ក្នុងឱកាសនោះ ឯកឧត្តមឯកអគ្គរដ្ឋទូតបានរៀបរាប់ពីប្រវត្តិការងាររបស់លោកស្រី នាង ផល្លា ក្នុងការបង្ហាត់បង្រៀនកុមារពិការភ្នែក។ ក្រោយរត់គេចចេញពីរបបខ្មែរក្រហម លោកស្រី នាង ផល្លា បានទទួលការបណ្តុះបណ្តាលពីអង្គការសហប្រជាជាតិក្នុងជំរុំជន ភៀសខ្លួននៅប្រទេសថៃ មុនពេលទៅបង្រៀន និងដឹកនាំសាលាកុមារពិការភ្នែកក្នុងជំរំ។
នៅពេលលោកស្រីត្រឡប់មកកាន់មាតុប្រទេសវិញនៅឆ្នាំ១៩៩១ លោកស្រីបានទាក់ទង ជាមួយអង្គការគ្រួសារថ្មី ដើម្បីជួយបង្ហាត់បង្រៀនកុមារពិការភ្នែក និងគថ្លង់ និងធ្វើការអភិវឌ្ឍកម្មវិធីបណ្តុះបណ្តាលពិសេសមួយសម្រាប់កុមារទាំងនេះ។
កិច្ចសហប្រតិបត្តិការនេះបាននាំអោយមានការបង្កើតសាលាសម្រាប់កុមារពិការភ្នែក និងគថ្លង់លើកដំបូងនៅកម្ពុជានៅក្នុងឆ្នាំ១៩៩៣។
លោកស្រីក៏បានក្លាយជាគ្រូបង្រៀនអក្សរប្រាយ(សម្រាប់កុមារពិការភ្នែក)ដំបូងគេបង្អស់នៅកម្ពុជា ហើយបានរួមចំណែកបង្កើតអក្សរប្រាយជាភាសាខ្មែរ។
ការងារនិងការប្តេជ្ញាចិត្តរបស់លោកស្រីត្រូវបានទទួលស្គាល់លើឆាកអន្តរជាតិ ដោយសារ លោក ស្រីស្ថិតក្នុងចំណោមបេក្ខជន១០រូបដើម្បីដណ្តើមពានរង្វាន់គ្រូ បង្រៀនឆ្នើមពិភពលោក (Global Teacher Prize) ។
ដំណឹងនេះត្រូវបានផ្សព្វផ្សាយពាសពេញប្រទេសកម្ពុជា ដែលជាមោទនភាពមួយសម្រាប់ប្រជាជនខ្មែរ ក៏ដូចជាសម្រាប់ថ្នាក់ដឹកនាំផងដែរ។
ដោយសារប្រវត្តិការងារគំរូនេះហើយទើបប្រទេសបារាំងសម្រេចបំពាក់គ្រឿងឥស្សរិយយសអប់រំ ជូនដល់លោកស្រី នាង ផល្លា ហើយកាយវិកានេះក៏ជាសក្ខីភាព បញ្ជាក់ពីការ ទទួលស្គាល់ និងលើកទឹកចិត្តរបស់បារាំងចំពោះលោកស្រី ដែលជាគ្រូបង្រៀននិងជាស្រ្តី មួយរូបមានដំណើរជីវិត និងប្រវត្តិការងារដ៏គួរឱ្យកត់សម្គាល់។
សូមបញ្ជាក់ថា មេដាយអប់រំគឺជាគ្រឿងឥស្សរិយយសដ៏ចំណាស់មួយរបស់សាធារណ រដ្ឋបារាំង ដែលត្រូវបានបង្កើតឡើងនៅឆ្នាំ១៨០៨ដោយព្រះចៅណាប៉ូឡេអុងទី១ ដើម្បីផ្តល់ជូនសាស្រ្តាចារ្យ និងលោកគ្រូអ្នកគ្រូ។ ចាប់ពីឆ្នាំ១៨៦៦មក គ្រឿងឥស្សរិយយសនេះក៏ត្រូវបានបំពាក់ផងដែរដល់បុគ្គលមិន មែនជាគ្រូបង្រៀន តែមានស្នាដៃឧត្តុង្គឧត្តមក្នុងវិស័យអប់រំ៕
