ព្រះមហាក្សត្រ យល់ស្របតាមគំនិតផ្តួចផ្តើមរបស់សម្តេចតេជោ ហ៊ុន សែន ធ្វើវិសោធនកម្មច្បាប់ធម្មនុញ្ញកំណត់ «សញ្ជាតិខ្មែរតែមួយគត់»

(ភ្នំពេញ)៖ ព្រះករុណា ព្រះបាទ​សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា យល់ស្របតាមគំនិតផ្តួចផ្តើមរបស់សម្តេចតេជោ ហ៊ុន សែន ធ្វើវិសោធនកម្មច្បាប់ធម្មនុញ្ញកំណត់ «សញ្ជាតិខ្មែរតែមួយគត់»។

ក្នុងព្រះរាជសារបស់ព្រះករុណា ព្រះមហាក្សត្រ ជូនសម្តេចតេជោ ហ៊ុន សែន ដែលទទួលបាននៅយប់ថ្ងៃទី១១ ខែតុលា ឆ្នាំ២០២១ មានខ្លឹមសារថា៖ សម្តេចអគ្គមហាសេនាបតីតេជោ ជាទីរាប់អានដ៏ខ្ពង់ខ្ពស់ និងស្រឡាញ់ដ៏ជ្រាលជ្រៅបំផុត ខ្ញុំបានទទួលនូវលិខិតលេខ ០៦៣/០១/២០២១ ចុះថ្ងៃទី១១ ខែតុលា ឆ្នាំ២០២១ របស់ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញស្តីពីមតិរបស់ក្រុមប្រឹក្សាធម្មនុញ្ញ អំពីការផ្តួចផ្តើមគំនិតធ្វើវិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី(មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញនៃព្រះរាជាណា​ចក្រ​កម្ពុជា និងមាត្រា៣ និងមាត្រា៤ នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ ដើម្បីកំណត់ឱ្យប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ត្រូវតែជា ឥស្សរជនដែលមាន «សញ្ជាតិខ្មែរតែមួយគត់»។

បើតាមព្រះរាជសារ ព្រះមហាក្សត្រ បានសូមប្រគល់ជូនសម្តេចតេជោ នូវលិខិតរបស់ ឯកឧត្តមកិត្តិនីតិ កោសលបណ្ឌិត ប្រធានក្រុមប្រឹក្សាធម្មនុញ្ញ ខាងលើនេះ ដើម្បីចាត់ការតាមនីតិវិធី៕

វិភាគអន្តរជាតិ៖ ហេតុអ្វីកូរ៉េខាងត្បូងបោះដៃរកឥណ្ឌា និងអាស៊ាន?

(វ៉ាស៊ីនតោន)៖ ស្ទើរតែពេញមួយប្រវត្តិសាស្ត្ររបស់ខ្លួន, កូរ៉េខាងត្បូង គឺជាប្រទេសមួយដែលរក្សាទំនាក់ទំនងការទូតដោយផ្ដោតសំខាន់តែទៅលើពួកមហាអំណាចនៅជុំវិញ តំបន់ ឧបទ្វីបកូរ៉េ តែប៉ុណ្ណោះ។ ចិន, ជប៉ុន, រុស្ស៊ី និងសហរដ្ឋអាមេរិកមានឥទ្ធិពលលើសលប់លើកូរ៉េខាងត្បូង ទាំងនយោបាយការបរទេស, យុទ្ធសាស្ត្រ សេដ្ឋកិច្ច និងសនិ្តសុខ តួយ៉ាងដូចជាការស្វែងរកសន្តិភាពជាមួយកូរ៉េខាងជើងជាដើម។

តែនៅក្នុងរយៈពេលប៉ុន្មានឆ្នាំចុងក្រោយនេះ ខណៈការប្រឈមមុខដាក់គ្នារវាងសហរដ្ឋអាមេរិក និងចិនកាន់តែខ្លាំងឡើង កូរ៉េខាងត្បូងក៏កាន់តែមានការព្រួយបារម្ភខ្លាំងដូចគ្នា ដែរ ដ្បិតបារម្ភខ្លាចផុងខ្លួនគាបនៅចំកណ្ដាលនៃការប្រកួតប្រជែងរវាងមហាអំណាចទាំង២។ ការបារម្ភបែបនេះបានក្លាយជាការពិត ដោយកាលពី២០១៧កន្លងទៅ ចិន បានដាក់ទណ្ឌកម្មសេដ្ឋកិច្ចជាការសងសឹកទៅនឹងកូរ៉េខាងត្បូង ដែលសម្រេចចិត្តអនុញ្ញាតឱ្យសហរដ្ឋអាមេរិកដាក់ពង្រាយប្រព័ន្ធមីស៊ីល THAAD នៅលើទឹកដីរបស់ខ្លួន។

ទណ្ឌកម្មនេះឯងបានធ្វើឱ្យកូរ៉េខាងត្បូងភ្ញាក់ដឹងខ្លួនថាទីក្រុងប៉េកាំងចង់ប្រើប្រាស់សេដ្ឋកិច្ចជាអាវុធ ដើម្បីមានឥទ្ធិពលកែប្រែយុទ្ធសាស្ត្រ ឬការសម្រេចចិត្តរបស់ខ្លួន ហើយបាន ចាប់ផ្ដើមសម្លឹងមើលការធ្វើពិពិធកម្មសេដ្ឋកិច្ច និងភាពជាដៃគូយុទ្ធសាស្ត្រនៅក្នុងតំបន់ តាមរយៈការងាកទៅពង្រឹងទំនាក់ទំនងជាមួយឥណ្ឌា និងបណ្ដាប្រទេសជាសមាជិក អាស៊ាន នៅក្រោមយុទ្ធសាស្ត្រថ្មីមួយដែលគេស្គាល់ថា «New Southern Policy» (NSP)។ NSP មានគោលដៅលើកកម្ពស់ទំនាក់ទំនងរវាងកូរ៉េខាងត្បូងជាមួយឥណ្ឌា និងអាស៊ាន ឱ្យដល់កម្រិតនៃទំនាក់ទំនងរវាងទីក្រុងសេអ៊ូលជាមួយចិន, ជប៉ុន, រុស្ស៊ី និងសហរដ្ឋអាមេរិកដូច្នោះដែរ។ ដើម្បីអាចធ្វើបែបនេះទៅកើត NSP បានផ្ដោតសំខាន់ទៅ លើកិច្ចសហប្រតិបត្តិការស៊ីជម្រៅរបស់កូរ៉េខាងត្បូងទាំងខាងសេដ្ឋកិច្ច, នយោបាយ, យុទ្ធសាស្ត្រ និងសង្គមវប្បធម៌ជាមួយឥណ្ឌា និងអាស៊ាន។

*អ្វីទៅជាយុទ្ធសាស្ត្រ «New Southern Policy» (NSP)?

«New Southern Policy» ឬ NSP គឺជានយោបាយការបទេសដ៏ធំបំផុតជាលើកដំបូងរបស់កូរ៉េខាងត្បូងដែលមានគោលដៅពង្រឹងទំនាក់ទំនងជាមួយឥណ្ឌា និងអាស៊ាន។ NSP មានគោលការណ៍គ្រឹះចំនួន៣ ក្នុងនោះរួមមាន៖ សន្តិភាព (មានន័យថាកិច្ចសហប្រតិបត្តិការនយោបាយ និងយុទ្ធសាស្ត្រ), វិបុលភាព (មានន័យថាកិច្ចសហប្រតិបត្តិការ សេដ្ឋកិច្ច ហើយប្រជាជន (មានន័យថាកិច្ចសហប្រតិបត្តិការសង្គមវប្បធម៌)។ គម្រោងធំៗចំនួន ៩៤ បានដំណើរការនៅក្រោម NSP ចាប់តាំងពីយុទ្ធសាស្ត្រថ្មីនេះត្រូវបានដាក់ឱ្យអនុវត្តកាលពីឆ្នាំ២០១៧ មក។

នៅឆ្នាំ២០២០, NSP ត្រូវបានប្ដូរឈ្មោះទៅជា «New Southern Policy Plus» ដែលបានដាក់បញ្ចូលគោលនយោបាយ និងតំបន់យុទ្ធសាស្ត្រថ្មីៗបន្ថែមឆ្លើយតបទៅនឹងការឆ្លង រាតត្បាត COVID-19។ តាមរយៈគោលនយោបាយយុទ្ធសាស្ត្រថ្មីនេះ, វាបានចូលរួមចំណែកក្នុងការចែករំលែកការអភិវឌ្ឍមួយចំនួនគួរឱ្យកត់សម្គាល់នៅក្រោមវិធីសាស្ត្ររបស់ កូរ៉េខាងត្បូងចំពោះតំបន់អាស៊ី។ ជាឧទាហរណ៍, ក្រសួងការបរទេសកូរ៉េខាងត្បូងបានបង្កើត «ការិយាល័យមួយទទួលបន្ទុកកិច្ចការអាស៊ាន និងតំបន់អាស៊ីអាគ្នេយ៍» ហើយបាន លើកឋានៈការិយាល័យនេះស្មើនឹងការិយាល័យទទួលបន្ទុកកិច្ចការចិន និងជប៉ុន។ មិនតែប៉ុណ្ណោះ កូរ៉េខាងត្បូងក៏បានពង្រីកការធ្វើពាណិជ្ជកម្មនៅក្នុងតំបន់ផងដែរ។ ជាក់សែ្ដង រដ្ឋាភិបាល កូរ៉េខាងត្បូងបានចុះកិច្ចព្រមព្រៀងពាណិជ្ជកម្មសេរីជាមួយឥណ្ឌូណេស៊ី ហើយចុះកិច្ចព្រមព្រៀងពាណិជ្ជកម្មថ្មីៗជាមួយកម្ពុជា, ម៉ាឡេស៊ី និងហ្វីលីពីន ព្រមទាំងបាន ផ្ដួចផ្ដើមកិច្ចពិភាក្សាស្ដីពីការធ្វើបច្ចុប្បន្នភាពកិច្ចព្រមព្រៀងពាណិជកម្មជាមួយអាស៊ាន និងឥណ្ឌា ក៏ដូចជាប្ដេជ្ញាចិត្តបង្កើនការបោះទុនវិនិយោគទ្វេដងលើគម្រោងជាច្រើននៅ កម្ពុជា, ឥណ្ឌូណេស៊ី, ឡាវ, មីយ៉ាន់ម៉ា, ហ្វីលីពីន និងវៀតណាម នៅត្រឹមឆ្នាំ២០២៣។

*ហេតុអ្វីកូរ៉េខាងត្បូង ជ្រើសរើសយកអាស៊ាន និងឥណ្ឌា?

កូរ៉េខាងត្បូងបានបោះដៃទៅអាស៊ាន និងឥណ្ឌាក្រោមហេតុផលមួយចំនួន។ ដំបូងដៃ នោះគឺកូរ៉េខាងត្បូងមានទំនាក់ទំនងរឹងមាំជាមួយបណ្ដាប្រទេសទាំងនេះរួចស្រេចទៅហើយ ជាពិសេសទំនាក់ទំនងខាងសេដ្ឋកិច្ចតែម្ដង។ អាស៊ានរួមបញ្ចូលគ្នា គឺជាដៃគូពាណិជ្ជកម្មធំបំផុតលំដាប់ទី២របស់កូរ៉េខាងត្បូងចាប់តាំងពីឆ្នាំ២០១៧មក ហើយគ្រាន់តែវៀតណាម តែមួយគត់ រ៉ាប់រងការនាំចេញរបស់កូរ៉េខាងត្បូងដល់ទៅ ៩ភាគរយឯណោះ ខណៈឥណ្ឌាវិញជាទីផ្សារនាំចេញធំបំផុតលំដាប់ទី៧ របស់កូរ៉េខាងត្បូង។ មួយវិញទៀត រឿងដែល សំខាន់បំផុត នោះគឺទាំងកូរ៉េខាងត្បូង, ឥណ្ឌា និងអាស៊ានសុទ្ធតែមានការបារម្ភចំពោះការកើនឡើងឥទ្ធិពលចិននៅក្នុងតំបន់ តែប្រឹងរក្សាជំហរមិនប្រឈមមុខត្រង់ៗជាមួយចិន ដូចគ្នា ដើម្បីប្រយោជន៍សេដ្ឋកិច្ចជាមួយទីក្រុងប៉េកាំង។

កូរ៉េខាងត្បូងបានប្រើប្រាស់យុទ្ធសាស្ត្រ NSP ដោយផ្ដោតជាសំខាន់លើការលើកកម្ពស់សន្តិសុខសេដ្ឋកិច្ច តាមរយៈការធ្វើពិពិធកម្មភាពជាដៃគូសេដ្ឋកិច្ចរបស់កូរ៉េខាងត្បូង និងពង្រឹងកិច្ចសហប្រតិបត្តិការមិនមែនជាលក្ខណៈប្រពៃណី ដោយផ្ដោតលើបញ្ហាសន្តិសុខប្រជាជន ដូចជាសន្តិសុខបរិស្ថាន និងសុខភាពសាធារណៈជាជាងផ្ដោតទៅលើបញ្ហា សន្តិសុខរសើបៗនៅក្នុងតំបន់។

*តើយុទ្ធសាស្ត្រ NSP មានឥទ្ធិពលលើផលប្រយោជន៍អាមេរិកដូចម្ដេច?

យុទ្ធសាស្ត្រ NSP ត្រូវបានគេចាត់ទុកថាជាការបំពេញបន្ថែមមួយដល់ប្រយោជន៍របស់សហរដ្ឋអាមេរិកនៅក្នុងតំបន់ឥណ្ឌូ-ប៉ាស៊ីហ្វិក។ នៅឯកិច្ចប្រជុំកំពូលរវាងប្រធានាធិបតី អាមេរិក លោក ចូ បៃដិន និងប្រធានាធិបតីកូរ៉េខាងត្បូង លោក មូន ចែអ៉ីន ក្នុងទីក្រុងវ៉ាស៊ីនតោន កាលពីខែឧសភា ឆ្នាំ២០២១នេះ, មេដឹកនាំទាំង២បានសង្កត់ធ្ងន់ថា
សារៈសំខាន់នៃទំនាក់ទំនងរវាងអាមេរិក និងកូរ៉េខាងត្បូងគឺមានវិសាលភាពលើសពីតំបន់ឧបទ្វីបកូរ៉េ ហើយបានឯកភាពគ្នាថានឹងធ្វើការឱ្យស្របទៅតាមយុទ្ធសាស្ត្រ NSP និងចក្ខុវិស័យរបស់សហរដ្ឋអាមេរិកសម្រាប់សេរីភាព និងការបើកចំហតំបន់ឥណ្ឌូ-ប៉ាស៊ីហ្វិក។

នៅក្នុងសេចក្ដីថ្លែងការណ៍រួម លោក បៃដិន និងលោក មូន ក៏បានបញ្ជាក់ផងដែរពីគោលដៅរួមក្នុងការពង្រីកកិច្ចសម្របសម្រួលថ្នាក់តំបន់ស្ដីពីការអនុវត្តចច្បាប់, សន្តិសុខ ព័ត៌មានវិទ្យា, សុខភាពសាធារណៈ និងលើកកម្ពស់សេដ្ឋកិច្ចនៅក្រោយការឆ្លងរាតត្បាត COVID-19 ខណៈស្វះស្វែងពង្រឹងការផ្សាភ្ជាប់ និងគំនិតច្នៃប្រឌិតនៅក្នុងបណ្ដាប្រទេស ជាសមាជិកអាស៊ាន ហើយនឹងធ្វើកិច្ចសហប្រតិបត្តិការលើការអភិវឌ្ឍនៅក្នុងតំបន់អនុទន្លេមេគង្គជាដើម។ សេចក្ដីថ្លែងការណ៍រួមដដែលហាក់ដូចជាបង្ហាញថារដ្ឋបាលលោក មូន ចែអ៉ីន គាំទ្រយ៉ាងពេញទំហឹងដល់យុទ្ធសាស្ត្រឥណ្ឌូ-ប៉ាស៊ីហ្វិករបស់សហរដ្ឋអាមេរិក។ ប៉ុន្តែ ធាតុពិត រដ្ឋាភិបាលលោក មូន នៅតែស្ទាក់ស្ទើរដដែលក្នុងការទទួលស្គាល់ ឬគាំទ្រ ជាផ្លូវការចំពោះសេរីភាព និងការបើកចំហតំបន់ឥណ្ឌូ-ប៉ាស៊ីហ្វិក ដ្បិតបារម្ភខ្លាចចិនខឹងសម្បារ។

ពិតមែនទៅ ទោះជាកូរ៉េខាងត្បូងជាសម្ព័ន្ធមិត្តរបស់អាមេរិក និងមានកង្វល់រួមចំពោះបញ្ហាសន្តិសុខនៅក្នុងតំបន់ក៏ពិតមែន, តែកូរ៉េខាងត្បូងមិនហ៊ានធ្វើឱ្យចិនអន់ចិត្ត ឬខឹងសម្បារខ្លាំងជ្រុលនោះទេ ពីព្រោះចិនគឺជាតួអង្គដ៏សំខាន់ដែលអាចជួយគ្រប់គ្រងទំនាក់ទំនងជាមួយកូរ៉េខាងជើង ហើយផ្អែកលើកត្តាទីតាំងភូមិសាស្ត្រនៅក្បែរចិន និងសេដ្ឋកិច្ច កូរ៉េខាងត្បូងដឹងច្បាស់ថាមិនអាចប្រឆាំងនឹងចិនត្រង់ៗនោះទេ។

*កា្វដ (Quad) និងការទូតក្នុងតំបន់របស់កូរ៉េខាងត្បូង

យុទ្ធសាស្ត្ររបស់កូរ៉េខាងត្បូង ចំពោះកិច្ចសន្ទនាសន្តិសុខចតុភាគី ឬហៅថាកា្វដ (Quad) នាពេលបច្ចុប្បន្ន គឺមានលក្ខណៈស្រដៀងគ្នាទៅនឹងយុទ្ធសាស្ត្រចំពោះយុទ្ធសាស្ត្រ ឥណ្ឌូ-ប៉ាស៊ីហ្វិករបស់អាមេរិកដូច្នោះដែរ។ ពោលគឺធ្វើយ៉ាងណាកុំឱ្យផុងខ្លួនគាបនៅចំកណ្ដាល នៃការប្រជែងឥទ្ធិពលរវាងសហរដ្ឋអាមេរិក និងចិន។ កា្វដមានប្រទេស ៤ ជាសមាជិក ដូចជាអូស្ត្រាលី, ឥណ្ឌា, ជប៉ុន និងសហរដ្ឋអាមេរិក ហើយទោះជាមិនសូវលើកឈ្មោះចិនចំៗនៅក្នុងអង្គប្រជុំ តែសម្ព័ន្ធភាពនេះត្រូវបានគេមើលឃើញថាបង្កើតឡើង ក្នុងគោលដៅខ្ទប់ការកើនឡើងឥទ្ធិពលចិននៅក្នុងតំបន់។

ដោយសារខ្លាចចិនសងសឹកតាមរយៈការដាក់ទណ្ឌកម្មសេដ្ឋកិច្ច, កូរ៉េខាងត្បូងនៅតែមានភាពស្ទាក់ស្ទើរចូលរួមជាមួយក្វាដឱ្យពេញដៃពេញជើង។ ក៏ប៉ុន្តែ ខណៈក្វាដបានបន្ត វិវត្តខ្លួនទៅមុខ និងកំណត់យ៉ាងច្បាស់ពីអាទិភាពរបស់ខ្លួន, កូរ៉េខាងត្បូងត្រូវបានគេមើលឃើញថាបង្ហាញពីចេតនាចង់សហការជាមួយក្វាដ នៅក្នុងករណីដែលតម្រូវឱ្យខ្លួន ធ្វើដូច្នេះ។

កូរ៉េខាងត្បូងមិនមែនជាសមាជិកកា្វដទេ តែត្រូវបានអញ្ជីញឱ្យចូលរួមក្នុងកិច្ចប្រជុំក្វាផ្លឹស (Quad Plus) កាលពីខែមីនា ឆ្នាំ២០២០ ជាពេលដែលកិច្ចប្រជុំផ្ដោតសំខាន់លើ
ការឆ្លើយតបទៅនឹង COVID-19។ ជាការទាក់ទាញចិត្តកូរ៉េខាងត្បូង, ក្រុមប្រទេសក្វាដនៅតែបន្តមិននិយាយចំឈ្មោះរបស់ចិន ហើយផ្ដោតតែទៅលើការគ្រប់គ្រង COVID-19, ការអភិវឌ្ឍហេដ្ឋារចនាសម្ព័ន្ធ, ការប្រែប្រួលអាកាសធាតុ, ការផ្លាស់ប្ដូរបទពិសោធន៍រវាងប្រជាជន និងប្រជាជន និងបច្ចេកវិទ្យាដែលមើលដើរស្របទៅតាមអាទិភាពនៃ យុទ្ធសាស្ត្រ NSP។ ដូច្នេះ ដរាបណា ក្វាដនៅតែបន្តបញ្ចៀសការប្រើវោហារប្រឆាំងចិនត្រង់ៗ, កូរ៉េខាងត្បូងនឹងបន្តធ្វើកិច្ចសហប្រតិបត្តិការលើការចែករំលែកអាទិភាព ឬ
ប្រយោជន៍រួម ទោះជាកូរ៉េខាងត្បូងចង់ដោះស្រាយបញ្ហាទាំងឡាយតាមរយៈទំនាក់ទំនងទ្វេភាគីជាមួយសហរដ្ឋអាមេរិក ជាជាងចូលរួមក្នុងកា្វដក៏ដោយ ហើយឱកាសចូលរួម ក៏នៅតែមានដែរ៕

ប្រភព៖ Carnegie Endowment (ថ្ងៃចន្ទ ទី១១ ខែតុលា ឆ្នាំ២០២១)

ដោយៈ Fresh News

សារព័ត៌មាន The Guardian ផ្ញើលិខិតមកក្រសួងការបរទេសកម្ពុជា សោកស្តាយចំពោះកំហុសរបស់ខ្លួនដែលផ្សាយខុសការពិតថា សម្តេចតេជោ ហ៊ុន សែន ទិញសញ្ជាតិពីប្រទេសស៉ីព្រ ហើយបានកែតម្រូវឡើងវិញ

(ភ្នំពេញ)៖ សារព័ត៌មាន The Guardian បានផ្ញើលិខិតមកលោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា ដោយសម្តែងសោកស្តាយចំពោះកំហុសរបស់ខ្លួន និងបង្កឱ្យមានការបារម្ភដល់សម្តេចនាយករដ្ឋមន្រ្តី ហ៊ុន សែន ដែលផ្សាយខុសការពិតថា សម្តេចតេជោ ទិញសញ្ជាតិពីប្រទេសស៉ីព្រ ហើយបានបញ្ជាក់អំពីការកែតម្រូវអត្ថបទរបស់ខ្លួនឡើងវិញផងដែរ។ 

ខាងក្រោមនេះជាសារលិខិតទាំងស្រុងរបស់សារព័ត៌មាន the Guardian៖

ជូនចំពោះ ឯកឧត្តម រដ្ឋលេខាធិការ

ខ្ញុំសរសេរសារអេឡិចត្រូនិក (email) នេះ ក្នុងការឆ្លើយតបទៅនឹងលិខិតរបស់ ឯកឧត្តម ចុះថ្ងៃទី០៦ ខែតុលា ឆ្នាំ២០២១ (បានទទួលនៅវេលាម៉ោង ១៣.១៩ GMT នៅថ្ងៃនេះ) ដែលបានអានរួចហើយដោយលោកស្រី និពន្ធនាយក ខេតធឺរីន វីននឺរ (Katherine Viner) និងបានបញ្ជូនមកខ្ញុំ ដែលមានតួនាទីជាអ្នកទទួលខុសត្រូវកម្មវិធីមិត្តអ្នកអាន (ត្រួតពិនិត្យផ្ទៃក្នុង-internal Ombudsman)។

ខ្ញុំអាចធានាចំពោះ ឯកឧត្តម បានថា កំហុសឆ្គងត្រូវបានរកឃើញនិងជម្រាបមកខ្ញុំ ដោយបុគ្គលិក ដែលជាអ្នកសរសេរអត្ថបទផ្ទាល់របស់សារព័ត៌មានដឺហ្គាឌីយែន (the Guardian)កាលពីម្សិលម៉ិញ ហើយអត្ថបទនោះត្រូវបានកែសម្រួល និងបានបញ្ជាក់ការកត់ចំណាំនៅចុងអត្ថបទរួច (footnoted)។ ឯកឧត្តម អាចឃើញអត្ថបទដែលបានកែសម្រួលថ្មី ដែលមានការពាក់ព័ន្ធដល់លោកនាយករដ្ឋមន្រ្តី ហ៊ុន សែន ដូចមានក្នុងតំណភ្ជាប់នៅទីនេះ។

អត្ថបទ នឹងត្រូវបានគ្រោងដាក់បញ្ចូលបន្ថែមទៅក្នុងបញ្ជីផ្នែកការកែតម្រូវ និងការបកស្រាយបញ្ជាក់ (Correction and Clarification Column) តាមប្រព័ន្ធអនឡាញ នាពេលក្រោយ នៅក្នុងថ្ងៃនេះ (ម៉ោងផ្សព្វផ្សាយ ២០:០០ GMT)។

ស្មេរអត្ថបទមានការសោកស្តាយដោយបង្កឱ្យមានការបារម្ភដល់ លោកនាយករដ្ឋមន្រ្តី ហ៊ុន សែន ប៉ុន្តែមានសង្ឃឹមថា ចំណាត់ការឆ្លើយតបយ៉ាងឆាប់រហ័សក្នុងការកែតម្រូវកំហុសឆ្គងនេះ នឹងផ្តល់នូវដំណោះស្រាយគួរជាទីពេញចិត្ត។

សូម ឯកឧត្តម ទទួលនូវការរាប់អានដ៏ស្មោះស័គ្រ្មពីខ្ញុំ។

អេលីសាបែត រីបប៊ែន (Elisabeth Ribbans)

កម្មវិធីមិត្តអ្នកអាន

កិច្ចប្រជុំពិភាក្សានៃការដោះស្រាយបញ្ហាដីធ្លី ជូនប្រជាពលរដ្ឋរងផលប៉ះពាល់ដោយសារគម្រោងវិនិយោគអភិវឌ្ឍន៍របស់ក្រុមហ៊ុនយូញៀន

កោះកុង÷ លោក សុខ សុទ្ធី អភិបាលរងខេត្តកោះកុង តំណាងលោកស្រី មិថុនា ភូថង អភិបាលនៃគណៈអភិបាលខេត្តកោះកុង បានចូលរួមប្រជុំពិភាក្សាអំពីវឌ្ឍនភាពនៃការដោះស្រាយបញ្ហាដីធ្លី ជូនប្រជាពលរដ្ឋរងផលប៉ះពាល់ដោយសារគម្រោងវិនិយោគអភិវឌ្ឍន៍របស់ក្រុមហ៊ុនយូញៀន ដែលកិច្ចប្រជុំនេះប្រព្រឹត្តទៅក្រោមអធិបតីភាពលោក ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការ នៃអគ្គលេខាធិការដ្ឋានអាជ្ញាធរជាតិដោះស្រាយទំនាស់ដីធ្លី។

ប្រជាពលរដ្ឋដែលរាជរដ្ឋាភិបាលធ្វើការដោះស្រាយគោលនយោបាយជូនមាន ៣ប្រភេទគឺ៖

១. ប្រជាពលរដ្ឋ រស់នៅក្នុងទីតាំងវិនិយោគក្រុមហ៊ុនយូញៀន មានចំនួន ២៤៧គ្រួសារ ដែលរាជរដ្ឋាភិបាលដោះស្រាយគោលនយោបាយជូន ដីផ្ទះទំហំ ០,៥ហិកតា  ដីចម្ការទំហំ ៣ហិកតា និងថវិកា ៩០០០$ (ប្រាំបួនពាន់ដុល្លារអាមេរិក) ក្នុងមួយគ្រួសារ

២. ប្រជាពលរដ្ឋដែលខុសភូមិ ខុសឃុំ មានចំនួន ២៥៥គ្រួសារ រាជរដ្ឋាភិបាលដោះស្រាយគោលនយោបាយជូនដីចម្ការទំហំ ២ហិកតា ក្នុងមួយគ្រួសារ

៣. ប្រជាពលរដ្ឋស្នើសុំគោលបន្ថែម មានចំនួន ៨៣១គ្រួសារ រាជរដ្ឋាភិបាលដោះស្រាយគោលនយោបាយជូន ដីចម្ការទំហំ ១ហិកតាក្នុងមួយគ្រួសារ។ ចំពោះប្រជាពលរដ្ឋស្នើសុំដីសម្បទានសង្គមកិច្ច រាជរដ្ឋាភិបាល នឹងធ្វើការដោះស្រាយតាមក្រោយ។

សូមបញ្ជាក់ថា កាលពីថ្ងៃទី១ តុលា ឆ្នាំ២០២១ អាជ្ញាធរជាតិដោះស្រាយទំនាស់ដីធ្លី និងរដ្ឋបាលខេត្ត បានរៀបចំពិធីឱ្យប្រជាពលរដ្ឋប្រភេទ២ (ប្រជាពលរដ្ឋខុសភូមិ ខុសឃុំ) ចាប់ឆ្នោតយកដីឡូត៍ ហើយប្រជាពលរដ្ឋជំនួយ ១៧៧គ្រួសារ ក្នុងចំណោម ២៥៥គ្រួសារក៏បានមកចាប់ឆ្នោតយកដីឡូត៍រួចហើយ។ 

ជាមួយគ្នានេះ អាជ្ញាធរជាតិដោះស្រាយទំនាស់ដីធ្លី និងរដ្ឋបាលខេត្ត នឹងរៀបចំពិធីឱ្យប្រជាពលរដ្ឋប្រភេទទី៣ (អ្នកស្នើសុំគោលនយោបាយបន្ថែម) ចាប់ឆ្នោតយកដីឡូត៍ នៅថ្ងៃទី១៤-១៥ ខែតុលា ឆ្នាំ២០២១ នេះបន្តទៀត៕

សេចក្តីជូនដំណឹងរបស់រដ្ឋបាលខេត្តកំពតស្តីពីការបើកបង្ហូរទឹកដោយសន្សឹមៗ នៅក្នុងអាងស្តុកទឹកវារីអគ្គិសនីកំចាយ

(កំពត)៖ នៅថ្ងៃទី១១ ខែតុលា ឆ្នាំ២០២១ វេលាម៉ោង១១ថ្ងៃត្រង់នេះ រដ្ឋបាលខេត្តកំពត និងក្រុមបច្ចេកទេស នៃទំនប់វារីអគ្គិសនីកំចាយ បានជូនដំណឹងថា ការបើកបង្ហូរទឹកដោយសន្សឹមៗ នៅក្នុងអាងស្តុកទឹកវារីអគ្គិសនីកំចាយ ក្រោយស្ថានភាពទឹក មានការកើនឡើងជាបន្តបន្ទាប់ដោយសារទឹកភ្លៀង។

សេចក្តីជូនដំណឹងរបស់រដ្ឋបាលខេត្ត បញ្ជាក់ថា គណៈកម្មាធិការគ្រប់គ្រងគ្រោះមហន្តរាយខេត្តកំពត សូមជូនដំណឹងដល់បងប្អូនប្រជាពលរដ្ឋឲ្យបានជ្រាបថា ដោយស្ថានភាពទឹកភ្លៀងនៅតែបន្តធ្លាក់រយៈពេលប៉ុន្មានថ្ងៃជាប់ៗគ្នា នៅទូទាំងខេត្តកំពតធ្វើឲ្យលំហូរទឹកចូលក្នុងអាងស្តុកទឹកទំនប់វារីអគ្គិសនីកំចាយមានចំនួនកើនឡើងដល់កំរិតត្រូវរំដោះទឹកចេញពីទំនប់។

ក្រុមបច្ចេកទេសនៃទំនប់វារីអគ្គិសនីកំចាយនឹងធ្វើការបើកបង្ហូរទឹកដោយសន្សឹមៗ នៅវេលាម៉ោង១១ និង០០នាទី ថ្ងៃត្រង់នេះនាថ្ងៃទី១១ ខែតុលា ឆ្នាំ២០២១នេះ។

 

អភិបាលខេត្តបន្ទាយមានជ័យ ចុះពិនិត្យមើលផលប៉ះពាល់ជាក់ស្តែងក្រោយទឹកជំនន់ នៅស្រុកមង្គលបូរី

(បន្ទាយមានជ័យ)៖ នៅថ្ងៃទី១០ ខែតុលា ឆ្នាំ២០២១ លោក អ៊ុ រាត្រី អភិបាលខេត្តបន្ទាយមានជ័យ  អមដំណើរដោយ លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក រ័ត្ន ដាសុីណង់ អភិបាលស្រុកមង្គលបូរី ឃុំ បានអញ្ជើញចុះពិនិត្យមើលផលប៉ះពាល់ជាក់ស្តែងផ្លូវថ្នល់ ស្រូវស្រែប្រជាពលរដ្ឋ នៅឃុំសឿ ស្រុកមង្គលបូរី និង នៅសង្កាត់ភ្នៀត សង្កាត់កោះពងសត្វ ក្រុងសិរីសោភ័ណ ខេត្តបន្ទាយមានជ័យ ក្រោយទឹកស្រក។

សូមជម្រាបជូនថា បងប្អូនប្រជាកសិករបានកំពុងចាប់ផ្តើមធ្វើការបង្ករបង្កើនផលឡើងវិញក្រោយរដូវទឹកសម្រកនេះ និងស្រូវខ្លះមានដើមដងល្អ នៅក្នុងស្រុកមង្គលបូរី ។ដោយឡែកនៅខាងសង្កាត់ភ្នៀត សង្កាត់កោះពងសត្វ ជាភូមិសាស្ត្រផ្នែកខាងក្រោមដែលទទួលទឹកហូរធ្លាក់ទៅពីស្ទឹងសិរីសោភ័ណ ស្ថានភាពទឹកនូវមិនទាន់មានសភាពធូស្រាលទាំងស្រុងនោះទេ កន្លែងខ្លះទឹកនៅហូរកាត់លើផ្លូវ ថ្នល់ក្នុងភូមិ។

ជាមួយនឹងការអញ្ជើញចុះពិនិត្យនោះ លោក អ៊ុ រាត្រី អភិបាលខេត្តបន្ទាយមានជ័យ បានជម្រុញនិងណែនាំបន្ថែមដល់បងប្អូនប្រជាកសិករទាំងអស់ត្រូវបន្តខិតខំធ្វើការដាំដុះបង្ករបង្កើនផលស្រូវ ដំណាំរួមផ្សំផ្សេងទៀត ឡើងវិញ ដើម្បីជួយលើកកម្ពស់ជីវភាពប្រចាំថ្ងៃ។

រស់នៅដោយប្រកាន់ភ្ជាប់វិធានការ៣ការពារ និង៣កុំឲ្យបានខ្ជាប់ខ្ជួនដើម្បីការពារជំងឺកូវីដ១៩ ។

ចំពោះស្ថានភាពផ្លូវរងការខូចខាតវិញ ឯកឧត្តម អ៊ុ រាត្រី អភិបាលខេត្តបន្ទាយមានជ័យ ក្នុងនាមអាជ្ញាធរខេត្តនឹងរកវិធានការដោះស្រាយ សម្រួលដល់ការធ្វើដំណើរ ដឹកជញ្ជូនទំនិញ កសិផលប្រជាពលរដ្ឋ ឲ្យបានល្អប្រសើរឡើញវិញតាមលទ្ធភាពជាក់ស្តែងនៅពេលទឹកស្រកផុតទាំងស្រុង៕

អភិបាលរាជធានី៖ អាយុជីវិតប្រជាពលរដ្ឋ ជារឿងតែមួយគត់ដែលអាជ្ញាធរគ្រប់លំដាប់ថ្នាក់ត្រូវការពារ

ភ្នំពេញ៖ លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានមានប្រសាសន៍លើកឡើងថា ក្នុងនាមអាជ្ញាធរដែលជាម៉ែ ជាឪរបស់បងប្អូនប្រជាពលរដ្ឋ ត្រូវការពារអាយុជីវិតបងប្អូនប្រជាពលរដ្ឋ ទៅតាមអនុសាសន៍ដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន។

ការបញ្ជាក់បែបនេះរបស់លោក ឃួង ស្រេង បានធ្វើឡើងនាថ្ងៃទី១០ ខែតុលាឆ្នាំ២០២១ ខណៈដែលលោកបានដឹកនាំមន្ត្រីជំនាញ និងអាជ្ញាធរដែនដី ចុះពិនិត្យស្ថានភាពទឹកជំនន់នៅតាមបណ្ដោយស្ទឹងព្រែកត្នោត ស្ថិតក្នុងភូមិសាស្រ្តខណ្ឌដង្កោរាជធានីភ្នំពេញ ខណៈដែលទឹកស្ទឹងនៅតែបន្តហក់ឡើង ដែលជាការព្រួយបារម្ភមួយរបស់

អាជ្ញាធររាជធានីភ្នំពេញ ក្នុងកិច្ចការពារអាយុជីវិត និងទ្រព្យសម្បត្តិប្រជាពលរដ្ឋ។

ក្នុងឱកាសនោះដែរ លោក ឃួង ស្រេង ក៏បានធ្វើការណែនាំអោយ ប្រធានមន្ទីរធនធានទឹក និងឧតុនិយមរាជធានីភ្នំពេញ ត្រូវតាមដានស្ថានភាពទឹកឲ្យបានជាក់លាក់ ពេលដែលមានបញ្ហាអ្វីកើតឡើង យើងអាចត្រៀមជាមុនដើម្បីសង្គ្រោះប្រជាពលរដ្ឋ កុំឱ្យបាត់បង់ជីវិតនិងខូចខាតទ្រព្យសម្បត្តិ។

លោក ឃួង ស្រេង បានបញ្ជាក់ទៀតថា ពាក់ព័ន្ធនឹងទឹកជំនន់តាមស្ទឹងព្រែកត្នោតឆ្នាំនេះ អាជ្ញាធររាជធានីភ្នំពេញ បានត្រៀមលក្ខណៈរួចរាល់ហើយ ដើម្បីសង្គ្រោះប្រជាពលរដ្ឋ ពេលមានហានិភ័យកើតឡើង។

ប្រធានមន្ទីរធនធានទឹកនិងឧតុនិយមរាជធានីភ្នំពេញ លោក ម៉ៅ ប៊ុនធឿន ក្នុងឱកាសអមដំណើរលោក ឃួង ស្រេង នៅថ្ងៃទី១០ តុលា ២០២១ បានបញ្ជាក់ឲ្យព័ត៌មានយើងដឹងថា សម្រាប់ស្ទឹងព្រែកត្នោតនៅផ្នែកខាងលើ ទឹកមានកម្ពស់៥,១៦ម៉ែត្រ ស្រកចុះ០,៦២ ។ នៅចំណុចរលាំងជ្រៃ ទឹកមានកំពស់៧,២៨ម៉ែត្រ កើនឡើងលើសម្សិលមិញ០,២៨ ម៉ែត្រ។ យើងបាន

បើកទ្វារទឹកចំនួន៥ដើម្បីកុំឲ្យទឹកចាល់។ 

លោក ម៉ៅ ប៊ុនធឿន បន្តទៀតថា កម្ពស់ទឹកស្ទឹងព្រែកត្នោតដែលត្រូវប្រកាសឲ្យមានការប្រុងប្រយ័ត្ននោះ គឺចាប់ពី ៧ម៉ែត្រកន្លះទៅ៨ម៉ែត្រ ក្នុងនោះសម្រាប់ទ្វារទឹកកំពង់ទួល មានកំពស់៥,១៨ម៉ែត្រកើនឡើង០,៣៨ ម៉ែត្រ បើប្រៀបធៀបកាលពីថ្ងៃទី០៩តុលាម្សិលមិញ។ សម្រាប់ទ្វាទឹកកំពង់ទួលចំនួន៥ យើងបានបើកអោយដំណើរការចំនួន៤ទ្វាទឹក៕

លិខិតមិត្តអ្នកអាន៖ «សម រង្ស៊ី លោតខុសចង្វាក់បាក់ចង្កេះ» (មានវីដេអូ)

ទីបំផុត ព័ត៌មានដែលថាលោកនាយករដ្ឋមន្ត្រី ហ៊ុន សែន បានមានសញ្ជាតិ២ និងមានលិខិត​ឆ្លងដែនប្រទេសស៊ីព្រគឺជាព័ត៌មានមិនពិត។ កាសែត The Guardian បានចុះផ្សាយកែតម្រូវឡើងវិញហើយថា «អ្វីដែលខ្លួនបានផ្សាយនោះគឺជាការផ្សាយខុស»។ ការកែតម្រូវរបស់កាសែត The Guardian បានធ្វើឲ្យទណ្ឌិតសម រង្ស៊ីដែល មានសញ្ជាតិ២ និងបនភើនដែលបានយកព័ត៌មានមិនពិតនោះទៅប្រើប្រាស់ដើម្បីបំពុលសង្គមដោយគ្មានការផ្ទៀងផ្ទាត់ជាមុននោះ បាក់ចង្កេះព្រោះតែលោតខុសសង្វាក់។ អ្វីដែលកាន់តែធ្ងន់ធ្ងរបំផុតនោះ គឺព័ត៌មាននេះក៏បានរុញច្រានឲ្យ សម រង្ស៊ី ស្ថិតក្នុងស្ថានភាព«យីអ៊ុនដាក់ អារក្សជាន់» យ៉ាងទាន់ហន់បំផុត។

តើព្រឹត្តិការណ៍នេះបានឆ្លុះបង្ហាញឲ្យឃើញពីចំណុចខ្សោយអ្វីខ្លះរបស់អ្នកនយោបាយប្រឆាំងជ្រុលនិយមដឹកនាំដោយ សម រង្ស៊ីដែលជាកូន នៃត្រកូលក្បត់ជាតិតពូជ?

ទី១៖ វាបានបង្ហាញឲ្យឃើញថា សម រង្ស៊ី គឺ ជាអ្នកនយោបាយដែល«មិនដឹងខ្យល់អ្វីទាំងអស់ គឺដឹងតែល្ហើយ»ប៉ុណ្ណោះ ពោលគឺ ឲ្យតែលឺខ្យល់បក់ ជននេះក៏ផ្តើមហក់កញ្ឆេងភ្លាមថា ខ្លួនមាន ដង្ហើមរស់ហើយ ដោយមិនបានយកខួរក្បាលមកគិតទាល់តែសោះថា តើខ្យល់នោះបក់មកពីទិសណា និងនាំមកនូវសារធាតុគ្រោះថ្នាក់អ្វីមកជាមួយឬអត់នោះទេ? ក្នុងមួយជីវិតនយោ​បាយរបស់ខ្លួន សម រង្ស៊ី ធ្វើ នយោបាយបែប«មិនដឹងខ្យល់» រហូតដោយមិនដែលបានប្រើវិចារណញាណដើម្បីវិភាគសភាពការណ៍អ្វីឡើយ។ ទីបំផុតបរាជ័យក៏កើតមានយ៉ាងទាន់ហន់ និងជាបន្តបន្ទាប់ម្តងហើយម្តងទៀត។

ទី២៖ នយោបាយមិន ដឹងខ្យល់របស់ សម រង្ស៊ី បានបង្ហាញថា បុគ្គលរូបនេះរួមទាំងគូកនគឺជាភ្នាក់ងារផ្សព្វផ្សាយព័ត៌មានមិនពិតដើម្បីបំពុលសង្គមជារៀងរហូតមកដោយមិនអាចប្រកែកបានឡើយ។ ព័ត៌មានមិនពិតគឺជាចំណីដ៏ឆ្ងាញ់របស់ សម រង្ស៊ី និងគូកនពីព្រោះបុគ្គលប្រភេទនេះប្រៀបបាននឹងសត្វឈ្លឹងដែលរស់បានតែនឹងការជញ្ជក់ឈាមពីអ្នកដ៏ទៃដោយមិនពិចារ​ណាអ្វីឡើយ។

ទី៣៖ បើនិយាយពីកម្រិតយុទ្ធសាស្ត្រនយោបាយវិញ សម រង្ស៊ី ធ្វើ នយោបាយបែបរាក់កំផែល ដោយគ្មានទីប្រឹក្សាពិគ្រោះយោបល់និងគ្មានក្រុមការងារសម្រាប់ផ្ទៀងផ្ទាត់ព័ត៌មានអ្វីទាំងអស់​។ ជាធម្មតា ព័ត៌មានមួយដែលកើតឡើងគឺមានប្រភពរបស់វាដែលអ្នកនយោបាយឬអ្នក​សារព័ត៌មានត្រូវចូលទៅមើលដល់ប្រភពឬសគល់ជាមុនសិនមុននឹងយកវាមកប្រើប្រាស់ដើម្បីធ្វើជាអាវុធយុទ្ធសាស្ត្រនយោបាយ។ ប៉ុន្តែ សម រង្ស៊ី និងគូកន បែរជាយកព័ត៌មានមិនពិតមកធ្វើជាយុទ្ធសាស្ត្រវាយទៅ លើគូបដិបក្ខដោយមិនបានផ្ទៀងផ្តាត់ទាល់តែសោះ។ នេះគឺជាចំណុចខ្សោយដ៏ធំនិងជាប្រភពនៃការបរាជ័យយ៉ាងអាម៉ាស់ដែលបុគ្គលរូបនេះបានជួបប្រទះជាហូរហែររហូត មកទល់នឹងបច្ចុប្បន្ន។

ទី៤៖ ប្រសិនបើគេក្រឡេកមើលសេចក្តីថ្លែងការណ៍៥ចំណុចរបស់ខ្មោចគណបក្សដែលបានស្លាប់ទៅហើយនោះគេពិតជាអស់សំណើចជាខ្លាំងពីព្រោះពាក្យពេចន៍ទាំងអស់ដែលពួកគេបានសរសេរ គឺសុទ្ធសឹងជាដំបងសំពងទៅលើខ្លួនឯងទាំងអស់។ ជាក់ស្តែង ពួកគេបាន និយាយពីអ្នករត់ចោលស្រុកនិយាយពីជនក្បត់ជាតិដែលបោកប្រាស់គេដើម្បីបានលុយដេកស៊ីចាយយ៉ាងស្រួលនៅឯបរទេស។ ចំណុចទាំងអស់នេះ គឺសុទ្ធសឹងតែជាលក្ខណៈសម្គាល់របស់ទណ្ឌិត សម រង្ស៊ី ទាំងអស់ពីព្រោះគឺ សម រង្ស៊ីនេះហើយ ដែលជាមនុស្សតែងតែរត់ចោលស្រុ​ករហូត និងរស់ដោយសារការបោកប្រាស់ខ្មែរនៅក្រៅស្រុកដើម្បីបានលុយស៊ីចាយសប្បាយហ៊ឺហាដោយមិនបាច់ធ្វើការអ្វីឡើយ។ ចំណែកឯលោក ហ៊ុន សែនវិញ គឺពិតជាមេដឹកនាំដែលតែងតែក្រាញននៀលនៅជាមួយប្រជាពលរដ្ឋនិងស្ថិតនៅជាមួយប្រជាពលរដ្ឋខ្មែរគ្រប់ពេលវេលាជាពិសេសក្នុងកាលៈទេសៈដ៏លំបាក។

ទី៥៖ ការកែតម្រូវរបស់កាសែត The Guardian កំពុងធ្វើឲ្យ សម រង្ស៊ី អស់ក្រេឌីតនិងអាម៉ាស់ មុខពេញពិភពលោកពីព្រោះ សម រង្ស៊ី បានប្រើប្រាស់ព័ត៌មានមិនពិតនេះទាំងភាសាខ្មែរ និងអង់គ្លេសដោយភ្ជាប់ជាមួយនូវ link របស់កាសែតនេះតែ ម្តងនៅក្នុងហ្វេសប៊ុក ផ្លូវការរបស់ខ្លួន។ ឥឡូវនេះ ពេលកាសែត The Guardian បានកែតម្រូវព័ត៌មាន សម រង្ស៊ី នៅតែបន្តប្រើប្រាស់ព័ត៌មានមិនពិតនេះដដែលដោយមិនបានកែតម្រូវតាមកាសែតនេះទេ។ ចំណុចនេះបានធ្វើឲ្យ សាធារណៈមតិជាតិនិងអន្តរជាតិ បានឃើញយ៉ាងច្បាស់ថា សម រង្ស៊ី គឺជាជនឱកាសនិយមនិងនៅតែរឹងរូសប្រើប្រាស់ព័ត៌មានមិនពិតធ្វើជាមូលដ្ឋានក្នុងការវាយប្រហារមកលើលោក ហ៊ុន សែន ។

ទី៦៖ មិនត្រឹមតែអាម៉ាស់ដូចស្រាតខោដើរកណ្តាលផ្សារប៉ុណ្ណោះទេប៉ុន្តែទង្វើរបស់ សម រង្ស៊ី បានបិទវាំងនននយោបាយរបស់ខ្លួនឲ្យចប់ជា ស្ថាពរដោយសារតែ រដ្ឋាភិបាលដឹកនាំដោយលោក ហ៊ុន សែន កំពុងរៀបចំសេចក្តីព្រាងច្បាប់មួយស្តីពីការកំណត់សញ្ជាតិតែមួយគត់សម្រាប់មេដឹកនាំស្ថាប័នកំពូលរបស់ជាតិពោលគឺ ប្រធានព្រឹទ្ធសភា ប្រធានរដ្ឋសភា ប្រធានក្រុមប្រឹក្សាធម្មនុញ្ញ និងនាយរដ្ឋមន្ត្រី ត្រូវមានសញ្ជាតិខ្មែរតែមួយប៉ុណ្ណោះ។ នេះហើយជាអ្វីដែលគេហៅថា «តម្រិះជិះកឯង» ដែលជាលទ្ធផលកើតចេញពីនយោបាយ «ស្ទើរភ្លើង» «ឆ្អិនក្បាលស៊ីក្បាល ឆ្អិនកន្ទុយស៊ីកន្ទុយ» របស់ខ្លួន។

រហូតមកទល់ពេលនេះ នយោបាយ«ស្ទើរភ្លើង ឬតម្រិះជិះកឯង» របស់សម រង្ស៊ី បានបង្កើតកំហុសជាប្រវត្តិសាស្ត្រ២លើកធំៗនិងបានផ្តល់ជាការដូដាក់ជើងពានជូនលោក ហ៊ុន សែន រួចជាស្រេច។ កំហុសទី១ គឺ ការកែប្រែរដ្ឋធម្មនុញ្ញពី២ភាគ៣មកជា៥០% បូក១ និងកំហុសនយោបាយដ៏ធំបំផុតលើកទី២ គឺការបង្កើតហេតុផលសមស្របបំផុតដែលជាឱកាសមាសឲ្យរដ្ឋាភិបាលលោក ហ៊ុន សែន ធ្វើវិសោធនកម្មរដ្ឋធម្មនុញ្ញស្តីពីសញ្ជាតិតែមួយសម្រាប់មេដឹកនាំកំពូលៗដែលតាមពិតទៅលោក ហ៊ុន សែន បានព្យាយាមមិនធ្វើវាជាយូរណាស់មកហើយក្នុងគោលដៅទុកឱកាសឲ្យអ្នកនយោបាយសញ្ជាតិ២ អាចធ្វើជាមេដឹកនាំកំពូលបាន។ ប៉ុន្តែ ពេលនេះ លោក ហ៊ុន សែន ក៏អស់ភាពអត់ធ្មត់បានតទៅទៀតហើយដោយសារតែ សម រង្ស៊ី ជា «អ្នកដុតឲ្យខ្លោចរោចឲ្យឆៅ» ហើយជាលទ្ធផលនៃនយោបាយមិនដឹងខ្យល់នេះក៏បានធ្វើឲ្យទណ្ឌិតសម រង្ស៊ី «លោតខុសសង្វាក់ បាក់ចង្កេះ» ហើយការបាក់ម្តងនេះ គឺពិតជាគ្មានគ្រូពេទ្យណាអាចព្យាបាលបានឡើយ៕

ដោយ៖ អ្នកនយោបាយតុកាហ្វេ

លេខាធិការដ្ឋានអាយស៊ីស៊ី-អង្គរ ចុះពិនិត្យការដ្ឋានជួសជុលប្រាសាទមេបុណ្យខាងលិច

សៀមរាប៖ នៅព្រឹកថ្ងៃទី១០ ខែតុលា ឆ្នាំ២០២១  លេខាធិការដ្ឋានអាយស៊ីស៊ី-អង្គរ អង្គការយូណេស្កូប្រចាំកម្ពុជា ព្រមទាំងថ្នាក់ដឹកនាំអាជ្ញាធរជាតិអប្សរា បានចុះពិនិត្យការងារនៅការដ្ឋានជួសជុលប្រាសាទមេបុណ្យខាងលិច ដែលស្ថិតនៅកណ្ដាលបារាយណ៍ខាងលិច។

សូមបញ្ជាក់ថា ប្រាសាទមេបុណ្យខាងលិចបានចាប់ផ្តើមជួសជុលពីឆ្នាំ២០១២។ បច្ចុប្បន្ន ច្រាំងកសិន្ធុជុំវិញបានជួសជុលរួចជាស្ថាពរ និងកំពុងដំឡើងតួប៉មសងខាងជុំវិញសរុបមានចំនួន១២៕

អត្ថបទ៖ នាយកដ្ឋានផ្សព្វផ្សាយ

រូបភាព៖ ហាប់ គឹមអាន

ពិធីបើកកិច្ចប្រជុំស្តីពីការពិនិត្យលើវឌ្ឍនភាពការងារ សម្រាប់ត្រៀមការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ នាពេលខាងមុខ

ព្រះសីហនុ៖ នៅថ្ងៃទី១០ ខែតុលា ឆ្នាំ២០២១ លោក សាយ សំអាល់ សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តព្រះសីហនុ បានអញ្ជើញដឹកនាំកិច្ចប្រជុំដើម្បីពិនិត្យលើវឌ្ឍនភាពការងារ សម្រាប់ត្រៀមការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ នាពេលខាងមុខ  ដោយមានការអញ្ជើញចូលរួមពីសមាជិកសមាជិកាក្រុមការងារគណបក្សចុះមូលដ្ឋានខេត្តព្រះសីហនុ និងគណៈកម្មាធិការគណបក្សខេត្ត  ក្រុងស្រុក ឃុំសង្កាត់នៃខេត្តព្រះសីហនុ។ 

លោក សាយ សំអាល់ ប្រធានក្រុមការងារបានបន្តជំរុញឱ្យសមាជិកសមាជិកាក្រុមការងារបន្តកិច្ចខិតខំប្រឹងប្រែងបន្ថែមទៀតក្នុងការចុះមូលដ្ឋានឱ្យបានខ្លាំងក្លា។ ជាមួយគ្នានេះ  លោកក៏បានថ្លែងការកោតសរសើរ  និងវាយតម្លៃខ្ពស់  ចំពោះការខិតខំប្រឹងប្រែងបំពេញភារកិច្ចរបស់គណៈកម្មាធិការគណបក្សខេត្ត ក្រុងស្រុក និងឃុំសង្កាត់នាពេលកន្លងមក  ទាំងការងារនយោបាយ សតិអារម្មណ៍ ចាត់តាំង  ព្រមទាំងការចិញ្ចឹមចលនានៅតាមមូលដ្ឋាន។ ក្នុងនោះ លោកបានបន្តលើកទឹកចិត្តមន្ត្រីទាំងអស់ ឱ្យធ្វើអំពើល្អ និងបម្រើប្រជាពលរដ្ឋឱ្យបានកាន់តែល្អប្រសើរបន្ថែមទៀត ព្រោះនេះគឺជាមូលដ្ឋាននៃ ភាពរឹងមាំរបស់គណបក្សប្រជាជនកម្ពុជា។ 

លោកប្រធានក្រុមការងារ បានថ្លែងថាចាប់តាំងពីថ្ងៃបដិសន្ធិ គណបក្សប្រជាជនកម្ពុជាបានពុះពារឆ្លងកាត់បណ្តាដំណាក់កាលធំៗ ជាប្រវត្តិសាស្ត្ររបស់ប្រទេសជាតិប្រកបដោយវីរភាព លើមូលដ្ឋានប្រកាន់ខ្ជាប់ឥតប្រែប្រួលនូវគោលបំណង និងឧត្តមគតិរបស់ខ្លួន គឺឈរនៅខាងប្រជាជន ផ្សារភ្ជាប់រួមសុខទុក្ខជាមួយប្រជាជន គ្រប់កាលៈទេសៈ ប្រឹងប្រែងជម្នះគ្រប់ឧបសគ្គ ហ៊ានធ្វើពលិកម្មឥតរុញរា ដើម្បីប្រទេសកម្ពុជាមួយ ឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម។

ជាមួយគ្នានេះ លោកប្រធានក្រុមការងារ បានណែនាំដល់សមាជិកសមាជិកាទាំងអស់  ត្រូវយកចិត្តទុកដាក់ខ្ពស់ជំរុញប្រជាពលរដ្ឋ  រស់នៅក្នុងភូមិឃុំសង្កាត់ដែលបានចុះឈ្មោះបោះឆ្នោតរួច ឱ្យទៅពិនិត្យឈ្មោះក្នុងបញ្ជីបោះឆ្នោត និងជំរុញអ្នកដែលមិនទាន់បានចុះឈ្មោះបោះឆ្នោត ឬទើបគ្រប់អាយុឱ្យចុះឈ្មោះបោះឆ្នោត នៅតាមឃុំសង្កាត់ដែលពួកគាត់រស់នៅចាប់ពីថ្ងៃទី១២ ខែ តុលា ដល់ថ្ងៃទី៣០  ខែវិច្ឆិកាឆ្នាំ២០២១ និងត្រៀមសម្រាប់ទៅបោះឆ្នោតជូនគណបក្សប្រជាជនកម្ពុជានាថ្ងៃបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់នាថ្ងៃទី៥ ខែមិថុនា ឆ្នាំ២០២២ និងការបោះឆ្នោតជ្រើសរើសតំណាងរាស្ត្រឆ្នាំ២០២៣ និងការបោះឆ្នោតនាអាណត្តិក្រោយៗទៀត  ដើម្បីគណបក្សប្រជាជនកម្ពុជា  បន្តដឹកនាំ  និងអភិវឌ្ឍប្រទេសជាតិឱ្យរីកចម្រើនខ្លាំងលើគ្រប់វិស័យបន្ថែមទៀត ព្រមទាំងថែរក្សា  ការពារសុខសន្តិភាព  ដែលកម្ពុជារកបានដោយលំបាកនេះ  បានគង់វង្សយូរអង្វែងតរៀងទៅ៕