សម្តេចអគ្គមហាសេនាបតីតេជោ ហ៊ុន សែន នាព្រឹកថ្ងៃទី៣ ខែកក្កដា ឆ្នាំ២០១៤ បានបញ្ជាក់សារជាថ្មីអំពីភាពស្របច្បាប់នៃរាជរដ្ឋាភិបាលអាណត្តិទី៥ នៃរដ្ឋសភា របស់សម្តេចដើម្បីជាការឆ្លើយតបទៅនឹងក្រុមប្រឆាំងជ្រុលនិយម ដែលចេះតែនិយាយបំភ្លៃការពិត បំភ័ន្ធសាធារណៈមតិជាតិ និងអន្តរជាតិ ពិសេសពាក់ព័ន្ធនឹងការលើកឡើងរបស់បក្សប្រឆាំងទាក់ទងអំពីភាពស្របច្បាប់ ដែលសម្ដេចតេជោបានថ្លែងនៅខេត្តកំពង់ឆ្នាំងនោះ។
ថ្លែងក្នុងពិធីប្រកាសជាផ្លូវការដាក់ឲ្យអនុវត្តន៍ផែនការយុទ្ធសាស្ត្រជាតិ ស្ដីពីពិការភាព ២០១៤-២០១៨ ត្រូវនឹងខួបគម្រប់ ៥ឆ្នាំ នៃច្បាប់ស្ដីពីកិច្ចការពារ និងលើកកម្ពស់សិទ្ធិជនពិការនៅសាលមហោស្រពកោះពេជ្រ សម្តេចតេជោមានប្រសាសន៍បញ្ជាក់ថា ភាពស្របច្បាប់នៅកម្ពុជា គឺភាពស្របច្បាប់របស់ខ្លួនត្រង់ថា អស់ត្រឹមព្រះរាជក្រឹត្យព្រះមហាក្សត្រ។ ខ្ញុំគ្រាន់តែផ្ដាំជូនប៉ុណ្ណឹងទៅវិញ បើខ្លួនល្ងង់ក៏ល្ងង់តែម្នាក់ឯងទៅ។ សម្តេចតេជោក៏បានធ្វើការប្រៀបធៀបភាពស្របច្បាប់នៃការគ្រប់គ្រងប្រទេសក្នុងប្រទេសថៃថា “នៅប្រទេសថៃក៏អីញ្ចឹងដែរ ប្រាយុទ្ធ ចាន់អូចា គាត់មានព្រះរាជក្រឹត្យព្រះមហាក្សត្រគាត់ធ្វើការងារបាន ឯរឿងនៅទីនេះបញ្ហាធំជាងគេ គឺសភាប្រជុំ តែបើសភាប្រជុំហើយមិនទាន់មានព្រះរាជក្រឹត្យព្រះមហាក្សត្រក៏អត់ បានដែរ។ អាហ្នឹងវាចប់ត្រឹមប៉ុណ្ណឹង ស្របច្បាប់មិនស្របច្បាប់លោកឯងគិតមើលទៅ”។
សម្តេចតេជោបានមានប្រសាសន៍ថា ច្បាប់ដែលកំពុងមានជាធរមាន បើមិនទាន់មានច្បាប់ថ្មីមកជំនួស បានសេចក្ដីថានៅរក្សាដដែលទាំងអស់ ច្បាប់ត្រូវកែដោយសភា សូម្បីតែលិខិតបទដ្ឋានដែលលើកឡើងក្នុងចំណុច ទី៤ បើកាលណាឯកឧត្ដម លោកជំទាវ ក្រសួងមិនរៀបចំលិខិតបទដ្ឋានថ្មីទេ លិខិតបទដ្ឋានចាស់វានៅតែដដែល។ ដូចគ្នានេះដែរ ច្បាប់បោះឆ្នោតនីតិវិធីទាំងឡាយទាក់ទិនជាមួយនិងការបោះឆ្នោត បើមិនមានច្បាប់ថ្មីចូលមកជំនួសទេ ច្បាប់ចាស់នៅបន្ត។ ដូចនេះឆ្នាំ២០១៨ ប្រហែលជាគ្មានការចាំបាច់ដើម្បីនិយាយអ្វីច្រើនទេ នៅរក្សាការបោះឆ្នោតខែ៧ (កក្កដា) តទៅទៀត កុំឲ្យវាឈឺក្បាលពេក ដល់ពេលនោះចេះតែធ្វើការទៅ អ្នកណាចូលឬមិនចូលក៏ហីទៅ។
សម្តេចតេជោថ្លែងបញ្ជាក់បន្ថែមថា ច្បាប់បោះឆ្នោតកំណត់ថា រៀងរាល់ ៥ឆ្នាំម្ដង នាអាទិត្យទី៤ ខែកក្កដា ត្រូវធ្វើការបោះឆ្នោត បើអត់មានច្បាប់ថ្មីមកដូរទេ ច្បាប់ចាស់វានៅដដែលកុំខ្វល់ច្រើនពេក។ សម្ដេចគូសបញ្ជាក់ថា ផ្លូវច្បាប់នៅកម្ពុជាក៏ដោយនៅទីណាក៏ដោយ បើនៅប្រទេសមានប្រមុខរដ្ឋ តែថ្នាក់ប្រមុខរដ្ឋគេចេញឲ្យហើយគឺវារួចទៅហើយ ប្រទេសមានព្រះមហាក្សត្រ ព្រះរាជក្រឹត្យចេញដោយព្រះមហាក្សត្រគឺរួចទៅហើយ គ្មានអ្វីរង់ចាំទៀតទេ កុំរញ៉រញ៉ៃ។
សម្តេចតេជោក៏បានធ្វើការបដិសេធន៍ និងរិះគន់ចំពោះការផ្សាយមិនត្រឹមត្រូវ ដោយបណ្តាញទូរទស្សន៍ វិទ្យុ និងសារព័ត៌មានមួយ ចំនួន ដែលថា ការ ដោះលែងអ្នកទោសជន ជាតិថៃ វីរៈ សុងខ្វាមឃីត ថា មានលក្ខខណ្ឌសម្រាប់ការដោះដូរ ជាមួយជនជាតិកម្ពុជាចំនួន ១៤នាក់ដែលកំពុងជាប់ឃុំ ឃាំងក្នុងប្រទេសថៃនោះផងដែរ។
សម្តេចតេជោនាយករដ្ឋមន្ត្រីបានមានប្រសាសន៍ បញ្ជាក់ថា ការដោះលែង វីរៈ សុងខ្វាមឃីត គឺគ្មានការដោះដូរនោះទេ ភាគីខាងថៃគាត់ និយាយត្រឹមត្រូវ ហើយបញ្ហាខ្ញុំស្នើសុំឲ្យ ឬមិនឲ្យគឺជាសិទ្ធិរបស់ខាងថៃ ឯខាងកម្ពុជាដោះលែងឲ្យទៅដោយគ្មានលក្ខខណ្ឌអ្វីទាំងអស់ បញ្ជូនទៅដល់បាងកកបាត់ទៅហើយ។ ខ្ញុំសូមបញ្ជាក់ព្រោះថា មានពេលខ្លះផ្នែកសារព័ត៌មានរបស់យើងធ្វើឲ្យមានការរំខានត្រឡប់ទៅវិញ មិនត្រឹមតែមិនបានក្លាយទៅជាការពិត វាទៅជារឿងយើងដោះដូរបញ្ជូនទៅម្នាក់ ឲ្យដោះដូរប៉ុន្មាននាក់មកវិញ អត់ទេ អត់មានលក្ខខណ្ឌដោះដូរអ្វីទេ ខ្ញុំសូមបញ្ជាក់៕