ក្នុងជំនួបដែលធ្វើឡើងនៅផ្ទះសំណាក់រដ្ឋ ក្នុងទីក្រុងណាននីង សាធារណរដ្ឋប្រជាមានិតចិន ដែល ធ្វើឡើងនៅរសៀលថ្ងៃទី១៥នេះដែរ ឯកឧត្តម Zhang Gaoli ឧបនាយករដ្ឋមន្រ្តីទី១
នៃរដ្ឋាភិបាលចិន មានប្រសាសន៍ជំរាបជូនសម្តេចតេជោនាយករដ្ឋមន្រ្តីថា កាលពីឆ្នាំ២០០៨ឯកឧត្តមបានអញ្ជើញ ទៅបំពេញទស្សនកិច្ចផ្លូវការនៅប្រទេសកម្ពុជា ហើយនៅឆ្នាំ២០១០ឯកឧត្តមបានទទួលសម្តេចតេជោនាយក រដ្ឋមន្រ្តី ដែលបានអញ្ជើញមកបំពេញទស្សនកិច្ចនៅប្រទេសចិន។ ឯកឧត្តមមានប្រសាសន៍បន្តថា កម្ពុជា ចិន គឺជាមិត្តចាស់ក្នុងនោះសម្តេចតេជោគឺជាមិត្តដ៏ល្អរបស់ប្រទេស និងប្រជាជនចិន។
សម្តេចតេជោនាយករដ្ឋមន្រ្តីមានប្រសាសន៍ថា នេះគឺជាការអញ្ជើញមកចូលរួមការតាំងពិព័រណ៌ចិន - អាស៊ាន លើកទី៨ នៅទីក្រុងណាននីងរបស់សម្តេច ដែលនោះត្រូវបានចាត់ទុកថា គឺជាព្រឹត្តិការណ៍ប្រវត្តិ សាស្រ្តថ្មីមួយទៀត នៃទំនាក់ទំនងកម្ពុជា ចិន ក៏ដូចជាទំនាក់ទំនងចិន អាស៊ាន។ ក្នុងជំនួបពិភាក្សាគ្នានោះ ដែរ សម្តេចតេជោនាយករដ្ឋមន្រ្តីមានប្រសាសន៍លើកឡើង ពីគំរោងរបស់កម្ពុជាក្នុងការប្រើប្រាស់ជំនួយឥត សំណង៧០០លានយ័ន និងកម្ចីឥតការប្រាក់ចំនួន២០០លានយ័ន ដែលសម្តេចតេជោនិងឯកឧត្តមប្រធា នាធិបតីចិន ស៊ី ជិនពីង បានពិភាក្សាគ្នាក្នុងដំណើរទស្សនកិច្ចរបស់សម្តេចទៅកាន់ទីក្រុងសៀងហៃ កាលពី ខែឧសភាកន្លងទៅ។ សម្តេចតេជោនាយករដ្ឋមន្រ្តីមានប្រសាសន៍ថា កម្ពុជានឹងប្រើប្រាស់ជំនួយទាំងនោះ ដើម្បីក្នុងការកសាងអគារពហុកីឡាដ្ឋានជាតិអូរឡាំពិកថ្មី កសាងអគាររដ្ឋបាលសាលាខេត្តត្បូងឃ្មុំ កសាង មជ្ឈមណ្ឌលការពារជំងឺឆ្លង និងបញ្ហាជាក់ស្តែងដទៃទៀត ដែលកម្ពុជាកំពុងត្រូវការជាបន្ទាន់នោះ។ ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្រ្តីបានស្នើដលើភាគីចិន បន្តរក្សានូវអត្រាការប្រាក់១,២៥% ក្នុង១ឆ្នាំសំរាប់រាល់កម្ចីរបស់កម្ពុជា។ ជាមួយគ្នានេះសម្តេចតេជោបានស្នើដល់ភាគីចិន ផ្តល់នូវឥណទាន
ដល់កម្ពុជា ក្នុងការពង្រឹងដល់វិស័យគមនាគមន៍ និងសន្តិសុខជាតិសំរាប់កម្ពុជា។ ជាមួយគ្នានេះ សម្តេចតេជោក៏បានស្នើដល់ភាគីចិន ជួយសាងសង់ឃ្លាំងរក្សាស្តុកស្រូវអង្ករដល់កម្ពុជា សំដៅធ្វើយ៉ាងណា ឲ្យកម្ពុជា
ឈានទៅសំរេចបាននូវការនាំអង្ករចេញឲ្យបាន១លានតោននៅឆ្នាំ២០១៥ខាងមុខ។ តាមរយៈនោះដែរ សម្តេចតេជោនាយករដ្ឋមន្រ្តីក៏បានស្នើដល់ភាគីចិន ជួយទិញនូវកសិផលមួយចំនួនដូចជា ពោត សណ្តែកសៀង កៅស៊ួ អង្ករ ចេក ស្វាយ ពិសេសជួយជំរុញការនាំចូលមកកាន់ប្រទេសចិនដោយគ្មានកូតា គ្មានកំណត់ចំនួន និងដោយគ្មានការបង់ពន្ធនៃការនាំចូលប្រទេសចិន។
ឯកឧត្តមឧបនាយករដ្ឋមន្រ្តីចិន Zhang Gaoli មានប្រសាសន៍គាំទ្រចំពោះគំរោងនៃការប្រើប្រាស់ ជំនួយឥតសំណង និងកម្ចីគ្មានការប្រាក់របស់ប្រទេសកម្ពុជា ក្នុងការកសាងអគារពហុកីឡាដ្ឋានជាតិអូរឡាំពិកថ្មី អគាររដ្ឋបាលសាលាខេត្តត្បូងឃ្មុំ និងមជ្ឈមណ្ឌលការពារជំងឺឆ្លងដែលជាបញ្ហាជាក់ស្តែងរបស់កម្ពុជា។
ឯកឧត្តមមានប្រសាសន៍បន្តថា ភាគីចិននិងពិនិត្យលើគំរោងដែលបានលើកឡើងដោយភាគីកម្ពុជា ដែល ភាគីទាំងពីរត្រូវតែសហការគ្នាជាបន្តទៀត។ ជាមួយគ្នានេះឯកឧត្តមក៏បានគាំទ្រ និងស្វាគំន៍ចំពោះការនាំចូល និងទិញនូវកសិផលបន្ថែមទៀតពីប្រទេសកម្ពុជា ដែលក្នុងនោះឯកឧត្តមនឹងស្នើដល់ក្រសួងពាណិជ្ជ កម្ម និងគយរបស់ប្រទេសចិន ធ្វើការសិក្សាដៀម្បីឈានទៅការទិញកសិផលបន្ថែមពីកម្ពុជា។