ពាក់ព័ន្ធនឹងការអភិរក្សវិស័យវប្បធម៌ខ្មែរ លោក ហ៊ុន សែន បានថ្លែងថា ទទួលទានផ្លែឈើត្រូវនឹកដល់អ្នកដាំដើម ផឹកទឹកត្រូវនឹកដល់ប្រភព

នៅព្រឹកថ្ងៃទី២៩ ខែកញ្ញា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានថ្លែងថា យើងពិតជានឹកឃើញទៅដល់អ្នកដែលបានរួមចំណែកធ្វើកិច្ចការទាក់ទងនឹងបញ្ហាវប្បធម៌នេះពោលគឺ ទទួលទានផ្លែឈើត្រូវនឹកដល់អ្នកដាំដើម ផឹកទឹកត្រូវនឹកដល់ប្រភព។ លោក បានថ្លែងដូចនេះក្នុងឱកាសពិធីសំ​ណេះសំណាល និងបំពាក់គ្រឿងឥស្សរិយយស ជូនព្រឹទ្ធាចារ្យ កោសល្យវោហារ គង់ ណៃ ដែលនៅពេលថ្មីៗនេះ ព្រឹទ្ធាចារ្យ គង់ ណៃ ត្រូវបានរដ្ឋាភិបាលជប៉ុនផ្តល់រង្វាន់ «សិល្បៈ និងវប្បធម៌ក្រុងហ្វុគុអូកា» ឆ្នាំ២០១៧។

លោកនាយករដ្ឋមន្រ្តី ហ៊ុន សែន បានរម្លឹកផងដែរអំពីប្រវត្តិដែលជួបលោកព្រឹទ្ធាចារ្យកាលពីឆ្នាំ ១៩៨២ នៅខេត្តកំពតជាមួយសិល្បៈករសិល្បៈការិនី ព្រមទាំង លោកតា ប្រាជ្ញ ឈួនផងដែរដែលជាភ័ព្វសំណាងខ្លាំងណាស់ ដែលយើងបានចេញផុតរួចពីស្ថានភាពដ៏លំបាកលំបិននៃរបបប៉ុល ពត ដែលកាលពីមុនដោយសារប្រទេសអសន្តិសុខ រាល់ការសម្តែងល្ខោន និងសិល្បៈនានា គឺតួអង្គសម្តែងជាបុរសភាគច្រើនត្រូវកាន់កាំភ្លើងគ្រប់ៗគ្នា។ លោកពិតជាមានមោទនភាពដែលយើងបានរួមគ្នាចេញដំណើរពីស្ថានភាពលំបាកលំបិន ពិតមែនតែសិល្បៈករសិល្បៈការិនីយើងមួយចំនួន បានលាចាកលោកនេះទៅទោះបីជាជំនាន់មុនក្តី មុនរបប ក្នុងរបបប៉ុលពតក្តី ក៏ប៉ុន្តែក្រោយមកទៀត ក៏នៅមានសិល្បៈករ សិល្បៈការិនីយើងមួយចំនួនបានចូលរួមជាមួយយើងដើម្បីកសាងរៀបចំឡើងវិញនូវសិល្បៈសម្រាប់ប្រទេសរបស់យើង។

ជាមួយគ្នានេះដែរ លោកនាយករដ្ឋមន្រ្តី ហ៊ុន សែន ក៏បានរម្លឹកអំពីការខិតខំរបស់អតីតរដ្ឋមន្រ្តីក្រសួងវប្បធម៌ពីមុនដូចជា លោក កែវ ចិន្តា និងលោកព្រឹទ្ធាចារ្យ ឆេង ផុន ដែលបានប្រមែប្រមូលសិល្បៈករ សិ​ល្បៈ​ការិនីដែលបាននៅរស់រានមានជីវិតពីរបបកាប់សម្លាប់ ប៉ុល ពត ដែលពេលនោះគឺជាដំ​ណាក់កាលប្រមូលទុន ដើម្បីរៀបចំវប្បធម៌ជាតិឱ្យរស់ឡើងវិញ។ យើងបានខិតខំរួមគ្នាធ្វើឱ្យសិល្បៈវប្បធម៌ជាតិរស់រានមានជីវិត រួមទាំងចាប៉ីដងវែង ហើយដែលនៅឆ្នាំ២០១៦ ក៏បានដាក់បញ្ចូលជាបេតិកភ័ណ្ឌអរូបីយ៍ពិភពលោកផងដែរ។ ប្រសិនបើយើងក្រឡេកមើលទៅក្រោយគឺលំបាកខ្លាំងណាស់ ចំពោះអ្នកដែលមិនធ្លាប់ដឹងពីអតីតកាលរបស់កម្ពុជាគឺមិនបានដឹងថាមានអ្វីកើតឡើងទេ អ្វីដែលគេបានឃើញសព្វថ្ងៃគឺគិតថាកម្ពុជាមិនមានអ្វីកើតឡើងឡើយ។

ប្រមុខរាជរដ្ឋាភិបាលកម្ពុជា បានមានប្រសាសន៍បន្ថែមថា ដែលហៅថាវប្បធម៌វាមិនមែនគ្រាន់តែសិល្បៈមួយមុខឬចម្រៀងមួយមុខនោះទេ ក៏ប៉ុន្តែវាពាក់ព័ន្ធបញ្ហាច្រើនណាស់ ហើយដែលគ្របដណ្តប់លើទិដ្ឋភាពជាច្រើនដែលយើងបានខិតខំរួមគ្នាធ្វើឱ្យរស់រានមានជីវិត មិនត្រឹមតែរស់រានមានជីវិតក្នុងក្របខណ្ឌប្រទេសទេ។ កន្លងទៅយើងក៏បានដាក់ជាបន្តបន្ទាប់ទាំងរូបី និងអរូបីទៅក្នុងបញ្ជីបេតិកភណ្ឌពិភពលោកដូចជាចាប៉ីដងវែងនេះ គឺត្រូវបានដាក់បញ្ចូលទៅក្នុងសម្បត្តិបេតិកភណ្ឌអរូបីពិភពលោកនៅឆ្នាំ២០១៦កន្លងទៅ។

លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា លោក និងតួអង្គផ្សេងទៀតនៃអ្នកដឹកនាំកម្ពុជា ក្រោយសម័យប៉ុល ពត បានផ្សាភ្ជាប់ខ្លួនយ៉ាងខ្លាំងជាមួយគ្រប់ទិដ្ឋភាព គ្រប់ផ្នែក គ្រប់វិស័យ និងអនុវិស័យដែលក្នុងនោះរាប់ទាំងវិស័យសិល្បៈ វប្បធម៌ដែលអាចផ្សាភ្ជាប់ខ្លួនជាមយយសិល្បៈច្រើនទម្រង់។ សិល្បៈខ្មែរក៏ទទួលបានការទទួលស្គាល់ជាបន្តបន្ទាប់នូវស្នាដៃនិងសិ​ល្បៈបែបបូរាណរបស់យើង ហើយលោក សង្ឃឹមថារឿងនេះយើងនឹងបន្តអភិរក្សតទៅទៀតជាមួយនឹងអ្វីដែលកំពុងតែស្ថិតនៅក្នុងប្រទេសរបស់យើង។ ទន្ទឹមនឹងនេះដែរ លោកនាយករដ្ឋមន្រ្តី ហ៊ុន សែន ក៏បានខិតខំលើកស្ទួយសិល្បៈវប្បធម៌ខ្មែរ ក្នុងនោះ រួមទាំងឧបករណ៍ភ្លេងខ្មែរជាដើមនៅក្នុងពិធីលៀងសាយភោជន៍ ដែលបានរៀបចំជូនភ្ញៀវអន្តរជាតិ និងប្រមុខរដ្ឋនានា ដែលមកទស្សនកិច្ចនៅកម្ពុជាផងដែរ៕

 

លោកនាយករដ្ឋមន្រ្ដី ហ៊ុន សែន អនុញ្ញាតឱ្យសិស្សជាប់បាក់ឌុបគ្រប់ឆ្នាំសិក្សា ប្រឡងចូលរៀនកម្រិតបរិញ្ញាបត្រ តាមគ្រឹះស្ថានបណ្តុះបណ្តាល វិស័យសុខាភិបាល ដោយមិនកំណត់និទ្ទេស

បន្ទាប់ពីមានសិស្សប្រឡងជាប់ សញ្ញាបត្រមធ្យមសិក្សាទុតិយភូមិ (បាក់ឌុប) សំណូមពរតាមរយៈការ Comment នៅលើកគេហទំព័រ Facebook របស់លោកនាយករដ្ឋមន្រ្ដីអំពីលក្ខខណ្ឌ ប្រឡងចូលសិក្សាតាម គ្រឹះស្ថានបណ្តុះបណ្តាលវិស័យសុខាភិបាល តម្រូវឱ្យសិស្សទទួលបាននិទ្ទេសពី A ដល់ C សម្រាប់អ្នកជាប់ បាក់ ឌុបមុនឆ្នាំ២០១៤ ទើបប្រឡងចូលបាននោះ បានបង្កឱ្យមានសិស្សមួយចំនួន ដែលស្រឡាញ់ជំនាញ សុខាភិបាល មិនអាចប្រឡងនោះ ទើបលោកនាយករដ្ឋមន្រ្ដី ហ៊ុន​ សែន សម្រេចថា ការប្រឡងចូលរៀន ក្នុងវិស័យសុខាភិបាល គឺអនុញ្ញាតឱ្យចូលប្រឡងទាំងអស់ ឱ្យតែជាប់បាក់ឌុប។

យុវជនម្នាក់ដែលមានឈ្មោះ Vouth Vatey បាន Comment ក្នុង Facebook លោកនាយករដ្ឋមន្រ្ដី ហ៊ុន សែន ថា រូបគេតំណាងឱ្យសិស្សប្រឡជាប់បាក់ឌុបមុនឆ្នាំ២០១៤ ដែលចង់សិក្សាជំនាញសុខាភិបាល សំណូមពរលោកនាយករដ្ឋមន្រ្ដី ជួយសម្រួលឱ្យសិស្ស និស្សិតដែលបានបញ្ចប់មធ្យមសិក្សាទុតិយភូមិ មុនឆ្នាំ២០១៤ ដោយទទួលបានត្រឹមនិទ្ទេស D, E អាច ចុះឈ្មោះប្រឡងប្រជែងថ្នាក់ជាតិ ចូលរៀនថ្នាក់ ឧត្តមសិក្សា ក្នុងវិស័យសុខាភិបាល នាឆ្នាំ២០១៧-២០១៨ ខាមុខនេះផងចុះ ព្រោះតាមលក្ខខណ្ឌ អ្នកជាប់បាក់ ឌុបមុនឆ្នាំ២០១៤ ត្រូវតែមាននិទ្ទេសចាប់ពី A ដល់ C មិនដូចអ្នកទើបជាប់ឌុបក្រោយឆ្នាំ២០១៤ឡើយ គឺគ្រប់ទិន្ទេសទាំងអស់អាចប្រឡងចូលរៀនបាន។

ឆ្លើយតបសំណូមពរនេះ លោកនាយករដ្ឋមន្រ្ដីបាន Comment វិញថា «សុំពិនិត្យសំណូមពរនេះផង។ យោបល់ខ្ញុំមិនចាំបាច់កំណត់និទេ្ទសទេ គឺអនុញ្ញាតឱ្យចូលប្រឡងទាំងអស់ឱ្យ តែប្រឡងជាប់មធ្យមសិក្សា ទុតិយភូមិ»។

ក្រោយផ្តល់យ៉ាងដូច្នេះ គណៈកម្មាធិការប្រឡថ្នាក់ជាតិ នៃទីស្តីការគណៈរដ្ឋមន្ត្រី បានចេញសេចក្តីជូនដំណឹង ថ្មីមួយ ស្តីពីការកែសម្រួលលក្ខខណ្ឌ នៃការប្រឡងថ្នាក់ជាតិជ្រើសរើសចូលរៀនថ្នាក់ឆ្នាំសិក្សាមូលដ្ឋាន សម្រាប់កម្រិតបរិញ្ញាបត្រ នៅតាមគ្រឹះស្ថានបណ្តុះបណ្តាល វិស័យសុខាភិបាល​ ដោយបញ្ជាក់ថា ការប្រឡង ចូលសិក្សា អនុញ្ញាតឱ្យអ្នកប្រឡងជាប់បាក់ឌុប គ្រប់ឆ្នាំសិក្សា​ទាំងអស់ និងអ្នកជាប់បាក់ឌុបមកពីក្រៅប្រទេស អាចចុះឈ្មោះចូលប្រឡងបាន ៕

ក្រសួងសេដ្ឋកិច្ច និងហិរញ្ញវត្ថុ​ ចេញសេចក្តី​ជូនដំណឹង​ស្តីពីការ​ពន្យាពេលបង់ពន្ធ​លើអចលនទ្រព្យ​ សម្រាប់​ឆ្នាំ២០១៧​

ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៩ ខែកញ្ញា ឆ្នាំ២០១៧នេះ បានចេញសេចក្តីជូនដំណឹងស្តីពីការពន្យាពេលបង់ពន្ធលើអចលនទ្រព្យ សម្រាប់ឆ្នាំ២០១៧ រហូតដល់ថ្ងៃទ៣១ ខែតុលា ឆ្នាំ២០១៧។

អគ្គនាយកដ្ឋានពន្ធដារ ជូនដំណឹងដល់ម្ចាស់អចលនទ្រព្យទាំងអស់ ដែលមានអចលនទ្រព្យស្ថិតក្នុងភូមិសាស្រ្តត្រូវជាប់ពន្ធលើអចលនទ្រព្យ នៃរាជធានី ខេត្ត ទូទាំងប្រទេស ឲ្យបានដឹងថា អគ្គនាយកដ្ឋានពន្ធដារពិនិត្យឃើញថា រហូតមកទល់ពេលនេះ មានម្ចាស់អចលនទ្រព្យជាច្រើនបានមកប្រកាសបង់ពន្ធលើអចលនទ្រព្យ សម្រាប់ឆ្នាំ២០១៧ ហើយក៏នៅមានម្ចាស់អចលនទ្រព្យមួយចំនួនទៀត នៅមិនទាន់បានបំពេញកាតព្វកិច្ចបង់ពន្ធប្រភេទនេះនៅឡើយទេ។

អគ្គនាយកដ្ឋានពន្ធដារ បានបញ្ជាក់ថា ដើម្បីបង្កលក្ខណៈងាយស្រួល និងផ្តល់លទ្ធភាពជូនម្ចាស់អចលនទ្រព្យដែលមិនទាន់បានមកប្រកាសបង់ពន្ធ មានពេលវេលាគ្រប់គ្រាប់ក្នុងការមកប្រកាសបង់ពន្ធនេះ អគ្គនាយកដ្ឋានពន្ធដារ សម្រេចពន្យាពេលនៃការប្រកាសបង់ពន្ធលើអចលនទ្រព្យ សម្រាប់ឆ្នាំ២០១៧នេះ រហូតដល់ថ្ងៃទី៣១ ខែតុលា ឆ្នាំ២០១៧។ ម្ចាស់អចលនទ្រព្យទាំងឡាយដែលមិនមកប្រកាសបង់ពន្ធក្នុងអំឡុងពេល ឬក្រោយការពន្យាពេលខាងលើនេះ នឹងត្រូវទទួលរងនូវទោសទណ្ឌ ស្របតាមច្បាប់ស្តីពីសារពើពន្ធ ជាធរមាន៕

លោកនាយករដ្ឋមន្រ្តី ហ៊ុន សែន ឧបត្ថម្ភថវិកា ១០០លានរៀលជូនលោកតា គង់ ណៃ និងថវិកា២០លានរៀលជូនលោកតា ប្រាជ្ញ ឈួន

នៅព្រឹកថ្ងៃទី២៩ ខែកញ្ញា ឆ្នាំ២០១៧នេះ ក្នុងឱកាសពិធីសំ​ណេះសំណាល និងបំពាក់គ្រឿងឥស្សរិយយសជូនព្រឹទ្ធា​ចារ្យ កោសល្យវោហារ គង់ ណៃ ដែលនៅពេលថ្មីៗនេះ ព្រឹ​ទ្ធាចារ្យ គង់ ណៃ ត្រូវបានរដ្ឋាភិបាលជប៉ុនផ្តល់រង្វាន់ «សិល្បៈ និងវប្បធម៌ក្រុងហ្វុគុអូកា» ឆ្នាំ២​០​១៧ លោកនាយករដ្ឋមន្រ្តី ហ៊ុន សែន បានបំពាក់ជូនមេដាយព្រះរាជាណាចក្រថ្នាក់មហាសេរីវឌ្ឍន៍ជូន លោកតា គង់ ណៃ និងថវិកា ១០០ លានរៀល ហើយលោកតា ប្រាជ្ញ ឈួន ក៏ទទួលបានមេដាយព្រះរាជាណាចក្រថ្នាក់មហាសេរីវឌ្ឍន៍ និងថវិកាឧបត្ថម្ភ ២០លានរៀលផងដែរ។

លោកនាយករដ្ឋមន្រ្តី ហ៊ុន សែន បានបញ្ជាក់ថា ជានិច្ចជាកាល លោកនិងភរិយា តែងតែយកចិត្តទុកដាក់ចំពោះមរតកមនុស្សរស់ តាមរយៈការជួយឧបត្ថម្ភជាថវិកាអស់រយៈពេលជាង ២០ឆ្នាំមកហើយ។ លោក ក៏បានអបអរសាទរផងដែរចំពោះសិល្បៈសម័យ បើគ្មានបូរាណ ក៏គ្មានសម័យដែរ និងអំពាវនាវឱ្យយកចិត្តទុកដាក់ឱ្យបានខ្លាំងថែមទៀត ក្នុងការថែរក្សា និងអភិរក្សលើសិល្បៈចាប៉ី និងអាយ៉ៃផងដែរ៕

ចាប់ពីឆ្នាំ២០១៨តទៅ លោកនាយករដ្ឋមន្រ្តី ហ៊ុន សែន នឹងមានពិធីសំណេះសំណាលជាមួយសិល្បៈករ សិល្បៈការិនីមួយឆ្នាំម្តង

នៅព្រឹកថ្ងៃទី២៩ ខែកញ្ញា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានថ្លែងថា លោកនឹងមានកម្មវិធីសំណេះសំណាលជាមួយសិល្បៈករ សិល្បៈការិនីក្នុងមួយឆ្នាំម្តងចាប់ពីឆ្នាំ២០១៨ខាងមុខនេះតទៅ គឺសម្រេចយកចំថ្ងៃទិវាវប្បធម៌ ៣មីនាតែម្តង។ លោក បានថ្លែងដូចនេះក្នុងឱកាសពិធីសំណេះសំណាល និងបំពាក់គ្រឿងឥស្ស រិយយស ជូនព្រឹទ្ធាចារ្យ កោសល្យវោហារ គង់ ណៃ ដែលនៅពេលថ្មីៗនេះ ព្រឹទ្ធាចារ្យ គង់ ណៃ ត្រូវបានរដ្ឋាភិបាលជប៉ុនផ្តល់រង្វាន់ «សិល្បៈ និងវប្បធម៌ហ្វឹគឹអូកា» ឆ្នាំ២០១៧។

លោកនាយករដ្ឋមន្រ្តី ហ៊ុន សែន បានបញ្ជាក់ថា ពិធីជួបសំណេះសំណាលជាមួយសិល្បៈករ សិល្បៈការិនីនេះ គឺដើម្បីរំលឹកពីអនុស្សាវរីយ៍ និងសុខទុក្ខរបស់សិល្បៈករ សិល្បៈការិនីចាស់ៗរបស់ខ្មែរយើងដែលនៅក្នុងពិធីនោះគឺមានការញ៉ាំអាហាររួមគ្នា និងកម្មវិធីសម្តែងសិល្បៈកំសាន្តផងដែរ៕

ក្រសួងបរិស្ថាន ចូលរួមកិច្ចប្រជុំលើកទី១ស្តីពីសារធាតុបារ៉ត នៅប្រទេសស្វីស

នៅមជ្ឈមណ្ឌលសន្និសីទអន្តរជាតិទីក្រុងហ្សឺណែវ សហព័ន្ធស្វីស នៅថ្ងៃទី២៨ ខែកញ្ញា ឆ្នាំ២០១៧ លោក អ៊ាង សុផល្លែត អនុរដ្ឋលេខាធិការ តំណាងលោករដ្ឋមន្ត្រីក្រសួងបរិស្ថាន អមដំណើរដោយឯកអគ្គរាជទូតកម្ពុជាប្រចាំសហព័ន្ធស្វីស និងអង្គការសហប្រជាជាតិ បានដឹកនាំគណៈប្រតិភូក្រសួងបរិស្ថាន ចូលរួមពិធីបើកជាផ្លូវការកិច្ចប្រជុំលើកទី១នៃបណ្តាប្រទេសភាគីហត្ថលេខីអនុសញ្ញាទីក្រុងមីណាម៉ាតាស្តីពីសារធាតុបារ៉ត (COP1) ក្រោមអធិបតីភាពលោកស្រីប្រធានាធិបតីសហព័ន្ធស្វីស។

កិច្ចប្រជុំនេះរៀបចំដោយអង្គការ UNEP ប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៩ ខែកញ្ញា ឆ្នាំ២០១៧ ដែលមានវត្តមានរដ្ឋមន្ត្រីមកពី៨០ប្រទេស ក្នុងចំណោមប្រទេស ចំនួន១៧៦ ដែលបានចូលរួម។ បន្ទាប់កម្មវិធីបើកផ្លូវការ លោក អ៊ាង សុផល្លែត និងប្រតិភូបានអញ្ជើញចូលរួមកិច្ចពិភាក្សាតុមូលថ្នាក់រដ្ឋមន្ត្រីដែលផ្តោតទៅលើការបំពុលរបស់បារ៉តសាយភាយ ទៅក្នុងខ្យល់ ទឹក និងក្នុងដី ហើយត្រូវមានវិធានការទប់ស្កាត់បែបណាដើម្បីកុំឱ្យមានសោធនាដកម្មពី សារធាតុបារ៉តទាំងទិដ្ឋភាពនយោបាយរួមទាំងបច្ចេកទេស។

ថ្លែងក្នុងកិច្ចពិភាក្សាតុមូលនេះ លោកប្រធានប្រតិភូក្រសួងបរិស្ថាន បានលើកអំពីបញ្ហាបច្ចេកវិទ្យាសម្រាប់ប្រទេសកំពុងអភិវឌ្ឍន៍ក្នុងការគ្រប់គ្រង់សំណល់បារ៉តក៏ដូចជាការដកបារ៉តពីតំបន់ដែលរងការបំពុល និងការគ្រប់គ្រងបារ៉តដែលបានដកចេញពីសំណល់។

លោក អ៊ាង សុផល្លែត បានបញ្ជាក់ថា ដើម្បីសម្រេចបានជោគជ័យត្រូវមានការទទួលខុសត្រូវដោយមាន ការចូលរួមកម្រិតអន្តរជាតិ ជាតិ និងពីបុគ្គលម្នាក់ៗផងដែរ៕

លោកនាយករដ្ឋមន្រ្តី ហ៊ុន សែន នឹងបន្តតំណែងយ៉ាងតិច២អាណត្តិទៀតដើម្បីថែរក្សាសន្តិភាពនិងការអភិវឌ្ឍចៀសឆ្ងាយពីបដិវត្តន៍ពណ៌

នៅព្រឹកថ្ងៃទី២៩ ខែកញ្ញា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានថ្លែងថា លោកនឹងបន្ត២អាណត្តិទៀតយ៉ាងតិចដើម្បីរក្សាប្រទេសកម្ពុជាឱ្យមានសន្តិភាព និងការអភិវឌ្ឍចៀ​ស​​ឆ្ងាយពីបដិវត្តន៍ពណ៌។ លោក បានថ្លែងដូចនេះក្នុងឱកាសពិធីសំ​ណេះសំណាល និងបំពាក់គ្រឿងឥស្សរិយយសជូនព្រឹទ្ធាចារ្យ កោសល្យវោហារ គង់ ណៃ ដែលនៅពេលថ្មីៗនេះ ព្រឹ​ទ្ធាចារ្យ គង់ ណៃ ត្រូវបានរដ្ឋាភិបាលជប៉ុនផ្តល់រង្វាន់ «សិល្បៈ និងវប្បធម៌ហ្វុគុអូកា» ឆ្នាំ២​០​១៧។

លោកនាយករដ្ឋមន្រ្តី ហ៊ុន សែន បានបញ្ជាក់ថា លោកមិនឱ្យអ្នកណាមកបំផ្លាញទឹកដីកម្ពុជាដ៏កំសត់នេះបានទេ ដូចនេះវត្តមានរបស់លោកគឺជាវត្តមានចាំបាច់បំផុតដើម្បីរក្សាប្រទេសកម្ពុជាឱ្យស្ថិតក្នុងស្ថានភាពមានសន្តិភាព ចៀសឆ្ងាយពីបដិវត្តន៍ពណ៌ ពីការបំផ្លាញដោយអំពើក្បត់ណាមួយដែលយើងមិនអាចទទួលយកបាន។

លោក ហ៊ុន​ សែន បានបន្ថែមថា លោករីករាយណាស់ដែលបានចូលរួមចំណែកជាមួយមេដឹកនាំកម្ពុជាគ្រប់រូបតាំងពីដំណាក់កាលដំបូង នាទីដំបូងរហូតមកដល់ពេលនេះ។ លោក ថ្លែងថាបើយើងរក្សាបាននូវសន្តិភាព គឺយើងនឹងរក្សាបាននូវការអភិវឌ្ឍ រក្សាបាននូវអ្វីៗដែលយើងប្រឹងរួមគ្នាកសាងតាំងពីបាតដៃទទេរហូតដល់មានអ្វីៗដូចសព្វថ្ងៃនេះ ហើយលោកមិនព្រមដាច់ខាតជាមួយនឹងការបំផ្លាញម្តងហើយម្តងទៀតមកលើប្រទេសកម្ពុជា ទម្រាំបានមកដល់ពេលនេះគឺលំបាកខ្លាំងណាស់។

គួរបញ្ជាក់ថា ប្រទេសកម្ពុជា ធ្លាប់បានឆ្លងកាត់សង្រ្គាម និងការទម្លាក់គ្រាប់បែកជិត ៣លានតោនពីសំណាក់សហរដ្ឋអាមេរិកដែលគាំទ្រលោកសេនាប្រមុខ លន់ ណុល ផ្តួលរំលំសម្តេចព្រះនរោត្តម សីហ​នុ ដែលបានធ្វើឱ្យប្រទេសជាតិខ្ទេចខ្ទាំ បែកបាក់ និងប្រជាពលរដ្ឋកំពុងរងគ្រោះពីឥទ្ធិពលនៃគ្រាប់បែកគីមីទាំងនោះផងដែរ៕

អាជ្ញាធរមីនដឹកនាំមន្ត្រីជំនាញ ចុះវាយតម្លៃផលប៉ះពាល់ នៅទីតាំងគ្រាប់បែកគីមីដែលអាមេរិកទម្លាក់ នៅខេត្តស្វាយរៀង

នៅព្រឹកថ្ងៃទី២៩ ខែកញ្ញា ឆ្នាំ២០១៧នេះ អាជ្ញាធរមីនកម្ពុជា បានដឹកនាំមន្ត្រីជំនាញរបស់អាជ្ញាធរមីន មន្ត្រីជំនាញរបស់អាជ្ញាធរគីមី នៃក្រសួងការពារជាតិ និងមន្ត្រីជំនាញស៊ីម៉ាក់ ព្រមទាំងអាជ្ញាធរមូលដ្ឋានផងដែរ ដើម្បីសិក្សាវាយតម្លៃផលប៉ះពាល់ នៅទីតាំងដែលមានគ្រាប់បែកគីមីរបស់អាមេរិក ដែលទម្លាក់លើទឹកដីខ្មែរ នៅក្នុងឃុំគគីរ ស្រុករមាសហែក ខេត្តស្វាយរៀង។

ការពិនិត្យសិក្សាវាយតម្លៃផលប៉ះពាល់ នៅទីតាំងគ្រាប់បែកគីមីនេះ ដឹកនាំដោយលោក សេរី កុសល អនុប្រធានទី១អាជ្ញាធរមីនកម្ពុជា។

ការចុះទៅកាន់ទីតាំងគ្រាប់បែកគីមីនេះ ត្រូវបានគេដឹងថា ធ្វើឡើងបន្ទាប់ពីប្រជាពលរដ្ឋ សិស្សានុសិស្ស និងព្រះ សង្ឃ នៅជុំវិញតំបន់នោះសម្តែងក្តីព្រួយបារម្ភ និងភ័យខ្លាចចំពោះគ្រាប់បែកគីមីនេះ និងបន្ទាប់ពីប្រមុខរាជ រដ្ឋាភិបាលកម្ពុជា លោកនាយករដ្ឋមន្រ្ដី ហ៊ុន សែន សម្រេចឱ្យប្រើកញ្ចប់ថវិកាពិសេសរបស់រាជរដ្ឋាភិបាល ដើម្បីដោះស្រាយបញ្ហាអាវុធគីមី ដែលកំពុងបង្កការភ័យខ្លាចយ៉ាងខ្លាំង ដល់ប្រជាពលរដ្ឋនៅតំបន់នោះ។

សូមជម្រាបថា នៅខែមករា ឆ្នាំ២០១៧ គ្រាប់បែកគីមីទំលាក់ពីយន្តហោះសហរដ្ឋអាមេរិក ដែលទំលាក់នៅ ទីតាំងវត្ត និងសាលារៀន សិ្ថតភូមិគគីរ ឃុំគគីរ ស្រុករមាសហែកខេត្តស្វាយរៀង ត្រូវបានមន្ត្រីជំនាញ របស់ ស៊ីម៉ាក់ រកឃើញចំនួន២គ្រាប់។ គ្រាប់បែកគីមីនេះ គឺប្រភេទ Chlorobenzalmalononitrile (CS) មានទម្ងន់ ប្រមាណជាង ២០០គីឡូក្រាមក្នុងមួយគ្រាប់ ត្រូវបានប្រជាពលរដ្ឋ កប់ចោលកាលពីខែកុម្ភៈ ឆ្នាំ១៩៧០។ ភ្លាមៗបន្ទាប់រកឃើញគ្រាប់បែកគីមីនោះ មន្ត្រីជំនាញស៊ីម៉ាក់បានចុះពិនិត្យទីតាំង ដោយធ្វើការហ៊ុព័ទ្ធទី តាំងគ្រាប់បែកទាំង២នោះ មិនឱ្យប្រជាពលរដ្ឋទៅជិត ឬប៉ះពាល់ឡើយ។

សូមបញ្ជាក់ថា ក្នុងអំឡុងពេលសង្គ្រាមចន្លោះឆ្នាំ១៩៦៥ ដល់ឆ្នាំ១៩៧៣ អាមេរិក បានទម្លាក់គ្រាប់បែកជិត ៣លានតោននៅលើទឹកដីកម្ពុជា។ គ្រាប់បែកទាំងនោះ បណ្តាលឱ្យប្រជាពលរដ្ឋខ្មែរប្រមាណជាកន្លះលាននាក់ បានស្លាប់បាត់បង់ជីវិត និងជាច្រើនលាននាក់ ត្រូវបានស្លាប់ ដោយសារជំងឺ ហើយប្រជាពលរដ្ឋខ្មែររាប់លាន នាក់ ទៀត ត្រូវនិរាស្រ្តព្រាត់ប្រាស់ពីផ្ទះសម្បែង។ ជាពិសេសគ្រាប់បែកគីមីរបស់អាមេរិក នៅតែបន្តធ្វើឱ្យ ប្រជា ពលរដ្ឋខ្មែររងគ្រោះដល់ពេលបច្ចុប្បន្ន ដែលក្នុងនោះកុមារខ្មែរមួយចំនួន ត្រូវជួបពិការភាពតាំង ពីកំណើត ព្រោះសារធាតុគីមីនេះ ៕

នាយឧត្តមសេនីយ៍ សៅ សុខា បើកកិច្ចប្រជុំត្រួតពិនិត្យការងារកងរាជអាវុធហត្ថ រយៈពេល០៩ខែឆ្នាំ២០១៧

នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកង រាជអាវុធ ហត្ថលើផ្ទៃប្រទេស បានអញ្ជើញជាអធិបតីក្នុងកិច្ចប្រជុំត្រួតពិនិត្យតួនាទី ភារកិច្ច ការងារកងរាជអាវុធហត្ថ ០៩ខែ និងដាក់ចេញទិសដៅការងារត្រីមាសទី៤ ឆ្នាំ២០១៧ នៅសាលប្រជុំ សេនាធិការដ្ឋាន នៃបញ្ជាការដ្ឋាន កងរាជអាវុធហត្ថលើផ្ទៃប្រទេស ដែលប្រព្រឹត្តទៅនៅថ្ងៃទី២៩ ខែកញ្ញា ឆ្នាំ២០១៧។

លោក វង្ស ពិសេន មេបញ្ជាការរង និងជានាយសេនាធិការដ្ឋានកងរាជអាវុធហត្ថលើផ្ទៃប្រទេស បានឡើងអាន របាយការណ៍ជូនអង្គប្រជុំជ្រាបថា ការអនុវត្តតួនាទី ភារកិច្ចកងរាជអាវុធហត្ថមានជាអាទិ៍៖
១- ការងារការពារសន្តិសុខ និងសណ្តាប់ធ្នាប់ បានការពារគណៈប្រតិភូជាតិ អន្តរជាតិ កិច្ចប្រជុំ ពិធីសម្ពោធ សមិទ្ធផលនានារបស់ព្រះមហាក្សត្រ រាជរដ្ឋាភិបាល និងពិធីបុណ្យផ្សេងៗ ធ្វើសកម្មភាពសរុប៩៥.៩៥២លើក។ ជួយសម្រួលសណ្តាប់ធ្នាប់របៀបរៀបរយចរាចរណ៍កកស្ទះ ជូនប្រជាពលរដ្ឋនិងការដង្ហែក្បួនទាម ទារតវ៉ា ផ្សេងៗសរុប៨.៨៤៧លើក។ ធ្វើការត្រួតពិនិត្យសណ្តាប់ធ្នាប់កងទ័ពនៅតាមទីសាធារណៈ លទ្ធផល៖ ត្រួតពិនិត្យអាវុធឆ្លងកាត់៣២ដើម (ដកហូតអាវុធច្នៃ០១ដើម គ្រាប់AKចំនួន២៤គ្រាប់ ស្លាកលេខខ.ម០១ស្លាក) បានកែសម្រួល ឯកសណ្ឋានយោធាសរុបចំនួន១៥៦នាក់ (យោធិន៥៩នាក់ ជនស៊ីវិល៩៧នាក់) ដកហូតខោអាវ៨៦សម្រាប់ មួក៤៥ ឡូហ្គោ០២ និងបកស្គុតខ្មៅលើកញ្ចក់រថយន្ត បានចំនួន៧១គ្រឿង។

២- ការស្រាវជ្រាវបង្រ្កាបបទល្មើស បានធ្វើការស្រាវជ្រាវនិងបង្ក្រាបបទល្មើសចំនួន២.០៨៩លើក ក្នុងនោះ មាន៖ -ប្លន់ប្រដាប់អាវុធបង្រ្កាបបាន៣៨លើក -ឃាតកម្មបង្ក្រាបបាន៤២លើក -រំលោភសេពសន្ថវៈបង្រ្កាបបាន៣៩លើក -ជួញដូរមនុស្សបង្រ្កាបបាន០៦លើក -ចាប់ជំរិតបង្ក្រាបបាន០២លើក -លួចបង្រ្កាបបាន១៣១លើក -ឆក់បង្រ្កាបបាន២៧លើក -ហិង្សាដោយចេតនាបង្រ្កាបបាន១៥២លើក -ប្រើប្រាស់និងរក្សាអាវុធគ្មានការអនុញ្ញាតបង្រ្កាបបាន២១លើក -ការជួញដូរចែកចាយគ្រឿងញៀនបង្រ្កាបបាន៨៨២លើក -ការប្រើប្រាស់គ្រឿងញៀនបង្រ្កាបបាន២៦០លើក -បទល្មើសព្រៃឈើបង្រ្កាបបាន១១១លើក -បទល្មើសជលផលបង្រ្កាបបាន២៥លើក និងបទល្មើសធនធានរ៉ែបង្រ្កាបបាន០២លើក។ បានឃាត់ខ្លួនជនសង្ស័យពាក់ព័ន្ធនឹងបទល្មើសចំនួន ៣.៣៧៨នាក់ និងវត្ថុតាងចាប់យកមួយចំនួនបញ្ជូនទៅតុលាការ។

៣- ការងារសង្គ្រោះ បានធ្វើការជួយប្រជាពលរដ្ឋរងគ្រោះថ្នាក់ចរាចរណ៍ចំនួន១.០៧២លើក អគ្គិភ័យ៣៤១លើក និងករណីផ្សេងៗចំនួន ៣.៣៦៨លើក ដឹកជញ្ជូនជនរងគ្រោះទៅកាន់មន្ទីរពេទ្យ ចំនួន១.០៩៧នាក់។
៤- ការសហការពង្រឹងអនុវត្តច្បាប់ និងបទបញ្ជា បានធ្វើសកម្មភាពសហការជាមួយនគរបាលជាតិ ៣.២៨៣លើក -ស្ថាប័នពន្ធដារ, គយនិងរដ្ឋាករ ១.៥៨៤លើក -រដ្ឋបាលព្រៃឈើអង្គការអភិរក្សសត្វព្រៃ និងអភិរក្សដែនជីវៈចម្រុះ៣.៦១៦លើក -ក្រសួងសាធារណៈការនិងដឹកជញ្ជូន៨៣១លើក -ក្រសួងរ៉ែថាមពល១៣លើក -ក្រសួងបរិស្ថាន១៤លើក -ក្រសួងកសិកម្ម០៧លើក -ក្រសួងដែនដីនគររូបនីយកម្មនិងសំណង់២៧លើក -រដ្ឋបាលជលផល១៦៩លើក -ក្រុមចម្រុះ៦៨៣លើក -អាជ្ញាធរអប្សរា៣១លើក និងកាំកុងត្រូល០២លើក។ បានសហការបង្រ្កាបបទល្មើសធនធានធម្មជាតិ ដោយអនុវត្តសេចក្តីសម្រេចរបស់រាជរដ្ឋាភិបាលលេខ១២៧សសរ/២០១៦ ស្តីពីការបង្កើតគណៈកម្មការជាតិទប់ស្កាត់ និងបង្រ្កាបបទល្មើសធនធានធម្មជាតិមានជាអាទិ៍៖ -បទល្មើសព្រៃឈើ ការប្រមូលដឹកជញ្ជូន សន្និធិផល អនុផលព្រៃឈើដោយគ្មានការអនុញ្ញាត ឃាត់ខ្លួនជន សង្ស័យចំនួន២៤១នាក់ ឃុំខ្លួនចំនួន៣៧នាក់ អប់រំចំនួន២០៤នាក់ បានចាប់យកយានយន្តគ្រប់ប្រភេទ និងឈើចម្រុះរួមមាន៖ រថយន្ត២០៨គ្រឿង គោយន្ត៥០គ្រឿង ត្រាក់ទ័រ០៤គ្រឿង រណារយន្ត៣៥គ្រឿង ទោចក្រយានយន្ត៣៣គ្រឿង ម៉ាស៊ីនជ្រៀកឈើ០៧គ្រឿង កាំភ្លើងច្នៃ០៣ដើម ឈើគ្រញូង២.២១៨គ.ក្រ ឈើគ្រប់ប្រភេទ ចំនួន៣.៥៦៩,៦០៣ម៣ និង៤.៦៦៨ដុំ។ -បទល្មើសធនធានរ៉ែបានធ្វើការឃាត់ខ្លួនជន សង្ស័យ ចំនួន១២នាក់ ឃុំខ្លួនចំនួន០៣នាក់ អប់រំចំនួន០៩នាក់ ជាមួយគ្នានោះដែរ បានចាប់យកយានយន្ត គ្រប់ប្រភេទមាន៖ គ្រឿងចក្រ០៨គ្រឿង រថយន្ត០៧គ្រឿង។ -ការកាប់រានទន្រ្ទានដីរដ្ឋដោយខុសច្បាប់ឃាត់ខ្លួនជនសង្ស័យចំនួន២៧នាក់ ដោយធ្វើការអប់រំ។ ចាប់យកយានយន្តគ្រប់ប្រភេទមាន៖ គ្រឿងចក្រ១១គ្រឿង និងរណារយន្ត០៧គ្រឿង។

ទន្ទឹមនឹងនោះដែរ កងរាជអាវុធហត្ថបានធ្វើការអប់រំចិត្តសាស្ត្រនាយទាហាន នាយទាហានរងនៃកងរាជ អាវុធហត្ថ ឱ្យយល់ជ្រួតជ្រាបពីសភាពការណ៍ វិវត្តន៍ និងសភាពការណ៍ថ្មីៗដែលកើតមានឡើង យល់ច្បាស់ ពីតួនាទី ភារកិច្ច បទបញ្ជា ក្រមសីលធម៌ បទវិន័យទូទៅរបស់កងយោធពលខេមរភូមិន្ទ។ល។ បានបើកនិងបិទវគ្គហ្វឹកហ្វឺនបណ្តុះបណ្តាលបំប៉នចំនួន៤៦វគ្គ=៣.៣៧៧នាក់។ លើសពីនេះទៀត បានចាត់ បញ្ជូននាយទាហាននិងនាយទាហានរងនៃកងរាជអាវុធហត្ថទៅសិក្សា សិក្ខាសាលាក្នុង និងក្រៅប្រទេស ចំនួន៥០វគ្គ ស្មើនឹង៤៧៣នាក់ក្នុងនោះ៖ សិក្សានិងសិក្ខាសាលាក្នុងប្រទេស៣៣វគ្គស្មើនឹង៣៤៤នាក់។ សិក្សាសិក្ខាសាលាក្រៅប្រទេស១៧វគ្គស្មើនឹង១២៩នាក់។ល។
ចំណែកឯ ការងារកសាងហេដ្ឋារចនាសម្ពន្ធ កងរាជអាវុធហត្ថបានសាងសង់សំណង់បន្ទាយជំរំជម្រកចាប់ពី បញ្ជា ការដ្ឋានលើផ្ទៃប្រទេសរហូតដល់រាជធានី ខេត្ត ក្រុង ស្រុក ខណ្ឌ៕

លោកស្រី ប៊ុន រ៉ានី ហ៊ុនសែន ផ្ញើសារលិខិតចូលរួមរំលែកទុក្ខ ចំពោះមរណៈភាពរបស់ លោកព្រឹទ្ធាចារ្យ វណ្ណ ម៉ូលីវណ្ណ

លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅរសៀលថ្ងៃទី ២៨ ខែកញ្ញា ឆ្នាំ២០១៧ បានផ្ញើសារលិខិតចូលរួមរំលែកទុក្ខចំពោះមរណៈភាពរបស់ លោកព្រឹទ្ធាចារ្យ វណ្ណ ម៉ូលីវណ្ណ ដែលជាបិតាស្ថាបត្យករខែ្មរដ៏ល្បីល្បាញ ។

នៅក្នុងសារលិខិតរំលែកទុក្ខរបស់ លោកស្រី ដែលបានផ្ញើជូនលោកស្រី វណ្ណ អំបែ្យហេ្សទ្រូដ ( Vann Amber Gertrude ) ដែលត្រូវជាភរិយារបស់ លោកព្រឹទ្ធាចារ្យ វណ្ណ ម៉ូលីវណ្ណ បានគូសបញ្ជាក់ថា មរណៈភាពរបស់ ព្រឹទ្ធាចារ្យ វណ្ណ ម៉ូលីវណ្ណ គឺជាការបាត់បង់ស្ថាបត្យករខ្មែរជើងចាស់ដ៏ឆ្នើមល្បីល្បាញបំផុតរបស់កម្ពុជា ដែលបានបន្សល់ទុក្ខនូវស្នាដៃស្ថាបត្យកម្មដ៏ច្រើននៅក្នុងព្រះរាជាណាចក្រកម្ពុជា ដែលយើងទាំងអស់ គ្នាចងចាំជានិច្ច ។

សារលិខិតរំលែកទុក្ខបានសរសេរបញ្ជាក់ទៀតថា ខ្ញុំ និងសហការីទាំងអស់ នៃកាកបាទក្រហមកម្ពុជា សូមសម្ដែងនូវសមានទុក្ខសោកស្ដាយអាឡោះអាល័យយ៉ាងក្រៃលែង និងក្ដីសង្វេករកទីបំផុតគ្មានជាមួយ លោកស្រី បុត្រា បុត្រី ចៅប្រុស ចៅស្រី ព្រមទាំងក្រុមគ្រួសារទាំងអស់ ដែលបានបាត់បង់ លោកព្រឹទ្ធាចារ្យ វណ្ណ ម៉ូលីវណ្ណ ដែលជាស្វាមី បិតា ជីតា ប្រកបដោយព្រហ្មវិហារធម៌ ជាទីគោរពស្រឡាញ់ដ៏ខ្ពង់ខ្ពស់ ។ ខ្ញុំ និងសហការី សូមឧទ្ទិសបួងសួងដល់ដួងវិញ្ញាណក្ចន្ធ លោកព្រឹទ្ធាចារ្យ វណ្ណ ម៉ូលីវណ្ណ បានចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ ៕

ឧបនាយករដ្ឋមន្រ្តី ទៀ បាញ់ ផ្ញើសាររំលែកមរណទុក្ខចំពោះភរិយារបស់លោកព្រឹទ្ធាចារ្យ វណ្ណ ម៉ូលីវណ្ណ

ក្រោយពីទទួលដំណឹងយ៉ាងក្រៀមក្រំរួចមក លោកឧបនាយករដ្ឋមន្រ្តី ទៀ បាញ់ ជារដ្ឋមន្ត្រីក្រសួងការពារជាតិ និងលោកស្រី នាថ្ងៃទី២៨ ខែកញ្ញា ឆ្នាំ២០១៧ បានផ្ញើសាររំលែកមរណទុក្ខជូនចំពោះលោកស្រី វណ្ណ អាមបឺរហ្គឺតត្រាដ ភរិយារបស់លោកព្រឹទ្ធាចារ្យ វណ្ណ ម៉ូលីវណ្ណ ក្រោយលោកតាបានទទួលមរណភាព នៅថ្ងៃព្រហស្បតិ៍។

លោកព្រឹទ្ធាចារ្យ វណ្ណ ម៉ូលីវណ្ណ ត្រូវបានគេស្គាល់ជាទូទៅថា ជាធនធានមនុស្សដ៏សំខាន់មួយរូប លោកជាស្ថាបត្យករជើងចាស់ដ៏ល្បីល្បាញទាំងចំណេះដឹង និងទេពកោសល្យ ហើយបានចូលរួមចំណែកយ៉ាងសំខាន់ ក្នុងការអភិវឌ្ឍន៍វិស័យវិទ្យាសាស្ត្រ បច្ចេកវិទ្យា និងវប្បធម៌របស់ជាតិកម្ពុជា។

ខាងក្រោមនេះ ជាសាររំលែកមរណទុក្ខរបស់ឧបនាយករដ្ឋមន្រ្តី ទៀ បាញ់ និងលោកស្រី ជូនចំពោះភរិយារបស់លោក វណ្ណ ម៉ូលីវណ្ណ ៖

លោក សុខ ឥសាន លើកឡើងពីមូលហេតុការលើកបដាទាមទារឲ្យដោះលែង កឹម សុខា

លោក សុខ ឥសាន អ្នកនាំពាក្យគណបក្សប្រជាជនកម្ពុជា បានមានប្រសាសន៍ថា កន្លងទៅ ថ្នាក់ដឹកនាំគណបក្សប្រឆាំងនៅកម្ពុជា បានណែនាំឲ្យបណ្តាញរបស់ខ្លួននៅតាម រាជធានី ខេត្ត ទូទាំងប្រទេស នាំគ្នាលើកបដា ដែលមានខ្លឹមសារទាមទារឲ្យមានការដោះលែង កឹម សុខា ដែលបានប្រព្រឹត្តបទល្មើសសន្និដ្ឋិភាពជាមួយបរទេសបង្ករការប្រទូសារ៉ាយដល់ប្រទេសជាតិធ្ងន់ធ្ងរ ហើយដែលត្រូវបានតុលាការចោទប្រកាន់ និងកំពុងស្ថិតនៅក្នុងនីតិវិធីរបស់តុលាការ។

លោក សុខ ឥសាន បានបន្តថា ដើម្បីរក្សាសណ្តាប់ធ្នាប់សាធារណសង្គម សមត្ថកិច្ចបានណែនាំឲ្យគណបក្សប្រឆាំង ទម្លាក់ផ្លាកបដាទាំងនោះចេញឲ្យអស់ ។ ប៉ុន្តែមន្ត្រីជាន់ខ្ពស់នៃគណបក្សប្រឆាំងបានរឹងទទឹងមិនព្រមរុះរើបដាទាំងនោះចេញ តាមការណែនាំរបស់អាជ្ញាធរទេ ដោយចោទសួរសមត្ថកិច្ចថា ឲ្យរុះរើបដាចេញនេះ តើផ្អែកលើច្បាប់អ្វី?

លោក សុខ ឥសាន បានសួរទៅមន្ត្រីគណបក្សប្រឆាំងវិញថា នៅពេលណែនាំឲ្យលើកបដាទាំងនោះ នៅទូទាំងប្រទេសនោះ តើអស់លោកផ្អែកលើច្បាប់ស្អីដែរ ? ច្បាប់អី មាត្រាណា ជំពូកប៉ុន្មាន ? បើគ្មានច្បាប់ណាមកសំអាងទេ និងបើធ្វើតាមឯកចិត្តទេ អាជ្ញាធរនឹងមានវិធានការណ៍ទម្លាក់ចោល ក្នុងក្របខ័ណ្ឌសិទ្ធិអំណាចរបស់ខ្លួន ពីព្រោះប្រទេសមានច្បាប់ មិនអាចបណ្តែតបណ្តោយឲ្យជនណា បក្សណាធ្វើអ្វីផ្តេសផ្តាស់បែបអនាធិបតេយ្យនោឡើយ៕

ក្រសួងធនធានទឹក បញ្ជាក់ស្ថានភាពកម្ពស់ទឹក នៅតាមស្ថានីយជលសាស្ត្រនានា ប្រចាំថ្ងៃទី២៩ ខែកញ្ញានេះ

ក្រសួងធនធានទឹក និងឧតុនិយម នៅព្រឹកថ្ងៃទី២៩ ខែកញ្ញា ឆ្នាំ២០១៧នេះ បានចេញព្រឹត្តបត្រព័ត៌មាន និងព្យាករណ៍កម្ពស់ទឹក នៅតាមបណ្តាស្ថានីយជលសាស្ត្រទាំង៨ រួមមានស្ថានីយ៖
១-ទន្លេមេគង្គ-ស្ទឹងត្រែង
២-ទន្លេមេគង្គ-ក្រចេះ
៣-ទន្លេមេគង្គ-កំពង់ចាម
៤-ទន្លេបាសាក់-ចតុមុខ
៥-ទន្លេមេគង្គ-អ្នកលឿង
៦-ទន្លេបាសាក់-កោះខែល
៧-ទន្លេសាប-ព្រែកក្តាម
៨-ទន្លេសាប-កំពង់លួង
សូមអានព្រឹត្តបត្រព័ត៌មាន និងព្យាករណ៍កម្ពស់ទឹកជំនន់ របស់ក្រសួងធនធានទឹក ពីស្ថានភាពកំពស់ទឹក នៅតាមបណ្តាស្ថានីយជលសាស្ត្រ ដូចខាងក្រោម៖

ព្រឹទ្ធសភា ប្រកាសសំរេចបើកសម័យប្រជុំលើកទី១១ នៅថ្ងៃទី៥ ខែតុលាខាងមុខ

បន្ទាប់ពីទទួលបានការពិនិត្យ និងពិភាក្សា នៅក្នុងកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នៅព្រឹកថ្ងៃ ទី២៩ ខែកញ្ញា ឆ្នាំ២០១៧នេះ ព្រឹទ្ធសភា បានកំណត់យកព្រឹកថ្ងៃទី៥ ខែតុលា ឆ្នាំ២០១៧ ដើម្បីបើកសម័យប្រជុំលើកទី១១ ព្រឹទ្ធសភានីតិកាលទី៣។

សម័យប្រជុំ នៅថ្ងៃទី៥ ខែតុលា ខាងមុខនេះ មានរបៀបវារៈតែ១គត់ គឺស្តាប់របាយកាណ៍គណៈកម្មាធិការ អចិន្រ្តៃយ៍ ព្រឹទ្ធសភា សកម្មភាពការងាររបស់ព្រឹទ្ធសភា នៅចន្លោះសម័យប្រជុំលើកទី១០ និងលើកទី១១ នីតិកាលទី៣។
ខាងក្រោមនេះជាសេចក្តីជូនដំណឹងរបស់ព្រឹទ្ធសភា៖

ខេត្តក្រចេះ រៀបចំសិក្ខាសាលាផ្សព្វ​ផ្សាយអនុក្រឹត្យ ​និងលិខិត​បទដ្ឋានពាក់ព័ន្ធ​នឹងការបង្កើត​យន្តការ​ច្រកចេញចូល​តែមួយ​

ក្រចេះ៖ នៅថ្ងៃទី២៩ ខែកញ្ញា ឆ្នាំ២០១៧នេះ នៅសាលមហោស្រពខេត្តក្រចេះ លោក សរ ចំរុង អភិបាលនៃគណៈអភិបាលខេត្តក្រចេះ លោក ធុន គ្រី សមាជិកក្រុមប្រឹក្សាខេត្ត បានអញ្ជើញជាអធិបតីក្នុងសិក្ខាសាលាផ្សព្វផ្សាយ និងដាក់ឱ្យអនុវត្តអនុក្រឹត្យ និងលិខិតបទដ្ឋានពាក់ព័ន្ធ ស្តីពីការបង្កើតយន្តការច្រកចេញចូលតែមួយសម្រាប់ការផ្តល់សេវារដ្ឋបាលជូនប្រជាពលរដ្ឋ។

ក្នុងសិក្ខាសាលាផ្សព្វផ្សាយនេះក៏មានការអញ្ជើញចូលរួមពីលោក លោកស្រី សមាជិកក្រុមប្រឹក្សាខេត្ត អភិបាលរងខេត្ត អភិបាលក្រុង ស្រុក មន្ទីរ អង្គភាពជុំវិញខេត្ត កងកម្លាំងប្រដាប់អាវុធ ក្រុមប្រឹក្សាឃុំ សង្កាត់ និងមន្ត្រីរាជការពាក់ព័ន្ធជាច្រើនរូបទៀត។

សិក្ខាសាលាផ្សព្វផ្សាយនេះ មានគោលបំណងក្នុងការលើកកម្ពស់គុណភាព ប្រសិទ្ធភាព ប្រសិទ្ធផល តម្លាភាព និងគណនេយ្យភាព នៃការផ្តល់សេវារដ្ឋបាល នៅរដ្ឋបាលថ្នាក់ក្រោមជាតិ នៅកន្លែងតែមួយ ដើម្បីបង្កលក្ខណៈងាយស្រួល និងឆ្លើយតបទាន់ពេលវេលាទៅនឹងតម្រូវការរបស់ប្រជាពលរដ្ឋ និងគោលដៅកំណត់អំពីយន្តការ គោលការណ៍ បែបបទ និងនីតិវិធីនៃការផ្តល់សេវារដ្ឋបាល នៅរដ្ឋបាលថ្នាក់ក្រោមជាតិ ព្រមទាំងការគាំទ្រ និងការតាមដានត្រួតពិនិត្យ និងវាយតម្លៃទៅលើការផ្តល់សេវារដ្ឋបាលផងដែរ៕

រដ្ឋមន្រ្តីក្រសួងពាណិជ្ជកម្ម ជួបពិភាក្សាការងារជាមួយឯកអគ្គរដ្ឋទូតបង់ក្លាដេស ដើម្បីពង្រឹងកិច្ចសហប្រតិបត្តិការទ្វេភាគី

នៅទីស្តីការក្រសួងពាណិ្ជកម្ម លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានជួបពិភាក្សាការងារជាមួយលោកស្រី Saida Muna Tasneem ឯកអគ្គរដ្ឋទូតបង់ក្លាដេសប្រចាំនៅកម្ពុជា និងថៃ ដែលមាននិវេសនដ្ឋាននៅទីក្រុងបាងកក ប្រទេសថៃ ដើម្បីពង្រឹងកិច្ចសហប្រតិបត្តិការទ្វេភាគី។

ជំនួបពិភាក្សាការងារនេះ បានធ្វើឡើងនៅថ្ងៃទី២៧ ខែកញ្ញា ឆ្នាំ ២០១៧ ដោយផ្តោតសំខាន់ទៅលើលទ្ធភាពនៃការចុះហត្ថលេខាចំនួន០២ រវាងក្រសួងពាណិជ្ជកម្មនៃប្រទេសទាំងពីរ ក្នុងអំឡុងពេលដំណើរទស្សនៈកិច្ចផ្លូវការរបស់លោកស្រីSheikh Hasina នាយករដ្ឋមន្រ្តីបង់ក្លាដេស មកកាន់ប្រទេសកម្ពុជានាពេលខាងមុខនេះ ដែលរួមមាន៖
១-អនុស្សរណៈយោគយល់គ្នា ស្តីពីបែបបទសម្រាប់រៀបចំក្រុមប្រឹក្សាពាណិជ្ជកម្មរួម (MOU on the Modalities of the Joint Trade Council)
២-បន្តសុពលភាពលើកិច្ចព្រមព្រមព្រៀងពាណិជ្ជកម្មទ្វេភាគីឆ្នាំ២០០៦ ដែលបានផុតកំណត់កាលពីឆ្នាំ២០១៦។
ទន្ទឹមនឹងនេះ លោកស្រីបានស្នើសុំឲ្យក្រសួងពាណិជ្ជកម្មជួយសម្របសម្រួលជាមួយនឹងសភាពាណិជ្ជកម្មកម្ពុជា ក្នុងការរៀបចំវេទិកា Business Dialogue ជាមួយសហព័ន្ធនៃសភាពាណិជ្ជកម្ម និងឧស្សាហកម្មបង់ក្លាដេស ដើម្បីចាប់ដៃគូពាណិជ្ជកម្ម និងស្វែងរកឱកាសវិនិយោគ។ លើសពីនេះទៀតសភាពាណិជ្ជកម្មនៃប្រទេសទាំងពីរ មានបំណងចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការ នៅចំពោះមុខនាយករដ្ឋមន្រ្តីនៃប្រទេសទាំងពីរ។

ឆ្លើយតបនឹងសំណើរបស់លោកស្រីឯកអគ្គរដ្ឋទូតបង់ក្លាដេស និងលោក ប៉ាន សូរស័ក្តិ បានសន្យាថា នឹងជួយសម្របសម្រួលជាមួយនឹងសភាពាណិជ្ជកម្មកម្ពុជា ក្នុងការរៀបចំវេទិកា Business Dialogue ជាមួយសហព័ន្ធនៃសភាពាណិជ្ជកម្ម និងឧស្សាហកម្មបង់ក្លាដេស ដើម្បីចាប់ដៃគូពាណិជ្ជកម្ម និងស្វែងរកឱកាសវិនិយោគ។ ជាមួយគ្នានេះដែរ លោក ប៉ាន សូរស័ក្តិ បានថ្លែងអំណរគុណដល់សាធារណរដ្ឋប្រជាមានិតបង់ក្លាដេស ដែលយល់ព្រមទិញអង្ករកម្ពុជាចំនួន ០១លានតោន ក្នុងរយៈពេល៥ឆ្នាំ ចាប់ពីឆ្នាំ២០១៧-២០២២៕