លោកនាយករដ្ឋមន្រ្តី ហ៊ុន សែន ផ្តល់អនុសាសន៍ចំនួន៨ចំណុចសម្រាប់អាជ្ញាធរពាក់ព័ន្ធអនុវត្តន៍ដើម្បីធានាដល់ការគាំពារនិងលើកកម្ពស់សិទ្ធិជនមានពិការភាពឱ្យកាន់តែប្រសើរថែមទៀត

 តាមរយៈសារលិខិតអបអរសាសទរទិវាជនមានពិការភាពកម្ពុជាលើកទី២២ និងទិវាជនមានពិការភាពអន្តរជាតិលើកទី៣៨ លោកនាយករដ្ឋមន្រ្តី ហ៊ុន សែន បានផ្តល់អនុសាសន៍ចំនួន៨ចំណុច សម្រាប់អាជ្ញាធរពាក់ព័ន្ធអនុវត្តន៍ដើម្បីធានាដល់ការគាំពារនិងលើកកម្ពស់សិទ្ធិជនមានពិការភាពឱ្យកាន់តែប្រសើរថែមទៀត។

អនុសាសន៍ទាំង៨ចំណុចនោះរួមមាន៖
ទី១៖ គ្រប់ក្រសួង ស្ថាប័ន ព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់ត្រូវយកផែនការយុទ្ធសាស្ត្រជាតិស្តីពី ពិការភាព ២០១៩-២០២៣ ទៅអនុវត្តប្រកបដោយប្រសិទ្ធភាព និងស័ក្តិសិទ្ធភាព ដោយរៀបចំផែនការសកម្មភាព និងកញ្ចប់ថវិកាប្រចាំឆ្នាំតាមវិស័យរបស់ក្រសួង ស្ថាប័ន អង្គភាពនីមួយៗ។

ទី២៖ គ្រប់ក្រសួង ស្ថាប័ន ព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់ត្រូវបន្តផ្សព្វផ្សាយវិធានការទប់ស្កាត់ការរាតត្បាតនៃជំងឺកូវីដ-១៩ តាមការណែនាំរបស់ក្រសួងសុខាភិបាល ហើយផ្តល់គ្រប់លទ្ធភាពធ្វើយ៉ាងណាឱ្យជនមានពិការភាពទទួលបានសម្ភារៈ ព័ត៌មានស្តីពីការបង្ការ និងការពារជំងឺកូវីដ-១៩។

ទី៣៖ សូមបងប្អូនមានពិការភាពទាំងអស់ រក្សាវិធានសុខាភិបាលដោយត្រូវរក្សាគម្លាតសុវត្ថិភាព ពាក់ម៉ាសលាងដៃនឹងទឹកអាល់កុល សាប៊ូ ឬដែលឱ្យបានខ្ជាប់ខ្លួននៅតាមទីកន្លែងសាធារណៈនានា និងនៅតាមសហគមន៍។

ទី៤៖ គ្រប់ក្រសួង ស្ថាប័នរដ្ឋ ត្រូវលើកទឹកចិត្តជនមានពិការភាពដែលមានលក្ខណសម្បត្តិ និងសមត្ថភាពឱ្យ បំពេញមុខងារតួនាទីទទួលខុសត្រូវ ក្នុងមុខតំណែងឱ្យមានសិទ្ធិចូលបម្រើការងារដោយគ្មានការរើសអើង រាប់ទាំងការបម្រើការងារជាមន្ត្រីរាជការ កម្មករ និយោជិត កូនជាង ឬកម្មសិក្សាការីជាដើម។
ទី៥៖ ត្រូវលើកទឹកចិត្តឱ្យមានការចូលរួមពីផ្នែកឯកជន សង្គមស៊ីវិល រោងចក្រ សហគ្រាស និងគ្រឹះស្ថានទាំងអស់ត្រូវអនុវត្តប្រកប ដោយការទទួលខុសត្រូវ និងដោយភ្ញាក់រលឹកនូវកាតព្វកិច្ចជ្រើសរើសជនមានពិការភាពឱ្យចូលបម្រើការងារ បន្តនិរន្តរភាពការងារ ដូចអ្នកដទៃ ដែលមានចែងក្នុងច្បាប់ស្តីពី កិច្ចការពារនិងលើកកម្ពស់សិទ្ធិជនពិការ។

ទី៦៖ ក្រុមប្រឹក្សាសកម្មភាពជនពិការ ត្រូវជំរុញការអនុវត្តផែនការយុទ្ធសាស្ត្រជាតិស្តីពីពិការភាព ២០១៩-២០២៣ ច្បាប់ស្តីពី កិច្ចការពារនិងលើកកម្ពស់សិទ្ធិជនពិការ អនុវត្តអនុសញ្ញាស្តីពី សិទ្ធិជនពិការនិងគោលនយោបាយជាតិនានាដើម្បីជាឧត្តមប្រយោជន៍សុខុមាលភាពដល់បងប្អូនមានពិការភាពគ្រប់ប្រភេទ និងគ្រប់កម្រិត។

ទី៧៖ ត្រូវបន្តរៀបចំការបង្កលក្ខណៈងាយស្រួលចេញចូលទីកន្លែងសាធារណៈសម្រាប់ជនមានពិការភាពគ្រប់ប្រភេទដូចជា ការរៀបចំចំណតយានយន្តពិសេសសម្រាប់ជនមានពិការភាព, ការធ្វើជម្រាល, ការបំពាក់ឧបករណ៍ធ្នាក់ដៃ ទ្វារ, បន្ទប់ទឹកជនមានពិការភាព, ការដាក់ស្លាកសញ្ញានានានៅតាមក្រសួង ស្ថាប័ន មន្ទីរ ផ្លូវថ្នល់ ទីកន្លែងលំហែកាយ មជ្ឈមណ្ឌលវប្បធម៌ កន្លែងលេងកីឡា កន្លែងកម្សាន្ត គ្រឹះស្ថានអប់រំ សណ្ឋាគារ មន្ទីរពេទ្យ មណ្ឌលសុខភាព និងមធ្យោបាយដឹកជញ្ជូន។ល។

ទី៨៖ ក្រសួងព័ត៌មាន ត្រូវធ្វើការណែនាំដល់គ្រប់ស្ថានីយវិទ្យុ និងទូរទស្សន៍របស់រដ្ឋនិងឯកជន ព្រមទាំងគ្រប់ប្រព័ន្ធសារព័ត៌មាន បង្កើនម៉ោងផ្សព្វផ្សាយឱ្យបានទូលំទូលាយដោយមានការបកប្រែភាសាសញ្ញា ជាពិសេសព័ត៌មានស្តីពី ការរាតត្បាត និងវិធីសាស្រ្តការពារជំងឺកូវីដ-១៩ ដើម្បីមនុស្សគថ្លង់អាចទទួលព័ត៌មានបានទាន់ពេលវេលា៕

លោក ចាន់ ដារ៉ុង នាំយកសម្ភារ និងបរិក្ខារសម្រាប់ទប់ស្កាត់ការឆ្លងរីករាលដាលជំងឺ COVID-19 ផ្តល់ដល់សាលាចំនួន០២គឺ វិទ្យាល័យមិត្តភាពខ្មែរ ជប៉ុន និងអនុវិទ្យាល័យខ្នាឆ្មារ

 កំពង់ឆ្នាំង៖ នៅព្រឹកថ្ងៃទី០៣ ខែធ្នូ ឆ្នាំ២០២០ លោក ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមានជ័យ រួមជាមួយសហការី ក្រុមប្រឹក្សាឃុំខ្នាឆ្មារ និងឃុំធ្លកវៀន បាននាំយកសម្ភារ និងបរិក្ខារសម្រាប់ទប់ស្កាត់ការឆ្លងរីករាលដាលជំងឺ COVID-19 ផ្តល់ដល់វិទ្យាល័យ និងអនុវិទ្យាល័យ ចំនួន០២ ក្នុងស្រុកសាមគ្គីមានជ័យ គឺវិទ្យាល័យមិត្តភាពខ្មែរ ជប៉ុន និងអនុវិទ្យាល័យ​ខ្នាឆ្មារ។ សម្ភារ និងបរិក្ខារដែលបាននាំយកទៅផ្តល់ជូនរួមមាន៖ ១. ម៉ាស់ចំនួន ៤ ០០០ ម៉ាស់, ២. ទឹកអាល់កុលសម្រាប់លាងដៃចំនួន៩០លីត្រ, ៣. ទឹកសាប៊ូសម្រាប់លាងដៃសម្លាប់មេរោគចំនួន ២៤ ដប, ៤. ទែរម៉ូម៉ែត្រសម្រាប់វាស់កម្តៅចំនួន ៣ ដើម និង ៥. ដបសម្រាប់ច្រកទឹកអាល់កុលចំនួន១៩ ដប។

ក្នុងនោះដោយសាលាទាំងពីរទទួលបានសម្ភារ និងបរិក្ខាររួមមាន៖
១. វិទ្យាល័យមិត្តភាពខ្មែរ ជប៉ុន សាមគ្គីមានជ័យ នៅឃុំធ្លកវៀន ទទួលបាន៖ ទឹកអាល់កុលចំនួន ៦០លីត្រ ម៉ាស់ចំនួន ៣ ០០០ ម៉ាស់ ទឹកសាប៊ូសម្រាប់លាងដៃសម្លាប់មេរោគចំនួន ១៤ដប ទ័រម៉ូម៉ែត្រវាស់កម្តៅចំនួន ២ដើម និងដបសម្រាប់ច្រកទឹកអាល់កុលចំនួន ១០ដប។
២. អនុវិទ្យាល័យខ្នាឆ្មារ ទទួលបាន៖ ទឹកអាល់កុលចំនួន ៣០លីត្រ ម៉ាស់ចំនួន ១ ០០០ម៉ាស់ ទឹកសាប៊ូសម្រាប់លាងដៃសម្លាប់មេរោគចំនួន ១០ដប ទ័រម៉ូម៉ែត្រវាស់កម្តៅចំនួន ១ដើម និងដបសម្រាប់ច្រកទឹកអាល់កុល ចំនួន ៩ ដប៕

ក្រសួងការងារ ចេញប្រកាសស្តីពីការឈប់សម្រាកបុណ្យដែលមានប្រាក់ឈ្នួលប្រចាំឆ្នាំ២០២១

 នៅថ្ងៃទី៣ ខែធ្នូ ឆ្នាំ២០២០ ក្រសួងការងារ និងបណ្តុះបណ្តាលវិជ្ជាជីវ៖ បានចេញប្រកាសស្តីពីការឈប់សម្រាកបុណ្យដែលមានប្រាក់ឈ្នួលប្រចាំឆ្នាំ២០២១ ដែលបានអនុញ្ញាតឱ្យកម្មករ និយោជិតនៃរោងចក្រ សហគ្រាសទាំងអស់ ដែលមានចែងក្នុងមាត្រា១នៃច្បាប់ស្តីពីការងារ បានឈប់សម្រាកពីការងារដោយមានប្រាក់ឈ្នួលទៅតាមប្រតិទិន។

សូមអានប្រកាសរបស់ក្រសួងការងារដូចខាងក្រោម៖

លោក គួច ចំរើន អញ្ជើញចុះត្រួតពិនិត្យអាគារសំរាប់ធ្វើចត្តាឡីស័កទាំង ៣ទីតាំង ដែលស្ថិតនៅសង្កាត់លេខ៣ ក្រុងព្រះសីហនុ

ព្រះសីហនុ៖ នៅព្រឹកថ្ងៃទី៣ ខែធ្នូ ឆ្នាំ២០២០ លោក គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញចុះត្រួតពិនិត្យអាគារសំរាប់ធ្វើចត្តាឡីស័កទាំង ៣ទីតាំង ដែលស្ថិតនៅសង្កាត់លេខ៣ ក្រុងព្រះសីហនុ អមដំណើរដោយលោកឧត្តមសេនីយ៍ទោស្នងការនគរបាលខេត្តព្រះសីហនុ លោកស្រីប្រធានមន្ទីរសុខាភិបាល និងនាយិកាទីចាត់ការហិរញ្ញវត្ថុសាលាខេត្ត។

បន្ទាប់ពីចុះពិនិត្យមើលទីតាំងអាគារសំរាប់ធ្វើចត្តាឡីស័ករួចមក លោកអភិបាលខេត្ត បានបន្តទៅពិនិត្យការសាងសង់សំណង់អាគារមន្ទីរពិសោធន៍វេជ្ជសាស្ត្រ មានទីតាំងស្ថិតនៅក្នុងមន្ទីរពេទ្យបង្អែកខេត្តព្រះសីហនុ ដែលជា អំណោយដ៏ថ្លៃថ្លារបស់លោក ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ផ្តល់ដល់មន្ទីរពេទ្យបង្អែកខេត្ត សំរាប់បំរើដល់ភាពចាំបាច់របស់ប្រជាពលរដ្ឋ។ មន្ទីរពិសោធន៍វេជ្ជសាស្ត្រនេះ គឺបំពាក់ដោយម៉ាស៊ីនវិភាគ និងបរិក្ខារទំនើបៗ ដើម្បីជួយសម្រួលក្នុងការពិនិត្យ វិភាគជំងឺឆ្លងទូទៅ ពិសេសជំងឺឆ្លងដូចជាជំងឺកូវីដ-១៩ ជាដើម៕

រដ្ឋបាលខេត្តស្វាយរៀងរៀបចំត្រៀមកន្លែងចត្តាឡីស័ក៥កន្លែងសម្រាប់ទទួលបងប្អូនដែលជាប់ពាក់ព័ន្ធព្រឹត្តិការណ៍ ២៨ វិច្ឆិកា ២០២០

ស្វាយរៀង៖ អនុវត្តតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាលដើម្បីការពារ ទប់ស្កាត់ ប្រយុទ្ធប្រឆាំងនឹងការរីករាលដាលនៃជំងឺកូវីដ-១៩ ចំពោះបងប្អូនដែលពាក់ព័ន្ធនឹងព្រឹត្តិការណ៍ថ្ងៃទី២៨ វិច្ឆិកា ២០២០ ក្នុងរដ្ឋបាលខេត្តស្វាយរៀង ដឹកនាំដោយលោក ម៉ែន វិបុល អភិបាលនៃគណៈអភិបាលខេត្តស្វាយរៀង និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ខេត្ត បានរៀបចំមណ្ឌលចត្តាឡីស័កចំនួន ៥កន្លែងរួមមាន៖ មណ្ឌលចត្តាឡីស័កថ្នាក់ខេត្តស្រុករមាសហែក (ការិយាល័យកសិកម្មស្រុក) មណ្ឌលចត្តាឡីស័កថ្នាក់ខេត្តស្រុកស្វាយជ្រំ (ការិយាល័យកសិកម្មស្រុក) មណ្ឌលចត្តាឡីស័កក្រុងបាវិត (សណ្ឋាគារ អ៊ឹម ម៊ីហៀង) មណ្ឌលចត្តាឡីស័កក្រុងស្រុកស្វាយរៀង (ផ្ទះសំណាក់គ្រូបង្រៀន) និងមណ្ឌលចត្តាឡីស័កស្រុកកំពង់រោទិ៍(សាលាបឋមសិក្សាព្រៃស្ទៀង)។

សម្រាប់បងប្អូនដែលចង់ពិគ្រោះយោបល់ និងមានការសង្ស័យ ចង់ធ្វើតេស្តសំណាក សូមទំនាក់ទំនងតាមទីតាំងដូចខាងក្រោម៖
១. ក្រុងស្វាយរៀង នៅមន្ទីរពេទ្យបង្អែកស្វាយរៀង 012 953 975/088 477 7765
២. ស្រុកស្វាយជ្រំ នៅមន្ទីរពេទ្យបង្អែកស្វាយជ្រំ 077 929 213/088 732 4346
៣. ស្រុករមាសហែក នៅមន្ទីរពេទ្យបង្អែករមាសហែក 012 308 561
៤. ក្រុងបាវិត និងស្រុកចន្ទ្រា នៅមណ្ឌលសុខភាពបាវិត ឬមណ្ឌលសុខភាពមេសថ្ងក 012 977 561/089 937 846
៥. ស្រុកស្វាយទាប ស្រុកកំពង់រោទិ៍ និងស្រុករំដួល នៅមន្ទីរពេទ្យបង្អែកស្វាយទាប ឬមន្ទីរពេទ្យបង្អែកសាមគ្គីរំដួល 097 335 3392 /097 861 9991៕

ព្រះរាជសារ ព្រះករុណាព្រះបាទសម្ដេចព្រះបរមនាថ នរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសទិវាជនមានពិការភាពកម្ពុជាលើកទី ២២ និងអន្តរជាតិលើកទី ៣៨ ថ្ងៃទី ៣ ខែធ្នូ ឆ្នាំ ២០២០