វិភាគអន្តរជាតិ៖ អ្វីទៅជាផែនការបន្ទាប់របស់រុស្ស៊ី នៅក្នុងសង្រ្គាមអ៊ុយក្រែន?

(ប៉ារីស)៖ រុស្ស៉ីត្រូវបានគេមើលឃើញថាហាក់ដូចជាបានបោះបង់ចោលគោលដៅដំបូងរបស់ខ្លួននៅក្នុងសង្រ្គាមអ៊ុយក្រែន នោះគឺវាយកាន់កាប់រដ្ឋធានីកៀវ និងផ្ដួលរំលំរដ្ឋាភិបាលលោក វ៉ូឡូឌីមៀ ហ្សេលេនស្គី។ ប៉ុន្តែដំណាលគ្នានឹងការសន្យាកាត់បន្ថយសកម្មភាពយោធាលើរដ្ឋធានីកៀវ កងទ័ពរុស្ស៊ីបានបង្វែរ ទិសដៅវាយប្រហារទៅកាន់តំបន់ភាគខាងកើត និងភាគខាងត្បូងនៃប្រទេសអ៊ុយក្រែន ដែលនេះអាចជាការចាប់ផ្ដើមផែនការ «B»។

នៅក្រោមផែនការ «B» នេះ រុស្ស៉ីអាចនឹងមានគោលដៅជាច្រើន ហើយអាចនឹងអូសបន្លាយសង្រ្គាមសព្វថ្ងៃ។ ដូច្នេះថាតើអ្វីទៅជាផែនការ B របស់រុស្ស៉ី?

* ជ័យជម្នះជានិមិត្តរូប

បើតាមលោក អាឡិចហ្សាន់ឌឺ ហ្គ្រីនបឺគ (Alexander Grinberg) ខណៈកំពុងគ្រប់គ្រងលើប្រព័ន្ធផ្សព្វផ្សាយនៅក្នុងស្រុក, លោក វ្ល៉ាឌីមៀ ពូទីន អាចនឹងចង់ បានរបាយការណ៍មួយពីជ័យជម្នះរបស់រុស្ស៉ី នៅអ៊ុយក្រែនឱ្យបានមុនថ្ងៃទី៩ ខែឧសភា ដែលជាថ្ងៃរុស្ស៉ីប្រារព្ធទិវាជ័យជម្នះរបស់ខ្លួនលើកងទ័ពណាហ្ស៊ី អាល្លឺម៉ង់ក្នុងសម័យសង្រ្គាមលោកលើកទី២។ រុស្ស៊ីក្នុងនាមជាមហាអំណាចមិនអាចចាញ់បានឡើយ ដូច្នេះលោក ពូទីន ត្រូវការជប់ជ័យជម្នះជានិមិត្តរូប មួយឡើង ដើម្បីយកមកប្រាប់ប្រជាជន និងឥសរ្សជននយោបាយរុស្ស៊ី។

* វាយយកទីក្រុងម៉ារីយូប៉ូល (MARIUPOL)

មន្ត្រីយោធាអាមេរិកបានឱ្យដឹងថារុស្ស៉ីបានដកកងទ័ពរបស់ខ្លួន ២ភាគ៣ ចេញពីតំបន់ជុំវិញរដ្ឋធានីកៀវ និងតំបន់មួយចំនួនទៀតនៅឯភាគខាងជើងនៃ ប្រទេសអ៊ុយក្រែន។ ប៉ុន្តែ ព្រមពេលជាមួយគ្នា កងទ័ពរុស្ស៉ីបាន និងកំពុងបង្កើនការឡោមព័ទ្ធលើទីក្រុងម៉ារីយូប៉ូល (Mariupol) អស់រយៈពេលជាច្រើន សប្ដាហ៍មកហើយ។ ក្រុមអ្នកជំនាញយោធាជាច្រើនបាននិយាយថាការវាយកាន់កាប់ទីក្រុងម៉ារីយូប៉ូល នឹងក្លាយជាការបោះជំហានមួយដ៏សំខាន់សម្រាប់រុស្ស៉ី ក្នុងការគ្រប់គ្រងតំបន់ភាគខាងកើតប្រទេសអ៊ុយក្រែនទាំងស្រុង ដូចដែលក្រសួងការពារជាតិរុស្ស៉ីបានប្រកាសថាកងទ័ពរបស់ខ្លួនបានប្ដូរយុទ្ធសាស្ត្រ

ទៅរំដោះតំបន់ភាគកើតដែលមានតំបន់ផ្ដាច់ខ្លួន២ គាំទ្រដោយរុស្ស៊ី។ តែដើម្បីរំដោះតំបន់ភាគខាងកើតអ៊ុយក្រែនទាំងស្រុង រុស្ស៊ីត្រូវតែយកម៉ារីយូប៉ូឱ្យបាន

ជាមុនសិន ព្រោះថាយកបានទីក្រុងមួយនេះមានន័យថារុស្ស៊ីអាចតភ្ជាប់ច្រករបៀងរវាងគ្រីមៀ និងតំបន់ដុនបាស់។

* វាយយកទឹកដីអ៊ុយក្រែនបន្ថែម

តំបន់ផ្ដាច់ខ្លួន២ នៅភាគខាងកើតអ៊ុយក្រែន គឺដូញ៉េត (Donetsk) និងលូហាន់ (Luhansk) ដែលត្រូវបានលោក ពូទីនទទួលស្គាល់ជារដ្ឋឯករាជ្យ មិនទាន់ អាចគ្រប់គ្រងតំបន់ភាគខាងកើត បានទាំងស្រុងនៅឡើយទេ។ វិមានក្រឹមឡាំង បានអះអាងជារឿយៗថាតំបន់ផ្ដាច់ខ្លួនទាំង២នេះគួរតែមានសិទ្ធិអំណាច រដ្ឋបាលពេញលេញ និងគ្រប់គ្រងទឹកដីតំបន់ភាគខាងកើត។ តួយ៉ាងសូម្បីតែ ក្រសួងការពារជាតិរុស្ស៉ីក៏បានប្រកាសដែរថាកងទ័ពរបស់ខ្លួនបានប្ដូរយុទ្ធសាស្ត្រ ដោយងាកទៅផ្ដោតលើការរំដោះតំបន់ភាគខាងកើតអ៊ុយក្រែនឱ្យបានទាំងស្រុង។

* កេងចំណេញពេលវេលា

ក្រុមអ្នកវិភាគយោធាបានកត់សម្គាល់ថាការជ្រើសរើសកងទ័ពថ្មីប្រចាំឆ្នាំរបស់រុស្ស៊ី បានចាប់ផ្ដើមធ្វើឡើងកាលពីថ្ងៃទី១ ខែមេសាកន្លងទៅនេះ ហើយខណៈ មូស្គូ អះអាងថានឹងមិនបញ្ជូនកងទ័ពដែលខ្លួនបានកែនបន្ថែមទៅកាន់អ៊ុយក្រែនក៏ដោយ ក៏កងទ័ពថ្មីអាចនឹងចូលសមរភូមិសង្រ្គាម នៅពេលពួកគេ ចុះកុងត្រា និងត្រូវបានបណ្ដុះបណ្ដាល។ ប៉ុន្តែ ការកេងចំណេញពេលវេលាដើម្បីកែនទ័ពថ្មី ឬការអូសបន្លាយសង្រ្គាមកាន់តែយូរ ក៏អាចបង្កការខាតបង់ធំដល់រុស្ស៊ីដែល កំពុងជាប់ទណ្ឌកម្មលោកខាងលិចផងដែរ។

* បំបែកបាក់លោកខាងលិច

ការអូសបន្លាយសង្រ្គាមកាន់តែយូរ វាអាចបង្កការខាតបង់ធំដល់រុស្ស៊ី។ តែនៅម្ខាងរុស្ស៊ីក៏អាចប្រើវាដើម្បីបំបែកបំបាក់សម្ព័ន្ធមិត្តលោកខាងលិចផងដែររវាង ប្រទេសដែលចង់ដាក់ទណ្ឌកម្មធ្ងន់ធ្ងរលើមូស្គូ និងប្រទេសដែលមានជំហរទន់ខ្សោយ ឬចង់ផ្សះផ្សាជាមួយរុស្ស៊ី។ ចូរកុំភ្លេចថាលោក ពូទីនកាលពីថ្ងៃចន្ទ ទី៤ ខែមេសានេះ បានផ្ញើសារអបអរសាទរភ្លាមៗទៅកាន់នាយករដ្ឋមន្ត្រីហុងគ្រី លោក វ៉ិចទ័រ អ័របាន (Viktor Orban) ដែលជាមិត្តដ៏ជិតសិ្នទ្ធបំផុតមួយរបស់ លោកនៅក្នុងសហភាពអឺរ៉ុប បន្ទាប់ពីគណបក្សរបស់លោក អ័របាន ទទួលបានជ័យជម្នះនៅក្នុងការបោះឆ្នោតសកល ដែលនឹងអនុញ្ញាតឱ្យលោកកាន់អំណាច ៤ អាណត្តិជាប់គ្នានៅហុងគ្រី។

មួយវិញទៀត សង្រ្គាមនៅអ៊ុយក្រែនបានបង្ហាញរួចទៅហើយថា ប្រទេសអឺរ៉ុប និងអាមេរិកនៅតែមានការខ្វែងគំនិតគ្នាក្នុងការចាត់វិធានការតឹងរ៉ឹងប្រឆាំង រុស្ស៊ី។ នៅពេលប្រធានាធិបតីអាមេរិក លោក ចូ បៃដិនបាននិយាយថាលោក ពូទីន មិនអាចបន្តកាន់អំណាចតទៅទៀតបាន, ហៅលោក ពូទីនថាជាឃាតក និងឧក្រិដ្ឋជនសង្រ្គាម, លោកប្រធានាធិបតីបារាំង ម៉ាក្រុង បែរជាប្រាប់លោក បៃដិនឱ្យប្រយ័ត្នសម្ដី ដោយអះអាងថាវេហារស័ព្ទបែបនេះមិនអាចជួយអ្វី បានឡើយ។

លើសពីនេះទៅទៀត, ទោះបីជាបានជំរុញឱ្យសហភាពអឺរ៉ុបដាក់ទណ្ឌកម្មបន្ថែមប្រឆាំងលើវិស័យប្រេង និងធ្យូងថ្មរបស់រុស្ស៊ី ប៉ុន្តែលោក ម៉ាក្រុងផ្ទាល់មិនបាន លើកឡើងពីបញ្ហាឧស្ម័ន ដែលអឺរ៉ុបនៅតែត្រូវការទិញពីរុស្ស៊ីនោះទេ៕

ប្រភព៖ AFP (ថ្ងៃអង្គារ ទី៦ ខែមេសា ឆ្នាំ២០២២)

ដោយៈ FreshNews

វីដេអូ បទវិភាគ៖ ករណីវិវាទការងារនៅក្រុមហ៊ុន NAGA WORLD និងការបន្តអូសបន្លាយធ្វើបាតុកម្មដោយក្រុមមេដឹកនាំសហជីព» !

 

វិភាគអន្តរជាតិ៖ របៀបដែលក្រុមហ៊ុនអាវុធអាមេរិក រកលុយពីសង្រ្គាម

(វ៉ាស៊ីនតោន)៖ សង្រ្គាមរវាងរុស្ស៊ី និងអ៊ុយក្រែនបានឈានចូលដល់ថ្ងៃទី៣៩ហើយ និងបានបណ្ដាលឱ្យមនុស្សរាប់ពាន់នាក់បាត់បង់ជីវិត រីឯ សេដ្ឋកិច្ចពិភពលោកកំពុងរង្គោះរង្គើរ ខណៈកិច្ចប្រឹងប្រែងការទូតបញ្ចប់សង្រ្គាមនេះហាក់មិនទាន់មានលទ្ធផលជាដុំភួននោះឡើយ។ ជាទូទៅ គេតែងតែនិយាយថា «គ្មាននរណាម្នាក់ឈ្នះនៅក្នុងសង្រ្គាមឡើយ»។ ប៉ុន្តែ មានឧស្សាហកម្មមួយដែលត្រូវបានគេដាក់ឈ្មោះឱ្យថា «ឧស្សាហកម្មមិនចេះជួបវិបត្តិ» នោះគឺឧស្សាហកម្មអាវុធ ដោយមិនថាពិភពលោកមានសង្រ្គាម ឬជួបវិបត្តិសេដ្ឋកិច្ចនោះទេ ការលក់អាវុធនៅតែមាន កំណើនជារៀងរាល់ឆ្នាំជានិច្ច។

មកទល់នឹងពេលនេះ អ្នកដែលគ្រប់គ្រងទីផ្សារអាវុធពិភលោក គឺសហរដ្ឋអាមេរិក ហើយបើតាមមជ្ឈដ្ឋានមួយចំនួន សង្រ្គាម ឬជម្លោះយោធា ឬក៏ ភាពតានតឹងខាងភូមិសាស្ត្រនយោបាយ គឺជា «ម៉ាស៊ីនបោះពុម្ភលុយ» សម្រាប់ក្រុមហ៊ុនផលិតអាវុធអាមេរិក។ បើតាមប្រព័ន្ធផ្សព្វផ្សាយអាមេរិក លោក ជែម ថៃក្លេត (James Taiclet) ជានាយកប្រតិបត្តិក្រុមហ៊ុនផលិតអាវុធអាមេរិក Lockheed Martin កាលពីខែមករាកន្លងទៅបាននិយាយថា ការប្រកួតប្រជែងរវាងមហាអំណាចធំៗ នឹងជំរុញឱ្យមានការបង្កើនកញ្ចប់ថវិកាយោធា ហើយនឹងនាំប្រាក់ចំណូលមកឱ្យក្រុមហ៊ុន។

តួយ៉ាង ភាគហ៊ុនរបស់ក្រុមហ៊ុនផលិតអាវុធអាមេរិកត្រូវបានគេរាយការណ៍បានកើនឡើងជាលំដាប់ ចាប់តាំងពីសង្រ្គាមរុស្ស៊ី-អ៊ុយក្រែន ផ្ទុះឡើងមក ដោយគិតមកទល់នឹងឆ្នាំ២០២២នេះ ភាគហ៊ុនក្រុមហ៊ុន Lockheed Martin បានកើនឡើងដល់ទៅ ២៥ភាគរយ។ ភ្លាមៗ ក្រោយសង្រ្គាមនៅអ៊ុយក្រែនផ្ទុះឡើងកាលពីថ្ងៃទី២៤ ខែកុម្ភៈ សហរដ្ឋអាមេរិកបានប្រកាសផ្ដល់ជំនួយយោធា ៣៥០លានដុល្លារឱ្យអ៊ុយក្រែន។ ក្រោយមកទៀត ថ្ងៃទី១២ ខែមីនា លោក ចូ បៃដិន បានផ្ដល់ជំនួយយោធា ២០០លានដុល្លារ និង៨០០លានដុល្លារបន្ថែមទៀត នៅថ្ងៃទី១៦ ខែមីនា ដល់ប្រទេស អ៊ុយក្រែន ដែលធ្វើឱ្យជំនួយយោធារបស់សហរដ្ឋអាមេរិកទៅកាន់អ៊ុយក្រែនកើនដល់ជាង ១.៣៥ពាន់លានដុល្លារ គិតចាប់តាំងពីខែកុម្ភៈមក។

លើសពីនេះទៅទៀត, នៅចំពោះមុខភាពតានតឹងភូមិសាស្ត្រនយោបាយ អាល្លឺម៉ង់ និងបណ្ដាប្រទេសអឺរ៉ុបដទៃបានប្រកាសជាបន្តបន្ទាប់ពីផែនការ បង្កើនកញ្ចប់ថវិកាយោធា ហើយចង់ ឬមិនចង់នេះនឹងជួយបង្កើតឱកាសកើបលុយដល់ក្រុមហ៊ុនអាវុធអាមេរិក។ ពោលគឺវាគ្មានអ្វីត្រូវសង្ស័យឡើយ សង្រ្គាមនៅអ៊ុយក្រែន នឹងជំរុញឱ្យបណ្ដាប្រទេសជាសមាជិក NATO ដែលមួយចំនួនប្រើប្រាស់អាវុធផលិតដោយសហរដ្ឋអាមេរិកបង្កើនកញ្ចប់ថវិកា យោធាក្នុងការទិញអាវុធមកពង្រឹងសមត្ថភាពការពារជាតិរបស់ពួកគេ។

កញ្ចប់ថវិកាយោធារបស់សហរដ្ឋអាមេរិក បានកើនឡើងរហូតក្នុងរយៈពេលជាង ២០ឆ្នាំមកនេះ ជាពិសេសនៅក្រោយការវាយប្រហារភេរវកម្ម ថ្ងៃទី១១ ខែកញ្ញា ឆ្នាំ២០០១ ហើយចាប់តាំងពីពេលនោះមក ជំនួញអាវុធនៅជុំវិញពិភពលោកក៏មានសន្ទុះខ្លាំងមករហូតដែរ។ ប៉ុន្តែ មានមនុស្សតិច ណាស់ដែលសួរថាតើនរណាខ្លះទទួលបានផលចំណេញពីរឿងទាំងនេះ? តើសង្រ្គាមប្រឆាំងភេរវកម្មជាង ២០ឆ្នាំមកបានផ្ដល់ផលចំណេញអ្វីខ្លះដល់ប្រជាជនអាហ្វហ្កានីស្ថាន អ៉ីរ៉ាក់ ឬក៏សហរដ្ឋអាមេរិក?

ចាប់តាំងពីសង្រ្គាមនៅក្នុងប្រទេសអាហ្វហ្កានីស្ថាននៅឆ្នាំ២០០១ រហូតដល់លោក ចូ បៃដិនប្រកាសបិទសង្រ្គាមកាលពីឆ្នាំ២០២១ ក្រោយតាលីបង់ ឡើងកាន់អំណាចជាថ្មី, មន្ទីរបញ្ចកោណនៃក្រសួងការពារជាតិអាមេរិកបានចំណាយច្រើនជាង ១៤ទ្រីលានដុល្លារ ហើយពីមួយភាគបី ដល់ពាក់កណ្ដាល នៃកញ្ចប់ថវិកាទាំងនោះ បានហូរចូលហោរប៉ាវក្រុមហ៊ុនផលិតអាវុធអាមេរិក។ នេះបើតាមរបាយការណ៍របស់វិទ្យាស្ថាន Watson សម្រាប់កិច្ចការអន្តរជាតិ និងសាធារណៈនៃសកលវិទ្យាល័យ Brown University។

គួរបញ្ជាក់ថា រាប់ចាប់ពីលេខរៀងពី១ ដល់ទី៥ ក្រុមហ៊ុនដែលលក់អាវុធដាច់ជាងគេបំផុតនៅលើពិភពលោក សុទ្ធតែជាក្រុមហ៊ុនអាមេរិកក្នុងនោះរួមមានក្រុមហ៊ុន Lockheed Martin, Boeing, General Dynamics, Raytheon និងក្រុមហ៊ុន Northrop Grumman។

* ទ្រឹស្តីគំរាមកំហែង

ក្រៅតែពីសង្រ្គាម និងភាពតានតឹងភូមិសាស្ត្រនយោបាយ, «ការបង្កើតទ្រឹស្តីគំរាមកំហែង» ឧទាហរណ៍ដូចជាលើកឡើងជារឿយៗថាចិន ឬរុស្ស៊ី បង្កការគំរាមកំហែងដល់សន្តិភាព និងសណ្ដាប់ធ្នាប់ពិភពលោក ក៏ជាមធ្យោបាយមួយដែលមន្ទីរបញ្ចកោណ និងក្រុមហ៊ុនអាវុធអាមេរិក បង្កើនចំណូលផងដែរ។ ដ្បិតពួកគេបានប្រាប់ប្រជាជនអាមេរិក និងពិភពលោកថាចិន រុស្ស៊ី កូរ៉េខាងជើង ឬអ៉ីរ៉ង់សុទ្ធតែបង្កការគំរាមកំហែងដល់ សន្តិសុខជាតិ និងផលប្រយោជន៍របស់សហរដ្ឋអាមេរិក។

ជាក់ស្ដែង នៅក្នុងរបាយការណ៍ 2022 National Defense Strategy មន្ទីរបញ្ចកោណបានលើកឡើងពីការព្រួយបារម្ភពីអំណាចយោធាចិន ហើយថា ការប្រជែងឥទ្ធិពលរវាងកំពូលមហាអំណាច២ នោះគឺចិន និងអាមេរិកជាការគំរាមកំហែងដ៏ធំដល់សន្តិសុខអាមេរិក និងសកលលោក។ នៅម្ខាង ទ្រឹស្ដីគំរាមកំហែងគឺជាយុទ្ធសាស្ត្រដែលអាមេរិកប្រើដើម្បីប្រមូលកម្លាំងសម្ព័ន្ធមិត្តខ្ទប់ការកើនឡើងឥទ្ធិពលចិន តែនៅម្ខាងអាមេរិកក៏ប្រើវាក្នុងការ បង្កើនចំណូលឧស្សហកម្មអាវុធរបស់ខ្លួនផងដែរ។

បើតាមរបាយការណ៍ចេញផ្សាយដោយ Project On Government Oversight (POGO) ដែលជាទីភ្នាក់ងារឃ្លាំមើលឯករាជ្យមួយមានមូលដ្ឋាន ក្នុងទីក្រុងវ៉ាស៊ីនតោន, មនុស្ស ៩នាក់ ក្នុងចំណោម ១២នាក់ ដែលជាសមាជិកគណៈកម្មាការយុទ្ធសាស្ត្រការពារជាតិអាមេរិក គឺមានទំនាក់ទំនង ដោយផ្ទាល់ និងដោយប្រយោលជាមួយក្រុមហ៊ុនផលិតអាវុធអាមេរិក៕

ប្រភព៖ Asiatimes (ថ្ងៃចន្ទ ទី៥ ខែមេសា ឆ្នាំ២០២២)

ដោយ៖ Fresh News