ខណៈដែលលោក Putin លួចយកការបោះឆ្នោតនៅរុស្ស៊ី មេដឹកនាំរបស់យើងបែរជានៅស្ងៀមគួរឱ្យអាម៉ាស់ទៅវិញ

ប្រទេសរុស្ស៊ី នឹងធ្វើការបោះឆ្នោតជ្រើសរើសប្រធានាធិបតីនៅខែក្រោយ ដែលការបោះឆ្នោតនេះ ច្បាស់ណាស់ថា លោក Putin នឹងទទួលជ័យជម្នះ។ ដោយពិចារណាលើសេចក្តីថ្លែងការណ៍​ក្នុងពេលថ្មីៗនេះ ការបោះឆ្នោតមួយបង្ហាញពីការប្រកួតប្រជែងមួយ។ ដូច្នោះ តើប្រធា​នាធិបតីបច្ចុប្បន្ន ដែលកាន់អំណាចបីអាណត្តិចាប់តាំងពីឆ្នាំ ១៩៩៩ មកនេះ អាចត្រូវបានធានាថាទទួលបានជោគជ័យមុនដែរឬទេ?

ចម្លើយនោះគឺថា ការបោះឆ្នោតរបស់រុស្ស៊ីគ្រាន់តែជាឈ្មោះប៉ុណ្ណោះ។ ជាក់ស្តែង វាគឺជាការរៀបចំក្លែងក្លាយមួយ ដែលធ្វើឡើងដើម្បីបង្ហាញពីគោរពលទ្ធិប្រជាធិបតេយ្យចំពោះក្រុមវរជនពុករលួយប៉ុណ្ណោះ។ ប្រជាជនរុស្ស៊ី បានស៊ាំទៅនឹងការដឹកនាំបែបនេះហើយ គឺមិនមានអ្វីថ្មីទេ។ លោក Putin នឹងឈ្នះការបោះឆ្នោតនៅថ្ងៃទី១៨ ខែមីនាខាងមុននេះ ពីព្រោះ ប្រព័ន្ធគ្រប់យ៉ាង គឺគាត់ជាអ្នកបង្កើតឡើង ដែលត្រូវបានគេហៅថា “ការរៀបចំប្រព័ន្ធប្រជាធិបតេយ្យ”។ គូប្រជែងរបស់លោក Putin គឺលោក Alexei Navalny (ដែលត្រូវបានគេរំពឹងថា នឹងមិនឈ្នះលោក Putin លើករណីគ្រប់យ៉ាងនោះ) ត្រូវបានហាមឃាត់មិនឱ្យចូលរួមការបោះឆ្នោត ពីព្រោះគាត់ត្រូវបានចោទប្រកាន់ពាក់ព័ន្ធនឹងការជំរុញប្រជាជនឱ្យធ្វើពហិការក្នុងការបោះឆ្នោតខាងមុខនេះ។

ការគ្រប់គ្រងបណ្តាញទូរទស្សន៍របស់រុស្ស៊ី និងប្រព័ន្ធផ្សព្វផ្សាយផ្សេងទៀត បង្ហាញថា ក្រុមអ្នកនយោបាយប្រឆាំងហាក់ដូចជាលិចបាត់គ្មានស្រមោល។​ ពុំមានការជជែកដេញដោលរវាងបេក្ខភាពប្រធានាធិបតី និងប្រធានាធិបតី ពុំមានការស្ទង់មតិអ្វីនោះទេ។ គូប្រជែងរបស់លោក Putin មានរូបមានរាង ក៏ប៉ុន្តែ ពួកគេគ្រាន់តែជាដៃគូស្របច្បាប់ ដែលចូលរួមក្នុងការបោះឆ្នោតដើម្បីជួយឱ្យមានលក្ខណៈស្របច្បាប់ដល់លោក Putin ប៉ុណ្ណោះ។ ល្ខោននយោបាយគឺជារឿងមួយផ្នែក លោក Putin បានព្យាករណ៍កម្លាំង ដែលថា គាត់នឹងឈ្នះការបោះឆ្នោតលើសលប់។ អ្នកវិភាគបាននិយាយថា នឹងមានការចេញមកបោះឆ្នោតច្រើន ហើយលោក Putin នឹងអាចទទួលបាននូវការគាំទ្រច្រើនជាង ៦៤ ភាគរយ ចំនួនដែលគាត់ទទួលបានកាលពី ៦ឆ្នាំមុន។ លោក Putin ក៏ចង់ឱ្យមានការបោះឆ្នោតដោយសេរី និងយុត្តិធម៌ដែរ ដើម្បីជំរុញកេរ្តិ៍ឈ្មោះជាអន្តរជាតិរបស់គាត់ដែរ។

និយាយមួយបែបទៀតថា លោក Putin ចង់បានទាំងពីរផ្លូវ គឺទាំងការប្រកួតប្រជែងត្រឹមត្រូវ និងការប្រកួតប្រជែងដែលគ្មានហានិភ័យ។ ហើយកន្លងមក គាត់ហាក់ដូចជាកំពុងទទួលបានជោគជ័យរួចទៅហើយ។ ប្រសិនបើការបោះឆ្នោតបែបលួចបន្លំនេះ បាន និងកំពុងធ្វើឡើងនៅប្រទេស Iran, Zimbabwe ឬក៏នៅប្រទេស Venequela វិញ ការរិះគន់តាមបណ្តាញ Tweeter នឹងចេញរាល់ថ្ងៃពីសេតវិមាន។ ក៏ប៉ុន្តែ ក្នុងរឿងរុស្ស៊ី លោកប្រធានាធិបតី Donald Trump បែរជាស្ងប់ស្ងាត់គួរឱ្យចម្លែកទៅវិញ។ ហេតុអ្វី? អ្នកគ្រប់គ្នាដឹងថា លោក Trump មានឥរិយាបថទន់ភ្លន់ចំពោះលោក Putin។ មានការធ្វើពាណិជ្ជកម្ម និងនយោបាយបែបផ្ទាល់ខ្លួនមួយចំនួនរវាងលោក Trump និងលោក Putin ហើយករណីខ្លះកំពុងស្ថិតក្រោមការស៊ើបអង្កេតថែមទៀតផង។  ឥរិយាបថរបស់រដ្ឋបាលលោក Trump ក្នុងពេលបច្ចុប្បន្ន គឺជារឿងអៀនខ្មាស់។ កាលពីសប្តាហ៍មុន លោក Trump បានបដិសេធក្នុងការដាក់ទណ្ឌកម្មបន្ថែមទៀតប្រឆាំងនឹងលោក Putin។

សញ្ញាចុងក្រោយនៃការពាក់ព័ន្ធរបស់លោក Trump នេះ បានកើតមានឡើង បើទោះបីជា របាយការណ៍របស់ព្រឹទ្ធសភាអាមេរិកលើកឡើងអំពីការរិះគន់ចំពោះការគំរាមកំហែងដែលធ្វើឡើងដោយរុស្ស៊ីក៏ដោយ ក៏លោក Trump នៅតែបង្ហាញពីការមិនឆ្លើយតប “ដ៏ខ្ជះខ្ជាយ” នេះ។ ជាច្រើនឆ្នាំមកហើយ របាយការណ៍បាននិយាយថា “រដ្ឋាភិបាលរបស់លោក Putin បានចូលពាក់ព័ន្ធទៅនឹងការធ្វើសកម្មភាពលើលទ្ធិប្រជាធិបតេយ្យ និងនីតិរដ្ឋនៅអឺរ៉ុប និងនៅអាមេរិក។ វិមានក្រឹមឡាំងបានដាក់ពង្រាយកាំភ្លើងធំវាយប្រហារ រួមមានដូចជា ការឈ្លានពានដោយយោធា ការវាយប្រហារតាមប្រព័ន្ធអ៊ីនធឺណិត និងបញ្ចេញព័ត៌មានក្លែងក្លាយ ឬក៏ការគាំទ្រក្រុមនយោបាយជាដើម។”

ការមិនអើពើរបស់លោក Trump គឺមិនមែនជារឿងល្អទេ។ នាយករដ្ឋមន្រ្តីអង់គ្លេស លោកស្រី​ Theresa May បានរិះគន់លោក Putin កាលពីខែវិច្ឆិកា ថា បានជ្រៀតជ្រែកនៅក្នុងការបោះឆ្នោត និងការធ្វើប្រជាមតិរបស់អ្នកផ្សេង។ របាយការណ៍បន្ថែមទៀតថា “ប្រសិនបើអាមេរិកបរាជ័យក្នុងការធ្វើការងារបន្ទាន់នេះ ដើម្បីឆ្លើយតបទៅនឹងកំណើននៃការគំរាមកំហែងដ៏ស្មុគស្មាញនេះ របបរបស់លោក Putin…នឹងបន្តអភិវឌ្ឍន៍យុទ្ធសាស្រ្តរបស់ខ្លួននេះ ជ្រៀតជ្រែកលើរបបលទ្ធិប្រជាធិបតេយ្យនៅលើពិភព។” រួមទាំងការបោះឆ្នោតរបស់អាមេរិកនៅឆ្នាំ ២០១៨ នេះ។ មិនដែលមានទេពីមុននៅក្នុងប្រវត្តិសាស្ត្រអាមេរិច ច្បាស់ណាស់ការគំរាមកំហែងដល់សន្តិសុខជាតិត្រូវតែមានការអើពើពីប្រធានាធិបតីអាមេរិច៕”

(ប្រភព : The Guardian ចុះថ្ងៃទី១១ ខែកុម្ភៈ ឆ្នាំ២០១៨)