ្នាំង លោក យឹម សំអុល អនុប្រធាននាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ និងមានការចូលរួមពីថ្នាក់ដឹកនាំមន្ទីរពាក់ព័ន្ធ អភិបាលក្រុងស្រុក ប្រធានការិយាល័យរដ្ឋបាលក្រុងស្រុក អធិការនគរបាលក្រុងស្រុក មេឃុំចៅសង្កាត់ និងស្មៀនឃុំសង្កាត់ សរុបប្រមាណ ២០០នាក់។

វគ្គបណ្តុះបណ្តាលនេះរៀបចំឡើងដោយអគ្គនាយកដ្ឋានអត្រានុកូលដ្ឋាន នៃអគ្គអត្តសញ្ញាណកម្មការក្រសួងមហាផ្ទៃ ដែលមានរយៈពេល ០២ថ្ងៃ គឺចាប់ពីថ្ងៃទី ២៥ ដល់ថ្ងៃទី២៦ ខែសីហា ឆ្នាំ២០២០។

លោក ស៊ុន សុវណ្ណារិទ្ធិ បានធ្វើការផ្តាំផ្ញើដល់សិក្ខាកាមទាំងអស់ ត្រូវក្រេបជញ្ជក់យកចំណេះដឹងចំណេះធ្វើក្នុងពេលនេះដើម្បីយកទៅបំរើសេវាសាធារណៈជូនប្រជាពលរដ្ឋបានច្បាស់លាស់និងត្រឹមត្រូវបំផុត៕

អង្គភាពព័ត៌មាន និងប្រតិកម្មរហ័ស: ថ្ងៃឈប់សម្រាករយៈពេលវែង ជាកញ្ចក់ឆ្លុះបញ្ចាំងពីសេចក្តីសុខរបស់ខ្មែរក្នុងសម័យតេជោសែន "(Video)

អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី នៅព្រឹកថ្ងៃទី២៦ ខែសីហា ឆ្នាំ២០២០នេះ បានបញ្ចេញផ្សាយនូវវីដេអូមួយក្រោមចំណងជើងថា " ថ្ងៃឈប់សម្រាករយៈពេលវែង ជាកញ្ចក់ឆ្លុះបញ្ចាំងពីសេចក្តីសុខរបស់ខ្មែរក្នុងសម័យតេជោសែន "។

តាមរយៈខ្លឹមសារវីដេអូនេះបានបង្ហាញនូវបរិយាកាសដ៏មហាសប្បាយរីករាយ រំលេចឱ្យឃើញអំពីប្រក្រតីភាពជីវភាពរស់នៅរបស់ប្រជាពលរដ្ឋខ្មែរនៅទូទាំងប្រទេសក្នុងឱកាសការឈប់សម្រាករយៈពេល៩ថ្ងៃ បូករួមទាំងថ្ងៃសៅរ៍- អាទិត្យ បន្ទាប់ពីសម្តេចតេជោ ហ៊ុន សែន ប្រកាសសងវិញចំនួន៥ថ្ងៃ នៃថ្ងៃបុណ្យចូលឆ្នាំប្រពៃណីជាតិខ្មែរកន្លងទៅ ។ ក្នុងពេលឈប់សម្រាក គេបានសង្កេតឃើញថា ប្រជាពលរដ្ឋខ្មែរ ទាំងអ្នករស់នៅទីក្រុង និងទីជនបទ បានធ្វើដំណើរទៅកំសាន្តនៅតាមតំបន់រមណីយដ្ឋានធម្មជាតិនានា និងជួបជុំមិត្តភ័ក្ត្រ បងប្អូន សាច់ញាតិ ក្រុមគ្រួសារក្នុងបរិយាកាសដ៏សែនសប្បាយរីករាយយ៉ាងក្រៃលែង។ សូមទស្សនាវីដេអូ របស់អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី ក្រោមចំណងជើងថា " ថ្ងៃឈប់សម្រាករយៈពេលវែង ជាកញ្ចក់ឆ្លុះបញ្ចាំងពីសេចក្តីសុខរបស់ខ្មែរក្នុងសម័យតេជោសែន " ដូចតទៅនេះ:

#តេជោសែន #ហ៊ុនសែន #អរគុណសន្តិភាព #កម្ពុជា #ខ្មែរតែមួយ #KhmerUnity

លោកនាយករដ្ឋមន្រ្តី ហ៊ុន សែន ស្នើឱ្យតំណាងប្រតិភូគណបក្សនយោបាយនៃឧត្តមក្រុមប្រឹក្សាពិគ្រោះនិងផ្ដល់យោបល់ ចូលរួមផ្ដល់នូវមតិបន្ថែមលើវិធានការដោះស្រាយបញ្ហាវិបត្តិកូវីដ-១៩

 នៅព្រឹកថ្ងៃទី២៥ ខែសីហា ឆ្នាំ២០២០ លោកនាយករដ្ឋមន្រ្តី ហ៊ុន សែន បានអញ្ជើញជាអធិបតីភាពប្រជុំបូកសរុបការងារឆមាសទី៤ របស់ឧត្តមក្រុមប្រឹក្សាពិគ្រោះ និងផ្តល់យោបល់។ ក្នុងកិច្ចប្រជុំនេះ ប្រធានគណៈប្រតិភូ នៃគណបក្សនយោបាយជាសមាជិក ត្រូវបានអនុញ្ញាតឱ្យផ្តល់នូវទស្សនទានដើម្បីផ្តល់ធាតុចូលក្នុងន័យស្ថាបនាអំពីបរិបទបច្ចុប្បន្នភាពសង្គមដោយផ្អែកលើការរកឃើញតម្រុយនិងភស្តុតាងនានាតាមរយៈបេសកកម្មការងារបន្ថែមជាមួយនឹងការប្រឈមនឹងជំងឺកូវីដ-១៩ផងដែរ។

នៅក្នុងកិច្ចប្រជុំនេះផងដែរ លោកនាយករដ្ឋមន្រ្តី ហ៊ុន សែន ក៏បានស្នើឱ្យប្រតិភូគណបក្ស នយោបាយ នៅក្នុងឧត្តមក្រុមប្រឹក្សាពិគ្រោះ និងផ្ដល់យោបល់ ចូលរួមជាមតិយោបល់ជុំវិញបញ្ហាកូវីដ–១៩ ដែលរាជរដ្ឋាភិបាលបានដាក់ចេញវិធានការ ឆ្លើយតប រួមទាំងបញ្ហាផ្សេងៗ ដែលជាដំណោះស្រាយលើបញ្ហាសេដ្ឋកិច្ច-សង្គម។

លោកនាយករដ្ឋមន្ត្រី ហ៊ុន សែន បានមានប្រសាសន៍ថា បញ្ហាជំងឺកូវីដ-១៩ មិនមែនជាបញ្ហាដាច់ដោយឡែករបស់កម្ពុជានោះទេ វាជាបញ្ហារួមរបស់សកលលោក។ លោក បានមានប្រសាន៍បញ្ជាក់ប្រាប់ទៅប្រតិភូបក្សនយោបាយនៃឧត្តមក្រុមប្រឹក្សាពិគ្រោះ និងផ្តល់យោបល់ថាលោកចង់ឱ្យតំណាងប្រតិភូគណបក្សនយោបាយ នៃឧត្តមក្រុមប្រឹក្សាពិគ្រោះ និងផ្ដល់យោបល់ ចូលរួមផ្ដល់នូវមតិទៅលើបញ្ហាការដោះស្រាយរបស់រាជរដ្ឋាភិបាល ទៅលើបញ្ហាកូវីដ-១៩នេះ ថាតើបានដោះស្រាយសមស្រប ឬនៅតើនៅមានអ្វីទៀតជាចន្លោះប្រហោង។

កិច្ចប្រជុំឧត្តមក្រុមប្រឹក្សាពិគ្រោះនិងផ្ដល់យោបល់នេះ បានផ្តល់ឱកាសឲ្យប្រធានប្រតិភូគណ បក្សនីមួយៗ ម្នាក់ៗបានចូលរួមទស្សនៈទាន១០នាទី នៃការផ្តល់ធាតុចូល ក្នុងន័យស្ថាបនា អំពីបរិបទបច្ចុប្បន្នភាពសង្គម ផ្អែកលើការរកឃើញតម្រុយ ឬភស្តុតាង តាមរយៈបេសកកម្មការងារបន្ថែម ជាមួយនឹងការប្រឈមនឹងកូវីដ-១៩។

ទាក់ទងទៅនឹងបញ្ហាព្រំដែន នៅក្នុកិច្ចប្រជុំនេះផងដែរ លោកនាយករដ្ឋមន្រ្តី ហ៊ុន សែន ក៏បានឱ្យលោកទេសរដ្ឋមន្រ្តី វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនកម្ពុជាចុះទៅជួបប្រជាពលរដ្ឋ ដែលអះអាងថា បាត់ដីនៅខេត្តត្បូងឃ្មុំ ក្រោយការបោះបង្គោលព្រំដែន ។

ជាមួយគ្នានេះដែរ លោកនាយករដ្ឋមន្រ្តី ហ៊ុន សែន ក៏បានណែនាំទៅកាន់លោកឧបនាយករដ្ឋមន្រ្តី ប៊ិន ឈិន រដ្ឋមន្រ្តីទីស្ដីការគណៈរដ្ឋមន្រ្តី ឱ្យរៀបចំបើកសិក្ខាសាលាមួយដើម្បីឱ្យប្រជាពលរដ្ឋ សិស្ស និស្សិតចូលស្តាប់ និងសួរអំពីរឿងព្រំដែន។

សូមបញ្ជាក់ថា ឧត្តមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងតាមព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨ ដោយមានការស្នើសុំរបស់លោកនាយករដ្ឋមន្រ្តី ហ៊ុន សែន ក្រោយពេលបោះឆ្នោតជាតិអាណត្តិទី៦។ ឧត្តមក្រុមប្រឹក្សាពិគ្រោះ និងផ្តល់យោបល់ មានសមាសភាពមកពីគណបក្សយោបាយចំនួន១៦ ក្នុងចំណោមគណបក្សនយោបាយចំនួន២០ ដែលបានចូលរួមការបោះឆ្នោតជាតិឆ្នាំ២០១៨។ ឧត្តមក្រុមប្រឹក្សាពិគ្រោះ និងផ្តល់យោបល់ មានតួនាទីផ្តល់យោបល់ជូនរាជរដ្ឋាភិបាលក្រៅក្របខណ្ឌសភា ក្នុងគោលដៅលើកស្ទួយប្រសិទ្ធភាពការងារ ដើម្បីជាប្រយោជន៍ដល់ការបម្រើសេវាប្រជាពលរដ្ឋ និងការអភិវឌ្ឍសង្គមប្រកបដោយសក្តានុពល៕

រាជរដ្ឋាភិបាល គ្រោងនឹងរៀបចំវេទិកាសាធារណៈដើម្បីពន្យល់បកស្រាយសារជាថ្មីស្តីអំពីផែនទីនិងការបោះបង្គោលព្រំដែន

 រាជរដ្ឋាភិបាលកម្ពុជា នឹងរៀបចំវេទិកាសាធារណៈ នៅពេលខាងមុខនេះ នៅទីស្តីការគណៈរដ្ឋមន្រ្តី ដើម្បីពន្យល់និងបើកទូលាយសម្រាប់ប្រជាពលរដ្ឋដែលមានការចង់ដឹង ចង់យល់ អំពីផែនទី និងការបោះបង្គោលព្រំដែន។

នៅក្នុងកិច្ចប្រជុំរបស់ឧត្តមក្រុមប្រឹក្សាពិគ្រោះ និងផ្តល់យោបល់ ដើម្បីបូកសរុបការងារឆមាសទី៤ ដែលធ្វើឡើងនៅវិមានសន្តិភាព នាព្រឹកថ្ងៃទី២៥ ខែសីហា ឆ្នាំ២០២០ លោកនាយករដ្ឋមន្រ្តី ហ៊ុន សែន បានឆ្លើយតបនឹងសំណើរបស់សមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដោយបានណែនាំឱ្យលោកឧបនាយករដ្ឋមន្រ្តីប្រចាំការ ប៊ិន ឈិន រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី រៀបចំវេទិកាសាធារណៈដើម្បីពន្យល់ប្រជាពលរដ្ឋ ដែលចង់ដឹងអំពីផែនទី និងការបោះបង្គោលព្រំដែន។ នេះបើតាមលោក ឈឹម ផលវរុណ អគ្គលេខាធិការនៃឧត្តមក្រុមប្រឹក្សាពិគ្រោះ និងផ្តល់យោបល់។

លោក ឈឹម ផលវិរុណ បានថ្លែងប្រាប់ក្រុមអ្នកសារព័ត៌មាន ក្នុងសន្និសីទកាសែតក្រោយបញ្ចប់កិច្ចប្រជុំខាងលើថា ពាក់ព័ន្ធនឹងរឿងព្រំដែននេះ លោកនាយករដ្ឋមន្រ្តី ហ៊ុន សែន បានបើកទូលាយដោយអនុញ្ញាតឱ្យលោកទេសរដ្ឋមន្រ្តី វ៉ា គឹមហុង ប្រធានអាជ្ញាធរជាតិទទួលបន្ទុកលើកិច្ចការព្រំដែន ចុះទៅសាកសួរប្រជាពលរដ្ឋដែលអះអាងថាបាត់ដីហើយការបើកទូលាយមួយទៀតគឺអនុញ្ញាតឱ្យរៀបចំវេទិកាសាធារណៈដើម្បីពន្យល់អំពីផែនទី និងការបោះបង្គោលព្រំដែន។ បើតាម លោក ឈឹម ផលវរុណ សម្រាប់វេទិកានេះ ត្រូវបានអនុញ្ញាតឱ្យប្រើប្រាស់សាលនៃទីស្តីការគណៈរដ្ឋមន្រ្តី ដោយមានតំណាងប្រជាពលរដ្ឋ ៥០០នាក់ ចូលស្តាប់ជាបន្តបន្ទាប់។

ការដាក់ចេញនូវការរៀបចំវេទិកា ដើម្បីពន្យល់ប្រជាពលរដ្ឋអំពីការបោះបង្គោលព្រំដែន និងផែនទីនេះ បានធ្វើឡើងស្របពេលដែល កម្ពុជា និងវៀតណាម បានប្រគល់ និងទទួល ផែនទីឋានលេខាព្រំដែនគោក ខ្នាត ១/២៥ ០០០ ដែលជាផែនទីទំនើបសម័យឌីជីថល កាលពីថ្ងៃទី០១ ខែសីហា ឆ្នាំ២០២០ និងការញុះញង់បំផុសបំផុលអំពីបញ្ហាព្រំដែនឡើងវិញ រហូតដល់មានការឃាត់ខ្លួន លោក រ៉ុង ឈុន និង លោក សួង សុភ័ណ្ឌ ប្រធានគណបក្សខ្មែរឈ្នះផងដែរ។

សម្រាប់ផែនទីខាងលើនេះ លោក ឈឹម ផលវរុណ បានអះអាងថា កម្ពុជានៅតែប្រើប្រាស់ជាគោលនូវផែនទីគ្រឹះ ដែលមានចែង នៅក្នុងរដ្ឋធម្មនុញ្ញ នោះគឺផែនទីបោនខ្នាត ១/១០០០០០ ដដែល៕

រដ្ឋាភិបាលអូស្រ្ដាលី រៀបចំផែនការអភិវឌ្ឍរយៈពេលយូរឆ្នាំ សម្រាប់ជួយកម្ពុជាឱ្យកាន់តែរីកចម្រើនជឿនលឿន

នៅ ថ្ងៃទី២៥ ខែសីហា ឆ្នាំ២០២០ នៅទីស្ដីការក្រសួងបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ  បានអនុញ្ញាតឱ្យលោក Poblo Kang ឯកអគ្គរដ្ឋទូតថ្មីនៃប្រទេសអូស្រ្ដាលីប្រចាំព្រះរាជាណាចក្រកម្ពុជា និងសហការី ចូលជួបសម្ដែងការគួរសម និងពិភាក្សាការងារ។ លោក អ៊ុក រ៉ាប៊ុន  បានសម្ដែងការស្វាគមន៍ និងបានជម្រាបជូនភ្ញៀវអំពីការងាររួមរបស់ក្រសួងអភិវឌ្ឍន៍ជនបទក្នុងនោះមានការងារស្ដារ និងអភិវឌ្ឍន៍ហេដ្ឋារចនាសម្ព័ន្ធជនបទ ការងារផ្គត់ផ្គង់ទឹកស្អាត និងអនាម័យជនបទ ការងារអភិវឌ្ឍន៍សហគមន៍ ការងារឥណទានជនបទ ការងារអភិវឌ្ឍន៍ជនជាតិ ភាគតិច និងការងារអភិវឌ្ឍន៍ធនធានមនុស្សជាដើម។ 

លោករដ្ឋមន្ត្រី បានបញ្ជាក់ថា ក្រសួងអភិវឌ្ឍន៍ជនបទបានគ្រប់គ្រងផ្លូវជនបទប្រមាណ ៧៤% នៅទូទាំងប្រទេស ក្នុងនោះបានធ្វើការកែលម្អជាបណ្ដើរៗពីផ្លូវដីស ឲ្យទៅជាផ្លូវក្រាលក្រួសក្រហម ពីផ្លូវក្រួសក្រហមឲ្យទៅជាក្រាលកៅស៊ូពីរជាន់ប្រភេទ DBST និងទៅជាផ្លូវបេតុងចំពោះតំបន់ដែលលិចទឹក។ ទាក់ទិនទៅនិងវិស័យផ្គត់ផ្គង់ទឹកស្អាត និងអនាម័យជនបទ លោក បានបន្តថាក្រសួងអភិវឌ្ឍន៍ជនបទមានទិសដៅសំខាន់ៗចំនួន ៣ គឺទី១ នៅឆ្នាំ ២០២៣ សម្រេចឲ្យបាន៩០% និងខេត្តចំនួន ៥ ជាខេត្ត (ODF) គឺបញ្ឈប់ការបន្ទោបង់ពាស វាលពាសកាល។ ទី២ នៅឆ្នាំ ២០២៥ នឹងសម្រេចឲ្យបាន១០ ខេត្តបន្ថែមទៀត និងទី៣ នៅឆ្នាំ ២០៣០ សម្រេចឲ្យបាន ១០០% លើវិស័យផ្គត់ផ្គង់ទឹកស្អាត និងអនាម័យជនបទនៅកម្ពុជា។ ទិសដៅនេះគឺដោយសារតែក្រសួងមានក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទ តាំងពីថ្នាក់ជាតិរហូតដល់ថ្នាក់ខេត្តដែលបង្កលក្ខណៈងាយស្រួលក្នុងកិច្ចសហប្រតិបត្តិការជាមួយស្ថាប័នពាក់ព័ន្ធ និងដៃគូអភិវឌ្ឍន៍ផ្សេងៗទៀត។ 

ជាការឆ្លើយតបលោក Poblo Kang  បានសម្ដែងនូវការគាំទ្រចំពោះការអភិវឌ្ឍន៍លើគ្រប់វិស័យនៅកម្ពុជា ក្នុងនោះមានវិស័យកសិកម្ម និងធារាសាស្រ្ដជាដើម និងបានបញ្ជាក់ថា បច្ចុប្បន្នរដ្ឋាភិបាលអូស្រ្ដាលីបានផ្ដោតការងារសំខាន់ៗចំនួន ៣ នៅកម្ពុជា ទី១ វិស័យសុខាភិបាល បានផ្ដល់រថយន្ដសង្គ្រោះដល់មណ្ឌលសុខភាព និងផ្នែកមន្ទីរពិសោធន៍ ទី២ ជួយលើកកម្ពស់ជនងាយរងគ្រោះកំណត់អត្តសញ្ញាណគ្រួសារក្រីក្រផ្ដល់សាច់ប្រាក់ រួមទាំងជនជាតិដើមភាគតិចជាដើមដោយសហការជាមួយក្រសួងផែនការ និងទី៣ ស្ដារសេដ្ឋកិច្ចឡើងវិញបន្ទាប់ពីរងផលប៉ះពាល់ដោយសារជំងឺកូវី ១៩។ ក្រៅពីនេះរដ្ឋាភិបាលអូស្រ្ដាលីបានជួយផ្នែកទឹកស្អាត និងការដោះមីន និងយុទ្ធភ័ណ្ឌមិនទាន់ផ្ទុះ។ លោកឯកអគ្គរដ្ឋទូត បានបន្តថា រដ្ឋាភិបាលអូស្រ្ដាលីកំពុងរៀបចំកម្មវិធីដែលមានរយៈពេល ៦ ឆ្នាំ សម្រាប់ជួយអភិវឌ្ឍន៍នៅកម្ពុជា។

លោករដ្ឋមន្រ្ដី បានថ្លែងអំណរគុណដល់រដ្ឋាភិបាលអូស្រ្ដាលីដែលបានជួយដល់កម្ពុជាតាមរយៈគម្រោងកែលម្អផ្លូវជនបទ ជំហានទី ២ សម្របសម្រួល និងគ្រប់គ្រងព្រម ទាំងបានស្នើសុំឲ្យអូស្រ្ដាលីជួយផ្នែកអភិវឌ្ឍន៍ធនធាន មនុស្សតាមរយៈការផ្ដល់អាហារូបករណ៍ជាដើម៕

រដ្ឋមន្ត្រីកសិកម្ម ​ស្វាគមន៍ក្រុមហ៊ុនចិនលើគម្រោងវិនិយោគប្រមូលទិញ កែច្នៃ វេចខ្ចប់ ​និងនាំចេញផ្លែឈើស្រស់កម្ពុជាចេញទៅប្រទេសចិន​

 (ភ្នំពេញ)៖ នៅទីស្តីការក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី២៤ ខែសីហា ឆ្នាំ២០២០ ឯកឧត្តមរដ្ឋមន្ត្រី វេង សាខុន បានអនុញ្ញាតឱ្យលោក Wang Bingham អគ្គនាយកក្រុមហ៊ុនធៀន ធៀន និងសហការីចូលជួបសម្តែងការគួរសម និងពិភាក្សាការងារពាក់ព័ន្ធនឹងគម្រោងវិនិយោគរបស់ក្រុមហ៊ុនក្នុងវិស័យកសិកម្មនៅព្រះរាជាណាចក្រកម្ពុជា។

ជាកិច្ចចាប់ផ្តើម ឯកឧត្តមរដ្ឋមន្ត្រីបានថ្លែងអំណរគុណចំពោះរដ្ឋាភិបាលនៃសាធារណរដ្ឋប្រជាមានិតចិន និងប្រជាជនចិនដែលតែងតែផ្តល់កិច្ចសហប្រតិបត្តិការយ៉ាងល្អប្រសើរមកកម្ពុជាលើគ្រប់វិស័យ ជាពិសេសវិស័យកសិកម្មដោយភាគីទាំងពីរបាននិងបន្តការខិតខំប្រឹងប្រែងរួមគ្នាអនុវត្តការនាំចេញអង្ករកម្ពុជាទៅទីផ្សារចិនឱ្យបាន ៤០០ពាន់តោន និងថ្មីៗនេះភាគីចិនបានអនុញ្ញាតឱ្យកម្ពុជានាំចេញចេកអំបូងលឿង និងស្វាយស្រស់ឆ្ពោះត្រង់ទៅកាន់ប្រទេសចិនផងដែរ។ 

ពាក់ព័ន្ធនឹងគម្រោងវិនិយោគប្រមូលទិញ កែច្នៃ វេចខ្ចប់ និងនាំចេញផ្លែឈើស្រស់កម្ពុជាចេញទៅប្រទេសចិនរបស់ក្រុមហ៊ុន ឯកឧត្តមរដ្ឋមន្ត្រីស្វាគមន៍ និងគាំទ្រ ហើយលោកក៏បានបញ្ជាក់ផងដែរថា គម្រោងវិនិយោគនេះគឺពិតជាស្របតាមផែនការអភិវឌ្ឍវិស័យកសិកម្មរបស់ក្រសួងក្នុងការជំរុញផលិតកម្មកសិកម្មក្នុងស្រុកតាមរយៈការធ្វើទំនើបកម្មកសិកម្ម ការកែច្នៃ វេចខ្ចប់ និងនាំចេញ ដែលទាំងអស់នេះនឹងជួយជំរុញសេដ្ឋកិច្ចជាតិ។

លោក Wang Bingham បានថ្លែងអំណរគុណចំពោះឯកឧត្តមរដ្ឋមន្ត្រី និងសហការីដែលបានចំណាពេលវេលាដ៏មានតម្លៃទទួលជួបរូបលោកនារសៀនេះ។ លោកបានបញ្ជាក់ថា បន្ទាប់ពីបានទស្សនកិច្ចសិក្សាស្វែងយល់អំពីផលិតផល និងគុណភាពនៃផ្លែស្វាយ មៀន ខ្នុរ ធុរេន ដូងក្រអូប និងក្រូចថ្លុងរបស់កម្ពុជា លោកពិតជាមានការជឿជាក់ថានឹងទទួលការគាំទ្រ និងមានទីផ្សារខ្ពស់នៅប្រទេចិននាពេលដែលក្រុមហ៊ុនដាក់លក់នៅលើប្រព័ន្ធទីផ្សារពាណិជ្ជកម្មព័ត៌មានវិជ្ជាផ្ទាល់របស់ក្រុមហ៊ុន។ ហើយដើម្បីឱ្យគម្រោនេះទទួលបានជោគជ័យ លោកអគ្គនាយកក៏បានស្នើសុំយោបល់ និងអនុសាសន៍ពីឯកឧត្តមរដ្ឋមន្ត្រី និងមន្ត្រីជំនាញពាក់ព័ន្ធនឹងទីផ្សារប្រមូលទិញ និងនីតិវិធីនៃការនាំចេញផលិតផលខាងលើទៅប្រទេសចិន។

ជាការឆ្លើយតប ឯកឧត្តមរដ្ឋមន្ត្រីបានណែនាំដល់ក្រុមហ៊ុនសហការជាមួយស្ថានទូតចិនប្រចាំកម្ពុជា អគ្គនាយកដ្ឋានកសិកម្ម នាយកដ្ឋានសហប្រតិបត្តិកាអន្តរជាតិ និងនាយកដ្ឋានកសិឧស្សាហកម្ម សិក្សាស្វែងយល់បន្ថែមអំពីសក្តានុពុលនៃផលិតកម្មឈើហូបផ្លៃខាងលើ រួចរៀបចំចុះអនុស្សារណៈនៃការយោគយល់គ្នាជាមួយក្រសួង ដើម្បីក្រសួងមានលទ្ធភាពអាចជួយសម្របសម្រួលក្នុងការធ្វើផលិតកម្មកសិកម្មតាមកិច្ចសន្យាជាមួយសហគមន៍ និងជាពិសេសនីតិវិធីនៃការនាំចេញ៕

ក្រសួងសាធារណការ ចេញសេចក្តីណែនាំ ស្តីពីការបិទស្លាកសញ្ញាចាំងពន្លឺលើយានជំនិះ ដែលមានទម្ងន់លើសពី ៣.៥តោន

 ក្នុងគោលបំណងចូលរួមចំណែកក្នុងការបង្ការ ទប់ស្កាត់គ្រោះថ្នាក់ចរាចរណ៍ផ្លូវគោក ពាក់ព័ន្ធនឹងយានជំនិះធុនធ្ងន់ និងយោងតាមបទដ្ឋានបច្ចេកទេស ស្តីពីបទដ្ឋានត្រួតពិនិត្យលក្ខណៈបច្ចេកទេសយានជំនិះ ក្រសួងសាធារណការ និងដឹកជញ្ជូន នៅព្រឹកថ្ងៃទី២៥ ខែសីហា ឆ្នាំ២០២០នេះ បានសេចក្តីណែនាំដល់ម្ចាស់យានជំនិះធុនធ្ងន់គ្រប់ប្រភេទ ត្រូវធ្វើការបិទស្លាកសញ្ញាចាំងពន្លឺលើយានជំនិះធុនធ្ងន់របស់ខ្លួនឱ្យបានត្រឹមត្រូវ។

នៅក្នុងសេចក្តីណែនាំរបស់ក្រសួងសាធារណការ និងដឹកជញ្ជូន ដែលទទួលបាននៅព្រឹកនេះ បានឱ្យដឹងទៀតថា អគ្គនាយកដ្ឋានដឹកជញ្ជូនផ្លូវគោក សូមធ្វើការណែនាំអំពីការបិទស្លាកសញ្ញាចាំងពន្លឺលើ រថយន្តដឹកទំនិញធុនធ្ងន់ យានយន្តុបករណ៍ រ៉ឺម៉ក និងសឺមីរ៉ឺម៉ក ដែលមានទម្ងន់សរុបអតិបរមាលើសពី៣.៥តោន ដូចខាងក្រោម៖

* ទី១៖ ស្លាកសញ្ញាចាំងពន្លឺបិទនៅលើយានជំនិះត្រូវមានពីរពណ៌ «ក្រហម» និង «លឿង» ដែលមានទទឹងមិនតិចជាង៥០មីលីម៉ែត្រ និងកម្រិតចាំងពន្លឺស្របតាមបទដ្ឋាន បច្ចេកទេស VC104+។
* ទី២៖ ស្លាកសញ្ញាចាំងពន្លឺ «ពណ៌លឿង» ត្រូវបិទនៅផ្នែកសងខាងតាមបណ្ដោយយានជំនិះ ដែលមានប្រវែងមិនតិចជាង៨០% នៃប្រវែងបណ្តោយរបស់យានជំនិះ និងបិទនៅគែមខ្ពស់បំផុតតាមទម្រង់យាន ប៉ុន្តែមិនតិចជាង៤០០មីលីម៉ែត្រពីគែម និងមានប្រវែងមិនតិចជាង២៥០មីលីម៉ែត្រ។
* ទី៣៖ ស្លាកសញ្ញាចាំងពន្លឺ «ពណ៌ក្រហម» ត្រូវបិទនៅផ្នែកខាងក្រោយតាមទទឹងយានជំនិះ និងបិទនៅតែមខ្ពស់បំផុតតាមទម្រង់យាន ប៉ុន្តែមិនតិចជាង ៤០០មីលីម៉ែត្រ ពីគែម។
* ទី៤៖ ករណីរថយន្តដឹកទំនិញធុនធ្ងន់ យានយន្តុបករណ៍ រ៉ឺម៉ក ឬសឺមីរ៉ឺម៉ក ដែលមានទម្ងន់សរុបអតិបរមាលើសពី ៣.៥តោន មកទទួលសេវាត្រួតពិនិត្យលក្ខណៈបច្ចេកទេស និងមិនមានបិទស្លាកសញ្ញាចាំងពន្លឺ ឬបិទស្លាកសញ្ញាចាំងពន្លឺ មិនស្របតាមបទដ្ឋានបច្ចេកទេសខាងលើ ត្រូវអនុវត្តឱ្យបានម៉ឺងម៉ាត់ តាមខ្លឹមសារប្រកាសលេខ១៧០ ប្រក.សក.ដជគ ចុះថ្ងៃទី១២ ខែមិថុនា ឆ្នាំ២០១៩ ស្តីពីការត្រួតពិនិត្យលក្ខណៈបច្ចេកទេសយានជំនិះ និងណែនាំដល់ម្ចាស់យានជំនិះនោះឱ្យបិទស្លាកសញ្ញាទាំងពន្លឺ បានត្រឹមត្រូវ ដូចមានក្នុងគំនូរអធិប្បាយណែនាំ អំពីការបិទស្លាកសញ្ញាចាំងពន្លឺលើយានជំនិះធុនធ្ងន់ ដែលភ្ជាប់ជាមួយ ៕

ខាងក្រោមនេះជាសេចក្តីណែនាំរបស់ ក្រសួងសាធារណការ និងដឹកជញ្ជូន៖