លោកស្រី Azalina៖ ច្បាប់ដើម្បីគ្រប់គ្រងព័ត៌មានក្លែងក្លាយសម្រាប់សន្តិសុខជាតិ

រដ្ឋមន្រ្តីទទួលបន្ទុកផ្នែកច្បាប់ម៉ាឡេស៊ីបាននិយាយនៅថ្ងៃនេះថា រដ្ឋាភិបាលកំពុងស្វែងរកដើម្បីដាក់អនុវត្តន៍ច្បាប់ថ្មីមួយ ដើម្បីប្រយុទ្ធប្រឆាំងនឹងព័ត៌មានក្លែងក្លាយ ដោយសារតែវាគំរាមកំហែងដល់សន្តិសុខជាតិ។ រដ្ឋមន្ត្រីនៅក្នុងនាយកដ្ឋានរបស់នាយករដ្ឋមន្រ្តីលោកស្រី Datuk Seri Azalina Othman Said បានពន្យល់ថា រដ្ឋាភិបាលកំពុងផ្តល់អាទិភាពចំពោះបញ្ហានេះ ពីព្រោះមានក្រុមអង្គការរៀបចំជាច្រើនបានកំពុងប៉ុនប៉ងបង្កឲ្យមានបាតុកម្ម និងការស្អប់ខ្ពើមទ្រង់ទ្រាយជាសកល ហើយប្រទេសម៉ាឡេស៊ីនឹងមិនទុកឲ្យរួចខ្លួនពីស្ថានភាពនេះទេ។

នេះគឺជាបញ្ហាសន្តិសុខជាតិសម្រាប់រដ្ឋាភិបាល។ ជាពិសេសនាយករដ្ឋមន្រ្តីកំពុងពិនិត្យមើលរឿងនេះដោយយកចិត្តទុកដាក់បំផុត។ លោកស្រីបានប្រាប់សន្និសីទសារព័ត៌មានមួយថា «យើងបារម្ភថា មានអង្គការរៀបចំមួយចំនួនព្យាយាមធ្វើឲ្យម៉ាឡេស៊ីអស្ថិរភាព ដែលត្រូវបានគេស្គាល់ថា ជាសង្គមចម្រុះជាតិសាស និងសាសនារបស់យើង»។ លោកស្រី Azalina បានច្រានចោលការលើកឡើងពីក្រុមអ្នករិះគន់ដែលបាននិយាយថា ច្បាប់​ថ្មីនេះនឹងជាឧបករណ៍មួយផ្សេងទៀតរបស់គណបក្ស Barisan Nasional (BN) ដែលកំពុងកាន់អំណាចដើម្បីបង្ក្រាបពួកអ្នកប្រឆាំង។

វាជារឿងអយុត្តិធម៌សម្រាប់ប្រជាជនដែលចោទប្រកាន់ BN ។ ដូចខ្ញុំបាននិយាយច្រើនដងហើយ ព័ត៌មានក្លែងក្លាយប៉ះពាល់ដល់សមាជិកគណបក្សប្រឆាំងផងដែរ។ ដូច្នេះនៅពេលដែលច្បាប់ត្រូវបានអនុវត្ត វានឹងការពារយើងទាំងអស់គ្នា។ លោកស្រីបាននិយាយថា ពេលវេលាបានផ្លាស់ប្តូរ។ មនុស្សម្នារធ្លាប់តែបញ្ជូន «គ្រឿងសព្វា​វុធបែបមីស៊ីល» ត្រឡប់ទៅវិញនៅពេលនោះ ប៉ុន្តែពេលនេះការវាយប្រហារអាចត្រូវបានផ្ទុះឡើង ដោយគ្រាន់តែចុចប៊ូតុងតែមួយប៉ុណ្ណោះ។ គ្រប់គ្នាសុទ្ធតែមានហានិភ័យ។

រដ្ឋមន្រ្តីទទួលបន្ទុកផ្នែកច្បាប់បាននិយាយថា សមាជិកគណបក្សប្រឆាំងមិនចាំបាច់ព្រួយបារម្ភចំពោះការចោទប្រកាន់ទេ ព្រោះពួកគេក៏ត្រូវបានគេពិគ្រោះយោបល់មុនការដាក់ច្បាប់ឲ្យអនុវត្តន៍ផងដែរ ដូចដែលបានចែងនៅក្នុងរដ្ឋធម្មនុញ្ញអញ្ចឹង។ «យើងកំពុងស្ថិតនៅក្នុងកិច្ចប្រជុំមួយដែលភាគីទាំងអស់ រាប់បញ្ចូលទាំងសមាជិករដ្ឋសភា មកពីរដ្ឋាភិបាលដែលកំពុងកាន់អំណាច និងគណបក្សប្រឆាំង។

លោកស្រីនិយាយសំដៅទៅលោក Lim Kit Siang មេដឹកនាំនៅក្នុងសភា DAP ថា «ប៉ុន្តែមិនចាំបាច់ឈានទៅពិភាក្សាដោយមានការវិនិច្ឆ័យជាមុនបែបទស្សនៈអវិជ្ជមាននោះទេ ដូចជាសមាជិក រដ្ឋសភាប្រចាំតំបន់ Gelang Patah ដែលចូលចិត្តចោទប្រកាន់រដ្ឋាភិបាលទៅលើកិច្ចការជាច្រើន»។ លោកស្រី Azalina បានថ្លែងថា លោកស្រីបានបើកកិច្ចប្រជុំបច្ចេកទេសលើកទី ២ នៅថ្ងៃនេះជាមួយតំណាងមកពីការិយាល័យអគ្គព្រះរាជអាជ្ញា ដើម្បីពិភាក្សាលើសេចក្តីព្រាងច្បាប់ថ្មីនេះ៕

(ប្រភព: The Malay mail online ចុះថ្ងៃទី១១ ខែកុម្ភៈ​ ឆ្នាំ២០១៨)