ថ្នាក់ដឹកនាំក្រុមហ៊ុនធំៗជាច្រើនរបស់ប្រទេសស្វីស ចូលជួបលោកនាយករដ្ឋមន្ត្រី ហ៊ុន សែន ដើម្បីសុំយោបល់ពាក់ព័ន្ធនឹងឱកាសវិនិយោគនៅកម្ពុជា

នៅវិមានសន្តិភាព ព្រឹកថ្ងៃទី២៣ ខែវិច្ឆិកា ឆ្នាំ២០១៧នេះ ក្នុងឱកាសជួបពិភាក្សាការងារជាមួយ លោក អាន់ទ្រៀ ហ្គឺប៊ឺ (Adreas Gerber) នាយកគ្រប់គ្រងនៃក្រុមហ៊ុន Credit Suisse ដែលបានដឹកនាំប្រតិភូក្រុមហ៊ុនជាច្រើនរូបទៀត របស់ប្រទេសស្វីស លោកនាយករដ្ឋមន្រ្តី ហ៊ុន សែន បានជម្រាបជូនគណៈប្រតិភូទាំងអស់អំពីស្ថានភាពនយោបាយ សេដ្ឋកិច្ច និងការអភិវឌ្ឍនៅប្រទេសកម្ពុជា។

តាមការបញ្ជាក់របស់ លោក កៅ គីមហួន រដ្ឋមន្ត្រីប្រតិភូអមនាយករដ្ឋមន្ត្រី នៅក្រោយជំនួបពិភាក្សាការងារនេះ បានឱ្យដឹង លោកនាយករដ្ឋមន្ត្រី ហ៊ុន សែន បានស្វាគមន៍លោក Adreas Gerber ក៏ដូចជាប្រធានក្រុមហ៊ុនផ្សេងទៀត លើវិស័យចម្រុះ ខាងផ្នែកធនាគារ និងហិរញ្ញវត្ថុ, អចលនទ្រព្យ, ការសាងសង់ជាដើម។ លោក Adreas Gerber បានជម្រាបជូនលោកនាយករដ្ឋមន្រ្តីថា វត្តមានរបស់ប្រតិភូវិនិយោគិននេះ គឺដើម្បីស្វែងរកការពិតអំពីស្ថានភាពសេដ្ឋកិច្ច វិនិយោគនៅក្នុងប្រទេសកម្ពុជា។

លោកនាយករដ្ឋមន្ត្រី ហ៊ុន សែន បានជម្រាបជូនគណៈប្រតិភូទាំងអស់អំពីស្ថានភាពនយោបាយ សេដ្ឋកិច្ច ការអភិវឌ្ឍនៅប្រទេសកម្ពុជា ហើយលោកក៏បានជម្រាបជូនប្រតិភូថា ស្ថានភាពនៅក្នុងប្រទេសកម្ពុជាមាន២ គឺកម្ពុជាពិត និងកម្ពុជាលើទំព័រសារព័ត៌មាន។ ជាងនេះដែរ លោកបានជម្រាបជូនអំពីការអភិវឌ្ឍរបស់ប្រទេស កម្ពុជា ក្នុងរយៈពេលប៉ុន្មានឆ្នាំចុងក្រោយនេះ គឺមានការរីកចម្រើនយ៉ាងច្រើន ដូចប្រតិភូបានមើលឃើញជាក់ស្តែង។

លោក Adreas Gerber ក៏ដូចជាប្រធានក្រុមហ៊ុនផ្សេងៗទៀត បានផ្លាស់ប្តូរមតិជាមួយលោកនាយករដ្ឋមន្រ្តី ហ៊ុន សែន ដើម្បីស្វែងយល់បន្ថែមពីស្ថានភាពពិតនៅប្រទេសកម្ពុជាហើយក៏មានការត្រេកអរពីអ្វីដែលពួកគាត់បានមើលឃើញពីការរីកចម្រើនរបស់ប្រទេសកម្ពុជា។ លោកនាយករដ្ឋមន្ត្រីបានបញ្ជាក់ជូនទៅកាន់ប្រតិភូថា អ្វីដែលកម្ពុជានៅតែផ្តល់អាទិភាពគឺវិស័យ៤៖ វិស័យអភិវឌ្ឍន៍ធនធានមនុស្ស, ទឹក, ផ្លូវ និងវិស័យអគ្គីសនី។ គណៈប្រតិភូក៏បានសាកសួរលោកនាយករដ្ឋមន្រ្តី ហ៊ុន សែន ពីវិស័យនានាដែលក្រុមហ៊ុនស្វីស គួរតែវិនិយោគបាននៅកម្ពុជា។

លោកនាយករដ្ឋមន្រ្តី ហ៊ុន សែន បានមានប្រសាសន៍ថា ក្រុមហ៊ុនស្វីស គួរតែវិនិយោគលើវិស័យធនាគារ និងហិរញ្ញវត្ថុ ដោយសារតែក្រុមហ៊ុន Credit Suisse ជាធនាគារមួយលំដាប់អន្តរជាតិ។ ជាងនេះទៀត លោកក៏បានលើកទឹកចិត្តឱ្យមានការវិនិយោគ លើវិស័យធនធានមនុស្ស និងទេសចរណ៍ ដោយសារបច្ចុប្បន្ននេះ កម្ពុជាមានទេសចរប្រមាណ៥,៥លាននាក់ ហើយតាមការប៉ាន់ស្មាន នៅឆ្នាំ២០១៧នេះ កម្ពុជានឹងទទួលបានភ្ញៀវទេសចរ ប្រមាណ ៥,៨លាននាក់ ដែលមកពីក្រៅប្រទេស។ប្រមុខរាជរដ្ឋាភិបាលកម្ពុជា បានលើកឡើងដែរថា ពីដើមឡើយ ក្រុមហ៊ុនមួយចំនួននៅកម្ពុជា បានផ្តោតទៅលើបរិមាណ ប៉ុន្តែការវិវត្តន៍ចុងក្រោយនេះ គឺមិនត្រឹមតែបរិមាណទេ គឺបានគិតគូរទាំងបរិមាណ និងគុណភាព។ ទន្ទឹមនឹងនេះដែរ លោកនាយករដ្ឋមន្ត្រី ក៏បានចាប់អារម្មណ៍ និងលើកទឹកចិត្តដល់ក្រុមហ៊ុនវេចខ្ចប់ដែលជាតម្រូវការសំខាន់បំផុតនៅកម្ពុជា។ លោក ហ៊ុន សែន បានលើកទឹកចិត្ត និងជូនពរគណៈប្រតិភូទាំងអស់ជោគជ័យ ក្នុងដំណើរទស្សនកិច្ចសិក្សាស្វែងយល់អំពីសក្តានុពលពាណិជ្ជកម្ម និងវិនិយោគនៅក្នុងប្រទេសកម្ពុជា៕

លោកនាយករដ្ឋមន្ត្រី ហ៊ុន សែន ទទួលជួបអនុប្រធានក្រុមហ៊ុនផលិតអគ្គិសនីរបស់អាមេរិក ដែលកំពុងផលិតថាមពលអគ្គិសនីដើរដោយធ្យូងថ្មនៅកម្ពុជា

នៅក្នុងជំនួបពិភាក្សាការងារ និងសម្តែងការគួរសមជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព នាព្រឹកទី២៣ ខែវិច្ឆិកា ឆ្នាំ២០១៧នេះ លោក ចន រ៉ាយ (Jonh E. Rice) អនុប្រធានក្រុមហ៊ុន GE (General Electric) របស់សហរដ្ឋអាមេរិក បានជម្រាបជូនថា ក្រុមហ៊ុន GE កំពុងសហការលើការផលិតថាមពលអគ្គិសនីដើរដោយធ្យូងថ្ម ក្នុងខេត្តព្រះសីហនុ។ ទន្ទឹមនេះ ក្រុមហ៊ុនក៏កំពុងសិក្សាលើបណ្តាញអគ្គិសនី និងការបែងចែកអគ្គសនីទៅកាន់ប្រជាពលរដ្ឋកម្ពុជាផងដែរ ដែលគម្រោងនេះនឹងបញ្ចប់នាចុងឆ្នាំ២០១៧នេះ។

លោកនាយករដ្ឋមន្រ្តី ហ៊ុន សែន បានថ្លែងថា កម្ពុជាកំពុងមានតម្រូវការអគ្គិសនីចម្រុះ គ្រប់ទីកន្លែង គឺទាំងវារីអគ្គិសនី និង ថាមពលអគ្គិសនីប្រើដោយធ្យូងថ្ម។ បើតាមការបញ្ជាក់របស់ លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី ក្រោយជំនួបពិភាក្សាការងារ និងសម្តែងការគួរសមនេះ បានឱ្យដឹងថា បច្ចុប្បន្នក្រុមហ៊ុន GE មានគម្រោងលើវិស័យសំខាន់ៗចំនួន២ គឺវិស័យអគ្គិសនី និងវិស័យសុខាភិបាល ដែលទាក់ទងនឹងឧបករណ៍ពេទ្យដែលកន្លងមកត្រូវបាន ប្រើក្នុងមន្ទីរពេទ្យជាច្រើនមកហើយ។ ដោយឡែក ក្រុមហ៊ុន GE បានជួយក្នុងជំហ៊ានទី១ក្នុងការជំរុញការប្រើប្រាស់ទឹកស្អាតនៅតាមមន្ទីរពេទ្យចំនួន១២រួចមកហើយនៅកម្ពុជា។ ក្រុមហ៊ុន GE នឹងបន្តជំហានទី២ក្នុងការប្រើប្រាស់ទឹកស្អាតនេះនៅតាមមន្ទីរពេទ្យចំនួន១២ផ្សេងទៀតនៅកម្ពុជា។

ជាចំនុចសំខាន់មួយទៀតក្នុងជំនួបពិភាក្សាការងារនេះ លោកនាយករដ្ឋមន្រ្តី ហ៊ុន សែន បានថ្លែងបញ្ជាក់ថា នឹងស្នើសុំដល់ព្រះមហាក្សត្រឱ្យលោក ចន រ៉ាយ មានតួនាទីជាទីប្រឹក្សារាជរដ្ឋាភិបាលកម្ពុជា ដោយសារលោកមានបទពិសោធន៍ច្រើន ក្នុងកិច្ចការអភិវឌ្ឍន៍នៅកម្ពុជា និងដោយសារ លោក ចនរ៉ាយ នឹងត្រូវចូលនិវត្តន៌ពីការងារនៃក្រុមហ៊ុន GE ផងនោះ។

ជាការឆ្លើយតប លោក ចនរ៉ាយ បានសម្តែងនូវមោទនភាពក្នុងការទទួលយកតួនាទីនេះ ដោយលោកសន្យាថានឹងខិតខំចូលរួមបំរើដល់ការអភិវឌ្ឍរបស់កម្ពុជា៕

អតីតមេឃុំ ជំទប់ និងសមាជិកក្រុមប្រឹក្សាស្រុកស្រែអំបិលរបស់បក្សសង្គ្រោះជាតិ៣នាក់ទៀតហើយ ប្រកាសសុំរួមរស់ជាមួយគណបក្សប្រជាជនកម្ពុជា

កោះកុង៖ អតីតមេឃុំ ជំទប់ និងសមាជិកក្រុមប្រឹក្សា ក្នុងស្រុកស្រែអំបិល ខេត្តកោះកុង សរុប៣នាក់ ទៀតហើយ របស់គណបក្សសង្គ្រោះជាតិ ដែលទើបរលាយ បានប្រកាសសុំរួមរស់ជាមួយ គណបក្ស ប្រជាជនកម្ពុជា ដោយសារតែពួកគាត់បានឃើញនូវអំពើក្បត់ជាតិ របស់មេដឹកនាំគណបក្ស សង្គ្រោះជាតិ ដែលបម្រើបរទេស។ នេះបើតាមលិខិតដែលទទួលបាននៅថ្ងៃទី២៣ ខែវិច្ឆិកា ឆ្នាំ២០១៧នេះ។

ការសម្រេចដើរចេញរបស់អតីតមន្រ្តីគណបក្សសង្រ្គោះជាតិទាំង៣រូបនេះ បានធ្វើឡើងបន្ទាប់ពីតុលាការកំពូល បានកាត់ទោសរំលាយគណបក្សសង្រ្គោះជាតិ ដែលពាក់ព័ន្ធនឹង ការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ កាលពីថ្ងៃទី១៦ ខែវិច្ឆិកា ឆ្នាំ២០១៧។

អតីតមន្ដ្រីគណបក្សសង្គ្រោះជាតិទាំង៣រូបនោះ រួមមាន៖
ទី១៖ លោក ទេព ហៃ អាយុ៥៤ឆ្នាំ មេឃុំជីខក្រោម ស្រុកស្រែអំបិល ខេត្តកោះកុង, ទី២៖ លោក ហេង ឈីវ អាយុ៤៨ឆ្នាំ ជំទប់ទី១ឃុំជីខក្រោម ស្រុកស្រែអំបិល ខេត្តកោះកុង, ទី៣៖ លោកស្រី អ៊ុត សារ៉ាន់ អាយុ២៥ឆ្នាំ សមាជិកក្រុមប្រឹក្សាឃុំជីខក្រោម ស្រុកស្រែអំបិល ខេត្តកោះកុង។

គណបក្សប្រជាជនកម្ពុជាខេត្តកោះកុង បានប្រកាសស្វាគមន៍ និងទទួលសមាជិក-សមាជិកាថ្មី មកពីអតីតគណ បក្សសង្គ្រោះជាតិទាំង៣រូបនេះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។

សម្រាប់ការចុះចូលពីសំណាក់អតីតមន្រ្តីគណបក្សសង្គ្រោះជាតិខាងលើនេះ ត្រូវបានលោកនាយករដ្ឋមន្រ្ដី ហ៊ុន សែន ប្រធានគណបក្សប្រជាជនកម្ពុជា បានប្រកាសតាមបណ្តាញសង្គម Facebook របស់លោកថា «ការស្ម័គ្រចិត្តចុះចូលមកគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅកាន់ គ.ជ.ប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»៕

អភិបាលខេត្តស្វាយរៀង ជំរុញឱ្យមន្រ្តីរាជការមានសាមគ្គីភាព និងបំពេញតួនាទីផ្ដល់សេវាជូនប្រជាពលរដ្ឋឱ្យកាន់តែប្រសើរ

លោក ម៉ែន វិបុល អភិបាលខេត្តស្វាយរៀង បានផ្ដាំផ្ញើដល់មន្ទីរ-អង្គភាព និងរដ្ឋបាលក្រុង ស្រុក ត្រូវបន្តរក្សាឱ្យបាននូវសាមគ្គីភាពឯកភាពផ្ទៃក្នុង រវាងមន្រ្តីរាជការទាំងអស់ ដើម្បីរួមគ្នាបំពេញតួនាទីភារកិច្ចស្នូលរបស់ខ្លួន ឱ្យទទួលបានលទ្ធផលល្អ ធានាការផ្ដល់សេវាសាធារណៈ និងសេវារដ្ឋបាល ជូនប្រជាពលរដ្ឋឱ្យកាន់តែមានប្រសិទ្ធភាព និងប្រសិទ្ធផល។ លោកបានថ្លែងដូចនេះ នៅព្រឹកថ្ងៃទី២៣ ខែវិច្ឆិកា ឆ្នាំ២០១៧នេះ នៅសាលប្រជុំសាលាខេត្តស្វាយ​រៀង នៅក្នុងកិច្ចប្រជុំបូកសរុបលទ្ធផលការងារប្រចាំខែវិច្ឆិកា និងលើកទិសដៅការងារខែធ្នូ ឆ្នាំ២០១៧ របស់រដ្ឋបាលខេត្តស្វាយរៀង។

មានប្រសាសន៍ក្នុងឱកាសនោះ លោក ម៉ែន វិបុល បានសម្ដែងនូវការកោតសរសើរ និងថ្លែងអំណរគុណ ចំពោះការចូលរួមចំណែកយ៉ាងសកម្មប្រកបដោយការទទួលខុសត្រូវរបស់មន្ត្រីរាជការ កងកម្លាំងប្រដាប់អាវុធនៅក្នុងការថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ ការផ្ដល់សេវាសាធារណៈ និងការដោះស្រាយបញ្ហាជាតម្រូវការរបស់ប្រជាពលរដ្ឋ នៅមូលដ្ឋានប្រកបដោយប្រសិទ្ធភាព នាខែវិច្ឆិកាកន្លងមកនេះ។

ទន្ទឹមនេះ លោកអភិបាលខេត្ត ក៏បានធ្វើការផ្ដាំផ្ញើរដល់មន្ទីរអង្គភាព រដ្ឋបាលក្រុង ស្រុក កងកម្លាំងប្រដាប់អាវុធ និងអ្នកពាក់ព័ន្ធទាំងអស់ ឲ្យយកចិត្តទុកដាក់នូវកិច្ចការសំខាន់ៗមួយចំនួនដូចខាងក្រោម ៖
១- ត្រូវបន្តយកចិត្តទុកដាក់ថែរក្សាការពារសន្តិសុខ សណ្តាប់ធ្នាប់សង្គម និងសុវត្ថិភាពនៅក្នុងខេត្តឲ្យបានកាន់តែល្អប្រសើរ
២- សមត្ថកិច្ច និងអាជ្ញាធរពាក់ព័ន្ធទាំងអស់ត្រូវបន្តអប់រំណែនាំ និងផ្សព្វផ្សាយដល់ប្រជាពលរដ្ឋឱ្យបានយល់ជ្រួតជ្រាប អំពីការអនុវត្តសាលដីការបស់តុលាការកំពូល ដែលបានរំលាយគណបក្សសង្គ្រោះជាតិ
៣- រដ្ឋបាលក្រុង ស្រុកត្រូវណែនាំដល់រដ្ឋបាលឃុំ សង្កាត់ឱ្យបន្តអនុវត្តតួនាទីភារកិច្ចរបស់ខ្លួន ដើម្បីធានាប្រក្រតីភាព និងនិរន្តភាពក្នុងការគ្រប់គ្រងរដ្ឋបាលឃុំ សង្កាត់ ការអភិវឌ្ឍមូលដ្ឋាន ការផ្ដល់សេវានានា ការគ្រប់គ្រងចាត់ចែងការប្រើប្រាស់ថវិកា និងការដោះស្រាយសំណើសំណូមពរនានា ជូនប្រជាពលរដ្ឋ ឱ្យមានប្រសិទ្ធភាពស្របតាមច្បាប់ និងលិខិតបទដ្ឋានជាធរមាន ព្រមទាំងត្រូវពង្រឹងការបំពេញការងាររបស់ស្មៀនឃុំ សង្កាត់ និងកិច្ចការផ្សេងៗទៀត ស្របតាមការណែនាំរបស់ក្រសួងមហាផ្ទៃ
និង ៤- មន្ទីរពាក់ព័ន្ធ ជាពិសេសមន្ទីររ៉ែ និងថាមពល ត្រូវពង្រឹងការអនុវត្តលិខិតបទដ្ឋានគតិយុត្ត ពាក់ព័ន្ធនឹងបទដ្ឋានបច្ចេកទេស នៃការរៀបចំស្ថានីយប្រេងឥន្ធនៈ និងស្ថានីយឧស្ម័នឥន្ធនៈ៕

រាជរដ្ឋាភិបាលកម្ពុជាចាត់ទុកសារព័ត៌មានគឺជាដៃគូអភិវឌ្ឍមិនអាចខ្វះបាន

លោកនាយករដ្ឋមន្រ្តី ហ៊ុន សែន បានលើកឡើងថា សារព័ត៌មានប្រកបដោយវិជ្ជាជីវៈ និងក្នុងក្របខណ្ឌច្បាប់បានចូលរួមចំណែកក្នុងការជួយលើកស្ទួយលទ្ធិប្រជាធិបតេយ្យ ការគោរពសិទ្ធិមនុស្ស ការកសាងសន្តិភាព ស្ថិរភាពនយោបាយ និងការអភិវឌ្ឍប្រទេសជាតិ ប៉ុន្តែប្រសិនបើការប្រើប្រាស់សេរីភាពហួសព្រំដែនដោយបំពានច្បាប់ សារព័ត៌មានពិតជាបានបំផ្លាញលទ្ធិប្រជាធិបតេយ្យ បំផ្លាញសុខសន្តិភាព និងការអភិវឌ្ឍជាតិ ហើយរុញច្រានឱ្យប្រទេសធ្លាក់ក្នុងភ្លើងសង្រ្គាមយ៉ាងពិតប្រាកដ។ លោកនាយករដ្ឋមន្រ្តី ហ៊ុន សែន បានគូសបញ្ជាក់ថា ទោះបីជាយ៉ាងណា រាជរដ្ឋាភិបាលកម្ពុជា នឹងមិនអនុញ្ញាតឱ្យមានការប្រើប្រាស់សេរីភាពតាមបែបអនាធិបតេយ្យដោយបំពានច្បាប់ដើម្បីធ្វើបដិវត្តន៍ពណ៌ផ្តួលរំលំរាជរដ្ឋាភិបាលស្របច្បាប់ជាដាច់ខាត។

លោកនាយករដ្ឋមន្រ្តី ហ៊ុន សែន បានលើកឡើងដូចនេះនៅក្នុងសារលិខិតចុះថ្ងៃទី២១ ខែវិច្ឆិកា ឆ្នាំ២០១៧ ក្នុងឱកាសអបអរសាទរវេទិកានិពន្ធនាយកសារព័ត៌មានកម្ពុជា ដែលបានរៀបចំឡើងជារៀងរាល់ឆ្នាំដោយក្លិបអ្នកកាសែតកម្ពុជា ដើម្បីពិភាក្សាស្វែងរកដំណោះស្រាយ និងរៀបចំយន្តការសម្រាប់អនុវត្តន៍ក្នុងគោលបំណងលើកស្ទួយសិទ្ធិ សេរីភាពខាងសារព័ត៌មាន ពង្រឹងគុណភាព និងការទទួលខុសត្រូវផ្នែកវិជ្ជាជីវៈសារព័ត៌មាន រួមចំណែកលើកស្ទួយលទ្ធិប្រជាធិបតេយ្យ កសាងសុខសន្តិភាព ស្ថិរភាពនយោបាយ និងជំរុញការអភិវឌ្ឍប្រទេសកម្ពុជាប្រកបដោយចីរភាព។

នៅក្នុងសារលិខិតនោះដែរ លោកនាយករដ្ឋមន្រ្តី ហ៊ុន សែន ក៏បានសម្តែងការកោតសរសើរដោយស្មោះចំពោះអ្នកសារព័ត៌មានទាំងអស់ ដែលបានខិតខំបំពេញការងាររបស់ខ្លួនយ៉ាងសកម្ម និងពុះពាររាល់ការលំបាកដើម្បីយកព័ត៌មានផ្សព្វផ្សាយជូនសាធារណជនឱ្យបានដឹង និងស្វែងយល់អំពីការវិត្តន៍ទាំងនៅក្នុងប្រទេស និងនៅលើសកលលោក។ បេសកកម្មទាំអស់នោះពិតជាបានរួមចំណែកក្នុងការលើកស្ទួយលទ្ធិប្រជាធិបតេយ្យ ការគោរពសិទ្ធិមនុស្ស និងការអភិវឌ្ឍប្រទេសជាតិឱ្យមានការរីកចម្រើន ហើយរាជរដ្ឋាភិបាលកម្ពុជាចាត់ទុកសារព័ត៌មានគឺជាដៃគូអភិវឌ្ឍមិនអាចខ្វះបាន និងបានយកចិត្តទុកដាក់លើកស្ទួយវិស័យសារព័ត៌មានឱ្យមានការរីកចម្រើនដូចវិស័យជាអាទិភាពចម្បងដទៃទៀតដែរ។

លោកនាយករដ្ឋមន្រ្តី ហ៊ុន សែន ក៏បានបន្ថែមថា អ្នកសារព័ត៌មានបានដើរតួនាទីជាអ្នកសម្របសម្រួលនយោបាយក្នុងការចូលរួមកសាងសន្តិភាពនៅកម្ពុជា។ នៅពេលប្រទេសកំពុងប្រឈមនឹងភាពតានតឹងនៃការធ្វើបដិវត្តន៍ពណ៌ប៉ុនប៉ងផ្តួលរំលំរាជរដ្ឋាភិបាលកម្ពុជា និងការគេចវេះការបំពេញកាតព្វកិច្ចអនុវត្តច្បាប់របស់អ្នកសារព័ត៌មានមួយចំនួន ហើយបានបង្វែរសភាពការណ៍ទៅជាបញ្ហានយោបាយដើម្បីទម្លាក់កំហុសមកលើរាជរដ្ឋាភិបាល សារព័ត៌មានបានដើរតួនាទីជាអ្នកសម្របសម្រួលតាមរយៈការសរសេរអត្ថបទរបស់ខ្លួនដោយប្រកាន់ខ្ជាប់នូវវិជ្ជាជីវៈ និងមានការទទួលខុសត្រូវខ្ពស់ មិនបំប៉ោងព័ត៌មានដែលធ្វើឱ្យសភាពការណ៍នយោបាយឡើងកម្តៅ។ ទាំងនេះគឺបានឆ្លុះបញ្ចាំងពីតួនាទីដ៏សំខាន់របស់សារព័ត៌មានក្នុងការចូលរួមកសាងសន្តិភាព ស្ថិរភាពនយោបាយ ការអភិវឌ្ឍប្រទេសជាតិដោយការផ្តល់ព័ត៌មានប្រកបដោយការជឿទុកចិត្ត និងការទទួលខុសត្រូវទៅលើអាជីពរបស់ខ្លួន ហើយរាជរដ្ឋាភិបាលកម្ពុជានៅតែប្រកាន់ជំហរ និងប្តេជ្ញាចិត្តខ្ពស់ក្នុងការលើកស្ទួយសេរីភាពសារព័ត៌មាននៅកម្ពុជា ដោយចាត់ទុកសារព័ត៌មានគឺជាដៃគូសំខាន់ក្នុងការជំរុញការអភិវឌ្ឍប្រទេសប្រកបដោយតម្លាភាព និរន្តរភាព និងការទទួលខុសត្រូវ៕

អតីតសមាជិកក្រុមប្រឹក្សាក្រុង ឃុំ សង្កាត់ និងបេក្ខជនក្រុមប្រឹក្សាឃុំរបស់​បក្សសង្គ្រោះជាតិ​ខេត្តតាកែវ​ ស្នើសុំចូល​រួមជាមួយ​គណបក្សប្រជាជន​ជាបន្តបន្ទាប់​

អតីតសមាជិកក្រុមប្រឹក្សាក្រុង ឃុំ សង្កាត់ និងបេក្ខជនរបស់គណបក្សសង្គ្រោះជាតិ នៅខេត្តតាកែវ ចំនួន១០នាក់បន្ថែមទៀត នៅថ្ងៃទី២២ ខែវិច្ឆិកា ឆ្នាំ២០១៧ បានសុំចូលរួមរស់ជាមួយគណបក្សប្រជាជនកម្ពុជា ធ្វើអោយចំនួនជំទប់ទី១ ទី២ សមាជិកក្រុមប្រឹក្សា និងចំនួនបេក្ខជន គណបក្សសង្រោះជាតិចុះចូលគណបក្សប្រជាជនកម្ពុជា ក្នុងខេត្តតាកែវ បានកើនឡើងដល់ចំនួន ៣៦នាក់។

ពួកគាត់បានបញ្ជាក់ថា ការសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា មកពីពួកគាត់បានមើលឃើញពីចរិតនយោបាយក្បត់ជាតិ របស់ថ្នាក់ដឹកនាំកំពូល គណបក្សសង្រ្គោះជាតិ និងដោយមើលឃើញថា លោកនាយករដ្ឋមន្ត្រី ហ៊ុន សែន បានផ្តល់ឱកាសមាសដល់ពួកគាត់ ក្នុងការបន្តចូលរួមចំណែកបំរើជាតិមាតុភូមិបន្តទៀត។

អតីតសមាជិកគណបក្សសង្គ្រោះជាតិ បានបញ្ជាក់ថា ការសម្រេចចិត្តនេះមិនមែនជាការលក់ឧត្តមគតិ ដូចការចោទប្រកាន់នោះទេ ហើយគណបក្សប្រជាជន ក៏មិនត្រូវការទិញឧត្តមគតិរបស់គាត់ដែរ ដូចដែលលោកនាយករដ្ឋមន្ត្រី ហ៊ុន សែន បានមានប្រសាសន៍បញ្ជាក់កាលពីល្ងាចថ្ងៃទី១៦ ខែវិឆ្ឆិកា ឆ្នាំ២០១៧ កន្លងទៅរួចមកហើយ។

ជាចុងក្រោយសមាជិកបក្សសង្គ្រោះជាតិ ដែលបានសុំចូលរួមរស់ជាមួយគណបក្សប្រជាជនកម្ពុជាទាំងអស់ បានសំដែងនូវការគោរពថ្លែងអំណរគុណ និងការដឹងគុណយ៉ាងជ្រាលជ្រៅជូនចំពោះ លោកនាយករដ្ឋមន្ត្រី ហ៊ុន សែន និងថ្នាក់ដឹកនាំគណបក្សប្រជាជនកម្ពុជាគ្រប់ជាន់ថ្នាក់ ដែលបានអនុញ្ញាតិឲ្យពួកគាត់បានបន្តបំរើប្រជាពលរដ្ឋ ក្នុងនាមជាសមាជិកគណបក្សប្រជាជនកម្ពុជា។

អតីតសមាជិកក្រុមប្រឹក្សាគណបក្សសង្គ្រោះជាតិ បានចូលរួមជីវភាពនយោបាយជាមួយគណបក្សប្រជាជនកម្ពុជា រួមមានសមាជិកក្រុមប្រឹក្សាក្រុងដូនកែវ ៤នាក់ សមាជិក្រុមប្រឹក្សាឃុំសង្កាត់ចំនួន២៧នាក់ និងបេក្ខជនក្រុមប្រឹក្សាឃុំ៥នាក់ក្នុងនោះរួមមាន៖

១.ស្រុកត្រាំកក់ ៤នាក់ ក្នុងនោះសមាជិកក្រុមប្រឹក្សាឃុំគុស២នាក់ ឃុំអង្គតាសោម២នាក់ និងឃុំតាភេម១នាក់
២.ស្រុកបាទី៥នាក់ ក្នុងនោះសមាជិកក្រុមប្រឹក្សាឃុំចំប៉ី១នាក់ ឃុំត្រពាំងសាប១នាក់ ឃុំក្រាំងធ្នង់១នាក់ និងឃុំកណ្តឹង២នាក់។
៣.ស្រុកសំរោង១នាក់ សមាជិកក្រុមប្រឹក្សាឃុំសំរោង១នាក់។
៤.ស្រុកគិរីវង់៥នាក់ ក្នុងនោះសមាជិកក្រុប្រឹក្សាឃុំព្រះបាទជាន់ជុំ១នាក់ ឃុំតាអូ១នាក់ ឃុំព្រៃអំពក១នាក់ ឃុំគីរីចុងកោះ១នាក់ និងឃុំសោម១នាក់។
៥.ក្រុងដូនកែវ៤នាក់ ក្នុងនោះសមាជិកក្រុមប្រឹក្សាសង្កាត់រកាក្រៅ២នាក់ និងសង្កាត់រកាក្នុង២នាក់។
៦.ស្រុកកោះអណ្តែត១នាក់ សមាជិកក្រុមប្រឹក្សាឃុំរមេញ១នាក់។
៧.ស្រុកបូរីជលសារ១នាក់ សមាជិកក្រុមប្រឹក្សាឃុំគោកពោធិ៍១នាក់។
៨.ស្រុកទ្រាំង៥នាក់ ក្នុងនោះសមាជិកក្រុមប្រឹក្សាឃុំព្រៃស្លឹក១នាក់ ឃុំសំបួរ១នាក់ ឃុំរនាម១នាក់ និងឃុំសន្លុង២នាក់ ។
៩.ស្រុកព្រៃកប្បាស៤នាក់ ក្នុងនោះសមាជិកក្រុមប្រឹក្សាឃុំតាំងយ៉ាប១នាក់ និងឃុំពោធិ៍រំចាក១នាក់ ឃុំស្នោ១នាក់ និងឃុំព្រៃផ្តៅ១នាក់។
១០.ស្រុកអង្គរបូរី ៥នាក់ សមាជិកក្រុមប្រឹក្សាឃុំអង្គរបូរី១នាក់ ឃុំព្រៃផ្គាំ១នាក់ ឃុំបាស្រែ១នាក់ និងឃុំគោកធ្លក២នាក់៕

តាមរយៈសមាគមមិត្តភាពកម្ពុជា-ថៃ គឺបានជួយឱ្យចំណងមិត្តភាព និងកិច្ចសហប្រតិបត្តិការប្រទេសទាំងពីរ រីកចម្រើនទ្វេឡើង

ថ្លែងក្នុងកិច្ចប្រជុំសមាគមមិត្តភាពកម្ពុជា-ថៃ នៅថ្ងៃទី២២ ខែវិច្ឆិកា ឆ្នាំ២០១៧ លោកឧបនាយករដ្ឋមន្រ្ដី ទៀ បាញ់ រដ្ឋមន្ត្រីក្រសួងការពារជាតិ បានថ្លែងថា សមាគមមិត្តភាពកម្ពុជា-ថៃ បានជួយឱ្យចំណងមិត្តភាព និងកិច្ចសហប្រតិបត្តិការរបស់ប្រទេសទាំងពីរ កាន់តែរីកចម្រើនលូតលាស់ទ្វេឡើង។
លោកឧបនាយករដ្ឋមន្ត្រីបន្តថា ទោះបីជាកន្លងមកសកម្មភាពមិនបានខ្លាំងក៏ដោយ សមាគមទាំងពីរនេះ បាននាំឱ្យចំណងមិត្តភាព និងកិច្ចសហប្រតិបត្តិការរបស់ប្រទេសទាំងពីរ បានលូតលាស់ជាបន្ដបន្ទាប់។

លោកឧបនាយករដ្ឋមន្រ្ដី ទៀ បាញ់ បានបន្តឱ្យដឹងថា នៅដំណាក់កាលកន្លងមកឃើញថា ការដោះស្រាយ បញ្ហាពលករ, ការដោះស្រាយបញ្ហានៅតាមព្រំដែន, និងបញ្ហានៃការដឹកជញ្ចូនគ្រប់បែបយ៉ាងទាំងអស់ ត្រូវបានដោះស្រាយដោយមានការរីកចម្រើនជាបន្ដបន្ទាប់ ហើយទំនិញទាំងឡាយ ដែលមានការកក់ស្ទះ មួយចំនួន ត្រូវបានសម្រួលយ៉ាងល្អប្រសើរ។

លោកឧបនាយករដ្ឋមន្រ្ដី ទៀ បាញ់ បានគូសបញ្ជាក់ដែរថា តាមរយៈសមាគមកម្ពុជា-ថៃនេះ ពលកររបស់ កម្ពុជា ត្រូវបានថៃជួយសម្រួលជាបន្ដបន្ទាប់ឱ្យក្លាយជាពលករស្រប់ច្បាប់។

លោកឧបនាយករដ្ឋមន្រ្ដី បានបញ្ជាក់ទៀតថា ទោះបីជាកន្លងមកកម្ពុជា-ថៃមានភាព មិនចុះសម្រុងនឹងគ្នា យ៉ាងណាក៏ដោយ ប៉ុន្ដែបច្ចុប្បន្ននេះត្រូវបានលុបលាងជាបន្ដបន្ទាប់ និងនាំមកនូវភាពល្អូកល្អើន និងបានដោះស្រាយបញ្ហាជាមួយគ្នាយ៉ាងប្រពៃក្នុងរយៈពេលកន្លងមក។

សូមបញ្ជាក់ថា រាជរដ្ឋាភិបាលកម្ពុជា បានសម្រេចបង្កើតសមាគមមិត្តភាពកម្ពុជា-ថៃ កាលពីខែធ្នូ ឆ្នាំ២០១៥ ដើម្បីរឹតចំណងមិត្តភាព សាមគ្គីភាព និងសហប្រតិបត្តិការរវាងកម្ពុជា-ថៃ និងដើម្បីពង្រឹង និងពង្រីកទំនាក់ ទំនងលើគ្រប់ផ្នែក រួមទាំងផ្នែកពាណិជ្ជកម្ម វិនិយោគ កសិកម្ម វប្បធម៌ ទេសចរណ៍ កីឡា អប់រំ សុខាភិបាល បណ្តុះបណ្តាលវិជ្ជាជីវៈ និងសង្គមកិច្ចផងដែរ។ សមាគមនេះ ក៏មានភារកិច្ចរៀបចំគម្រោង និងកម្មវិធីសហ ប្រតិបត្តិការ ផ្លាស់ប្តូរយោបល់ ទស្សនកិច្ចសិក្សាស្រាវជ្រាវ ចែករំលែកបទពិសោធន៍ ពង្រឹងប្រព័ន្ធទំនាក់ទំនង និងធ្វើរបាយការណ៍ ពីសកម្មភាពដាក់ជូនរដ្ឋាភិបាលជាដើម។

សម្រាប់ខាងកម្ពុជា សមាគមមិត្តភាពកម្ពុជា-ថៃ មានលោកឧបនាយករដ្ឋមន្រ្ដី ទៀ បាញ់ ជាប្រធាន និង លោក លី យ៉ុងផាត់ ជាអនុប្រធាន។ សមាគមនេះបានដើរតួនាទី ជាគណៈកម្មាធិការអន្តរក្រសួងសម្រាប់ ទំនាក់ទំនង កម្ពុជា-ថៃ ដែលមានសមាជិកជាង៧០រូប រាប់បញ្ចូលទាំងទីប្រឹក្សាផងដែរ ដែលជារដ្ឋមន្រ្តីមកពីក្រសួង ឧស្សាហកម្ម និងសិប្បកម្ម, ក្រសួងកសិកម្ម, រដ្ឋមន្រ្តីក្រសួងបរិស្ថាន, និងអគ្គលេខាធិការក្រុមប្រឹក្សាអភិវឌ្ឍន៍ កម្ពុជា និងរដ្ឋលេខាធិការក្រសួងការបរទេស។ ទីប្រឹក្សាផ្សេងទៀត មានអភិបាលខេត្តបាត់ដំបង, កោះកុង, បន្ទាយមានជ័យ, ឧត្តរមានជ័យ, និងព្រះវិហារ។

សមាជិកចំនួន៣៥រូប ក្នុងនោះក៏រួមមានថ្នាក់ដឹកនាំសំខាន់ៗមួយចំនួនផងដែរដូចជា លោក គិត ម៉េង, លោក កុក អាន, លោក ពុង ខៀវសែ, លោក ឡាវ ម៉េងឃីន និងលោក អាន ម៉ាឌី ជាដើម។ សមាគមនេះ មាន អគ្គលេខាធិការដ្ឋានមួយជាសេនាធិការ ដែលមានសមាជិកចំនួន៦រូប។ សមាគមមិត្តភាពកម្ពុជា-ថៃ ក៏មានសិទ្ធិ ប្រើប្រាស់ថវិកា ដោយឡែករបស់ទីស្ដីការគណៈរដ្ឋមន្រ្ដី និងមានសិទ្ធិទទួល និងចាត់ចែងប្រើប្រាស់តាមនីតិវិធី ច្បាប់ជាធរមាននូវធនធាន និងមូលនិធិដែលបានមកពីប្រភពផ្សេងៗទៀត សម្រាប់ដំណើរការការងាររបស់ខ្លួន៕

អភិបាលខេត្តតាកែវ អញ្ជើញចូលរួមរំលែកទុក្ខ​គ្រួសារសព​ និងសួរសុខទុក្ខ​កម្មករ កម្មការនី​ ដែលរងគ្រោះ​ដោយសារ​ក្រឡាប់រថយន្ត​

តាកែវ៖ លោក ឡាយ វណ្ណៈ អភិបាលខេត្តតាកែវ នៅរសៀលថ្ងៃទី២២ ខែវិច្ឆិកា ឆ្នាំ២០១៧ បានអញ្ជើញចូលរួមរំលែកទុក្ខគ្រួសារសព និងសួរសុខទុក្ខកម្មករ កម្មការនី ដែលរងគ្រោះថ្នាក់ដោយសារក្រឡាប់រថយន្តដឹកកម្មករ កាលពីយប់ថ្ងៃទី២១ ខែវិច្ឆិកា ឆ្នាំ២០១៧ ដែលបណ្តាលឱ្យកម្មករស្លាប់០១នាក់ របួសធ្ងន់០៣នាក់ និងរបួសស្រាល១២១នាក់។

លោកអភិបាលខេត្តតាកែវ បានពាំនាំនូវការចូលរួមរំលែកមរណៈទុក្ខយ៉ាងក្រៀមក្រំបំផុត ចំពោះក្រុមគ្រួសារសព និងសួរសុខទុក្ខចំពោះកម្មករ កម្មការនី ដែលរងរបួសពីសំណាក់ លោកឧបនាយករដ្ឋមន្ត្រីប្រចាំការ ប៊ិន ឈិន រដ្ឋមន្ត្រីស្តីទីនៃទីស្តីការគណៈរដ្ឋមន្ត្រី និងជាប្រធានក្រុមការងារថ្នាក់ជាតិ ចុះមូលដ្ឋានខេត្តតាកែវចំពោះឧបទ្ទេវហេតុដ៏គួរឱ្យសោកស្តាយនេះ និងបានផ្តាំផ្ញើដល់ក្រុមគ្រូពេទ្យត្រូវយកចិត្តទុកដាក់ព្យាបាលបងប្អូនឱ្យបានល្អ និងជាសះស្បើយទើបអនុញ្ញាតិឱ្យត្រឡប់ទៅផ្ទះវិញ។

លោក ឡាយ វណ្ណៈ បានសង្កត់ធ្ងន់ថា លោកនឹងបញ្ជាឱ្យគណៈកម្មាធិការត្រួតពិនិត្យបច្ចេកទេសយានយន្ត ធ្វើការត្រួតពិនិ្យឡើងវិញ នូវលក្ខណៈបច្ចេកទេសរថយន្តដឹកកម្មករ និងអ្នកបើកបររថយន្តទូទាំងខេត្ត ថាតើលក្ខណៈបច្ចេកទេសរថយន្តត្រឹមត្រូវតាមស្តង់ដារដែលបានកំណត់ ឬអត់? ហើយអ្នកបើកបរមានបណ្ណបើកបរត្រឹមត្រូវឬទេ? ហើយប្រសិនបើពុំមានលក្ខណៈគ្រប់គ្រាន់ទេនោះ នឹងពុំត្រូវបានអនុញ្ញាតិឱ្យដឹកកម្មករនោះទេ ព្រោះជីវិតរបស់បងប្អូនកម្មករគឺផ្ញើរទាំងស្រុងលើរថយន្ត និងអ្នកបើកបរនេះ ដូច្នេះមិនអាចធ្វេសប្រហែសបានឡើយ។

ក្នុងឱកាសនោះដែរ លោកក៏បាននាំមកនូវអំណោយ និងថវិកាមួយចំនួនរបស់លោកឧបនាយករដ្ឋមន្ត្រីប្រចាំការ ជូនដល់បងប្អូនកម្មករដែលរងរបួស និងឧបត្ថម្ភដល់ក្រុមគ្រួសារសពនូវថវិកាចំនួន០៩លានរៀល ដោយក្នុងនោះថវិការបស់ឧបនាយករដ្ឋមន្ត្រីប្រចាំការ ប៊ិន ឈិន ចំនួន០២លានរៀល លោក ជា វណ្ណដេត អ្នកតំណាងរាស្ត្រមណ្ឌលតាកែវ និងជាប្រធានក្រុមការងារថ្នាក់ជាតិចុះមូលដ្ឋានស្រុកបាទី០១លានរៀល លោកអភិបាលខេត្ត០១លានរៀល សាខាកាកបាទក្រហមកម្ពុជាខេត្ត០១លានរៀល និងបេឡាជាតិរបបសន្តិសុខសង្គមចំនួន០៤លានរៀល។

បន្ថែមពីនោះ លោកអភិបាលខេត្ត ក៏បានទទួលបង់ថ្លៃសាលាផ្គត់ផ្គង់ការសិក្សាប្រចាំខែរហូតចប់បរិញ្ញាបត្រដល់ប្អូនស្រីសពម្នាក់ ដែលកំពុងបន្តការសិក្សានៅសកលវិទ្យាល័យវ៉ាន់ដា និងសន្យាផ្តល់អាហារូបករណ៍ថ្នាក់បរិញ្ញាបត្រដល់ប្អូនស្រីម្នាក់ទៀតនៃសព ក្រោយពេលប្រឡងជាប់សញ្ញាបត្រមធ្យមសិក្សាទុតិយភូមិ៕

លោក សុខ ឥសាន ស្នើសុំកុំយកហ្សឹមបាវ៉េ មកប្រៀបធៀបនឹងកម្ពុជា

នៅថ្ងៃទី២៣ ខែវិច្ឆិកា ឆ្នាំ២០១៧នេះ លោក  សុខ ឥសាន អ្នកនាំពាក្យគណបក្សប្រជាជនកម្ពុជា បាន​លើក​ឡើងថានៅ​លើ​ពិភពលោក នៅប្រទេសនី​មួយៗ​មានលក្ខណៈពិសេស​ដោយឡែក​ៗ​ពី​​គ្នា មិន​អាច​យក​សភាពការណ៍ប្រទេស​មួយមកប្រដូចនឹងប្រទេស​មួយទៀត​បាន​ទេ ។

លោក សុខ ឥសាន បានលើកឡើងទៀតថា  នៅប្រទេសហ្សឹមបាវ៉េ លោកប្រធានាធិបតី មូហ្គា​បេ​ មាន​វ័យចាស់​រហូតដល់៩៣ ឆ្នាំទៅហើយ ។ ធម្មតាក្នុងវ័យចាស់បែបនេះ មិនអាចមាន​កាយ​សម្បទា​​​គ្រប់គ្រាន់​ដើម្បីរ៉ាប់​រង​ការ​ងារ​បាន​ដូចធម្មតាទេ ទោះបីមាន​ឆន្ទៈចង់​បម្រើជាតិ​យ៉ាងណា​ក៏​ដោយ ។ នេះជាក្រឹត្យក្រមធម្មជាតិតម្រូវ ។ តែទោះយ៉ាងណាក្តីគេ​មិនអាច​ឆ្លៀត​ឱកាស​ដើម្បី​លូក​​​ដៃ​ចូល​កិច្ចការ​ផ្ទៃក្នុង​​ប្រទេសហ្សឹមបាវ៉េទេ ដែលផ្ទុយពីធម្មនុញ្ញអង្កការសហប្រជាជាតិ ។ គួរ​ទុក​​ឲ្យ​ប្រជាជន​ប្រទេសហ្សឹម​បាវ៉េសម្រេចចិត្តដោយផ្ទាល់ ។



លោក សុខ ឥសាន បានបញ្ជាក់ថា     ចំពោះកម្ពុជាមានលក្ខណៈពិសេសសម្រាប់កម្ពុជា ។ មានតែប្រជាជនកម្ពុជាទេ ដែលមាន​សិទ្ធិសម្រេចពីជោគវាសនារបស់កម្ពុជាផ្ទាល់។ លោកបន្តថា  សម្តេច តេជោ ហ៊ុន សែន ទើបមានអាយុ ៦៥ឆ្នាំ នៅមានកាយសម្បទាមាំមួន សុខភាពល្អ សកម្មការងារបម្រើប្រជាជននិងប្រទេសជាតិបានយ៉ាងមានប្រសិទ្ធភាព មានគុណ​សម្បត្តិ​ធំធេង​សម្រាប់​ប្រជាជន ហើយត្រូវ​បានប្រជាជន​ទូទាំងប្រទេស​ភាគ​ច្រើនលើសលុបបន្ត​គាំទ្របន្តបេស​ក​ក​ម្មបម្រើជាតិមាតុភូមិ តើមានខុសអីទៅបើនៅបន្តបម្រើប្រជាជននោះ?

លោកបន្តទៀតថា ប្រជាជនកម្ពុជាមិនគិតពីកាន់អំណាចយូរទេ ទោះបីប៉ុន្មានសិបឆ្នាំទៅ​មុខទៀត​ក៏ដោយ ឲ្យតែប្រទេសមានសន្តិភាព ស្ថេរភាពនយោបាយ សេចក្តីសុខក្សេ​នក្សាន្តសម្រាប់​ជីវ​ភាព​រស់​នៅ​សម្បូរ​សប្បាយ មានការអភិវឌ្ឍន៍រីកចម្រើន គឺជាការចង់បានរបស់ប្រជាជន ។ ដោយ​សារ​គុណ​សម្បត្តិ និងស្នាដៃស្តារកសាង និងអភិវឌ្ឍន៍ប្រទេសបានរីកចម្រើននេះហើយបាន​ជាប្រជាជន​នៅ​តែបន្ត​គាំ​ទ្រតទៅទៀតយ៉ាងដូច្នេះ ។

លោក សុខ ឥសាន បានបន្តបន្ថែមទៀតថា ហេតុនេះគេមិនអាចយក​សភាព​ការណ៍របស់​ហ្សឹម​បា​វ៉េ មកប្រៀបធៀប​ជាមួយ​កម្ពុជា​បាន​ឡើយ ព្រោះមានលក្ខណៈខុសគ្នាទាំងស្រុង។  ហើយគេ​ក៏កាន់​តែមិនអាចយកលោក មូហ្គាបេ មក​ប្រៀប​​ធៀបនឹងសម្តេចតេជោ ហ៊ុន សែន បានដែរ  ពីព្រោះសម្តេច ហ៊ុន សែន កាន់អំណាច និង​បន្តកាន់​អំណាចតាមឆន្ទៈរបស់ប្រជាជនកម្ពុជា ។ គ្មានជនណា ឬប្រទេសណាមាន សិទ្ធិសម្រេចជំនួសប្រជាជនកម្ពុជាបានទេ៕

អភិបាលខេត្តសៀមរាបដឹកនាំកិច្ចប្រជុំបូកសរុបលទ្ធផលការងារ របស់ក្រុមការងារចុះជួយក្រុងសៀមរាប

សៀមរាប៖ លោក ឃឹម ប៊ុនសុង អភិបាលនៃគណៈអភិបាលខេត្តសៀមរាប និងជាប្រធានក្រុមការងារចុះជួយក្រុងសៀមរាប នៅថ្ងៃទី២២ ខែវិច្ឆិកា ឆ្នាំ២០១៧ បានដឹកនាំប្រជុំបូកសរុបលទ្ធផលការងារ ក្រុមការងារចុះជួយក្រុងសៀមរាប ប្រចាំខែវិច្ឆិកាឆ្នាំ២០១៧ និងទិសដៅអនុវត្តបន្ត ដើមី្បត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា។

មានប្រសាសន៍បើកកិច្ចប្រជុំនោះ លោក ឃឹម ប៊ុនសុង ក៏បានលើកឡើង អំពីសភាពការណ៍ និង សកម្មភាពក្នុងខេត្ត លើការងារសន្តិសុខសណ្តាប់ធ្នាប់សាធារណៈ ដើមី្បធ្វើសេចក្តីរាយការណ៍អំពីលទ្ធផល សកម្មភាពការងារ ដែលបានអនុវត្តបានប្រចាំខែ ព្រមទាំងបញ្ហាប្រឈមដើមី្បរកនូវនីតិវិធីដោះស្រាយឲ្យបានចំនូវរាល់បញ្ហាទាំងនោះ និងឲ្យមានប្រសិទ្ធភាព ។

ក្នុងនោះដែរ លោកអភិបាលខេត្តក៏បានសង្កត់ធ្ងន់ ចំពោះរាល់បញ្ហាប្រឈមទាំងនេះ គឺត្រូវរកប្រភពបញ្ហា អំពីប្ញសគល់បញ្ហា ដើមី្បធ្វើការកែតម្រូវទៅតាមការសំណូមពររបស់ប្រជាពលរដ្ឋនៅក្នុងមូលដ្ឋាន។ម៉្យាងវិញទៀត ត្រូវធ្វើការកែលម្អ និងពង្រឹងដោះស្រាយ ទៅតាមវេទិកាសាធារណៈ ជាពិសេសតាមរយៈក្រុមការងារថ្នាក់ខេត្តចុះមូលដ្ឋាន ដោយត្រូវធ្វើការត្រួតពិនិត្យ និង គាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រដ្ឋាភិបាលកម្ពុជា ក្នុងការពង្រឹងការធ្វើកំណែទម្រង់ អនុវត្តកម្មវិធីនយោបាយអភិវឌ្ឍន៍លើគ្រប់វិស័យឲ្យមានប្រសិទ្ធភាពខ្ពស់។

លោកក៏បានធ្វើការផ្តាំផ្ញើ ដល់សមាជិកក្រុមការងារទាំងអស់ ត្រូវប្រកាន់ឲ្យបានខ្ជាប់ខ្ជួនពីតួនាទី ភារកិច្ចរបស់ខ្លួន ដែលប្រមុខរាជរដ្ឋាភិបាលប្រគល់ជូន ដើមី្បយកទៅអនុវត្តឲ្យទទួលបានជោគជ័យ និង មានប្រសិទ្ធភាពខ្ពស់៕

លោក​ សុខ ឥសាន៖​ តើការរំលាយបក្ស​ប្រឆាំង​ធ្វើឡើង​ដោយយុត្តិធម៌​ ឬ អយុត្តិធម៌?​

អ្នកនាំពាក្យគណបក្សប្រជាជនកម្ពុជា លោក សុខ ឥសាន នៅថ្ងៃទី២៣ ខែវិច្ឆិកា ឆ្នាំ២០១៧ បានលើកឡើងថា អ្នកណាក៏បានដឹងដែរថា គណបក្សប្រឆាំងដែលត្រូវបានរំលាយដោយតុលាការកំពូល គឺអាស្រ័យដោយមេដឹកនាំ និងក្រុមមេដឹកនាំគណបក្សនេះ បានប្រព្រឹត្តបទល្មើសធ្ងន់ធ្ងរ ដោយបានអនុវត្តតាមផែនការរបស់បរទេសក្នុងការផ្តួលរំលំរាជរដ្ឋាភិបាលកម្ពុជាស្របច្បាប់ ផ្ទុយពីគោលការណ៍លទ្ធិប្រជាធិបតេយ្យ និង នីតិរដ្ឋ ដែលជាស្មារតីនៃកិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ ហើយដែលត្រូវបានបញ្ចូលទៅក្នុងខ្លឹមសាររដ្ឋធម្មនុញ្ញនៃព្រះរាជាណាចក្រកម្ពុជា តាំងពីឆ្នាំ១៩៩៣ មកម៉្លេះ។

លោក សុខ ឥសាន បានបន្តថាទង្វើខុសច្បាប់របស់បក្សប្រឆាំង ត្រូវប្រឈមនឹងច្បាប់ស្តីពីគណបក្សនយោបាយ និងទោសក្បត់ជាតិត្រូវប្រឈមនឹងមាត្រា៤៤៣ នៃក្រមព្រហ្មទណ្ឌនៃព្រះរាជាណាចក្រកម្ពុជា។

អ្នកនាំពាក្យរូបនេះ បានបន្តថា ការដែលបក្សប្រឆាំងត្រូវរំលាយ គឺស្របតាមទង្វើល្មើសច្បាប់របស់ខ្លួន គ្មានអ្នកណាបង្កើតបទល្មើសឲ្យខ្លួននោះទេ។ ដូច្នេះ មានតែអ្នកល្មើសច្បាប់ទេ ដែលត្រូវទទួលផលវិបាកនៃអំពើល្មើសច្បាប់នោះ ហើយការរលាយរបស់បក្សប្រឆាំងនេះ គឺយុត្តិធម៌ ដោយស្របតាមច្បាប់ និងបទល្មើសរបស់គណបក្សស្រាប់។

លោក សុខ ឥសាន បានបន្តទៀតថា ប៉ុន្តែដោយសារគ្មានការទទួលស្គាល់ការពិត និងទង្វើល្មើសច្បាប់របស់ខ្លួន ពួកមេក្លោង និងពួកអាយ៉ង នៅតែប្រកាសបដិសេធពីទង្វើខុសច្បាប់ រំលោភលទ្ធិប្រជាធិបតេយ្យ និងនីតិរដ្ឋនៅកម្ពុជា ពួកគេសុខចិត្តធ្មេចភ្នែកប្រកែកយកតែឈ្នះដៃ បំភ័ន្តមតិសាធារណជាតិ និងអន្តរជាតិ ថាការរំលាយបក្សខ្លួនគឺអយុត្តិធម៌ណាស់ ដែលនេះគ្រាន់តែជាការលុបលាងភាពអាម៉ាស់ប៉ុណ្ណោះ។ ប៉ុន្តែទោះជាយ៉ាងណាក្តី ការពិតនៅតែជាការពិត រឿងធំប៉ុនមហាមេឃ មិនអាចយកចង្អេរតូចមួយមកបិទបាំងបានជាដាច់ខាត។

អ្នកនាំពាក្យគណបក្សប្រជាជនកម្ពុជា រូបនេះបានសង្កត់ធ្ងន់ថា ច្បាប់ គឺច្បាប់ ការល្មើសច្បាប់ ត្រូវតែទទួលខុសត្រូវចំពោះមុខច្បាប់ ទោះជាខំស្រែកថាអយុត្តិធម៌យ៉ាងណាក៏គ្មានប្រសិទ្ធភាពដែរ។ រលាយ ត្រូវតែរលាយ មិនអាចវិលមកវិញជាដាច់ខាត។ ខ្មោចមិនអាចរស់ឡើងវិញទេ ទោះមានគ្រូធ្មប់ពូកែយ៉ាងណា ក៏មិនអាចស្តារប្រស់ឲ្យរស់ឡើងវិញបានជាដាច់ខាត៕

វីដេអូ៖ សន្តិភាព ជីវភាព និងការអភិវឌ្ឍ