Wednesday, June 11, 2014

ឯកឧត្តម​​បណ្ឌិត​​សភា​ចារ្យ​ នាំ​យក​​ថវិកា​រាជ​រដ្ឋាភិបាល​​​ចំនួន​​ជាង ១ពាន់​​លាន​​រៀល​ជូន​ដល់​​កីឡាករ-​ការិនី​ និង​គ្រូ​​បង្វឹក​​ដែល​​មាន​​ស្នាដៃ ក្នុង​​ព្រឹត្តិ​ការណ៍​ប្រកួត​​កីឡា​អាស៊ាន​​ប៉ារ៉ា​​ហ្គេម​​លើក​ទី៧

នា​ព្រឹកថ្ងៃទី​១១ ខែមិថុនា ឆ្នាំ២០១៤ ឯកឧត្តម​បណ្ឌិត​សភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រី​ទទួល​បន្ទុក​ទីស្តីការ​គណៈ​រដ្ឋមន្ត្រី​ តំណាង​ដ៏ខ្ពង់​ខ្ពស់​សម្តេច​អគ្គមហាសេនា​បតី​តេជោ ហ៊ុន សែន បាន​ប្រគល់​ថវិកា​រាជរដ្ឋាភិបាល​ចំនួន​ជាង ១០៤៦​លាន​​​រៀល​ ជូនដល់​កីឡាករ កីឡាការិនី គ្រូ​បង្វឹក និង​គ្រូ​ជំនួយដែល​មាន​​ស្នា​ដៃក្នុង​ការ​រក​មេដាយ​​ជូន​ជាតិ ​ក្នុងព្រឹទ្ធការណ៍​ប្រកួត​កីឡា​អាស៊ានប៉ារ៉ាហ្គេម​លើក​ទី​៧ ដែល​បាន​ប្រព្រឹត្តិ​ទៅ​ចាប់​ពី​ថ្ងៃ​ទី១១-២២ ខែមករា ឆ្នាំ​២០១៤ នៅទីក្រុង​ណៃពិដោរ ប្រទេស​ភូមា។

នៅ​វិមាន​មិត្ត​ភាព ទីស្តីការ​គណៈ​រដ្ឋមន្ត្រី ក្នុង​ពិធី​ប្រគល់​ប្រាក់​រង្វាន់​ដល់​ជ័យលាភី និង​ប្រាក់​ឧបត្ថម្ភ​ចំពោះ​គ្រូបង្វឹក​ ឯកឧត្តមបណ្ឌិត​សភាចារ្យ សុខ អាន ​បាន​មាន​ប្រសាសន៍ថា ក្នុង​នាម​សម្តេច​អគ្គ​មហា​សេនា​​បតី​​តេជោ ហ៊ុន សែន នាយករដ្ឋមន្ត្រី​នៃ​ព្រះ​រាជាណាចក្រកម្ពុជា និង​ខ្លួន​ខ្ញុំ​ផ្ទាល់ សូម​សម្តែង​ការ​កោត​សរ​សើរ និងអប​អរ​សាទរ​ដល់​ជ័យលាភី​ទាំង​អស់​ ចំពោះ​កិច្ច​ខិត​ខំ​ប្រឹង​ប្រែង​ និង​ស្មារតី​ប្តេជ្ញា​ចិត្ត​ខ្ពស់​​រហូត​​​ទទួល​បាន​ជ័យ​ជំនះដ៏​ធំ​ធេង​ជូន​ជាតិ​មាតុភូមិ​។ ឯកឧត្តមបណ្ឌិត​សភាចារ្យ​ ក៏បាន​មាន​ប្រ​សា​សន៍​​វាយ​តម្លៃ​ខ្ពស់​​ដល់​ថ្នាក់​ដឹកនាំ​គណៈ​កម្មាធិការ​ជាតិ​ប៉ារ៉ា​អូឡាំពិកកម្ពុជា​ និង​ស្ថាប័ន​ពាក់​ព័ន្ធ​ទាំង​អស់ ​ជា​ពិសេស​គ្រូ​បង្វឹក​​ ដែល​បាន​រួម​ចំណែក​យ៉ាង​សំខាន់​ធ្វើ​ឲ្យ​សំរេច​បាន​នូវ​សមិទ្ធផល​ដ៏​ត្រចះ​ត្រ​ចង់​នេះ។

ឯកឧត្តម​បណ្ឌិត​សភាចារ្យ សុខ អាន បាន​មាន​ប្រសាសន៍ឲ្យ​ដឹង​ថា ការ​ជួប​ជុំ​នៅ​ថ្ងៃ​នេះ គឺ​ជា​សក្ខីភាព​បញ្ជាក់​ និង​ការ​គាំទ្រ​​របស់​រាជរដ្ឋាភិបាល​ដល់​វិស័យ​កីឡា ជា​ពិសេស​កីឡាករ​ និង​កីឡាការិនី បង​ប្អូន​ជន​ពិការ​ទាំង​អស់​​ ដែល​បាន​ចូល​រួម​ក្នុងព្រឹត្តិការណ៍​ប្រកួត​កីឡា​អាស៊ានប៉ារ៉ា​​ហ្គេម​លើកទី​៧។ ការ​យក​ចិត្ត​ទុក និង​ការ​គាំទ្រ​ទាំង​នេះ​ ស្តែង​ចេញ​តាម​រយៈ​ការ​ចំណាយ​ថវិកា​រដ្ឋ​ដ៏​ច្រើន​សម្រាប់​វិស័យ​នេះ ក៏​ដូច​​ជាការ​ផ្តល់​ថវិកា​ផ្ទាល់​ខ្លួន​របស់​សម្តេច​តេជោ និង​សម្តេច​កិត្តិព្រឹទ្ធ​បណ្ឌិត​ ចំនួន ១២ម៉ឺន ៥០០​ដុល្លារ​​ ជូន​ដល់​​កីឡាករ-ការិនី​ ដែល​ជា​ជ័យលាភី គ្រូប​ង្វឹក គ្រូ​ជំនួយ កាល​ពី​ខែ​មីនាកន្លង​មក​នេះ​។

​​ទាក់​ទង​ទៅនឹង​ការ​​រៀប​ចំ​បង្កើត​អនុក្រឹត្យ​ថ្មី ​របស់​រាជរដ្ឋាភិបាល ក្នុងការ​ផ្តល់​ប្រាក់​រង្វាន់​លើក​ទឹក​ចិត្ត​ដល់​កីឡាករ កីឡាការិនី ដែល​ដណ្តើម​មេដាយ​លើ​ឆាក​អន្តរជាតិ​ ឯកឧត្តម​បណ្ឌិត​សភាចារ្យ សុខ អាន បាន​មាន​ប្រសាសន៍​ឲ្យ​ដឹង​ថា គឺ​រាជរដ្ឋាភិបាល​លើក​ទឹក​ចិត្ត​ខ្លាំង​​ណាស់​ដល់​វិស័យ​កីឡា។ ក្នុង​នោះ​មេដាយ​មាស​ថ្នាក់​ពិភពលោក គឺ​ទទួល​បាន​ប្រាក់​ឧបត្ថម្ភ​ពី​រាជរដ្ឋាភិបាលក្នុង​មេដាយ​មាសមួយ ចំនួន ៣ម៉ឺន​ដុល្លារ ឬ​ស្មើ​នឹង​ ១២០លាន​រៀល​។ ថ្នាក់​ទ្វីប(អាស៊ី) មេដាយមាស ទទួល​ប្រាក់​ឧបត្ថម្ភ​ ចំនួន ២ម៉ឺន​ដុល្លារ​ ឬស្មើនឹង ៨០លាន​រៀល​ និង​ថ្នាក់​តំបន់​អាស៊ី​អាគ្នេយ៍ ទទួល​បាន​ប្រាក់​ឧបត្ថម្ភ​ ចំនួន​ ១ម៉ឺន​ដុល្លារ។ ឯកឧត្តម​បណ្ឌិត​សភាចារ្យ​បញ្ជាក់​ថា គ្រាន់​តែ​កីឡា​ប៉ារ៉ាអូឡាំពិក​កំរិត​អាស៊ាន​​មួយ​ប៉ុណ្ណោះ​រាជរដ្ឋាភិបាល​ចំណាយ​ថវិកា​អស់​ប្រមាណ​ជាង ១ពាន់លាន​រៀល ឬជិត ៣០ម៉ឺន​ដុល្លារ និង​ប្រាក់​ឧបត្ថម្ភ​ផ្ទាល់​របស់​សម្តេច​តេជោ​ ចំនួន​ ១២ម៉ឺន​ដុល្លារ​​ទៀត សរុប​ជិត ៤០ម៉ឺន​ដុល្លារ។ ដែល​នេះ​គឺឆ្លុះ​បញ្ចាំង​ពី​ការ​ខិត​ខំ​ប្រឹង​ប្រែង​របស់​រាជរដ្ឋាភិបាលក្នុងការលើក​កំពស់​​វិស័យ​កីឡា​​។

ឯកឧត្តម​បណ្ឌិត​សភាចារ្យ សុខ អាន បាន​មាន​ប្រសាសន៍​លើក​ឡើង​​ថា វិស័យ​អប់រំ​កាយ​ និង​កីឡា​ គឺ​ជា​​សមាស​ភាព​ដ៏​សំខាន់ ​ដែល​រាជរដ្ឋាភិបាលបាន និង​​កំពុង​​យក​ចិត្ត​ទុក​ដាក់​ក្នុង​ការ​ចូល​រួម​អភិវឌ្ឍន៍​ធន​​ធាន​មនុស្ស​ប្រកប​ដោយ​គុណភាព​ ដើម្បី​រួម​ចំណែក​ដល់​ការ​លើក​កំពស់​ ការ​អភិវឌ្ឍន៍​សេដ្ឋកិច្ច​សង្គម ប្រកប​ដោយ​​ចេរភាព និង​សមធម៌។ កីឡា​មិន​ត្រឹម​តែ​នាំ​មក​នូវ​សុខភាព​ល្អ ភាព​សប្បាយរីក​រាយ​ និង​ស្មារតី​សន្តិភាព សាមគ្គីភាព​ មិត្ត​ភាព ភារត​ភាព​ និង​សហប្រតិបត្តិការ​រវាង​គ្នា​នឹង​គ្នា​ ទាំង​ក្នុង​ក្រប​ខណ្ឌ​ជាតិ និង​អន្តរជាតិ​ប៉ុណ្ណោះ​ទេ ប៉ុន្តែ​កីឡា​ក៏​រួម​ចំណែក​យ៉ាង​សំខាន់​ដល់​ការ​លើក​កំពស់​កិត្យា​នុភាព​ជាតិ​នៅ​លើ​ឆាក​អន្តរជាតិ​ផងដែរ​។

ឯកឧត្តមបណ្ឌិត​សភាចារ្យ​បន្ត​ថា ​រាជរដ្ឋាភិបាល​តែង​តែ​យក​ចិត្ត​ទុក​ដាក់ និង​ផ្តល់​អាទិភាព​​ខ្ពស់​លើ​វិស័យ​​ពិការ​ភាព​ ដែល​បាន​ដាក់​បញ្ចូល​ទៅ​ក្នុង​យុទ្ធ​សាស្ត្រ​ចតុកោណ បាន​អុម័តច្បាប់​ស្តីពីកិច្ច​ការ​ពារ​ និង​​លើក​កំពស់​សិទ្ធិ​ជន​ពិការ​​ និង​បាន​ផ្តល់​​សញ្ចាប័នលើ​អនុសញ្ញា​អង្គការ​សហ​ប្រជា​ជាតិ​​ស្តីពី​សិទ្ធិ​ជន​ពិការ​ជា​ដើម​។ ដើម្បី​ប្រសិទ្ធភាព​ការ​ងារ​ក្នុង​ការ​អនុវត្ត​ និងជួយបង​ប្អូន​ជន​ពិការ​ទាំង​អស់​ យន្តការ​ជា​ច្រើន​ត្រូវ​បាន​បង្កើត​ ជា​អាទ៌ អគ្គលេខាធិការ​ដ្ឋាន​ក្រុម​ប្រឹក្សា​សកម្មភាព​ជន​ពិការ មូល​និធិ​ជន​​ពិការ​ រដ្ឋបាល​សិទ្ធិ​ជន​ពិការ​។ ជាមួយ​គ្នា​នេះ សម្តេច​អគ្គមហាសេនា​បតី​តេជោ និង​សម្តេច​កិត្តិ​ព្រឹទ្ធ​បណ្ឌិត​បាន​យក​ចិត្ត​ទុក​ដាក់​យ៉ាង​ខ្លាំង​ចំពោះ​​បង​ប្អូន​ជន​ពិការ ដែល​ស្តែង​ចេញ​ពីការជួប​​សំណេះ​សំណាល​​សួរ​សុខ​ទុក្ខ​នៅ​តាកែន​កោះ​ស្លា ស្រុក​ឈូក ខេត្ត​កំពតម្សិល​មិញ​នេះ​។ ការ​ផ្តល់​អំណោយ​ជា​សម្ភារ​និង​ថវិកា ការ​សាង​សង់​មជ្ឈមណ្ឌល​ជន​ពិការ​ជា​ច្រើន​កន្លែង​នៅ​ទូទាំង​ប្រទេស និងការ​សាង​សង់​លំ​នៅ​ដ្ឋាន​​ជូន​បង​ប្អូន​ពិការ​របស់​យើង​អាច​រស់​នៅ​ប្រកប​ដោយ​សេចក្តី​ថ្លៃ​ថ្នូរ។

ឯកឧត្តម​បណ្ឌិត​សភាចារ្យ សុខ អាន​ បាន​មាន​ប្រសាសន៍​ឲ្យ​ដឹង​ថា ជាលទ្ធផល​បង​ប្អូន​ជន​ពិការ​យើង​នៅ​ទូទាំង​ប្រទេស​បាន​ប្រើ​ប្រាស់​សក្តា​នុពល​របស់​ខ្លួន រួម​ចំណែក​ជាមួយ​រាជរដ្ឋាភិបាល​ក្នុង​គ្រប់​វិស័យ ដើម្បី​អភិវឌ្ឍន៍​សេដ្ឋកិច្ច​ និង​សង្គម​ជាតិ​ប្រកប​ដោយ​ឆន្ទៈខ្ពស់​ ស្រប​តាម​ពាក្យ​ស្លោក​ថា “ពិការ​តែកាយ តែ​ចិត្ត​មិន​ពិការ​ឡើយ​”។ “ជាក់​ស្តែង​ការ​ប្រកួត​កីឡា​ប៉ារ៉ា​ហ្គេមលើកទី៧ កីឡាករ កីឡាការិនីជន​ពិការ​របស់​យើង ២៣រូប​ប៉ុណ្ណោះទៅ​ចូល​រួម​ប្រកួត តែ​ជា​ទីមោទនអាច​ទទួល​មេដាយ​បាន​រហូត​ដល់​ទៅ ៣២គ្រឿង។ ក្នុង​នោះ​មាន​មេដាយមាស ៤គ្រឿង ប្រាក់១១គ្រឿង និង​សំរឹទ្ធិ ១៧គ្រឿង​”។

ឯកឧត្តម​បណ្ឌិត​សភាចារ្យ សុខ អាន បាន​មាន​ប្រសាសន៍​ឲ្យ​ដឹង​ថា ចាប់​តាំង​ពី​បដិសន្ធិ​នៃ​គណៈ​កម្មា​ធិ​ការ​ជាតិ​ប៉ារ៉ា​អូឡាពិកកម្ពុជា​នៅ​ឆ្នាំ​១៩៩៧ មក​ដល់​ពេល​បច្ចុប្បន្ននេះ កីឡាករ និង​កីឡាការិនី​ជន​ពិការ​យើង​បាន​ធ្វើ​ឲ្យ​កិត្តិនាម និង​កិត្តិ​ស័ព្ទ​កម្ពុជា​កាន់​តែ​ត្រូវ​បាន​ទទួល​ស្គាល់ និង​កោត​សរសើរ​ថែមទៀត​លើ​ឆាក​អន្តរជាតិ ដែល​បាន​នាំ​មក​មេដាយ​ជូន​ជាតិ សរុប ១២០គ្រឿង​។

ឯកឧត្តម​បណ្ឌិត​សភាចារ្យ សុខ អាន ក៏​បាន​អំពាវនាវ​ដល់​គ្រប់​ភាគីពាក់​ព័ន្ធ​ទាំង​អស់​​ ជា​ពិសេស​វិស័យ​ឯក​ជន ដៃគូ​អភិវឌ្ឍន៍ និង​សប្បុរស​ជន​ទាំង​អស់​​បន្ត​ឧបត្ថម្ភ​គាំទ្រ​ដើម្បី​អភិវឌ្ឍន​វិស័យ​អប់រំកាយ និង​កីឡា​ ដល់​ជន​ពិការ​កម្ពុជា។

ទាក់​ទង​ទៅនឹងការ​ជ្រើស​រើស​កីឡាករ កីឡាការិនី ចូល​រួម​ហ្វឹក​ហាត់ ឯកឧត្តម​បណ្ឌិត​សភាចារ្យ សុខ អាន ​ក៏​បាន​ណែនាំ​ឲ្យ​គ្រប់​សហព័ន្ធ​កីឡា គួរ​ពិនិត្យ​ពិច្ឆ័យ​ក្នុង​ការ​ជ្រើស​រើស​កីឡាករ កីឡាការិនី ឲ្យ​បាន​ត្រឹម​ត្រូវ​ តម្លាភាព យុត្តិធម៌ ទើប​យើង​រើស​បាន​កីឡាករ​ពូកែ​ពិត​ប្រាកដ​៕

ពិធីសំណេះសំណាលជាមួយយោធិនពិការនៅមជ្ឈមណ្ឌលតាកែនកោះស្លា

ពិធី​សំណេះ​សំណាល​ជា​មួយ​យោធិន​ពិការ​នៅ​មជ្ឈ​មណ្ឌល​តាកែន​កោះ​ស្លា ស្រុក​​ឈូក​ខេត្ដ​កំពត ក្រោម​អធិ​បតី​ភាព​ដ៏ខ្ពង់​ខ្ពស់ សម្ដេច​តេជោ ហ៊ុន សែន នាយក​រដ្ឋ​មន្ដ្រី និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន

មតិ​សំណេះ​សំណាល ឯកឧត្ដម​បណ្ឌិត​សភាចារ្យ សុខ អាន ក្នុងពិធី​ប្រគល់​ប្រាក់​រង្វាន់ដល់​ជ័យ​លាភី និង​​ប្រាក់​​ឧបត្ថម្ភ​​ចំពោះ​​គ្រូ​បង្វឹក ក្នុង​​ព្រឹត្តិការណ៍​ការ​ប្រកួត​​កីឡា​​អាស៊ាន​​ប៉ារ៉ា​ហ្គេម​​លើក​ទី​៧

រាជធានីភ្នំពេញ, ថ្ងៃទី១១ ខែមិថុនា ឆ្នាំ២០១៤

-        ឯកឧត្តម លោកជំទាវ អស់លោក លោកស្រី
-        គ្រូបង្វឹក កីឡាករ កីឡាការិនី ភ្ញៀវកិត្តិយស ទាំងអស់ ជាទីមេត្រី
ថ្ងៃនេះ ខ្ញុំមានសេចក្តីសោមនស្សរីករាយឥតឧបមាចូលរួមជាមួយ ឯកឧត្តម លោកជំទាវ អស់លោក លោកស្រី គ្រូបង្វឹក កីឡាករ កីឡា ការិនី ទាំងអស់ ក្នុងពិធីប្រគល់​ប្រាក់រង្វាន់ដល់​ជ័យ​លាភី និង​ប្រាក់​ឧបត្ថម្ភ​ចំពោះ​គ្រូបង្វឹក ក្នុង​ព្រឹត្តិការណ៍ការប្រកួត​កីឡា​អាស៊ាន​ប៉ារ៉ាហ្គេម​លើកទី​៧ ដែល​បាន​ប្រព្រឹត្តិ​ទៅ​ចាប់​ថ្ងៃទី​១១ ដល់​២២ ខែមករា ឆ្នាំ​២០១៤ នៅ​ទីក្រុង​ណៃ​ពី​ទ័រ ប្រទេស​មីយ៉ាន់ម៉ា កន្លងមកនេះ​។ ឆ្លៀត​ក្នុង​ឱកាស​នេះ ​ក្នុងនាម​ សម្តេច​​​​អគ្គមហាសេនាបតីតេជោហ៊ុន​ សែន នាយករដ្ឋមន្ត្រីនៃព្រះរាជាណាចក្រកម្ពុជា និង​ខ្លួនខ្ញុំ​ផ្ទាល់ ខ្ញុំសូមសម្តែង​នូវ​ការកោត​សរសើរ និង​អបអរ​សាទរ​ដល់ជ័យ​លាភី​​ទាំងអស់ ចំពោះកិច្ចខិតខំប្រឹង​ប្រែង និង​ស្មារតី​​​​​​​ប្តេជ្ញា​ចិត្ត​ខ្ពស់​​​​​រហូត​ទទួល​បានជ័យជំនះ​ដ៏ធំធេង​ជូន​ជាតិ​មាតុភូមិ​។ ខ្ញុំ​​ក៏សូម​​យក​​ឱកាស​នេះ​សម្តែង​​​​​​នូវ ការ​កោត​សរសើរ និង​វាយ​តម្លៃ​ខ្ពស់ផង​ដែរចំពោះ​​ថ្នាក់ដឹកនាំ គណៈកម្មាធិការជាតិ​ប៉ារ៉ា​ឡាំ​ពិក​កម្ពុជា និង​ស្ថាប័ន​ពាក់ព័ន្ធទាំងអស់ ជាពិសេសគ្រូបង្វឹក និង​គ្រូ​ជំនួយ​ ដែលបាន​រួមចំណែក​យ៉ាង​​សំខាន់ ធ្វើឱ្យ​សម្រេច​បាន​​នូវសមិទ្ធផល​ដ៏ត្រចះត្រចង់នេះ។

ការជួបជុំគ្នាថ្ងៃនេះ គឺជាសក្ខីភាពបញ្ជាក់នូវការលើកទឹកចិត្ត និងការគាំទ្ររបស់​រាជ​រដ្ឋាភិបាល​​​ដល់​​វិស័យកីឡា ជាពិសេស កីឡាករ និងកីឡាការិនី​ជន​ពិការ​ទាំងអស់ ដែល​បាន​​​ចូ​លរួម​ក្នុង​ព្រឹត្តិ​ការណ៍​ការ​ប្រកួត​​កីឡា​អាស៊ាន​ប៉ារ៉ាហ្គេម​លើកទី​៧។ ការយកចិត្តទុកដាក់​​ និង​​ការគាំទ្រ​​ទាំងនេះ ស្តែងចេញតាមរយៈ​ការ​ចំណាយថវិការដ្ឋ​ដ៏ច្រើន​សម្រាប់​វិស័យនេះ ក៏​ដូច​ជា​​ ការ​ផ្តល់ថវិកាផ្ទាល់ខ្លួន​​របស់ សម្តេចតេជោ និង​សម្តេច​កិត្តិព្រឹទ្ធបណ្ឌិត​ ចំនួន ១២០.៥០០ (ដប់ពីរម៉ឺន​ប្រាំ​រយ​) ដុល្លារអាមេរិក​ ជូន​ដល់​គ្រប់​កីឡាករ និងកីឡាការិនី ​ដែល​​ជា​ជ័យលាភី​ គ្រូ​បង្វឹក​ និង​គ្រូ​ជំនួយ​ កាលពី​ខែមីនាកន្លងមកនេះ​។     

ឯកឧត្តម លោកជំទាវ អស់លោក លោកស្រី
វិស័យអប់រំកាយនិងកីឡាគឺជាសមាសភាព​ដ៏​សំខាន់ ​​ដែល​​រាជរដ្ឋាភិបាល​បាននិងកំពុង​បន្ត​យក​ចិត្ត​ទុកដាក់ក្នុង​ការចូលរួមអភិវឌ្ឍ​ធនធាន​មនុស្ស​​​ ប្រកប​​ដោយ​គុណភាព​ ដើម្បី​រួម​​ចំណែក​​​ដល់ការលើក​កម្ពស់ការអភិវឌ្ឍសេដ្ឋកិច្ច-សង្គម ប្រកបដោយចីរភាព​និងសមធម៌។ កីឡា​មិនត្រឹម​តែនាំ​មក​នូវ​សុខភាពល្អ ​ភាព​សប្បាយ​​​រីករាយ​ និង​ស្មារតី​សន្តិភាព សាមគ្គីភាព មិត្តភាព ភាតរភាព និង​សហប្រតិបត្តិការរវាង​គ្នានិងគ្នា ទាំងក្នុង​ក្រប​ខ័ណ្ឌ​ជាតិ និងអន្តរជាតិ​ប៉ុណ្ណោះទេ ប៉ុន្តែ កីឡា​ក៏​រួមចំណែកយ៉ាង​សំខាន់ ​ដល់​ការលើក​កម្ពស់​កិត្យានុ​ភាពជាតិ​នៅលើ​ឆាក​អន្តរជាតិផងដែរ។ ដូច្នេះ កីឡាករ កីឡាការិនីកម្ពុជា​ទាំងអស់​ រួមទាំង​ កីឡាករ កីឡា​ការិនី​​ ជនពិការ​​របស់​យើង គឺ​ប្រៀបបានដូចជាអ្នក​ការទូត ដែលមានលក្ខណៈមហាជន​ ដ៏មាន​ប្រសិទ្ធិភាព ដែលដើរ​តួនាទី​យ៉ាង​​​សំខាន់​នៅក្នុងផ្នែកទំនាក់ទំនងអន្តរជាតិ។

លើសពីនេះទៀត រាជរដ្ឋាភិបាល​​តែងតែ​​យកចិត្ត​ទុកដាក់​ និង​ផ្តល់​អាទិភាពខ្ពស់​​លើ​វិស័យ​ពិការរភាព ដោយ​​បាន​​ដាក់​​បញ្ជូល​ក្នុង​យុទ្ធ​សាស្ត្រ​ចតុកោណ បានអនុម័តច្បាប់ស្តីពី​កិច្ចការពារ និងលើក​កម្ពស់​សិទ្ធិជន​ពិការ និងបាន​ផ្តល់សច្ចាប័ន​លើអនុសញ្ញា​អង្គការ​សហប្រជា​​ជាតិ​​​​ស្តីពី​សិទ្ធិជនពិការ ជាដើម​។ ដើម្បី​ប្រសិទ្ធិ​ភាព​ការងារ​ក្នុង​ការ​អនុវត្ត និង​ជួយ​ដល់​​បងប្អូន​ជនពិការ​ទាំងអស់​​ យន្តការជាច្រើនត្រូវ​បាន​​បង្កើត ជាអាទិ៍​ លេខា​ធិការដ្ឋាន​ក្រុមប្រឹក្សា​សកម្មភាព​ជនពិការ មូលនិធិជនពិការ និងរដ្ឋបាលសិទ្ធិជនពិការ​ ​ ។ ជាមួយគ្នានេះ សម្តេចអគ្គមហា​សេនាបតី​​​តេជោ និង​សម្តេចកិត្តិព្រឹទ្ធបណ្ឌិត​ បានយកចិត្តទុក​ដាក់​យ៉ាងខ្លាំង​ចំពោះបងប្អូន ជនពិការ ដែលស្តែង​ចេញ​ពី ការជួបសំណេះសំណាល​សួរសុខទុក្ខ ការផ្តល់​អំណោយជាសម្ភារៈ និង​ថវិកា ​ការ​សាងសង់មជ្ឈមណ្ឌល​ជនពិការជាច្រើន​កន្លែង​​នៅ​ទូទាំង​ប្រទេស និង​ការសាងសង់​លំនៅដ្ឋាន​​​​​ ជូន​​​បងប្អូន​ជន​ពិការរបស់​​យើងអាច​រស់នៅប្រកប​ដោយ​សេចក្តី​ថ្លៃថ្នូរ ។

ជាលទ្ធផល បងប្អូន​ជនពិការយើង​នៅទូទាំងប្រទេសបាន​ប្រើ​ប្រាស់​​សក្តានុពល​របស់​ខ្លួន​រួមចំណែក​ជា​មួយ​រាជរដ្ឋាភិបាល​ក្នុង​គ្រប់វិស័យ ​ ដើម្បី​​​អភិវឌ្ឍសេដ្ឋកិច្ច​ និង​សង្គម​ជាតិ​ ប្រកប​ដោយ​ឆន្ទះខ្ពស់​ ស្រប​តាម​ពាក្យ​ស្លោក​ថា «ពិការតែកាយតែចិត្តមិនពិការឡើយ»។ ជាក់ស្តែង​ តាមរយៈរបាយការណ៍របស់​ ឯកឧត្តម​ យី វាសនា​ អគ្គលេខាធិការ​​គណៈកម្មាធិការ​ជាតិ​​ប៉ារ៉ា​ឡាំ​ពិកកម្ពុជា​ ការប្រកួត​កីឡា​អាស៊ាន​ប៉ារ៉ា​ហ្គេម​លើក​ទី៧​ កីឡាករ កីឡាការិនីជន​ពិការ​​របស់​​យើង​តែ ២៣រូប ប៉ុណ្ណោះទៅ​ចូលរួម​ប្រកួត​ តែ​ជាទីមោទនៈ អាចទទួល​មេដាយបានរហូត​ដល់ ៣២​គ្រឿង ដែលក្នុង​នោះ​មាន​ មេដាយ​មាស ៤គ្រឿង ប្រាក់ ១១គ្រឿង និងសំរឹទ្ធ ១៧គ្រឿង។  ចាប់​តាំង​ពី​​ការ​ចាប់​បដិសន្ធិ​នៃគណៈកម្មាធិការជាតិប៉ារ៉ា​ឡាំពិកកម្ពុជានៅ​ឆ្នាំ​១៩៩៧ មកដល់​ពេល​បច្ចុប្បន្ន​​នេះ កីឡាករ​ កីឡាការិនី​ជនពិការ​យើង​ បាន​ធ្វើឲ្យកិត្តិនាម និងកិត្តិស័ព្ទកម្ពុជា​កាន់​តែ​​ត្រូវ​បាន​ទទួល​​​ស្គាល់ និង​កោតសរសើរ​ថែមទៀត​​​លើឆាកអន្តរជាតិ ដោយបាន​​នាំ​មេដាយ​​​ជូន​ជាតិ​សរុបចំនួន ១២០គ្រឿង។ ខ្ញុំពិត​ជាមាន​ក្តីរំភើប និងសូមចូលរួម​អបអរសាទរ​​នូវ​លទ្ធផល​ដ៏​ឧដ្តុង្គ​ឧត្តម​​នេះ!

ឯកឧត្តម លោកជំទាវ អស់លោក លោកស្រី
ជាថ្មីម្តងទៀត ខ្ញុំសូមកោតសរសើរនិងវាយតម្លៃខ្ពស់ដល់ថ្នាក់ដឹកនាំនៃគណៈកម្មាធិការ​​​ជាតិ​​ប៉ារ៉ាឡាំ​ពិក​កម្ពុជា គ្រូបង្វឹក និងកីឡាករ កីឡាការិនី​ជនពិការ​​​ទាំងអស់​ ចំពោះកិច្ចខិត​ខំ​ប្រឹង​ប្រែង និងស្មារតី​ប្តេជ្ញា​ចិត្ត​ខ្ពស់នាំមកនូវជ័យជំនះ​ដ៏ធំធេង ​​ជូនជាតិមាតុភូមិជាទីស្នេហា​នៃ​​យើង។​

ខ្ញុំសូមអំពាវនាវដល់គ្រប់ភាគីពាក់ព័ន្ធទាំងអស់ ជាពិសេស វិស័យឯកជន ដៃគូអភិវឌ្ឍន៍ និង​សប្បុ​រស​ជន​ទាំង​អស់ សូមបន្តចូលរួមឧបត្ថម្ភគាំទ្រ ដើម្បីអភិវឌ្ឍវិស័យ​អប់រំកាយ និង​កីឡា​ដល់​​ជនពិការ​កម្ពុជា ។

ក្នុងនាមសម្តេចអគ្គមហាសេនាបតីតេជោនាយករដ្ឋមន្ត្រី ខ្ញុំបាននាំមកជាមួយនូវទឹកប្រាក់​ចំនួន ១ ០៤៦ ២០០ ០០០រៀល (មួយ​ពាន់​សែសិបប្រាំ​មួយលានពីរសែន​​​រៀល) របស់​​រាជ​រដ្ឋា​ភិបាល​​ មកប្រគល់ជូនជ័យលាភី ​គ្រូបង្វឹក​ និង​គ្រូ​ជំនួយ​ ក្នុង​ព្រឹត្តិការណ៍ការ​ប្រកួត​​កីឡា​​អាស៊ាន​​​​​ប៉ារ៉ាហ្គេម​លើកទី​៧ ស្របតាមអនុក្រឹត្យ​ថ្មីរបស់​រាជរដ្ឋាភិបាល​ ដែល​បាន​ផ្តល់​ប្រាក់​រង្វាន់​​ និង​ប្រាក់​ឧបត្ថម្ភ​ស្មើគ្នា​ចំពោះ​​គ្រូបង្វឹក ​គ្រូជំនួយ ​កីឡាករ និង​កីឡា​ការិ​នី​អូឡាំ​ពិក និង​ប៉ារ៉ាឡាំពិក​។

ជាទីបញ្ចប់ ខ្ញុំសូមជូនពរ ឯកឧត្តម លោកជំទាវ អស់លោក លោកស្រី គ្រូបង្វឹក គ្រូជំនួយ កីឡាករ កីឡាការិនីជនពិការ​ ភ្ញៀវកិត្តិយសទាំងអស់ សូមមាន​សុខភាពល្អ ទទួល​បាន​​ជោគជ័យ​ក្នុងការងារ និងសុភមង្គលក្នុងគ្រួសារ។
សូមអរគុណ!

កំណាព្យ៖ មេដឹកនាំគណបក្សសង្គ្រោះជាតិ ខ្វះសីលធម៌



(បទពាក្យប្រាំពីរ)

នៅលើឆាកជាតិ អន្តរជាតិ                  គេដឹងព្រោងព្រាតគ្មានក្រឡះ
លោក សម រង្ស៊ី ចិត្តមានៈ                   ពុំមានអៀនខ្មាស សាសន៍ដទៃ      
គេធ្លាប់ដឹកនាំ ធ្វើបាតុកម្ម                    ស្ទើរជិតមួយឆ្នាំ តែគ្មានន័យ
ឃោសនាបោកប្រាស់ យុវវ័យ              ឲ្យលង់ស្មារតី ភ្លេចរកស៊ី              
អ្នកខ្លះចាញ់បោក មេឃោសនា            លក់ឆ្កែ លក់ឆ្មា មកវក់វី
ដើរតាមលំអាន សម រង្ស៊ី                    ពុំបានសំភី ឲ្យបានច្បាស់             
អុចអាល ឆ្កឹះឆ្កៀល ដើរតាមផ្លូវ            វិបត្តិធ្លាក់ទៅ យ៉ាងអាម៉ាស់
បាត់បង់ជីវិតពលរដ្ឋខ្លះ                       អាងអីរត់ប្រាស់ទៅបរទេស          
គេលើកអេហ្ស៊ីប ទុយណេស៊ី               គេលើកលីបី ថាពិសេស
លោក សម រង្ស៊ី អស់ចំណេះ               អាងអីរត់ក្រេសពីភ្នំពេញ              
អាងអីតែថាខ្លួនមានសិទ្ធិ                     ដល់គេពិនិត្យសិទ្ធិគេវិញ
បែរជាស្រែកថ្ងូរទាំងទោម្នេញ               ហើយចោទគេវិញថាផ្តាច់ការ        
ពាក្យថាចេះឯងក្រែងចេះគេ             ចេះត្រឹមតែជេរស្រែកឡាំប៉ា
មិនបាច់រៀនសូត្រពីគ្រូណា                 សូម្បីកុមារ ក៏ចេះដែរ                  
ឯណាគុណធម៌ ល្អឧត្តម                     ជាអ្នកដឹកនាំប្រទេសខ្មែរ
តំណាងអ្នកក្រុង ចំការស្រែ                 ឬអាង ថៅកែមេបាតុកម្ម             ?
ថ្ងៃណាថៅកែប្រែអស់លក្ខណ៍             នោះខ្លួននឹងធ្លាក់ទុក្ខរងកម្ម
គួរអនុវត្ត និងចងចាំ                           ព្រះរាជបណ្តាំព្រះមហាក្សត្រ        

                                                                                                  
                                                                                                   ដោយ មូល មិត្ត

វត្ត​មាន​​សម្តេច​​តេជោនៅ​តា​កែន​កោះ​​ស្លា​​ បញ្ចប់​​ពាក្យ​​ចចាម​អារ៉ាម​​អកុស​ល​​បង្ករ​​ឡើង​​ដោយ​​ពួក​​អ្នក​​នយោបាយ​​ប្រឆាំង​

វត្ត​មាន​របស់​សម្តេច​អគ្គមហាសេនា​បតី​តេជោ​ហ៊ុន សែន ​នាយករដ្ឋមន្ត្រី​នៃ​ព្រះ​រាជាណាចក្រ​កម្ពុជា នៅ​ភូមិ​តេជោ​អភិវឌ្ឍន៍​ ស្ថិត​នៅ​ក្នុង​ស្រុក​ឈូក ខេត្ត​កំពត ​បាន​បញ្ចប់​នូវ​ពាក្យ​ចចាម​​អារ៉ាមដែល​បង្ក​ឡើង​ដោយ​ពួក​ក្រុម​ជ្រុល​និយម និង​អ្នកនយោបាយ​ប្រឆាំង បាន​​ប្រឌិតបំផុស​​ឡើង​​អំពី​សុខ​ភាព​របស់​សម្តេច។

នៅក្នុង​ពិធី​សំណេះ​សំ​ណាល ជាមួយ​យោធិន​ពិការ នៅក្នុង​មជ្ឈមណ្ឌល​យោធិន​ពិការ​ ៣១៧ កោះស្លា នា​ព្រឹក​ថ្ងៃទី​១០ ខែមិថុនា ឆ្នាំ​២០១៤ សម្តេច​តេជោ ហ៊ុន សែន ដែល​រួម​ដំណើរ​ដោយ​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន បាន​មាន​ប្រសាសន៍​ប្រតិកម្ម​ខ្លាំងៗ​ថា «​ខ្ងុំ​អត់​ទាន់​ងាប់​ទេ ហើយ​កុំ​សង្ឃឹម​បន់​ឱ្យ​ខ្ញុំ​ងាប់​ឱ្យសោះ តែ​បើ​សិន​ជា​ខ្ញុំ​ងាប់​ពិតមែន ត្រៀម​បង្វិច​ឱ្យ​ហើយ​​ទៅ ​នេះ​ខ្ញុំ​និយាយ​ពិត​ក្រែងលោ​មិនដឹង!»។​ ​

សម្តេច​​តេ​ជោនាយករដ្ឋមន្ត្រី​មាន​ប្រសាសន៍​ថា ក្នុង​នាម​ជាមនុស្ស​គួរ​តែ​មាន​ការចេះ​ដឹង​កុំ​បន់​ឲ្យ​គេ​ស្លាប់។ ​«​មនុស្ស​រស់​នៅ​​ឱ្យ​ជ្រងោៗ ចេះ​ឱ្យ​គេ​បោក​បាន​ធ្វើ​នយោបាយ​ អី​ក៏​យ៉ាប់​ម្ល៉េះ? ចាញ់ឆ្នោត​ឡាំប៉ា មិន​ដែល​ម្តង​​ណា​​ទទួល​ស្គាល់ ហើយ​ធ្វើ​អ្វី​គេ​មិនកើត បែរជា​មក​បន់​ឱ្យ​គេ​ងាប់, អស់លោក​ល្មមៗ​បាន​ហើយ ព្រោះ​ខ្ញុំ​បណ្តោយ​ឱ្យ​លោក​ឯង​ប៉ុន្មាន​រយៈ​ហើយ តែបើ​ចង់​ដឹង​តែ​៤៨​ម៉ោង គឺ​គ្រប់គ្រាន់! នេះ​មិនមែន​ជាការ​គំរាម តែ​ជា​ការនិយាយ​គ្នា ឱ្យដឹង​ស​ខ្មៅ ព្រោះ​លោក​ឯង​វា​ខូច​ពេក​ហើយ ប្រមាថ​​ជីវិត​ខ្ញុំ​សព្វ​គ្រប់បែបយ៉ាង ដែល​មិន​អាចទទួល​យក​បាន»​។​

សម្តេច​តេជោមាន​ប្រសាសន៍​ថា ខ្ញុំ​សូម​ផ្តាំ​ក្នុង​ករណី​ដែល​ខ្ញុំដាច់​សរសៃ​ឈាម​អញ្ចឹង​មែន សូម​វេច​បង្វេច​ឲ្យ​ស្រួល ដើម្បី​រត់ ព្រោះ​អ្នក​ដែល​មាន​លទ្ធភាព​បញ្ជា​កម្លាំង​ប្រដាប់​សរុប គឺមាន​តែម្នាក់​ហ្នឹង​ឯង។ សម្តេច​តេជោ​ថ្លែង​ថា សូម​កុំបន់​ឲ្យ ហ៊ុន សែន ស្លាប់​ព្រោះ​គេ​កំពុង​ត្រូវ​ការ ហ៊ុន សែន ដើម្បី​គ្រប់​គ្រងស​ភាព​ការណ៍ សូម្បី​តែ​ជនបរទេស​មួយ​ចំនួន​ក៏ខ្សឹបខ្សៀវ​ជាមួយ​គ្នា​ថា «ពេល​នេះ​មិនទាន់​អត់ ហ៊ុន សែន បាន​ទេ»​។

​សម្ដេច​តេជោ​ពន្យល់ថា «​រដ្ឋមន្ត្រី​ការពារជាតិ​មិន​អាច​បញ្ជា​កម្លាំង​ប៉ូលិស ឬ​រដ្ឋបាល​ស៊ីវិល​បាន , រដ្ឋមន្ត្រី​មហាផ្ទៃ​មិន​អាច​បញ្ជា​លើ​ទាហាន​កើត មិន​អាច​បញ្ជា​លើ PM បាន អ៊ីចឹង​ខ្ញុំ​សុំ​ផ្ដាំ​បើ​សិនជា​ករណី​មាន​អ៊ីចឹង​មែន គួរតែ​វេច​បង្វិច​ត្រៀម​ឱ្យ​ស្រួល ក្រែងលោ​វា​មាន​យថាហេតុ​អី​កើតឡើង ងាប់​ខ្លួនឯង​ទេ!​។

ទាក់​ទង​នឹង​ការ​ឃោស​នា​របស់​គណបក្ស​នយោបាយ​ប្រឆាំង ខុស​រដូវ​នៃការឃោស​​បោះ​ឆ្នោត​​​សម្តេចតេជោ​បាន​មាន​ប្រសាសន៍ពន្យល់​​​ថា ការ​បោះ​ឆ្នោត១ ឆ្នាំ​ហើយ សូម​កុំបន្ត​ឃោស​នា​​តទៅ​ទៀត​ ចាំដ​ល់​ឆ្នាំ​២០១៨ ចាំ​ឃោសនា។ ខ្ញុំ​សូម​បញ្ជាក់​ចុងក្រោយ​ថា អ្វី​ដែលខ្ញុំ​និយាយ​នេះ​ជារឿងពិត ហើយ​កុំប្រថុយ​ហ្នឹង​ធ្វើ។ ​សូម​កុំឃើញ​នៅប្រទេស​អេហ៊្សីប​គេធ្វើបាន​ទុយ​ណេស៊ី លីប៊ី គេ​ធ្វើ​បាន ប៉ុន្តែ​នេះ​នៅ​កម្ពុជា។ កុំថា​នៅ​បាងកក​គេធ្វើ​បាន នៅ​កម្ពុជា​ចង់​ធ្វើដែរ មួយ​ថៃ មួយ ​កម្ពុជា មួយ យីង​ឡាក់ មួយ ហ៊ុន សែន ខុសគ្នា។ ខ្ញុំ​សូម​ប្រដៅ​ឲ្យច្បាស់​ប្រាប់​ឲ្យចំ ហើយ​អស់​លោក​បរទេស​សូម​នៅ​ឲ្យ​ស្ងៀម កិច្ចការ​ផ្ទៃ​ក្នុង​កម្ពុជា ទុក​ឲ្យ​កម្ពុជា​ដោះ​ស្រាយ លើក​ទឹក​ចិត្ត​ទទួល​បាន ប៉ុន្តែ​ជ្រៀត​ជ្រែក​មិនអាច​ទទួល​យកបាន​ទេ ត្រូវ​គោរពច្បាប់​របស់​កម្ពុជា។ សម្តេច​តេជោ​​​បញ្ជាក់​ថា ប្រទេស​ជិត​ខាង​យើង​យោធា​កាន់​អំណាច ចាប់​ខ្លួន​អ្នក​​កើតចេញពី​ការបោះ​ឆ្នោត ម៉េច​ក៏គេ​ធ្វើបាន។ នៅ​ប្រទេស​អេហ៊្សីប គេចាប់​ខ្លួន​ប្រធា​នា​ធិប​តី​​ចេញពីការ​បោះឆ្នោត ឥឡូវ​អ្នក​ចាប់​ប្រធានា​ធិបតី​ឡើង​ធ្វើជា​ប្រធានាធិបតី។ ចំណែក​យើង​​ឈ្នះ​ឆ្នោត​ឆ្លងកាត់​សភា ព្រះមហាក្សត្រ​តែង​តាំង ដូច​ម្តេច​ដោះ​ស្រាយ​បញ្ហា​មិនបាន។

សម្តេចតេជោនាយក​រដ្ឋមន្រ្តី​ក៏បាន​ព្រមានដែរ​ថា ល្មមៗ​បានហើយ​ប្រយ័ត្ន​គេ​មិន​ខន្តី ខ្លួន​ឯង មាន​ស្អី​ពិត​ប្រាកដ ឯ​បញ្ហាញុះ​ញង់ ឯកសារ​មាន​គ្រប់​គ្រាន់ ហើយ​ផ្ញើ​ឲ្យ​ស្ថានទូត​នានា ពេល ចាំ​បាច់​លោក​ឯងស្ទុះ​អត់​រួច​ទេ ហើយ​អត់​មានអភ័យ​ឯកសិទ្ធិ​ទេ ដីកា​តុលាការ​ចាប់ខ្លួន​តែម្តង ហើយ​សូម​កុំ​និយាយថា កំពុង​រៀបចំ​ចរចា គំរាម​ចាប់​ខ្លួន គេ​មិន​ចាប់ គេ​ទុក​ឲ្យខ្លួន​មក​ចរចា យូរៗ​ទៅ​ព្រហើន​ទៅៗ។

ពាក់​ព័ន្ធ​នឹង​ការទាមទារ​របស់​គណបក្ស​សង្រ្គោះជាតិ ចង់​ឲ្យគណៈ​កម្មាធិការ​ជាតិរៀបចំកា​រ​បោះ​ឆ្នោត (គ.ជ.ប) ក្លាយ​ជាស្ថាប័ន​នោះ សម្តេច​តេជោ​ថ្លែងថា ភាសា​ពាក្យ​ថា គ.ជ.ប ជា ស្ថាប័ន​ធម្មនុញ្ញ ខ្ញុំ​មិន​ដែល​ឮទេ បើ​មាន​ចែង​ក្នុង​រដ្ឋធម្មនុញ្ញ​ខ្ញុំឮ ខ្ញុំ​ចេះ ប៉ុន្តែ​ស្ថាប័ន​ធម្មនុញ្ញ​វា អត់​មាន។ ឥឡូវ​ខ្ញុំ​ប្រាប់​ទៅ ខ្ញុំ​បាន​ឯកភាព ហើយ​ខាង​គណបក្ស​ប្រជាជនកម្ពុជា​បាន​ឯកភាព​ដាក់ គ.ជ.ប ទៅ​ក្នុង​ជំពូក​ទី១៥ ថែម​មួយ​ជំពូក​ទៀត​ធ្វើវិសោធនកម្ម​រដ្ឋធម្មនុញ្ញ។ រដ្ឋ​ធម្មនុញ្ញ​ជំពូ​ក​ទី ១៥ ចែង​ពីស្ថាប័នរៀប​ចំការបោះ​ឆ្នោត តួនាទី ភារកិច្ច និង​របៀប​ជ្រើស​តាំង។

សម្តេចតេជោ​បាន​មាន​ប្រសាសន៍​បញ្ជាក់​ថា បញ្ហា​ធំ​របស់​ខ្ញុំគឺ​ប្រជាពលរដ្ឋ​បានសេច​ក្តីសុខ ​ឬ អត់មាន​ទឹក​ធ្វើស្រែទេ មន្រ្តីរាជការ កម្លាំង​ប្រដាប់​អាវុធ​របស់​យើង​បើក​ប្រាក់​ខែទាន់​ពេលទេ រកវិធី​ដំឡើង​ប្រាក់ខែកម្មករ​យ៉ាងដូច​ម្តេច ជំរុញការ​នាំចេញ​កសាង​ប្រទេស ត្រង់​ក្រុម​ប្រឆាំង​ទៅណាក៏​ទៅៗ​ ហើយ​ខ្ញុំការពារ​រដ្ឋធម្មនុញ្ញ ការពារ​ជាតិ សាសនា ព្រះមហាក្សត្រ ។

​ទាក់​ទង​ទៅនឹង​ការ​សុំ​បង្កើត​ស្ថានីយ៍​ទូរ​ទស្សន៍​របស់​គណបក្ស​ប្រឆាំង ​សម្ដេច​តេជោ​នាយ​ក​រដ្ឋ​មន្ត្រី​​មាន​ប្រ​សាសន៍ឲ្យ​ដឹង​​ថា ចង់​បង្កើត​ទូរទស្សន៍​ ខ្ញុំ​ឲ្យ តាមរយៈក្រុមហ៊ុន​មួយ​សរសេរ​សំបុត្រដើម្បីស្នើ​សុំ​បង្កើត​​ទូរទស្សន៍ ខ្ញុំ​ឲ្យ ខ្ញុំ​ប្រាប់​ទៅ​ទៀត ​តាំង​ពី​មុន​ឃោសនា​បោះឆ្នោត​ជ្រើស​​រើស​​​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ ខ្ញុំ​បាន​ប្រាប់​តាមរយៈ​ភ្នាក់ងារ ព្រោះ​បាន​សួរ​ខ្ញុំពីរឿង​នេះ នៅ​ថ្ងៃ​ទី៩ ពិភាក្សា​គ្នា​តាម​ទូរ​ស័ព្ទ ប៉ុន្តែ​ក្រោយ​មក​បញ្ជូន​តាម​ភ្នាក់ងារ ខ្ញុំ​ថា​ ឲ្យ​គណបក្ស​បង្កើត​អត់​បាន​ទេ ព្រោះ​ស្រុក​ខ្មែរ ៥០ ទៅ ៦០ គណបក្ស បើ​គណបក្ស​មួយ​មាន​​ទូរទស្សន៍​មួយវា​មិនងាប់​បាត់​ទៅ​ហើយ។ សម្តេច​តេជោ​បញ្ជាក់​ថា សុំ​ឲ្យ​បង្កើត​ក្រុមហ៊ុន​ទៅ​ហើយ​ណែនាំ​ទៀត​ថា ក្រុម​ហ៊ុន​​នោះ​ត្រូវចុះ​បញ្ជីពាណិជ្ជកម្មឲ្យ​បាន​ត្រឹម​ត្រូវ។ សន្យាថា​ធ្វើ ហើយ​ខ្ញុំក៏បានសួរ​ទៅ​ឯក​ឧត្តម ខៀវ កាញារីទ្ធ ដែរ អាច​ចែក​១ កាណាល់​ចេញ​ពីទូរទស្សន៍​ជាតិ​​យក​មកឲ្យគាត់​បង្កើត​ទូរទស្សន៍ ហើយ​ឲ្យ​គាត់ចារ ដើម្បី​កុំ​ឲ្យ​ក្រុមហ៊ុន​វា​ក្បត់​គាត់​ទៅ​ថ្ងៃ​ក្រោយ គិត​ឲ្យគាត់​អីញ្ចឹង​ទៀត ក្រែង​លោ​ក្រុមហ៊ុន​នោះ ថ្ងៃក្រោយ​វាយក​អាជ្ញា​ប័ណ្ណ​នោះ​ទៅ​ធ្វើស្អីក្បត់​គាត់​ទៅ​ទៀត ឲ្យ​គាត់​ចារ​តិច​ទៅ រួច​បាន​ខ្ញុំ​ចារ​ពី​លើឲ្យ​១ កាណាល់​បង្កើត​ទូរទស្សន៍។ តែ​មក​ដល់ម៉ោង​នេះ ដោយ​​សារ​តែចង់​បំបិទ​ចោល​លទ្ធផល​ចរចា ខ្លួនបែ​រ​ជា​អត់​ធ្វើការងារ​នេះ​ទេ ខ្ញុំ​សូមផ្ដាំ​ទៅ​អ្នក​គាំទ្រ​​​បក្ស​ប្រឆាំង​ផង​ថា ខ្ញុំ​ឲ្យបង្កើត​ទូរទស្សន៍។

សម្ដេច​តេជោ​នាយក​រដ្ឋមន្ត្រី​បន្ត​ថា ប៉ុន្តែ​មនុស្ស​នេះ​វាខូច រួច​លោក​ទូតអាមេរិក​បាន​ប្រាប់​ឯកឧត្ដម ស ខេង ថា បើ​សិន​ឲ្យបង្កើត​ទូរទស្សន៍​ គឺហ្នឹង​ដោះស្រាយ​ភ្លាម​ឲ្យ​បង្កើត​តែ​គាត់​មិន​ព្រម​សរសេរ​សំបុត្រ​មក​ឲ្យ​ធ្វើ​ម៉េច​បាន។ បាន​សេចក្ដី​ថា គ្មាន​ចេតនា​ដោះ​ស្រាយ​បញ្ហា​ទេ ហើយ​​បើ​ដោះ ក៏ដោះ​បើមិនដោះ​ក៏ហី​ទៅ។

សម្តេច​តេជោក៏បាន​ព្រ​មាន​ ឲ្យគណបក្ស​ប្រឆាំង​កុំព្យាយាម​ធ្វើបាតុកម្ម​ឲ្យសោះ បើសិន​ជា​ធ្វើ​បាតុ​កម្ម​ណាមួយ​ខុស​នឹង​ច្បាប់ ​គឺរដ្ឋាភិបាល​មិនអត់​ឱន​ឲ្យ​ទេ។ “នៅ​មានទោស​នៅ​ឡើយ​ទេ ពាក់ព័ន្ធ​ទៅ​នឹងប​ទញុះ​ញង់​បង្កឲ្យមានចលា​ចល មាន​មនុស្ស​ស្លាប់ និង​ខូចខាត​ទ្រព្យ​សម្បត្តិ។ គេ​នៅ​ខន្តី​ យើង​ចេះ​តែ​តម្លើង​ឫទ្ធ”។ សម្តេច​តេជោ​សង្កត់​ធ្ងន់​​ថា បើ​សិន​ជា​រាជរដ្ឋាភិ​បាល លែង​ខន្តី គឺ​អ្នកឯង​នឹងជាប់​ខ្នោះ​ហើយ។ បើ​សិន​ជា​រាជរដ្ឋាភិបាល​ចង់​ធ្វើ គឺ​រយៈ​ពេលតែ ៤៨ ម៉ោង​ទេ ហើយ​កុំព្យាយាម​រត់ចូល​ស្ថានទូត។

សម្តេចតេជោ​បាន​មាន​ប្រសាសន៍​ថា សម្តេច​បាន​ទូលថ្វាយ​ព្រះមហាក្សត្រ​ថា បើសិន​ជា​គណ​បក្ស​ប្រឆាំង​ចូល​ប្រជុំរដ្ឋសភា នោះ​បញ្ហាល្អ​នឹង​ត្រូវដោះ​ស្រាយ​បាន ប៉ុន្តែ​បើសិន​ជា​មិន​ចូល​​រដ្ឋសភាទេ នោះ​រាជរដ្ឋាភិ​បាល និងរដ្ឋសភា​នឹង​បន្តដំណើរ​រហូត​ដល់ការ​បោះ​ឆ្នោត​ឆ្នាំ ២០១៨៕

សេចក្តីជូនដំណឹងរបស់ខុទ្ទកាល័យសម្តេចអគ្គមហាសេនាបតីតេជោ នាយករដ្ឋមន្រ្តី នៃព្រះរាជាណាចក្រកម្ពុជា