អគ្គសេនាធិការកងទ័ពចម្រុះឧត្តមសេនីយ៍ Joe Dunford បានមកដល់ក្រុងបាងកកដើម្បីបង្ហាញថា អាមេរិកមិនមែនជា “មហាអំណាចកំពុងធ្លាក់ចុះទេ” និងចេនារបស់ខ្លួនដើម្បីពង្រឹងទំនាក់ទំនងយោធាជាមួយកងកម្លាំងប្រដាប់អាវុធរបស់ថៃ ដែលបានគ្រប់គ្រងនយោបាយនៅក្នុងរដ្ឋប្រហារកាលពីពាក់កណ្តាលឆ្នាំ ២០១៤។
លោក Dunford បានជួបនៅថ្ងៃពុធជាមួយនាយករដ្ឋមន្ត្រី ប្រាយុទ្ធ ចាន់អូចា សមភាគីគាត់គឺ មេបញ្ជាការកំពូលនៃកងកម្លាំងប្រដាប់អាវុធថៃឧត្តមសេនីយ៍ Thanchaiyan Srisuwan និងឧបនាយករដ្ឋមន្ត្រីនិងជារដ្ឋមន្ត្រីការពារជាតិលោក ប្រាវីត វង់សុវណ្ណ។
ប្រាវីត បច្ចុប្បន្នកំពុងស្ថិតនៅក្រោមការស៊ើបអង្កេតរបស់គណៈកម្មការប្រឆាំងអំពើពុករលួយរបស់របបសឹកចំពោះការមាននាឡិការដ៏ថ្លៃចំនួន ២៥ គ្រឿងដែលមានតម្លៃប្រមាណ ១,២៤ លានដុល្លារ ប៉ុន្តែគឺជាសហសេវិកពេញមួយជីវិតរបស់នាយករដ្ឋមន្ត្រី ហើយគេមិនរំពឹងថា នឹងទទួលទណ្ឌកម្មនោះទេ។
លោក Dunford និងប្រាវីត បានពិភាក្សាអំពី “សន្តិសុខក្នុងទំនាក់ទំនងយោធា និងអាស៊ីប៉ាស៊ីហ្វិក” និងបញ្ហាផ្សេងៗទៀត។ ដំណើរទស្សនកិច្ចរបស់ Dunford ទៅកាន់ប្រទេសថៃធ្វើឡើងបន្ទាប់ពីដំណើរទស្សនកិច្ចរបស់ ប្រាយុទ្ធ ទៅកាន់សេតវិមាននៅខែតុលាមុន និងការចូលរួមរបស់រដ្ឋមន្ត្រីការពារជាតិអាមេរិកលោក Jim Mattis នៅពិធីបូជាសពរបស់ស្តេច ភូមិបុល អាឌុលយ៉ាដេត នៅចុងឆ្នាំមុន។
អ្នកវិភាគបាននិយាយថា ជំនួបទាំងនោះបានជួយបង្កើតចំណងទ្វេភាគីឡើងវិញបន្ទាប់ពីទំនាក់ទំនងរង្គោះរង្គើមួយរយៈនៅចំពេលមានការរិះគន់របស់អាមេរិកលើការធ្វើរដ្ឋប្រហារ និងការព្យួរលទ្ធិប្រជាធិបតេយ្យស្ថិតក្រោមរដ្ឋការ បារ៉ាក់ អូបាមា។
ក្រសួងការពារជាតិអាមេរិកបាននិយាយថា “ការទៅដល់ក្រុងបាងកករបស់ Dunford នៅថ្ងៃអង្គារគឺដើម្បី “បង្កើនទំនាក់ទំនងយោធាអាមេរិក និងថៃ”។
ក្រសួងនោះបាននិយាយថា “រដ្ឋប្រហារយោធាឆ្នាំ ២០១៤ បានលុបចោលការទាក់ទំនងគ្នាកម្រិតខ្ពស់ទាំងអស់របស់យោធាទាំងពីរ។ ទំនាក់ទំនងនោះត្រូវបានបង្កើតឡើងវិញ ដោយសារតែពេលនេះរដ្ឋាភិបាលថៃបានដាក់ថ្ងៃរៀបចំបោះឆ្នោតសេរីនៅចុងឆ្នាំនេះ”។
ទស្សនកិច្ចរបស់ Dunford បានកើតនៅមុនពេលការធ្វើសមយុទ្ធយោធាពហុភាគីដ៏ធំរបស់មន្ទីបញ្ចកោណនៅថ្ងៃទី ១៣ ដល់ ២៣ ខែកុម្ភៈ ឈ្មោះ Cobra Gold 2018។
ស្ថានទូតអាមេរិកនៅបាងកកបាននិយាយថា “ទាហានអាមេរិកប្រហែល ៦៨០០ នាក់នឹងចូលរួមដោយផ្ទាល់ជាមួយនឹងប្រទេស ៣១ ផ្សេងទៀត ដែលចូលរួមដោយផ្ទាល់ ឬគ្រាន់តែសង្កេតការណ៍លើសមយុទ្ធនោះនៅក្នុងទីតាំងផ្សេងៗគ្នានៅទូទាំងប្រទេសថៃ”។
ការធ្វើសមយុទ្ធលើកទី ៣៧ នោះរាប់បញ្ចូលទាំងទាហានប្រហែល ៤០០០ របស់ថៃ។ កងកម្លាំងមកពីសិង្ហបូរី ជប៉ុន ឥណ្ឌូនេស៊ី កូរ៉េខាងត្បូង និងម៉ាឡេស៊ីកំពុងមកដល់ រួមជាមួយចំនួនទាហានតិចតួចមកពីចិន និងឥណ្ឌា។
លោក Dunford បាននិយាយថា “អ្នកមិនទាត់ចោលនូវការពិតអំពីទស្សនៈសន្តិសុខលើវត្តមានអាមេរិកនៅប៉ាស៊ីហ្វិក ការប្តេជ្ញាចិត្តរបស់អាមេរិកនៅប៉ាស៊ីហ្វិក និងសមត្ថភាពរបស់អាមេរិកនៅប៉ាស៊ីហ្វិកនោះទេ”។
គាត់បាននិយាយថា “ពិតណាស់ ភស្តុតាងច្បាស់ពីទំហំនៃយោធារបស់យើងបង្ហាញថា យើងមិនមែនជាមហាអំណាចកំពុងធ្លាក់ចុះនោះទេ។ ប្រសិនបើនរណាកំពុងព្យាយាមបំផ្លាញអាមេរិកដោយនយោបាយ កាទូត និងសន្តិសុខ ផ្ទាំងស៊ីបដំបូងនោះគឺជាបណ្តាញសម្ព័ន្ធមិត្តនិងដៃគូរបស់យើង”។
គាត់និយាយថា “នៅពេលអ្នកឃើញសារថា អាមេរិកគឺជាមហាអំណាចកំពុងធ្លាក់ចុះនោះ វាជាការខិតខំប្រឹងដោយចេតនាដើម្បីបំផ្លាញភាពជឿជាក់នៃសម្ព័ន្ធភាព និងទំនាក់ទំនងរបស់យើងនៅក្នុងតំបន់។ ទោះបីជាអ្នកបានខិតខំបង្ខូចរឿងនេះយ៉ាងណាក៏ដោយ ក៏មិនមានជាតិណាផ្សេងមានសមត្ថភាពយោធាដែលយើងកំពុងមាននៅតំបន់ប៉ាស៊ីហ្វិកនោះទេ”។
គាត់និយាយថា “វាសំខាន់ណាស់ក្នុងការរក្សាទំនាក់ទំនងជាមួយថៃ ដោយសារតែវាសំខាន់នៅក្នុងវិស័យដែនសមុទ្រនៅក្នុងផ្នែកដ៏គ្រោះថ្នាក់របស់ពិភពលោក។ ឥឡូវនេះ មូលហេតុដែលខ្ញុំមានទំនាក់ទំនងយោធាជាមួយសម្ព័ន្ធមិត្តគឺដើម្បីបង្កើតការជួយគ្នាទៅវិញទៅមក និងដើម្បីត្រៀមខ្លួនវាយប្រយុទ្ធរួមគ្នា ប្រសិនបើវាចាំបាច់”៕
ប្រភព៖ Asia Times ចុះថ្ងៃ១១ ខែកុម្ភៈ ឆ្នាំ២០១៨
