សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្ញើសារនយោបាយចេញពីខេត្តព្រះសីហនុ ដោយបានអំពាវនាវទៅកាន់អាជ្ញាធររាជធានីខេត្ត ទូទាំងប្រទេស ឲ្យផ្តល់សិទ្ធិស្នើគ្នាក្នុងការធ្វើបាតុកម្ម ទាំងអ្នកគាំទ្ររាជរដ្ឋាភិបាល និងទាំងអ្នកប្រឆាំងរាជរដ្ឋាភិបាល។ ប៉ុន្តែសម្តេចតេជោក៏បានព្រមានផងដែរ ដល់អ្នកដឹកនាំ ឬក៏ការញុះញង់ឲ្យមានបាតុកម្មកូដកម្ម ពិសេសកូដកម្មរបស់កម្មកររោងចក្រ ដែលអាចឈានដល់ការបិទរោងចក្រនោះ គឺត្រូវទទួលខុសត្រូវលើកម្មករ ដែលមិនមានការងារធ្វើ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការ ស្ថានីយអគ្គិសនីដុតធ្យូងថ្មកម្លាំងអនុភាព ១០០ ម៉េហ្គាវ៉ាត់ និងខ្សែបញ្ជូនអគ្គិសនី ២៣០ គីឡូវ៉ុល ភ្នំពេញ-កំពង់ចាម នៅឃុំកំពេញ ស្រុកស្ទឹងហៅ ខេត្ត
ព្រះសីហនុ នាព្រឹកថ្ងៃទី២៥ ខែកុម្ភៈ ឆ្នាំ២០១៣ សម្ដេចតេជោនាយករដ្ឋមន្ត្រីបានមានប្រសាសន៍បញ្ជាក់ថា ឥឡូវនេះខ្ញុំមិនសំណូមពរឲ្យធ្វើបាតុកម្មទេ តែខ្ញុំគ្រាន់តែមិនឃាត់ ព្រោះសិទ្ធិមានដូចគ្នា។ សម្តេចតេជោមានប្រសាសន៍ថា អ្នកប្រឆាំងក៏មានសិទ្ធិ អ្នកគាំទ្រក៏មានសិទ្ធិ ខ្ញុំក៏មិនធ្វើតាមប្រធានាធិបតីវេណាហ្សូអេឡាដែរ ដោយប្រធានាធិបតីរូបនេះ បានអំពាវនាវឲ្យអ្នកគាំទ្រគាត់ចេញមកធ្វើបាតុកម្មតែម្ដង ឯខ្ញុំអត់អំពាវនាវទេ ខ្ញុំគ្រាន់តែផ្ដល់សិទ្ធិស្មើគ្នាតែប៉ុណ្ណោះ។
សម្តេចតេជោសែន បានមានប្រសាសន៍ថា ខ្ញុំព្រះករុណាខ្ញុំជានាយករដ្ឋមន្ត្រីនៃព្រះរាជាណាចក្រកម្ពុជា ត្រូវធានាសុវត្ថិភាពឲ្យទាំងអស់គ្នា ធានាទាំងសិទ្ធិជួបជុំទាំងអស់គ្នា។ សម្តេចតេជោបានលើកឧទាហរណ៍បញ្ជាក់ថា ត្រូវទៅទីលានប្រជាធិបតេយ្យបើសិនទាំងសងខាងសុំទីលានប្រជាធិបតេយ្យ សាលារាជធានីភ្នំពេញត្រូវត្រៀមចែកជាពីរឲ្យហើយទៅ ម្ខាងអ្នកគាំទ្រ និងម្ខាងអ្នកប្រឆាំង។ “ច្បាស់ណាស់ ខ្ញុំឮសំឡេងខាងមុខនេះ វានឹងកើតមានការស្នើសុំធ្វើបាតុកម្ម បើអ្នកឯងដាក់ពាក្យសុំសិទ្ធិធ្វើបាតុកម្ម ខាងគាំទ្រក៏សុំដែរ បើដូច្នេះទីលានប្រជាធិបតេយ្យត្រូវត្រៀមចែកជាពីរទៅ ព្រោះបើឲ្យៗទាំងពីរបើមិនឲ្យៗទាំងពីរ ព្រោះតែបាតុកម្មមានចរិតនយោបាយវាមានអ្នកគាំទ្រ វាមានអ្នកប្រឆាំងហើយ”។
សម្តេចតេជោនាយករដ្ឋមន្ត្រីបានមានប្រសាសន៍ថា ខ្ញុំសូមផ្ដាំទៅអាជ្ញាធរគ្រប់ទីកន្លែង បើក្រុមប្រឆាំងមានសិទ្ធិ ក្រុមអ្នកគាំទ្រក៏មានសិទ្ធិដែរ ហើយប្រសិនបើនៅភ្នំពេញវាមានតែមួយកន្លែង វាមិនដឹងជាបញ្ចៀសទៅឯណា? ដូច្នេះមើលទៅទីលានប្រជាធិបតេយ្យត្រូវធ្វើរបងឲ្យហើយទៅ ខ្ញុំគ្រាន់តែឲ្យជាយោបល់ ហើយក៏ឲ្យអ្នកដទៃភ្លឺភ្នែកដែរ កុំឲ្យចេះប្រើសិទ្ធិតែឯង។ សម្តេចតេជោមានប្រសាសន៍បញ្ជាក់ថា ឥឡូវបាតុកម្មវាមានពីរហើយ អ្នកគាំទ្រក៏មានសិទ្ធិ អ្នកប្រឆាំងក៏មានសិទ្ធិ សិទ្ធិដូចគ្នា សិទ្ធិទល់សិទ្ធិ ព្រោះនេះកុំឲ្យវាមានតែម្ខាង ឆន្ទៈទល់ឆន្ទៈ។
ពាក់ព័ន្ធទៅនឹងអ្នកដឹកនាំ ឬក៏ញុះញង់ឲ្យមានបាតុកម្មកូដកម្ម ពិសេសកូដកម្មរបស់កម្មកររោងចក្រ ដែលអាចឈានដល់ថៅកែបិទរោងចក្រនោះ សម្តេចតេជោមានប្រសាសន៍ឲ្យដឹងថា យើងខិតខំថ្នាក់ថ្នមវិនិយោគិន ឲ្យមកបណ្តាក់ទុននៅស្រុកខ្មែរ តាមរយៈការបង្កលក្ខណៈវិស័យកាត់ដេរ និងស្បែកជើងមកដំណើរការ គេបានរើរោងចក្រពីបណ្តាប្រទេសនានា ដែលមានតម្លៃពលកម្មខ្ពស់ពេលមកកាន់ទីតាំងយើងដែលមានតម្លៃពលកម្មសមល្មម។ សម្តេចតេជោបញ្ជាក់ថា យើងបានខិតខំខ្លាំងណាស់ ដើម្បីធ្វើយ៉ាងណាឲ្យតម្លៃដើមផលិតមានភាពអនុគ្រោះសម្រាប់ឲ្យម្ចាស់រោងចក្រផលិត ហើយខិតខំដំឡើងបៀវត្សអប្បបរមា និងកម្រៃផ្សេងៗឲ្យកម្មករក្នុងវិស័យកាត់ដេររបស់យើង ប៉ុន្តែយើងបែរក្លាយខ្លួនជាអ្នកទោស ឯអ្នកដែលមានគុណសម្បត្តិ គឺជាអ្នកដែលដើរសន្យាឲ្យប្រាក់ខែខ្ពស់ទៅវិញ សម្តេចតេជោសែនបានមានប្រសាសន៍បញ្ជាក់ថា គឺត្រូវទទួលខុសត្រូវលើកម្មករ ដែលមិនមានការងារធ្វើ។
សម្តេចតេជោមានប្រសាសន៍បញ្ជាក់ឲ្យដឹងថា យើងនឹងរង់ចាំមើលរោងចក្រណាដែលបិទទ្វារដោយសារបាតុកម្ម ឬកូដកម្មដំឡើងប្រាក់ខែ នៅពេលដែលរោងចក្រត្រូវបិទទ្វារ សូមអញ្ជើញកម្មករ កម្មការិនីមេត្តាធ្វើបាតុកម្មទាមទារឲ្យអ្នកដែលញុះញង់ហ្នឹងរក ការងារឲ្យធ្វើទៅ ហើយនេះជា តម្រិះជិះកឯងហើយ។
សម្ដេចតេជោនាយករដ្ឋមន្ត្រី ក៏បានមានប្រសាសន៍ឲ្យដឹងផងដែរ លើការសន្យារបស់មេដឹកនាំគណបក្សនយោបាយប្រឆាំង ដែលដើរឃោសនាលើការបញ្ចុះតម្លៃភ្លើងអគ្គិសនីឲ្យចុះថោក ខណៈដែលគណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាលជាអ្នកទាក់ទាញអ្នកវិនិយោគឲ្យមកបើករោងចក្រផលិតអគ្គិសនី ឬក៏វារីអគ្គិសនី ដែលនាំឲ្យមានការបញ្ចុះតម្លៃអគ្គិសនីនៅក្នុងប្រទេសកម្ពុជា។
ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពលបានឱ្យដឹងថា ក្នុងវិស័យអគ្គិសនី ការអភិវឌ្ឍ ហេដ្ឋារចនាសម្ព័ន្ធមូលដ្ឋានសម្រាប់ការផ្គត់ផ្គង់អគ្គិសនី ក្នុងរយៈពេលកន្លងមក មានការរីកចម្រើនគួរ ឱ្យកត់សម្គាល់ ទាំងប្រភពអគ្គិសនី ទាំងអនុស្ថានីយ និងបណ្ដាញអគ្គិសនីគ្រប់ប្រភេទ។ បច្ចុប្បន្នគោលដៅរបស់ក្រសួង រ៉ែនិងថាមពល ក្នុងការដឹកនាំវិស័យថាមពលអគ្គិសនី គឺមិនត្រឹមតែខិតខំជំរុញការអភិវឌ្ឍលើគ្រប់ផ្នែក នៃការផ្គត់ផ្គង់អគ្គិសនី ដើម្បីធ្វើយ៉ាងណាឱ្យប្រទេសកម្ពុជា មានប្រភពអគ្គិសនីគ្រប់គ្រាន់ មានបណ្ដាញអគ្គិសនី នៅទីណាក៏ដោយអាចភ្ជាប់ចរន្តប្រើប្រាស់បានប៉ុណ្ណោះទេ តែក៏នឹងខិតខំរៀបចំធ្វើយ៉ាងណាឱ្យសេវាផ្គត់ផ្គង់អគ្គិសនីនៅកម្ពុជា កាន់តែមានគុណភាព មានស្ថិរភាព មានសុវត្ថិភាព មិនមានថ្លៃកាន់តែ សមរម្យឡើងផងដែរ។ ដើម្បីសម្រេចគោលដៅនេះ ពេលកន្លងមក ក្នុងក្របខ័ណ្ឌនៃយុទ្ធសាស្ត្រចតុកោណរបស់រាជរដ្ឋាភិបាល អតីតក្រសួងឧស្សាហកម្ម រ៉ែ និងថាមពល បានជំរុញការអភិវឌ្ឍវិស័យអគ្គិសនីលើគ្រប់មុខព្រួញ ទាំងប្រភពអគ្គិសនី អនុស្ថានីយបណ្ដាញ បញ្ជូនតង់ស្យុងខ្ពស់ តង់ស្យុងមធ្យម និងបណ្ដាញចែកចាយអគ្គិសនីនៅតំបន់ទីក្រុង និងតំបន់ជនបទ ដោយបើកទូលាយ ឱ្យមានការចូលរួមវិនិយោគរបស់ផ្នែកឯកជន ទាំងអ្នកវិនិយោគ ក្នុងស្រុក និងទាំងអ្នកវិនិយោគក្រៅស្រុកបន្ថែមពីលើលទ្ធភាពវិនិយោគរបស់រដ្ឋ៕
No comments:
Post a Comment