បទវិចារណកថា
ដោយៈ លី គាំ
យុទ្ធសាស្រ្តថ្មីរបស់គណបក្សប្រឆាំងក្រោយពេលបំបែកជួរ
ថ្មីៗនេះ បន្ទាប់ពីបក្សប្រឆាំងត្រូវបានបំបែកជួរដោយចំណាត់ការរបស់រាជរដ្ឋាភិបាលលើ
ក្រុមអណាធិបតេយ្យ ដែលគេដឹងថា មានបក្សប្រឆាំងនៅពីក្រោយនោះ
បក្សប្រឆាំងបាន រកមធ្យោបាយកៀងគរប្រជាពលរដ្ឋទូទាំងប្រទេសលែងបានទៀតហើយ។ កាលពីមុនបក្សប្រឆាំងស្រែកក្តែងៗដោយមោទនៈភាពថា <បងប្អូន តើឃើញទេ ....យើងប្រមូលគ្នាបានរាប់លាននាក់
ទូទាំង ប្រទេស....ពួកយើងទាមទារឲ្យមានការបោះឆ្នោតជាថ្មី... ពួកយើងទាមទារឲ្យរំលំរាជរដ្ឋាភិបាល....ទាមទារឲ្យ ហ៊ុន សែន ចុះចេញពីតំណែង។ល។>
មេដឹកនាំបក្សប្រឆាំងបានប្រកាសប្រាប់ពិភពលោក និងទន្ទេញចាំមាត់ថា ពួកគេដឹកនាំមហាជនធ្វើបាតុកម្មដោយអហិង្សា ប៉ុន្តែមេបក្សប្រឆាំងភ្លេចខ្លួនថា
«ខ្លួនកំពុងតែដុតរោលសង្គមឲ្យក្លាយទៅជាភ្លើងកំហឹងនៅក្នុងចិត្តរបស់បាតុករប៉ុន្មានម៉ឺននាក់ឲ្យហ៊ានស្រែកអាក្រោសពេញរាជធានីភ្នំពេញ
និងទូទាំងប្រទេស គ្មានសិលធម៌ គ្មានសណ្តាប់ធ្នាប់ រញ៉េរញ៉ៃនោះ គេបែរជាថា គេធ្វើបាតុកម្មកន្លងមកដោយអត់ធ្មត់
និងអហិង្សាទៅវិញ។
ក្រោយពេលបំបែកជួរ គណបក្សប្រឆាំងបានប្រើមធ្យោបាយ
និងយុទ្ធសាស្រ្តថ្មី ចាប់ផ្តើមធ្វើចលនាជាក្រុមតូចៗនៅតាមភូមិ តាមឃុំ
តាមស្រុក ក្នុងខេត្តមួយចំនួនជាបន្តបន្ទាប់។ ដោយឡែក នៅថ្ងៃទី២១ ខែមករា កន្លងទៅនេះ
មេបក្សប្រឆាំងបានកោះប្រជុំពួកសកម្មជន របស់ខ្លួននៅឃុំត្រើយស្លា ស្រុកស្អាង
ខេត្តកណ្តាល តែអកុសលពួកនេះ បានប្រកាសរំសាយកិច្ចប្រជុំរបស់ខ្លួនភ្លាមៗគួរឲ្យចាប់អារម្មណ៍។
បន្ទាប់ពីព្រឹត្តិការណ៍នៅឃុំត្រើយស្លា មេដឹកនាំបក្សប្រឆាំង
ខឹងសម្បារនឹង គណបក្សប្រជាជនយ៉ាងខ្លាំង។ពួកគេបានធ្វើសន្និសីទកាសែត នៅទីស្នាក់ការរបស់គេ ប៉ុន្មានម៉ោងក្រោយពីការប្រកាសរំសាយ។
មេបក្សប្រឆាំងបាននិយាយ យ៉ាងហ៊ឺហារថា < យើងសម្រេចចិត្តមិនទៅ ជួបសំណេះសំណាលជាមួយប្រជាពលរដ្ឋនៅឃុំត្រើយស្លានោះ
ដើម្បីបញ្ជៀសមិនឲ្យប្រឈមមុខនឹងហិង្សារវាងប្រជាពលរដ្ឋជាមួយនឹងកម្លាំងរបស់រាជរដ្ឋាភិបាល>។
តាមរយៈការធ្វើសន្និសីទកាសែតនេះ ក៏ បានឆ្លុះបញ្ចាំងឲ្យគេឃើញយុទ្ធសាស្រ្តថ្មីរបស់ខ្លួន
នៅលើគោក ដោយមេបក្សប្រឆាំងបានដាក់កំហុសមកលើសកម្មជនរបស់គណបក្សប្រជាជនថាជាអ្នកប្រើអំពើហិង្សាទៅវិញ
ថាជាអ្នកបង្ករឿង រំខានពួកខ្លួនមិនឲ្យចុះសំណេះសំណាលជាមួយប្រជាពលរដ្ឋបាន។
ក្នុងន័យនេះយើងសូមសួរថា អ្វីទៅដែលហៅថា <ចុះជួបសំណេះសំណាលជាមួយប្រជាពលរដ្ឋ? > អ្វីទៅដែលហៅថា <សមាជិក ឬសកម្មជនគណបក្សប្រជាជនកម្ពុជារំខានសកម្មភាពខ្លួនបង្កអំពើហិង្សាលើពួកខ្លួន?
> និង <អ្វីទៅដែលហៅថា សម្ដេចតេជោ ហ៊ុន សែន
អំពាវនាវដល់សមាជិកអ្នកគាំទ្រគណបក្សប្រជាជន ឲ្យងើបឡើងតទល់ នឹងប្រជាជន
សកម្មជន ដែលគាំទ្រគណបក្សប្រឆាំងរបស់ខ្លួន? >។ល។
តើនេះពុំមែនជាកលល្បិចថ្មី ធ្វើឲ្យគេឃើញនៅលើគោកទេឬអ្វី?ពួកខ្លួនបង្កចលាចលចង្អុលគេទៅវិញ។គេគ្រាន់តែការពារសិទ្ធិសេរីភាពរបស់គេ
បែរជាចោទថា គេបំបិទសិទ្ធិខ្លួនទៅវិញ។រឿងអ្វីបានជាមេដឹកនាំបក្សប្រឆាំងនៅមិនសុខចិត្ត
មិនសុខកាយដើរទៅសួរសុខទុក្ខរំខាន ប្រជាជនទូទាំងប្រទេស
ប្រៀបនឹងធ្វើការឃោសនាបោះឆ្នោត និងបន្តបញ្ឆេះសកម្មជនខ្លួនទៅវិញ។
ក្នុងន័យនេះ ក្រោមក្រសែភ្នែករបស់អ្នកស្នេហាសន្ដិភាព ទាំងក្នុង
និងក្រៅប្រទេស គេយល់ និងបានឃើញយ៉ាងប្រត្យក្សថា អស់រយៈពេលជាង ៥ខែមកហើយ
បន្ទាប់ពីការបោះឆ្នោតសកលនាថ្ងៃទី ២៨ ខែកក្កដា ឆ្នាំកន្លងទៅ ទាំងថ្នាក់ដឹកនាំគណបក្សប្រជាជនកម្ពុជាក្ដី
ទាំងអ្នកបោះឆ្នោតជាង ៣លាននាក់ គាំទ្រគណបក្សប្រជាជនកម្ពុជាក្ដី
រួមទាំងអ្នកគាំទ្រគណបក្សប្រឆាំងមួយចំនួនធំក្ដី គេបានអត់ធ្មត់ខន្ដីជាទីបំផុត។
ទើបតែពេលថ្មីៗនេះ ពួកគេទ្រាំលែងបាន
ពួកគេមិនអាចអនុញ្ញាតឲ្យក្រុមបក្សប្រឆាំងបន្ដចលនាកម្ទេចសេដ្ឋកិច្ចក្នុងប្រទេស
ដែលកំពុងតែលូតលាស់ គួរជាទីសង្ឃឹមដល់ប្រជាពលរដ្ឋគ្រប់រូប។
ពួកគេពុំអាចបណ្ដោយឲ្យក្រុមបក្សប្រឆាំងបន្ដធ្វើចលនាបំបះបំបោរបែបអំណាចប្រជាជន
តាមលំអានបដិវត្តន៍ផ្កាម្លិះនៅប្រទេសមួយចំនួននៅពិភពអារ៉ាប់ ដែលញ៉ាំងដល់ផ្ទុះសង្គ្រាមស៊ីវិលក្នុងប្រទេសបានឡើយ។
មេបក្សប្រឆាំងត្រូវចងចាំឲ្យច្បាស់ថា ក្នុងស្ថានភាពបច្ចុប្បន្ន ខ្លួនកំពុងរស់នៅក្នុងព្រំដែនច្បាប់(ក្រមរដ្ឋប្បវេណី
ក្រមព្រហ្មទណ្ឌ និងរដ្ឋធម្មនុញ្ញ)របស់ប្រទេសជាតិ។ ការកោះហៅមេដឹកនាំគណបក្សប្រឆាំង
ការឃាត់ខ្លួនក្រុមសកម្មជនមួយចំនួន ទៅសួរចម្លើយដោយតុលាការក្ដី
ឬដោយសមត្ថកិច្ចក្ដី គឺពុំមែនជារឿងលែងសើចនោះទេ។
ជារួម យុទ្ធសាស្ដ្រថ្មីណាមួយ ចលនាបំបះបំបោរថ្មីណាមួយ
ទាំងក្នុងរាជធានីភ្នំពេញក៏ដូចជាតាមបណ្ដាខេត្តនានា ទោះមានទ្រង់ទ្រាយតូចក្ដី
ទ្រង់ទ្រាយធំក្ដី មេដឹកនាំបក្សប្រឆាំងត្រូវដឹងថា ខ្លួនអាចធ្វើបានតែក្នុងរង្វង់ក្រមសីលធម៌
និងស្ថិតក្រោមមូលដ្ឋានគ្រឹះនៃច្បាប់ប្រទេសតែប៉ុណ្ណោះ៕