អគ្គលេខាធិការ និងជាអ្នកនាំពាក្យរដ្ឋសភាលោក ឡេង ប៉េងឡុង បានថ្លែងឲ្យដឹងនារសៀលថ្ងៃទី០៥ ខែធ្នូ ឆ្នាំ២០១៦នេះថា គណបក្សសង្គ្រោះជាតិ បានដាក់លិខិតជូនរដ្ឋសភា ដោយស្នើសុំផ្លាស់ប្តូរតំណែងប្រធាន ក្រុមតំណាងរាស្រ្តសម្លេងភាគតិចពីលោក សម រង្ស៊ី ជំនួសដោយលោក កឹម សុខា វិញ។
លោក ឡេង ប៉េងឡុង បានបញ្ជាក់ថា សមាសភាពថ្នាក់ដឹកនាំក្រុមតំណាងរាស្រ្តសម្លេងភាគតិច នៅក្នុងលិខិតដែលស្នើសុំមករដ្ឋសភានោះមាន៖ ១៖ លោក កឹម សុខា ជាប្រធាន, ទី២៖ លោក យឹម សុវណ្ណ អនុប្រធាន និងទី៣៖ យ៉ែម បុញ្ញប្ញទ្ធិ ជាសមាជិក។ ចំណែកសមាសភាពកាលពីមុខគឺ៖ លោក សម រង្ស៊ី ប្រធាន, លោក កឹម សុខា អនុប្រធាន និងលោក យឹម សុវណ្ណ ជាសមាជិក។
សូមបញ្ជាក់ផងដែរថា លោក កឹម សុខា ប្រធានស្តីទីគណបក្សសង្គ្រោះជាតិថ្មីៗនេះ ត្រូវបានព្រះមហាក្សត្រព្រះរាជទានលើកលែងទោសតាមសំណើររបស់លោកនាយករដ្ឋមន្ត្រី ហ៊ុន សែន ហើយលោក កឹម សុខា ក៏បានប្រកាសថា នៅពេលខាងមុខនេះលោកនឹងចូលរួមប្រជុំសភាបន្ទាប់ពីអវត្តមានអស់រយៈពេលប្រមាណ៥ខែមកនេះ ដោយសារជាប់ពាក់ព័ន្ធនឹងបទល្មើសជាក់ស្តែង នៃការបដិសេធមិនចូលខ្លួនក្នុងនាមជាសាក្សី ក្នុងសំណុំរឿង សញ្ចារកម្ម។ ប៉ុន្តែ នាពេលចុងក្រោយនេះ លោក កឹម សុខា ហាក់ដូចជាមានរាសីឡើងខ្ពស់ ខណៈទណ្ឌិត សម រង្ស៊ី កំពុងដាំក្បាលចុះ។ តាមរយៈតួនាទី ជាប្រធានក្រុមសភាសំឡេងភាគតិច លោក កឹម សុខា ត្រូវបានគេរំពឹងថា នឹងមានឱកាសបានជួបពិភាក្សាការងារជាច្រើនជាមួយតំណាងគណបក្សកាន់អំណាចនៅពេលខាងមុខនេះ៕
