ត្បូងឃ្មុំ៖ នៅថ្ងៃទី១២ ខែវិច្ឆិកា ឆ្នាំ ២០២០ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការ រងនៃកងយោធពលខេមរភូមិន្ទ មេបញ្ជាការ កងទ័ព ជើង គោក តំណាងលោកនាយករដ្ឋមន្ត្រី ហ៊ុន សែន លោកស្រី ប៊ុន រ៉ានី ហ៊ុនសែន បានអញ្ជើញជាអធិបតីភាពក្នុងពិធីជួបសំណេះសំណាលសួរសុខទុក្ខ និងចែកស្រូវពូជជូនប្រជាពលរដ្ឋដែលរងផលប៉ះពាល់ដោយសារជំនន់ទឹកភ្លៀង នៅស្រុកចំនួន០៥ស្រុក មាន១៣ឃុំ ស្មើនឹង៣២០០គ្រួសារ ដេីម្បីស្ដារឡើងវិញឡើងវិញបន្ទាប់ពីរងនូវការខូចខាតដោយជំនន់ទឹកភ្លៀងក្នុងឆ្នាំ២០២០នេះ ដែលពិធីនេះរៀបឡើងនៅបរិវេណវិទ្យាល័យ ហ៊ុន សែន ព្រៃទទឹង ឃុំជ្រៃវៀន ស្រុកព្រៃឈរ ខេត្តត្បូងឃ្មុំ។
ក្នុងកម្មវិធីនេះដោយមានការចូលរួមពីសំណាក់នាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយតំណាងក្រុមការងាររបស់រាជរដ្ឋា
ភិបាល និងស្រុកស្ទឹងត្រង់ លោក អ៊ុន ចាន់ដា អភិបាលខេត្តកំពង់ចាម និងលោក ខ្លូត ផន ប្រធានក្រុមប្រឹក្សាខេត្ត អភិបាលខេត្តត្បូងឃ្មុំ អភិបាលខេត្តក្រចេះ អភិបាលរងខេត្ត លោក-លោកស្រីប្រធានមន្ទីរ-អង្គភាពជុំវិញខេត្ត អាជ្ញាធរមូលដ្ឋាន និងប្រជាពលដ្ឋ សរុបប្រមាណ ៣.៥០០នាក់។
តាមរបាយការណ៍របស់លោក អ៊ុន ចាន់ដា អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត ជំនន់ទឹកភ្លៀងប៉ះពាល់ដល់ ០៩ស្រុក ១ក្រុង ស្មើនឹង ៥០ឃុំ-សង្កាត់ (ក្រុងកំពង់ចាម ស្រុកកំពង់សៀម ស្ទឹងត្រង់ ចំការលើ បាធាយ ជើងព្រៃ ព្រៃឈរ កងមាស និងស្រុកស្រីសន្ធរ) ប៉ះពាល់ប្រជាជន ៣៧១ខ្នងផ្ទះ លិចសាលារៀន ២០កន្លែង លិចផ្លូវជាតិ ផ្លូវខេត្ត ផ្លូវគ្រួសក្រហម ផ្លូវលំ ប្រមាណ ២៣,១៥គ.ម និងខូចខាតប្រវែង ១៤,៣២ម៉ែត្រ។ លិចដំណាំស្រូវ ចំនួន ២.៩០៤ហិកតា ស្មើនឹង៣.៩៣២គ្រួសារ ក្នុងនោះ ខូចខាត ១៩៦៧ហិចតា ស្មើនឹង៣.២០០គ្រួសារ។
អភិបាលខេត្ត បានបន្តថាវិធានការចាំបាច់នានាត្រូវបានដាក់ឲ្យអាជ្ញាធរមូលដ្ឋាន និងមន្ទីរជំនាញចុះអន្តរាគមន៍ ដោយយកគ្រឿងចក្រចុះកាយបើកមុខទឹកភ្លៀង រំដោះទឹកភ្លៀង មិនឱ្យជន់លិចដល់លំនៅដ្ឋានរបស់ប្រជាពលរដ្ឋ និងផ្លូវគមនាគមន៍បានទាន់ពេលវេលា ពិសេសបានជួយសង្គ្រោះផ្លូវជាតិ៧ ដែលរងការជន់លិច មិនឱ្យខូចខាតធ្ងន់ធ្ងរ។
តាងនាមឲ្យគណៈអភិបាលខេត្ត និងបងប្អូនប្រជាពលរដ្ឋទាំង៣.២០០គ្រួសារ ឯកឧត្តមអភិបាលខេត្ត បានគោរពថ្លែងអំណរគុណយ៉ាងជ្រាលជ្រៅជូនចំពោះ លោកនាយករដ្ឋមន្ត្រី ហ៊ុន សែន និងភរិយា ដែលបានផ្តល់ពូជស្រូវ ដល់ប្រជាកសិករដែលរងការខូចខាតនាពេលនេះ និងគោរពជូនពរ លោកទាំងទ្វេរ សូមមានសុខភាពល្អបរិបូរណ៍ និងជោគជ័យគ្រប់ភារកិច្ចជូនជាតិមាតុភូមិកម្ពុជា និងសូមគាំទ្រលោក ជានាយករដ្ឋមន្ត្រីនៅអាណត្តិបន្តបន្ទាប់ទៀត។
នៅក្នុងឱកាសនោះ ឧត្តមសេនីយ៍ឯក ហ៊ុន ម៉ាណែត អគ្គបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកបានមានប្រសាសន៍ថា មានប្រសាសន៍ផ្ដាំផ្ញើការសាកសួរសុខទុក្ខពីសំណាក់លោក ហ៊ុន សែន តែង តែគិតគូរពីសុខទុក្ខប្រជាពលរដ្ឋរងគ្រោះ ដោយសារជំនន់ទឹកភ្លៀង លោកមិនទុកឲ្យប្រជាពលរដ្ឋណាម្នាក់អត់អាហារស្លាប់ដោយពុំបានដឹងឮពីអាជ្ញាធរនោះឡើយ។
ហើយថ្ងៃនេះ លោកនាយករដ្ឋមន្ត្រី ហ៊ុន សែន លោកស្រី ប៊ុន រ៉ានី ហ៊ុនសែន បានផ្តល់ជូនស្រូវពូជ ដល់បងប្អូនដែលរងគ្រោះដោយជំនន់ទឹកភ្លៀង ដោយមិនប្រកាន់និន្នាការនយោបាយ សម្រាប់ការបង្កបង្កើនផលក្នុងការស្តារឡេីងវិញ នូវអ្វីដែលជាការខូតខាត ដោយជំនន់ទឹកភ្លៀងកន្លងទៅ។
លោក ហ៊ុន ម៉ាណែត បានចូលរួមសោកស្តាយចំពោះផលប៉ះពាល់ដោយសារទឹកជំនន់នាពេលកន្លងមក ដែលបង្កឲ្យខូចខាតផលដំណាំរបស់ប្រជាពលរដ្ឋ។ លោក បានថ្លែងអំណរអរគុណដល់ប្រជាពលរដ្ឋដែលស្រលាញ់សន្តិភាព និងចូលរួមថែរក្សាសន្តិភាព ក្រោមនយោបាយឈ្នះ-ឈ្នះ ក្រោមការដឹកនាំរបស់លោកនាយករដ្ឋមន្ត្រី ដែលបង្កើតឱកាសក្នុងការកសាង អភិវឌ្ឍន៍ប្រទេសឱ្យរីកចម្រើនពីមួយថ្ងៃទៅមួយថ្ងៃ។ ជាមួយគ្នានេះ លោក ហ៊ុន ម៉ាណែត បានណែនាំដល់ អាជ្ញាធរមូលដ្ឋាន ចូលរួមបង្ការ ទប់ស្កាត់នៃការឆ្លងរីករាលដាលជំងឺកូវីដ-១៩ ដោយអនុវត្តតាមវិធានការនានា និងតាមការណែនាំរបស់ក្រសួងសុខាភិបាល។
អំណោយរបស់លោកនាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី ហ៊ុនសែន សម្រាប់ចែកជូនដល់ ប្រជាពលរដ្ឋដែលរងគ្រោះដោយទឹកជំនន់នៅខេត្តកំពង់ចាម ចំនួន ៣២០០គ្រួសារ ដោយក្នុង១គ្រួសារ ទទួលបាន ស្រូវពូជ ចំនួន១០០គីឡូក្រាម និងថវិកា១០ម៉ឺនរៀល៕
