លោក ហ៊ុន សែន មានមោទនភាពយ៉ាងខ្លាំង ដែលបានរួមដំណើរជាមួយប្រជាពលរដ្ឋកម្ពុជា តាំងពីប្រទេសនៅជាគំនរផេះផង់

នៅព្រឹកថ្ងៃទី២៧ ខែកញ្ញា ឆ្នាំ២០១៧ នេះ លោកនាយករដ្ឋមន្រ្តី ហ៊ុន សែន បានថ្លែងថាលោក មានមោទនភាពខ្លាំងណាស់ ដែលបានរួមដំណើរជាមួយបងប្អូនប្រជាពលរដ្ឋកម្ពុជា តាំងពីប្រទេសនៅជាគំនរផេះផង់រហូតដល់មានអ្វីៗដូចសព្វថ្ងៃនេះ។ លោក បានថ្លែងដូចនេះក្នុងឱកាសអញ្ជើញជួបសំណេះសំណាលសួរសុខទុក្ខបងប្អូនកូនក្មួយកម្មករ កម្មការិនីជាង១ម៉ឺននាក់ មកពីរោងចក្រ តំបន់ចាក់អង្រែលើ ដែលពិធីនេះធ្វើឡើងនៅលើផ្លូវ៦០ម៉ែត្រ ខណ្ឌមានជ័យ រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានបញ្ជាក់ថា អ្វីៗដែលកម្ពុជា និងប្រជាពលរដ្ឋកម្ពុជាទាំងមូលមានសព្វថ្ងៃនេះ គឺដូចជាកូនបង្កើតរបស់លោកដែលលោកបានបង្កើតឡើងដោយផ្ទាល់។
លោកនាយករដ្ឋមន្ត្រីបញ្ជាក់ថា លោកបានធ្វើជារដ្ឋមន្រ្តីក្រសួងការបរទេស តាំងពីលោកមានអាយុជាង២៦ឆ្នាំមកម្ល៉េះ គឺតាំងពីទីក្រុងភ្នំពេញមានមនុស្ស៧០នាក់ បានរួមដំណើរជាមួយយាយតាឱពុកម្តាយរបស់ក្មួយៗរហូតដល់សព្វថ្ងៃនេះ។

ប្រមុខរាជរដ្ឋាភិបាលកម្ពុជា ក៏បានបញ្ជាក់ថា តម្រូវការអភិវឌ្ឍរីកចម្រើនសម្រាប់កម្ពុជា ក៏ដូចជាតម្រូវការសម្រាប់មនុស្សម្នាក់ៗផងដែរ គឺមិនចេះចប់នោះឡើយ ចង់បាននេះហើយ ចង់បាននោះ សំខាន់ឱ្យតែតម្រូវការទាំងនោះស្របច្បាប់។ លោកបន្តថា ប្រទេសកម្ពុជាយើងក៏មិននៅត្រឹមប៉ុណ្ណេះដែរ គឺនឹងត្រូវមានការអភិវឌ្ឍរីកចម្រើនទៅមុខជាបន្តទៀត៕

លោក ហ៊ុន សែន លើកឡើងជាថ្មីពីកត្តា៥យ៉ាងដើម្បីលើកកម្ពស់ការងារ និងជំរុញគោលនយោបាយឧស្សាហកម្មឱ្យកាន់តែល្អប្រសើរ!

នៅព្រឹកថ្ងៃទី២៧ ខែកញ្ញា ឆ្នាំ២០១៧ នេះ លោកនាយករដ្ឋមន្រ្តី ហ៊ុន សែន បានថ្លែងថាអ្វីដែលទទួលបានសព្វថ្ងៃនេះមិនមែនធ្លាក់ពីលើមេឃទេ ហើយក៏មិនមែនមកពីបក្សប្រឆាំងដែរ ពោលគឺកើតឡើងពីការខិតខំប្រឹងប្រែងរបស់រាជរដ្ឋាភិបាលដើម្បីលើកកម្ពស់ការងារ និងជំរុញគោលនយោបាយឧស្សាហកម្មឱ្យកាន់តែល្អប្រសើរ។ លោក បានថ្លែងដូចនេះក្នុងឱកាសអញ្ជើញជួបសំណេះសំណាលសួរសុខទុក្ខបងប្អូនកូនក្មួយកម្មករ កម្មការិនីជាង១ម៉ឺននាក់ មកពីរោងចក្រ តំបន់ចាក់អង្រែលើ ដែលពិធីនេះធ្វើឡើងនៅលើផ្លូវ៦០ម៉ែត្រ ខណ្ឌមានជ័យ រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានបញ្ជាក់ថា ចំណុចគន្លឹះ៥យ៉ាងដែលលោក លើកឡើងនោះ រួមមាន ទី១-ត្រូវរួមគ្នាថែរក្សាសន្តិភាព ស្ថិរភាព និងសុវត្ថិភាពសណ្តាប់ធ្នាប់សង្គមឱ្យបានល្អ ទី២- រួមគ្នារក្សាការងារចាស់ និងបង្កើតការងារថ្មីៗច្រើនថែមទៀតដោយធ្វើការពង្រីកនិងបង្កើនទីផ្សារបន្ថែម ទី៣- រួមគ្នាបង្កើនប្រាក់ចំណូលដោយការខិតខំបណ្តុះបណ្តាលចំណេះដឹងបន្ថែមដល់កម្មករ និងកុំឱ្យកម្មករភ័យខ្លាចពីការបាត់បង់ការងារ និងប្រាក់ចំណូល ទី៤- ផ្តល់របបគាំពារសន្តិសុខសង្គមដល់កម្មករ គឺចាប់ពីខែ មករា ២០១៨ តទៅ និយោជក (ម្ចាស់ក្រុមហ៊ុន) នឹងបង់ថ្លៃរបបសន្តិសុខសង្គម ១០០% ដល់កម្មករ គឺបងប្អូនអាចចំណេញ ថវិកា ៨,០០០៛ ទៅ ១២,០០០៛ ក្នុង១ខែ និងទី៥- ផ្តល់កិច្ចគាំពារ និងយកចិត្តទុកដាក់ចំពោះកម្មករ កម្មការនីដែលធ្វើការនៅក្រៅប្រទេសតាមរយៈការគាំទ្រ និងជួយជ្រោមជ្រែងពីរាជរដ្ឋាភិបាល ក្នុងការធ្វើការទំនាក់ទំនងល្អជាមួយបណ្តាប្រទេសជាដៃគូដើម្បីផ្តល់ការងារដែលមានប្រាក់ចំណូលខ្ពស់ និងលក្ខខណ្ឌការងារល្អៗដល់ក្មួយៗកម្មករ។

លោកនាយករដ្ឋមន្រ្តី ហ៊ុន សែន ក៏បានសម្តែងនូវសេចក្តីសប្បាយរីករាយជាខ្លាំងដែលបានអញ្ជើញជួបជុំជាមួយបងប្អូនកូនក្មួយកម្មករ កម្មការនីទាំងអស់គ្នា ដើម្បីស្វែងយល់ពីតម្រូវការ និងបង្កើនប្រសិទ្ធភាពការងារឱ្យកាន់តែល្អប្រសើរឡើង ជាពិសេសដើម្បីជំរុញគោលនយោបាយឧស្សាហកម្ម ២០១៥-២០២៥ របស់រាជរដ្ឋាភិបាលកម្ពុជាឱ្យបានជោគជ័យ និងបានសម្តែងការជឿជាក់ថា កម្មករ កម្មការិនីទាំងអស់ពិតជាបន្តគាំទ្រគោលនយោបាយរបស់រាជរដ្ឋាភិបាលកម្ពុជា៕

លោក ហ៊ុន សែន ស្នើឱ្យឯកអគ្គរដ្ឋទូតអាមេរិក គិតគូរទៅលើគ្រាប់បែកគីមី របស់អាមេរិកដែលរកឃើញនៅខេត្តស្វាយរៀង

នៅព្រឹកថ្ងៃទី២៧ ខែកញ្ញា ឆ្នាំ២០១៧ នេះ លោកនាយករដ្ឋមន្រ្តី ហ៊ុន សែន បានលើកឡើងជាសំណូមពរទៅលោក ឯកអគ្គរដ្ឋទូតអាមេរិកប្រចាំនៅកម្ពុជាថាគួរទៅពិនិត្យមើលគ្រាប់បែកគីមី ដែលត្រូវបានរកឃើញនៅខេត្តស្វាយរៀងផង។ លោក បានថ្លែងដូចនេះក្នុងឱកាសអញ្ជើញជួបសំណេះសំណាលសួរសុខទុក្ខបងប្អូនកូនក្មួយកម្មករ កម្មការិនីជាង១ម៉ឺននាក់ មកពីរោងចក្រ តំបន់ចាក់អង្រែលើ ដែលពិធីនេះធ្វើឡើងនៅលើផ្លូវ៦០ម៉ែត្រ ខណ្ឌមានជ័យ រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានបញ្ជាក់ថា កម្ពុជា បានទទួលបទពិសោធន៍គ្រប់គ្រាន់ហើយទៅលើសង្រ្គាមដែលបានបង្កដោយបរទេសនៅពីក្រោយខ្នង។ ជាក់ស្តែងគ្រាប់បែកគីមីដែលនៅសេសសល់នេះគឺជាសំណល់នៃសង្រ្គាមដែលអាមេរិកបានទម្លាក់គ្រាប់បែកជាច្រើននៅលើទឹកដីកម្ពុជា។

ប្រមុខរាជរដ្ឋាភិបាលកម្ពុជា ក៏បានបញ្ជាក់ថា អាមេរិកគួរតែផ្តល់លុយដើម្បីយកគ្រាប់បែកទាំងអស់នេះពីលើទឹកដីខ្មែរ ប្រសើរជាងមកទារលុយថ្លៃគ្រាប់បែកពីកម្ពុជានោះ។ ទូតអាមេរិក គួរផ្តោតការយកចិត្តទុកដាក់ទៅលើគ្រាប់បែកគីមីនៅខេត្តស្វាយរៀងនោះ ថាតើគួរធ្វើយ៉ាងណា? បើទុក មនុស្សមានការភ័យខ្លាច បើដុតបំផ្លាញនោះវាមានសារធាតុគីមីគ្រោះថ្នាក់ធ្វើឱ្យមនុស្សស្លាប់ និងកើតមេរោគផ្សេងៗ៕

លោកនាយករដ្ឋមន្រ្តី ហ៊ុន សែន លើកឡើងជាថ្មីថា អ្វីដែលទទួលបានសព្វថ្ងៃនេះមិនមែនធ្លាក់ពីលើមេឃទេហើយក៏មិនមែនមកពីបក្សប្រឆាំងដែរ

នៅព្រឹកថ្ងៃទី២៧ ខែកញ្ញា ឆ្នាំ២០១៧ នេះ លោកនាយករដ្ឋមន្រ្តី ហ៊ុន សែន បានថ្លែងថាអ្វីដែល​ទទួលបានសព្វថ្ងៃនេះមិនមែនធ្លាក់ពីលើមេឃទេ ហើយក៏មិនមែនមកពីបក្សប្រឆាំងដែរ  ។ លោក បានថ្លែងដូចនេះក្នុងឱកាសអញ្ជើញជួបសំណេះសំណាលសួរសុខទុក្ខបងប្អូនកូនក្មួយកម្មករ កម្មការិនីជាង១ម៉ឺននាក់ មកពីរោងចក្រ តំបន់ចាក់អង្រែលើ ដែលពិធីនេះធ្វើឡើងនៅលើផ្លូវ៦០ម៉ែត្រ ខណ្ឌមានជ័យ រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានបញ្ជាក់ថា សមិទ្ធផលដែលកម្ពុជា ទទួលបានសព្វថ្ងៃនេះ គឺកើតឡើងពីកិច្ចខិតខំប្រឹងប្រែងផ្ទាល់របស់កម្មករ កម្មការិនីផ្ទាល់ និងពីការខិតខំប្រឹងប្រែងរបស់រាជរដ្ឋាភិបាល ដែលទាំងអស់​នេះ​ពុំមែនធ្លាក់មកពីលើមេឃ ឬការសន្យាខ្យល់របស់បក្សប្រឆាំងនោះឡើយ។

លោកនាយករដ្ឋមន្រ្តី ក៏បានបញ្ជាក់ថា បច្ចុប្បន្នប្រទេសកម្ពុជា កំពុងតែមានការ​អភិវឌ្ឍ​ទៅ​មុខជាលំដាប់ ពីប្រទេសមានចំណូលទាប ក្លាយជាប្រទេស មានចំណូមមធ្យមកម្រិតទាប និងក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។ រាជរដ្ឋាភិបាល បានខិតខំប្រឹងប្រែងខ្លាំងណាស់តាមរយៈការសុំឱ្យបរទេសមកវិនិយោគនៅកម្ពុជា សុំឱ្យគេផ្តល់ជំនួយដល់កម្ពុជា សុំឱ្យបរទេសផ្តល់ជំនួយដល់កម្ពុជា និងគោលនយោបាយជួយសម្រួលពន្ធដារដល់វិនិយោគិនជាដើម។ ដោយឡែកសម្រាប់បក្សប្រឆាំងវិញ បែរជាប្រព្រឹត្តទង្វើផ្ទុយពីការខិតខំរបស់រាជរដ្ឋាភិបាលតាមរយៈការអំពាវនាវកុំបីគឺកុំឱ្យបរទេសមកវិនិយោគនៅកម្ពុជា កុំឱ្យបរទេសផ្តល់ជំនួយដល់កម្ពុជា កុំឱ្យបរទេសទិញទំនិញពីកម្ពុជាជាដើម ដែលទង្វើទាំងអស់នេះគឺជាការសម្លាប់ជីវិតកម្មករ កម្មការិនីខ្មែរយើង៕

នៅព្រឹកថ្ងៃនេះលោកនាយករដ្ឋមន្រ្តី ហ៊ុន សែន កំពុងជួបសំណេះសំណាលជាមួយកម្មករ កម្មការិនី ជាង១ម៉ឺននាក់ នៅផ្លូវ៦០ម៉ែត្រ

(ភ្នំពេញ)៖ នៅព្រឹកថ្ងៃទី២៧ ខែកញ្ញា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន កំពុងជួបសំណេះសំណាលជាមួយកម្មករ កម្មការិនីជាង១ម៉ឺននាក់ នៅលើផ្លូវ៦០ម៉ែត្រ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដែលមានកម្មករ កម្មការិនីចំនួនសរុបជាង១៣០០០នាក់ មកពីរោងចក្រចំនួន១៧ ដែលមានមូលដ្ឋាននៅក្នុងខណ្ឌមានជ័យ រាជធានីភ្នំពេញ។

សូមបញ្ជាក់ថា លោកនាយករដ្ឋមន្រ្តី ហ៊ុន សែន បាននិងកំពុងដាក់ចេញនូវយុទ្ធនាការចុះជួបសួរសុខទុក្ខកម្មករនៅតាមរោងចក្រ នៅទូទាំងប្រទេស ដោយកំណត់យកថ្ងៃពុធ ជួបកម្មករ តាមរោងចក្រ និងកំណត់យកថ្ងៃអាទិត្យ ដើម្បីជួបកម្មករ នៅកោះពេជ្រ៕

ចាប់ពីថ្ងៃទី០១ ខែតុលា តទៅ ការឆ្លងកាត់ស្ពានជ្រោយចង្វារចាស់នឹងត្រូវបិទ​បណ្តោះ​អាសន្ន ដើម្បីធ្វើការ​ជួស​ជុល​ឡើង​វិញ

អង្គការ JICA របស់ជប៉ុន នៅថ្ងៃទី២៦ ខែកញ្ញា ឆ្នាំ២០១៧ បានប្រកាសជាថ្មីម្ដងទៀតថា ការឆ្លងកាត់ស្ពានមិត្តភាពកម្ពុជា-ជប៉ុន (ស្ពានជ្រោយចង្វារចាស់) នឹងត្រូវបិទជាបណ្តោះអាសន្ន ចាប់ពីថ្ងៃទី០១ ខែតុលា ឆ្នាំ២០១៧ខាងមុខនេះ ដើម្បីធ្វើការជួសជុលស្តារទ្បើងវិញ។

គម្រោងជួសជុលស្តារទ្បើងវិញនេះ ត្រូវបានគាំទ្រដោយហិរញ្ញប្បទានឥត សំណងរបស់រដ្ឋាភិបាលជប៉ុន ក្នុងទឹកប្រាក់ចំនួន ៣,៣៤៣ (បីពាន់បីរយសែសិបបី) លានយ៉េន ប្រមាណជា ៣៣ (សាមសិបបី) លានដុល្លារអាមេរិក។ ការជួសជុលស្តារទ្បើងវិញនៃស្ពាននេះ នឹងប្រើរយៈពេលប្រមាណជា (២១ខែ) រហូតដល់ ខែមិថុនា ឆ្នាំ២០១៩៕

ស្ត្រីមេម៉ាយ ជនពិការ និងអ្នកជំងឺ ក្រីក្រ ០៣ គ្រួសារ ទទួល​បាន​អំ​ណោយ​មនុស្ស​ធម៌ពី​កាក​បាទ​ក្រហម​ខេត្ត​រតនគិរី

រតនគិរី៖ នៅព្រឹកថ្ងៃទី ២៦ ខែកញ្ញា ឆ្នាំ២០១៧នេះ ក្រុមប្រតិបត្តិសាខា ដឹកនាំដោយ លោក ឌឹម ណាត នាយកសាខា កាកបាទក្រហមខេត្តរតនគិរី រួមដំណើរដោយក្រុមការងារ កាកបាទក្រហមសង្កាត់ឡាបានសៀក និងយុវជនកាកបាទក្រហម បានចុះសួរសុខទុក្ខ នាំយកអំណោយមនុស្សធម៌ ចែកជូនដល់ ប្រជាពលរដ្ឋជាស្ត្រីមេម៉ាយ ជនពិការ និងអ្នកជំងឺ ក្រីក្រ ០៣ គ្រួសារ (ស្ថិតនៅភូមិថ្មី ១ គ្រួសារ ភូមិអូរមៀត ១ គ្រួសារ ក្នុងសង្កាត់ឡាបានសៀក និងសម្រាកព្យាបាលក្នុងមន្ទីរពេទ្យបង្អែកខេត្តរតនគិរី ០១ គ្រួសារ)។

ក្នុងឱកាសនោះដែរ លោកនាយកសាខា បានពាំនាំមកនូវប្រសាសន៍ផ្ដាំផ្ញើសាកសួរសុខទុក្ខ ពីសំណាក់ប្រធានកាកបាទក្រហមកម្ពុជា លោកស្រី ប៊ុន រ៉ានី ហ៊ុនសែន និង លោក ថង សាវុន ប្រធានគណៈកម្មាធិការសាខា ដែលជានិច្ចកាលតែងតែគិតគូរសុខទុក្ខបងប្អូនប្រជាពលរដ្ឋក្រីក្រ ដែលមានទុក្ខលំបាក ជនរងគ្រោះ ជនងាយរងគ្រោះ ជានិច្ច ស្របតាមប្រធានបទ « កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា»។

អំណោយដែលបានផ្ដល់ជូនក្នុង១ គ្រួសារទទួលបាន ៖ អង្ករ ៣០គីឡូក្រាម មី ១កេស ត្រីខ ១យួរ ទឹកស៊ីអ៊ីវ ១យួរ មុង ១ ភួយ១ សារុង ១ ក្រមា១ ទឹកដោះគោឆៅសម្រាប់អ្នកជំងឺ ២យួរ និងថវិកា មួយចំនួនផងដែរ៕

រកឃើញកូនត្រយ៉ងយក្សដែលជាប្រភេទសត្វ​ជិត​ផុត​ពូជ​បំផុត​ចំនួន ០២ក្បាល​នៅ​ក្នុង​ដែន​ជម្រក​សត្វ​ព្រៃកែវសីមា

យោងតាមសេចក្តីប្រកាសព័ត៌មាន ចេញផ្សាយដោយអង្គការ WCS កាលពីថ្ងៃទី២៦ ខែកញ្ញា ឆ្នាំ២០១៧ ក្រុមអ្នកស្រាវជ្រាវរបស់ក្រសួងបរិស្ថាន និងអង្គការ WCS បានរកឃើញសំបុកសត្វត្រយ៉ងយក្សដែលមានកូនចំនួន០២ក្បាល ជាលើកដំបូងនៅក្នុងដែនជម្រកសត្វព្រៃកែវសីមាក្នុងខេត្តមណ្ឌលគីរី។ ការរកឃើញនេះ ធ្វើឱ្យដែនជម្រកសត្វព្រៃកែវសីមាក្លាយជាទីជម្រកពងកូនមួយក្នុងចំណោមទីជម្រកពងកូនសេសសល់តិចតួចសម្រាប់សត្វត្រយ៉ងយក្សនេះនៅកម្ពុជា។

ត្រយ៉ងយក្ស ជាសត្វស្លាបតំណាងឱ្យប្រទេសកម្ពុជា ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុតនៅលើសាកលលោក។ ពួកវារស់នៅតែក្នុងប្រទេសកម្ពុជា និងតិចតួចប៉ុណ្ណោះមានរស់នៅក្នុងប្រទេសឡាវ និងវៀតណាម។ សត្វត្រយ៉ងយក្សពេញវ័យត្រូវបានគេប៉ាន់ប្រមាណថាមានចំនួនតែ១៩៤ក្បាលប៉ុណ្ណោះនៅលើពិភពលោក ក្នុងនោះដែរប្រមាណ៩៩%នៃចំនួនរបស់ពួកវាមានវត្តមានរស់នៅក្នុងប្រទេសកម្ពុជា ដែលធ្វើឱ្យកម្ពុជាក្លាយជាប្រទេសដ៏សំខាន់បំផុតនៅលើសាកលលោកដើម្បីអភិរក្សប្រភេទសត្វដ៏កម្រនេះកុំឱ្យបាត់បង់។

លោក សូត្រ វ៉ាន់ឌឿន ប្រធានក្រុមត្រួតពិនិត្យ និងតាមដានសត្វព្រៃប្រចាំដែនជម្រកសត្វព្រៃកែវសីមា បាននិយាយថា៖ «បន្ទាប់ពីរកឃើញវត្តមានសត្វត្រយ៉ងយក្សចំនួន០៤ក្បាលកាលពីចុងខែសីហាកន្លងទៅនេះ ក្រុមស្រាវជ្រាវសត្វព្រៃនៅតែបន្តស្វែងរកវត្តមានសត្វត្រយ៉ងយក្សបន្ថែមទៀត និងសំបុកពងកូនរបស់ពួកវា ពីព្រោះយើងមើលឃើញថាដែនជម្រកសត្វព្រៃកែវសីមា គឺជាទីជម្រកធម្មជាតិដ៏ល្អបំផុតមួយសម្រាប់ការស្វែងរកចំណី និងការបន្តពូជរបស់សត្វត្រយ៉ងយក្ស។ ដូចដែលបានរំពឹងទុក យើងបានរកឃើញសំបុកត្រយ៉ងយក្សចំនួន០១សំបុកមានកូនតូចចំនួន០២ក្បាល។ ពួកវាមានសុខភាពល្អ និងកំពុងរស់នៅក្នុងទីតាំងមានសុវត្ថិភាព។ ពួកយើងពិតជាមានមោទភាពណាស់ចំពោះការរកឃើញនេះ ពីព្រោះយើងអាចបញ្ជាក់បានថាដែនជម្រកសត្វព្រៃកែវសីមា ក៏ជាទីជម្រកដ៏សំខាន់សម្រាប់ការពងកូនរបស់ត្រយ៉ងយក្សនៅកម្ពុជាផងដែរ។»
ដែនជម្រកសត្វព្រៃកែវសីមា មានសារៈសំខាន់ជាសាកលសម្រាប់ការអភិរក្សប្រភេទសត្វពានរ ដូចជាស្វាកន្ទុយស និងទោចថ្ពាល់លឿងដែលចំនួនរបស់ពួកវាច្រើនជាងគេបង្អស់មានរស់នៅក្នុងដែនជម្រក សត្វព្រៃនេះរួមទាំង ពពួកសត្វខ្លាព្រៃ ដំរីអាស៊ី ក្រុមគោសាទិស និងសត្វស្លាបជាច្រើនផ្សេងទៀត។ ប៉ុន្តែសត្វព្រៃទាំងអស់នោះកំពុងទទួលការគំរាមកំហែងពីការបរបាញ់ និងការបាត់បង់ទីជម្រកដែលទាមទារឲ្យមានការអភិរក្សបន្ថែមទៀតដើម្បីធានាដល់ការរស់នៅ និងទីជម្រកធម្មជាតិសម្រាប់ពួកវា។

លោក Olly Griffin ទីប្រឹក្សាបច្ចេកទេសផ្នែកស្រាវជ្រាវសត្វព្រៃរបស់អង្គការWCS បាននិយាយថា៖ «ការរកឃើញនេះ ឆ្លុះបញ្ចាំងម្តងទៀតអំពីសារៈសំខាន់នៃដែនជម្រកសត្វព្រៃកែវសីមាសម្រាប់អភិរក្សថនិកសត្វ និងសត្វស្លាបប្រភេទរងគ្រោះជាសាកល។ អង្គការ WCS និងក្រសួងបរិស្ថាន ទទួលបានជោគជ័យក្នុងការការពារសំបុកសត្វត្រយ៉ងយក្សនៅតំបន់ខ្ពង់រាបភាគខាងជើងប្រទេសកម្ពុជាក្នុងខេត្តព្រះវិហារ ហើយនឹងធ្វើឱ្យជោគជ័យដូចគ្នានេះដែរនៅក្នុងដែនជម្រកសត្វព្រៃកែវសីមានេះ»៕

លោក Trump ចង់​បញ្ចៀស​សង្រ្គាម​នុយ​ក្លេ​អ៊ែរ​ជា​មួយ​នឹង​កូរ៉េ​ខាង​ជើង​

រដ្ឋ​មន្រ្តី​រត​នា​គារ​អា​មេ​រិក លោក Steve Mnuchin កាល​ពី​ថ្ងៃ​​អាទិត្យ​បាន​និយាយ​ថា ប្រ​ធា​នា​ធិប​តី Donald Trump ចង់​បញ្ចៀស​សង្រ្គាម​នុយ​ក្លេអ៊ែរ​ជា​មួយ​នឹង​កូរ៉េ​ខាង​ជើង​ ហើយ​ «​នឹងធ្វើ​អ្វីៗ​គ្រប់​បែប​យ៉ាង​ដែល​យើង​អាច​ធ្វើ​បាន» ដើម្បី​បញ្ចៀស​ជម្លោះ​នេះ។

លោក Mnuchin បាន​និយាយ​តាម​សារ​ព័ត៌​មាន ABC ថា «​ខ្ញុំ​អាច​ធានា​ចំពោះ​អ្នក​ថា អាទិ​ភាព​ទី​១​ របស់​ប្រ​ធា​នា​ធិប​តី គឺ​សុវត្ថិ​ភាព​របស់​ប្រ​ជា​ជន​អា​មេ​រិក និង​សម្ព័ន្ធ​មិត្ត​របស់​យើង។ ប្រ​ធា​នា​ធិប​តី​មិន​ចង់​ឱ្យ​មាន​សង្រ្គាម​នុយក្លេ​អ៊ែរ​​ទេ ហើយ​យើង​នឹង​ធ្វើ​អ្វីៗ​គ្រប់​បែប​យ៉ាង​ដែល​យើង​អាច​ធ្វើ​ឱ្យ​ប្រាកដ​ថា រឿង​នោះ​នឹង​មិន​កើត​ឡើង​ទេ»។

លោក Trump បាន​បង្កើន​ពាក្យ​សម្តី​ប្រ​ឆាំង​នឹង​កូរ៉េ​ខាងជើង​ម្តង​ទៀត​កាល​ពី​ចុង​សប្តាហ៍​ ដោយ​បានព្រ​មាន​រដ្ឋ​មន្រ្តី​ការ​បរ​ទេសរបស់​​ប្រ​ទេស​នេះថា គាត់ និង​មេ​ដឹក​នាំ Kim Jong Un «​នឹងនៅ​​មិន​បាន​យូរ​តទៅ​ទៀត​ទេ» នៅពេល​ដែល​ទី​ក្រុង​ព្យុង​យ៉ាង​វាយ​ប្រ​ហារ​យ៉ាង​គំហុក​លើ​សម្ព័ន្ធ​មិត្ត​របស់​អាមេ​រិក។

រដ្ឋ​មន្រ្តី​ការ​បរ​ទេស​កូរ៉េ​ខាង​ជើង លោក Ri Yong Ho បាន​ប្រាប់​មហា​សន្និ​បាត​អង្គ​ការ​សហ​ប្រ​ជា​ជាតិ​កាល​ពី​ថ្ងៃ​សៅរ៍​ថា ការ​វាយ​ប្រ​ហារ​លើ​អាមេ​រិក​ដី​គោក​ជា​មួយ​នឹង​រ៉ុក្កែត​របស់​ខ្លួន​ គឺ​ចៀស​មិន​រួច​ឡើយ បន្ទាប់​ពី​ «​ប្រ​ធានា​ធិប​តីបី​សាច» Trump បាន​ហៅ​មេ​ដឹក​នាំ​កូរ៉េ​ខាង​ជើង​ថា «​មនុស្ស​ចូល​ចិត្ត​រ៉ុក្កែត​» ស្ថិត​នៅ​ក្នុង​បេសកកម្ម​មួយ​ដែល​ធ្វើ​អត្ត​ឃាត​ខ្លួន។

លោក Trump បាន​និយាយ​តាម Twitter កាល​ពី​ល្ងាច​ថ្ងៃ​សៅរ៍​ថា «​ទើប​តែ​បាន​ឮ​រដ្ឋ​មន្រ្តី​ការ​បរ​ទេស​កូរ៉េ​ខាង​ជើង​និយាយ​នៅ​អង្គ​ការ​សហ​ប្រ​ជាជាតិ​ គាត់​បាន​បន្ទរ​តាម​មនុស្ស​ដែល​ចូល​ចិត្ត​រ៉ុក្កែត (Little Rocket Man) ថា ពួក​គេ​នឹង​មិន​នៅ​វែង​ឆ្ងាយ​ប៉ុន្មាន​ទេ»។

លោក Mnuchin កាល​ពី​ថ្ងៃ​អាទិត្យ​បាន​ព្យាយាម​និយាយ​សម្រាល​ស្ថាន​ការ​ណ៍​ចំពោះ​​ការ​លើក​ឡើង​របស់​លោក Trump។

គាត់​បាន​និយាយ​តាម​សារ​ព័ត៌​មាន ABC ថា «​ប្រ​ធា​នា​ធិប​តី​មិន​ចង់​ឱ្យ​មាន​សង្រ្គាម​នុយក្លេ​អ៊ែរ​​ទេ ហើយ​យើង​នឹង​ធ្វើ​អ្វីៗ​គ្រប់​បែប​យ៉ាង​ដែល​យើង​អាច​ធ្វើ​ឱ្យ​ប្រាកដ​ថា រឿង​នោះ​នឹង​មិន​កើត​ឡើង​ទេ»។ ម្យ៉ាង​វិញ​ទៀត ប្រ​ធា​នា​ធិប​តី​នឹង​ការ​ពារ​ប្រ​ជា​ជន​អា​មេ​រិក និង​សម្ព័ន្ធ​មិត្ត​របស់​យើង»។

ក្រុមអ្នក​វិ​ភាគ​បាន​និយាយ​ថា ការ​តម្លើង​កម្តៅ​ពាក្យ​សម្តី​ គឺ​កំពុង​តែ​បង្កើន​ហានិភ័យ​ដោយ​សារ​តែ​ការ​គិត​ខុស ដោយ​ភាគី​ម្ខាង ឬភាគី​ដទៃ​ដែល​អាច​ធ្វើ​ឱ្យ​មាន​ផល​វិ​បាក​កាន់​តែ​ធ្ងន់​ធ្ងរ។

ទូរ​ទស្សន៍​រដ្ឋ KRT របស់​កូរ៉េ​ខាង​ជើងបាន​ចាក់​ផ្សាយ​វីដេ​អូ​កាល​ពី​ថ្ងៃ​អាទិត្យ ដោយ​បង្ហាញ​ប្រ​ជា​ជន​រាប់​ពាន់​នាក់​ចូល​រួម​ប្រ​ឆាំង​នឹង​សម្ព័ន្ធ​មិត្ត​របស់​អា​មេ​រិកនៅ​ឯ​ទី​លាន​ Kim Il Sung ក្នុង​ទី​ក្រុង​ព្យុង​យ៉ាង។

ទីភ្នាក់​ងារ​ព័ត៌​មាន KCNA ផ្លូវ​ការ​របស់​កូរ៉េ​ខាង​ជើង​បាន​និយាយ​ថា ប្រ​ជា​ជន​ជាង ១០០.០០០ នាក់​បាន​ប្រ​មូល​ផ្តុំ​គ្នា​កាល​ពី​ថ្ងៃ​សៅរ៏ និង​បាន​ថ្លែង​សុន្ទរ​កថា​គាំទ្រយោ​បល់​​របស់​លោក Kim កាល​ពី​ដើម​សប្តាហ៍​នេះ។

ទីភ្នាក់​ងារ​ព័ត៌​មាន KCNA បាន​ស្រង់​សម្តី​លោក Ri Il-bae ដែល​ជា​មេ​​បញ្ជាការនៃ​កង​ការ​ពារ​ពិ​សេសបាន​និយាយ​ថា «​យើង​កំពុង​តែ​រង់​ចាំ​ពេល​វេលា​ដែល​សម​ស្រប​ដើម្បី​ប្រ​យុទ្ធ​ចង់​ក្រោយ​ជា​មួយ​អា​មេ​រិក ដែល​ជា​ចក្រ​ភព​ដ៏​អាក្រក់​ និង​ដក​អា​មេ​រិក​ចេញ​ពី​ពិ​ភព​លោក។ នៅពេល​ដែល​អគ្គ​មេ​បញ្ជាការ​ Kim Jong Un ចេញ​បញ្ជា​ យើង​នឹង​បំផ្លាញ​ក្រុម​ពួក​ឈ្លាន​ពាន»៕

ប្រភព៖​ Reuters ចុះថ្ងៃទី២៥ ខែ​​​​​​កញ្ញា​​​ ឆ្នាំ២០១៧

(សូមទស្សនាវីដេអូ) លិខិតមិត្តអ្នកអាន៖ មហាអំណាចអាមេរិកមើល កឹម សុខា ខុសទទេ !

រឿងរ៉ាវវិដេអូឃ្លីបទី១ដែល កឹម សុខា សារភាពថាបានឃុបឃិតរៀបចំផែនការសម្ងាត់ ផ្តួលរំលំរដ្ឋាភិបាលស្របច្បាប់នៅកម្ពុជាមិនទាន់នឹងចប់ផង វិដេអូឃ្លីបខ្លីមួយទៀតដែល បង្ហាញថា មានបរទេសបានជួយរៀបចំគោលនយោបាយ និងកម្មវិធីនយោបាយ របស់ គណបក្សសង្គ្រោះជាតិ ត្រូវបានបង្ហោះ តាមបណ្តាញហ្វេសប៊ុក ដែលកាន់ តែដាក់បន្ទុក បន្ថែមទៀតទៅលើជនសង្ស័យ កឹម សុខា ដែលកំពុងតែជាប់ចោទពីបទសន្និដ្ឋិភាព ជាមួយ បរទេស។
នៅក្នុងវិដេអូឃ្លីបថ្មី កឹម សុខា បានថ្លែងចំពោះមុខអ្នកគាំទ្រខ្លួននៅប្រទេសអូស្ត្រាលីថា៖ «ឥឡូវនេះមានប្រទេសមហាអំណាចមួយខាងលទ្ធិប្រជាធិបតេយ្យ កំពុងជួយគណបក្ស សង្គ្រោះជាតិរៀបចំគោលនយោបាយ និងកម្មវិធីនយោបាយគណបក្ស ដើម្បីទៅដឹកនាំ ប្រទេស»។ តើបរទេសទាំងនោះបានជួយអ្វីខ្លះដល់កឹម សុខា ? យោងតាមច្បាប់ស្តី ពី គណបក្សនយោបាយ តើ កឹម សុខា និងគណបក្សសង្គ្រោះជាតិប្រឈមមុខនឹងអ្វីខ្លះ?

​វេទិកាការងារប្រចាំខែរបស់ក្រសួងការងារ និងបណ្តុះបណ្តាលវិជ្ជាជីវៈ ផ្តល់ឱកាសការងារ និងកម្មសិក្សាការងារដល់យុវជន (២៤៩)