ប្រធានរដ្ឋសភា លោក ហេង សំរិន អញ្ជើញបើកកិច្ចប្រជុំក្រុមប្រឹក្សាប្រតិបត្តិលើកទី១ របស់សភាតំបន់អាស៊ីនៅសណ្ឋាគារសុខាភ្នំពេញ

កិច្ចប្រជុំក្រុមប្រឹក្សាប្រតិបត្តិលើកទី១របស់សភាតំបន់អាស៊ី Asian Parliamentary Assembly (APA) បានបើកជាផ្លូវការហើយ នៅថ្ងៃទី០២ និងទី០៣ ខែតុលា ឆ្នាំ២០១៧ នៅសណ្ឋាគារសុខាភ្នំពេញនិងរ៉េស៊ីដង់។ ក្នុងកិច្ចប្រជុំប្រជុំនេះ កម្ពុជាគឺជាម្ចាស់ផ្ទះ ដែលប្រព្រឹត្តទៅក្រោមអធិបតីភាព លោក ហេង សំរិន ប្រធានរដ្ឋសភាកម្ពុជា និងជាប្រធានសភាតំបន់អាស៊ី Asian Parliamentary Assembly (APA) ដែលមានប្រទេសចំនួន២៧ចូលរួម។

កម្មវិធីនៃកិច្ចប្រជុំរួមមាន៖ ការថ្លែងសុន្ទរកថាស្វាគមន៍ដោយលោក ងួន ញ៉ិល អនុប្រធានទី២រដ្ឋសភា ប្រធានក្រុមរដ្ឋសភាជាតិកម្ពុជានៃសភាតំបន់អាស៊ី (APA) និងជាប្រធានគណៈកម្មការរៀបចំកិច្ចប្រជុំក្រុមប្រឹក្សាប្រតិបត្តិលើកទី១ នៃសភាតំបន់អាស៊ី Asian Parliamentary Assembly (APA), ការថ្លែងសុន្ទរកថា របស់លោក មហាម៉ាត រ៉េហ្សា ម៉ាជីឌី (Hon. Dr. Mohammad Reza Majidi) អគ្គលេខាធិការនៃអគ្គលេខាធិការដ្ឋានសភាតំបន់អាស៊ី (APA) និង ការអញ្ជើញថ្លែងសុន្ទរកថាបើកដោយ លោក ហេង សំរិន ប្រធានរដ្ឋសភាកម្ពុជា និងជាប្រធានសភាតំបន់អាស៊ី Asian Parliamentary Assembly (APA) ។

បន្ទាប់មក កិច្ចប្រជុំដែលដឹកនាំដោយលោក ងួន ញ៉ិល គឺបានប្រព្រឹត្តទៅ ដោយមានការពិភាក្សាគ្នាយ៉ាងសកម្ម និងផុលផុសទៅលើសេចក្តីព្រាងសេចក្តីសម្រេចចំនួន២៤ សម្រាប់យកទៅពិភាក្សា ក្នុងកិច្ចប្រជុំក្រុមប្រឹក្សាប្រតិបត្តិលើកទី២ ដែលធ្វើមុនមួយថ្ងៃ នៃមហាសន្និបាត APA លើកទី១០ នៅប្រទេសទួគី ដើម្បីដាក់ជូនមហាសន្និបាតពិភាក្សា និងអនុម័ត៕

លោក សុខ ឥសាន៖ បើគ្មានកំហុស មិនត្រូវសមត្ថកិច្ចចាប់ខ្លួនទេ

នៅថ្ងៃទី០៣ ខែតុលា ឆ្នាំ២០១៧នេះ លោក សុខ ឥសាន អ្នកនាំពាក្សគណបក្សប្រជាជកម្ពុជាបានបញ្ជាក់ថា ជាទូទៅជនជាប់ចោទមិនដែលសារភាពងាយៗចំពោះកំហុសរបស់ខ្លួនដែលបានប្រព្រឹត្តនោះទេ លុះត្រាតែសមត្ថកិច្ចមានភស្តុតាង ឯកសារ និងសាក្សីច្បាស់លាស់ណាស់ ដែលមិនអាចប្រកែកបាន ទើបនៅស្ងៀម មិនហ៊ានប្រកែកតទៅទៀត ។

លោក សុខ ឥសាន បានបន្តថា បញ្ហានេះក៏មិនខុសអីនឹងករណីលោក កឹម សុខា ដែរ ។ សំណុំរឿងនេះត្រូវបានបញ្ចេញជាសាធារណៈ ដោយសំដីខ្លួនឯងផ្ទាល់ ប្រកបដោយមោទនភាពខ្ពស់ណាស់ ដោយសារអាងលើមហាយក្សជាអ្នកប្រើឱ្យធ្វើតាមការចង្អុលបង្ហាញពីអ្នកឯកទេសខាងបដិវត្តន៍ពណ៌ ដែលជាសាស្ត្រាចារ្យល្បីឈ្មោះខាងផ្តួលរំលំរដ្ឋអំណាចបណ្តាប្រទេសស្របច្បាប់ដែលគេមិនពេញចិត្ត ។

លោក សុខ ឥសាន បានបន្តទៀតថា ប្រជាជនកម្ពុជាទូទាំងប្រទេស និងបងប្អូនខ្មែរនៅក្រៅប្រទេសសុទ្ធតែបានដឹង លឺ និងយល់បានថាពិតជាសម្លេងក្រអឺតក្រទមរបស់លោក កឹម សុខា យ៉ាងច្បាស់ក្រឡែត គ្មានការកាត់ត ការបន្លែបន្លំអ្វីទាល់តែសោះ ។ ដូច្នេះ រឿងនេះ មានពិរុទ្ធភាពធ្ងន់ធ្ងរ ទោះបីសាម៉ីជន ប្រកែកយ៉ាងណា ក៏នៅតែជាប់កុនដែរ មិនអាចរួចខ្លួនបានជាដាច់ខាត ។ លោក ក៏បានធ្វើការសន្និដ្ឋានថា បើគ្មានកំហុស បើមិនប្រព្រឹត្តបទល្មើសធ្ងន់ធ្ងរទេ នោះ សមត្ថកិច្ចមិនចាប់ខ្លួនទេ ៕

ខេត្តព្រះសីហនុ រៀបចំពិធីបិទសិក្ខាសាលា ស្តីពីតួនាទីយុវជន ដើម្បីក្លាយជាអ្នកដឹកនាំ

ព្រះសីហនុ៖ ខេត្តព្រះសីហនុ រៀបចំពិធីបិទសិក្ខាសាលា ស្តីពីតួនាទីយុវជន ដើម្បីក្លាយជាអ្នកដឹកនាំ នៅថ្ងៃទី ០២ ខែតុលា ឆ្នាំ២០១៧ ដែលរៀបចំដោយ អង្គការសហព័ន្ធសន្តិភាពសកល យូភីអេហ្វ (UPF) ក្រោមអធិបតីភាព លោក យន្ត មីន អភិបាលនៃគណៈអភិបាលខេត្តព្រះសីហនុ លោក អ៊ុក ដាមរី ទីប្រឹក្សាជាន់ខ្ពស់នៃរដ្ឋសភា និងទូតសន្តិភាពរបស់សហព័ន្ធ យូភីអេហ្វ លោក ហាជីមិ សៃតុ នាយកសហព័ន្ធ យូភីអេហ្វ ប្រចាំឥណ្ឌូចិន។

នាឱកាសនោះលោក យន្ត មីន អភិបាលខេត្តព្រះសីហនុ បានសំដែងនូវក្តីសោមនស្សរីករាយយ៉ាងខ្លាំង ដែលបានចូលរួមក្នុងពីធីបិទវគ្គសិក្ខាសាលា ក្រោមប្រធានបទ “តួនាទីយុវជន ដើម្បីក្លាយទៅជាអ្នកដឹកនាំ សម្រាប់ការកសាងគ្រួសារ សង្គម ប្រទេសជាតិ និងសន្តិភាព” ។ លើសពីនេះទៀត ក្រោយពីបញ្ចប់ពិធីបិទវគ្គ និងមានភ្ជាប់នូវកម្មវិធីជិះកង់បង្ហាញ ដើម្បីសន្តិភាព។

លោកអភិបាលខេត្តព្រះសីហនុ ក៏បានថ្លែងអំណរគុណយ៉ាងជ្រាលជ្រៅចំពោះ លោក អ៊ុក ដាមរី ទីប្រឹក្សាជាន់ខ្ពស់រដ្ឋសភា និងជាទូតសន្តិភាពសហព័ន្ធ យូភីអេហ្វ (UPF) រួមជាមួយលោកអនុរដ្ឋលេខាធិការ និងជាទីប្រឹក្សាសហព័ន្ធ យូភីអេហ្វ កម្ពុជាដែលបានបង្កើតនូវសិក្ខាសាលានេះឡើង ក្នុងន័យបង្ហាញឲ្យឃើញពីទំនាក់ទំនង និងសហប្រតិបត្តិការដ៏ល្អ រវាងរដ្ឋបាលខេត្តព្រះសីហនុ និងជាមួយអង្គការសហព័ន្ធសន្តិភាពសកល-កម្ពុជា ដែលបានផ្តោតទៅលើយុវជន ដែលនាពេលអនាគតនឹងក្លាយជាអ្នកដឹកនាំប្រកបដោយមនសិកាជាតិ ចំណេះដឹង សមត្ថភាព និងភាពអង់អាច៕

ក្រសួងការបរទេសកម្ពុជា បំភ្លឺករណី​នាវាដឹកអាវុធ​គ្រាប់រ៉ុកកែត​ ជាង៣ម៉ឺនដើម​នៅប្រទេសអេហ្ស៊ីប​ បំពាក់​ទង់ជាតិកម្ពុជា​

ភ្នំពេញ៖ ក្រសួងការបរទេសកម្ពុជា នៅថ្ងៃទី០២ ខែតុលា ឆ្នាំ២០១៧ បានចេញសេចក្តីបំភ្លឺបន្ទាប់ពីមានការចេញផ្សាយដោយសារព័ត៌មាន Washington Post របស់សហរដ្ឋអាមេរិកថា នាវាដ៏អាថ៌កំបាំងមួយបានធ្វើដំណើរឆ្ពោះទៅកាន់ព្រែកជីកស៊ុយអេ ហើយវាមានឈ្មោះថា ជី ស៊ុន (Jie Shun) ដោយមានដោតទង់ជាតិនៃប្រទេសកម្ពុជា ព្រមទាំងដឹកអាវុធជាប្រភេទកាំភ្លើងបាញ់គ្រាប់រ៉ុបកែតជាង៣០,០០០ដើម។

នៅយប់ថ្ងៃទី០២ ខែតុលា ឆ្នាំ២០១៧ ក្រសួងការបរទេសកម្ពុជា បានចេញសេចក្តីបំភ្លឺមួយដោយបញ្ជាក់ថា នាវាទាំងឡាយណា ដែលអះអាងថា ស្ថិតក្រោមទង់ជាតិកម្ពុជាក្រោយចុងខែសីហា ឆ្នាំ២០១៦ គឺជាត្រូវបានចាត់ទុកថាខុសច្បាប់ និងអាចត្រូវបានដាក់ទោសដោយច្បាប់ និងបទបញ្ញត្តិអន្តរជាតិ។

សេចក្តីបំភ្លឺរបស់ក្រសួងការបរទេសកម្ពុជា បានបញ្ជាក់ទៀតថា តាមរយៈកំណត់ទូត ចុះថ្ងៃទី១២ ខែមេសា ឆ្នាំ២០១៦ បានជូនដំណឹងដល់ស្ថានទូតនៃសាធារណៈរដ្ឋកូរ៉េនៅភ្នំពេញថា នាវាចំនួន៣គ្រឿង របស់ក្រុមហ៊ុនកូរ៉េខាងជើងមួយ បំពាក់ទង់ជាតិកម្ពុជា ត្រូវបានលុបចេញពីបញ្ជីដោយ ISROC ស្របតាមកថាខណ្ឌទី១៩ នៃសេចក្តីសម្រេចលេខ ២២៧០ ចុះថ្ងៃទី០២ ខែមីនា ឆ្នាំ២០១៦ របស់ក្រុមប្រឹក្សាសន្តិសុខអង្គការសហប្រជាជាតិ៕

(សូមទស្សនាវីដេអូ)៖ ទំហំពាណិជ្ជកម្មរវាងកម្ពុជា-ថៃ ឆ្នាំ២០១៧នេះ បានកើនឡើងជាង៥,០០០លានដុល្លារ

លោកនាយករដ្ឋមន្រ្តី ហ៊ុន សែន៖ ការបាញ់សម្លាប់នៅអាមេរិកជាសោកនាដកម្មដែលមនុស្សជាតិគ្រប់ទីកន្លែងរួមទាំងកម្ពុជាមិនត្រូវការឡើយ

(ភ្នំពេញ)៖ ចំពេលដែលសហរដ្ឋអាមេរិករងការបាញ់ប្រហារសម្លាប់មនុស្សរហូតដល់ជិត ៦០នាក់ និងរងរបួសជាង ៥០០នាក់នោះ លោកនាយករដ្ឋមន្រ្តី ហ៊ុន សែន បានចេញមករម្លឹកពី​សារៈសំខាន់បន្ថែមទៀតនៃសុខសន្តិភាពដែលកំពុងគ្របដណ្តប់លើផ្ទៃប្រទេសកម្ពុជា។ ប្រមុខរាជរដ្ឋាភិបាលកម្ពុជា ថែមទាំងបញ្ជាក់ទៀតថា ការបាញ់សម្លាប់នៅសហរដ្ឋអាមេរិកព្រមទាំងបញ្ហានានានៅមជ្ឈឹមបូព៌ាមិនមែនជាសេចក្តីត្រូវការរបស់មនុស្សជាតិព្រមទាំងពលរដ្ឋកម្ពុជាផងដែរ។

លោកនាយករដ្ឋមន្រ្តី ហ៊ុន សែន បានគូសបញ្ជាក់លើ Facebook នាព្រឹកថ្ងៃទី០៣ ខែតុលា ឆ្នាំ២០១៧នេះយ៉ាងដូច្នេះ «កម្ពុជាសន្តិភាព គឺពោរពេញទៅដោយឱកាសគ្រប់យ៉ាងរាល់នូវបញ្ហា និងវិបត្តិទាំងឡាយដែលកំពុងកើតឡើងនៅមជ្ឈឹមបូព៌ាព្រមទាំងបញ្ហាជនភៀសខ្លួន និងការបា​ញ់សម្លាប់មនុស្សនៅសហរដ្ឋអាមេរិកកាលពីម្សិលមិញ គឺជាសោកនាដកម្មដែល​មនុស្សជាតិគ្រប់​ទីកន្លែង រួមទាំងកម្ពុជាមិនត្រូវការឡើយ»។

លោកនាយករដ្ឋមន្រ្តី ហ៊ុន សែន ក៏បានថ្លែងអំណរគុណដល់ជនរួមជាតិ ដែលបានចូលរួមថែរក្សាការពារសន្តិភាព៕

ទំហំពាណិជ្ជកម្មរវាងកម្ពុជា-ថៃឆ្នាំ២០១៧នេះ បានកើនឡើងជាង៥,០០០លានដុល្លារ

លោកនាយករដ្ឋមន្រ្តី ហ៊ុន សែន បានបញ្ជាក់ថា ទំហំពាណិជ្ជកម្មទ្វេភាគីរវាងប្រទេសកម្ពុជា និងប្រទេសថៃឆ្នាំ២០១៧នេះ មានការកើនឡើងដល់ជាង៥,០០០លានដុល្លារ។ លោក បានថ្លែងដូចនេះ កាលពីរសៀលថ្ងៃទី ០២ ខែ តុលា ឆ្នាំ២០១៧ ក្នុងពេលជួបពិភាក្សាការងារជាមួយ លោក Pornpetch Wichitcholchai ប្រធានសភាថៃ នៅវិមានសន្តិភាព រាជធានីភ្នំពេញ ។
លោក Pornpetch Wichitcholchai បានមានប្រសាសន៍ថា ប្រវត្តិសាស្ត្ររបស់ប្រទេសទាំងពីរ កម្ពុជា-ថៃ មានជាយូរយារណាស់មកហើយ ហើយទំនាក់ទំនងនោះគឺជាទំនាក់ទំនងដ៏ល្អ ហើយថ្មីៗនេះទៀត តាមរយៈដំណើរទស្សនកិច្ចរបស់លោកនាយករដ្ឋមន្រ្តីថៃ ប្រាយុទ្ធ ចាន់អូចា បានធ្វើឱ្យទំនាក់ទំនងប្រទេសទាំងពីរកាន់តែរឹងមាំថែមទៀត។ លោក បន្តថានៅពេលនេះប្រទេសយើងទាំងពីរកំពុងតែពង្រឹង និងពង្រីកនូវការតភ្ជាប់គ្នាទាំងហេដ្ឋារចនាសម្ព័ន្ធផ្លូវថ្នល់ និងទំនាក់ទំនងការតភ្ជាប់ផ្លូវរថភ្លើង ក៏ដូចជាតភ្ជាប់រវាងប្រជាជន និងប្រជាជនផងដែរ ដើម្បីធ្វើយ៉ាងណាជំរុញកំណើនសេដ្ឋកិច្ច ពាណិជ្ជកម្មរវាងប្រទេសទាំងពីរឱ្យកាន់តែរឹងមាំថែមទៀត។ ដោយឡែកសភាទាំងពីរ របស់កម្ពុជា និងថៃគឺមានទំនាក់ទំនងផ្សារភ្ជាប់ស្អិតគ្នារមួតហើយធ្វើការទៅមករកគ្នាជាប្រចាំរាល់កិច្ចប្រជុំទាំងឡាយលើឆាកអន្តរជាតិ សភានៃប្រទេសទាំងពីរតែងតែធ្វើការពិភាក្សាគ្នាដែលនេះគឺបានឆ្លុះបញ្ចាំងទាំងទំនាក់ទំនងផ្នែកនីតិប្រតិបត្តិ និងនីតិបញ្ញាត្តិរវាងប្រទេសទាំងពីរ។
ជាការឆ្លើយតប លោកនាយករដ្ឋមន្រ្តី ហ៊ុន សែន បានឯកភាពជាមួយលោក Pornpetch Wichitcholchai អំពីទំនាក់ទំនងរវាងប្រទេសទាំងពីរកម្ពុជា-ថៃ។ លោក មានមោទនភាព និងមានជំនឿជឿជាក់យ៉ាងខ្លាំងចំពោះទំនាក់ទំនងសហប្រតិបត្តិការនឹងមានការរីកចម្រើនធំធាត់ និងកាន់តែរឹងមាំថែមទៀត។ តាមរយៈដំណើរទស្សនកិច្ចរបស់លោក ប្រាយុទ្ធ ចាន់អូចា កន្លងមកនេះគឺជាសក្ខីភាពឆ្លុះបញ្ចាំងនូវទំនាក់ទំនងសហប្រតិបត្តិការល្អនៃប្រទេសទាំងពីរ ហើយក៏បានឆ្លុះបញ្ចាំងពីជោគជ័យនៃកំណើនសេដ្ឋកិច្ច ពាណិជ្ជកម្មដែលកាលពីឆ្នាំ២០១៥ គឺទំហំពាណិជ្ជកម្មមានត្រឹមតែ៤,៣០០លានដុល្លារតែប៉ុណ្ណោះ តែឆ្នាំ២០១៧នេះ ទំហំពាណិជ្ជកម្មបានកើនឡើងជាង៥,០០០លានដុល្លារ។
ដោយឡែកទេសចរណ៍កម្ពុជាទៅកាន់ប្រទេសថៃ ក៏មានការកើនឡើងផងដែរ ហើយការរីកចម្រើនក៏បានឆ្លុះបញ្ចាំងឱ្យឃើញនូវការរៀបចំរបស់រដ្ឋាភិបាលនៃប្រទេសទាំងពីរ។ លោកនាយករដ្ឋមន្ត្រី ក៏បានសម្តែងនូវការគាំទ្រចំពោះទំនាក់ទំនងគ្នាទៅវិញទៅមករវាងសភានៃប្រទេសទាំងពីរ ហើយរដ្ឋាភិបាលក៏ដូច្នេះដែរគឺមានការប្រាស្រ័យទាក់ទងគ្នា និងដោះស្រាយរាល់បញ្ហានានាបានល្អ។ លោក ហ៊ុន សែន ក៏បានស្នើសុំឱ្យបន្តនូវអ្វីដែលបានធ្វើកន្លងមកនេះ ដែលជាផែនទីចង្អុលផ្លូវដូចមានចែងក្នុងផែនការរួមនៃកិច្ចប្រជុំគណៈរដ្ឋមន្ត្រីរួមកាលពីពេលថ្មីៗកន្លងមកនេះផងដែរ៕

ភ្លៀងលាយខ្យល់មួយមេធំបណ្តាលឲ្យដើមឈើតំបន់អង្គរដួលរលំជាច្រើនដើម

ភ្លៀងមួយមេធំរួមនឹងខ្យល់បក់បោកយ៉ាងខ្លាំង កាលពីរាត្រីថ្ងៃទី១ ខែតុលា ឆ្នាំ២០១៧ បានធ្វើឲ្យដើមឈើជាច្រើនដើម នៅក្នុងបរិវេណនៃរមណីយដ្ឋានដួលរលំ។ ពេលនេះ មន្ត្រីជំនាញ កំពុងរៀបចំកាត់សម្អាតចេញដើម្បីកុំឲ្យមានបញ្ហាស្ទះចរាចរ និងប៉ះពាល់ដល់រចនាសម្ព័ន្ធប្រាសាទថែមទៀត។

តាមរបាយការណ៍របស់នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា បញ្ជាក់ថា ដើមឈើដែលបានរលំដួលដោយភ្លៀងលាយខ្យល់នេះមាននៅ៥ទីតាំងសំខាន់ៗគឺ នៅប្រាសាទតាព្រហ្មបាក់ដើមត្រាង១ដើម ប្រាសាទព្រះខ័នបាក់ដើមស្រឡៅ១ដើម នៅប្រាសាទភិមានអាកាសបាក់ដើមស្ពង់១ដើម ខាងលិចប្រាសាទអង្គរវត្តរលំដើមចាមរី១ដើម និងក្នុងបរិវេណប្រាសាទអង្គរវត្តរលំដើមសង្កែ៥ដើម និងដើមក្ងោក១ដើម។

  ជាមួយគ្នានេះដែរ អាជ្ញាធរជាតិអប្សរាសូមអំពាវនាវដល់សាធារណជន និងភ្ញៀវទេសចរទាំងអស់ សូមមានការប្រុងប្រយ័ត្នខ្ពស់ក្នុងដំណើរកម្សាន្តរបស់ខ្លួន ជាពិសេស ពេលមានភ្លៀងធ្លាក់ខ្លាំង សូមនៅឲ្យឆ្ងាយពីដើមឈើធំៗ ដើម្បីការពារគ្រោះថ្នាក់ជាយថាហេតុណាមួយ។ ម្យ៉ាងទៀត សូមប្រជាពលរដ្ឋជួយផ្តល់ដំណឹងដល់ក្រុមការងារ ក្នុងករណីប្រទះឃើញដើមឈើដែលមានគ្រោះថ្នាក់ អាចបាក់ធ្លាក់ប៉ះពាល់ដល់សុត្ថិភាពរបស់ប្រជាពលរដ្ឋ និងភ្ញៀវទេសចរ ដើម្បីឲ្យក្រុមការងារអាចទៅកាត់ក្រីទាន់ពេលវេលាបាន៕

លិខិតប្រជាជនផ្ញើសារជូនជនក្បត់ជាតិម្នាក់នៅគុកត្រពាំងផ្លុង!

(ភ្នំពេញ)៖ ក្នុងសម័យសង្គមរាស្ត្រនិយមនៃសម្តេចព្រះនរោត្តម សីហនុ មាន«ជនក្បត់ជាតិ»ត្រូវបានសមត្ថកិច្ចចាប់ខ្លួនយកទៅបាញ់ចោលនៅត្រពាំងក្រឡឹង ខេត្តកំពង់ស្ពឺ។ ឥឡូវនេះជនក្បត់ជាតិជំនាន់ទី២ ត្រូវបានសមត្ថកិច្ចចាប់ខ្លួនតាមច្បាប់យកទៅឃុំនៅពន្ធនាគារត្រពាំងផ្លុង ខេត្តត្បូងឃ្មុំ។
«អំពើក្បត់ជាតិ» គឺមិនមែនជាសិទ្ធិសេរីភាពនោះទេ។ គ្មានប្រទេសណាមួយនៅលើពិភពលោកនេះ លើកតម្កើងជនក្បត់ជាតិនោះទេ។ ច្បាប់នៃប្រទេសខ្លះ ទោសក្បត់ជាតិបែបនេះ គឺត្រូវផ្តន្ទារទោសប្រហារជីវិតដោយព្យួរក ឬបាញ់ចោលតែម្តងហើយ កឹម សុខា ដែលជាប់គុកនៅត្រពាំងផ្លុងរង់ចាំការជំនុំជម្រះទោសតាមតុលាការហាក់ដូចជាមានឱកាសជាង «ព្រាប អ៊ិន ដែលត្រូវបានបញ្ជូនយកទៅបាញ់ចោលនៅត្រពាំងក្រឡឹង» កាលជំនាន់មុន។
សារជាតិនៃអំពើក្បត់ជាតិបានស្តែងចេញតាមរយៈវីដេអូរួចហើយ គឺដោយសារអំពើឆោតល្ងង់ខាងនយោបាយ និងចរិតអួតក្អេងក្អាងពើងទ្រូងយកមុខក្នុងគណបក្សរហូតភ្លេចខ្លួនទម្លាយចេញនូវផែនការទុច្ចរិតជាប្រព័ន្ធ។ «អណ្តាតជាអាទិ៍កន្លង បានសុខទុក្ខផងក៏ដោយសារអណ្តាត»។ ព្រះក៏លោកពិតជាបានផ្តល់យុត្តិធម៌ និងជួយប្រជាជនកម្ពុជាឲ្យរកឃើញ «ជនក្បត់ជាតិ» បានទាន់ពេលវេលា។
តបទៅនឹងភាពក្រអឺតក្រទមពីក្នុងគុក និងតបចំពោះសារ៣សន្លឹកដែលអ្នកដទៃជួយសរសេរឲ្យ យើងជាប្រជាជនកម្ពុជាសូមជូនសារ៣ចំណុចទៅវិញ ទៅកាន់ជនក្បត់ជាតិដែលកំពុងជាប់ឃុំនៅពន្ធនាគារត្រពាំងផ្លុង និងជនពាក់ព័ន្ធមួយក្រុមណានោះ៖
ទី១- ប្រជាជនបោះឆ្នោតឲ្យចូលទៅធ្វើការក្នុងរដ្ឋសភា ដើម្បីប្រើប្រាស់ពេលវេលាធ្វើកិច្ចការបម្រើផលប្រយោជន៍ជាតិ មិនមែនឲ្យទៅ«ធ្វើតាមបង្គាប់គ្រូបរទេសធ្វើបដិវត្តន៍ពណ៌ផ្តួលរំលំរដ្ឋាភិបាលស្របច្បាប់ តាមរបៀបនៅយូហ្គោស្លាវីនោះទេ»។ ប្រជាជនគ្រប់រូបប្រើសិទ្ធិបោះឆ្នោត តែមិនមែនមានន័យថា ប្រជាជនគាំទ្រអំពើក្បត់ជាតិរបស់អ្នកណាម្នាក់នោះទេ។ អ្នកណាក្បត់ជាតិ គឺអ្នកនោះទទួលខុសត្រូវចំពោះមុខច្បាប់ និងទទួលទោសតាមច្បាប់ដោយខ្លួនឯង។ ប្រជាជនកម្ពុជាទាំង១៥លាននាក់ ឬ៣លាននាក់ ឬ៣សែននាក់ ឬ៣០០នាក់ គឺមិនទទួលកំហុសជំនួស និងមិនទទួលទោសជាមួយជនក្បត់ជាតិណានោះទេ។ កុំយកប្រជាជនទៅពាក់ព័ន្ធបិទបាំងអំពើក្បត់ជាតិរបស់ខ្លួន។ សូមច្បាស់ចំណុចនេះ! ទោសអ្នកណា អ្នកនោះទទួល! នៅលើពិភពលោកនិងនៅកម្ពុជា គឺគ្មានច្បាប់ចែងពីការទទួលទោសជំនួសនោះទេ។
ទី២- សូមចងចាំឲ្យច្បាស់ថា បរទេសមានភាពឆ្លាតវៃក្នុងការប្រើមនុស្ស។ បើអ្នកណាមានប្រយោជន៍ចំពោះគេ គឺគេប្រើអ្នកនោះតទៅទៀត។ ក៏ប៉ុន្តែ ក្នុងករណីជនក្បត់ជាតិបែបនេះ ច្បាស់ណាស់ បរទេសគឺកំពុងរកវិធីគេចចេញពីការជាប់ពាក់ព័ន្ធ។ គេមិនភ្ជាប់ខ្លួននិងកិត្តិយសជាមួយជនចោលម្សៀតរបៀបនេះតទៅទៀតទេ។ ត្រូវយល់ឲ្យច្បាស់នូវពាក្យថា «ខូចការណ៍» និង «អត់ប្រយោជន៍» ដែលលែងមានតម្លៃនឹងប្រើប្រាស់តទៅទៀត។
ទី៣- ជនក្បត់ជាតិគ្មានតម្លៃអ្វីទាល់តែសោះនឹងផ្ញើសារគំរាមសមត្ថកិច្ច មកបំភ័ន្តរាជរដ្ឋាភិបាល ឬដាក់លក្ខខ័ណ្ឌចំពោះតុលាការ។ ផែនការបំផ្លាញជាតិ ដើម្បីដណ្តើមអំណាចតាមរយៈការធ្វើ «បដិវត្តន៍ពណ៌» គឺបរាជ័យហើយ។ ឧបាយកលពិសពុលជាន់ឈ្លីអធិបតេយ្យជាតិ ដើម្បីដណ្តើមអំណាចតាមរយៈការធ្វើបដិវត្តន៍ពណ៌ គឺបរាជ័យហើយ។ គំនិតទុច្ចរិតអំពាវនាវឲ្យគេវាយឆ្នាំងបាយកម្មករខ្មែរ ដើម្បីបំផ្លាញសេដ្ឋកិច្ចជាតិ ដើម្បីបង្កើតវិបត្តិសេដ្ឋកិច្ច គឺបរាជ័យហើយ។
សូមចងចាំពាក្យចុងក្រោយត្រឡប់ទៅវិញ៖ គុកមិនដាក់មនសិកាមនុស្សបានទេ តែគុកពិតជាអាចដាក់ជនក្បត់ជាតិឲ្យជាប់ទាំងមូលតែម្តង សូម្បីព្រលឹងនិងអំពើក្បត់ជាតិក៏ជាប់នៅក្នុងគុកនោះដែរ។ សូមចងចាំថា សូម្បីតែឱកាសនៃការបំផ្លាញជាតិដែលអ្នកបានគិតទុកលើឱកាសនៃការចង់សងសឹកតាមរបៀប «ទឹកឡើងត្រីស៊ីស្រមោច...» ក៏ត្រូវជាប់នៅក្នុងគុកជាមួយគ្នារហូតដល់ថ្ងៃចុងក្រោយរបស់អ្នកនោះដែរ។
ពិតណាស់ កម្ពុជាមិនយកមិត្តបរទេសឬអ្នកណាជាសត្រូវនោះទេ។ យើងត្រូវការមិត្តបរទេសមកជួយអភិវឌ្ឍន៍កម្ពុជាលើគ្រប់វិស័យ ក៏ប៉ុន្តែ កម្ពុជាមិនត្រូវការទទួលយកមនោគមន៍វិជ្ជាបរទេសដែលបំបែកបំបាក់ស្មារតីជាតិនិងបំផ្លាញកម្ពុជាជាថ្មីម្តងទៀតដូចមេរៀនជូចត់ក្នុងទសវត្សរ៍ឆ្នាំ១៩៧០នោះទេ។ ពិតណាស់ ផលប្រយោជន៍ជាតិធំធេងណាស់ ដែលមិនត្រូវបណ្តោយឲ្យក្រុមជនក្បត់ជាតិបំផ្លាញជាដាច់ខាត។ ពិតណាស់ ប្រទេសជាតិត្រូវតែបន្តរស់ដោយកិត្តិយស តែជនក្បត់ជាតិត្រូវតែទទួលទោសតាមផ្លូវច្បាប់។ ប្រជាធិបតេយ្យនៅក្នុងប្រទេសកម្ពុជានឹងកាន់តែមានសុខភាពល្អ នៅពេលសន្តិភាពដែលមានតម្លៃដ៏ពិសិដ្ឋ មិនត្រូវជនក្បត់ជាតិឆក់យកទៅបំផ្លាញចោលបាន។
ប្រជាជនកម្ពុជាមិនតក់ស្លុតក្នុងការថ្កោលទោសជនក្បត់ជាតិនោះទេ។ ទោះក្នុងតម្លៃណាក៏ដោយ យើងរួមគ្នាក្រោម «ស្មារតីនយោបាយជាតិនិយម» ការពារអធិបតេយ្យជាតិ ឯករាជ្យជាតិ និងសេរីភាពរបស់ប្រជាជាតិយើងប្រកបដោយភាពរឹងមាំនិងកិត្តិយសបំផុត!៕
ដោយ៖ សេនាជាតិ

លិខិតប្រជាជនកម្ពុជា៖ កន្លែងដែលអសន្តិសុខ គឺជាកន្លែងដែលសុវត្ថិភាពជាងគេ!

នៅពេលនេះគឺជាវេលាដ៏ឈឺចាប់និងសោកស្តាយជាទីបំផុតសម្រាប់ពិភពលោកទាំងមូលចំពោះការបាត់បង់ជីវិតមនុស្សជាង ៥៨ នាក់ របួស ៥២៧នាក់នៅក្នុងព្រឹត្តិការណ៍បាញ់ប្រហារដ៏យង់ឃ្នងមួយទៅលើក្រុមមហាជនដែលចូលរួមប្រគុំតន្ត្រីនៅឡាវេហ្គាស សហរដ្ឋអាមេរិក។ ទង់ជាតិអាមេរិកត្រូវបានបង្ហូតពាក់កណ្តាលដងដើម្បីជាការកាន់មរណៈទុក្ខចំពោះជនរងគ្រោះ។

យើងខ្ញុំជាប្រជាជនកម្ពុជាពិតជាមានការសោកស្តាយ និងសូមចូលរួមមរណទុក្ខជាមួយក្រុមគ្រួសារជនរងគ្រោះ និងសូមចែករំលែកក្តីឈឺចាប់ ចំពោះអ្នករងរបួសទាំងឡាយហើយក៏សូមថ្កោលទោសយ៉ាងដាច់អហង្ការចំពោះអំពើហិង្សាដ៏ព្រៃផ្សៃ អមនុស្សធម៌នេះ និងសូមឱ្យសមត្ថកិច្ចចាប់ជនបង្កនិងអ្នកនៅពីក្រោយខ្នងមកផ្តន្ទាទោសតាមច្បាប់ដើម្បីផ្តល់យុត្តិធម៌ជូនដល់ជនរងគ្រោះពីអំពើឧក្រិដ្ឋកម្មនេះ។ ព្រឹត្តិការណ៍បាញ់ប្រហារដ៏សាហាវ មិនដែលធ្លាប់មាននៅសហរដ្ឋអាមេរិកនេះហាក់ដូចជាបង្ហាញផ្ទុយពីអ្វីដែលឯកអគ្គរដ្ឋទូតសហរដ្ឋអាមេរិកប្រចាំកម្ពុជា William Heidt ថ្លែងថាសហរដ្ឋអាមេរិកមានសុខសុវត្ថិភាព និងបានអំពាវនាវឱ្យជនជាតិអាមេរិក ដែលមានបំណងមកទស្សនាប្រទេសកម្ពុជាត្រូវប្រុងប្រយ័ត្នខ្ពស់ចំពោះសុវត្ថិភាពផ្ទាល់់
ខ្លួន។ កាលប្រកាសនេះទំនងដោយទូតអាមេរិកប្រតិកម្មគ្មានហេតុផលដោយភាពអគតិ ចំពោះស្ថានភាពនៅកម្ពុជាក៏ព្រោះតែ កឹម សុខា កូនជឹងរបស់ខ្លួនដែលទទួលអនុវត្តន៍ផែនការសម្ងាត់បដិវត្តន៍ពណ៌ត្រូវបានចាប់ខ្លួនអំពីបទក្បត់ជាតិ ក្រោយពីបានសារភាពនៅ ចំពោះមុខអ្នកគាំទ្រខ្លួននៅប្រទេសអូស្ត្រាលីថាបានអនុវត្តន៍ផែនការផ្តួលរំលំរដ្ឋាភិបាល តាំងតែពីឆ្នាំ ១៩៩៣ មកម៉្លេះ ហើយមានអាមេរិកជាអ្នកគាំទ្រ។

តាមពិតកម្ពុជាជាប្រទេសដែលមានសន្តិភាពពេញលេញ និងមានសន្តិសុខល្អ និង ប្រជាពលរដ្ឋបានរស់នៅយ៉ាងសុខសាន្ត ប្រកបរបរចិញ្ចឹមជីវិតជាធម្មតា។ បងប្អូនប្រជាពលរដ្ឋបានធ្វើដំណើរឆ្លងកាត់ពីតំបន់មួយទៅតំបន់មួយប្រកបដោយសុខសុវត្ថិភាព និង កន្លែងកម្សាន្តនានា ត្រូវបានការពារសន្តិសុខបានយ៉ាងល្អ ពោលគឺមិនដូចអ្វីដែលឯកអគ្គរដ្ឋទូតអាមេរិកសម្អុយអំពីស្ថានភាពពិតនៅកម្ពុជា និងបំភ័យប្រជាជនខ្លួនឯងមិនឱ្យ មកទស្សនាស្រុកខ្មែរដោយសារតែកំហឹងបុគ្គលនោះឡើយ។ ប្រទេសដែលលោកទូតអា មេរិកស្រែកសម្អុយថាជាកន្លែងអសន្តិសុខ ប៉ុន្តែបែរជាមានសន្តិសុខល្អប្រពៃ ហើយប្រជាជនរួមនឹងភ្ញៀវទេសចរ និងជនជាតិអាមេរិកដែលស្នាក់អាស្រ័យនៅកម្ពុជាក៏ទទួល បាននូវសេចក្តីសុខសុវត្ថិភាពនេះដែរ។ ផ្ទុយមកវិញ ទឹកដីអាមេរិករបស់ William Heidt ឯណោះវិញទេដែលគួរឱ្យខ្លាចមិនចង់រស់នៅព្រោះពោរពេញដោយការប្រើប្រាស់កាំភ្លើងខុសច្បាប់ ឃាតកម្មរាប់មិនអស់ អសន្តិសុខ ជាកន្លែងដែលគ្មានសុវត្ថិភាពគ្រប់គ្រាន់។

ដូច្នេះ ឯកអគ្គរដ្ឋទូតអាមេរិក William Heidt គួរឈប់ធ្វើអត្ថាធិប្បាយតាមកំហឹងផ្ទាល់ទៀត និងសូមកុំបំភ្លៃ បំផ្លើស បំប៉ោងសភាពការណ៍ពិតធ្វើអ្វី។ កម្ពុជាជាកោះសន្តិភាពមួយដែលពោរពេញដោយការអភិវឌ្ឍ សុខសុវត្ថិភាព មិនមែនជាកន្លែងអសន្តិសុខ ដូចអ្វីដែលលោកទូតយល់ឃើញនោះទេ។ បើកម្ពុជាគ្មានសន្តិភាព និងសន្តិសុខទេ ទំនង លោកទូត និងភរិយាមិនអាចធ្វើដំណើរចូលព្រៃ និងទៅតំបន់នានារបស់កម្ពុជាដោយ សប្បាយរីករាយ បោះតង់បោះជំរុំសម្រាកក្នុងព្រៃឡើយ។ លោក William Heidt គួរលះបង់ គំនិតលោភៈ ទោសៈ មោហៈចេញពីក្នុងខ្លួន និងវាយតម្លៃម្តងទៀតថាកម្ពុជាមិនដូចអ្វីដែលលោកបានគិត ក្នុងភាពយល់សប្តិ៍នោះឡើយ។ កម្ពុជាពោរពេញដោយសុខសុវត្ថិភាព និងការអភិវឌ្ឍ៕

ដោយ ពល ពានរិន្ទ
អ្នកវិភាគ និងតាមដានសភាពការណ៍នយោបាយនៅកម្ពុជា
ខេត្តកណ្តាល រាត្រីថ្ងៃទី០២ ខែតុលា ឆ្នាំ ២០១៧