លោកឧបនាយករដ្ឋមន្ត្រី ស ខេង បានវាយតម្លៃខ្ពស់ចំពោះសមិទ្ធផល ការងារសម្រេចបាន និង​បន្ត​អភិវឌ្ឍ​ខេត្ត​ឱ្យ​កាន់តែ​រីក​ចម្រើន

បាត់ដំបង៖ ព្រឹកថ្ងៃទី២៨ ខែកុម្ភៈ ឆ្នាំ២០១៩នេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីដ៏ខ្ពង់ខ្ពស់ ក្នុងពិធីបិទសន្និបាតបូកសរុបលទ្ធផល​ការ​ងារ​ប្រចាំឆ្នាំ២០១៨ និងលើកទិសដៅការងារសម្រាប់អនុវត្តឆ្នាំ២០១៩ របស់រដ្ឋបាលខេត្តបាត់ដំបង នៅសាលមហោស្រពស្ទឹងសង្កែ ក្រុងបាត់ដំបង។

ក្នុងពិធីនេះផងដែរ ក៏មានការអញ្ជើញចូលរួមពី លោក លោកស្រី សមាជិករដ្ឋសភា រដ្ឋលេខា​ធិការ អនុរដ្ឋលេខាធិការ អគ្គនាយក អគ្គនាយករងក្រសួងមហាផ្ទៃ ប្រធានក្រុមប្រឹក្សាខេត្ត អភិបាលខេត្ត លោក លោកស្រី សមាជិកក្រុមប្រឹក្សាខេត្ត អភិបាលរងខេត្ត មន្ទីរ អង្គភាព ជុំវិញ​ខេត្ត កងកម្លាំងប្រដាប់អាវុធ អភិបាលក្រុង/ស្រុក មេឃុំ ចៅសង្កាត់ ព្រមទាំងមន្ត្រីរាជការចំណុះឱ្យរដ្ឋបាលខេត្តបាត់ដំបង សរុបជាង ១០០០នាក់។

សូមជម្រាបថា សន្និបាតបូកសរុបលទ្ធផលការងារប្រចាំឆ្នាំ២០១៨ និងលើកទិសដៅការងារសម្រាប់អនុវត្តឆ្នាំ២០១៩ របស់រដ្ឋបាលខេត្ត បាត់ដំបង បានប្រព្រឹត្តទៅរយៈពេល ១ថ្ងៃ និង ១ព្រឹក ចាប់ពីថ្ងៃទី ២៧ ខែកុម្ភៈ ឆ្នាំ២០១៩ ដែលបានបើកពិធីក្រោមអធិបតី លោក អ៊ុយ រី ប្រធាន​ក្រុមប្រឹក្សាខេត្ត លោក ងួន រតន: អភិបាល នៃគណៈអភិបាល ខេត្តបាត់ដំបង ឧត្តមសេនីយ៍ទោ ឯក សំអូន មេបញ្ជាការស្តីទី និងជានាយសេនាធិការយោធភូមិភាគទី៥ និងព្រឹកថ្ងៃ​ទី២៨ ខែកុម្ភៈ ឆ្នាំ២០១៩នេះ ជាពិធីបិទសន្និបាត ក្រោមអធិបតីភាពដ៏ខ្ពងខ្ពស់របស់ លោកឧបនាយករដ្ឋមន្ត្រី ស ខេង ។

នៅក្នុងពីធីនេះផងដែរ អភិបាលខេត្តបានអានរបាយការណ៍សង្ខេបស្តីពី លទ្ធផលនៃដំណើរការសន្និបាត និងបញ្ហាប្រឈមនានា ក្នុងអង្គសន្និបាត ព្រមទាំងបានស្តាប់សេចក្តីព្រាង នៃរបាយការណ៍បូកសរុបលទ្ធផល សម្រេចបានក្នុងឆ្នាំ២០១៨ និងលើកទិសដៅការងារឆ្នាំ​២០១៩ របស់រដ្ឋបាលខេត្ត និងមានបទអន្តរាគមន៍ចំនួន៨ ពីសំណាក់អង្គភាព ស្ថាប័នពាក់​ព័ន្ធ​ជុំវិញខេត្ត។

ជាមួយគ្នានោះ អង្គសន្និបាតបានពិភាក្សា រកដំណោះស្រាយ សំណូមពរលើចំណុចគន្លឹះសំខាន់ៗ ដើម្បីធានាឱ្យមានប្រសិទ្ធិភាព ក្នុងការពង្រឹង និងអនុវត្តទិសដៅ ភារកិច្ចរបស់រដ្ឋ​បាលខេត្ត សម្រាប់ឆ្នាំ២០១៩ ប្រកបដោយប្រសិទ្ធិភាព តម្លាភាព និងគណនេយ្យភាព។

ថ្លែងក្នុងឱកាសបិទសន្និបាតលោកឧបនាយករដ្ឋមន្ត្រី បានឱ្យដឹងថា សន្និបាតរដ្ឋបាលខេត្តបាត់ដំបង មិនគ្រាន់តែឆ្លុះបញ្ចាំងនៅសមិទ្ធផល បញ្ហាប្រឈម និងទិសដៅសម្រាប់តែ​ថ្នាក់ខេត្ត​ប៉ុណ្ណោះទេ បានទាំងការបូកសរុបវាយតម្លៃ តាមវិស័យនានាក្នុងខេត្តទាំងមូល។

សន្និបាតបានអញ្ជើញតំណាងអាជ្ញាធរ ស្រុក/ក្រុង ឃុំ/សង្កាត់ មន្ទីរ/អង្គភាព កងកម្លាំងមានសមត្ថកិច្ចនានាចូលរួម ដើម្បីផ្តល់ឱកាសឱ្យអ្នក ចូលរួមទាំងអស់ បានរួមគ្នាពិនិត្យ វាយតម្លៃនូវសមិទ្ធផលការងារ ដែលខេត្តសម្រេចបានរយៈពេល ១ឆ្នាំកន្លងមក និងការងារដែល នៅ​សេស​សស់ ខ្វះចន្លោះ និងកំណត់បញ្ហាប្រឈម ដើម្បីឈានទៅរក ដំណោះស្រាយប្រកប​ដោយប្រសិទ្ធិភាព និងមានភាពសក្ត័សិទ្ធិ ដែលអាចធានា ឆ្លើយតបបាននូវតម្រូវការចាំបាច់ និងពិតប្រាកដ នៅមូលដ្ឋាន។

លោកឧបនាយករដ្ឋមន្ត្រីបានថ្លែងទៀតថា ឆ្លងតាមរយៈអង្គសន្និបាត លោកបានសំណូមពរគ្រប់គណៈបញ្ជាការឯកភាព បន្តលុបបំបាត់ នូវរាល់បទល្មើស គ្រឿងញៀន គោរពច្បាប់ចរាចរណ៍ និងអនុវត្តឱ្យ ខានតែបាន គោលនយោបាយភូមិ/ឃុំមានសុវត្ថិភាព។

លោកក៏បានណែនាំ និងផ្តាំផ្ញើដល់រដ្ឋបាលខេត្ត ស្រុក/ក្រុង អាជ្ញាធរមូល ដ្ឋាន និងស្ថាប័នពាក់ព័ន្ធក្នុងខេត្ត ត្រូវតាំងចិត្ត និងខិតខំប្រឹងប្រែង បំពេញតួនាទី ភារកិច្ចរបស់ខ្លួន ដោយផ្អែកតាមផែនការសកម្មភាព ការងារប្រចាំឆ្នាំ ស្របតាមគោលការណ៍ច្បាប់របស់ក្រសួងមហាផ្ទៃ ក៏ដូចជារាជរដ្ឋាភិបាលផងដែរ។

នៅក្នុងឱកាសនោះ លោកសូមឱ្យអាជ្ញាធរមូលដ្ឋាន ដែលជាមន្ត្រីថ្នាក់ ក្រោមជាតិ យកចិត្តទុកដាក់ធ្វើយ៉ាងណា ដោះស្រាយបញ្ហាប្រឈមនានា ដែលប្រជាពលរដ្ឋសំណូមពរ ថែរក្សាគ្រប់គ្រងទឹក សម្រាប់ជួបគ្រោះ រាំងស្ងួត ថែរក្សាការពារអភិរក្សតំបន់មួយចំនួន អប់រំយុវជនកុំឱ្យប្រើ ប្រាស់គ្រឿងញៀន ជួយដល់ប្រជាកសិករ លើការងារបង្កបង្កើនផលប្រកប ដោយគុណភាព ស្របទៅនឹងទីផ្សារផងដែរ។

ជាចុងក្រោយ លោកឧបនាយករដ្ឋមន្ត្រីក៏បានជំរុញឱ្យអាជ្ញាធរខេត្ត រៀបចំ បរិវេណផ្សារឱ្យមានសណ្តាប់ធ្នាប់មានអនាម័យ សោភ័ណភាព មានទី កន្លែងចាក់សំរាមឱ្យមានសណ្តាប់​ធ្នាប់ល្អ និងបានបំពាក់ឯកសណ្ឋាន និងសញ្ញាសក្តិ គ្រឿងឥស្សរយសជូនមន្ត្រីរាជការ ដែលមាន​ស្នាដៃ ល្អផងដែរ៕

លោកនាយករដ្ឋមន្រ្តី ហ៊ុន សែន សំណូមពរដល់ប្រតិភូឧត្តមក្រុមប្រឹក្សាពិគ្រោះ និងផ្តល់យោបល់ពង្រីកវិសាលភាពការងាររបស់ខ្លួនច្រើនជាងនេះ

លោកនាយករដ្ឋមន្រ្តី ហ៊ុន សែន បានធ្វើការសំណូមពរដល់ប្រតិភូឧត្តមក្រុមប្រឹក្សាពិគ្រោះ និងផ្តល់យោបល់​ឱ្យផ្តោតការងារក្នុងវិសាលភាពធំទូលាយជាងនេះដោយមិនត្រឹមតែផ្តោតតែលើបញ្ហាដីធ្លីប៉ុណ្ណោះទេ។ នេះបើយោងតាមលោក ឈឹម ផលវរុណ ប្រធាន​លេខាធិការដ្ឋាន​នៃ​ឧ​ត្ត​ម​ក្រុមប្រឹក្សា​ពិគ្រោះ ​និង​ផ្តល់យោបល់ ដែលបានមានប្រសាសន៍នៅក្នុងសន្និសីទបន្ទាប់ពីកិច្ចប្រជុំប្រចាំឆមាសរបស់ឧត្តមក្រុមប្រឹក្សាពិគ្រោះ និងផ្តល់យោបល់ នៅថ្ងៃទី២៨ ខែកុម្ភៈ ឆ្នាំ២០១៩។

លោក ឈឹម ផលវរុណ បានបន្ថែមថា លោកនាយករដ្ឋមន្រ្តី ហ៊ុន សែន បានធ្វើការកោតសរសើរនិងគាំទ្រទាំងស្រុងចំពោះសកម្មភាពការងាររបស់ប្រតិភូឧត្តមក្រុមប្រឹក្សាពិគ្រោះ និងផ្តល់យោបល់ដែលមានសមាសភាពមកពី១៦គណបក្សនយោបាយ។

លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា យន្តការនេះគឺជាការផ្តល់តម្លៃដល់ប្រសិទ្ធភាពការងាររបស់ប្រតិភូឧត្តមក្រុមប្រឹក្សាពិគ្រោះ និងផ្តល់យោបល់ ហើយលោកបានបន្ថែមថា ការសម្រេចរបស់លោកនៅក្នុងកិច្ចប្រជុំប្រចាំឆមាសរបស់ឧត្តមក្រុមប្រឹក្សា គឺមានតម្លៃស្មើនឹងការសម្រេចនៅក្នុងកិច្ចប្រជុំពេញអង្គគណៈរដ្ឋមន្រ្តីទៀតផង៕

លោកនាយករដ្ឋមន្រ្តី ហ៊ុន សែន បញ្ជាមិនឱ្យអាជ្ញាធរមូលដ្ឋានកេងចំណេញពីការបែងចែកដីសម្បទានសង្គមកិច្ច

លោកនាយករដ្ឋមន្រ្តី ហ៊ុន សែន បានបញ្ជាយ៉ាងដាច់ណាត់មិនឱ្យអាជ្ញាធរមូលដ្ឋានធ្វើការកេ​ងចំណេញផលប្រ យោជន៍ពីការបែងចែកដីសម្បទានសង្គមកិច្ចដោយការបន្លំខ្លួនធ្វើជាប្រជាពលរដ្ឋក្រីក្រជាដើម។ នេះបើយោងតាមលោក ឈឹម ផលវរុណ ប្រធាន​លេខាធិការដ្ឋាន​នៃ​ឧ​ត្ត​ម​ក្រុមប្រឹក្សា​ពិគ្រោះ ​និង​ផ្តល់យោបល់ ដែលបានមានប្រសាសន៍នៅក្នុងសន្និសីទបន្ទាប់ពីកិច្ចប្រជុំប្រចាំឆមាសរបស់ឧត្តមក្រុមប្រឹក្សាពិគ្រោះ និងផ្តល់យោបល់ នៅថ្ងៃទី២៨ ខែកុម្ភៈ ឆ្នាំ២០១៩។

លោក ឈឹម ផលវរុណ បានបន្ថែមថា លោកនាយករដ្ឋមន្រ្តី ហ៊ុន សែន បានហាមឃាត់បែបនេះ ដើម្បីឱ្យប្រជាពលរដ្ឋក្រីក្រពិតប្រាកដបានទទួលផលប្រយោជន៍ពីការបែងចែកដីសម្បទានសង្គមកិច្ចនេះ៕

លោកនាយករដ្ឋមន្រ្តី ហ៊ុន សែន បញ្ជាឲ្យអភិបាលខេត្តមណ្ឌលគិរី យកភ្នំដោះក្រមុំមកវិញ ដោយមិនត្រូវខ្លាចនរណាទាំងអស់

លោកនាយករដ្ឋមន្រ្តី ហ៊ុន សែន បានបញ្ជាយ៉ាងដាច់ណាត់ឲ្យអភិបាលខេត្ត មណ្ឌលគិរី លោក ស្វាយ សំអៀង យកភ្នំដោះក្រមុំមកគ្រប់គ្រងវិញ ដោយមិនត្រូវឲ្យមាននរណាបំពាន ឬរំលោភយកធ្វើកម្មសិទ្ធិនោះឡើយ។ នេះបើតាមមន្ត្រីជាន់ខ្ពស់ នៃរាជរដ្ឋាភិបាលកម្ពុជា ប្រាប់បណ្តាញព័ត៌មាន Fresh News នៅរសៀលថ្ងៃទី២៨ ខែកុម្ភៈ ឆ្នាំ២០១៩។

មន្ត្រីជាន់ខ្ពស់ដដែលរូបនោះ បានបញ្ជាក់យ៉ាងដូច្នេះថា «ក្នុងកិច្ចប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់ នាថ្ងៃទី២៨ ខែកុម្ភៈនេះ នៅវិមានសន្តិភាព, ឆ្លើយតបនឹងការលើក ឡើងរបស់គណបក្សខ្មែរជនជាតិដើមកម្ពុជា បញ្ហាការបំពានភ្នំដោះក្រមុំ ខេត្តមណ្ឌលគិរី លោកនាយករដ្ឋមន្ត្រី ហ៊ុន សែន បានបញ្ជាឲ្យអភិបាល ខេត្តមណ្ឌលគិរី យកមកវិញ ដោយមិនត្រូវខ្លាច នរណាទាំងអស់»៕

ប្រភព៖ Fresh News

រដ្ឋបាលខេត្តកំពង់ឆ្នាំង ជូនដំណឹងស្ដីពីការបិទផ្សាយជាសាធារណៈ នូវឯកសារនៃការវិនិច្ឆ័យដីធ្លីមានលក្ខណៈជាប្រព័ន្ធ

កំពង់ឆ្នាំង៖ រដ្ឋបាលខេត្តកំពង់ឆ្នាំង ជូនដំណឹងស្ដីពីការបិទផ្សាយ ជាសាធារណៈនូវឯកសារនៃការវិនិច្ឆ័យដីធ្លី មានលក្ខណៈជាប្រព័ន្ធ សម្រាប់ភូមិថ្មរាប និងភូមិទ័ពស្រូវ ឃុំបន្ទាយព្រាល ស្រុករលាប្អៀរ ខេត្តកំពង់ឆ្នាំង រយៈពេល ១៥ ថ្ងៃ (ដោយរាប់បញ្ចូលទាំងថ្ងៃឈប់សម្រាក) ចាប់ពីថ្ងៃទី ៦ ខែមីនា ឆ្នាំ២០១៩ ដល់ថ្ងៃទី ២០ ខែមីនា ឆ្នាំ២០១៩ នៅបរិវេណសាលាបុណ្យថ្មរាប ក្នុងភូមិថ្មរាប ឃុំបន្ទាយព្រាល ស្រុករលាប្អៀរ ខេត្តកំពង់ឆ្នាំង៕

ព័ត៌មានលម្អិត សូមអានសេចក្តីជូនដំណឹងរបស់រដ្ឋបាលខេត្តកំពង់ឆ្នាំង មានខ្លឹមសារដូចខាងក្រោម៖

ខេត្តកំពង់ឆ្នាំង រៀបចំបើកកិច្ចប្រជុំផ្សព្វផ្សាយអំពីយុទ្ឋនាការត្រៀមរៀបចំទិវា ៨ឧសភា

កំពង់ឆ្នាំង៖ នៅព្រឹកថ្ងៃទី២៨ ខែកុម្ភៈ ២០១៩ លោកសៀត គឹមលៀង អនុប្រធានគណៈកម្មាធិការសាខា លោក ប្រាក់សោភ័ណ្ឌ នាយកសាខា អញ្ជើញចូលរួមក្នុងកិច្ចប្រជុំផ្សព្វផ្សាយអំពីយុទ្ឋនាការត្រៀមរៀបចំទិវា ៨ឧសភា ឆ្នាំ២០១៩ និងពិធីចម្រើនព្រះជន្មសម្តេចព្រះមហាក្សត្រី នរោត្តម មុនិនាថ សីហនុព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមម្ពុជា នៅទីស្នាក់ការកណ្តាលកាកបាទក្រហមកម្ពុជា ក្រោមអធិបតីភាពលោកស្រី ឃួន សុដារី អនុប្រធានកាកបាទក្រហមកម្ពុជា ៕

លោកនាយករដ្ឋមន្រ្តី ហ៊ុន សែន បញ្ជាឲ្យសិក្សាដកមេបញ្ជាការយោធាខេត្ត និងអភិបាលរងខេត្តព្រះសីហនុ២នាក់ ចេញពីតំណែងពាក់ព័ន្ធរឿងដីធ្លី

លោកនាយករដ្ឋមន្រ្តី ហ៊ុន សែន នៅរសៀលថ្ងៃទី២៨ ខែកុម្ភៈ ឆ្នាំ២០១៩នេះ បានបញ្ជាឲ្យធ្វើការសិក្សាក្នុងការដកមេបញ្ជាការយោធាខេត្តព្រះសីហនុ និងអភិបាលរងខេត្ត២រូបទៀត ចេញពីតំណែង ពាក់ព័ន្ធករណីបង្ក្រាបប្រជាពលរដ្ឋតវ៉ារឿងដីធ្លី ឈានដល់ការប្រើអំពើហិង្សានៅខេត្តព្រះសីហនុ កាលពីពេលកន្លងទៅ។

ការបញ្ជារបស់លោកនាយករដ្ឋមន្រ្តី ហ៊ុន សែន យ៉ាងដូច្នេះធ្វើឡើងក្នុងប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់នៅថ្ងៃទី២៨ ខែកុម្ភៈ ឆ្នាំ២០១៩នេះ នៅវិមានសន្តិភាព៕

ប្រភព៖ Fresh News

អ្នកលេង Facebook ផ្ទុះការរិះគន់អ្នកវិភាគក្មេងខ្ចី ដែលបញ្ចេញយោបល់ឱ្យលោកនាយករដ្ឋមន្ត្រីឈប់ប្រើ Facebook

អ្នកប្រើប្រាស់បណ្តាញសង្គម Facebook មួយចំនួនបានធ្វើComments រិះគន់ និងប្រតិកម្មចំៗចំពោះការលើកឡើងរបស់ លី ស្រីស្រស់ អ្នកវិភាគវ័យក្មេង ដែលបង្ហោះសារបែបបញ្ចើចបញ្ចើ ភ្ជាប់ជាមួយព័ត៌មានលោកនាយករដ្ឋមន្ត្រី ហ៊ុន សែន ជុំវិញការប្រើប្រាស់ Facebook របស់លោក។ លី ស្រីស្រស់ បានសរសេរសារបង្ហោះក្នុងន័យថា លោកនាយករដ្ឋមន្ត្រី ហ៊ុន សែន បើឈប់ប្រើ Facebook ល្អជាង ហើយយកពេលទៅគិតបញ្ហាជាតិបានច្រើន។

ប៉ុន្តែមានមតិយោបល់ជាច្រើនបានមើលឃើញផ្ទុយពីការលើកឡើងរបស់ លី ស្រីស្រស់ ដោយក្នុងនោះមានគណនី Facebook ជាច្រើនបានយល់ឃើញស្របគ្នាថា ការប្រើប្រាស់ Facebook របស់លោកនាយករដ្ឋមន្ត្រីបច្ចុប្បន្ន គឺចំនេញផលប្រយោជន៍ប្រជាជន និងផលប្រយោជន៍ជាតិ។ គេយល់ឃើញដូចគ្នាថា លោកនាយករដ្ឋមន្ត្រី បានដោះស្រាយបញ្ហាប្រឈម និងសំណូមពររបស់ប្រជាពលរដ្ឋបានទាន់ពេលវេលា និងមានប្រសិទ្ធិភាពកាន់តែខ្ពស់ឡើង តាមរយៈបណ្តាញសង្គមនេះ។

ជាក់ស្តែងគណនី Facebook ឈ្មោះ សុខ រតនា បានលើកឡើងថា « ខ្ញុំមើលឃើញថា ហ្វេសប៊ុកលោក ហ៊ុន សែន ក៏ជាទីកន្លែងដែលបង្កើតអោយមាននូវទំនាក់ទំនងផ្ទាល់ជាមួយពលរដ្ឋ និង សុំមិនគាំទ្រនូវសារដែល Sreysrors Ly ខាងលើនេះទេ ព្រោះថា ហ្វេសប៊ុកលោក ហ៊ុន សែន មិនមែនជាហ្វេសប៊ុកសម្រាប់លេងសើចនោះទេ ហើយផ្ទុយពីការចោទប្រកាន់នេះ គឺហ្វេសប៊ុកលោក ហ៊ុន សែន គឺជាហ្វេសប៊ុកដែលបានជួយដោះស្រាយបញ្ហាជាតិ និងប្រជាជនទៅវិញ » ។ គណនីមួយទៀតឈ្មោះ សំរិទ្ធិខ្មៅ ព្រះវិហារ បានបញ្ចេញយោបល់ថា « ជាការពិត ខ្ញុំយល់ឃើញថា ហ្វេសប៊ុក របស់លោកនាយករដ្ឋមន្រ្តីមានសារៈសំខាន់បំផុតសម្រាប់ ជាវេទិកាបង្កើតទំនាក់ទំនងរវាងលោកនាយករដ្ឋមន្រ្តី និងប្រជាពលរដ្ឋ ប្រជាពលរដ្ឋអាចលើកបញ្ហារបស់ពួកគាត់ដើម្បីដាក់ជូនលោកបានដឹង ហើយអាចធ្វើអោយលោកបានដោះស្រាយបញ្ហាទាំងឡាយដែលប្រជាពលរដ្ឋបានលើកឡើង ។ រាល់បញ្ហាទាំងអស់ លោកនាយករដ្ឋមន្រ្តី លោកនឹងបានដឹង។ ប្រជាពលរដ្ឋទំនងមានភាពកក់ក្តៅ និងជឿទុកចិត្តបានកាន់តែច្រើនឡើងក្នុងការធ្វើទំនាក់ទំនងដោយផ្ទាល់ជាមួយលោកនាយករដ្ឋមន្រ្តី ។ ដូច្នេះសុំកុំយល់ច្រឡំអោយសោះថា ហ្វេសប៊ុករបស់លោកនាយករដ្ឋមន្រ្តី ជាកន្លែងសម្រាប់លេងសើចសប្បាយនោះ ។ បញ្ហាប្រជាពលរដ្ឋ គឺជាបញ្ហាជាតិ ហើយបញ្ហាជាច្រើនទៀតត្រូវបានធ្វើឡើងតាមហ្វេសប៊ុកនេះតែម្តង ពីព្រោះ វាបង្កើតអោយមានទំនាក់ទំនងការងារគ្រប់ផ្នែកដ៏ងាយ រហ័ស និងលឿនបំផុតដើម្បីដោះស្រាយបញ្ហាជាក់ស្តែងតែម្តង ។ គណនី Facebook មួយទៀតឈ្មោះ អ្នកវិភាគ តុកាហ្វេ បានគូសបញ្ជាក់ថា « Facebook លោកនាយករដ្ឋមន្ត្រី ហ៊ុន សែន ដែលប្រើក្នុងពេលបច្ចុប្បន្នហ្នឹង ខ្ញុំមើលឃើញថា សម្រាប់ដោះស្រាយបញ្ហាប្រជាជន ក៏ដូចជាបញ្ហាជាតិ ។ Facebook លោកគឺជាទីកន្លែងទំនាក់ទំនងដោយផ្ទាល់ និងសាមញ្ញបំផុតរវាងប្រជាពលរដ្ឋ និងមេដឹកនាំរបស់ខ្លួន ។ មិនមែនជាការប្រើលេងឥតប្រយោជន៍នោះទេ ។ ជាមួយគ្នានេះ គណនីឈ្មោះ Sreyneang Leak បានយល់ឃើញថា « សម័យបច្ចេកវិទ្យា ដើម្បីទទួលបានព័ត៌មាន និងដឹងពីបញ្ហាបានលឿន គេតែងតែប្រើប្រាស់នូវបណ្ដាញសង្គម អ្វីដែលកញ្ញា Sreysrors Ly លើកឡើងខាងលើ គឺវាដើរផ្ទុយ ៣៦០ដឺក្រេតែម្ដង ។ ម្យ៉ាង សូម្បីតែកញ្ញាផ្ទាល់ក៏ប្រើប្រាស់នូវបណ្ដាញសង្គមមួយនេះផងដែរ ។ បើកញ្ញា យល់ថា ការប្រើប្រាស់នូវបណ្ដាញសង្គមមួយនេះ គឺអត់ប្រយោជន៍ ឬដោះស្រាយបញ្ហាណាមួយមិនបាន តើកញ្ញាខ្លួនឯងហ្នឹង ប្រើប្រាស់វាធ្វើអ្វី ។ សង្ឃឹមថា ភ្នែករបស់កញ្ញា ភ្លឺ មិនមែនងងឹតទៅចុះ ។ គណនី Facebook មួយទៀត ឈ្មោះ Ounmomcute បានបញ្ជាក់ថា បើលោកនាយករដ្ឋមន្ត្រី ហ៊ុន សែន ឈប់ប្រើ Facebook មែន ចប់ហើយ ព្រោះប្រជាជនខ្លះដោយសារមាន Facebook ហ្នឹងហើយ បានអាចបញ្ចេញការពិតបាន។ គណនីដដែលបានបន្តថា មិនគួរណាគិតអវិជ្ជមានចំពោះ Facebook លោកនាយករដ្ឋមន្ត្រី ហ៊ុន សែន ទេ វាមានប្រយោជន៍ទៅវិញទេសម្រាប់ប្រជាជន។ ដូចគ្នានេះដែល គណនី Facebook ឈ្មោះ Miech Sopheap បានបញ្ចេញយោបល់ថា «តាមខ្ញុំដឹងដំណោះស្រាយជាច្រើនរបស់ប្រជាពលរដ្ឋ ត្រូវបានដោះជូនដោយពេញចិត្តបំផុត តាមរយៈការប្រើ Facebook របស់គាត់ (លោកនាយករដ្ឋមន្ត្រី) ។ មានតែខាតទៅវិញទេ បើចង់ឱ្យគាត់ឈប់ប្រើ Facebook នោះ។
គួរបញ្ជាក់ថា ទំព័រ Facebook ផ្លូវការរបស់លោកនាយករដ្ឋមន្ត្រី ហ៊ុន សែន ត្រូវបានបង្កើតឡើងនៅពាក់កណ្តាល ឆ្នាំ២០១០ ។ Facebook Page ផ្លូវការរបស់នាយករដ្ឋមន្ត្រីនេះ បានទទួលការគាំទ្រយ៉ាងច្រើនលើសលុបពីប្រជាពលរដ្ឋភ្លាមៗ បន្ទាប់ពីបង្កើតឡើង និងប្រកាសដាក់ដំណើរជាផ្លូវការ។ រហូតមកដល់ពេលនេះ ទំព័រ Facebook ផ្លូវការរបស់លោកនាយករដ្ឋមន្ត្រី មានអ្នក Like and Follow ចំនួនជាង១០លាននាក់ទៅហើយ។ អ្វីដែលគួរកត់សំគាល់នោះ លោកនាយករដ្ឋមន្ត្រី ហ៊ុន សែន បានធ្វើការណែនាំឱ្យក្រសួងស្ថាប័ន និងអាជ្ញាធររាជធានី-ខេត្តទាំងអស់ តាមដានទំព័រ Facebook ផ្លូវការរបស់លោកជាប្រចាំ ដើម្បីទទួលបានដំណឹងពីបញ្ហានានាដែលប្រជាពលរដ្ឋបានសុំអន្តរាគមន៍មកកាន់នាយករដ្ឋមន្ត្រី។ បញ្ហាប្រឈម និងសំណូមពរនានារបស់ប្រជាពលរដ្ឋក៏ត្រូវបានដោះស្រាយជាបន្តបន្ទាប់ផងដែរ។ អ្វីដែលរឹតតែពិសេសជាងនេះទៅទៀតនោះ ពលរដ្ឋខ្មែរជាច្រើននាក់រួចមកហើយ ដែលបានទទួលដំណោះស្រាយជាទីគាប់ចិត្ត បន្ទាប់ពីស្នើសុំជំនួយដោយផ្ទាល់មកនាយករដ្ឋន្ត្រី និងតាមរយៈកិច្ចអន្តរាគមន៍ពីលោកនាយករដ្ឋមន្ត្រីផ្ទាល់ និងភ្លាមៗតាម Facebook របស់លោក។ សរុបមកទំព័រ Facebook របស់លោកពិតជាមានសារៈសំខាន់ និងមានអត្ថប្រយោជន៍មិនអាចកាត់ថ្លៃបានចំពោះប្រជាពលរដ្ឋខ្មែរ ទាំងក្នុង និងក្រៅប្រទេស ៕

សេចក្តីជូនដំណឹងស្តីពីការជ្រើសរើសបេក្ខជន-បេក្ខនារី សម្រស់ឯកវាយនភណ្ឌឆ្នាំ២០១៩ (លើកទី៥)

ក្រសួងការងារ និងបណ្តុះបណ្តាលវិជ្ជាជីវៈ សហការជាមួយសមាគម រោងចក្រកាត់ដេរនៅកម្ពុជា (GMAC) សហភាពសហព័ន្ធយុវជនកម្ពុជា (សសយក) អគ្គនាយកដ្ឋានវិទ្យុ និងទូរទស្សន៍បាយ័ន និងអង្គការសហជីព រៀបចំកម្មវិធីសម្រស់ឯកវាយនភណ្ឌឆ្នាំ ២០១៩ (លើកទី៥) ដើម្បីអប អរសាទរខួបអនុស្សាវរីយ៍លើកទី១៣៣ ទិវាពលកម្មអន្តរជាតិ ១ឧសភា៕

ព័ត៌មានលម្អិត សូមអានសេចក្តីជូនដំណឹងខាងក្រោម៖

លោក អ៊ិត សំហេង ថ្លែងថា រាជរដ្ឋាភិបាលយកចិត្តទុកដាក់ឲ្យស្ត្រី ក្លាយជាកម្លាំងចលករចូលរួមអភិវឌ្ឍសង្គម និងសេដ្ឋកិច្ច

ក្នុងពិធីអបអរសាទរខួបលើកទី១០៨ នៃទិវាអន្តរជាតិនារី ៨មីនា លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា រាជរដ្ឋាភិបាលកម្ពុជា បានផ្តល់ការយកចិត្តទុកដាក់យ៉ាងខ្លាំង ក្នុងការលើកកម្ពស់សមភាពយេនឌ័រ និងពង្រឹងភាពអង់អាចដល់ស្រ្តី និងក្មេងស្រី ដើម្បីឱ្យពួកគេក្លាយជាកម្លាំងចលករចូលរួមក្នុងកិច្ចអភិវឌ្ឍ សង្គម និងសេដ្ឋកិច្ច។

គួរជម្រាបថា ពិធីអបអរសាទរទិវាអន្តរជាតិនារី ៨មីនា ត្រូវបានប្រារព្ធឡើង ជារៀងរាល់ឆ្នាំ ដើម្បីរំលឹកអំពីវីរភាពនៃការតស៊ូរបស់នារីទូទាំង សាកលលោក ក្នុងការទាមទារឱ្យមានការលើកកម្ពស់សិទ្ធិ សេរីភាព ប្រជាធិបតេយ្យ និងការអនុវត្តសិទ្ធិស្មើគ្នារវាងបុរស និងស្រ្តីនៅក្នុងសង្គម។

នៅកម្ពុជា ទិវាអន្តរជាតិនារី ៨មីនា ក្នុងឆ្នាំ២០១៩នេះ ត្រូវបានធ្វើឡើងក្រោមប្រធានបទ «លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍធនធានមនុស្ស»។ សម្រាប់ក្រសួងការងារ ពិធីអបអរសាទរខួបលើកទី១០៨ នៃទិវាអន្តរជាតិនារីនេះ ត្រូវបានប្រារព្ធឡើងថ្ងៃទី២៨ ខែកុម្ភៈ ឆ្នាំ២០១៩ នៅទីស្តីការក្រសួងតែម្ដង។

ក្នុងពិធីនោះ លោករដ្ឋមន្ត្រី អ៊ិត សំហេង បានថ្លែងយ៉ាងដូច្នេះថា «រាជរដ្ឋាភិបាលកម្ពុជា បានផ្តល់ការយកចិត្តទុកដាក់យ៉ាងខ្លាំង ក្នុងការលើកកម្ពស់សមភាពយេនឌ័រ និងពង្រឹងភាពអង់អាចដល់ស្រ្តី និងក្មេងស្រី ដើម្បីឱ្យពួកគេក្លាយជាកម្លាំងចលករមួយ ចូលរួមក្នុងកិច្ចអភិវឌ្ឍសង្គម និងសេដ្ឋកិច្ច»។

លោកថា គោលដៅជាយុទ្ធសាស្រ្តរបស់រាជរដ្ឋាភិបាល គឺការពង្រឹងសមភាពយេនឌ័រ និងការគាំពារសង្គម ដើម្បីលើកស្ទួយស្ថានភាពសង្គម-សេដ្ឋកិច្ច និងពង្រឹងតួនាទីស្រ្តី ដែលជាឆ្អឹងខ្នងនៃសេដ្ឋកិច្ច និងសង្គមជាតិ។

រាជរដ្ឋាភិបាលបានដាក់ចេញនូវក្របខណ្ឌគោលនយោបាយជាតិគាំពារសង្គម ឆ្នាំ២០១៦-២០២៥ ដែលមានលក្ខណៈទូលំទូលាយ ដោយផ្តោតលើសសរស្តម្ភពីរ គឺប្រព័ន្ធជំនួយសង្គម និងប្រព័ន្ធសន្តិសុខសង្គម។

ក្របខណ្ឌគោលនយោបាយនេះ នឹងដើរតួនាទីយ៉ាងសំខាន់ក្នុងការបង្កើន លទ្ធភាពទទួលបានសេវាជំនួយសង្គម និងសន្តិសុខសង្គម ដែលជាការគិតគូរចំពោះស្រ្តី មានជាឤទិ៍ ៖

ទី១- កម្មការិនីសម្រាលកូនបានទទួលប្រាក់ឈ្នួលចំនួន ១២០% ចំនួន៣ខែ។ ចាប់ពីថ្ងៃទី០១ ខែមករា ឆ្នាំ២០១៨ រាជរដ្ឋាភិបាល បានអនុវត្តកម្មវិធីផ្តល់ប្រាក់ឧបត្ថម្ភដល់កម្មការនីសម្រាលកូន ដោយផ្តល់ជូនកូនមួយនាក់ចំនួន ៤០ម៉ឺនរៀល ចំពោះកូនភ្លោះទទួលបាន ៨០ម៉ឺនរៀល និងកូនភ្លោះបីបាន ១លាន២សែនរៀល ព្រមទាំងទទួលបានថវិកាបន្ថែមចំនួន ៥លានរៀល ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតផ្ទាល់។

ទី២- នៅពាក់កណ្តាលឆ្នាំ២០១៩ អនុវត្តកម្មវិធីឧបត្ថម្ភស្រ្តីមានផ្ទៃពោះ និងកុមារអាយុក្រោម២ឆ្នាំ នៃគ្រួសារក្រីក្រដែលមាន ៣ដំណាក់កាល គឺដំណាក់កាលទី១ ឧបត្ថម្ភ៤លើក ក្នុង១លើក ៤ម៉ឺនរៀល នៅពេលស្រ្តីមានផ្ទៃពោះទៅទទួលយកសេវាពិនិត្យផ្ទៃពោះ នៅមូលដ្ឋានសុខាភិបាលរបស់រដ្ឋ, ដំណាក់កាលទី២ ឧបត្ថម្ភ២០ម៉ឺនរៀល នៅពេលស្រ្តីសម្រាលកូននៅមូលដ្ឋានសុខាភិបាលរបស់រដ្ឋ និងដំណាក់កាលទី៣ ឧបត្ថម្ភ១០លើក ក្នុង១លើក ៤ម៉ឺនរៀល នៅពេលស្រ្តីជាម្តាយនាំទារកទៅទទួលថ្នាំបង្ការ ឬសេវាគាំពាររហូតដល់កុមារមានអាយុ២ឆ្នាំ។

ទី៣- ការអនុញ្ញាតឱ្យកម្មការិនីជាស្រ្តីដែលមានផ្ទៃពោះ ចេញមុនម៉ោង យ៉ាងតិច១៥នាទី។ លើសពីនេះទៀត គ្រប់រោងចក្រទាំងអស់ត្រូវរៀបចំ បន្ទប់បំបៅកូនសម្រាប់កម្មការនី ដែលមានកូនអាយុក្រោម១២ខែ និងត្រូវមានទារកដ្ឋានសម្រាប់កម្មការនីដែលមានកូនអាយុលើសពី១៨ខែ។ គ្រប់តំបន់សេដ្ឋកិច្ចពិសេស ឬសួនឧស្សាហកម្មត្រូវរៀបចំឱ្យមានទារកដ្ឋាន មួយនៅក្នុងតំបន់របស់ខ្លួន។

ទី៤- ទន្ទឹមនឹងនេះ គ្រប់រោងចក្រទាំងអស់បានអនុញ្ញាតឱ្យកម្មករនិយោជិត ជាស្រ្តីខ្មែរឥស្លាម អាចប្រើប្រាស់សម្លៀកបំពាក់តាមបែបប្រពៃណីឥស្លាម។

ទី៥- រាជរដ្ឋាភិបាលប្រកាសផ្តល់ជូនប្រាក់ឧបត្ថម្ភដល់ស្ត្រី ជាមន្រ្តីរាជការស៊ីវិល នគរបាល និងកងកម្លាំងប្រដាប់ឤវុធ ដែលបានសម្រាលកូន ក្នុងនោះកូនមួយទទួលបាន ៨០ម៉ឺនរៀល កូនភ្លោះទទួលបាន ១លាន៦០ម៉ឺនរៀល កូនភ្លោះ៣ ទទួលបាន ២លាន៤០ម៉ឺនរៀល រួមជាមួយនឹងការឈប់សម្រាកលំហែរមាតុភាព រយៈពេល៣ខែ ជាមួយប្រាក់បៀវត្ស ១០០%។

ទាំងអស់នេះ បានបង្ហាញច្បាស់ថា រាជរដ្ឋាភិបាលតែងបានយកចិត្តទុកដាក់ ខ្ពស់ចំពោះស្ត្រី ដោយពីមួយឆ្នាំទៅមួយឆ្នាំ ស្ត្រីតែងទទួលបាននូវ ផលប្រយោជន៍ផ្ទាល់ខួនច្រើន និងកាត់បន្ថយបន្ទុកគ្រួសារកាន់តែច្រើន ដែលជាការលើកកម្ពស់ដល់សមភាពយេនឌ័រកាន់តែប្រសើរឡើង នៅគ្រប់វិស័យនៅកម្ពុជា ៕

សិក្ខាសាលាស្តីពីការបញ្ជ្រាបការយល់ដឹងជាសាធារណៈពីវិស័យ ទេសចរណ៍ដល់មន្រ្តីរាជការ យុវជន និងប្រជាពលរដ្ឋ

កំពង់ឆ្នាំង៖ នៅព្រឹកថ្ងៃទី២៨ ខែកុម្ភៈ​ ឆ្នាំ២០១៩ ក្រសួងទេសចរណ៍ ដោយមានកិច្ចសហការជាមួយមន្ទីរទេសចរណ៍ ខេត្តកំពង់ឆ្នាំង បានរៀបចំសិក្ខាសាលាស្តីពីការបញ្ជ្រាបការយល់ដឹងជាសាធារណៈ ពីវិស័យទេសចរណ៍ដល់យុវជន សិស្ស និសិ្សត មន្រ្តីរាជការ និងប្រជាពលរដ្ឋខេត្តកំពង់ឆ្នាំង ក្រោមអធិបតីភាពលោក គាត វិសុទ្ធមុនី អនុប្រធាននាយកដ្ឋានជំរុញទេសចរណ៍ក្នុងស្រុក និងលោក អេង ស្រស់វណ្ណះ អនុប្រធានមន្ទីរទេសចរណ៍ខេត្តកំពង់ឆ្នាំង។

កម្មវិធីសិក្ខាសាលានេះមានរយះពេល ០២ថ្ងៃ គឺចាប់ពីថ្ងៃទី២៨ ខែកុម្ភះ ឆ្នាំ២០១៩ ដល់ថ្ងៃទី០១ ខែមីនា ឆ្នាំ២០១៩ នៅសណ្ឋាគារសុខាញូយ៉ក ខេត្តកំពង់ឆ្នាំង ដោយមានអ្នកចូលរួមសរុប ១០៤នាក់ ៕

ក្រសួងពាណិជ្ជកម្ម ដាក់ឲ្យដំណើរការសាកល្បង ការផ្តល់វិញ្ញាបនបត្របញ្ជាក់ប្រភពដើមទំនិញទម្រង់ D នៅខេត្តក្រចេះ ស្ទឹងត្រែង និងមណ្ឌលគិរី

ក្រសួងពាណិជ្ជកម្ម នឹងដាក់ឲ្យដំណើរការសាកល្បង ក្នុងការផ្តល់វិញ្ញាបនបត្រ បញ្ជាក់ប្រភពដើមទំនិញទម្រង់ ឌី (D) សម្រាប់នាំចេញកសិផល ទៅប្រទេសជាប់ព្រំដែន ទៅឲ្យមន្ទីរពាណិជ្ជកម្ម ខេត្តក្រចេះ ស្ទឹងត្រែង និងមណ្ឌលគិរី ចាប់ពីថ្ងៃទី១ ខែមីនា ឆ្នាំ២០១៩ ស្អែកនេះតទៅ។ នេះបើតាមសេចក្ដីជូនដំណឹងរបស់ក្រសួងពាណិជ្ជកម្ម ដែលទទួលបាននៅថ្ងៃទី២៨ ខែកុម្ភៈ ឆ្នាំ២០១៩នេះ។

ក្រសួងពាណិជ្ជកម្ម បានបញ្ជាក់ថា ផលិតករ និងអ្នកនាំចេញកសិផល អាចដាក់ពាក្យស្នើសុំវិញ្ញាបនបត្របញ្ជាក់ប្រភពដើម ទំនិញទម្រង់ ឌី (C/O Form D) តាមប្រព័ន្ធស្វ័យប្រវត្តកម្ម តាមរយៈគេហទំព័រ https://co.moc.gov.kh ហើយត្រូវចុះហត្ថលេខា និងទទួលយកវិញ្ញាបនបត្របញ្ជាក់ប្រភពដើមទំនិញទម្រង់ ឌី (C/O Form D) នៅមន្ទីរពាណិជ្ជកម្មខេត្ត ដែលទីស្នាក់ការក្រុមហ៊ុនរបស់ខ្លួនស្ថិតនៅ។

ខាងក្រោមនេះ ជាសេចក្ដីជូនដំណឹង របស់ក្រសួងពាណិជ្ជកម្ម ដែលមានខ្លឹមសារទាំងស្រុង៖

ក្រសួងសេដ្ឋកិច្ច និងហិរញ្ញវត្ថុ ដាក់ចេញនូវវិធានការលើកទឹកចិត្ត និងអភិវឌ្ឍន៍វិស័យមូលបត្រ ដើម្បីលើកកម្ពស់គុណវុឌ្ឍិរបស់ធុរកិច្ចថ្មីៗ

នៅសណ្ឋាគារភ្នំពេញ ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៨ ខែកុម្ភៈ ឆ្នាំ២០១៩នេះ បានរៀបចំសិក្ខាសាលាស្តីពី «ដំណើរវិវឌ្ឍន៍ នៃបច្ចេក វិទ្យាហិរញ្ញវត្ថុ» ដោយមានកិច្ចសហប្រតិបត្តិការ ជាមួយក្រុមហ៊ុន Korea Shinhwa Logistic Service and LoDICS ក្រោមអធិបតីភាពលោកស្រី ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។

នៅក្នុងសិក្ខាសាលានោះ ក៏មានវត្តមានចូលរួមពី លោក លោកស្រី តំណាងក្រសួង-ស្ថាប័ន និងវិស័យឯកជន ដែលអញ្ជើញមកពី ក្រសួងពាណិជ្ជកម្ម, ក្រសួងប្រៃសណីយ៍ និងទូរគមនាគមន៍, ធនាគារជាតិនៃកម្ពុជា, គណៈកម្មការមូលបត្រកម្ពុជា, ក្រុមប្រឹក្សា ជាតិគណនេយ្យ, មជ្ឍមណ្ឌលបណ្តុះបណ្តាលធុរកិច្ចថ្មី «តេជោ», សាលារាជធានីភ្នំពេញ, តំណាងធនាគារពាណិជ្ជកម្មធំៗចំនួន០៧, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើទាំង០៧, ក្រមហ៊ុនធានា រ៉ាប់រងអាយុជីវិត និងទូទៅចំនួន០៧, សាកលវិទ្យាល័យចំនួន០៤, ក្រុមហ៊ុនជួញដូរឧបករណ៍និស្សន៍ចំនួន១០, សមាគមបច្ចេកវិទ្យា ហិរញ្ញវត្ថុបែបទំនើបកម្ពុជា, ក្រុមហ៊ុននវានុវត្តន៍ធុរកិច្ចថ្មី (Business Startup), សាស្រ្តាចារ្យ-ជំនាញការជនជាតិកូរ៉េ និងមន្ត្រីពាក់ព័ន្ធមួយ ចំនួនទៀតសរុប១០០នាក់។

វិស័យហិរញ្ញវត្ថុបែបទំនើប បានដើរតួនាទីយ៉ាងសំខាន់ ក្នុងការជួយជំរុញ កំណើនសេដ្ឋកិច្ចជាតិ ប៉ុន្តែវិស័យនេះ ក៏នៅតែជួបការលំបាកដោយសារ ចំណេះដឹងផ្នែកបច្ចេកវិទ្យា, ចំណេះដឹងពាក់ព័ន្ធ នឹងហិរញ្ញវត្ថុឌីជីថល និងការយល់ដឹងរបស់អតិថិជននៅមានកម្រិត ព្រមទាំងភាពស្មុគស្មាញ នៃប្រតិបត្តិការហិរញ្ញវត្ថុ បែបទំនើបជាដើម ដែលជាមូលហេតុ ចំបងជំរុញឱ្យ រាជរដ្ឋាភិបាល គិតគូរឡើងវិញ ក្នុងការអភិវឌ្ឍវិស័យហិរញ្ញវត្ថុបែបទំនើប ដែលជាបដិវត្តន៍ឧស្សាហកម្មទី៤.០ នៅកម្ពុជាឲ្យមានការរីកចំរើន តាមរយៈ យុទ្ធសាស្រ្តចតុកោណដំណាក់កាលទី៤ និងយុទ្ធសាស្រ្តអភិវឌ្ឍន៍វិស័យ ហិរញ្ញវត្ថុឆ្នាំ២០១៦-២០២៥ និងឯកសារទស្សនាទានស្តីពីសារពើពន្ធ អេឡិចត្រូនិក ដើម្បីជួយគាំទ្រដល់វិស័យហិរញ្ញវត្ថុ បែបទំនើប ក្នុងការពង្រីកអាជីកម្ម និងលើកទឹកចិត្តការបង្កើតថ្មី (Startup)ផងដែរ ។

បន្ថែមលើនេះក្រសួងសេដ្ឋកិច្ច និងហិរញ្ញវត្ថុ ក៏បានដាក់ចេញនូវវិធានការ លើកទឹកចិត្ត និងអភិឌ្ឍន៍ SMEs នៅក្នុងវិស័យមូលបត្រ ដើម្បីចូលរួម ចំណែកលើកកម្ពស់គុណវុឌ្ឍិរបស់ធុរកិច្ចថ្មីៗ ឱ្យមានលទ្ធភាពទទួលបាន ហិរញ្ញប្បទានក្នុងលក្ខខណ្ឌប្រកួតប្រជែងពីស្ថាប័នហិរញ្ញវត្ថុ។

សិក្ខាសាលាថ្ងៃនេះ ត្រូវបានរៀបចំក្នុងគោលបំណងចម្បងៗ គឺចែករំលែក នូវបទពិសោធន៍នានាពីសាធារណៈរដ្ឋកូរ៉េ លើវិស័យបច្ចេកវិទ្យាហិរញ្ញវត្ថុ ប្រមូលធាតុចូលសំខាន់ៗ ពីបណ្តាស្ថាប័នពាក់ព័ន្ធ នៅក្នុងព្រះរាជាណា ចក្រកម្ពុជា និងសាធារណៈរដ្ឋកូរ៉េ សម្រាប់ជាមូលដ្ឋានក្នុងការចងក្រង ឯកសារគោលនយោបាយជាតិ លើ «វិស័យបច្ចេកវិទ្យា ហិរញ្ញវត្ថុ បែបទំនើប»៕

រដ្ឋមន្រ្តីក្រសួងធនធានទឹក និងឧតុនិយម បន្តពិធីប្រគល់រថយន្ដដឹក-ស្ទួច ជូនមន្ទីរធនធានទឹកតាមបណ្ដាខេត្តទូទាំងប្រទេស

បន្ទាប់ពីបានប្រគល់រថយន្ត ដឹក-ស្ទូច ដល់មន្ទីរធនធានទឹក និងឧតុនិយម នៃខេត្ត ចំនួន២០រួចមក នៅព្រឹកថ្ងៃទី២៨ ខែកុម្ភៈ ឆ្នាំ២០១៩នេះ លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម បានបន្តប្រគល់ រថយន្តដឹក-ស្ទូច ចំនួន៥គ្រឿងទៀត ជាលើកចុងក្រោយជូនដល់មន្ទីរ ធនធានទឹក និងឧតុនិយម នៃខេត្តកោះកុង ខេត្តព្រះសីហនុ ខេត្តរតនគិរី ខេត្តមណ្ឌលគិរី និងរាជធានីភ្នំពេញ។

ថ្លែងក្នុងឱកាសនោះ លោករដ្ឋមន្រ្តី បានលើកឡើងថា ការប្រគល់រថយន្ត ដឹក-ស្ទូច សម្រាប់មន្ទីរធនធានទឹក និងឧតុនិយមគ្រប់រាជធានី-ខេត្ត គឺដើម្បីរួមចំណែកលើកកម្ពស់ប្រសិទ្ធភាព ក្នុងការបំពេញការងាររបស់ មន្ទីរតាមតម្រូវការចាំបាច់ និងដើម្បីប្រើប្រាស់ក្នុងការជួយអន្តរាគមន៍ លើការងារធនធានទឹកឲ្យបានទាន់ពេលវេលា។

បន្ថែមពីនេះ លោក លឹម គានហោ បានណែនាំដល់គ្រប់មន្ទីរ ត្រូវប្រើប្រាស់ និងថែទាំរថយន្តខាងលើឲ្យបានល្អ ដើម្បីជាប្រយោជន៍សម្រាប់ការងារ របស់ខ្លួន នាពេលបច្ចុប្បន្ន និងចំពោះមុខ។

សូមបញ្ជាក់ថា ក្នុងខណៈដែលប្រទេសកម្ពុជាកំពុងទទួលរងឥទ្ធិពល នៃបាតុភូតអែល នីណូ (El Nino) បង្កឲ្យធាតុអាកាសនៅកម្ពុជា មានសភាពក្តៅហួតហែង ដូចបានផ្សព្វផ្សាយតាមរយៈសារាចរណែនាំ នាពេលថ្មីៗនេះ របស់រាជរដ្ឋាភិបាលកម្ពុជា ស្តីពីការចាត់វិធានការ ថែរក្សាទឹកទុក មន្ទីរនៃខេត្តខ្លះ បាននិងកំពុងប្រើប្រាស់រថយន្តទាំងនេះ ដើម្បីដឹកទឹកយកទៅចែកជូនប្រជាពលរដ្ឋនៅតាមទីតាំង ដែលជួបប្រទះបញ្ហាកង្វះទឹកប្រើប្រាស់ប្រចាំថ្ងៃ ៕

លោកស្រី ដោក សុទ្ធា ជំរុញឱ្យអាជ្ញាធរមូលដ្ឋានត្រូវបន្តដោះស្រាយបញ្ហា ដែលនៅសេសល់

កំពង់ឆ្នាំង៖ ថ្ងៃទី២៨ ខែ កុម្ភះ ឆ្នាំ២០១៩ លោកស្រី ដោក សុទ្ធា បានថ្លែងនូវការកោតសរសើរដល់អាជ្ញាធរខេត្ត និងអង្គភាពទាំងអស់ ដែលបានបំពេញតួនាទីនិងភាកិច្ចរបស់ខ្លួនក្រោមការដឹកនាំរបស់រាជរដ្ឋាភិបាលដើម្បីធានាបាននូវសុខសន្តិភាព ស្ថិរភាពជូនប្រជាពលរដ្ឋ ឱ្យបានល្អ ប្រសើរ ហើយមានការអភិវឌ្ឍគួរ​ឱ្យ​កត់​សម្គាល់លើគ្រប់វិស័យនៅទូទាំង ខេត្តកំពង់ឆ្នាំង។

លោកស្រី បានថ្លែងកោតសរសើរបែបនេះ នៅសាលប្រជុំក្រុមប្រឹក្សា ខេត្តកំពង់ឆ្នាំង ក្នុងកិច្ចប្រជុំសាមញ្ញលើកទី៥៧ អាណត្តិទី២ របស់ក្រុម ប្រឹក្សា ខេត្តកំពង់ឆ្នាំង ដោយមានការ អញ្ជើញចូលរួមពីលោក អៀង វុធ អភិបាលរង ខេត្តកំពង់ឆ្នាំង លោកលោកស្រី សមាជិកក្រុមប្រឹក្សាខេត្ត មន្រ្តីសាលាខេត្ត និង លោកលោកស្រីប្រធានអង្គភាពពាក់ព័ន្ធ ជុំវិញខេត្តផងដែរ។

ក្រោយពីពិនិត្យលើបញ្ហាប្រឈម លោកស្រី ដោក សុទ្ធា បានជំរុញអោយ អាជ្ញាធរខេត្ត និង អង្គភាពពាក់ព័ន្ធត្រូវបន្តដោះស្រាយបញ្ហាដែលនៅ សេសសល់ ស្រមតាមសំណូមពរ និង តម្រូវការចាំបាច់របស់ប្រជាពលរដ្ឋ តាមតួនាទី និង ភារកិច្ចរបស់ខ្លួនអោយបានទាន់ពេលវេលា ជាពិសេសគ្រប់ អង្គភាពត្រូវរៀបចំសោភ័ណភាពអង្គភាពរបស់ខ្លួនអោយបានល្អដើម្បីចូលរួមអបអរសាទរបុណ្យទន្លេលើកទី៥ នាខែមិនា ឆ្នាំ២០១៩ ខាងមុខនេះ៕

ការចូលរួមពីគណបក្សនយោបាយនានាជាមួយរាជរដ្ឋាភិបាលគឺជួយជំរុញដល់ការកសាងប្រទេសឱ្យកាន់តែរីកចម្រើនទៅមុខ

នៅក្នុងទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន បានឱ្យដឹងថា នៅព្រឹកថ្ងៃទី២៨ ខែកុម្ភៈ ឆ្នាំ២០១៩ នេះ លោកនឹងជួបប្រជុំពិភាក្សាការងារប្រចាំឆមាស ជាមួយបងប្អូនមកពី គណបក្សចំនួន ១៦ ដែលជាសមាជិកនៅក្នុងឧត្តមក្រុមប្រឹក្សាពិគ្រោះ និងផ្តល់យោបល់។

លោកនាយករដ្ឋមន្រ្តី ហ៊ុន សែន បានគូសបញ្ជាក់ថា នេះគឺជាដំណើការនៃលទ្ធិប្រជាធិបតេយ្យនៅប្រទេសយើង។ ការចូលរួមផ្តល់នូវមតិយោបល់ល្អៗពីគណបក្សនយោ​បាយទាំងអស់ដល់រាជរដ្ឋាភិបាគឺជួយជំរុញដល់ការកសាងប្រទេសឱ្យកាន់តែរីកចម្រើនទៅមុខ។

លោកនាយករដ្ឋមន្រ្តី ហ៊ុន សែន ក៏បានអរគុណបងប្អូនដែលបានរួមចំណែកចូលរួមជួយប្រទេសជាតិ និងអរគុណបងប្អូនជនរួមជាតិដែលបានចូលរួមថែរក្សាការពាសន្តិភាពដើម្បីកម្ពុជាកាន់តែមានឱកាសអភិវឌ្ឍន៍លឿនទៅមុខ៕

ក្រុមការងារចុះបញ្ជីដីធ្លី ផ្តល់ប័ណ្ណកម្មសិទ្ធិដីធ្លីជូន​ប្រជា​ពល​រដ្ឋ ២ភូមិ ក្នុងឃុំអភិវឌ្ឍន៍ ស្រុកទឹកផុស

កំពង់ឆ្នាំង៖ ថ្ងៃទី២៧ ខែកុម្ភៈ ឆ្នាំ២០១៩ លោក លី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ត និងជានាយកចាត់ការកម្មវិធីអនុវិស័យរដ្ឋបាលដីធ្លីខេត្តកំពង់ឆ្នាំង បានចាត់តាំងក្រុមការងារចុះបញ្ជីដីធ្លីមានលក្ខណៈជាប្រព័ន្ធ ចុះចែកប័ណ្ណកម្មសិទ្ធិដីធ្លីជូនប្រជាពលរដ្ឋក្នុងភូមិដំរឹប និងភូមិស្រែព្រិច ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង។

ក្នុងឱកាសនោះដែរ ប្រជាពលរដ្ឋដែលទទួលបានបណ្ណកម្មសិទ្ធិដីធ្លី បានសំដែងនូវទឹកចិត្តសប្បាយរីករាយ និងថ្លែងអំណរគុណយ៉ាងជ្រាលជ្រៅជូនចំពោះក្រុមការងារចុះបញ្ជី ជា ពិសេសលោក ឈួរ ច័ន្ទឌឿន អភិបាលខេត្ត ដែលជានិច្ចជាកាលតែងតែយកចិត្តទុកដាក់ដល់សុខទុក្ខរបស់ប្រជាពលរដ្ឋនៅក្នុងខេត្តទាំងមូល។

ដូចគ្នានេះ ក្រុមការងារក៏បានថ្លែងអំណរគុណដល់អាជ្ញាធរមូលដ្ឋានគ្រប់លំដាប់ថ្នាក់ ពិសេសប្រជាពលរដ្ឋម្ចាស់ក្បាលដីទាំងអស់ ដែលបានចូលរួមសហការយ៉ាងល្អក្នុងដំណើរការនៃការចុះបញ្ជី រហូតទទួលបានលទ្ធផលល្អនាថ្ងៃនេះ៕