Friday, April 03, 2015

លិខិតជូនពររបស់សម្តេចអគ្គមហាញាចក្រី ហេង សំរិន ប្រធានរដ្ឋសភា ជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាក្នុងឱកាសប្រារព្ធខួបកំណើតគម្រប់ ៦៤ ឈានចូល ៦៥ឆ្នាំ


កម្ពុជាចែករំលែកបទពិសោធន៏ការអភិរក្សនិងអភិវឌ្ឍន៏រមណីយដ្ឋានបេតិកភណ្ឌពិភពលោកអង្គរដល់អនុប្រធានាធិបតីមីយ៉ាន់ម៉ា

ឯកឧត្តមបណ្ឌិត​សភាចារ្យ ​សុខ​ អាន ​បាន​ចែក​រំលែកបទ​ពិសោធន៏​នៃ​ភាពជោគ​ជ័យទាំង​ឡាយ​ដែល​កម្ពុជា​មាន ពាក់ពន្ធ័​នឹងការងារ​អភិរក្ស​ និងអភិវឌ្ឍន៏​រមណីយ​ដ្ឋាន​បេតិកភណ្ឌពិភព​លោក​តំបន់​ប្រាសាទ​អង្គរឲ្យ​ដល់​មីយ៉ាន់ម៉ា។
ឯកឧត្តម​បណ្ឌិត​សភាចារ្យ​ សុខ​  អាន  ​ឧបនាយក​រដ្ឋមន្ត្រី​រដ្ឋមន្ត្រី​ទទួលបន្ទុក​ទីស្តីការ​គណរដ្ឋមន្ត្រី​នៅ​ក្នុងជំនួប​ទ្វេភា​គី​ជាមួយ​ឯកឧត្តម​ ញ៉ាន​ ធុន​ (U NYAN TUN) ​អនុប្រធានា​ធិបតី​សហភាព​មីយ៉ាន់ម៉ា ​នៅ​មជ្ឈមណ្ឌល​អាជ្ញាធរជាតិ​អប្សរា​ខេត្តសៀមរាប​ នាល្ងាច​ថ្ងៃទី២​  ខែមេសា ​ឆ្នាំ​២០១៥នេះ​ បានធ្វើ​បទ​បង្ហាញ​​និងចែក​រំលែកបទ​ពិសោធន៏​ដែល​កម្ពុជា​មាន​ ពាក់ពន្ធ័​នឹង​ការងារ​អភិរក្ស​ និង​អភិវឌ្ឍន៏​រមនីយ​ដ្ឋាន​បេតិកភណ្ឌ​ពិភព​លោកអង្គរ​  រួមទាំង​ផែនការ​សកម្មភាព​នានា ​ដើម្បី​ធ្វើឲ្យ​កិច្ចការ​នេះ​ទទួលបាន​លទ្ធផល​ជោគជ័យ​ ជូនដល់​ប្រទេស​មីយ៉ាន់ម៉ា ​ដើម្បី​បានស្វែង​យល់​ និងនាំយក​បទ​ពិសោធន៍​ពីកម្ពុជា​ទៅ​អនុវត្ត​តាម។
ឯកឧត្តម​ឧបនាយក​រដ្ឋមន្ត្រី​សុខ​ អាន​ មាន​ប្រសាសន៏​ថា​ មាន​ករណី​ជាច្រើន​ដែលនាំ​មកនូវ​ជោគ​ជ័យ​លើកិច្ចការ​អភិរក្ស​ និង​អភិវឌ្ឍន៏​បេតិកភណ្ឌ​វប្បធម៌​ពិភពលោក​អង្គរនេះ ​  ដោយ​ឯកឧត្តម​បាន​ជំរាប​ជូន​អំពី​បទពិសោធន៏​វិស័យ​ការ​ទូត​ខាងផ្នែក​វប្បធម៌ ​ ដែល​ឯកឧត្តម ធ្លាប់​ធ្វើជា​ប្រធានគណៈ​កម្មាធិការ​បេតិកភណ្ឌ​កន្លងមក​ គឺបញ្ហាដែល​ឯកឧត្តម យក​ចិត្ត​ទុក​ដាក់មុន​គេនោះ​ គឺ​​ការប្រ​មូលផ្តុំ​ធនធាន​មនុស្ស ​និង​​​ធនធាន​ហិរញ្ញវត្ថុ​ពីសហគមន៏​អន្តរជាតិ​ តាមរយៈ​គណៈ​កម្មាធិការ​ ICC​ អង្គរ ។
គួរបញ្ជាក់ថា​ ចាប់តាំង​ពីគណៈ​កម្មាធិការ​ICCអង្គរ​ បានបង្កើត​ឡើងនៅ​ឆ្នាំ១៩៩៣​រហូតមក​  កម្ពុជា​ ទទួល​​បាន​ជំនួយ​យកមក​អនុវត្ត​គម្រោង​អភិរក្ស ​ជួសជុល ​និង​ការងារ​អភិវឌ្ឍន៏​នៅក្នុង​តំបន់​អង្គរ​នេះ​មានទឹក​ប្រាក់​ប្រ​មាណ​ជាង​៥រយលាន​ដុល្លារ​សហរដ្ឋ​អាមេរិក​មករួច​មក​ហើយ។
ឯកឧត្តម​ឧបនាយក​រដ្ឋមន្ត្រី ​ក៏បាន​ជំរាប​ជូនផង​ដែរ​អំពី​ផែនការ​គ្រប់គ្រង​ទេសចរណ៏​ដែល​ស្ថិតក្នុង​ក្រប​ខណ្ឌ​ផែន​ការ​គ្រប់គ្រង​បេតិកភណ្ឌ ​ ដោយសារ​តែពី​មួយឆ្នាំ​ទៅមួយឆ្នាំ ​កម្ពុជា​ទទួលបាន​កំណើន​ទេស​ចរណ៏​កាន់តែច្រើន  ​ហើយ​ការ កើន​ឡើងនៃភ្ញៀវទេសចរ វាក៏នឹងនាំបញ្ហាយ៉ាងច្រើនដែរ ដែល​ចាំបាច់​​ទាមទា​ឲ្យយើង​មាន​ផែនការ​ច្បាស់​លាស់​ក្នុងការ​គ្រប់គ្រង​ ដើម្បី​បញ្ចៀស​បញ្ហា​ដែលអាច​កើតមាន​ដែល​បង្ករនូវ​ផល​ប៉ះពាល់​ទាំងផលប់ះ​ពាល់ផ្នែក​បេតិ​ក​ភណ្ឌ​ ផ្នែកសង្គម ​ និង​ផ្នែក​វប្បធម៌​ គឺខិតខំ​ធ្វើ​យ៉ាង​ណា​​កាត់បន្ថយ​ផលប៉ះពាល់​ទាំង​នោះឲ្យបាន​ច្រើនបំផុត។
ឯកឧត្តម ​ក៏បានពន្យល់​អំពីនិ​តិវិធី​ទាក់ទង​នឹង​ការស្នើ​សុំដាក់​បញ្ចូល​ប្រាសាទ​អង្គរជា​សម្បត្តិ​បេតិក ភណ្ឌ​ពិភពលោក ​និង​លក្ខខ័ណ្ឌ​ក្នុងការចុះបញ្ជី​  គម្រោងរៀបចំ​ផែនការ​អភិរក្ស និង​អភិវឌ្ឍន៏ត្រូវ​រៀបចំ​របៀប​ណាខ្លះ​នោះ?​ កម្ពុជា​ក៏នឹង​ស្វាគមន៏​ផងដែរ​ចំពោះមន្ត្រី​ជំនាញ​ខាងផ្នែក​បេតិកភណ្ឌ ​ក៏ដូចជា​មន្ត្រី​ការទូត​មីយ៉ាន់ម៉ា​  ក្នុងការ​មកចូល​រួមធ្វើជា​អ្នកសង្កេត​ការណ៏ ​នៅក្នុងគណៈ​កម្មាធិការ ICC​អង្គរនេះ ​ដើម្បី​បាន​រៀន​សូត្រ​ពីការងារ​ផង និង​ទទួល​បានបទ​ពិសោធន៏ផង​។
ជាមួយ​គ្នានេះ​ ឯកឧត្តម​ក៏អញ្ជើញ​និស្សិត  ឬ​អ្នក​ជំនាញ​ការរបស់​មីយ៉ាន់​ម៉ាមក​កាន់កម្ពុជា​ ដើម្បី​ជួយ​បណ្តុះ​បណ្តាល​អំពីការងារ​ពាក់ពន្ធ័​នឹង​ការអភិរក្ស ​និង​អភិវឌ្ឍ​​សម្បត្តិ​បេតិកភណ្ឌ​ពិភពលោកនេះ​ ពី​ព្រោះ​​អាជ្ញាធរជាតិ​អប្សរា  មានការ​រៀបចំ​កម្មវិធី​បណ្តុះ​បណ្តាល​ជា​បន្តបន្ទាប់​ស្តីពីបេតិក ភណ្ឌការ​គ្រប់​គ្រង​  និងទេស​ចរណ៏។
បន្ទាប់ពី​បានស្តាប់ការ​ពន្យល់ ​និងទទួល​បានការយល់​ដឹងអំពី​បទពិសោធន៏​ដែលផ្តល់​ដោយ​ឯកឧត្តម​ឧបនាយក​រដ្ឋមន្ត្រី ​សុខ​ អាន​ រួចមក​ឯកឧត្តម​ ញ៉ាន​ ធុន​ អនុប្រធានា​ធិប​តីសហភាព​មីយ៉ាន់ម៉ា ​បានកោត​សរសើរ​ពីភាពប៉ិន​ប្រសព្វ​របស់កម្ពុជា ​លើការ​អភិរក្ស​ និងអភិវឌ្ឍន៏​សម្បត្តិវប្បធម៌​ពិភពលោក​នេះ  ។
​ឯកឧត្តម បាន​មាន​ប្រសាសន៍​ថានឹងរៀន​សូត្រ​ពីកម្ពុជា​ ដើម្បីយកបទ​ពិសោធន៏​ទាំង​នេះទៅអនុវត្តន៏​នៅ​ប្រទេស​មីយ៉ានម៉ា​ឲ្យបានជោគជ័យ​តាមការ​រំពឹងទុក។

គួរបញ្ជាក់ថា​ ប្រទេស​មីយ៉ាន់ម៉ា​ ក៏គ្រោងនឹង​ស្នើដាក់​បញ្ចូល​រមណីយ​ដ្ឋាន​សំខាន់ៗ​ចំនួន២​ ចូលក្នុង​បញ្ជី​សម្បត្តិ​បេតិ​កភណ្ឌ​វប្បធម៌​ពិភពលោក​នៅក្នុង​ពេលឆាប់ៗ​នេះ​  ទើបនៅ​ក្នុងដំណើរ​មកបំពេញ​ទស្ស​ន​​​​កិច្ច​​សុឆន្ទៈ​របស់​គណៈ​ប្រតិភូជាន់​ខ្ពស់មីយ៉ាន់​ម៉ា  មកកាន់​ព្រះ​រាជា​ណាចក្រ​កម្ពុជា​រយៈពេល​៣ថ្ងៃនេះ ​គណៈប្រតិ​ភូបានសុំ​ស្វែង​យល់​ច្រើនពីកម្ពុជា​ទាំងលើ​ការអភិវឌ្ឍ​ប្រទេសជាតិ ក៏ដូច​លើ​ការងារ​វប្បធម៌៕

កម្ពុជា-មីយ៉ាន់ម៉ា សន្យារឹតបន្តឹង ចំណងមិត្តភាពការទូត រវាងប្រទេសទាំងពីរ ឱ្យរឹងមាំ

ព្រះ​រាជា​ណា​ចក្រកម្ពុជា និង​សហភាព​មីយ៉ាន់ម៉ា​ បានសន្យា​រឹតបន្តឹង​ចំណង​ មិត្តភាពការ ទូតរវាង​ប្រទេស​ទាំងពីរ​ ឱ្យកាន់​តែ​ខ្លាំងក្លា​ថែមទៀត​ ខណៈ​ដែលឆ្នាំនេះ ​ចំណងការ​ទូតរវាង​កម្ពុជា​ និង​មីយ៉ាន់ម៉ា ​មានរយៈ​ពេល៦០ឆ្នាំ​ហើយ​នោះ។

ការសន្យា​នឹង​រឹត​បន្តឹងចំណង​ការទូតបន្ថែម​ទៀត​នេះ បានធ្វើឡើង​ នៅខណៈពេល​ដែល អនុ​ប្រធា​នាធិបតី​ មីយ៉ាន់ម៉ា​ ឯកឧត្តម​ ញ៉ាន​ ធុន ​បានជួបសម្តែងការ​គួរសមជាមួយ ​សម្តេច​តេជោ ហ៊ុន​ សែន​ នាយករដ្ឋមន្រ្តី​កម្ពុជា នៅទី​ស្តី​ការគណៈរដ្ឋមន្រ្តី វិមាន​សន្តិភាព​​ នាព្រឹកថ្ងៃ​ទី២ ខែ​មេសា ​ឆ្នាំ២០១៥នេះ។

ឯកឧត្តម​ អ៊ាង សុផល្លែត ​ជំនួយការ​ផ្ទាល់សម្តេច​នាយករដ្ឋមន្រ្តី ហ៊ុន សែន បានថ្លែង ប្រាប់​ក្រុម​អ្នកសារ​ព័ត៌មាន​ថា​ ទស្សន​កិច្ច​របស់​ ឯកឧត្តម​ ញ៉ាន​ ធុន (U Nyan Tun )​ បាន​ធ្វើ​ឡើង ដើម្បី​ពង្រឹងពង្រីក​ទំនាក់​ទំនង​ល្អរវាងប្រទេស​ទាំងពីរ ​និងសហភាព​មី​យ៉ាន់​ម៉ា​សុំរៀនសូត្រ​ពីកម្ពុជា​ ពីការ​អភិវឌ្ឍន៍​យ៉ាង​ឆាប់រហ័ស​ ។​ ឯកឧត្តម​ អ៊ាង​ សុផល្លែត ​បនា​បន្ត​ថា ថ្នាក់ដឹកនាំ នៃ​ប្រទេស​ទាំងពីរ​ បានសន្យា​រឹតបន្តឹង​ចំណង​ការទូតរ​វាងប្រទេស​ទាំងពីរ ឱ្យកាន់​តែរឹង​មាំថែម​ទៀត ។


តាម​ការជូន​ព័ត៌មាន ​នៅ​ថ្ងៃទី​២ ខែ​មេសា ឆ្នាំ​២០១៥នេះ​ដែរ នៅ​ទឹក​ដី​អង្គរ ក្នុង​ខេត្ត​សៀម​រាប ឯកឧត្តម​បណ្ឌិត​សភា​ចារ្យ​ សុខ អាន នឹង​ធ្វើ​បទ​បង្ហាញ​ស្តី​ពី​បទ​ពិសោធន៍ក្នុង​ការ​គ្រប់​គ្រង និង​អភិរក្សរមណីយដ្ឋានអង្គរ ជូនឯកឧត្តម​ Nyan Tun អនុប្រធានាធិបតី​សហភាព​មី​យ៉ាន់​ម៉ា ខណៈដែល​អនុប្រធានាធិបតី​រូប​នេះ មក​បំ​ពេញ​ទស្សនកិច្ច​សុឆន្ទៈ ​នៅ​ព្រះ​រាជាណា​ចក្រក​ម្ពុជា​រយៈពេល​៣ថ្ងៃ​ តប​តាម​ការអញ្ជើញ​របស់​សម្តេច​អគ្គមហាសេនាបតី​តេជោ ហ៊ុន សែន  ចាប់​ពី​ថ្ងៃ​ទី០១ ដល់​ថ្ងៃ​ទី​៣ ខែ​មេសា ឆ្នាំ​២០១៥ បន្ថែម​លើ​ការ​ពង្រឹង​នូវ​ចំ​ណង​មិត្ត​ភាព​ និង​កិច្ច​សហ​​ប្រតិ​បត្តិការលើ​គ្រប់​វិស័យ​រវាង​ប្រទេស​ទាំង​ពីរ​៕