ហ្វីលីពីន​ក្នុងឋានៈជា​ប្រធានអាស៊ាន​ កំពុងធ្វើដំណើរ​ ក្នុងស្ថានភាព​មិនធ្លាប់មាន​ពីមុនមក​

ប្រធានអាស៊ានត្រូវបានទទួលតំណែងឆ្លាស់គ្នាតាមលំដាប់តួរអក្សរ។ នេះគឺជាបទដ្ឋាន ដែលបានដាក់ចេញកន្លងមក ឬក៏ឈរឈ្មោះតាមលំដាប់លំដោយនៅក្នុងគំរូការទូតរបស់តំបន់ចាប់តាំងពីអាស៊ានកកើតឡើងនៅឆ្នាំ ១៩៦៧។ ក៏ប៉ុន្តែ ច្បាប់នៅក្នុងអាស៊ានម្តងម្កាលត្រូវបានគេមើលឃើញថា មានការរំលោភបំពានពីសមាជិករបស់ខ្លួនដែលបានកើតឡើងពីមុនមក ជាពិសេស ប្រសិនបើឥណ្ឌូនេស៊ីស្នើសុំសិទ្ធិរំលងតាមលំដាប់លំដោយនោះ។

ឆ្នាំនេះ ហ្វីលីពីន ក្លាយជាប្រធានអាស៊ាន ហើយនឹងត្រូវទទួលសមាជិកទាំងអស់ រួមមានដៃគូកិច្ចពិភាក្សាចំនួន ១២ វេទិកាតំបន់អាស៊ាន ដែលនឹងត្រូវធ្វើឡើងនៅខែមិថុនា ឆ្នាំ ២០១៧ បន្ទាប់ពីកិច្ចប្រជុំកំពូលអាស៊ាន និងកិច្ចប្រជុំកំពូលអាស៊ីខាងកើតនៅចុងឆ្នាំ ២០១៧ នេះ។

ប្រធានាធិបតីហ្វីលីពីន លោក Rodrigo Duterte ត្រូវកំណត់អំពីរបៀបវារៈនៃកិច្ចប្រជុំនេះ។ តើបញ្ហាសមុទ្រចិនខាងត្បូង នឹងត្រូវដាក់ក្នុងរបៀបវារៈកំពូលដែរ ឬទេ? ក៏ប៉ុន្តែ ក្នុងឋានៈជាប្រធាន ហ្វីលីពីនជាប់កាតព្វកិច្ចក្នុងការគោរពឆន្ទៈរបស់សមាជិកដទៃទៀតផងដែរ។

កន្លងមក ឡាវ និងកម្ពុជា មិនបានលើកឡើងអំពីជម្លោះដែនសមុទ្រនៅក្នុងអង្គការនេះទេ។ រដ្ឋាភិបាលទីក្រុង Manila មានឥរិយាបថមិនច្បាស់លាស់ ជាពិសេសបន្ទាប់ពីលោក Duterte ចូលកាន់អំណាច។ ក៏ប៉ុន្តែ ហ្វីលីពីន ត្រូវបានផ្តល់ជំនួយផ្នែកយោធា ដោយមានការបញ្ចូនក្រុមឧត្តមសេនីយ៍ទៅហ្វឹកហ្វឺនយ៉ាងច្រើននៅសហរដ្ឋអាមេរិក។ នេះបង្ហាញថា អាមេរិកចង់ឱ្យបញ្ហាសមុទ្រចិនខាងត្បូងក្លាយជាប្រធានបទពិភាក្សានៅក្នុងព្រឹត្តិការណ៍ទាំងបីរបស់អាស៊ាន។

រដ្ឋាភិបាលទីក្រុងប៉េកាំង ដោយមានការបង្ហាញពីឆន្ទៈនយោបាយ និងសាច់ដុំផ្នែកយោធារបស់ខ្លួនបានបញ្ជូនយន្តហោះចម្បាំង និងក្រុមប្រយុទ្ធទៅកាន់តំបន់មានជម្លោះនេះយ៉ាងច្រើន។ សកម្មភាពនេះ វាផ្ទុយទៅនឹងសកម្មភាពការទូតផ្នែកជើងទឹករបស់ចិន ដែលកន្លងមករហូតដល់ឆ្នាំ ២០១១  ចិនមានឥរិយាបថកណ្តាលពាក់ព័ន្ធបញ្ហាសមុទ្រចិនខាងត្បូង ហើយជាញឹកញាប់ជំរុញឱ្យភាគីទាំងអស់ស្វែងរកការចូលរួមក្នុងការអភិវឌ្ឍតំបន់នេះ ហើយចង់ឱ្យគោរពអធិបតេយ្យភាពរបស់ចិន។

នៅក្នុងក្រសែភ្នែករបស់លោកខាងលិច សកម្មភាពរបស់ចិនគឺជា “គោលបំណងមិនទាន់ដឹងច្បាស់មួយ”។ តើចិនចង់ក្លាយជាមហាអំណាចពិភពលោកឬ? គ្មាននរណាដឹងពីចម្លើយច្បាស់នោះទេ ក៏ប៉ុន្តែ គេបានគិតថា ចិនគឺជា “កត្តាគំរាមកំហែង” មួយនៅថ្ងៃអនាគត។

ក៏ប៉ុន្តែ គោលបំណង “មិនដឹងច្បាស់លាស់នេះ” បានក្លាយជាព្រឹត្តិការណ៍មួយកាន់តែធំទៅៗនៅពេល ដែលោក Trump ចូលកាន់តំណែង។ លោក Trump បានបង្កើនថវិកាយោធារបស់មន្ទីរបញ្ចកោណ ៥៧ ភាគរយ។ តើនេះជាអ្វីដែលអាមេរិកចង់បង្ហាញចិនឬ? តើចិនគួរថយមួយជំហានដែរ ឬទេ? បញ្ហាទាំងអស់នេះ ត្រូវតែមានការយកចិត្តទុកដាក់ពីសំណាក់ហ្វីលីពីនថាតើគោលបំណងរបស់ចិន និងអាមេរិក វាយ៉ាងម៉េច ដើម្បីយកមកប្រឹក្សាជាមួយមន្រ្តីជាន់ខ្ពស់អាស៊ានប្រកបដោយភាពវៃឆ្លាត។

ទីមួយ អាស៊ានមិនចង់មានសង្រ្គាមនៅក្នុងតំបន់ ឬយុទ្ធសាស្រ្តកេងយកផលប្រយោជន៍តែឯង ដែលនឹងជំរុញឱ្យសមាជិកអាស៊ាន ត្រូវជ្រើសរើសយកចិន ឬក៏អាមេរិក។

ដោយសារតែ Trump និង Duterte មានការទទួលបាននូវអំណាចទៅវិញទៅមក រដ្ឋមន្រ្តីការបរទេសអាស៊ាន និងមន្រ្តីជាន់ខ្ពស់ទាំងអស់ ត្រូវខិតខំធ្វើការបន្ថែមទៀត ដើម្បីធ្វើឱ្យអាស៊ានក្លាយជាអ្វីមួយច្បាស់ៗលាស់ និងមានប្រសិទ្ធភាពឆ្ពោះទៅមុខ។ តើនេះនឹងជាផ្លូវមួយខ្សែក្រវ៉ាត់មួយ ឬក៏ជាការអំពាវនាវឱ្យមានការសើរើឡើងវិញចំពោះកិច្ចព្រមព្រៀង TPP ទេ?

ទាំងនេះគឺជាសកម្មភាពការទូតដ៏គ្រោះថ្នាក់សម្រាប់ហ្វីលីពីន ក្នុងការរៀបចំនៅក្នុងកិច្ចប្រជុំអាស៊ាននេះ។ ក្នុងឋានៈជាប្រធានអាស៊ាន ទីក្រុង Manila ត្រូវទប់ទល់ទៅនឹងការប៉ុនប៉ងដាក់បញ្ចូនក្នុងរបៀបវារៈតាមរបៀបហ្វីលីពីន នៅពេលដែលខ្លួនឯងផ្ទាល់មិនទាន់ច្បាស់ថា តើលោក Duterte នឹងងាកទៅខាងណានោះផង៕

ប្រភព : Jakarta Post ចុះថ្ងៃទី០៩ ខែមេសា ឆ្នាំ២០១៧

​​​​​​​​​​​​​​​​​​ចិន​នាំ​យក​កម្ម​វិ​ធី​ខ្សែ​ក្រ​វ៉ាត់​មួយ ផ្លូវ​មួយ​ទៅ​កាន់​ទ្វីប​អូ​សេ​អា​នី​​

មាន​ការ​ពិ​ភាក្សា​​ដេញ​ដោល​គ្នា​​ដ៏​ល្អ​មួយ​​​នៅ​ក្នុង​ទី​ក្រុង​ Wellington ថាតើ​ជា​ការ​ផ្តួច​ផ្តើម​គំនិត​នៅ​កម្ម​វិធី​ខ្សែ​ក្រ​វ៉ាត់​មួយ ផ្លូវ​មួយ​របស់​ចិន​ (B&RI) ដែល​ទាក់​ទង​នឹង​ប្រ​ទេស​នូវែលហ្សេ​ឡង់ និង​របៀប​ដែល​ប្រ​ទេស​នូវែល​ហ្សេ​ឡង់​អាច​ចូល​រួម​ជាមួយ​នឹង​កម្ម​វិធី​នេះ​​សម្រាប់គោល​បំណង​អ្វី។ គំនិត​ផ្តួច​ផ្តើម​កម្ម​វិធី​ខ្សែ​ក្រ​វ៉ាត់​មួយ ផ្លូវ​មួយ គឺ​ជា​សកម្ម​ភាព​ជំនួញ​ដ៏​អស្ចារ្យ​ជា​មួយ​នឹង​ផល​ប៉ះ​ពាល់​យ៉ាង​សំខាន់​សម្រាប់​សណ្តាប់​ធ្នាប់​សេដ្ឋ​កិច្ច​ពិ​ភព​លោក ប៉ុន្តែ​ថា​តើ​វា​ពាក់​ព័ន្ធ​ទៅ​នឹង​ប្រ​ទេស​នូវែល​ហ្សេ​ឡង់​យ៉ាង​​ណា?

ចំពោះ​ការ​ពង្រីក​វិ​សាល​ភាព និង​យន្ត​ការ​ប្រតិបត្តិ​របស់​ខ្លួន​ត្រូវ​បាន​គេ​ធ្វើ​ឡើង​យ៉ាង​ច្បាស់​លាស់​​កម្ម​វិ​ធី B&R គឺ​ជា​បណ្តាញ​ភាព​ជា​ដៃ​គូដ៏​ធំធេង​សម្រាប់​ហេដ្ឋារច​នា​សម្ព័ន្ធ​ ផលិត​កម្ម និង​គម្រោង​សេវា​កម្ម​រវាង​ចិន​ និង​បណ្តា​ប្រ​ទេស​នៅ​តាម​បណ្តោយ​ផ្លូវ​សូត្រ​ខ្សែ​ក្រ​វ៉ាត់​សេដ្ឋ​កិច្ច​ទៅ​ភាគ​ឥសាន្ត​នៃ​​ទ្វីប​អាស៊ី​បូព៌ា និង​​ផ្លូវ​សូត្រ​តាម​ដែន​សមុទ្រ​ទៅ​ភាគ​ខាង​ត្បូង។ កម្មវិ​ធី​ B&R នឹង​ត្រូវ​ភ្ជាប់​ជា​មួយ​នឹងអាស៊ី​បូព៌ា និង​អឺរ៉ុប។

កម្ម​វិ​ធី B&R បាន​កើត​ឡើង​នៅ​ពេល​ដែល​ប្រ​ទេស​នូវែល​ហ្សេ​ឡង់​ឈាន​មុខ​គេ​ក្នុង​ចំណោមបណ្តា​​ប្រ​ទេស​អភិ​វឌ្ឍន៍​លោក​ខាង​លិច​ក្នុង​ការ​ជំរុញ​ទំនាក់​ទំនង​សេដ្ឋ​កិច្ច និងពាណិជ្ជ​កម្ម​ឱ្យ​មាន​សក្តា​នុ​ពល​ជា​មួយ​នឹង​ចិន​។

នូវែល​ហ្សេឡង់​គឺ​ជា​ប្រ​ទេស​ដំបូង​ក្នុង​ចំណោម​ប្រ​ទេស​អភិ​វឌ្ឍ​ន៍​លោក​ខាង​លិច​ដែល​ចុះ​ហត្ថ​លេ​ខា​លើ​កិច្ច​ព្រម​ព្រៀង​ពាណិជ្ជ​កម្ម​សេរី (FTA) ជា​មួយ​នឹង​ចិន​ និង​ជា​ប្រ​ទេស​ទី​មួយ​ដែល​បាន​ចូល​រួម​នៅ​ក្នុង​ធ​នា​គារ​វិ​និយោគ​ហេដ្ឋា​រចនា​សម្ព័ន្ធ​អា​ស៊ី (AIIB) ​ដែល​ដឹក​នាំ​ដោយ​ចិន។ ដោយ​គ្រាន់​តែ​ឱ្យ​ឈ្មោះ​សូចនាករ​ចំនួន​ពីរ​នៃ​ទំនាក់​ទំនង​សេដ្ឋ​កិច្ច​ជឿន​លឿន​របស់​ប្រ​ទេស​នូវែល​ហ្សេ​ឡង់​ជា​មួយ​នឹង​ចិន។

ប៉ុន្តែ​ភាព​ខ្លាំង​នៃ​ទំនាក់​ទំនង​សេដ្ឋ​កិច្ច​ជា​មួយ​នឹង​ចិន​បាន​ធ្វើ​ឱ្យ​មាន​ការ​ពិ​ភាក្សា​ដេញ​ដោលគ្នា​​នៅក្នុង​ទី​ក្រុង​ Wellington អំពី​ថា​តើ​ប្រ​ទេស​នូវែល​ហ្សេ​ឡង់​កំពុង​តែ​ធ្វើ​ឱ្យ​មាន​តុល្យ​ភាពនូវ​ទំនាក់​​​ទំនងរបស់​ខ្លួនជា​មួយ​ចិន និង​បណ្តា​ប្រ​ទេស​ដទៃ​ទៀត​ដោយ​របៀប​ណា ជា​ពិសេស​ដៃ​គូ​សេដ្ឋ​កិច្ច​ នយោ​បាយ​​​ និង​សន្តិ​សុខតាម​បែប​ប្រ​ពៃណី​របស់​ខ្លួន​។ ការ​ប្រ​កួត​ប្រ​ជែង​ផ្នែក​យុទ្ធ​សាស្រ្ត​កាន់​តែ​ខ្លាំង​ឡើង​រវាង​សហ​រដ្ឋ​អា​មេ​រិក និង​ចិន​ហាក់​បី​ដូច​ធ្វើ​ឱ្យ​មាន​ការ​ប្រ​ឈម​កាន់​តែ​ខ្ពស់​ឡើង។ ប្រ​ទេស​នូវែល​ហ្សេ​ឡង់​ស្ថិត​ក្រោម​សម្ពាធ​ដើម្បី​​ប្រកាន់យក​​ជំហរ​លើ​បញ្ហា​​មួយ​ចំនួន ដូច​ជា​ភាពតាន​តឹង​នៅ​សមុទ្រ​ចិន​ខាង​ត្បូង និង​បញ្ហា​សន្តិ​សុខ​ថ្នាក់​តំបន់​ដទៃទៀត៕

អ្នក​នាំពាក្ស​គណ​បក្សប្រជាជន​កម្ពុជា៖ យុវជន​ចង់​បានការ​បោះឆ្នោតដោយ​សេរី ត្រឹមត្រូវ និងយុត្តិធ៌ម

លោក សុខ ឥសាន អ្នកនាំពាក្សគណបក្សប្រជាជនកម្ពុជា បានមានប្រសាសន៍ថា យុវជនចង់បានការបោះឆ្នោតដោយសេរី ត្រឹមត្រូវ និងយុត្តិធ៌ម ។ ការចង់បានបែបនេះរបស់យុវជនយើង គឺជាការត្រឹមត្រូវ ដែលប្រជាពលរដ្ឋគ្រប់រូបក៏ចង់បានបែបនេះដែរ ។ ក៏ប៉ុន្តែ ការចង់បានបែបនេះបានជាការជាក់ស្តែង លុះត្រាតែគ្រប់ភាគីពាក់ព័ន្ធត្រូវអនុវត្តឲ្យបានត្រឹមត្រូវតាមច្បាប់ រួមមាន៖ ច្បាប់ស្តីពីការរៀបចំ និងប្រព្រឹត្តទៅរបស់ គ.ជ.ប ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីគណបក្សនយោបាយ ព្រមទាំងបណ្តាគោលការណ៍ បទបញ្ជារ នីតិវិធី ក្រមសីលធ៌មរបស់គ.ជ.ប ។

បើមានភាគីណាមួយអនុវត្តមិនបានត្រឹមត្រូវទេ នោះការបោះឆ្នោតមិនអាចផ្តល់លទ្ធផលជាវិជ្ជមានដែរ ។

លោក សុខ ឥសាន បានបន្ថែមថា ម៉្យាងទៀតភាគីគណបក្សកាន់អំណាច និងរាជរដ្ឋាភិបាល គឺពិតជាមិនចង់ឃើញភាគីណាមួយរំលោភច្បាប់ទេ ជាពិសេសខ្លួនឯងផ្ទាល់តែម្តង បើខ្លួនឯងល្មើសច្បាប់នោះ គឺពិតជាជះឥទ្ធិពលដល់ការដឹកនាំរបស់ខ្លួនជាមិនខាន ។ ដូច្នេះគណបក្សកាន់អំណាចជៀសវាង ការធ្វើខុសច្បាប់ ឬរំលោភច្បាប់ ។ តាមការជាក់ស្តែង ភាគច្រើន អំពើល្មើសច្បាប់ កើតឡើងពីគណបក្សប្រឆាំង ។ ពេលកើតបញ្ហាអាលនឹងចោទគណបក្សកាន់អំណាចថាប្រើតុលាការ ឬប្រើច្បាប់ដើម្បីគាបសង្កត់បក្សប្រឆាំង ។ បញ្ហានេះ មិនត្រូវយល់ច្រឡំទេ ។ បើមិនបានធ្វើខុសច្បាប់ទេ ហើយសមត្ថកិច្ចមានវិធានការណ៍ ឬតុលាការចាត់នីតិវិធី នោះទើបអាចចោទថា រាជរដ្ឋាភិបាលគាបសង្កត់ខ្លួន ។ តែបើប្រព្រឹត្តខុសច្បាប់ ហើយសមត្ថកិច្ចមានវិធានការណ៍តាមច្បាប់ និងតុលាការចាត់និតិវិធីតាមគោលការណ៍ច្បាប់ នោះ មិនមានន័យថាគាបសង្កត់ទេ ។ សូមកុំយល់ច្រឡំឲ្យសោះ ឬកុំនិយាយមួលបង្កាច់ ។

បើអនុវត្តច្បាប់បានព្រមៗគ្នានោះ សង្ឃឹមថា ការបោះឆ្នោតនឹងដំណើរការប្រកបដោយ ប្រជាធិបតេយ្យ សេរី ត្រឹមត្រូវ និងយុត្តិធ៌ម សមស្របតាមបំណងប្រាថ្នាចង់បានទាំងអស់គ្នា ៕

អាជ្ញាធរអប្សរារៀបចំចំណតរ៉ឺម៉កនៅខាងលិចប្រាសាទតាព្រហ្ម

ស្របពេលដែលចំនួនភ្ញៀវទេសចរបន្តកើនឡើង វិស័យទេសចរណ៍បានបង្កើតការងារជាច្រើនជូនប្រជាពលរដ្ឋខ្មែរ និងបង្កើនចំណូលចូលថវិកាជាតិ សម្រាប់ជំរុញការងារអភិវឌ្ឍន៍នៅក្នុងប្រទេស។ ទន្ទឹមនឹងនោះដែរ បញ្ហាប្រឈមមួយ ក្នុងចំណោមបញ្ហាប្រឈមជាច្រើនទៀតនៅតំបន់អង្គរ គឺកំណើនមធ្យោបាយដឹកជញ្ជូនភ្ញៀវទេសចរ។

អាជ្ញាធរអប្សរា ត្រូវគិតគូរឱ្យយមានចំណតសមស្របតាមចំនួនភ្ញៀវដែលប្រាសាទនីមួយៗអាចទទួលបាន ដោយមិនបង្កផលប៉ះពាល់អវិជ្ជមានមកលើប្រាសាទ បរិស្ថាន និងទេសភាពវប្បធម៌។ ជាក់ស្តែងកន្លងមកនៅប្រាសាទតាព្រហ្ម តែងតែមានរ៉ឺម៉កដឹកភ្ញៀវទេសចរជាច្រើនចតតាមដងផ្លូវ ដោយសារចំណតនៅមានទំហំតូច ពិសេសនៅផ្នែកខាងលិច ដែលនេះបង្កឱ្យបាត់សណ្តាប់ធ្នាប់ ស្ទះចរាចរណ៍ និង អាចប៉ះពាល់ដល់ប្រាសាទ។

នៅថ្ងៃទី៩ ខែមេសា ឆ្នាំ២០១៧កន្លងទៅនេះ ក្រុមការងារអនុវត្តផែនការគ្រប់គ្រងទេសចរណ៍អង្គរ ដឹកនាំដោយលោក សុខ សង្វារ អគ្គនាយករងអាជ្ញាធរអប្សរា បានចុះពិនិត្យទីតាំងផ្ទាល់ជាមួយអ្នកជំនាញអាយ ស៊ី ស៊ី អង្គរ ដើម្បីរៀបចំចំណតបណ្តោះអាសន្នសម្រាប់រ៉ឺម៉ក នៅលើកំណាត់ផ្លូវកៅស៊ូចាស់ ខាងជើងខ្លោងទ្វារខាងលិចប្រាសាទតាព្រហ្ម។

មានប្រសាសន៍ក្នុងឱកាសនោះលោក សុខ សង្វារបញ្ជាក់ថា “ជាការចាំបាច់ណាស់ ដែលត្រូវរៀបចំចំណតឱ្យបានប្រសើរ ដើម្បីផ្តល់សេវាជូនភ្ញៀវទេសចរកាន់តែល្អ និងថែរក្សាទេសភាពវប្បធម៌នៃតំបន់អង្គរយើង។ យើងនឹងជំរុញឱ្យយមានការរៀបចំចំណតនៅតាមប្រាសាទផ្សេងៗទៀតក្នុងពេលឆាប់ៗខាងមុខ”។

គួររំលឹកផងដែរថា កន្លងមកអាជ្ញាធរអប្សរាបានរៀបចំសណ្តាប់ធ្នាប់និងគ្រប់គ្រងលំហូរភ្ញៀវ ដោយសាងសង់ចំណតនៅមុខប្រាសាទអង្គវត្ត ជួសជុលនិងរៀបចំឱ្យមានផ្លូវជិះកង់ អនុវត្តចរាចរណ៍ឯកទិសនៅខ្លោងទ្វារទន្លេអុំនាពេលព្រឹក កំណត់វង់ទស្សនានៅប្រាសាទតាព្រហ្មជាដើម។ ការរៀបចំនេះទទួលបានការសាទរជាខ្លាំងពីសំណាក់សាធារណៈជន ហើយពួកគាត់សំណូមពរឱ្យអាជ្ញាធរអប្សរាបន្តរៀបចំចំណតនៅតាមទីតាំងដទៃទៀត ដើម្បីកុំឱ្យមានការចតពាសវាលពាសកាល ដែលនាំឱ្យបាត់សណ្តាប់ធ្នាប់និងប៉ះពាល់ដល់តម្លៃអង្គរ៕

លោក​នាយករដ្ឋម​ន្ត្រី ហ៊ុន សែន ជូនពរ​ពលរដ្ឋ​កម្ពុជា​ក្នុង​ឱកាសបុណ្យ​ចូលឆ្នាំ​ថ្មី និង​ប្តេជ្ញារ​ក្សា​សុខស​ន្តិ​ភាព

លោកនាយករដ្ឋមន្ត្រី ហ៊ុន សែន បានផ្ញើសារលិខិតចូលរួមអបអរសាទរ និងជូនពរជនរួមជាតិកម្ពុជា  ក្នុងឱកាសបុណ្យចូលឆ្នាំខ្មែរប្រពៃណីជាតិ  និងប្តេជ្ញារក្សាសន្តិភាព ស្ថិរភាព ដើម្បីជាគ្រឹះសម្រាប់ជីវភាពរស់នៅរបស់ប្រជាពលរដ្ឋ។

នៅក្នុងសារលិខិតរបស់លោកនាយករដ្ឋមន្ត្រី ហ៊ុន សែន បានប្តេជ្ញារក្សាឲ្យបាននូវសន្តិភាព ស្ថិរភាព និងសណ្តាប់ធ្នាប់សាធារណៈជូនជាតិទាំងមូល ដើម្បីជាគ្រឹះដ៏រឹងមាំ សម្រាប់ជីវភាពរស់នៅរបស់ប្រជាពលរដ្ឋ និងដើម្បីការអភិវឌ្ឍសេដ្ឋកិច្ច សង្គម ប្រកបដោយចីរភាព។

បើតាមប្រមុខដឹកនាំរដ្ឋាភិបាលពិធីបុណ្យចូលឆ្នាំថ្មី ឆ្នាំរកា ធ្វើឡើងក្នុបរិការណ៍ដែលកម្ពុជា កំពុងរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ដែលនឹងត្រូវធ្វើឡើងនៅថ្ងៃទី៤ ខែមិថុនា ២០១៧ខាងមុខ។

ប្រមុខដឹកនាំរដ្ឋាភិបាលបន្តថា កន្លងមកទោះបីជាកម្ពុជា ជួបប្រទះនូវបញ្ហាប្រឈមគ្រប់បែបយ៉ាង ទាំងក្នុង និងក្រៅប្រទេស តែរាជរដ្ឋាភិបាលនៅតែអាចធានាបាននូវសន្តិភាព សន្តិសុខ និងសណ្តាប់ធ្នាប់សាធារណៈបានល្អ និងរក្សាបាននូវស្ថានភាពម៉ាក្រូសេដ្ឋកិច្ច និងហិរញ្ញវត្ថុបានល្អប្រសើ។

លោកនាយករដ្ឋមន្ត្រីបន្តថា នៅឆ្នាំ២០១៦ កន្លងទៅ តាមការប៉ាន់ប្រមាណ កំណើនសេដ្ឋកិច្ចកម្ពុជា សម្រេចបានក្នុងរង្វង់ ៧% ដោយសារមានកំណើនក្នុងវិស័យឧស្សាហកម្ម ដែលជាកម្លាំងចលករអូសកំណើនសេដ្ឋកិច្ចនាំមុខទី១ ការរីកលូតលាស់នៃវិស័យសំណង់ និងវិស័យផ្សេងៗ៕

ហេតុអ្វី​ រុស្ស៊ី​ និងតួកគី​ ធ្វើលំហាត់​កងទ័ពជើងទឹក​រួមគ្នានៅ​សមុទ្រខ្មៅ​

ដូចនៅក្នុងសម័យសង្រ្គាមត្រជាក់ តំបន់ភាគខាងត្បូងរបស់អង្គការណាតូនៅតែជាបញ្ហា ចំពោះសម្ព័ន្ធភាពនេះ។រុស្ស៊ី  និងតួកគីបានធ្វើលំហាត់កងទ័ពជើងទឹករួមគ្នាមួយចំនួននៅសមុទ្រខ្មៅ។

កងនាវាសមុទ្រខ្មៅរបស់វិមានក្រឹមឡាំងបានដាក់ពង្រាយនាវាចំនួនបីគ្រឿង ហើយតួកគីបានបញ្ជូននា វាពីរគ្រឿងទៅចូលរួមក្នុងលំហាត់នេះ ដែលមានឈ្មោះថា PASSEX។

ភាគីរុស្ស៊ីបានពង្រាយនាវាចម្បាំងថ្មីឈ្មោះ Admiral Grigorovich បំពាក់ដោយមីស៊ីល ចម្ងាយវែងវាយប្រហារលើដីប្រភេទ Kalibr នាវាបោសសំអាតមីនប្រភេទ Vice Admiral Zakharin និងនាវាល្បាតប្រភេទ Raptor សំរាប់លំហាត់នេះ នេះយោងតាមក្រសួងការពារជាតិរុស្ស៊ី។ ជាមួយគ្នានេះ ការចូលរួមរបស់ទីក្រុងអង់ការ៉ានៅក្នុងល្បែងសង្រ្គាមនេះគឺមាននាវា ចម្បាំងប្រភេទ Barbaros និងប្រភេទ Buyukada។

សេចក្តីថ្លែងការណ៍របស់ក្រសួងការពារជាតិរុស្ស៊ីបានឲ្យដឹងថា “ នៅក្នុងលំហាត់នេះ មានសកម្មភាពដូចជា ការបើកនាវាចេញពីមូលដ្ឋាន ដោយបើកនៅពីក្រោយនាវាបោសសំអាត​មីន ការសំដែងការប្រយុទ្ធរួមគ្នា ការរៀបចំគមនាគមន៍ ព្រមទាំងការរុញច្រានការវាយ ប្រហារគោលដៅតូចៗដែលមានល្បឿនលឿន ប្រតិបត្តិការអធិការកិច្ច និងការស្វែងរក និងជួយសង្គ្រោះនៅលើផ្ទៃសមុទ្រ។”

លំហាត់រួមគ្នារវាងរុស្ស៊ី និងតួកគីអាចមានន័យទូលំទូលាយជាងនេះសំរាប់សម្ព័ន្ធភាពអង្គការណាតូ និងលោកខាងលិច ជាពិសេសពេលដែលទីក្រុងអង់ការ៉ាត្រៀមធ្វើប្រជាមតិលើ រដ្ឋធម្មនុញ្ញនៅថ្ងៃទី ១៦ ខែ មេសា។ រដ្ឋធម្មនុញ្ញថ្មីនឹងផ្តល់ឲ្យប្រធានាធិបតីតួកគីលោក Recep Erdogan នូវអំណាចកាន់តែច្រើនថែមទៀតជាងអំណាចដែលលោកមាននៅពេលបច្ចុប្បន្ន ដែលជាមូលហេតុមួយធ្វើឲ្យមានការព្រួយបារម្ភចំពោះលោកខាងលិច។ ពិតណាស់ លំហាត់យោធារួមគ្នានេះអាចជាសញ្ញាមួយបង្ហាញថាតួកគីកំពុងងាកចេញពីលោកខាងលិច។

ដោយប្រឈមជាមួយនឹងការិះគន់ពីសម្ព័ន្ធមិត្តអឺរ៉ុប និងសហរដ្ឋអាមេរិក តួកគីនៅក្នុងប៉ុន្មានខែថ្មីៗនេះបានចូលកាន់តែគៀកជាមួយទីក្រុងម៉ូស្គូ។ លោក Erdogan ដែលតាំងខ្លួនថា ជាបុរសខ្លាំង មានទស្សនៈដូចគ្នាជាមួយប្រធានាធិបតីរុស្ស៊ីលោក Vladimir Putin ហើយការ ខឹងសម្បារនៅក្នុងអតីតកាល ដូចជាការបាញ់ទម្លាក់យន្តហោះចម្បាំងរុស្ស៊ីប្រភេទ Su-24 Fencer ពីសំណាក់តួកគីនៅក្នុងខែវិច្ឆិកា ឆ្នាំ ២០១៥ ត្រូវបានអនុគ្រោះជាទូទៅ។ ក៍ប៉ុន្តែ ដោយសារភាពជិតស្និទ្នខ្លាំងរបស់តួកគីជាមួយលោកខាងលិច ទីក្រុងអង់ការ៉ាទំនងជាមិនអាច ដកខ្លួនចេញពីអឺរ៉ុបនៅក្នុងរយៈពេលខ្លីឆាប់ៗបានឡើយ។

ពិតណាស់ ទំនាក់ទំនងដែលកំពុងដុះចេញជាពន្លករបស់ទីក្រុងអង់ការ៉ាជាមួយវិមានក្រឹមឡាំងទីបំផុតអាចជាឆាកល្ខោនមួយ។ លោក Michael Kofman អ្នកវិភាគកិច្ចការយោធារុស្ស៊ីនៅមជ្ឈមណ្ឌលវិភាគកងទ័ពជើងទឹក (Center for Naval Analyses) បានថ្លែងប្រាប់សារព័ត៌មាន The National Interest ថា “នេះគឺជាមធ្យោបាយមួយដើម្បីដាក់សម្ពាធលើសម្ព័ន្ធភាព នេះ និងបង្ហាញថាតួកគីមានជម្រើសភូមិសាស្រ្តនយោបាយជាច្រើន។ ការពិតទៅ នេះគឺជាភាពសាវ៉ាមួយ ដោយធ្វើឲ្យតួកគីទទួលបាននូវភាពអមិត្តពីសហភាពអឺរ៉ុប។ នោះក៍ជាគ្រោះមហន្តរាយខាងទំនាក់ទំនងនយោបាយផងដែរ។”

ចំពោះសម្ព័ន្ធភាពអង្គការណាតូ លំហាត់យោធារបស់តួកគីជាមួយរុស្ស៊ីបង្កជាបញ្ហាមួយ។ លោក Kofman បាននិយាយថា “យើងគួរតែសួរថាតើអង្គការណាតូមានបំណងរក្សាវិធី សាស្រ្តរួមយ៉ាងណាចំពោះសមុទ្រខ្មៅ ប្រសិនបើតួកគីគឺជាប្រទេសតែមួយគត់ដែលមានកងទ័ពជើងទឹកនៅទីនោះចូលរួមលំហាត់យោធាជាមួយរុស្ស៊ី។”

តាមទស្សនៈរបស់រុស្ស៊ី លំហាត់យោធានេះធ្វើឲ្យវិមានក្រឹមឡាំងមានលទ្ធភាពបង្ហាញ ក្រុងវ៉ាស៊ីនតោន និងអឺរ៉ុបថា ខ្លួនមិនឯកកោពីអង្គការណាតូឡើយ កុំថាឡើយដល់ទៅឯកកោពីពិភពលោក។ លោក Paul Saunders នាយកប្រតិបត្តិមជ្ឈមណ្ឌល Center for the National Interest ដែលជាក្រុមវិភាគចុះផ្សាយសារព័ត៌មាន The National Interest បាននិយាយថា “ចំពោះទីក្រុងម៉ូស្គូ វាជាឱកាសមួយបង្ហាញដល់រដ្ឋាភិបាលលោកខាងលិច និងពិភពលោកថា អង្គការណាតូមិនអាចរារាំងសមាជិករបស់ខ្លួនមិនឲ្យធ្វើសហប្រតិបត្តិការជាមួយយោធារុស្ស៊ី បានឡើយ។”

ដូច្នេះ ដូចនៅក្នុងសម័យសង្រ្គាមត្រជាក់ តំបន់ភាគខាងត្បូងរបស់អង្គការណាតូនៅតែជាបញ្ហាចំពោះសម្ព័ន្ធភាពនេះ៕

ប្រភព៖ The National Interest ថ្ងៃទី ០៩ ខែ មេសា ឆ្នាំ ២០១៧

ប្រមុខរាជរដ្ឋាភិបាលកម្ពុជា តែងគិតគូរយកចិត្តទុកដាក់ខ្ពស់ដល់ប្រជាពលរដ្ឋមូលដ្ឋាន អាជីវករ និងកម្មករ

លោកនាយករដ្ឋមន្រ្តី ហ៊ុន សែន​ បានលើកឡើងថា  រាជរដ្ឋាភិបាលកម្ពុជា តែងគិតគូរ​យក​ចិត្តទុកដាក់ខ្ពស់ដល់ប្រជាពលរដ្ឋមូលដ្ឋាន អាជីវករ និងកម្មករ។ លោក បានលើក​ឡើងដូច​នេះនៅ​ក្នុងសារលិខិតអបអរសាទរ​ផ្ញើជូនជនរួមជាតិកម្ពុជា ក្នុងឱកាសបុណ្យចូលឆ្នាំខ្មែរ​ប្រពៃ​ណី​ជាតិ ចុះថ្ងៃទី០៧ ខែមេសា ឆ្នាំ២០១៧។

ប្រមុខរាជរដ្ឋាភិបាលកម្ពុជា បានបញ្ជាក់ថា ក្នុងឆ្នាំកន្លងទៅ រាជរដ្ឋាភិបាលបានវិភាជន៍ថវិកា បម្រើដល់ការអភិវឌ្ឍនៅថ្នាក់ក្រោមជាតិ នៅតាមរាជធានីខេត្ត ក្រុង ស្រុក ខណ្ឌ ឃុំ សង្កាត់ ចំនួនប្រមាណ២២៨២គម្រោង។លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា ថ្មីៗកន្លង​ទៅនេះ រាជរដ្ឋាភិបាលបាន​សម្រេចអនុញ្ញាតឱ្យប្រជាពលរដ្ឋជាអាជីវករ​លក់ដូរនៅ​តាមផ្សារ​រដ្ឋ និងទីតាំងផ្សាររដ្ឋនូវសិទ្ធិ កាន់កាប់ សិទ្ធិប្រើប្រាស់ និងសិទ្ធិអាស្រ័យ ផលលើ តូប រាន ស្តង់ និងកន្លែងលក់ដូរដទៃទៀត ព្រមទាំងមានសិទ្ធិផ្ទេរសិទ្ធិទាំងនេះជូន កូនចៅ ឬអ្នកដទៃទៀត​ដោយពុំមានការកំណត់​អាណត្តិ ព្រមទាំងលុបការបង់ភាស៊ី និងការបង់ថ្លៃផ្សេងៗទៀត ចំពោះ​ការលក់ដូររបស់ប្រជា​ពល​រដ្ឋតាមកញ្ច្រែង កញ្ជើ ល្អីនៅតាមទីផ្សារទូទាំងប្រទេសមិន​អនុ​ញ្ញា​ត​​ឱ្យយកពន្ធប្រថាប់​ត្រាលើការផ្ទេរសិទ្ធិកាន់កាប់អចលនទ្រព្យពីឪពុកម្តាយមកកូន ការដំ​ឡើងបៀវត្សឱ្យដល់ជាង ១លានរៀលនៅឆ្នាំ២០១៨។

ទន្ទឹមនេះ រាជរដ្ឋាភិបាល ក៏បានគិតគូរដល់ប្រាក់ខែកម្មកររោងចក្រកាត់ដេរសម្លៀកបំពាក់ និងស្បែងជើង ដែលនឹងត្រូវកើនឡើងពី១៤០ដុល្លារអាមេរិកក្នុងមួយខែ ទៅដល់១៥៣ដុល្លារ អាមេរិកក្នុងមួយខែ ដែលនេះមានន័យថាកម្មករនឹងទទួលបានប្រាក់ខែសរុបពី១៧០ដុល្លារ​អាមេរិកក្នុងមួយខែទៅដល់ ១៨១ដុល្លារអាមេរិកក្នុងមួយខែ៕

លោកស្រី ម៉ែន សំអន​ អញ្ជើញ​ចូលរួមពិធី​សូត្រមន្តឆ្នាំថ្មី​ ដែលរៀបចំដោយ​អគ្គលេខា​ធិការដ្ឋាន​រដ្ឋសភា​

ឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំរកា នព្វស័ក ពុទ្ធសករាជ ២៥៦១ កាន់តែខិតជិតមកដល់នាពេលខាងមុខនេះ នៅវិមានរដ្ឋសភា លោកស្រីឧបនាយករដ្ឋមន្ត្រី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាសមាជិការដ្ឋសភា មណ្ឌលខេត្តស្វាយរៀង រួមជាមួយថ្នាក់ដឹកនាំ និងមន្រ្តីរាជការទំាងអស់នៃរដ្ឋសភា នាព្រឹកថ្ងៃទី១០ ខែមេសា ឆ្នាំ២០១៧នេះ បានរៀបចំពិធីសូត្រមន្ត រាប់បាត្រប្រគេនទេយ្យទានចំពោះព្រះសង្ឃ ដើម្បីសុំសេចក្តីសុខ សិរីសួស្តី កើតមានចំពោះថ្នាក់ដឹកនាំ មន្រ្តីរាជការ ជាពិសេស សូមឲ្យប្រទេសជាតិ និងប្រជាជនកម្ពុជាទាំងមូលបានជួបតែភាពរីកចម្រើន អភិវឌ្ឍន៍ និងវិបុលសុខគ្រប់ប្រការ។

ពិធីសូត្រមន្តនេះ ត្រូវបានរៀបចំតាមបែបប្រពៃណីព្រះពុទ្ធសាសនា និងមានការសម្តែងរបាំត្រុដិ ដើម្បីបណ្តេញឧបទ្រុបចង្រៃឆ្នាំចាស់ និងលើករាសីឆ្នាំថ្មីផងដែរ៕

ក្រសួង​បរិស្ថាន រៀបចំ​កិច្ច​​ប្រជុំពិគ្រោះ​​យោបល់​ស្តីពី​​ «សេចក្តី​ព្រាង​ផែន​​ការប្រតិ​បត្តិ​ស្តារ​​សត្វខ្លា​ធំ នៅដែន​ជម្រក​សត្វព្រៃ​ស្រែពក ខេត្ត​មណ្ឌល​គិរី»

ភ្នំពេញ៖​ នៅទីស្តីការក្រសួងបរិស្ថាន នៅថ្ងៃទី១០ ខែមេសា ឆ្នាំ២០១៧នេះ មានរៀបចំ​កិច្ច​ប្រជុំពិគ្រោះ​យោបល់ថ្នាក់ជាតិស្តីពី​​ «សេចក្តីព្រាងផែនការប្រតិបត្តិស្តារសត្វខ្លាធំ នៅដែនជម្រកសត្វព្រៃស្រែពក ខេត្តមណ្ឌល​គិរី»។

សូមជម្រាបផងដែរថា កិច្ចប្រជុំនេះ​ នឹងប្រមូលធាតុចូលពីគ្រប់ភាគីពាក់ព័ន្ធ​ ដើម្បីសម្រេចបាននូវផែនការប្រតិបត្តិមួយ ដែលឆ្លើយតបទៅនឹង បញ្ហាប្រឈម និងតម្រូវការជាក់ស្តែងនាពេលបច្ចុប្បន្នក្នុងការដាក់បញ្ចូលក្នុងសេចក្តីព្រាងចុងក្រោយ។ កិច្ចប្រជុំនេះដឹកនាំដោយ ​ អនុរដ្ឋលេខាធិការក្រសួងបរិស្ថាន​ លោក សូ​ ខនឫទ្ធីគុណ​ តំណាងលោក សាយ សំអាល់ រដ្ឋមន្ត្រី​ក្រសួងបរិស្ថាន។

នាឱកាសនោះលោក សូ​ ខនឫទ្ធីគុណ លើកឡើងថា​ តាមរយៈកិច្ចប្រជុំនេះ បានបង្ហាញយ៉ាងច្បាស់ពីការយកចិត្តទុកដាក់របស់រាជរដ្ឋាភិបាលកម្ពុជា ពីគ្រប់ភាគីពាក់ព័ន្ធ​ ក្នុងការស្តារវត្តមានសត្វខ្លាធំឡើងវិញ នៅក្នុងប្រទេសកម្ពុជាក៏ដូចជាកញ្ចក់ឆ្លុះឱ្យឃើញពីស្មារតីគាំទ្រ សហការ និង​​ភាពជាដៃគូសហប្រតិបត្តិការដ៏ល្អ រវាងក្រសួងស្ថាប័នមានសមត្ថកិច្ច និង​ដៃគូ​អភិវ​ឌ្ឍ ដើម្បីធានាថាការរៀបចំផែនការនេះ មានការចូលរួមពីគ្រប់មជ្ឈដ្ឋានអាចទទួលយកបានពីគ្រប់ភាគីក្នុងភាពជាម្ចាស់ អាច​អនុវត្ត​បានប្រកបដោយ​​ប្រសិទ្ធភាពខ្ពស់ បន្ទាប់ពីផែនការប្រតិបត្តិនេះត្រូវបានដាក់ឱ្យប្រើប្រាស់ជាផ្លូវការ។

សូមបញ្ជាក់ថា​ កិច្ចប្រជុំនេះមានការរៀបចំដោយ នាយកដ្ឋានអភិរក្សតំបន់ការពារធម្មជាតិដីគោកខាងកើតទន្លេមេគង្គ នៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ ក្រសួងបរិស្ថាន​ ដោយមានការចូលរួមពីក្រសួង​ ស្ថាប័នពាក់ព័ន្ធ​ រួមនឹងអង្គការជាដៃគូជាតិ​ និងអន្តរជាតិ៕

ក្រសួងការងារ និងបណ្ដុះបណ្ដាលវិជ្ជាជីវៈរៀបចំកម្មវិធីអបអរសាទរខួបអនុស្សារីយ៍លើកទី ១៣១ទិវាលពលកម្មអន្ដរជាតិ ១ឧសភាឆ្នាំ២០១៧

នៅថ្ងៃទី១០ ខែមេសា ឆ្នាំ២០១៧ នេះក្រសួងការងារ និងបណ្ដុះបណ្ដាលវិជ្ជាជីវៈបានចេញសេចក្ដីប្រកាសព័ត៌មានស្ដីពី ការរៀបចំកម្មវិធីអបអរសាទរខួបអនុស្សារីយ៍លើកទី ១៣១ ទិវាលពលកម្មអន្ដរជាតិ ១ ឧសភាឆ្នាំ២០១៧ ដែលបានលើកប្រធានបទថា៖ “ដើម្បីសនិ្ដភាព ការងារ មុខរបរ និងអភិវឌ្ឍន៍“ ។ តាមសេចក្តីប្រកាសព័ត៌មាន របស់ក្រសួងការងារ និងបណ្ដុះបណ្ដាលវិជ្ជាជីវៈបានឱ្យដឹងថា ក្រសួងនឹងរៀបចំនូវវេទិកាពិភាក្សាអំពីទំនាក់ទំនងវិជ្ជាជីវៈនៅកម្ពុជា ដោយមានការចូលរួមយ៉ាងទូលំទូលាយពីគ្រប់តំណាងភាគីពាក់ព័ន្ធក្នុងវិស័យការងារដូចជា តំណាងក្រសួង-ស្ថាប័នរដ្ឋពាក់ព័ន្ធ អង្គការវិជ្ជាជីវៈ កម្មករនិយោជិត និយោជក អង្គការអន្ដរជាតិខាងការងា (ILO) នឹងអង្គការសង្គមស៊ីវិល ដើម្បីពិភាក្សាស្វែងរកដំណោះស្រាយរួមគ្នាលើបញ្ហាកង្វល់ ឬសំណូមពរជាអាទិភាព របស់បងប្អូនកម្មករនិយោជិត និងនិយោជក៕

សូមអានសេចក្ដីប្រកាសរបស់ក្រសួងការងារ និងបណ្ដុះបណ្ដាលវិជ្ជាជីវៈនៅខាងក្រោមនេះ ៖

លោកនាយករដ្ឋមន្រ្តី ហ៊ុន សែន៖ វិស័យឧស្សាហកម្ម សិប្បកម្ម សំណង់ និងទេសចរណ៍កម្ពុជា មានការរីកលូតលាស់ជាលំដាប់

លោកនាយករដ្ឋមន្រ្តី ហ៊ុន សែន​ បានលើកឡើងថា  វិស័យឧស្សាហកម្ម សិប្បកម្ម សំណង់ និងទេសចរណ៍​កម្ពុជា ​មានការរីកលូតលាស់ជាលំដាប់។ លោក បានលើកឡើងដូចនេះនៅ​ក្នុងសារលិខិតអបអរសាទរ​ផ្ញើជូនជនរួមជាតិកម្ពុជា ក្នុងឱកាសបុណ្យចូលឆ្នាំខ្មែរ​ប្រពៃណី​ជាតិ ចុះថ្ងៃទី០៧ ខែមេសា ឆ្នាំ២០១៧។

ប្រមុខរាជរដ្ឋាភិបាលកម្ពុជា បានបញ្ជាក់ថា វិស័យឧស្សាហកម្ម និងសិប្បកម្មបានរីកលូត​លាស់ជាបន្តបន្ទាប់ ដែលក្នុងនេះមានរោងចក្រ​សរុបចំនួនជាង ១៥០០រោងចក្រ ដែលភាគ​ច្រើនជារោងចក្រកាត់ដេរសម្លៀកបំពាក់ ស្បែក​ជើង និងមានឧស្សាហកម្មមធ្យម តូច និង​សិប្បកម្មជាង៣៩០០០មូលដ្ឋាន ហើយដែលបាន​ស្រូប​កម្លាំងពលករសរុបប្រមាណ​ជាង​១លាននាក់។ សក្ខីភាពនេះ បង្ហាញឱ្យឃើញនូវជំនឿ​ជឿជាក់ក្នុងការបណ្តាក់ទុននៅ​កម្ពុជា​ពីសំណាក់វិនិ​យោគិនក្នុងស្រុក និងបរទេស ដែល​សកម្មភាពនេះបានចូលរួមចំណែកកាត់​បន្ថយភាពក្រី​ក្រ​របស់​ប្រជាពលរដ្ឋតាមរយៈការផ្តល់ការងារ និងផ្តល់ប្រាក់ចំណូលសម្រាប់​ទ្រទ្រង់ជីវភាព​រស់​នៅប្រចាំថ្ងៃ។

ប្រមុខរាជរដ្ឋាភិបាលកម្ពុជា ក៏បានបញ្ជាក់ថា កម្ពុជា ក៏មានការរីកលូតលាស់លើវិស័យសំ​ណង់​ដោយមានអគារខ្ពស់ចាប់ពី៥ជាន់ទៅ៤០ជាន់ឡើងក្នុងរាជធានីភ្នំពេញ គិតមកដល់ឆ្នាំ ២០១៦នេះ មានជាង ៨០០កន្លែង ព្រមទាំងសំណង់លំនៅស្ថាន បុរី សណ្ឋាគារ ផ្ទះសំណាក់ បានរីកដុះដាលព្រោងព្រាត តាមទីប្រជុំជន ទីរួមខេត្តក្នុងប្រទេស។

សម្រាប់វិស័យទេសចរណ៍វិញ ក្នុងពិធីបុណ្យសមុទ្រលើកទី៥ ឆ្នាំ២០១៦ ក្រោមប្រធានបទ «ទីក្រុងបៃតង ឆ្នេរស្អាត សមុទ្រខៀវស្រងាត់» និងនៅក្នុងវេទិកាជាតិទីក្រុងស្អាតឆ្នាំ២០១៧ ក្រោមប្រធានបទ «ទីក្រុងស្អាត ទីក្រុងផ្តល់ភាពកក់ក្តៅដល់ប្រជាពលរដ្ឋនិងភ្ញៀវទេសចរ» ដែល​បានរៀបចំធ្វើឡើងកន្លងទៅថ្មីៗនេះ រាជរដ្ឋាភិបាលបានដាក់ចេញនូវវិធានការចាំ​បាច់​មួយចំនួនដើម្បីទាក់ទាញភ្ញៀវទេសចរជាតិ និងអន្តរជាតិក្នុងនោះគឺការពង្រឹងសន្តិភាព សន្តិ​សុខ ការរៀបចំសណ្តាប់ធ្នាប់សាធារណៈ បរិស្ថានឱ្យបានកាន់តែល្អប្រសើរ និងកាត់បន្ថយការ កកស្ទះចរាចារណ៍ក្នុងទីក្រុងផងដែរ ដើម្បីឱ្យកម្ពុជាក្លាយជាគោលដៅទេសចរណ៍ប្រកប​ដោយ​​ភាពទាក់ទាញនិងផ្តល់ភាពកក់ក្តៅដល់ភ្ញៀវទេសចរ។

លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា ក្នុងឆ្នាំ២០១៦កន្លងទៅនេះ ភ្ញៀវទេសចរ អន្តរជាតិ បានចូលមកព្រះរាជាណាចក្រកម្ពុជាមានចំនួនប្រមាណជាង៥លាននាក់ និងពលករ ដែលបម្រើការងារវិស័យឧស្សាហកម្មទេសចរណ៍ដោយផ្ទាល់មានប្រមាណជាង៦០ម៉ឺននាក់ផងដែរ៕

រដ្ឋមន្ត្រីអាស៊ាន​ និងជប៉ុន​ ឯកភាពធ្វើការឆ្ពោះ​ទៅរកកិច្ច​ព្រមព្រៀង​ពាណិជ្ជកម្ម​ក្នុង​តំបន់

បណ្តារដ្ឋមន្ត្រីសេដ្ឋកិច្ចអាស៊ាន និងនាយករដ្ឋមន្ត្រីជប៉ុន បានឯកភាពបញ្ចប់កិច្ចព្រមព្រៀងពាណិជ្ជកម្មដ៏ធំមួយនៅក្នុងឆ្នាំនេះ ដែលមានឈ្មោះថាកិច្ចព្រមព្រៀងភាពជាដៃគូសេដ្ឋកិច្ចទូលំទូលាយកម្រិតតំបន់ (RCEP)។

ការប្តេជ្ញាចិត្ត បានធ្វើឡើងកាលពីព្រឹកថ្ងៃសៅរ៍ ទី០៨ ខែមេសា នៅក្នុងខេត្តអូសាកា ប្រទេសជប៉ុន ក្នុងពេលរដ្ឋមន្ត្រីសេដ្ឋកិច្ចនៃប្រទេសអាស៊ាន ចូលជួបសំដែងការគួរសមជាមួយលោក ស៊ិនហ្សូ អាបេ នាយករដ្ឋមន្ត្រីជប៉ុន។

នៅក្នុងជំនួបនោះ រដ្ឋមន្ត្រីសេដ្ឋកិច្ចអាស៊ាន និងនាយករដ្ឋមន្ត្រីជប៉ុន ក៏បានពិភាក្សា និងព្រមព្រៀងលើការអភិវឌ្ឍធនធានមនុស្ស ការរៀបចំច្បាប់ និងកិច្ចសហប្រតិបត្តិការសេដ្ឋកិច្ចក្នុងតំបន់ ដូចជាកសាងហេដ្ឋារចនាសម្ព័ន្ធ ដើម្បីសម្រេចបានក្របខ័ណ្ឌពាណិជ្ជកម្មសេរីដែលមានលក្ខណៈគ្រប់ជ្រុងជ្រោយ គុណភាពខ្ពស់ និងផ្តល់អត្ថប្រយោជន៍ឲ្យគ្នាទៅវិញទៅមក។

ប្រទេសជប៉ុនត្រូវបានរំពឹងថា នឹងអភិវឌ្ឍផែនការជាក់លាក់សម្រាប់កញ្ចប់កិច្ចសហប្រតិបត្តិការជាមួយអស៊ាន រួមមានការគាំទ្រក្រុមហ៊ុនខ្នាតតូច និងមធ្យមនៅក្នុងប្រទេសជាសមាជិកអាស៊ាន។

គួររំលឹកផងដែរថា RCEP គឺជាកិច្ចព្រមព្រៀងពាណិជ្ជកម្មសេរី (FTA) ដែលត្រូវបានស្នើឡើង រវាងរដ្ឋទាំងដប់នៃសមាជិកអាស៊ាន   ជាមួយប្រទេសចំនួនប្រាំមួយ  (អូស្ត្រាលី  ចិន  ឥណ្ឌា ជប៉ុន កូរ៉េខាងត្បូង និងនូវែលហ្សេឡង់)។ កិច្ចពិភាក្សាស្តីពី RCEP ត្រូវបានបើកដំណើរការជាផ្លូវការនៅក្នុងខែវិច្ឆិកា ឆ្នាំ២០១២ នៅឯកិច្ចប្រជុំកំពូលអាស៊ាន ធ្វើឡើងនៅក្នុងប្រទេសកម្ពុជា។

យោងតាមទិន្នន័យពីនាយកដ្ឋានស្ថិតិអាស៊ាន បានបង្ហាញថាពាណិជ្ជកម្មទ្វេភាគី រវាងអាស៊ាន និងជប៉ុនបានកើនដល់ ២៣៨ពាន់លានដុល្លារ ក្នុងឆ្នាំ 2015។ អាស៊ានបាននាំចេញចំនួន ១១៤ពាន់លានដុល្លារ ទៅកាន់ប្រទេសជប៉ុន ខណៈដែលនាំចូលពីប្រទេសនៅអាស៊ីខាងកើតច្រើនជាង ១២៤ពាន់លានដុល្លារ នៅក្នុងឆ្នាំដដែល៕

មន្ដ្រីក្រសួងការបរទេស និងសហប្រតិបត្តិការអន្ដរជាតិចំនួន៥នាក់ និងមន្រ្ដីចំនួន១១នាក់ផ្សេងទៀតត្រូវបានប្រកាសចូលកាន់មុខដំណែង

នៅទីស្តីការក្រសួងការបរទេស នៅព្រឹកថ្ងៃទី១០ ខែមេសា ឆ្នាំ២០១៧ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានអញ្ជើញជា អធិបតី​ក្នុងពិធីប្រកាសចូលកាន់ដំណែង អគ្គនាយក អគ្គនាយករង និងប្រធាននាយកដ្ឋាន មួយចំនួននៃក្រសួងការបរទេសនិងសហប្រតិបត្តិការអន្ដរជាតិ។

មន្ត្រីត្រូវតែងតាំងតំណែងរួមមាន អគ្គនាយកដែលត្រូវបានតែងតាំងមានដូចខាងក្រោម៖

១- លោក ចាន់ រតនា ជាអគ្គនាយកនៃអគ្គនាយកដ្ឋានច្បាប់ កុងស៊ុល និងព្រំដែន។

២- លោក អ៊ឹង រចនា ជាអគ្គនាយកនៃអគ្គនាយកដ្ឋានអាស៊ី-ប៉ាស៊ីហ្វិក។

៣- លោក ណុំ ពិសិដ្ឋ ជាអគ្គនាយកនៃអគ្គនាយកដ្ឋានអឺរ៉ុប អាមេរិក និងអាហ្រ្វិក-មជ្ឈឹមបូព៌ា។

៤- លោក ថៃ ជុន ជាអគ្គនាយក នៃអគ្គនាយកដ្ឋានសហប្រតិបត្តិការអន្តរជាតិ។

៥- លោក ឈីវ យីស៊ាង ជាប្រធានវិទ្យាស្ថានជាតិទំនាក់ទំនងការទូត និងសិក្សាអន្តរជាតិ បន្ថែមលើមុខងារបច្ចុប្បន្ន។ បន្ថែមពីលើនោះក៏មានការតែងតាំង អគ្គនាយករងចំនួន ១១នាក់  ប្រធាននាយកដ្ឋានចំនួន ១៧នាក់ផងដែរ។

នៅក្នុងឱកាសនោះដែរ លោកទេសរដ្ឋមន្ត្រី ប្រាក់សុខុន មានប្រសាសន៍បញ្ជាក់ថា នៅពេលខាងមុខនេះ ក្រសួងកំពុងពិនិត្យលទ្ធភាពតែងតាំងមន្ត្រីអ្នកការទូតកម្ពុជាមួយចំនួនទៀតនៅតាមបណ្តាប្រទេសមួយចំនួន ដែលទាមទារឱ្យមន្ត្រីមានសមត្ថភាព និងមានបទពិសោធន៍ការងារដឹកនាំ ហើយអ្នកការទូតត្រូវចេះសរសេររបាយការណ៍ និងធ្វើបទវិភាគអំពីស្ថានភាព នៅក្នុងប្រទេសដែលកំពុងបំពេញបេសកកម្មការទូត និងត្រូវមានទំនាក់ទំនងល្អ ជិតស្និទ្ធជា​មួយប្រទេសដៃគូរ។

លោកទេសរដ្ឋមន្ត្រី ក៏បានបញ្ជាក់ទៀតថា មន្ត្រីក្រសួងការបរទេសឯទៀតដែលនៅពុំទាន់ទទួលបានការតែងតាំងជាមន្ត្រី ការទូតគឺកុំអស់សង្ឃឹម គឺត្រូវរង់ចាំព្រោះមន្ត្រីចាប់ពីតំណែងប្រធាននាយកដ្ឋានមានឱកាសច្រើនណាស់ក្នុងការតែងតាំងមន្ត្រីការទូត ប៉ុន្តែត្រូវខិតខំបង្កើនសមត្ថភាពបន្ថែមទៀត។ លោកទេសរដ្ឋមន្ត្រី ក៏បានបញ្ជាក់ទៀតថា វិទ្យាស្ថានបណ្តុះបណ្តាលអ្នកការទូត ដែលស្ថិតនៅក្នុងបរិវេណក្រសួងការបរទេសកំពុងដំណើរការសាងសង់ បន្ទាប់ពីសាងសង់រួច វិទ្យាស្ថានមួយនេះនឹងចាប់ ផ្តើមបើកដំណើរការបណ្តុះបណ្តាលអ្នកការទូត ជាមួយគ្នានោះដែរ មានបណ្តាប្រទេសមួយចំនួនបានសន្យាជួយឧបត្ថម្ភដល់វិទ្យានេះផងដែរ៕

អត្ថបទ៖ សាវឿន

លោកនាយករដ្ឋមន្ត្រី ហ៊ុន សែន ៖ រាជរដ្ឋាភិបាលកម្ពុជា នៅ​តែ​បន្តកសាងហេរចនា​សម័្ពន្ឋ​ដើម្បី​បម្រើ​ដល់​ការអភិវឌ្ឍ​សេដ្ឋកិច្ចសង្គម

លោកនាយករដ្ឋមន្ត្រី ហ៊ុន សែន ៖ រាជរដ្ឋាភិបាលកម្ពុជា នៅ​តែ​បន្តកសាងហេរចនា​សម័្ពន្ឋ​ដើម្បី​បម្រើ​ដល់​ការអភិវឌ្ឍ​សេដ្ឋកិច្ចសង្គម
លោកនាយករដ្ឋមន្ត្រី ហ៊ុន សែន បានបញ្ជាក់ថា រាជរដ្ឋាភិបាលកម្ពុជានៅតែបន្តកសាងហេដ្ឋារចនាសម័្ពន្ឋ ដើម្បី​បម្រើដល់ការអភិវឌ្ឍសេដ្ឋកិច្ចសង្គម សំដៅរួមចំណែកកាត់បន្ថយភាពក្រីក្ររបស់ប្រជាជន។ ការ​ប្រកាស​បន្ត​នូវការកសាងហេរចនាសម័្ពន្ឋរបស់ប្រមុខរាជរដ្ឋាភិបាលកម្ពុជានេះ បានធ្វើឡើង​តាម​រយៈ​សារលិខិត​របស់​ប្រមុខ​រាជរដ្ឋាភិបាលក្នុងឱកាសអបអរសាទពីធីបុណ្យចូលឆ្នាំថ្មីប្រពៃណីជាតិខ្មែរឆ្នាំរកា នព្វស័ក ពស ២៥៦១។
នៅក្នុងសាលិខិតដដែលនេះប្រមុខរាជរដ្ឋាភិបាលបានបញ្ជាក់ថា ដោយអនុវត្តតាមយុទ្ធ​សាស្ត្រចតុកោណ​ដំណាក់​កាលទី៣ ប្រមុខរាជរដ្ឋាភិបាលនៅតែបន្តកសាងហេរចនាសម័្ពន្ឋ​ដើម្បីបម្រើ​ដល់ការអភិវឌ្ឍ​សេដ្ឋកិច្ច​សង្គម​សំដៅរួមចំណែកកាត់បន្ថយភាពក្រីក្ររបស់ប្រជាជន។

លោកនាយករដ្ឋមន្ត្រីបន្តថា ក្នុងឆ្នាំកន្លងទៅរាជរដ្ឋាភិបាលបានបន្តកសាង និងបញ្ជប់ការកសាង និង​បាន​ដាក់​ឲ្យប្រើប្រាស់ជាផ្លូវការនូវសំណង់ហេរចនាសម័្ពន្ឋផ្លូវ ថ្នល់ ស្ពានមួយចំនួនដូចជា កណាត់ផ្លូវជាតិ លេខ៥៦ ផ្លូវ​ចូល​ប្រាសាទបន្ទាយឆ្មា ប្រវែង ១២៤គីឡូម៉ែត្រ ពីសិរីសោភ័ណបន្ទាយមានជ័យដល់ក្រុងសំរោង ខេត្តឧត្តរ​មាន​ជ័យ ផ្លូវជាតិលេខ៤៤ ប្រវែងជាង ១៣៩ គីឡូម៉ែត្រ ភ្ជាប់ពីផ្លូវជាតិលេខ៤ ទៅផ្លូវជាតិលេខ៥ កំណាត់ផ្លូវជាតិ​លេខ​៧៦ ប្រវែង១៧២ គីឡូម៉ែត្រ ពីខេត្តមណ្ឌលគិរីទៅរតនគិរី និងស្ពានបេតុងកោះធំប្រវែង ៤១៥គីឡូម៉ែត្រ ជាដើម។

មកដល់ដំណាច់ឆ្នាំ២០១៦នេះ សរុបផ្លូវជាតិ និងផ្លូវខេត្តមានប្រវែង ១៥៣៧៦គីឡូម៉ែត្រ ហើយ​ក្នុងនោះ​ផ្លូវ​ចាក់កៅស៊ូមានប្រវែង ១២១០០គីឡូម៉ែត្រ ផ្លូវលំជនបទប្រវែង ១៤៨៦៣ខ្សែ ស្ថាបនារួចមានប្រវែងជាង ៤៣៥០០​គីឡូម៉ែត្រ។ ពីឆ្នាំ២០១២ ដល់ ឆ្នាំ២០១៦ ផ្លូវលំជនបទកែសម្រួល និងចាក់បេតុងមាន​ប្រវែង​ប្រមាណ​ជា​ជាង ៣០០គីឡូម៉ែត្រ៕

ប្រជាពលរដ្ឋ ស្រុកកំពង់លែង ទទួលកាដូរជាទីគាប់ចិត្ត ដោយតម្លៃអគ្គិសនីពីរមុន​ ៣០០០រៀល​ មកនៅត្រឹម៤៨០រៀល, ​៦១០រៀល​ និង ៧៩០​រៀលក្នុងមួយ​គីឡូវ៉ាត់ម៉ោង​

សម្រាប់ប្រជាពលរដ្ឋ ស្រុកកំពង់លែង ខេត្តកំពង់ឆ្នាំង នាឱកាសបុណ្យចូលឆ្នាំថ្មី ប្រពៃណីជាតិឆ្នាំនេះ បានទទួលកាដូរជាទីគាប់ចិត្ត ដោយតម្លៃអគ្គិសនីពីរមុនហូតដល់៣០០០រៀល ក្នុងមួយគីឡូវ៉ាត់ម៉ោង មកនៅត្រឹម៤៨០រៀល, ៦១០រៀល និង ៧៩០រៀលក្នុងមួយគីឡូវ៉ាត់ម៉ោងប៉ុណ្ណោះ (អាស្រ័យលើទំហំប្រើប្រាស់ថាមពល ប្រើកាន់តែតិចតម្លៃកាន់តែថោក) បន្ទាប់ពីអគ្គិសនីកម្ពុជា បានវិនិយោគខ្សែកប់់នៅបាតទន្លេ ចូលដល់ស្រុកកំពង់លែង។

លោកទី  នរិន្ទ  ប្រធានអាជ្ញាធរអគ្គិសនីកម្ពុជា  និងលោក  កែវ  រតនៈ  អគ្គនាយកអគ្គិសនីកម្ពុជា បានយកដំណឹងដ៏រីករាយនេះ ចុះផ្សព្វផ្សាយ និងបកស្រាយរាល់ចម្ងល់របស់បងប្អូន ប្រជាពលរដ្ឋ និងទទួលបានការអបអរសាទរ ពីសំណាក់បងប្អូនប្រជាពលរដ្ឋទៀតផង ។

ក្រោមការចង្អុលបង្ហាញរបស់រាជរដ្ឋាភិបាលកម្ពុជា អគ្គិសនីកម្ពុជា បានយកចិត្តទុកដាក់សាងសង់ខ្សែបញ្ជូន និងចែកចាយថាមពលអគ្គិសនី ពាសពេញផ្ទៃប្រទេសកម្ពុជា។ ដោយឡែកខេត្តកំពង់ឆ្នាំង បានទទួលថាមពលពីបណ្តាញជាតិ ២៣០គីឡូវ៉ុល តាំងពីឆ្នាំ២០១៣ ប៉ុន្តែក៏មានតំបន់ដាច់ស្រយាលមួយចំនួន ខណ្ឌដោយទន្លេសាប និងដៃទន្លេជាច្រើន ដែលពុំមានអគ្គិសនីប្រើប្រាស់ ហើយអគ្គិសនីកម្ពុជា បានខិតខំសាងសង់ខ្សែកាប្លិ៍កប់បាតទន្លេ ក៏ដូចជាអាកាសផងដែរ។

តាមរយៈអគ្គិសនីកម្ពុជា ខេត្តកំពង់ឆ្នាំង ទទួលបានសមិទ្ធផលខ្សែកាប្លិ៍បក់បាតទន្លេច្រើនជាងគេ រហូតដល់ចំនួន៥កំណាត់ ទៅភ្ជាប់កោះផ្សេងៗដែលខណ្ឌដោយទន្លេរួម៖ ១- កោះកណ្តាល ឃុំកំពង់ត្រឡាច ស្រុកកំពង់ត្រឡាច ព្រមទាំងបន្តឆ្លងទៅដីគោកនៃស្រុកជលគិរី មានប្រវែងសរុបប្រមាណ២គីឡូម៉េត្រ មាន២កំណាត់ ដាក់ឲ្យដំណើរការកាលពីខែធ្នូ ឆ្នាំ២០១៦។ ២- ឆ្លងពីក្រុងកំពង់ឆ្នាំងកាត់តាមកោះចំនួន២ ឆ្ពោះទៅឃុំកំពង់ហៅ ទីរួមស្រុកកំពង់លែង មានប្រវែងសរុបប្រមាណ៣គីឡូម៉ែត្រ មាន៣កំណាត់ ដាក់ឲ្យដំណើរការនៅដើមខែមេសា ឆ្នាំ២០១៧នេះ។

អគ្គិសនីកម្ពុជា បានលើកឡើងថា ប្រជាពលរដ្ឋក្នុងតំបន់ខាងលើ នឹងទទួលបានថាមពលប្រកបដោយគុណភាព ស្ថិរភាព និងថ្លៃសមរម្យជាមួយ តម្លៃដូចក្នុងប្រព័ន្ធបណ្តាញជាតិ ជំនួសម៉ាស៊ីនប្រើប្រេងម៉ាស៊ូតតូចៗ ក្នុងតម្លៃជិត៣,០០០រៀល ក្នុង១គីឡូវ៉ាត់ម៉ោង ហើយពុំមានស្ថិរភាព និងគុណភាពល្អ។

ប្រជាពលរដ្ឋនឹងទទួលបានអត្រាថ្លៃស្មើ ៧៩០រៀល ក្នុង១គីឡូវ៉ាត់ម៉ោង បូកបន្ថែមថ្លៃអនុគ្រោះចំនួន៣ទៀត ដូចជា៖  ប្រើប្រាស់ក្នុង១ខែ តិចជាង១០គីឡូវ៉ាត់ម៉ោង អត្រាថ្លៃត្រឹមតែ៤៨០រៀល ក្នុង១គីឡូវ៉ាត់ម៉ោង។ ប្រើប្រាស់ក្នុង១ខែ ចាប់ពី១១ដល់៥០គីឡូវ៉ាត់ម៉ោង អត្រាថ្លៃត្រឹមតែ៦១០រៀល ក្នុង១គីឡូវ៉ាត់ម៉ោង។  សហគមន៍បូមទឹកប្រើប្រាស់កសិកម្ម ពេលយប់ពីម៉ោង៩យប់ដល់៧ព្រឹក អត្រាថ្លៃត្រឹមតែ៤៨០រៀលក្នុង១គីឡូវ៉ាត់ម៉ោង។

អគ្គិសនីកម្ពុជា បានបញ្ជាក់បន្ថែមទៀតថា ចាប់ពីពេលនេះតទៅ ទិសដៅសំខាន់នៅតំបន់នេះ គឺត្រូវធ្វើការពង្រីកការផ្គត់ផ្គង់ឲ្យអស់លទ្ធភាព ដែលបច្ចុប្បន្នមានការផ្គត់ផ្គង់បានត្រឹមតែចំនួន១,៤០០គ្រួសារ ឲ្យទៅដល់ចំនួនជាង១០,០០០គ្រួសារ៕

 

នាយឧត្តមសេនីយ៏ សៅ សុខា ដឹកនាំកិច្ចប្រជុំស្តីពីការត្រួតពិនិត្យនិងពិភាក្សាអំពីលទ្ធផល នៃការស្រាវជ្រាវស៊ើបអង្កេតបទល្មើសព្រៃឈើ នៅខេត្តមណ្ឌលគិរី

ភ្នំពេញ៖ នៅថ្ងៃទី១០ ខែមេសា ឆ្នាំ២០១៧ នៅសាលប្រជុំ សេនាធិការដ្ឋាន នៃបញ្ជាការដ្ឋានកងរាជ​អាវុធហត្ថលើផ្ទៃប្រទេស បានបើកកិច្ចប្រជុំ ស្តីពីការត្រួតពិនិត្យនិងពិភាក្​សាអំពីលទ្ធផលនៃ​ការស្រាវជ្រាវស៊ើបអង្កេត​រឿងក្តីបទល្មើសធនធានធម្មជាតិ នៅចំណុចអូរហ៊ុច ខេត្តមណ្ឌលគិរី ក្រោមអធិបតីភាព នាយឧត្តមសេនីយ៏ សៅ សុខា អគ្គមេបញ្ជាការនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ និងមានការអញ្ជើញចូលរួមពីសំណាក់ អនុប្រធាន សមាជិកនៃគណៈកម្មការជាតិ ព្រមទាំងសមាជិកនៃក្រុមការងាររបស់គណៈកម្មការជាតិជាច្រើនរូបផងដែរ។

យោងតាមស្មារតីអង្គប្រជុំ នៅថ្ងៃទី០៧ ខែមីនា ឆ្នាំ២០១៧ គណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ បានចេញសេចក្តីសម្រេចលេខ ២០/២០១៧ សសរ ចុះថ្ងៃទី០៩ ខែមីនា ឆ្នាំ២០១៧ ស្តីពីការបង្កើតក្រុមការងារស្រាវជ្រាវ ស៊ើបអង្កេតរឿងក្តីបទល្មើសធនធានធម្មជាតិនៅចំណុចអូរហ៊ុច ខេត្តមណ្ឌលគិរី។

អ្នកនាំពាក្យអាវុធហត្ថលើផ្ទៃប្រទេស លោក អេង ហ៊ី បានបញ្ជាក់ថា ក្រុមការងារនេះ មានសមាសភាពចម្រុះមកពី កងរាជអាវុធហត្ថលើផ្ទៃប្រទេស, នគរបាលជាតិ, ក្រសួងបរិស្ថាន, ក្រសួងកសិកម្ម រុក្ខាប្រមាញ់ និងនេសាទ, ក្រសួងរ៉ែនិងថាមពល។

លោកថាក្រុមការងារនេះ មានភារកិច្ចដូចតទៅ៖ ធ្វើការទាក់ទងជាមួយក្រសួង ស្ថាប័ន អាជ្ញាធរដែនដី និងអង្គភាពពាក់ព័ន្ធនានា, ធ្វើការស្រាវជ្រាវ ស៊ើបអង្កេតដោយហ្មត់ចត់ ត្រឹមត្រូវតាមច្បាប់ រកឱ្យឃើញបុគ្គលដែលពាក់ព័ន្ធនឹងរឿងក្តីបទល្មើសធនធានធម្មជាតិ ដែលកើតឡើងកាលពីថ្ងៃទី២២ ខែកុម្ភៈ ឆ្នាំ២០១៧ នៅចំណុចអូរហ៊ុច  ខេត្តមណ្ឌលគិរី, ធ្វើការកោះហៅបុគ្គលដែលពាក់ព័ន្ធនឹងបទល្មើសនេះ មកធ្វើការស្តាប់ចម្លើយ និងផ្ទៀងផ្ទាត់ជាមួយវត្ថុតាង ដើម្បីរកឱ្យឃើញការពិត, បូកសរុបលទ្ធផលការងារស្រាវជ្រាវ ស៊ើបអង្កេត ធ្វើរបាយការណ៍ជូនគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ៕

កម្ពុជា​ដណ្ដើម​បាន​កៅ​អីក្រុម III នៃព្រឹត្តិ​ការណ៍ Davis Cup បាន​មក​វិញ

ភ្នំពេញ៖ ក្រុមកីឡាវាយកូនបាល់កម្ពុជា បានដណ្ដើមកៅអីក្រុម III ក្នុងការប្រកួតជម្រុះពានរង្វាន់ Davis Cup ប្រចាំតំបន់អាស៊ី/អូសេអានីត្រឡប់មកវិញហើយ បន្ទាប់ពីបំបាក់ក្រុមខ្លាំងអូម៉ង់ ដោយលទ្ធផល ២-០ ក្នុងការប្រកួតខ្វែងពូលក្រុម IV នៅទីក្រុងអ៊ីសា ប្រទេសបារ៉ែនកាលពីថ្ងៃទី៨នេះ។
ជាមួយនឹងការវិលត្រឡប់ទៅលេងក្រុម III នាឆ្នាំ២០១៨ ជាថ្មីនេះដែរ ក្រុមកីឡាវាយកូនបាល់កម្ពុជា បានបង្កើតកំណត់ត្រាដ៏អស្ចារ្យរបស់ខ្លួន ក្នុងការប្រកួតជម្រុះក្រុម IV ឆ្នាំ២០១៧នេះ ដោយបានរក្សាជ័យជម្នះមិនស្គាល់ចាញ់តាំងពីប្រកួតទី១ក្នុងពូល រហូតដល់ការប្រកួតវគ្គខ្វែង ពោលគឺបានយកឈ្នះម្ចាស់ផ្ទះបារ៉ែន កៀហ្ស៊ីស៊ីស្ថាន, មីយ៉ាន់ម៉ា និងអារ៉ាប់ប៊ីសាអូឌីតជាបន្ដបន្ទាប់។
លុះដល់ការប្រកួតខ្វែងពូល ដោយត្រូវជួបក្រុមជម្រើសជាតិអូម៉ង់ ដែលជាក្រុមលេខ២ ពូលB គឺបានយកឈ្នះ ២-០ ដោយមិនបាច់ឆ្លងកាត់ប្រកួតវិញ្ញាសាវាយគូឡើយ ពោលគឺយកឈ្នះលើវិញ្ញាសាវាយឯកត្តជន ២ប្រកួតជាប់គ្នាតែម្ដង រួមមានកីឡាករ ឡុង សំនៀង យកឈ្នះកីឡាករ Mohammed Al Nabhani ២-១សិត ជាមួយពិន្ទុ ៣-៦, ៦-២ និង ៦-៤ ខណៈកីឡាករឆ្នើម ប៊ុន កេន្នី ឈ្នះកីឡាករ Abdullah Al Barwani ២-០សិតជាមួយពិន្ទុ ៦-២ និង ៦-១។
ដោយឡែកក្រុមអារ៉ប៊ីសាអូឌី ដែលជាក្រុមលេខ២ ឡើងមកពីពូលA ជាមួយកម្ពុជា ក៏បានទម្លាក់ក្រុមសិង្ហបុរី ដែលជាក្រុមលេខ១ ពូលB ដើម្បីឡើងទៅលេងក្រុម III នៃព្រឹត្តិការណ៍ Davis Cup 2018 ជាមួយក្រុមជម្រើសជាតិកម្ពុជាផងដែរ បន្ទាប់ពីប្រកួតឈ្នះក្រុមសិង្ហបុរី ដោយលទ្ធផល ២-១ ក្នុងការប្រកួតវគ្គខ្វែងពូលកាលពីម្សិលមិញដូចគ្នា៕

កូរ៉េខាងជើងអាចបំផ្ទុះគ្រាប់នុយក្លេអ៊ែរក្នុងខែនេះ

វ៉ាស៊ីនតោន៖កូរ៉េខាងជើងអាចបំផ្ទុះគ្រាប់នុយក្លេអ៊ែរក្នុងខែនេះ។ លោក ដូណាល់ ត្រាំ «បញ្ជាកងទ័ពប្រុងជើងការ នឹងប្រើគ្រប់មធ្យោបាយ ទប់ទល់កូរ៉េខាងជើង!» ទីប្រឹក្សាសន្តិសុខជាតិអាមេរិក លោក H.R. McMaster បាននិយាយថា ប្រធានាធិបតីអាមេរិក លោក ដូណាល់ ត្រាំ បានបញ្ជាឱ្យកងទ័ពអាមេរិកត្រៀមខ្លួនប្រើប្រាស់ មធ្យោបាយគ្រប់ជម្រើសទំាងអស់ ប្រឈមមុខនឹងការគំរាមកំហែងដោយអាវុធនុយក្លេអ៊ែរ និងមីស៊ីលផ្លោងរបស់កូរ៉េខាងជើងប្រឆាំងនឹងសហរដ្ឋអាមេរិក ព្រមទំាងសម្ព័ន្ធមិត្តរបស់ខ្លួនផងដែរ។ នេះបើតាមការចេញផ្សាយដោយ ទីភ្នាក់ងារសារព័ត៌មានយ៉ុនហាប់ នៅព្រឹកថ្ងៃចន្ទ ទី១០ ខែមេសា ឆ្នាំ២០១៧៕

លោកនាយករដ្ឋមន្រ្តី ហ៊ុន សែន ថ្វាយសារលិខិតថ្វាយព្រះពរព្រះមហាក្សត្រ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកនាយករដ្ឋមន្រ្តី ហ៊ុន សែន ថ្វាយសារលិខិតថ្វាយព្រះពរសម្តេចព្រះមហាក្សត្រី ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកនាយករដ្ឋមន្រ្តី ហ៊ុន សែន ផ្ញើសារលិខិតជូនពរប្រធានរដ្ឋសភា លោក ហេង សំរិន ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកនាយករដ្ឋមន្រ្តី ហ៊ុន សែន ផ្ញើសារលិខិតជូនពរប្រធានព្រឹទ្ធសភា លោក សាយ ឈុំ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកឧបនាយករដ្ឋមន្រ្តីប្រចាំការ ប៊ិន ឈិន ផ្ញើសារលិខិតជូនពរលោកនាយករដ្ឋមន្រ្តី ហ៊ុន សែន ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកឧបនាយករដ្ឋមន្រ្តីប្រចាំការ ប៊ិន ឈិន ផ្ញើសារលិខិតជូនពរប្រធានរដ្ឋសភា លោក ហេង សំរិន ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកឧបនាយករដ្ឋមន្រ្តីប្រចាំការ ប៊ិន ឈិន ផ្ញើសារលិខិតជូនពរប្រធានព្រឹទ្ធសភា លោក សាយ ឈុំ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកឧបនាយករដ្ឋមន្រ្តីប្រចាំការ ប៊ិន ឈិន ថ្វាយសារលិខិតថ្វាយព្រះពរព្រះមហាក្សត្រក្នុង ឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

លោកឧបនាយករដ្ឋមន្រ្តីប្រចាំការ ប៊ិន ឈិន ថ្វាយសារលិខិតថ្វាយព្រះពរសម្តេចព្រះមហាក្សត្រីក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

ចៅចាក់ស្មុក៖ រដូវកាលបោះឆ្នោតជារដូវកាលមុខរបរកាក់កបសម្រាប់អ្នកនយោបាយសេះហោះ

នៅថ្ងៃទី១០ ខែមេសា ឆ្នាំ២០១៧នេះ ទំព័រហ្វេសប៊ុកចៅចាក់ស្មុក បានបង្ហោះផ្សាយអត្ថបទ ដោយដាក់ចំណងជើងថា«រដូវកាលបោះឆ្នោតជារដូវកាលមុខរបរកាក់កបសម្រាប់អ្នក​នយោបាយសេះហោះ» ដែលមានខ្លឹមសារដូចតទៅ៖

ខណៈការឃោសនាបោះឆ្នោតក្រុមប្រឹក្សាឃុំ-សង្កាត់ខិតជិតមកដល់ បន្ទាយព្រះអាទិត្យកំពុងតែរត់ខ្វែងដៃខ្វែងជើងដើរប្រមូលថវិកាដើម្បីទ្រទ្រង់ការចំណាយលើការឃោសនារបស់ខ្លួន។ បើតាម ម៉ៅ មុនីវណ្ណ បន្ទាយព្រះអាទិត្យគ្រោងនឹងចំណាយថវិកាយ៉ាងតិចចំនួន១,៧ លានដុល្លារសហរដ្ឋ អាមេរិក ក្នុងការងារឃោសនាបោះឆ្នោតខាងមុខ ហើយការចំណាយនេះនឹងអាចបន្ថែមថវិកា ពីបេក្ខជនសមាជិកក្រុមប្រឹក្សាឃុំសង្កាត់នៃបក្សរបស់ខ្លួន។ តើប្រភពថវិកាទាំងនេះបានមកពីណាខ្លះ? ថវិកាទាំងនេះបានមកពីការរៃអង្គាសពីសមាជិកសមាជិការបស់ខ្លួនទាំងនៅក្នុងស្រុក និងនៅក្រៅស្រុក ហើយរដូវកាលនេះក៏ជារដូវកាលនៃការសន្យាផងដែរ ដើម្បីទទួលបានការចូលរួមថវិកា។

ហេតុដូច្នេះហើយបានជាគេសង្កេតឃើញតំណាងរាស្ត្រ របស់បន្ទាយសង្គ្រោះជាតិ បានធ្វើដំណើរទៅបរទេសដូចជាសហរដ្ឋអាមេរិក ប្រទេសបារាំង អាល្លឺម៉ង់ អូស្ត្រាលី ញូវហ្សីលែន កាណាដាជាដើមដើម្បីជួបសកម្មជនរបស់ខ្លួនបំណងរៃអង្គាសប្រាក់មកចំណាយលើការឃោ​សនានេះ។

សូមបងប្អូនខ្មែរនៅក្រៅប្រទេសត្រៀមខ្លួនឱ្យហើយ និងត្រៀមថវិកាទុកចូលបុណ្យផ្កាសង្គ្រោះជាតិ និងចូលរួមពិធីជប់លៀងសង្គ្រោះជាតិដើម្បីប្រមូលបច្ច័យ និងថវិកាដើម្បីចូលរួមគាំទ្របក្សក្នុងកសរឃោសនាបោះឆ្នោត។ រឿងក្នុងស្រុកគេបានដឹងហើយថាបេក្ខជនដែល ត្រូវឈរឈ្មោះក្នុងការប្រកួតប្រជែងក្នុងការបោះឆ្នោតក្រុមប្រឹក្សាឃុំសង្កាត់ខាងមុខតម្រូវឱ្យបង់ប្រាក់ ១១០០ដុល្លារសម្រាប់បេក្ខជនឈរលេខ ១ ឈរលេខរៀងទី២ ជិតមួយពាន់ដុល្លារ និងលេខរៀងបន្តបន្ទាប់រហូតដល់បេក្ខជនបម្រុងនៅក្នុងការបោះឆ្នោតក្រុមប្រឹក្សាឃុំក៏ត្រូវបង់ប្រាក់ដែរ។ ចុះនៅក្រៅស្រុកវិញវាមានរឿងយ៉ាងម៉េចដែរ?

ទី១- ទាំងទណ្ឌិតសម រង្ស៊ី និងមន្ត្រីគណបក្សសង្គ្រោះជាតិផ្សេងទៀត បាននិយាយបំពក់កម្លាំង​ជាតិសាសន៍និយមដោយបំពុលថាជនជាតិ វៀតណាមរស់នៅពេញស្រុក បញ្ហាព្រសមដៃន ពុករលួយជាដើម ដើម្បីបញ្ឆេះកំហឹងប្រជាជនទាក់ទាញការគាំទ្រថវិកាដើម្បីគណបក្ស សង្គ្រោះជាតិយកមកចំណាយ លើការឃោសនាបោះឆ្នោត។ បងប្អូនខ្មែរខ្លះដែលធ្លាប់បានឃើញស្រុកខ្មែរពេលសង្គ្រាមខ្មែរក្រហមនូវតែដក់ក្នុងអារម្មណ៍អំពីកម្ពុជាក្នុងភាពអន់ថយនិងគ្មានការអភិវឌ្ឍតាមរូបភាពសារព័ត៌មានបរទេសបានជឿជាក់លើអ្វីដែលមេបក្សប្រឆាំងនិងមន្ត្រីរបស់ខ្លួន បានភូតភរកុហក លាបពណ៌កម្ពុជាគ្រប់រូបភាពតម្រូវតសមមនោគមន៍វិទ្យារបស់ខ្លួន ហើយក៏បរិច្ចាគថវិកាដែលខ្លួនសន្សំពីទឹកញើសរបស់ខ្លួនមកឱ្យគណបក្ស។

ទី២- មេបក្សប្រឆាំងនិងមន្ត្រីគណបក្សនេះភូតកុហកប្រជាពលរដ្ឋខ្លះដែលចង់បានអំណាចឱ្យបង់ថវិការបស់ខ្លួនចំនួនណាមួយជាមួយការសន្យាឱ្យតំណែងនេះ តំណែងនោះ។ ជាក់ស្តែងនៅសហរដ្ឋអាមេរិក មេបក្សប្រឆាំងបានសន្យាឱ្យតួនាទីជាអភិបាលខេត្ត ឬជាតំណាងរាស្ត្រដល់អ្នក មានលុយមួយចំនួន។ គ្រាន់តែក្នុងស្រុកមួយបក្សនេះបានសន្យាផ្តល់តំណែងជាអភិបាលស្រុកឱ្យមនុស្ស ៤ ទៅ៥នាក់ ខណៈតំណែងអភិបាល ស្រុកមានតែមួយកន្លែង។ ចំណែកអ្នកនៅបរទេស ខ្លះអ្នកលក់នំដូណាត់សោះ តែបែរជាឪពុកទទួលការសន្យាឱ្យឈរឈ្មោះជាតំណាងរាស្ត្រ ចំណែកឯកូនវិញនឹងទទួលបានតំណែងជាអភិបាលខេត្ត។ បងប្អូនប្រជាពលរដ្ឋមួយចំនួននៅសហរដ្ឋអាមេរិក បានលើកឡើងថា បងប្អូនដែលចង់បានតំណែងនេះ ភាគច្រើនមិនសូវទទួលបានការអប់រំខ្ពស់ទេ ហើយអ្នកខ្លះជាង៣០ឆ្នាំហើយមិនដែលទៅប្រទេសកម្ពុជាម្តងផង និងអ្នកខ្លះទៀតអត់ការងារធ្វើទទួលទានប្រាក់សោធននិវត្តន៍ ឬប្រាក់អាហារកិច្ចពេលអត់ការងារធ្វើ។ បើបងប្អូនដែលមានជីវភាពធូរធារ មានការចេះដឹងខ្ពស់ គេមិនទៅក្បែរផង ហើយមេដឹកនាំបក្សប្រឆាំងផ្សេងទៀតក៏មិនអាចបោកគេបានដែរ។ ឥឡូវនេះ បងប្អូននៅក្រៅប្រទេស នឿយណាយនឹងការរៃអង្គាសប្រាក់នេះ ហើយខ្លះគេដឹងរឿងពិត ហើយពិធីជួបជុំនីមួយៗ អ្នកចូលរួមធ្លាក់ជាងពាក់កណ្តាល។

ទី៣- បើដើរសន្យាគ្រប់កន្លែងយកប្រាក់ដូច្នេះ តើអ្នកតស៊ូនៅក្នុងស្រុកបានអ្វី? មន្ត្រីគណបក្សសង្គ្រោះជាតិ ថ្នាក់ឃុំ ថ្នាក់ស្រុក ខេត្តដែលហ៊ានចំណាយធនធានហិរញ្ញវត្ថុផ្ទាល់ខ្លួន លក់គោក្របី ដីធ្លីកេរដំណែលគ្រួសារគឺដើម្បីបានតំណែងជាអភិបាលស្រុក អភិបាលខេត្ត ឧទាហ​រណ៍ថា គណបក្សនេះឈ្នះឆ្នោតគ្រប់គ្រងប្រទេស។ ចុះបើដើរសន្យានៅក្រៅផង និងនៅក្នុងផង តើមានតំណែងឯណាឱ្យទៅ បើតំណែងអភិបាលខេត្តរាជធានីមានតែ ២៥ហ្នឹង? ចឹងវាមិនរំបល់យ៉ហើយទេ? នេះមិននិយាយពីការឃោសនានៅចំពោះមុខសកម្មជនរបស់ខ្លួន សុទ្ធតែផ្តល់តំណែង ជាមន្ត្រីរាជការនៅក្នុងក្រសួងស្ថាប័នរដ្ឋ ដោយចាត់ទុកមន្ត្រីរាជការបច្ចុប្បន្នជាមនុស្សអសមត្ថភាព និងពុករលួយ។ តែដល់ពេលឃោសនាទៅលើមន្ត្រីរាជការ ថាខ្លួននឹងមិនដកមន្ត្រី រាជការឡើយទុកទាំងអស់។ នេះគឺជាការបង្ហាញ ពីការឃោសនាបោកប្រាស យ៉ាងច្បាស់ក្រឡែត។

ទី៤- គិតមើលលុយដែលប្រមូលបានវិញម្តង តើយកទៅណាបើមានការបរិច្ចាគពីក្នុងប្រទេសផង ក្រៅប្រទេសផង? បរិច្ចាគចុះ បរិច្ចាកឡើងទឹកលុយចេញជាចម្ការម្រេច ចម្ការល្ហុង ដីរាប់ហិកតា ឡានទំនើបៗរាប់គ្រឿងសម្រាប់មេដឹកនាំបក្សម្នាក់ៗ ហើយមន្ត្រីជាន់ខ្ពស់របស់ខ្លួន សម្បូរលុយចាយរហូតដល់ចិញ្ចឹមស្រីកំណាន់ ចុះបេសកកម្មទៅណាមកណាសុទ្ធតែមាននារីកំដរទៀត។ តើគួរឱ្យបងប្អូនគាំទ្រគណបក្សបន្តទៀតទេ? បើម្នាក់ៗយកនយោបាយធ្វើជាមុខរបរ យកផលប្រយោជន៍ជាមាសជាប្រាក់ និងជាស្រីកំដរសម្រាប់ខ្លួនដូច្នេះ? ដើរសន្យាគ្រប់សព្វបែបយ៉ាងគ្រាន់តែសន្យានរណាក៏ធ្វើបានដែរតែការពិតធ្វើមិនបាន។

ចុះបើបក្សតម្រូវឱ្យបង់លុយយ៉ាងណានេះ? តើបេក្ខជនទាំងនោះបានលុយមកពីណា? ហើយដើម្បីបានលុយពេលកាន់តំណែង គេត្រូវធ្វើអ្វីដើម្បីបានលុយបង់ជូនបក្ស? ល្មមឈប់បោកប្រាស់ជាតិសាសន៍ឯងហើយ ហើយបងប្អូនប្រជាពលរដ្ឋគួរឈប់ចាញ់បោកអ្នកបោកប្រាស អាជីពទៀតដែរ។ រដូវកាលបោះឆ្នោតជារដូវកាលមុខរបរកាក់កបសម្រាប់អ្នកនយោបាយក្នុងការស្វែងរកលុយកាក់លាភសក្ការៈសម្រាប់ក្រុមខ្លួន៕

ដោយ៖ ចៅ ចាក់ស្មុក

ប្រមុខរដ្ឋស្តីទី លោក សាយ ឈុំ ជួបសំណេះសំណាលជាមួយក្រុមគ្រូពេទ្យ និងនិស្សិតពេទ្យស្ម័គ្រចិត្តក្នុងបរិយាកាសរីករាយ និងស្និទស្នាលបំផុត

នៅថ្ងៃទី០៩ ខែមេសា ឆ្នាំ២០១៧ ក្រុមគ្រូពេទ្យស្ម័គ្រចិត្ត លោក សាយ ឈុំ (ក្នុងនោះមានគ្រូពេទ្យ និងនិស្សិតពេទ្យស្ម័គ្រចំនួនប្រមាណជាង២៧០នាក់) បានចុះជួយពិនិត្យ និងព្យាបាលជម្ងឺជូនប្រជាជនក្នុងឃុំពារាម ស្រុកបាទី ខេត្តតាកែវ បានចំនួន ២ ០៧៩ ករណី ដែលរួមមាន៖ ពិនិត្យព្យាបាលភ្នែកចំនួន ៦០៩ ករណី មាត់-ធ្មេញចំនួន៦៧០ករណី វះកាត់ខ្នាតតូចចំនួន២៤ ករណី ជម្ងឺទូទៅរោគស្រ្តី និងកុមារចំនួន ៧៤១ ករណី អេកូសាស្រ្តចំនួន ៣៥ ករណី និងបានផ្ដល់ឈើច្រត់ ១ គូរផងដែរ។

លោក សាយ ឈុំ បានថ្លែងអំណរសរសើរ និងវាយតម្លៃខ្ពស់ចំពោះក្មួយៗទាំងអស់ ដែលបានឆ្លៀតយកថ្ងៃអាទិត្យជាថ្ងៃឈប់សម្រាកចុះទៅពិនិត្យ និងព្យាបាលជម្ងឺជូនប្រជាជនយើងនៅមូលដ្ឋានដោយស្មារតីគោរព ស្រលាញ់ និងបម្រើប្រជាជនដោយពិតៗ។ លោក ក៏បានសម្តែងសេចក្ដីរំភើបណាស់ចំពោះទឹកចិត្តស្នេហាជាតិ និងស្រលាញ់ប្រជាជនឥតត្រើយត្រាណរបស់ក្មួយៗទាំងអស់។

លោក សាយ ឈុំ ក៏បានបញ្ជាក់ថា ក្មួយៗជាទំពាំងស្នងប្ញស្សី ជាអ្នកបន្តវេន កសាងអភិវឌ្ឍ និងការពារប្រទេសទៅអនាគត។ សូមក្មួយៗទាំងអស់ថែរក្សានូវប្រពៃណីដ៏ល្អផូរផង់នេះ និងបន្តសកម្មភាពដ៏ថ្លៃថ្លានេះ ពោលគឺការពារប្រទេសឱ្យបានរឹងមាំ គង់វង្ស និងអភិវឌ្ឍប្រទេសប្រកបដោយចីរភាព និងនិរន្តរភាពដែលជាសំណូមពរដ៏ពិសិដ្ឋរបស់ប្រជាជនយើង៕