ស​ម្តេចតេជោ ​ហ៊ុន សែន បានផ្ញើរសារសំ​ខាន់ៗជាច្រើនក្នុងពេលចែកសញ្ញាបត្រ​ដល់និស្សិត​សាកលវិទ្យាល័យ​ភូមិន្ទភ្នំពេញ (RUPP)

នៅព្រឹកថ្ងៃទី១៣ ខែមិថុនា ឆ្នាំ២០១៦នេះ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជា​ណាចក្រ​កម្ពុជាបានអញ្ជើញចែកសញ្ញាបត្រ​ដល់និស្សិត​សាកលវិទ្យាល័យ​ភូមិន្ទភ្នំពេញ (RUPP) នៅមជ្ឈមណ្ឌល​ពិព័រណ៍ និងសន្និបាតកោះពេជ្រ។សម្តេចតេជោ ហ៊ុន សែន បានមានប្រសាសន៍ថា វិស័យអប់រំត្រូវបានជ្រើសរើសមន្រ្តីក្របខណ្ឌច្រើនជាងគេក្នុងមួយឆ្នាំៗ គឺមានរហូតដល់ ៥ពាន់នាក់ ដើម្បីបំពេញតម្រូវការអប់រំនៅកម្ពុជា។សម្តេចតេជោ ហ៊ុន សែន  ក៏បានចូលរួមអបអរសាទរជាមួយនិស្សិតជ័យលាភីមកពីសាកលភូមិន្ទភ្នំពេញទាំងអស់។ សម្តេចតេជោ ហ៊ុន សែន បានមានប្រសាសន៍បន្តថា ការសម្រេចបានលទ្ធផលដ៏ជោគជ័យ គឺកើតចេញពីការខិតខំរបស់និស្សិតគ្រប់រូប រួមទាំងការជួយជ្រោមជ្រែងជំរុញពីក្រុមគ្រួសារផងដែរ។ សម្តេចតេជោ ហ៊ុន សែន ក៏បានរំលឹកជាថ្មីថា ការជោគជ័យលើចំណេះដឹងនេះ មិនអាចកើតមានតាមរយៈការចាក់ប្តូរឈាមនោះទេ គឺបានកើតចេញពីខិតខំប្រឹងប្រែងយ៉ាងពិតប្រាកដ។សម្តេចតេជោ ហ៊ុន សែន ក៏បានបន្តប្រកាសថា នៅមានយុវជន​មួយចំនួនកំពុងដើរផ្លូវខុស ដោយសារការសេពគ្រឿងញៀន ហើយរាជរដ្ឋាភិបាល កំពុងអូសទាញពួកគេឲ្យដើរមករកផ្លូវត្រូវវិញ។ ដើម្បីទាញយុវជនចេញពីបញ្ហាគ្រឿងញៀន សម្តេច ហ៊ុន សែន ក៏បានអំពាវនាវឲ្យចូលរួមទាំងអស់គ្នា ពោលគឺអាណាព្យាបាល ត្រូវតែចូលរួមអប់រំកូនចៅ និងអូសទាញពួកគេឲ្យចេញឆ្ងាយពីគ្រឿងញៀន។សម្តេច​តេជោ ហ៊ុន សែន ក៏បានបន្តទៀតថា រាជរដ្ឋាភិបាលខិតខំកសាង និងរក្សាសន្តិភាព ព្រមទាំងទាក់ទាញវិនិយោគ ដើម្បីផ្តល់ការងារជូនប្រជាពលរដ្ឋ ប៉ុន្តែយុវជនមួយចំនួន មិនខិតខំទាញយកប្រយោជន៍ពីការអភិវឌ្ឍរបស់ប្រទេសជាតិ បែរជាធ្វើឲ្យខ្លួនរងគ្រោះដោយសារគ្រឿងញៀន។

សម្តេចតេជោ ហ៊ុន សែន បានថ្លែងរិះគន់ទៅដល់មនុស្សម្នាក់នៅប្រទេសបារាំង ដែលបានបង្ហោះរូបភាពបង្ហាញពីទឹកភ្លៀងលិចរាជធានីភ្នំពេញ ខណៈដែលមិនព្រមបង្ហោះរូបភាពទឹកជន់លិចនៅទីក្រុងប៉ារីស។ សម្តេចតេជោ បានបញ្ជាក់ថា រឿងទឹកជន់លិចមិនមែនមានតែភ្នំពេញទេ នៅបាងកក នៅមេនីឡា នៅប៉ារីសក៏លិចដែរ។ សម្តេចតេជោ បញ្ជាក់ថា ការលិចនេះដោយសារលូរំដោះទឹកមិនទាន់ ហើយទឹកទន្លេ ក៏រំដោះមិនទាន់ដែរ ដោយសារចំណុះទឹកនៅលើទទួលមិនអស់ក៏ធ្វើឲ្យលិច។

បើទោះបីសម្តេចតេជោ ហ៊ុន សែន មិនបង្ហាញអ្នកបង្ហោះនោះក៏ដោយ តែត្រូវបានគេដឹងថា​ គឹលោក សម រង្ស៊ី ប្រធានគណបក្សសង្គ្រោះជាតិ បានបង្ហោះអំពីទឹកលិចទីក្រុងភ្នំពេញ ខណៈភ្លៀងកំពុងធ្លាក់ដោយសម រង្ស៊ី បានសរសេរថា ៖ «០៨ មិថុនា ២០១៦ នៅរសៀលនេះ មានភ្លៀងមួយមេធំធ្លាក់រយៈពេលប្រហែលកន្លះម៉ោង បានធ្វើអោយតំបន់មួយចំនួននៅរាជធានីភ្នំពេញ លិចលង់ ដែលបង្កការលំបាកដល់ជីវភាពរស់នៅ របស់បងប្អូនប្រជាពលរដ្ឋ នៅតំបន់មួយចំនួននោះ»។

សម្តេចតេជោ ហ៊ុន សែន បានហៅអ្នករិះគន់ថា មើលឃើញតែចំណុចអវិជ្ជមាន មិនព្រមមើលឃើញពីចំណុចវិជ្ជមាន របស់រាជរដ្ឋាភិបាល។ សម្តេចតេជោ បន្តថា បើខ្លាំងធ្វើឲ្យស្មើភាពគ្នា កុំបង្ហោះតែរូបភាពទឹកលិចបង្ហោះរូបអគារខ្ពស់ៗផង។

សម្តេចតេជោ ហ៊ុន សែន បានថ្លែងរំពឹងថា កម្ពស់ទឹកទន្លេមេគង្គនៅឆ្នាំនេះ មានចំនួនច្រើនតាមការព្យាករណ៍ របស់ក្រសួងធនធានទឹក ដែលនៅមុខវាំងមានកម្ពស់ប្រមាណ ៩,៥ម៉ែត្រ។

សម្តេចតេជោ ហ៊ុន សែន ក៏បានមានប្រសាសន៍ថា កម្ពុជា មិនដែលខ្លាចចិននោះទេ ហើយចិនក៏មិនដែលគំរាមកម្ពុជា ឬកំណត់ផ្លូវឲ្យកម្ពុជាដែរ កម្ពុជា មានអធិបតេយ្យភាពរបស់ខ្លួន។         សម្តេចតេជោ បានបញ្ជាក់ថា ចិន មិនដូចប្រទេសខ្លះគំរាមកាត់ផ្តាច់ជំនួយ សម្តេចបញ្ជាក់ថា ផ្តាច់ ក៏  ផ្តាច់ទៅ អ្នកដែលស្លាប់មុនគេ គឺអ្នកស៊ីប្រាក់ខែរបស់ប្រទេសទាំងអស់នេះ។ សម្តេចតេជោថា កុំមកគំរាមខ្មែរ។

​សម្តេចតេជោ ហ៊ុន សែន បានថ្លែងសារធ្ងន់ៗផ្ញើទៅកាន់អ្នកនយោបាយថា គ្មានការចរចាណាមួយរវាងគណបក្សប្រជាជនកម្ពុជា និងគណបក្សសង្រ្គោះជាតិ នាពេលខាងមុខនោះទេ ហើយបើមានក៏គ្មាន ការនិយាយពីរឿងពាក់ព័ន្ធការអនុវត្តនីតិវិធីរបស់តុលាការ ឬរឿងរបស់អ្នកជាប់គុកនោះឡើយ។ សម្តេចតេជោ ក៏បានប្រកាសផងដែរថា កុំឲ្យគំរាមធ្វើបាតុកម្ម គឺសម្តេចមិនលើកលែងនោះឡើយ។

សម្តេចតេជោ ហ៊ុន សែន​ ក៏បានបញ្ជាក់បន្តថា មេដឹកនាំ និងសកម្មជនគណបក្សសង្រ្គោះជាតិ គឺជាអ្នកបង្កើតរឿងចោទប្រកាន់ភរិយា និងកូនសម្តេច ជាស្រី និងកូន របស់មេដឹកនាំវៀតណាម ឡេ ឌឹកថូ។ សម្តេចតេជោថា សម្តេចមិនអាចទទួលយកបាននោះឡើយ ចំពោះការវាយប្រហារនេះ ហើយសម្តេចមិនអត់ឱនឲ្យនោះឡើយ។ សម្តេចតេជោ ហ៊ុន សែន បានយកការឈឺចាប់ដោយការប្រមាថនេះ ផ្ញើទៅកាន់លោក បាន គីមូន អគ្គលេខាធិការអង្គការសហប្រជាជាតិ និងមេដឹកនាំប្រទេសដទៃទៀត រួមទាំងអ្នកវិភាគផងដែរថា តើអាចទទួលយកបានដែរទេ បើទទួលការប្រមាថដូចសម្តេចបែបនេះ?

សម្តេចតេជោ ហ៊ុន សែន ក៏បានបញ្ជាក់ថា ការចារលើព្រះរាជសាររបស់ព្រះមហាក្សត្រ មិនមានអ្វីខុសនោះទេ ព្រោះក្នុងរដ្ឋធម្មនុញ្ញមិនបានហាមឃាត់ រឿងនេះឡើយ។ សម្តេចបានជំរុញឲ្យក្រុមបក្សប្រឆាំង ទៅសួរព្រះមហាក្សត្រ បើចង់ដឹងថា ការចារលើព្រះរាជសារត្រូវ ឬខុស?

សម្តេចតេជោ ហ៊ុន សែន ក៏បានថ្លែងបញ្ជាក់ថា បុគ្គល ឬ អ្នកនយោបាយដែលលធ្វើខុសត្រូវ ចេញមុខទទួលខុសត្រូវ មិនត្រូវបង្វែរជាបញ្ហារបស់បក្សនោះឡើយ៕

ក្រសួងការបរទេសកម្ពុជា ចេញសេចក្តី​ថ្លែងការណ៍ជុំវិញឯកសារ​មួយដែលអនុម័ត​ដោយសភាអឺរ៉ុប​ដែលផ្អែក​លើព័ត៌មានមិនពិត

យោងតាមសេចក្តីថ្លែងការណ៍របស់ក្រសួងការបរទេសកម្ពុជា ចុះថ្ងៃទី១២ ខែមិថុនា ឆ្នាំ២០១៦ បានឲ្យដឹងថា រាជរដ្ឋាភិបាលកម្ពុជា មានការភ្ញាក់ផ្អើល ក្រោយពីបានអានឯកសារ​មួយដែល​អនុម័តដោយសភាអឺរ៉ុបដែលផ្អែកលើព័ត៌មានមិនពិតជាច្រើន។ 

ក្រសួងការបរទេសបានបញ្ជាក់ថា តាមអ្វីដែលយើងបានសិក្សា ពីប្រទេសអភិវឌ្ឍន៍​ការវិនិច្ឆ័យ​ណាមួយ អាចធ្វើទៅបាន ត្រូវផ្អែកលើការពិតជាក់ស្តែង និងការស៊ើបអង្កេតយ៉ាងហ្មត់ចត់ មិន​មែនសំអាងលើប្រភពលំអៀង ពាក្យចចាមអារាម និងព័ត៌មានដែលមានលក្ខណៈ​បំភ័ន្តនយោ​បាយនោះឡើយ។​

ក្រសួងការបរទេស និងសហប្រតិបត្តិការអន្តរជាតិ ក៏បានជម្រាបជូនសមាជិកសភាអ៊ឺរ៉ុប អំពីការ​ពិត ដែល​​មិនអាចប្រកែកបានកន្លងមក។ ក្រសួងការបរទេស ក៏បានលើកអំពីលោក សម រង្ស៊ី ថា គាត់ជាបេក្ខជនតែម្នាក់គត់ដែលអង្គការសហប្រជាជាតិ ស្តីបន្ទោសចំពោះពាក្យ​សំដី​​រើសអើង ជាតិសាសន៍អំឡុងការបោះឆ្នោតកាលពីឆ្នាំ១៩៩៣ ដែលគាត់​ល្បីខាង​ប្រើ​ប្រាស់​ពាក្យសម្តី ដែលពោរពេញដោយការញុះញង់ និងស្អប់ខ្ពើមជាតិសាសន៍។ គាត់បាន​ប្រើ​ពាក្យ​ស្លោកដែល ខ្មែរក្រហមធ្លាប់តែប្រើដើម្បីសម្លាប់ប្រជាជនខ្មែរ ហើយពាក្យស្លោកនោះ បាន​នាំ​ឱ្យមានការ សម្លាប់គ្រួសារជនជាតិវៀតណាមនៅឆ្នាំ១៩៩៨ ដោយហ្វូងមនុស្សដែល​មាន​ការ​ខឹងសម្បារ។ គាត់បានញុះញង់ពលរដ្ឋសាមញ្ញឱ្យដកបង្គោលតម្រុយព្រំដែនអន្តរជាតិ ដែល​សកម្មភាពនេះ ពិតជាត្រូវបានថ្កោលទោសនៅក្នុងប្រទេសនៅអ៊ឺរ៉ុប។ គាត់ក៏ត្រូវបាន​គេ​ស្គាល់​​យ៉ាងច្បាស់ទាំង ក្នុងប្រទេសបារាំងនិងកម្ពុជា ចំពោះការបរិហាកេរ្តិ៍​គូបដិបក្ស​នយោ​បាយ​របស់ខ្លួន ជាសំនុំរឿង មួយដែលត្រូវបានបញ្ជាក់ថាជាការ​បរិហាកេរ្តិ៍ក្នុងតុលាការ​ប្រទេស​បារាំង។

ដោយឡែកពាក់ព័ន្ធនឹងបញ្ហាសមាជិកគណបក្សប្រឆាំងពីរនាក់ រួមមានសមាជិកព្រឹទ្ធសភា ហុង សុខហួរ និងសមាជិករដ្ឋសភា អ៊ុំ សំអាន ដែលស្ថិតក្រោមការមើលខុសត្រូវរបស់ប្រធាន បក្ស សម រង្ស៊ី ត្រូវបានចោទប្រកាន់ពីបទការក្លែងក្លាយ និងការញុះញង់ឱ្យមានហឹង្សា។ ជាតួ យ៉ាង ហុង សុខហួរ បានផ្សព្វផ្សាយ និងចែកចាយសន្ធិសញ្ញាក្លែងក្លាយរវាងកម្ពុជា និង​វៀត​ណាម ដោយគោលបំណងបង្ហាញថាមានការព្រមព្រៀងគ្នា រំលាយចោល​នូវព្រំដែនរវាង​ប្រ​ទេស​ទាំងពីរ។ ដោយឡែក អ៊ុំ សំអាន បានប្រើពាក្យសម្តីប្រទុសរាយដោយខុសឆ្គង និងដែល​ប្រកប​ដោយទោសឧក្រិដ្ឋ ប្រកបដោយការញុះញង់ឱ្យមានការស្អប់ខ្ពើម និងរើសអើងជាតិ​សាសន៍​​ក្នុងគោលបំណងកេងចំណេញនយោបាយ ហើយការញុះញង់ឱ្យមានហឹង្សាគឺជា ទោស​ឧក្រិដ្ឋតាមការកំណត់របស់ច្បាប់។

ចំពោះករណី កឹម សុខា ការសូកប៉ាន់សាក្សី ត្រូវបានថ្កោលទោសដោយបណ្តាប្រទេសប្រជា ធិបតេយ្យទាំងអស់ ពិសេសប្រទេសសមាជិកសហភាពអ៊ឺរ៉ុប។ ម្យ៉ាងវិញទៀត​ការបដិសេធមិន​ចូលខ្លួនមក បំភ្លឺក្នុងតុលាការ តាមការកោះហៅរបស់អយ្យការត្រូវផ្តន្ទាទោសនៅគ្រប់​ប្រទេស​ប្រជា​ធិបតេយ្យជាពិសេសនៅសហភាពអ៊ឺរ៉ុប។ នៅកម្ពុជាក៏ដូច្នេះដែរ។

ចំពោះអ្នកដែលពាក់ព័ន្ធក្នុងករណីរបស់ កឹម សុខា គឺសកម្មជនសិទ្ធិមនុស្សទាំង៥ យោងតាម​ក្រម​​ព្រហ្មទណ្ឌកម្ពុជាមាត្រា ៥៤៨ ពួកគេបានប្រព្រឹត្តបទឧក្រិដ្ឋដោយការសូកប៉ាន់សាក្សី។ សកម្ម​ជនសិទ្ធិមនុស្សទាំង៥ ត្រូវបានចោទប្រកាន់ស្របទៅតាមច្បាប់មិនមែនជាលទ្ធផលនៃ សេចក្តីសម្រេចបំពានច្បាប់នោះទេ។

ដោយឡែកចំពោះសេរីភាព នៃការបញ្ចេញមតិ រដ្ឋាភិបាលកម្ពុជា ពុំយល់ថាសេរីភាពនៃការ បញ្ជេញមតិមានន័យថា ជាសេរីភាពក្នុងការជេរប្រមាថ ឬការបញ្ចេញព័ត៌មានក្លែងក្លាយ ឬការ បរិហារនរណាម្នាក់នោះទេ។ សិទ្ធិនៃការបញ្ចេញមតិ ពុំមែនជាសិទ្ធិភូតកុហក ឬបង្ខូច​កេរ្តិ៍​ឈ្មោះ​នរណាម្នាក់ឡើយ។ នៅក្នុងប្រទេសលោកខាងលិចទាំងអស់ មានច្បាប់ដាក់ទណ្ឌកម្ម ចំពោះការប្រព្រឹត្តបែបនេះ ហើយនៅកម្ពុជាក៏ដូចគ្នាដែរ។

ក្រសួងការបរទេសកម្ពុជា ក៏បានបញ្ជាក់ថា ព្រះរាជាណាចក្រកម្ពុជាបច្ចុប្បន្ន មានអង្គការក្រៅ រដ្ឋាភិបាលជាតិ និងអន្តរជាតិចំនួន ៤,៦៣៧ ដែលមានអង្គការមួយចំនួនតាំងខ្លួនជាតំណាងឱ្យ សង្គមស៊ីវិល ដែលអួតអាងនិយាយក្នុងនាមប្រជាពលរដ្ឋទាំងមូលដោយគ្មានលក្ខណៈស្រប ច្បាប់ដ៏តិចតួចទាល់តែសោះ។ មានអង្គការមួយចំនួន នៅពីក្រោយសកម្មភាពមនុស្សធម៌ និង អភិវឌ្ឍន៍ តែតាមពិតបានជាប់ពាក់ព័ន្ធ នៅក្នុងសកម្មភាពនយោបាយក្រោមការឧបត្ថម្ភពី​ស្ថា​ប័ន​បរទេស។

ក្រសួងការបរទេស ក៏បានបញ្ជាក់ពីជំហររបស់កម្ពុជាថា ក្នុងឋានៈជារដ្ឋអធិបតេយ្យមួយ ព្រះរា ជាណាចក្រកម្ពុជា ពុំស្ថិតក្រោមអភិបាលកិច្ចរបស់ស្ថាប័នបរទេសឡើយ ហើយរាជរដ្ឋាភិបាល​ កម្ពុជា មិនទទួលយកការជ្រៀតជ្រែកចូលកិច្ចការផ្ទៃក្នុង និងប្រឆាំងនឹងការច្បិចយកតែវិធី​សាស្រ្តដែលមានលក្ខណៈរើសអើង នៅពេលលើកយកបញ្ហាសិទ្ធិមនុស្សមកពិភាក្សា ឬការ យកករណីមួយចំនួនធ្វើជារឿងនយោបាយដែលស្តែងឱ្យឃើញថា សភាអ៊ឺរ៉ុបកំពុងអនុវត្តស្តង់ ដាពីរ ខណៈដែលគេមើលឃើញជាទូទៅថានៅតាមបណ្តាប្រទេសអ៊ឺរ៉ុប ក៏មានការអនុវត្ត​ចំណាត់​​ការ​ដូចគ្នានេះដែរស្របតាមគោលការណ៍នីតិរដ្ឋ។

ក្រសួងការបរទេស និងសហប្រតិបត្តិការអន្តរជាតិ ក៏បានសម្តែងការសោកស្តាយ ដែលសភា អ៊ឺរ៉ុប​មិនបានវាយតម្លៃចំពោះកិច្ចការទាំងឡាយ ដែលរាជរដ្ឋាភិបាលកម្ពុជាបានប្រឹងប្រែងធ្វើ ដើម្បី​ទ្រទ្រង់នីតិរដ្ឋ និងថែរក្សាសន្តិភាព និងស្ថេរភាពដែលប្រជាជនកម្ពុជា ត្រូវការចាំបាច់ ដើម្បី​ភាពសុខដុម ឯកភាព និងវិបុលភាពជាតិ៕

សម្តេច​តេជោ​ ហ៊ុន​ សែន​ ព្រមាន​ថាមិន​លើកលែង​ឲ្យកា​រធ្វើ​បាតុកម្មរបស់​គណបក្សសង្រ្គោះ​ជាតិ ​

សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានថ្លែងព្រមានថា មិនលើកលែងឲ្យការ​ធ្វើបាតុកម្មរបស់ គណបក្សសង្រ្គោះជាតិនោះឡើយ ហើយសមត្ថកិច្ចនឹង​ចាត់វិធានការ ដើម្បី​រក្សាសន្តិសុខសណ្តាប់ធ្នាប់សង្គម។

ការព្រមានរបស់សម្តេចតេជោ ហ៊ុន សែន បានធ្វើឡើងបន្ទាប់ពីគណបក្សសង្រ្គោះជាតិ បាន​ប្រកាសធ្វើការជួបជុំ និងទទួលញត្តិរបស់អ្នកគំាទ្ររបស់ខ្លួន មកពីតាមបណ្តាខេត្តនានា​ ហើយ​នៅថ្ងៃទី១៤ ខែមិថុនា ឆ្នាំ២០១៦ នេះ ជាថ្ងៃដែលលោក កឹម សុខា ប្រធានស្តីទីគណបក្ស​សង្រ្គោះ​​ជាតិ ត្រូវតុលាការ កោះហៅឲ្យចូលខ្លួនទៅបំភ្លឺពីបទ «បដិសេធក្នុងការចូលខ្លួន» តាម​ការ​កោះហៅរបស់តំណាងអយ្យកាកន្លងមក។ ការកៀងគររបស់អ្នកគាំទ្រនេះ ត្រូវបានគេ​មើល​​ឃើញថា ជាចេតនារបស់គណបក្សប្រឆាំង ដើម្បីត្រៀមធ្វើការទប់ទល់​ ប្រសិនបើមាន​ការចាប់ខ្លួនលោក កឹម សុខា ពីកងកម្លាំងសមត្ថកិច្ច។

សម្តេចតេជោ ហ៊ុន សែន បានហៅការកៀងគរ អ្នកគាំទ្រមកធ្វើបាតុកម្មនេះថា ជាការ​ធ្វើ​បាតុ​កម្ម ដើម្បីការពាររឿងអាស្រូវផ្លូវភេទរបស់បុគ្គល។ សម្តេចតេជោ ក៏បានបញ្ជាក់​ថាគណ​បក្ស​​សង្រ្គោះ​​ជាតិធ្លាប់ បានដឹកនាំ ធ្វើមហាបាតុកម្មក្រោមលេស មិនទទួលស្គាល់លទ្ធផល​នៃ​ការ​បោះ​​ឆ្នោតឆ្នាំ២០១៣ ដើម្បីបានទទួលតំណែងអនុប្រធានទី១នៃរដ្ឋសភា។ ប៉ុន្តែលើកនេះ កុំ​សង្ឃឹម​ថាអាចគំរាមធ្វើបាតុកម្មដើម្បីការពាររឿងអាស្រូវសេ្នហាផ្ទាល់ខ្លួន នោះបានឡើយ។

សម្តេចតេជោ ហ៊ុន សែន បានថ្លែងបន្តទៀតថា រឿងរបស់ឯកឧត្តម កឹម សុខា គឺជារឿងបុគ្គល​តូចតាច មិនគួរយកបក្សទាំងមូលទៅពាក់ព័ន្ធនោះទេ គួរតែចូលទៅដោះស្រាយ តាម​ផ្លូវ​តុលាការ។

សូមរំលឹកផងដែរថា បញ្ហារបស់ឯកឧត្តម កឹម សុខា កាន់តែរីកធំឡើងៗ បន្ទាប់ពីរឿងអាស្រូវ ស្នេហាលួចលាក់រវាងឯកឧត្តម កឹម សុខា ជាមួយកញ្ញា ខុម ចាន់តារាទី ហៅស្រីមុំ ត្រូវបាន បែកធ្លាយ នៅតាម បណ្តាញសង្គមហ្វេសប៊ុក៕

សម្តេចតេជោ ហ៊ុន សែន បញ្ជាក់ជាថ្មីថា គ្មានការជួបចរចា រវាង CPP និង CNRP នោះឡើយ

សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានបញ្ជាក់ជាថ្មីម្តងទៀតថា គ្មានការជួប​ចរចា​ណាមួយរវាងគណបក្សប្រជាជនកម្ពុជា (CPP) និងគណបក្សសង្រ្គោះជាតិ (CNRP) នា​ពេលខាងមុខនេះឡើយ។ សម្តេចតេជោ បានបន្ថែមថា បើមានការជួបនិយាយគ្នា ក៏គ្មាន​ប្រធាន​​បទ​និយាយរឿងបុគ្គល ដែលប៉ះពាល់ដល់នីតិវិធីរបស់តុលាការ និងអ្នកជាប់ពន្ធនាគារ​នោះឡើយ។ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានថ្លែងដូចនេះនៅ​ក្នុង​ឱកាសអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតជ័យលាភី នៃសាកល​វិទ្យា​ល័យភូមិន្ទភ្នំពេញ នាព្រឹកថ្ងៃទី១៣ ខែមិថុនា ឆ្នាំ២០១៦នេះ នៅមជ្ឈមណ្ឌលកោះពេជ្យ។

សម្តេចតេជោ ហ៊ុន សែនបានថ្លែងបញ្ជាក់ថា សម្តេចនឹងមិនមានការចរចា​ណាមួយ​រវាង​គណ​បក្ស​ប្រជាជន និងគណបក្សសង្រ្គោះជាតិ នៅពេលខាងមុខនេះទេ ច្រកជួបជុំតែមួយគត់គឺ​សភា ប៉ុន្តែត្រូវបានសង្រ្គោះជាតិបោះបង់ចោលរួចទៅហើយ។ ប្រសិនបើមានការពិភាក្សា​ណា​មួយ​នាពេលខាងមុខ គណបក្សប្រជាជន មិនពិភាក្សាលើបញ្ហា ដែលស្ថិតក្នុងដែនសមត្ថកិច្ច​របស់​តុលាការ និងពួកអ្នកជាប់គុកនោះទេ»។

ការបញ្ជាក់របស់សម្តេចនាយករដ្ឋមន្រ្តី បានធ្វើឡើងឆ្លើយតបទៅនឹងការលើកឡើងរបស់​គណ​បក្សសង្រ្គោះជាតិថា នឹងមានការជួបចរចាគ្នារវាងគណបក្សប្រជាជនកម្ពុជា និងគណបក្ស​សង្រ្គោះ​ជាតិ ដើម្បីដោះស្រាយបញ្ហានយោបាយ ដែលរបៀបវារៈ នៃកិច្ចចរចានោះ ក៏មាន​រឿង​​​របស់លោក សម រង្ស៊ី និង លោក កឹម សុខា ជាប្រធាន និងអនុប្រធានគណបក្ស​សង្រ្គោះ​ជាតិ​ផងដែរ។

សម្តេចតេជោ ហ៊ុន សែន បានហៅសំណុំរឿងរបស់លោក សម រង្ស៊ី និង លោក កឹម សុខា ក៏​ដូចជាការជាប់ឃុំរបស់អ្នកតំណាងរាស្រ្ត និងសកម្មជនគណបក្សសង្រ្គោះជាតិដទៃទៀត ជា​ការ​​ប្រព្រឹត្តល្មើសទៅនឹងច្បាប់ ដូច្នេះគ្មានរឿងអ្វីដែលគណបក្សប្រជាជនកម្ពុជា ទៅ​ចរចានោះ​ឡើយហើយវាក៏មិនត្រូវប្រធានបទនោះដែរ។ សម្តេចតេជោ ហ៊ុន សែន ក៏បានបញ្ជាក់ទៀតថា កុំច្រឡំតួអង្គ គណបក្សនយោបាយ មិនអាចជាប់ពាក់ព័ន្ធសំណុំរឿងរបស់តុលាការនោះទេ៕