ស្ថាប័នកំពូលអង្គការសហប្រជាជាតិបានជួបប្រជុំមិនផ្សាយជាសាធារណៈ ដើម្បីពិភាក្សាគ្នាពីវិបត្តិដែលបង្កឡើងដោយសេចក្តីសម្រេចរបស់ប្រធានាធិបតី Abdulla Yameen ឱ្យចាប់ខ្លួនចៅក្រមមួយចំនួនដែលបានបញ្ជាឱ្យដោះលែងគូប្រជែងនយោបាយរបស់គាត់។
បើយោងតាមប្រភពព័ត៌មានរបស់អង្គការសហប្រជាជាតិបានឱ្យដឹងថា ជំនួយការអគ្គលេខាធិការអង្គការសហប្រជាជាតិ គឺលោក Miroslav Jenca បានប្រាប់ស្ថាប័នកំពូលអង្គការសហប្រជាជាតិថា ខណៈដែលពុំមានរបាយការណ៍នៃការប៉ះទង្គិចគ្នាដោយហិង្សានោះ ស្ថានភាពនៅក្នុងប្រទេស Maldives មានភាពតានតឹង និងអាចកាន់តែយ៉ាប់យ៉ឺនថែមទៀត។
នេះគឺជាលើកទី១ ហើយ ដែលក្រុមប្រឹក្សាសន្តិសុខបានពិភាក្សាគ្នាពីវិបត្តិនេះ ចាប់តាំងពីវាបានចាប់ផ្តើមកាលពីថ្ងៃទី១ ខែកុម្ភៈ ប៉ុន្តែពុំមានសេចក្តីថ្លែងការណ៍ចេញផ្សាយទេ បន្ទាប់ពីកិច្ចប្រជុំរួចមក។
វិបត្តិនេះត្រូវបានបង្កឡើងដោយសេចក្តីសម្រេចចិត្តដ៏គួរឱ្យភ្ញាក់ផ្អើលរបស់តុលាការកំពូល ដែលបានដោះលែងអតីតប្រធានាធិបតី និងមេដឹកនាំបក្សប្រឆាំង លោក Mohamed Nasheed និងអ្នកទោសនយោបាយ៨ ទៀតចេញពីពន្ធនាគារ។
លោក Nasheed បាននិរទេសខ្លួនទៅក្រៅប្រទេស បន្ទាប់ពីចេញដំណើរពីពន្ធនាគារនៅលើកោះនេះ។
អស់រយៈ៤ ថ្ងៃ បន្ទាប់ពីដីការរបស់តុលាការ លោក Yameen បានប្រកាសដាក់រដ្ឋក្នុងគ្រាអាសន្ន និងបានបញ្ជាឱ្យកងកម្លាំងសន្តិសុខរបស់គាត់ទៅកាន់តុលាការដើម្បីចាប់ខ្លួនរដ្ឋមន្រ្តីក្រសួងយុត្តិធម៌។
អគ្គលេខាធិការអង្គការសហប្រជាជាតិ លោក Antonio Guterres បានទាមទារឱ្យលោក Yameen ឈប់ការដាក់បម្រាមប្រទេសក្នុងគ្រាអាសន្ន ខណៈដែលប្រធានទទួលបន្ទុកផ្នែកសិទ្ធិមនុស្សអង្គការសហប្រជាជាតិ លោក Zeid Ra’ad Al Hussein បានរៀបរាប់ពីសកម្មភាពរបស់លោក Yameen ថា គឺជាការវាយប្រហារទាំងស្រុងទៅលើលទ្ធិប្រជាធិបតេយ្យ។
លោក Jenca កាលពីសប្តាហ៍នេះបាននិយាយតាមទូរសព្ទជាមួយនឹងរដ្ឋមន្រ្តីការបរទេស Maldives និងបានស្នើឱ្យគាត់ដោះលែងរដ្ឋមន្រ្តីក្រសួងយុត្តិធម៌ជាបន្ទាន់។
លោក Jenca បាននិយាយថា រដ្ឋាភិបាលត្រូវតែដោះស្រាយវិបត្តិនយោបាយតាមរយៈការចរចាជាមួយនឹងគ្រប់ភាគីទាំងអស់ និងផ្តល់ឱ្យមានជំនួយពីអង្គការសហប្រជាជាតិដើម្បីសម្របសម្រួលនូវកិច្ចពិភាក្សាទាំងនោះ។
កាលពីថ្ងៃព្រហស្បតិ៍ លោក Jenca បានបដិសេធក្នុងការជួបជាមួយនឹងបណ្តាអ្នកការទូតមកពីសហភាពអឺរ៉ុប អាល្លឺម៉ង់ និងចក្រភពអង់គ្លេស។
រដ្ឋាភិបាលសឹង្ហបូរីកាលពីដើមសប្តាហ៍នេះ បានចេញសេចក្តីណែនាំអំពីការធ្វើដំណើរ ដោយជំរុញឱ្យជនជាតិសឹង្ហបូរីជៀសវាងនូវការធ្វើដំណើរដែលមិនចាំបាច់ទៅកាន់ប្រទេស Maldives។
បណ្តារដ្ឋាភិបាលប្រទេសលោកខាងលិច ព្រមជាមួយនឹងប្រទេសជិតខាងដូចជា ឥណ្ឌា និងចិន បានស្នើឱ្យប្រជាពលរដ្ឋរបស់ខ្លួនកុំឱ្យទៅកាន់ប្រទេស Maldives ប៉ុន្តែអាចទៅកាន់តំបន់ទាក់ទាញផ្សេងៗបាន៕
ប្រភព: AFP ចុះថ្ងៃទី១១ ខែកុម្ភៈ ឆ្នាំ២០១៨
No comments:
Post a Comment