សម្តេចតេជោ ហ៊ុន សែន បានថ្លែងអំណរគុណដល់ប្រជាជនដែលបានបោះឆ្នោតជូនគណបក្សប្រជាជនកម្ពុជា ដែលសរបញ្ជាក់ថា ពួកគាត់បោះឆ្នោតដើម្បីជ្រើសរើសយកសន្តិភាពនិងការអភិវឌ្ឍន៍។ សម្តេចបានថ្លែងដូចនេះនៅព្រឹកថ្ងៃទី១៣ ខែមិថុនា ឆ្នាំ២០២២ ក្នុងឱកាសអញ្ជើញជាអធិបតីក្នុងពិធីបិទ និងប្រគល់សញ្ញាបត្រក្នុងវគ្គបណ្ដុះបណ្ដាលឆ្នាំ២០២០ ២០២១ និងបើកវគ្គបណ្ដុះបណ្ដាលឆ្នាំ២០២២ របស់សាលាភូមិន្ទរដ្ឋបាលជាង២ពាន់នាក់ នៅរាជធានីភ្នំពេញ។
សម្តេចតេជោ ហ៊ុន សែន ក៏បានថ្លែងអំណរគុណដល់ប្រជាពលរដ្ឋទាំងអស់ដែលបានចូលរួមទៅបោះឆ្នោតដោយស្ងៀមស្ងាត់ សេរី ត្រឹមត្រូវ និងយុត្តិធម៌ ពិសេសគឺបានអនុវត្តសិទ្ធិរបស់ខ្លួនដែលឆ្លុះបង្ហាញឱ្យឃើញពីភាពចាស់ទុំខាងនយោបាយនៅក្នុងដំណើរការប្រជាធិបតេយ្យដ៏ទៀងទាត់នៅកម្ពុជា។
សម្តេចតេជោ ហ៊ុន សែន ក៏បានគូសបញ្ជាក់ថា នៅក្នុងចំណោមគណបក្សនយោបាយចំនួន១៧គណបក្សនយោបាយ គឺសុទ្ធតែទទួលបានសម្លេងគាំទ្រទាំងអស់ គ្រាន់តែតិចឬច្រើនតែប៉ុណ្ណោះ។ ហើយអ្វីដែលជាការគួរឱ្យកត់សម្គាល់នោះ នៅក្នុងពេលយុទ្ធនាការឃោសនាហែរក្បួន ពុំមានអំពើហិង្សា និងការជេរបញ្ជោរកើតឡើងនោះឡើយ៕
