លោក ហ៊ុន ម៉ានី ថ្លែងអំណរគុណដល់លោកគ្រូ អ្នកគ្រូ ខេត្តត្បូងឃ្មុំ ដែលជួយបង្រៀនសិស្សត្រៀមប្រឡងទុតិយភូមិដោយឥតគិតថ្លៃ

នៅថ្ងៃទី០៤ ខែឆ្នូ ឆ្នាំ២០១៦ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានថ្លែងអំណរគុណលោកគ្រូ អ្នកគ្រូ ខេត្តត្បូងឃ្មុំ ដែលបានចំណាយពេលវេលា កម្លាំងកាយ និងកម្លាំងចិត្តក្នុងការបង្រៀនវគ្គសិក្សាបំប៉នដោយឥតគិតថ្លៃ ជូនដល់សិស្សានុសិស្ស ដើម្បីត្រៀមប្រឡងសញ្ញាបត្រមធ្យមសិក្សាទុតិយភូមិកន្លងមក។
លោក ហ៊ុន ម៉ានី បានបន្តថាទឹកចិត្ត និងកាយវិការប្រកបដោយអត្ថន័យនេះ បង្ហាញនូវឆន្ទៈដ៏មោះមុតក្នុងការចូលរួមជាមួយសហភាពសហព័ន្ធយុវជនកម្ពុជា រួមចំណែកជាមួយក្រសួងអប់រំ យុវជន និងកីឡា ក៏ដូចជារាជរដ្ឋាភិបាលកម្ពុជា ក្នុងការអនុវត្តកម្មវិធីកំណែទម្រង់ លើវិស័យអប់រំ និងពង្រឹងសមត្ថភាពយុវជនជំនាន់ក្រោយដែលជាធនធានមនុស្សសម្រាប់បន្តវេន សង្គមកម្ពុជាឱ្យកាន់តែរឹងមាំថែមទៀត។

គួរបញ្ជាក់ថា លោក ហ៊ុន ម៉ានី បានថ្លែងបែបនេះ ក្នុងពិធីថ្លែងអំណរគុណលោកគ្រូ អ្នកគ្រូស្ម័គ្រចិត្តបង្រៀនវគ្គបំប៉នត្រៀមប្រលងសញ្ញាបត្រ មធ្យមសិក្សាទុតិយភូមិឆ្នាំ២០១៥-២០១៦ នៅខេត្តត្បូងឃ្មុំ នៅថ្ងៃទី០៤ ខែឆ្នូ ឆ្នាំ២០១៦៕