មន្រ្តីកាំកុងត្រូលតំបន់សេដ្ឋកិច្ចពិសេសភ្នំពេញ បន្តយុទ្ធនាការចុះត្រួតពិនិត្យផលិតផល នៅក្នុងខណ្ឌសែនសុខ

ដោយគិតពីបញ្ហាសុវត្ថិភាពសុខភាពជាចំបង នៅក្នុងរដូវបុណ្យភ្ជុំបិណ្ឌនោះ សាខាកាំកុងត្រូលតំបន់សេដ្ឋកិច្ច ពិសេសភ្នំពេញ ដឹកនាំដោយលោក ទី រ៉ូនី ប្រធានសាខាទទួលការិយាល័យប្រមូលចំណូល និងទីផ្សារ នៅព្រឹក ថ្ងៃទី១៤ ខែកញ្ញា ឆ្នាំ២០១៧នេះ សហការជាមួយមន្រ្តីមន្ទីរពាណិជ្ជកម្ម រាជធានីភ្នំពេញ បានចុះត្រួតពិនិត្យ ផលិតផលចំណីអាហារ និងគ្រឿងភេសជ្ជៈគ្រប់ប្រភេទ នៅក្នុងផ្សារទឹកថ្លា និងម៉ាតកាល់តិច ស្ថិតនៅសង្កាត់ ភ្នំពេញថ្មី ខណ្ឌសែនសុខ។

លោក ទី រ៉ូនី បានឱ្យដឹងថា ការចុះត្រួតពិនិត្យនេះ គឺពិនិត្យទៅលើផលិតផល ចំណីអាហារវេចខ្ចប់ជាផ្លាស្ទិក ដាក់កំប៉ុង និងគ្រឿងអាហារក្រៀមមួយចំនួនទៀត ដែលកំពង់ចរាចរ ដាក់លក់នៅក្នុងផ្សារទឹកថ្លា និងតាម ម៉ាតកាល់តិច។ ពេលចុះត្រួតពិនិត្យមន្រ្តីកាំកុងត្រូល បានធ្វើការត្រួតពិនិត្យ រកមើលកាលបរិច្ឆេទ ហួស សុពលភាព ដើម្បីដកហូតយកទៅកម្ទេចចោល។

ជាមួយគ្នានេះ ក្រុមការងារក៏បានបិទស្ទិកគ័រ បង្ហាញពីរូបគ្រឿងកំប៉ុងដែលគួរយកប្រើប្រាស់ និងមិនត្រូវយក មកបរិភោគ ដល់បងប្អូនអាជីវករ និងប្រជាពលរដ្ឋ ដើម្បីយល់ដឹងពីផលប៉ះពាល់ដល់សុខភាពផងដែរ ។
លោកប្រធាន បានណែនាំដល់អ្នក់លក់ និងអ្នកទិញត្រូវដឹងពីអត្តសញ្ញាណ ប្រភពអាស័យដ្ឋានរបស់អ្នកដែល យកមកលក់ឱ្យខ្លួន ឬវិក្កយបត្រ ទូទាត់ឱ្យបានត្រឹមត្រូវ ជាព័ត៌មាន ដើម្បីបង្កលក្ខណៈងាយស្រួល ដល់សមត្ថ កិច្ចកាំកុងត្រូលក្នុងការចុះស្រាវជ្រាវ និងតាមដាន ដើម្បីមានវិធានការ ទៅតាមច្បាប់ ចំពោះអ្នកលក់ ឬអ្នកចែក ចាយផលិតផលនេះ។

ក្នុងពេលចុះត្រួតពិនិត្យគុណភាពទំនិញនោះលោក ទី រ៉ូនី បានសរសើរដល់អាជីវករ ដែលបានយល់ពីផលប៉ះ ពាល់សុខភាព ដោយដាក់លក់នូវផលិតផលនំ ចំណី អាហារ មានលក្ខណៈល្អ មិនលក់គ្រឿង ដែលហួស សុពលភាព ឬផលិតផលបែក បាក់កំពិតនោះទេ។

ជាមួយគ្នានេះ លោកក៏បានអប់រំ និងអំពាវនាវ ដល់អាជីវករអ្នកលក់ដូរទាំងអស់ឱ្យប្រុងប្រយ័ត្ន និងយកចិត្តទុក ដាក់ខ្ពស់ គឺលក់ដូរនិងចែកចាយតែទំនិញ ផលិតផលម្ហូបអាហារណាដែលមានគុណភាព មិនប៉ះពាល់ដល់ សុខមាលភាព អ្នកប្រើប្រាស់។

ក្រោមការណែនាំពីសំណាក់លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកជាអគ្គនាយកកាំកុងត្រូល នៃក្រសួងពាណិជ្ជកម្ម សាខាកាំក្រុងត្រូល នៅទូទាំងប្រទេស បាននិងកំពុងបន្តយុទ្ធនាការចុះត្រួតពិនិត្យ មើលទំនិញដែលដាក់តាំងលក់តាមទីផ្សារ ដើម្បីចូលរួមចំណែក លើការការពារ សុវត្ថិភាពចំណីអាហារ ដល់ប្រជាពលរដ្ឋ ៕