ក្រោយពេលភូតអស់ក្បួន លើបញ្ហាប្រើប្រាស់ផែនទី និងញុះញង់ប្រជាពលរដ្ឋឲ្យចុះទៅតវ៉ានៅព្រំដែន
លោក សម រង្ស៊ី ពេលនេះបានផ្លាស់ប្តូរគោលដៅ និងវិធីបោកប្រាស់មួយបែបទៀតហើយ
ដោយចោទរាជរដ្ឋាភិបាល លើប្រធានបទថ្មីថា ផ្តាច់ការ និងថាការបង្កើតគណបក្សតូចៗជាល្បិចរបស់គណបក្សកាន់អំណាចដើម្បីបំបែកសំឡេងឆ្នោតវិញម្តង
ដើម្បីអាចស្រោចស្រង់ការគាំទ្រ និងលួងចិត្តអ្នកគាំទ្ររបស់ខ្លួន ពីភាពអាម៉ាស់ដែលបរាជ័យក្នុងបញ្ហាព្រំដែនកន្លងមក។
ការចោទប្រកាន់របស់លោក សម រង្ស៊ី ថាការបង្កើតគណបក្សតូចៗជាការបំបែកសម្លេងគណបក្សសង្គ្រោះជាតិនេះបញ្ជាក់ថា
លោក សម រង្ស៊ី ពិតជាមេដឹកនាំដែលគ្មានទស្សនៈប្រជាធិបតេយ្យក្នុងការប្រកួតប្រជែងដោយសេរីដូចការអួតរបស់ខ្លួនពីមុននោះទេ
តែពេលនេះបែរទៅជាក្លាយខ្លួនជាមេដឹកនាំខ្លាចស្រមោលខ្លួនឯងទៅវិញ។
ការមិនចង់ឲ្យពលរដ្ឋមានសិទ្ធិសេរីភាពក្នុងការជ្រើសរើសមេដឹកនាំ និងសម្រេចចិត្តដោយខ្លួនឯងបែបនេះ
បញ្ជាក់ថា គណបក្សសង្គ្រោះជាតិ ជាគណបក្សដឹងខ្លួនជាមុនថាចាញ់ឆ្នោត មិនហ៊ានប្រឈមនូវអ្វីដែលជាភាពបែកបាក់ផ្ទៃក្នុង
និងភាពធ្លាក់ចុះខ្សោយនៃគណបក្សរបស់ខ្លួន។
មានប្រតិកម្មរបស់មេដឹកនាំនៃគណបក្សទើបកើតថ្មីជាច្រើន
បានរិៈគន់ និងសើចចំអកចំពោះការចោទប្រកាន់របស់លោក សម រង្ស៊ី ដែលថា ពួកគេជាអ្នកមកបំបែកសម្លេងគណបក្សសង្គ្រោះជាតិ។
ក្នុងនោះ «គណបក្សប្រជាធិបតេយ្យមូលដ្ឋាន» របស់លោក យ៉េង វីរៈ
បានហៅការចោទប្រកាន់របស់លោក សម រង្ស៊ី ថាមិនមែនជារឿងប្លែក ហើយក៏មិនមែនជារឿងថ្មីដែរ។
ការប្រើប្រាស់វប្បធម៌លាបពណ៌ ទៅលើគណបក្សនយោបាយផ្សេងទៀត គឺជាទម្លាប់របស់លោក
សម រង្ស៊ី នៅពេលដែលសកម្មជន ឬគណបក្សនោះឈប់គាំទ្រលោក។
ចំណែកលោក ម៉ម សូណង់ដូ ប្រធាន «គណបក្សសំបុកឃ្មុំសង្គមប្រជាធិបតេយ្យ» បានប្រតិកម្មដែរថា អ្នកដឹកនាំគណបក្សសង្គ្រោះជាតិ
ជាពិសេសលោកសម រង្ស៊ី ដូចជាខ្មោចតៃហោងអីចឹង ហើយមនុស្សដូចខ្មោចតៃហោង ដើរលងគេ
លងប្រជាពលរដ្ឋអ្នកណាដែលខ្លាចខ្មោចហ្នឹងនោះ។ ប្រធានគណបក្សមួយនេះក៏បានចំអកដល់លោក
សម រង្ស៊ី ថា ការពិតអត់មានអី ក្រៅពីគំនិតដើរកេងប្រវ័ញ្ចជាច្រើនអាណត្តិមកហើយហ្នឹងទេ
ហើយឥឡូវនេះ លោក សម រង្ស៊ី កាន់តែបញ្ចេញសកម្មភាព របស់គាត់អោយប្រជាពលរដ្ឋ
យល់កាន់តែច្បាស់ឡើង អំពីការអសមត្ថភាព ភាពមិនស្មោះស ចំពោះជាតិ គឺគាត់ធ្វើអីក៏អត់បានជោគជ័យដែរ។លោកប្រៀបធៀបលោក
សម រង្ស៊ី ជាអ្នកនយោបាយ «ដូចខ្មោចតៃហោង» អីចឹង។
រីឯលោកស្រី ឡាក់ សុភាព ដែលជាស្ថាបនិក «គណបក្សខ្មែរសាមគ្គី» បានថ្លែងប្រតិកម្មថា ការបង្កើតគណបក្សខ្មែរសាមគ្គី
នេះឡើង គឺដើម្បីចូលរួមប្រកួតប្រជែង នៅក្នុងការបោះឆ្នោត ជ្រើសតាំងតំណាងរាស្ត្រឆ្នាំ២០១៨
ខាងមុខនេះ។ លោកស្រី បានលើកឡើងថា យើងមិនបាច់បំបែក សម្លេងគណបក្សសង្គ្រោះជាតិទេ
គឺគណបក្សមួយនេះកំពុងបែកបាក់ស្រាប់ហើយ ដោយសារមេដឹកនាំ ក្រុមគាត់ បក្ខពួកគាត់
បែកបាក់គ្នាអស់ទៅហើយនៅក្នុងផ្ទៃក្នុងគណបក្សសង្គ្រោះជាតិនោះ។ យើងអត់មានបំបែកសម្លេងគាត់ទេ
គឺគាត់ជាអ្នកបំបែកខ្លួនគាត់។
ក៏ដូចគ្នានេះដែរ លោក សួន សេរីរដ្ឋា ប្រធាន “គណបក្សអំណាចខ្មែរ” អះអាងថា លោក សម រង្ស៊ី ជាមេដឹកនាំនយោបាយអគតិ
គ្មានគំនិតជាមនុស្ស និងគ្មានសុភវិនិច្ឆ័យទេ។ ការនិយាយថា គណបក្សដែលបង្កើតថ្មី
ទៅបំបែកសំឡេងរបស់ខ្លួននេះមិនមែន លោក សម រង្ស៊ី ទើបតែនិយាយក្នុងពេលនេះទេ
គឺលោក សម រង្ស៊ី ធ្លាប់និយាយលាបពណ៌គណបក្សសិទ្ធិមនុស្សរបស់ លោក កឹម សុខា តាំងពីពួកគេមិនទាន់ចូលគ្នាម្ល៉េះ។
ដូច្នេះ លោក សម រង្ស៊ី ពេលនេះបានយកពាក្យទាំងនោះ មកនិយាយឡើងវិញ គឺដើម្បីលាបពណ៌អ្នកស្នេហាជាតិ។
បើតាមមតិប្រជាពលរដ្ឋយល់ថា ការលេងប៉ាហ៊ី ពីប្រទេសអូស្ត្រាលី
របស់លោក សម រង្ស៊ី ពេលនេះ គឺដើម្បីគេចវេសពីការទទួលខុសត្រូវចំពោះសកម្មជនរបស់ខ្លួននៅក្នុងប្រទេស
ដែលត្រូវបានចាប់ខ្លួនដោយសារការបញ្ជាឲ្យក្លែង និងផ្សព្វផ្សាយឯកសារសាធារណៈ។
ប្រជាពលរដ្ឋនៅបានកត់សម្គាល់ទៀតថា ខណៈដែលសកម្មជនរបស់ខ្លួនត្រូវបានសមត្ថកិច្ចចាប់ខ្លួនជាបន្តបន្ទាប់នោះ
លោក សម រង្ស៊ី និង លោកកឹម សុខា បាននាំគ្នាចាកចេញទៅក្រៅប្រទេសទាំងអស់ដែលទង្វើនេះនាំឲ្យមានការរិះគន់ថា
មេដឹកនាំគណបក្សសង្គ្រោះជាតិជាមនុស្សមិនទទួលខុសត្រូវ គឺនៅរាល់ពេលដែលមានបញ្ហា
តែងតែនាំគ្នារត់ចេញទៅក្រៅប្រទេសមិនខ្វល់ពីសុខទុក្ខរបស់កូនចៅ ឬសកម្មជនឡើយ។
ដូច្នេះ ប្រជាពលរដ្ឋ និងជាពិសេសសកម្មជនរបស់គណបក្សសង្គ្រោះជាតិ
ពិតជាអាចវិនិច្ឆ័យយ៉ាងច្បាស់អំពីសមត្ថភាពរបស់មេដឹកនាំដែលខ្លួននឹងធ្វើការសម្រេចចិត្ត
ក្នុងការជ្រើសរើសមកដឹកនាំប្រទេសនាពេលបច្ចុប្បន្ន និងពេលអនាគត៕
