ស្ថានទូតបារាំង និងសភាពាណិជ្ជកម្មបារាំង-កម្ពុជា នឹងរៀបចំ សន្និសីទសារព័ត៌មានស្តីពីសប្តាហ៍នៃរសជាតិបែបបារាំងនៅកម្ពុជា ក្នុងខែមីនានេះ

សេចក្តី​ជូន​ព័ត៌មាន​ របស់​ស្ថាន​ទូត​បារាំង​ប្រចាំ​នៅ​ព្រះ​រាជា​ណាចក្រ​កម្ពុជា​ ចុះថ្ងៃ​ទី ២​ ខែមីនា​ ឆ្នាំ២០១៥​ បានឲ្យ​ដឹងថា​ ស្ថាន​ទូត​បារាំង​ និង​សភា​ពាណិជ្ជ​កម្ម​បារាំង​-កម្ពុជា​ នឹង​រៀបចំ​ សន្និសីទ​សារព័ត៌​មាន​មួយ​ នៅព្រឹក​ ថ្ងៃទី​ ៤​ ខែមីនា​ ឆ្នាំ២០១៥​ នៅស្ថាន​ទូត​បារាំង​ ដើម្បី​បង្ហាញ​ពីព័ត៌មាន​លម្អិត​ជុំវិញ​ព្រឹត្តិ​ការណ៍ ​សប្តាហ៍​នៃ​រសជាតិ​បែប​បារាំង​នៅ​កម្ពុជា។

សេចក្តី​ជូន​ព័ត៌​មាន​ដដែល​ បានឲ្យ​ដឹងថា​ ចាប់ពី​ថ្ងៃទី​ ១៣​ ដល់ថ្ងៃ​ទី​ ២០​ ខែមីនា ​ឆ្នាំ២០១៥​   ស្ថាន​ទូត​បារាំង​ និង​សភា​ពាណិជ្ជ​កម្ម​បារាំង​-កម្ពុជា​ នឹងរៀប​ចំព្រឹត្តិ​ការណ៍​មួយ​ ក្រោមប្រធាន​បទ ​" សប្តាហ៍​នៃ​រស់ជាតិ​បែប​បារាំង​នៅ​កម្ពុជា"​ ដែល​នឹង​ផ្តល់​ជូន​សាធារណ​ជន​ខ្មែរ​ នឹង​បរទេស​នៅ​ភ្នំពេញ​នូវ​ឱកាស​តែមួយ​គត់​ ដើម្បី​ស្វែងយល់​អំពី​សិល្បៈ​នៃការ​រស់​នៅតាម​បែប​បារាំង​។ ​ក្នុង​ពឹ្រត្តិ​ការណ៍​នេះ​ នឹងមាន​ការរៀបចំ​កម្ម​វិធី​ភ្លក់​អាហារ​ ការ​តាំង​ពិព័រណ៍ ​ការបញ្ចាំង​ភាព​យន្ត​ និងជំនួប​អាជីព​នៅតាម​ទីកន្លែង​នានា ​ក្នុង​រាជធានី​ភ្នំពេញ៕

អត្ថបទ៖ ច័ន្ទ ទេវី

បន្ទាប់ពីផ្អាកការស្មុំកូនអន្តរប្រទេសចាប់តាំងពីឆ្នាំ២០១១មក កម្ពុជានឹងចាប់ផ្តើមដំណើរការស្មុំកូនអន្តរប្រទេសឡើងវិញនៅឆ្នាំ២០១៥នេះ

យោងតាម​សេចក្តី​ជូន​ដំណឹង​ របស់​ក្រសួង​សង្គម​កិច្ច​ អតីត​យុទ្ធជន​ និង​យុវនី​តិសម្បទា អំពី​ ស្ថានភាព​ស្មុំកូន​អន្តរ​ប្រទេស​នៅ​កម្ពុជា​ចុះ​ថ្ងៃទី២​ ខែមីនា​ ឆ្នាំ២០១៥​ បាន​ឲ្យដឹង​ថា​ កន្លង​មក​ដោយ​ស្ថិត​ក្នុង​ដំណាក់​កាល​ នៃការ​រៀបចំ​លិខិត​បទដ្ឋាន​គតិយុត្ត​ចាំបាច់​មួយ​ចំនួន​ កម្ពុជា​សម្រេច​ផ្អាកការ​ស្មុំកូន​អន្តរ​ប្រទេស​នៅ​ឆ្នាំ២០១១​ ហើយ​ទើបតែ​នៅ​ឆ្នាំ២០១៥​នេះ​ប៉ុណ្ណោះ ​ដែល​កម្ពុជា​បានចាប់​ផ្តើម​ដំណើរ​ការ​ស្មុំ​កូនអន្តរ​ប្រទេស​ឡើងវិញ។

នៅ​ក្នុងសេចក្តី​ជូន​ដំណឹង​ដដែល​បាន​បញ្ជាក់​ថា​ ច្បាប់​ស្តីពី​ការស្មុំ​កូន​អន្តរ​ប្រទេស​ នៃ​ព្រះរាជា​ណាចក្រ​កម្ពុជា​ ត្រូវបាន​ចូល​ជាធរ​មាន​នៅថ្ងៃ​ទី០៣​ ខែធ្នូ​ ឆ្នាំ២០០៩​ ដោយ​អនុលោម​តាមរដ្ឋ​ធម្មនុញ្ញ​នៃ​ព្រះរាជា​ណាចក្រ​កម្ពុជា ​ត្រង់មាត្រា​ទី៤៨​ និង​អនុលោម​តាម​អនុ​សញ្ញា​ក្រុងឡាអេ​ ស្តីពី​ការការ​ពារ​កុមារ​ និង​សហ​ប្រតិបត្តិ​ការ​ទាក់ទង​នឹង​ស្មុំ​កូន​អន្តរ​ប្រទេស​ ដែល​ត្រូវ​បាន​ផ្តល់​សច្ចាប័ន​នៅថ្ងៃទី​ ១ ​ខែសីហា ​ឆ្នាំ​២០០៧​ ព្រម​ទាំង​ពិធី​សារ​បន្ថែម​ចំនួនពីរ​ នៃ​អនុសញ្ញា​ស្តីពី​សិទ្ធិកុមារ​ ដែល​ត្រូវ​បាន​ផ្តល់​សច្ចាប័ន​នៅថ្ងៃទី​ ៣០​ ខែឧសភា​ ឆ្នាំ២០០២​។

ដោយ​ឡែក​លិខិត​បទដ្ឋាន​គតិយុត្ត​ដែលក្រសួង​បាន​នឹង​កំពុង​រៀបចំ​រួមមាន៖​ ១.នីតិវិធី​ស្តីពី​ស្មុំកូន​ក្នុង​ស្រុក​ ២.​ ស្តង់ដា​គ្រប់គ្រង​ករណី​ និង​បង្រួប​បង្រួម​គ្រួសារ​ ដើម្បី​ធ្វើ​សមាហរណ​កម្ម​កុមារ​ដែល​កំពុង​រស់នៅ​ក្នុង​មណ្ឌល​រដ្ឋ​ និង​មណ្ឌល​អង្គការ​មិនមែន​រដ្ឋាភិបាល៕

អត្ថបទ៖ ច័ន្ទ ទេវី

Add caption

ក្រសួងរៀបចំដែនដី លើកឡើងថា ទិន្នន័យករណីវិទាទដីធ្លីដែលផ្តល់ដោយអង្គការលីកាដូ នៅមិនទាន់មានភាពជាក់លាក់

យោង​តាម​លិខិត​ ដែល​ផ្ញើ​ទៅ​អង្គការ​សម្ព័ន្ធ​ខ្មែរ​ជំរឿន​ និង​ការពារ​សិទ្ធិ​មនុស្ស ​ហៅកាត់​ថា​ លីកាដូ​ របស់​ក្រសួង​រៀប​ចំ​ដែនដី​ នគ​រូបនី​យ​កម្ម​ និង​សំណង់​ កាល​ពីថ្ងៃទី​ ២ ​ខែមីនា​ ឆ្នាំ២០១៥​ បានឲ្យ​ដឹងថា ​លេខា​ធិការ​ដ្ឋាន​នៃ​គណៈ​កម្មការ​ សុរិយោ​ដី​ថ្នាក់​ជាតិ​ បាន​ទទួល​ហើយ​នូវ​លិខិត​របស់​ អង្គការ​លីកាដូ​ ដោយ​មាន​ភ្ជាប់​នូវតារាង​ ទិន្ន​ន័យ​ករណី​ ទំនាស់​ដីធ្លី​នៅ​កម្ពុជា​ ឆ្នាំ​២០១៤។

​

លិខិត​ដដែល​បាន​បញ្ជាក់​បន្ថែម​ទៀតថា​ លេខា​ធិការ​ដ្ឋាន​ ពិនិត្យ​ឃើញ​ថា​ ទិន្នន័យ​ដែល​ អង្គការ​លីកាដូ​ បាន​ផ្តល់​ជូន​ គឺមិនទាន់​បាន​បង្ហាញ​ឲ្យបាន​ច្បាស់​លាស់​ អំពី​អត្ត​សញ្ញាណ​គូភាគី​ទំនាស់​ ដូចជា​ ឈ្មោះ,​ ភេទ​, អាយុ​ និង​ទីលំ​នៅ​បច្ចុប្បន្ន ​ក៏ដូចជា​កម្មវត្ថុ​ នៃ​បណ្តឹង​ទាមទារ​ និង​អង្គភាព​ ដែល​បណ្តឹង​ទាំង​នោះ​បានដាក់​ ដើម្បី​ស្នើសុំ​ដោះស្រាយ​ ដូចអ្វី​ដែល​ក្រសួង​បាន​ស្នើ​ទៅ​អង្គការ​លីកាដូ​នៅឡើយ​ទេ។

អត្ថបទ៖ ច័ន្ទ ទេវី

សេដ្ឋកិច្ចប្រទេសក្នុងតំបន់អាស៊ាន នឹងរក្សាសន្ទុះកើនឡើងក្នុងឆ្នាំ២០១៥នេះ

នៅក្នុង​សេចក្តី​ថ្លែងការណ៍​សារព័ត៌​មាន​រួម​ បន្ទាប់​ពី​បញ្ចប់​កិច្ច​ប្រជុំ​ចង្អៀត​រដ្ឋមន្ត្រី​សេដ្ឋ​កិច្ច​អាស៊ាន​លើក​ទី២១​ បាន​បញ្ជាក់​ថា​ រដ្ឋមន្ត្រី​សេដ្ឋកិច្ច​អាស៊ាន​ មានភាព​ជឿជាក់​ថា​ បណ្តាសេដ្ឋកិច្ច​របស់​ប្រទេស​នៅក្នុង​តំបន់​នឹងរក្សា​នូវសន្ទុះ​កើនឡើង​នៅ​ឆ្នាំ២០១៥​នេះ​ បើទោះបី​ប្រឈម​ទៅនឹង​សេដ្ឋកិច្ច​ និង​ភូគព្ភ​នយោបាយ​ពិភព​លោក​ក៏ដោយ​។

ជាទស្សន​វិស័យ​សេដ្ឋកិច្ច​អាស៊ាន​ បាន​រំពឹង​ថា ​សេដ្ឋកិច្ច​អាស៊ាន​ នឹង​កើន​ឡើង​នៅឆ្នាំ២០១៥​ ដល់​ ៥,១%​ លើស​ពីការព្យា​ករណ៍​កំណើន​សេដ្ឋកិច្ច​ពិភព​លោក ​៣,៥%​។ ការ​រំពឹង​ទុកនេះ ​គឺយោង​លើ​តម្រូវ​ការកាន់​តែខ្លាំង​នៅ​ក្នុង​ប្រទេស​ដែល​មាន​សេដ្ឋកិច្ច​ជឿន​លឿន​ ដែល​រុញច្រាន​ដោយការ​ងើប​ឡើង​វិញ​នៃសេដ្ឋ​កិច្ច​អាមេរិក​ យ៉ាងមាំ​មួន​ និង​ការដាក់​ចេញ​នូវ​វិធានការ​ជំនួយ​គោល​នយោបាយ​ជា​ច្រើន​ នៅក្នុង​តំបន់​ប្រើប្រាស់​ប្រាក់​អឺរ៉ូ​ និង​ប្រទេស​ជប៉ុន​។​​ ជាមួយ​គ្នានេះ ​តម្រូវការ​ក្នុង​ស្រុក​របស់​តំបន់ ​នឹង​ទទួល​នូវការ​ជំរុញ​មួយ​បន្ថែម​ទៀត​ពីការធ្លាក់​ចុះ​នូវ​តំលៃ​ប្រេង​ឥន្ធនៈ​ ជាមួយ​និងកម្លាំង​ទិញ​របស់​អតិថិជន​កាន់​តែខ្លាំង​ ការ​ចំណាយ​លើ​ធាតុ​ផ្សំ​របស់​អ្នក​ផលិត​កាន់​តែទាប​ និង​គម្លាត​សារពើពន្ធ​កាន់​តែធំ។

គួរ​បញ្ជាក់​ថា ​កិច្ច​ប្រជុំ​ចង្អៀត​រដ្ឋ​មន្ត្រី​សេដ្ឋកិច្ច​អាស៊ាន​លើក​ទី២១នេះ ​បាន​ប្រារព្ធ​ធ្វើឡើង​នៅ​ប្រទេស​ម៉ាឡេស៊ី ​ពីថ្ងៃ​ទី២៨ ​ខែកុម្ភៈ​ ដល់​ថ្ងៃទី១ ​ខែមីនា​ ឆ្នាំ២០១៥ ​ដោយដឹក​នាំ​ដោយឯកឧត្តម​ Dato ​Sri​ Mustapa​ Mohamed ​រដ្ឋមន្ត្រី​ពាណិជ្ជកម្ម​ និង​ឧស្សា​ហកម្ម​អន្តរ​ជាតិរបស់​ប្រទេស​ម៉ាឡេស៊ី​​ ដែលជា​ប្រធាន​រដ្ឋមន្ត្រី​សេដ្ឋកិច្ច​អាស៊ាន​ឆ្នាំ២០១៥។

អត្ថបទ៖ ច័ន្ទ ទេវី