ឯកឧត្តមកិត្តិនីតិកោសលបណ្ឌិត ប៊ិន
ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី
នៅព្រឹកថ្ងៃទី១២ ខែសីហា ឆ្នាំ២០១៩នេះ នៅទីស្តីការគណៈរដ្ឋមន្ត្រី
បានអនុញ្ញាតឲ្យឯកឧត្តម Horinouchi Hidechisa ឯកអគ្គរដ្ឋទូតជប៉ុនប្រចាំកម្ពុជាទទួលជួបសម្តែងការគួរសមនិងជម្រាបលា
បន្ទាប់ពីបញ្ចប់បេសកកម្មការទូតរយៈពេល៣ឆ្នាំកន្លងមកនេះ។
ឯកឧត្តម Horinouchi Hidechisa
ឯកអគ្គរដ្ឋទូតជប៉ុនប្រចាំកម្ពុជា
បានជម្រាបជូនឯកឧត្តមកិត្តិនីតិកោសលបណ្ឌិតឧបនាយករដ្ឋមន្ត្រីប្រចាំការ
អំពីកិច្ចសហប្រតិបត្តិការដ៏រឹងមាំ
និងរីកចម្រើនរវាងព្រះរាជាណាចក្រកម្ពុជា និងរដ្ឋាភិបាលប្រទេសជប៉ុនក្នុងវិស័យសេដ្ឋកិច្ច
វិនិយោគ ការអភិវឌ្ឍនានា ក៏ដូចជាកិច្ចសហប្រតិបត្តិការរបស់ជប៉ុនដែលជាម្ចាស់ជំនួយធំជាងគេដល់អង្គជំនុំជម្រះវិសាមញ្ញ
នៃតុលាការកម្ពុជា ដែលមានទឹកប្រាក់ចំនួនប្រមាណ៨៧លានដុល្លារអាមេរិក
លើចំនួនសរុប៣០៣លានដុល្លារអាមេរិកដល់ អ.វ.ត.ក ដើម្បីយុត្តិធម៌
និងការកសាងសន្តិភាពនៅកម្ពុជា។
ឯកឧត្តមអគ្គរដ្ឋទូតបានថ្លែងថា ទំនាក់ទំនងល្អរវាងកម្ពុជា
និងជប៉ុន ក្នុងវិស័យសេដ្ឋកិច្ច វិនិយោគទុនសរុបបានកើនឡើងជាង៣ដង
កាលពីឆ្នាំ២០១៥
ចំណែកផ្នែកពាណិជ្ជកម្មវិញតម្លៃសរុបការនាំចូល
និងនាំចេញបានកើនឡើងជាង៣០ភាគរយ
ហើយចំនួននៃការធ្វើទិដ្ឋាការសម្រាប់ការធ្វើដំណើរទៅជប៉ុនកើនឡើងជាង២,៨៥ដង ចាប់តាំងពីការបើកជើងហោះហើរដោយផ្ទាល់ទៅមកពីកម្ពុជា‑ជប៉ុនកាលពីខែកញ្ញា ឆ្នាំ២០១៦។ ឯកឧត្តមបានវាយតម្លៃខ្ពស់ថា
តាមរយៈកិច្ចសហការក្នុងភាពជាដៃគូដ៏ល្អនេះ កំណើនសេដ្ឋកិច្ចរបស់កម្ពុជាមានការកើនឡើងខ្លាំង។ បន្ថែមពីលើនេះកាលពីខួប៦៥ឆ្នាំនៃទំនាក់ទំនងកម្ពុជា‑
ជប៉ុន រដ្ឋាភិបាលជប៉ុនក៏បានបើកស្ថានកុងស៊ុលរបស់ខ្លួនផងដែរនៅឯខេត្តសៀមរាប។
ជាការឆ្លើយតបឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានមានប្រសាសន៍ថា
ក្នុងរយៈពេលដែលឯកឧត្តមបំពេញបេសកកម្មការទូតនៅកម្ពុជា៣ឆ្នាំមកនេះ
គឺជាពេលវេលាមួយដែលហាក់ដូចជាលឿន
ប៉ុន្តែប្រទេសយើងទាំងពីរបានសហការគ្នាល្អបំផុត ទាំងវិស័យសេដ្ឋកិច្ច
និងទំនាក់ទំនងការទូត គឺមានភាពរឹងមាំល្អប្រសើរណាស់។ ឯកឧត្តមកិត្តិនីតិកោសលបណ្ឌិតឧបនាយករដ្ឋមន្ត្រីប្រចាំការ
បានមានប្រសាសន៍បន្ថែមថា កន្លងមកលោកផ្ទាល់បានសហការការងារគ្នាជាច្រើនជាមួយឯកអគ្គរដ្ឋទូតជប៉ុន
និងបានមើលឃើញថា ឯកអគ្គរដ្ឋទូតជប៉ុនប្រចាំកម្ពុជាមានការយល់ដឹងច្រើនទាំងចិត្តគំនិត
និងទស្សនៈ និងអំពីសភាពការណ៍ពិតរបស់កម្ពុជា ដែលបាននាំឱ្យឯកឧត្តមងាយស្រួលក្នុងការសម្របសម្រួល
និងបំពេញភារកិច្ចរបស់ខ្លួនប្រកបដោយជោគជ័យ។
ឯកឧត្តមកិត្តិនីតិកោសលបណ្ឌិតឧបនាយករដ្ឋមន្ត្រីប្រចាំការ
ក៏បានរំលឹកអំពីការជួយឧបត្ថម្ភគាំទ្ររបស់រដ្ឋាភិបាលជប៉ុនដល់ប្រជាជនកម្ពុជាជាច្រើនដើម្បីការពង្រឹងសេដ្ឋកិច្ច
វិនិយោគ និងការកសាងអភិវឌ្ឍប្រទេសកម្ពុជា
ក្នុងនោះជប៉ុនបានជួយគាំទ្រជាថវិកាធំជាងគេដល់កិច្ចដំណើរការនៃសាលាក្តីកាត់ទោសមេដឹកនាំជាន់ខ្ពស់ខ្មែរក្រហម
និងជាពិសេសដំណាក់កាលចុងក្រោយ នៅឆ្នាំ២០១៩នេះ
ជប៉ុនក៏បានសម្រេចផ្តល់ថវិកាចំនួនប្រមាណ២៥១.៩៧០ ដុល្លារអាមេរិក
ដើម្បីជួយទ្រទ្រង់គម្រោងរបស់ LDC (មជ្ឍមណ្ឌលតម្កល់ឯកសាររបស់សាលាក្តីខ្មែរក្រហម)
សម្រាប់រយៈពេល៣ឆ្នាំ ដែលកាយវិការដ៏ល្អនេះ កម្ពុជាសូមចងចាំទុកជានិច្ច៕
ជាមួយគ្នានេះ ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ ក៏បានសម្តែងនូវការកោតសរសើរ
និងសូមថ្លែងនូវអំណរអរគុណចំពោះរដ្ឋាភិបាលប្រទេសជប៉ុនដែលបានឧបត្ថម្ភគាំទ្រ
និងជួយកសាងអភិវឌ្ឍនៅកម្ពុជា ជាពិសេសការជួយទ្រទ្រង់ដល់សាលាក្តីខ្មែរក្រហម
និងបានជូនពរដល់ឯកឧត្តម Horinouchi Hidechisa ឯកអគ្គរដ្ឋជប៉ុនប្រចាំកម្ពុជាដែលបានបញ្ចប់អណត្តិការងាររបស់ខ្លួននៅកម្ពុជា
សូមទទួលបាននូវសេចក្តីសុខ ពុទ្ធពរទាំងបួនប្រការ
និងជោគជ័យលើការបំពេញភារកិច្ចថ្មីជាបន្តបន្ទាប់ទៀតនៅឯបណ្តាប្រទេសផ្សេងៗ៕
