ខ្មែរតែមួយ - Khmer Unity: 08/19/15

Wednesday, August 19, 2015

រដ្ឋមន្រ្តីក្រសួងអប់រំ បង្ហាញលក្ខខណ្ឌចំនួន៥ ដែលនាំឲ្យអ្នកប្រឡងបាក់ឌុប ធ្លាក់ដោយស្វ័យប្រវត្តិ

ការឈានចូលមកដល់ នៃការប្រឡងមធ្យមសិក្សាទុតិយភូមិ ហៅថាបាក់ឌុប នៅថ្ងៃច័ន្ទសប្តាហ៍ក្រោយនេះ រដ្ឋមន្រ្តីក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានបង្ហាញជំហរយ៉ាងម៉ឺងម៉ាត់ និងតឹងរ៉ឹងបំផុត មិនមានការបន្ធូរបន្ថយអាណិតអាសូរណាមួយសម្រាប់បេក្ខជនឡើយ ពោលពួកគេនឹងធ្លាក់ដោយស្វ័យប្រវត្តិ ប្រសិនបើធ្វើខុសទៅនឹងលក្ខខណ្ឌទាំង៥ ដែលក្រសួងបានដាក់ចេញ។

តាមរយៈវីដេអូបង្ហោះលើទំព័រ Facebook នៅថ្ងៃទី១៩ ខែសីហា ឆ្នាំ២០១៥ ជាសារផ្ញើរទៅកាន់បេក្ខជនប្រឡងជិត ៩ម៉ឺននាក់នៅឆ្នាំ២០១៥នេះ ឯកឧត្តម ហង់ ជូនណារ៉ុន បានបញ្ជាក់ថា លក្ខខណ្ឌទាំង ៥ចំណុច ដែលនាំឲ្យធ្លាក់ដោយស្វ័យប្រវត្តិនោះរួមមាន៖ ១. លួចយកសៀវភៅ សំណៅឯកសារ លូចចម្លង ប្រើទូរស័ព្ទ និងឧបករណ៍អេឡិចត្រូនិកផ្សេងៗនៅក្នុងមណ្ឌលប្រឡង។ ២. ការពិនិត្យឃើញថា សន្លឹកកិច្ច

ការរបស់បេក្ខជនអង្គុយជិតគ្នា មានខ្លឹមសារដូចគ្នា រកឃើញថាលួចចម្លងគ្នា ឬសន្លឹក កិច្ចការមានខ្លឹមសារដូចគ្នាទាំងស្រុងទៅនឹងសំណៅឯកសារ ដែលសរសេរទុកមុន ឬដូចទៅនឹងឯកសារបង្ហោះតាមហ្វេសប៊ុកជាដើម។ ៣. ផ្តល់សន្លឹកកិច្ចការទៅមិត្តភក្តិចម្លង បោះឯកសារទៅក្រៅបន្ទប់ប្រឡង ធ្វើជាមេខ្លោងប្រមូលលុយឲ្យគ្រូ។ (ចំណុចនេះ មិនត្រឹមតែឲ្យធ្លាក់ដោយស្វ័យប្រវត្តិនោះទេ ថែមទាំងមិនអនុញ្ញាតឲ្យប្រឡងនៅឆ្នាំបន្ទាប់ថែមទៀត)។ ៤. យកអាវុធជាតិផ្ទុះចូលក្នុងបន្ទប់ប្រឡង ឲ្យអ្នកដទៃប្រឡងជំនួស ឬ ធ្វើឲ្យខូចខាតឧបករណ៍ សម្ភារៈក្នុងបន្ទប់ប្រឡង។ (ចំណុចនេះ ឲ្យធ្លាក់ដោយស្វ័យប្រវត្តិ ហើយមិនអនុញ្ញាតឲ្យប្រឡងរយៈពេលពីរឆ្នាំបន្តបន្ទាប់គ្នា)។ ៥. ធ្វើឲ្យខូចសណ្តាប់ធ្នាប់របៀបរៀបរយ ឬធ្វើជាក្លិបរៀបចំចម្លើយ និងបង្ករបួសស្នាមទៅលើមន្រ្តីអនុរក្ស។ (ចំណុចនេះធ្លាក់ដោយស្វ័យប្រវត្តិ ហើយត្រូវប្រឈមមុខនិងច្បាប់)។

ចំពោះលក្ខខណ្ឌទាំងនេះមិនមែនដាក់រឹតបន្តឹងតែលើបេក្ខជនប្រឡងនោះទេ បុគ្គលិកសិក្សារបស់ក្រសួងអប់រំ ដែលទៅធ្វើជាអនុរក្សក្នុងការប្រឡងក៏មានលក្ខខណ្ឌដែរ ហើយបើធ្វើខុសនឹងប្រឈមការពិន័យ និងបញ្ឈប់ពីការងារ។ ឯកឧត្តម ហង់ ជួនណារ៉ុន បានអំពាវនាវឲ្យបេក្ខជនប្រឡង និងលោកគ្រូ អ្នកគ្រូជាអនុរក្សទាំងអស់ ចូលរួមគោរពនូវ លក្ខខណ្ឌ ដែលបានដាក់ចេញឲ្យបានខ្ជាប់ខ្ជួន ដើម្បីនាំមកនូវលទ្ធផលនៃការប្រឡងមួយដ៏ល្អប្រសើរ។

សូមបញ្ជាក់ថា ការប្រឡងបាក់ឌុបនៅឆ្នាំ២០១៥នេះ នឹងចាប់ផ្តើមនៅថ្ងៃទី២៤-២៥ ខែសីហា សប្តាហ៍ក្រោយនេះ ដោយមានបេក្ខជនប្រមាណ ៨៨.៤៨៨នាក់៕

ឯកឧត្តម ផៃ ស៊ីផាន លាតត្រដាងធាតុពិតរបស់ក្រុមប្រឆាំង ជុំវិញការបំភ្លៃរឿងព្រំដែន

ឯកឧត្តម ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍នៅក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រី នៅថ្ងៃទី ១៩ ខែសីហា ឆ្នាំ២០១៥នេះថា ទិសដៅរបស់ក្រុមប្រឆាំងដែលក្លែងបន្លំឯកសារស្តីពីព្រំដែន គឺឆ្លើយតបនិងចលនាដែលពួកគេបានរៀបចំឲ្យដូចភ្លៀងរលឹម គឺធ្វើការតវ៉ាប្រឆាំងរាជរដ្ឋាភិបាល ដូចជាទៅមើលព្រំដែន ដោយគ្មានអ្នកបច្ចេកទេសជំនាញព្រំដែនទៅជាមួយ និងបង្កអំពើហិង្សានៅតាមព្រំដែន គឺជានយោបាយបោកប្រាស់ យកប្រជាប្រិយភាព។

ឯកឧត្តម ផៃ ស៊ីផាន បានលើកឡើងថា ការក្លែងបន្លំឯកសាររបស់ សមាជិកព្រឹទ្ធសភា គណបក្សសង្គ្រោះជាតិ លោក ហុង សុខហួរ គឺជាធ្វើឲ្យប៉ះពាល់ដល់ឯកភាពជាតិ គឺមានទោសក្បត់ជាតិ។ «ពួកគេទៅបង្ករឿងឲ្យប្រជាជនមើលឃើញថា ពួកគេជាអ្នកស្នេហាជាតិ ជាវីរៈបុរស។ ទង្វើបង្កបញ្ហានៅតាមព្រំដែនរបស់ពួកគេ គឺបានធ្វើឲ្យប៉ះពាល់ដល់ទំនាក់ទំនងរវាងប្រទេសកម្ពុជា និងវៀតណាម ដែលកំពុងចរចារបោះបង្គោលព្រំដែន ដោយសន្តិវិធី តម្លាភាព និងឈានទៅសម្រេចបាននូវព្រំដែនដ៏រឹងមាំមួយរវាងប្រទេសទាំងពីរ»។

ឯកឧត្តម ផៃ ស៊ីផាន បញ្ជាក់ថា «ការក្លែងបន្លំឯកសារសាធារណៈរបស់រដ្ឋនេះ ធ្វើឲ្យប៉ះពាល់ដល់សន្តិសុខជាតិ គឺធ្វើឲ្យប្រជាពលរដ្ឋបះបោរ បង្កើតចលនាមហាជន និងចោទរាជរដ្ឋាភិបាលថា បានចុះហត្ថលេខារំលាយព្រំដែន មានចេតនាប្រគល់ដីឲ្យវៀតណាម។ គោលបំណងមួយទៀតរបស់ក្រុមប្រឆាំង ក្នុងការក្លែងបន្លំឯកសារនេះគឺគេបង្កើតពាក្យរសើប ឲ្យប្រជាពលរដ្ឋប្រឆាំង និងរាជរដ្ឋាភិបាល ដូចជាចោទថាសម្តេចតេជោកាត់ដីឲ្យយួន រឺជាអាយ៉ងយួនជាដើម។ ការពិតពួកនោះគ្រាន់តែជាពួករត់ចោលស្រុកប៉ុណ្ណោះ គឺពួកគេគ្មានអ្វីច្បាស់លាស់ និងពិតប្រាកដទេ»។

តាមប្រសាសន៍របស់ឯកឧត្តម ផៃ ស៊ីផាន គឺនៅក្នុងលោកយើងនេះគ្មានប្រទេសណាធ្វើកិច្ចការព្រំដែនជាមួយអង្គការសង្គមស៊ីវិល និងគណបក្សក្រៅរាជរដ្ឋាភិបាលទេ។ រាជរដ្ឋាភិបាលដែលកើតចេញពីការបោះឆ្នោតគឺជាស្ថាប័នតែមួយគត់ ដែលតំណាងឲ្យជាតិទាំងមូល។ «បច្ចុប្បន្នរាជរដ្ឋាភិបាល បានខិតខំដើម្បីធានាសុខសន្តិភាព និងសុវត្ថិភាពពិសេសដល់យុវជនជំនាន់ក្រោយរបស់កម្ពុជា។ យើងធ្លាប់ឆ្លងកាត់ភ្លើងសង្គ្រាមច្រើនសតវត្សមកហើយ ទំរំាបានសន្តិភាពដូចសព្វថ្ងៃ យើងបាត់បង់មនុស្សច្រើនណាស់ ដូច្នេះខ្ញុំមិនយល់ថាហេតុអ្វីបានជាបក្សប្រឆាំងនៅតែចង់ឲ្យមានភាពប្រទូសរាយ ការចលាចល ដើម្បីតែដណ្តើមអំណាចគេប្រើគ្រប់ល្បិចនយោបាយ»។

ឯកឧត្តមបន្តថា រាជរដ្ឋាភិបាលស្វាគមន៍ការតិទៀនដើម្បីកែលំអរ ប៉ុន្តែទង្វើតិទៀនរបស់គណបក្សប្រឆាំងបច្ចុប្បន្ន គឺតិទៀនតាមចិញ្ចើមថ្នល់ តិទៀនដើម្បីបំផ្លាញ គឺរាជរដ្ឋាភិបាលមិនអាចទទួលយកបានទេ៕

ផែនទីចំនួន១៨ផ្ទាំងពីអង្គការសហប្រជាជាតិត្រូវបានបញ្ជូនមកដល់ព្រះរាជាណាចក្រកម្ពុជាហើយ!

មន្ត្រីអង្គការសហប្រជាជាតិបាននាំយកផែនទីដើម១៨ផ្ទាំង ដែលតម្កល់ទុកនៅអង្គការសហប្រជាជាតិនោះ ដឹកតាមយន្តហោះ មកដល់ព្រលានយន្តហោះអន្តរជាតិភ្នំពេញហើយ នៅវេលាម៉ោង ១០ និង១២នាទីយប់ ថ្ងៃអង្គារទី១៨ ខែសីហា ឆ្នាំ២០១៥ ដើម្បីប្រគល់ផែនទីជូនកម្ពុជាជាផ្លូវការ ក្នុងការផ្ទៀងផ្ទាត់ ដែលនឹងត្រូវធ្វើឡើងនៅថ្ងៃទី២០ ខែសីហា ឆ្នាំ២០១៥ វេលាម៉ោង៩ព្រឹកនៅវិមានសន្តិភាព។

មន្រ្តីរដ្ឋាភិបាលកម្ពុជាចំនួន៣រូបតំណាងឲ្យក្រុមការងារគណៈកម្មការចំពោះកិច្ច បានទៅរង់ចាំទទួលស្វាគមន៍មន្រ្តីអង្គការសហប្រជាជាតិនាឱកាសនោះ រួមមាន ឯកឧត្តម ឡុង វិសាលោ រដ្ឋមន្រ្តីលេខាធិការ ក្រសួងការបរទេស, ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្រ្តី និងលោកជំទាវបណ្ឌិត កុយ ពិសី អនុប្រធានគណៈកម្មាធិការកិច្ចការព្រំដែនកម្ពុជា ។

មន្ត្រីទាំងពីររូបតំណាងរបស់ អ.ស.ប ដែលនាំយកផែនទីមកឱ្យកម្ពុជា រួមមានលោកស្រី Mereani Keleti Vakasisikakala ប្រធានស្តីទីនៃបណ្ណាល័យអង្គការសហប្រជាជាតិ និងលោក Keiichiro Okimoto មន្រ្តីផ្នែកច្បាប់នៃអង្គការសហប្រជាជាតិ។ មន្ត្រីទាំងពីររូបនេះ ត្រូវបានការពារសុវត្ថិភាព សន្តិសុខយ៉ាងតឹងរឹង ទាំងការធ្វើដំណើរ និងពេលយូរផែនទីទាំងនោះ យកទៅសម្រាកនៅសណ្ឋាគារ អ៊ីនធើកុងទីណាងតាល់ ក្នុងរាជធានីភ្នំពេញ។

ឯកឧត្តម ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍ប្រាប់អ្នកសារព័ត៌មាននៅឯព្រលានយន្តហោះអន្តរជាតិភ្នំពេញ បន្ទាប់ពីផែនទីមកដល់ថា ផែនទីទាំង១៨ផ្ទាំងនេះ ត្រូវបានតម្កល់ទុកក្នុងបណ្ណាល័យ ដាក់ ហាំម៉ាស្ក៍ហ្សូល របស់ អ.ស.ប ។ ឯកឧត្តម បានបញ្ជាក់ផែនទីដែលអង្គការសហប្រជាជាតិនាំមកនេះជាផែនទីដែលកម្ពុជាយើងបានប្តឹងទៅអង្គការសហប្រជាជាតិអំពីការឈ្លានពានរបស់កងទ័ពអាមេរិក និងវៀតណាមខាងត្បូងមកលើទឹកដីកម្ពុជា ហើយផែនទីនេះមិនមែនជាផែនទីដែលយើងតម្តល់ទុកសំរាប់ទទួលស្គាល់នូវខ្សែព្រំដែនកម្ពុជាទេ។ តែទោះជាយ៉ាងណាផែនទីនេះក៏មានខ្សែផែនទី ដែលយើងអាចធ្វើការផ្ទៀងផ្ទាត់បាន។

ឆ្លើយទៅនឹងសំនួរអ្នកកាសែតអំពីការចាកចេញទៅក្រៅប្រទេសរបស់មេដឹកនាំគណបក្សប្រឆាំង ថានឹងមានផលប៉ះពាល់យ៉ាងណាដល់ដំណើរពិនិត្យ ផ្ទៀងផ្ទាត់ផែនទីដែរឬទេ ?ឯកឧត្តម បានមានប្រសាសន៍ថា ខាងគណបក្សនោះ ត្រូវបានទទួលការអញ្ជើញរួចហើយ និងដឹងថា គេចាត់អ្នកតំណាងឲ្យចូលរួម ដូច្នេះ ការផ្ទៀងផ្ទាត់ផែនទី និងប្រព្រឹត្តិទៅជាធម្មតា។

ផែនទី១៨ផ្ទាំង ដែលបានមកពីអង្គការសហប្រជាជាតិនេះ នឹងរៀបចំពិធីប្រគល់ និងទទួល ផ្ទៀងផ្ទាត់ នៅវិមានសន្តិភាព នាវេលាម៉ោង៩: ០០ព្រឹក ថ្ងៃទី២០ ខែសីហា ឆ្នាំ២០១៥ ក្រោមអធិបតីភាពរបស់ឯកឧត្តមឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ។

យោងតាមសេចក្តីជូនព័ត៌មានរបស់លេខាធិការដ្ឋានគណៈកម្មការចំពោះកិច្ចរបស់រាជរដ្ឋាភិបាល ក្នុងការសម្របសម្រួលទទួល ប្រគល់ ពិនិត្យផ្ទៀងផ្ទាត់ផែនទី បានឲ្យដឹងថា នៅក្នុងឱកាស ទទួល ប្រគល់ ផ្ទៀងផ្ទាត់ផែននោះ ភាគីពាក់ព័ន្ធមួយចំនួន ត្រូវបានអញ្ជើញឲ្យចូលរួមសង្កេតការណ៍ ក្នុងនោះរួមមាន តំណាងគណបក្សនយោបាយ គឺគណបក្សប្រជាជនកម្ពុជា ចំនួន៥រូប គណបក្សសង្គ្រោះជាតិ៥រូប និងគណបក្សហ៊្វុនស៊ិនប៉ិចចំនួន៥រូប, តំណាងរដ្ឋសភា គឺសមាជិករដ្ឋសភាគណបក្សដែលមានសំឡេងភាគច្រើនចំនួន៣រូប សមាជិករដ្ឋសភាសំឡេងភាគតិច៣រូប។ តំណាងស្ថាប័នព្រឹទ្ធសភា៖ សមាជិកព្រឹទ្ធសភាគណបក្សប្រជាជនកម្ពុជា ចំនួន៣រូប សមាជិកព្រឹទ្ធសភាគណបក្សសមរង្ស៊ីចំនួន៣រូប។ បន្ថែមលើនេះ នឹងអញ្ជើញឱ្យចូលរូមផងដែរ ឧត្តមក្រុមប្រឹក្សានៃអង្គចៅក្រមចំនួនរូប២ លោកបណ្ឌិត សុខ ទូច និងសហការីនៃរាជបណ្ឌិតសភា

ចំនួន៣រូប ហើយនិងទីប្រឹក្សារាជរដ្ឋាភិបាលដែលជាជនជាតិបរទេសមួយចំនួន។

បន្ទាប់ពីបានជូនព័ត៌មាន តាមការរំពឹងទុក នឹងមានអ្នកសារព័ត៌មានជាតិ និងអន្តរជាតិប្រមាណជាង២០០នាក់ មកពីប្រមាណ៧០អង្គភាព ស្ថាប័ន នឹងចូលរួមយកព័ត៌មាន ដើម្បីការផ្សព្វផ្សាយនូវព្រឹត្តិការណ៍ជាប្រវត្តិសាស្ត្រដ៏មានសារៈសំខាន់នេះ៕

ប្រទេសនូវែលសេឡង់ នឹងក្លាយជាប្រទេសទី២៤ ដែលបានចុះហត្ថលេខាកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសជាលក្ខណៈទ្វេភាគី ជាមួយកម្ពុជា

នៅថ្ងៃទី១៩ ខែសីហា ឆ្នាំ២០១៥ នេះ កម្ពុជា បានចុះហត្ថលេខាកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស ជាមួយនឹងរដ្ឋាភិបាលនូវែលសេឡង់ ក្រោមអធិបតីភាព ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ជាមួយ ឯកឧត្តម Murray McCully រដ្ឋមន្ត្រី ក្រសួងការបរទេស នៃប្រទេសនូវែលសេឡង់។

ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា តាមរយៈកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសនេះ នឹងដើរតួនាទីយ៉ាងសំខាន់ ក្នុងការផ្តល់លទ្ធភាពជូនក្រុមហ៊ុនអាកាសចរនៃប្រទេសទាំងពីរ ធ្វើការគិតគូរពិចារណា និងចាប់ផ្តើមកសាងផែនការអាជីវកម្ម លើការតភា្ជប់ជើងហោះហើរ រវាងព្រះរាជាណាចក្រកម្ពុជា និងប្រទេសនូវែលសេឡង់។

ឯកឧត្តមបានបន្តថា បន្ទាប់ពីការចុះហត្ថលេខាកិច្ចព្រមព្រៀងនេះ នាពេលឆាប់ៗខាងមុខ អ្នកធ្វើដំណើរតាមផ្លូវអាកាស ក៏ដូចជាភ្ញៀវទេសចរណ៍ នឹងមានភាពងាយស្រួលក្នុងការរង់ចំាតជើងហោះហើរ ដោយប្រើរយៈពេលខ្លីបំផុត និងទិញសំបុត្រយន្តហោះយ៉ាងងាយស្រួល រវាងកម្ពុជា និងនូវែលសេឡង់ ព្រោះថា ក្រុមហ៊ុនអាកាសចរនៃប្រទេសទាំងពីរ និងក្រុមហ៊ុនអាកាសចរអន្តរជាតិផ្សេងទៀត នឹងរៀបចំផែនការតភ្ជាប់ជើងហោះហើរជាមួយគ្នា និងដាក់ប្រព័ន្ធលក់សំបុត្រយន្តហោះដំណើរការជាមួយគ្នា។ លើសពីនេះទៀត សម្រាប់ចក្ខុវិស័យនៅរយៈពេលវែង យើងជឿជាក់ថា នឹងអាចមានការហោះហើរត្រង់រវាងកម្ពុជា និងនូវែសេឡង់។ កិច្ចព្រមព្រៀងនេះ ក៏នឹងចូលរួមចំណែកជួយជម្រុញដល់ការអភិវឌ្ឍន៍វិស័យទេសចរណ៍ សេដ្ឋកិច្ច និងវប្បធម៌ រវាងប្រទេសទាំងពីរផងដែរ។

យោងតាមកិច្ចព្រមព្រៀង ដែលបានចុះហត្ថលេខានេះ អាជ្ញាធរអាកាសចរស៊ីវិលនៃប្រទេសទាំងពីរ បានព្រមព្រៀងលើខ្លឹមសារសំខាន់ៗ ដែលផ្តល់អត្ថប្រយោជន៍ទៅវិញទៅមក ដូចជា បែបបទអនុញ្ញាតផ្តល់សិទ្ធិហោះហើរ និងកិច្ចសហការជើងហោះហើរ របស់ក្រុមហ៊ុនអាកាសចរនៃប្រទេសទាំងពីរ ការសហការរួមគ្នារបស់អាជ្ញាធរអាកាសចរស៊ីវិលដើម្បីធានាសន្តិសុខ និងសុវត្ថិភាពអ្នកដំណើរតាមផ្លូវអាកាស និងការធានាឱ្យមាននូវតម្លាភាពនៃការប្រកួតប្រជែង។

បច្ចុប្បន្ន ព្រះរាជាណាចក្រកម្ពុជា បានចុះហត្ថលេខាកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសជាលក្ខណៈទ្វេភាគីចំនួន ២៣ ប្រទេស និងកិច្ចព្រមព្រៀងពហុភាគីក្រោមក្របខ័ណ្ឌអនុតំបន់ CLMV និងអាស៊ានផងដែរ។ ប្រទេសនូវែលសេឡង់ នឹងក្លាយជាប្រទេសទី២៤ ដែលបានចុះហត្ថលេខាកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសជាលក្ខណៈទ្វេភាគី ជាមួយព្រះរាជាណាចក្រកម្ពុជា ហើយនឹងត្រៀមចុះហត្ថលេខាជាបន្តបន្ទាប់ ជាទ្វេភាគីចំនួន ១០ ប្រទេសទៀត ដោយបានឯកភាពគ្នារួចហើយលើកម្រិតថ្នាក់បច្ចេកទេស។

នាពេលបច្ចុប្បន្ននេះជើងហោះហើរ និងចំនួនអ្នកធ្វើដំណើរតាមផ្លូវអាកាស បានកើនឡើងគួរឱ្យកត់សម្គាល់ ដែលចំនួនជើងហោះហើរកើនឡើងចំនួន ៩ ភាគរយ ប្រៀបធៀបរវាងឆ្នាំ២០១៤នឹង២០១៣ ហើយចំនួនអ្នកដំណើរតាមផ្លូវអាកាសកើនឡើងចំនួន ១៣ ភាគរយ ប្រៀបធៀបរវាងឆ្នាំ២០១៤នឹង២០១៣ (កាលពីឆ្នាំ២០១៤ មានអ្នកដំណើរតាមផ្លូវអាកាសសរុប ៥,៤ លាន)។ លើសពីនេះទៀត សម្រាប់ដើមឆ្នាំ២០១៥ ចំនួនអ្នកដំណើរតាមផ្លូវអាកាសបានកើនឡើងប្រមាណ ១១ ភាគរយ។

ក្រុមហ៊ុនអាកាសចរសរុបចំនួន ៣១ ក្រុមហ៊ុន ដែលកំពុងផ្តល់សេវាកម្មហោះហើរដឹកជញ្ជូនជាប្រក្រតី (Schedule Flights) ចេញ-ចូល ព្រះរាជាណាចក្រកម្ពុជា ក្នុងចំណោមនោះ មានក្រុមហ៊ុនអាកាសចរក្នុងស្រុកចំនួន ០៤ ក្រុមហ៊ុន និងក្រុមហ៊ុនអាកាសចរបរទេសចំនួន ២៧ ក្រុមហ៊ុន។

កាលពីឆ្នាំ២០១៤ កន្លងទៅ ចំនួនភ្ញៀវទេសចរណ៍ជនជាតិនូវែលសេឡង់ បានមកទស្សនាព្រះរាជាណាចក្រកម្ពុជា ចំនួន ២១,២៥៩ នាក់ និងមកពីតំបន់អូសេអានី (នូវែលសេឡង់ អូស្រ្តាលី និងហ្វីជី) ចំនួន ១៥៥,៥៧៨ នាក់៕

Pages

Wednesday, August 19, 2015

រដ្ឋមន្រ្តីក្រសួងអប់រំ បង្ហាញលក្ខខណ្ឌចំនួន៥ ដែលនាំឲ្យអ្នកប្រឡងបាក់ឌុប ធ្លាក់ដោយស្វ័យប្រវត្តិ

ឯកឧត្តម ផៃ ស៊ីផាន លាតត្រដាងធាតុពិតរបស់ក្រុមប្រឆាំង ជុំវិញការបំភ្លៃរឿងព្រំដែន

ផែនទីចំនួន១៨ផ្ទាំងពីអង្គការសហប្រជាជាតិត្រូវបានបញ្ជូនមកដល់ព្រះរាជាណាចក្រកម្ពុជាហើយ!